25 يناير ,, موعد المصريين

[hOuSsAm]

تاني نغمة الخضوع واحناء الرأس للحاكم الظالم رجعت تاني

الايدلوجيه دي خلاص افلست و انكشفت ادام كل المصريين ,,وبقت صوت نشاز لطائر يغرد خارج السرب

الساكت عن الظلم شيطان اخرس

ودم الشهيد سيد بلال مش حيروح بلاش

ان شاا ء الله

خضوع أيه يا بشمهندس

شوية هدوء وتروي الله يكرمك ، دي بلد مش شركة

مصر فيها فرضيات كثيرة للغاية

لا أحد يختلف على التغيير ولكن الأسلوب لازم يكون بعقل شوية

انا مع الغريب وضحى فى الراى ده

لو الموضوع متوقف عالمثقفين فسهل التحكم فيه

لكن فيه اطراف تانية بتدخل فى الموضوع مش واعية بيه

هيبقى تفكير جزء كبير فى السرقة والتكسير ونهب ممتلكات الحكومة والشركات وحتى الافراد

افتكروا وقفة 6 ابريل والدمار اللى حصل فى المحلة

وغيرها حجات كتيرة استغلها ضعاف النفوس فى سرقة المبانى العامة من مدارس ومجالس محلية

وهتحصل حالة فوضى غير عادية فى البلد

لازم لو حد اتحرك يكون التحرك حكيم وبوعى

مش زيطة وهيصة وخلاص

بقالنا 30 سنه

عملتم ايه

قاعدين بتتفرجوا

فلوس بتتنهب

شهداء بتسقط

بلد رايحه لفتنه طائفيه اي حادثه حتنقلب مجزره

عقول بتهاجر عشان البلد اتشفطت لحد ما خربت

من رأى المنكر فليغيره بيده

او بلسانه

اضعف الايمان ما يلزمنيش

اهو الفتنة الطائفية دى ممكن تحصل لو الانفلات ده حصل

خلى بالك هى كحكة وكل فئات المعارضة عايزة تاخدها

وهيدخلوا فى حروب مع بعض عشان كل واحد يكسب الكحكة

ربنا يسترها يا هندسة :)

[م تيمور المراغي]

خايفين

خايفين

خايفين

ليهم كل الحق في اللي قالوه علينا ,,

[hOuSsAm]

سيداتي وآنساتي في المحاورات

انتم على الرأس والخاطر ونفديكم ونذود عنكم

لكن الثورة انما خلقت للرجال

و بوعزيزي الهمنا ان حياة الفرد قد تكون ثمنا رخيصا جدا لكرامة شعب

ياعم تيمور مش كدة

يعنى عجبك المساجين اللى هربوا من السجن فى تونص

وعجبك العصابات اللى بتقلب الناس ليل نهار

بصراحة متفق مع العنبى تماما (ومنبقاش قاعدين هنا فى الامان ونسخن الناس هناك عالبلد) وهما يموتوا هناك ويضحوا واحنا مستنين هنا بنتفرج)

بجد كنت هحيك لو كنت واقف هناك وسط الجماهير مش بتوجه وخلاص وكان عندك رؤية الموضوع هيمشى ازاى مش انقلاب وخلاص

[م تيمور المراغي]

انا جزء من حمله مئات الاولف دخلوا فيها بالفعل

مجموعه عليهم نشر الفكره

ومجموعه تانيه في مصر يا حسام واقفه زي ما انت طالب مني دلوقتي بالظبط

يعني اعتبرني الله يخليك واقف بنفسي وسطهم

لانهم طلبوا مني انضم ليهم بقلمي

وانا وافقت

تحيتي لكل من رفض الانضمام

مع شيئ من رقيق العتاب ,,

[hOuSsAm]

خايفين

خايفين

خايفين

ليهم كل الحق في اللي قالوه علينا ,,

احنا ممكن نعمل زيك ونسخن الناس

وننزل عالمنتديات والفيس بوك ونبعت رسايل ونهيج الناس

وبردوا زيك قاعد هنا فى الامان تحت التكييف ولا عندى اى مشكلة لو خربت او ولعت

بس ساعتها يعنى هنبقى مبسوطين (وننزل كمغتربين نحتفل بالنصر)

البسالة يا بشمهندس مش انك تحارب بايدى الاخرين وانما البسالة تنزل وترفع سلاحك

عايز تسخين بقى وتضحية

احجز تذكرة وخد اجازة من الشغل يومين تلاتة وانزل حارب

هو يعنى كلام وتسخين وخلاص

ومفيش حسابات منطق (مين بقى اللى بيقولوا علينا وبيقولوا ايه؟)

[doha]

خايفين

خايفين

خايفين

ليهم كل الحق في اللي قالوه علينا ,,

خلاص مش حضرتك بتقول ان ان اوان التغيير وانك مش راضي باضعف الايمان .. مصر من جده مش بعيده وكلها تذكرة باقل من الف ريال وتكون مشارك مش بس بيدك على الكيبورد وانما كتفك بتف زملائك الي بتدعوهم دلوقت للخروج في المظاهرات ..

