الحياة.....صورة

[لماضة مصرية جدا]

السلام عليكم و رحمة الله و بركاته

أنا عمري ما شفت قوس قزح في الحقيقة

و بسأل نفسي كتير هو ليه سموه "قزح" يعني القوس و عرفناه.....طب القزح علشان "أزح" مثلا و لا ايه

بس اللي متأكدة منه انه جزء من تفاصيل الجمال اللي ربنا زوق بيها براح الكون بحاله

الحياة انك مصدق ان فيه قوس "قزح"...فيه الوان راح تبان في السما بعد المطرة

فيه غيوم راح تنقشع

فيه طهر راح ينصبغ

فيه حياة راح تنولد

فيه قوس.....هيشدك....و يوديك.....لل"قزح" يعني العالم اللي يشبه الجنة زي ما نتمني

الحياة...انك مصدق ان فيه قوس قزح....شايفه بقلبك....مع ان عمرك ما شفته في الحياة الحقيقية

صباحكم......قوس قزح....في سما الله الواسعة

[لماضة مصرية جدا]

الحياة

تبادل..أدوار...طول الوقت

الصغير ممكن أوي يحتضن الكبير

و الكبير ممكن اوي يرمي نفسه جوه دفا الصغير

مافيش...صغير....مافيش كبير

فيه حياة....مش مشاية علي خط مستقيم لكنها دايرة مقفولة علي "احتياج" انك تمارس انسانيتك بكل تفاصيلها

تم تعديل 11 يوليو 2011 بواسطة لماضة مصرية جدا

[لماضة مصرية جدا]

تيك

تاك

توم

فيه عقرب من الوقت

اللي اخترع المنبهات و العقارب يا خلاه شفاف...يا خلاه صغير

مع انه مهم جدا

تيك

تاك

توم

الحياة.....فيها عقرب...."لحظات" ممكن يغير "حياة"

بحالها

[لماضة مصرية جدا]

طريق

طويل

و في آخره

دراعين مفتوحين ليك بحجم الكون بحاله

حياتك....كده

لكل حد فينا....طريق...بنجري فيه...بنتكعبل....بس عينينا ديما علي الايدين اللي دايما مستنيانا في آخره

و بتعوضنا عن تعب الطريق بحاله

[لماضة مصرية جدا]

علم النفس قال ان رسوم الانسان ليها معني

العلوم الانسانية قالت ان الانسان ميقدرشي يعيش من غير معني و دايما بيتواصل ب "خربشات" علشان يدي للي حواليه "معني"

الحياة....(من غير اي علم يقول)....خربشات...يا بنحفرها بنفسنا علي جدران الحياة...يا هي بتتحفر في اعماقنا و احنا ماشيين في دروبها

بس كل "خربشة" ليها معني

و كل "معني"....فيه حياة..."إنسان" مر من هنا و كان عايز يفهم نفسه....و "حياته"

[Howayda Ismail]

الحياة لحظات من عمرنا

وانت اللى بتحددها عاوز تعيشها ازاى

[لماضة مصرية جدا]

السلام عليكم و رحمة الله و بركاته

احنا رجالة....ووقفنا وقفة رجالة

الحياة.....محتاجة شخص زي ابا سويلم

ياخد وقفة رجالة

غير كده

يبقي هاتوا بقي الخيول تدهسه

[Simba]

هي الحياة محطات

بس هتبقي اجمل لما ما نشغلش نفسنا بيها

[لماضة مصرية جدا]

السلام عليكم و رحمة الله و بركاته

الحياة لعبة ممكن تبقي للحظة معقدة أوي...و ملعبكة أوي

و في لحظة تانية

ممكن يكون حلها أبسط مما نتخيل

[لماضة مصرية جدا]

الحياة خوف....توجس

من المجهول

او من اللي ميشبهشي ملامحنا

لكن

شوية

بشوية

بنقدر نتصاحب علي أقسي لحظة خوف جوانا...كنا فاكرين انها مش راح تعدي...(بس الحمد لله عدت و هتعدي زي ما لحظات كتير غيرها عدت)

[لماضة مصرية جدا]

الحياة......لجوء...."انساني" مشروع جدا....لأرض صلبة

[لماضة مصرية جدا]

الحياة...."هدايا" معلقة علي حبال الأمل و الرجاء

و أفضل الهدايا التي تمطرها السماء

[Damo]

اسمحيلي يا لماضة اقول رأيي في حاجة.

في صورة من اللي حطيتيهم كان انطباعي أو ردة فعلي مختلفة عنك. بعدين لقيتك حطيتي التعليق اللي أنا فكرت فيه على صورة تانية

أدي الصورة:

وادي التعليق

الحياة لعبة ممكن تبقي للحظة معقدة أوي...و ملعبكة أوي

و في لحظة تانية

ممكن يكون حلها أبسط مما نتخيل

تم تعديل 17 يوليو 2011 بواسطة Damo

[Simba]

الحياة مواعيد

مواعيد مهمة

ومواعيد مالهاش اي لازمة

[لماضة مصرية جدا]

السلام عليكم و رحمة الله و بركاته

في الحياة عيون دايما بتاخد بالها عليك

حتي لو أنت "مغمض" عينيك

بس انت متأكد انها موجودة

و جنبك

[لماضة مصرية جدا]

لو كنا شوفنا دموعهم....لحظة الفراق

كانت حياتنا اتغيرت كتير

كنا نزلنا من القطر....و غيرنا الاتجاه

غريبة ان احنافي الحياة....بنستني الفراق....علشان نعرف اد ايه كنا بنحب

[لماضة مصرية جدا]

الرقص.....مع انه متعة في الحياة

بس بيوجع

كل متعة.....فيها......"حتة" وجع

خدها كده كلها علي بعض

زي ما هي

و ارقص

حتي فوق الوجع

[Simba]

من غير البنت الجميلة

هيفضل الوحش

وحش

تم تعديل 21 يوليو 2011 بواسطة Simba

[لماضة مصرية جدا]

السلام عليكم و رحمة الله و بركاته

في الحياة

أوقات كتير بنحتاج ان احنا نرجع للمربع "واحد"

رجوع مؤقت...

علشان نبتدي نلعبها من اول و جديد

بس المرة دي هنبقي اتعلمنا انهي مربعات لازم نختارهامن الأول

[لماضة مصرية جدا]

لما بتدوس عليك الدنيا أوي

فيه "سور" واحد بس تقدر تتشعلق فيه

و عينيك علي السما

سورك.....مش قيود بتخنقك

و لا مساحة بتحدد مكانك علي الارض

السور ده...ايمانك أنه "يراك"

يحميك.....يعطيك حين يمنع عنك

السور ده

فعلا بيحميك

بيحميك

حتي من نفسك