لا بحبك ولا قادر علي بعدك !!!

[ابو خليل]

خلصت الاجازة خلاص !

راجع ا لرياض يوم الأربعاء خلاص !!

أول ما جيت مصر كنت قرفان من الزحمةو سوء المعاملة والفقر والناموس والمجاري والمكروباسات ... و سب الدين في الشوارع ... وكان نفسي اسيب مصر بسرعة ..

والنهاردة .. مش قادر علي فراق مصر ؟؟؟

mf(

منتهي التناقض

وافتكرت صلاح جاهين بيقول :

على اسم مصر التاريخ يقدر يقول ما شاء

أنا مصر عندي أحب وأجمل الأشياء

باحبها وهي مالكه الأرض شرق وغرب

وباحبها وهي مرميه جريحة حرب

باحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلقيني جنبها في الكرب

والنبض ينفض عروقي بألف نغمة وضرب

على اسم مصر

ومش عارف العيب في مين ؟

فيه انا ..

ولا في مصر ؟؟

[Abouhemeed]

أبو خليل

العيب في السعودية

نظافة و فلوس و ناس في حالهم و قرب من المقدسات وإحساس بالغربة و حنين للعودة ... إلخ

و إحنا ناس ما اتعودناش على كده

;) ;)

[Tafshan]

cbyb: cbyb: cbyb:

مش عارف ليه عينية دمعت من كلمات جاهين ... وحشتني بنت الايه !!

انا بقالي سنتين و نص ما نزيلتش ، و لسه ح انزل الصيف الي جاى ، عارف ان مصر مش نظيفة زي دبي و عارف انها زحمة و عارف .... كل حاجة خرجتني منها ، بس و حشاني !

انا بأكتب بالعامية المصرية على شان بقالي كثير ما اتكلمتش بيها ، عارفين انا جاي على بالي ايه؟ ، اروح اضرب سندوتش سجق من عند "زيزو نتانة!" في باب الفتوح ، حد يعرفه ؟؟ انا عارف ان كثير منكم يعرفوه و بعدين اعدي علي المالكي اخذ واحد رز بلبن شبح و بعدين علي الاجزخانة اشوف حاجة تهضم الي اكلته !!!

نفسي ف كوباية شاي كشري علي قهوة في فيصل بنفس المعلقة المثنية و طبق السكر الملزق و حجر القص المتين و 5 من صحابي يكونوا قاعدين و اقابلهم من غير ميعاد و نديها طاولة لحد الصبح ..

و الله الزباله في مصر بريحتها احلى و اجمل من النظافة و البرفانات الهنا