انا مش بقلل من شأنك ولا بحاول اتهكم ولكني بس بصور لك الواقع بعيدا عن الشعارات والحماسه الزائده اوي الي واخداك من الصبح ومخلياك تخبط يمين وشمال في كل من يدعوا للتهدئه والتعقل ..

شايف ان الي بيحصل ده صح والاهم انه هيجيب نتيجه خلاص قاعد عندك مستني ايه .. من بكرا اقطع على اول طياره نازله مصر وانزل شارك فيه وان كان على شغلك طز .. مهي مصر الخضرا الي هتبدأ اول صفحه في تاريخها يوم 26 بعد الثورة الي حضرتك جزء من الاف على حد قولك بتدعوا ليها هيبقى فيها ملايين الاماكن للعاطلين والمهمشين وهتطلعنا كلنا فوق .. فوق .. سيب شغلك وارجع مصر وشارك في الي بتدعوا بحماسه غيرك للمشاركه فيه ومتكونش من الجبناء الخايفين الي زي حالاتنا الي بيقولوا قليلا من التعقل وماهكذا تورد الابل ..

اذا مكنتش مالي ايدك بالدرجه الكافيه انك تضحي بوظيفتك وتنزل تشارك بجد مش بس بالكلام من خلف الكيبورد يبقى ياريت تبطل تسخن غيرك الي ممكن فعلا يشاركوا وممكن فعلا يضحوا بحياتهم على غير طائل وممكن جدا يكونوا مسامير عماله تدق بعنف في نعش الوطن ..

كفايه بقى وياريت نبقى قد كلامنا الي بنقوله مش جعجعه ومفيش طحن ..

متاكد من الي بتدعوا ليه خلاص هات دقيقك واطحن ياسيدي ..

[م تيمور المراغي]

احنا ممكن نعمل زيك ونسخن الناس

وننزل عالمنتديات والفيس بوك ونبعت رسايل ونهيج الناس

وبردوا زيك قاعد هنا فى الامان تحت التكييف ولا عندى اى مشكلة لو خربت او ولعت

خلاص مش حضرتك بتقول ان ان اوان التغيير وانك مش راضي باضعف الايمان .. مصر من جده مش بعيده وكلها تذكرة باقل من الف ريال وتكون مشارك مش بس بيدك على الكيبورد وانما كتفك بتف زملائك الي بتدعوهم دلوقت للخروج في المظاهرات ..

انا مش بقلل من شأنك ولا بحاول اتهكم ولكني بس بصور لك الواقع بعيدا عن الشعارات والحماسه الزائده اوي الي واخداك من الصبح ومخلياك تخبط يمين وشمال في كل من يدعوا للتهدئه والتعقل ..

انا جزء من حمله مئات الالوف دخلوا فيها بالفعل

مجموعه عليهم نشر الفكره

ومجموعه تانيه في مصر يا حسام واقفه زي ما انت طالب مني دلوقتي بالظبط

يعني اعتبرني الله يخليك واقف بنفسي وسطهم

لانهم طلبوا مني انضم ليهم بقلمي

وانا وافقت

تحيتي لكل من رفض الانضمام

مع شيئ من رقيق العتاب ,,

[لماضة مصرية جدا]

السلام عليكم و رحمة الله و بركاته

و سايبني اكتب مداخلة طويلة عريضة و اترافع فيها عن دور المغتربين و بتاع

أنا مكنتش قريت التوبيك بتاع استاذ اركتيكت بتاع 25 يناير

ليه يا عنبي محطتشي ردك هناك.....الدنيا كانت هتبقي اسهل يا ابني يا ضنايا

اصلي حاسة من الصبح كل ما اخش موضوع الاقي سيرة "المغتربين"....و انا مش هدافع و لا هتكلم...لان الموضوع ده مش وقته خالص...مش وقت ان احنا نتبادل الاتهامات و لا نزايد علي احلامنا و لا وطنيتنا....و اي حد دلوقتي هيقول انا بحبها اكتر منك....(يبقي مش هنصدق الاتنين اصلا...ارتاحوا بقي)

انا مع الراي ان احنا نستني لما نشوف الصورة كلها علي بعضها كاملة و نستوعب ايه اللي حصل بالظبط

و بعد كده نبقي نشوف بقي....حكاية دور المغترب ديت...انا عايزة حد يشيل مداخلتي يا جدعان او ع الاقل يفكرني بيها....لما نبقي نتكلم عن دور المغترب....بين الاصالة و الحداثة ....(اصل اكيد هنتكلم...اومال مش احنا في مكلمة)

عشان خاطري......(وش اي ام بتدعي لولادها و هي ماسكة كيس الشاندوشتات).....خلينا نركز في التجربة اللي قدامنا شوية...نطلع منها بفكرة تزقنا لقدام احسن ما نغرس مطرحنا

[doha]

لانهم طلبوا مني انضم ليهم بقلمي

وانا وافقت

لا ياسيدي الفاضل .. قلمك زي تعاطفك لوحده مش كفايه .. اتبرع ولو بلتر دم مينفعش ابدا الجهاد الانترنتي ده ..

انت دلوقت داخل ضمن حملة تسخين بتقول للناس طبقوا التجربة التونسيه انتم مش اقل منهم .. يعني انزلوا الشوارع تصادموا مع الجيش والشرطه احرقوا وولعوا وشوفوا ايه اخرتها .. بتقول للناس دمكم رخيص قصاد الي ممكن تكسبوه .. في حاله زي دي معليش يعني كلامك مهما كان مهم صوتك مهما كان مؤثر فحبرك لوحده مش كفايه ابدا وانت بتقول للناس ابذلوا الدم ..

مقتنع ان ( حملتكم ) هتجيب نتيجه خلاص انزل شارك فيها بشحمك ولحمك واركن ( قلمك ) دلوقت على جنب اصل في عشرات الاقلام غيرك ومئات والاف الشباب المتحمسين الي شايلين قضية القلم دي على اكتافهم ومساهمين .. الاقلام كترت اوي في الآونة الاخيرة وصدقني لوحدها مش كفايه .. مقتنع بالي بتقول فيه فضحي بحاجه اكتر من بعض دقائق تقضيها في التسخين وتنصرف بعدها لاحتساء الشاي .. انزل بنفسك واركن القلم دلوقت خالص على جنب .

عموما .. كنت فاقده الامل في نتائج الدعوات المماثلة على الانترنت واصبحت الآن اكثر فقدا للامل ـ والثقة ـ لما اكتشفت ان غالبية المشاركين فاكرين انهم بكده بيعملوا الي عليهم ومكتفين بالشعور الزائف بالاهمية الي بيصبغه انضمامهم لمثل هذه الحملات .. وهي في الآول والآخر بتطلع ( طز ـ فش ) .. للاسف واضح ان قطاع عريض بيدفعه الحماس والحماس فقط بدون اي تفكير او دراسه لعواقب الامور ..

[محمد عبدالعزيز]

سؤال وأحب أسمع إجابتكم عليه

إيه الفرق بين إنى أموت فى مظاهرة أو احتجاجات أو نتيجة الفوضى اللى محتمل تحصل

وبين الآتى:

إنى أموت بالسرطان من الأكل المسرطن

أو نتيجة فشل كلوى من مياه الشرب

أو نتيجة أمراض نفسية من الوضع اللى احنا عايشينه واللى بترفع الضغط وتجيب السكر وتشيب الشباب

أو فى حادثة مرورية نتيجة الفشل الحكومى فى تنظيم المرور وتحقيق الانضباط والإهمال فى صيانة الطرق

أو أموت غرقان فى عبارة صاحبها مسنود

أو أموت فى قطر محروق نتيجة الإهمال

أو أموت فى عمارة مخالفة مبنية تحت سمع وبصر الحى و تم الطرمخة عليها

أو أموت فى مستشفى نتيجة الإهمال الطبى وتدهور مستوى التعليم فى كل المجالات

أو أموت من التعذيب فى قسم الشرطة وممكن أكون برئ

أو أموت كمداً وغيظاً لما ما اقدرش اخد حقى بعد ما تثبت براءتى

أو إنى أموت من الانتظار كمان 30 سنة لما نتغير كلنا ونبقى أحسن -ومين يضمنها دى- عشان أتجنب إنى أموت فى مظاهر أو احتجاج أو نتيجة الفوضى اللى محتمل تحصل :)

[akramgroup]

انا جزء من حمله مئات الالوف دخلوا فيها بالفعل

مجموعه عليهم نشر الفكره

ومجموعه تانيه في مصر يا حسام واقفه زي ما انت طالب مني دلوقتي بالظبط

يعني اعتبرني الله يخليك واقف بنفسي وسطهم

لانهم طلبوا مني انضم ليهم بقلمي

وانا وافقت

تحيتي لكل من رفض الانضمام

مع شيئ من رقيق العتاب ,,

لا لا لا يا ارش

فى وجهة نظرى غلط اللى انت بتعمله ده

شوف كام واحد دخل انهارده على المنتدى وشاف اللى انت بتقوله واتنقل لكام واحد كلامك

الموضوع صدقنى مش هزار يعنى اللى بتكتبه انت مسئول عنه امام الله

انا مش شايف اى حمله لان الحمله فى اعتقادى بتكون متنظمه اكتر من كده بكتير مش بس كلام

وانزلوا الشارع يوم 25 يناير وخلاص

يعنى الحمله اللى بتقول عليها المفروض انا لو راجل مقتنع بكلامك وعاوز انضم ليكم(زى ماانت قولت)

انزل اقف ادام باب العمارة ولا اعمل ايه

حتى انا مش شايف ترويج لفكرة منظمه ابدا

طب على الاقل قولوا(انتوا كحمله يعنى) طالبين ايه من الناس تروح على فين وامتى بالظبط

وحتى مش شايف ان فى حملتكم اى تنويهات لعدم التخريب او ان الموضوع يكون سلمى

انا بس للاسف شايف ترويج لحمله انزلوا فى الشارع وخلاص

او انزلوا فى الشارع ولو لقيتوا اى عسكرى اضربوه

او انزلوا فى الشارع وخلاص والباقى على ربنا

كده ماينفعش ياارش الموضوع مش نزول وخلاص

الموضوع تنظيم وبرنامج لحمله ليها مطالب وليها نظام

[akramgroup]

ياجماعه مصر مش زى تونس ابدا

احنا عندنا احزاب متعدده وكل حزب فيهم نفسه تخرب ويقعد هو لوحده على تلها

وبلطجيه تبع الشرطه واخوان وليله كبيره اوى

صدقنى ياارش الموضوع ممكن يوصل لدرجه فوق ماتتصور دى ممكن توصل حرب اهليه بجد

[Ahmed Anwer]

يوم 25 يناير مش هنكسر ومش هنخرب ومش هنعمل أي حاجة تضر ممتلكات أهالينا وقرايبنا .. يوم 25 هننزل كلنا بأعلام مصر مش بأعلام أحزاب ولا حركات سياسية .. يوم 25 يناير هنصحى كلنا ونفوق وننزل ونمشي في مسيرات في كل مصر ونهتف مطالبين بحقوقنا ومطالبين ان الشعب كله ينضم لينا .. يوم 25 مش هو النهاية .. بس لو اتحدنا هيكون بداية النهاية

منقول من صفحة 25 يناير

[م تيمور المراغي]

بهدوء خالص ,,

انا دوري قمت بيه على اكمل وجه والان الكل فيكم عرف ان هناك ( شيئ ما ) سيحدث يوم 25 يناير ,,

الدور التالي منوط بمنظمي الحمله و من انضم اليها من القوى السياسيه المؤثره في مصر ,,

تم التنفيذ

السلام عليكم

[ComingSoon]

انا متفق مع كل ماقالة architect

وانا موجود في مصر يعني مش كلام مجاني من بعيد

ياجماعة هذه الانظمة الديكتاتورية تخاف ماتختشيش

حتي لو محصلش شئ فمجرد التهديد يجعلها تراجع نفسها وتقدم تنازلات يستفيد منها الفقراء من الشعب المطحون

بعد اضراب المحلة

اعطوا الموظفين 30% زيادة قد لاتكون استفدنا نحن منها بشكل مباشر لكن استفاد منها قطاع كبير محروم من الشعب المصري

ونزلوا اسعار بعض السلع

تعال بقي اترك هذا الديكتاتور بدون ضغط

كل شوية هايشتغلنا ضرايب عقارية علي ضريبة دخل علي مبيعات وكل سنة نا ضريبة جديدة

[doha]

سؤال وأحب أسمع إجابتكم عليه

إيه الفرق بين إنى أموت فى مظاهرة أو احتجاجات أو نتيجة الفوضى اللى محتمل تحصل

وبين الآتى:

إنى أموت بالسرطان من الأكل المسرطن

أو نتيجة فشل كلوى من مياه الشرب

أو نتيجة أمراض نفسية من الوضع اللى احنا عايشينه واللى بترفع الضغط وتجيب السكر وتشيب الشباب

أو فى حادثة مرورية نتيجة الفشل الحكومى فى تنظيم المرور وتحقيق الانضباط والإهمال فى صيانة الطرق

أو أموت غرقان فى عبارة صاحبها مسنود

أو أموت فى قطر محروق نتيجة الإهمال

أو أموت فى عمارة مخالفة مبنية تحت سمع وبصر الحى و تم الطرمخة عليها

أو أموت فى مستشفى نتيجة الإهمال الطبى وتدهور مستوى التعليم فى كل المجالات

أو أموت من التعذيب فى قسم الشرطة وممكن أكون برئ

أو أموت كمداً وغيظاً لما ما اقدرش اخد حقى بعد ما تثبت براءتى

أو إنى أموت من الانتظار كمان 30 سنة لما نتغير كلنا ونبقى أحسن -ومين يضمنها دى- عشان أتجنب إنى أموت فى مظاهر أو احتجاج أو نتيجة الفوضى اللى محتمل تحصل :)

وهو احنا بنقول بلاش فوضى عشان متموتوش ولا لان هتموتوا وبرضه مفيش حاجه هتتصلح والوضع هيبقى اصعب واشد سوءا من الحالي ؟

في وضع زي وضع مصر وفي ظروف شديده السوء زي ظروفنا مينفعش ابدا نزيد الطين بله ونحاول نعالج الغلط بغلط اكبر منه ..

لو المظاهرات هتجيب حل كان زمانها حلت من زمان .. لو الفوضى عمرها بتيجي بنتيجه مكانش حد غلب ..

كل الي حضرتك قلت عليه امور صعبه يفترض اننا نحاول نغيرها بكل وسيله .. لكن العصيان والفوضى ابدا مش هي وسيلة التغيير ده وعمر العنف والهمجيه مايجيبوا لحد حقه الضايع ..

[م تيمور المراغي]

انا متفق مع كل ماقالة architect

وانا موجود في مصر يعني مش كلام مجاني من بعيد

ياجماعة هذه الانظمة الديكتاتورية تخاف ماتختشيش

حتي لو محصلش شئ فمجرد التهديد يجعلها تراجع نفسها وتقدم تنازلات يستفيد منها الفقراء من الشعب المطحون

بعد اضراب المحلة

اعطوا الموظفين 30% زيادة قد لاتكون استفدنا نحن منها بشكل مباشر لكن استفاد منها قطاع كبير محروم من الشعب المصري

ونزلوا اسعار بعض السلع

تعال بقي اترك هذا الديكتاتور بدون ضغط

كل شوية هايشتغلنا ضرايب عقارية علي ضريبة دخل علي مبيعات وكل سنة نا ضريبة جديدة

رأي فيك من زمان انك تقيل

تحيتي ليك يا سووون

[م تيمور المراغي]

كان فيه مشاركه جميله للاستاذ سووون في الموضوع التاني ,,

حبيت الفت النظر ليها مش معقول نكتب ردوود مكرره في الموضوعين

اقترح على الادارة الكريمه دمج الموضوعين سويا

وهم الاعلم ,,

[Ahmed Anwer]

رغم إني عايش في مصر

بس ارفض وصف المصريين المغتربين بأن أيديهم في المية

أخواتي الأتنين مغتربين

يعني لو حصلي حاجة أو حصل لأولادي حاجة

أخواتي مش هتتأذوا ؟؟؟ مش هيزعلوا عشاني

طب أنتم زملائي في المنتدي مش هتتأذوا ؟؟؟ مش هتزعلوا عشاني

الواقع إني كتير بجد المغتربين المصريين حاسين و متابعين هموم الوطن يمكن أكتر من اللي عايشين فيه

المغتربين المصريين ليهم أهل و ممتلكات في مصر

و بعدين أساسا كشعب معندهوش فكرة الهجرة بمعناها الحرفي تقريبا ،،، و ده فرق بينا و بين شعوب كتيرة

و ما دام الوضع لا يزيد عن كونه وقفات سلمية

فالمغتربين المصريين ممكن يشاركوا في وقفات سلمية أمام السفارات المصرية في البلاد التي تسمح بذلك

و ساعتها ممكن يكون دورهم أكبر من المقيمين في مصر

لحد ما ياخدوا بقية حقوقهم خاصة حق المشاركة السياسية و الانتخابات

[Ahmed Anwer]

مصراوي و اليوم السابع

مش جايبين أي خبر ،،،

رغم إنهم متابعين جيدين للانترنت ،،،

و الجروب وصل 25 ألف في 24 ساعة

يا ريت كل واحد ينقل الدعوة للمنتديات و الفيس بووك