صيدلية الزنجبـــــيل

[Howayda Ismail]

من قبيل الصدفة البحته إن مع برودة الجو هذه الأيام وتاثيرها الأقوى على الأطفال ...

قررت إني ألجأ إلى شراب الزنجبيل لتقوية المناعة ومقاومة البرد .. وعشان بيبقى حار شويه ... فقرر إما أن أضع عليه حليب وعسل نحل ... أو لو بالمياه يبقى أضع عليه نعناع ...

وفعلاً الأولاد حبوه ( أنا شخصياً ما كنتش بأحبه لأن طعمه كان بيفضل في فمي 4 أيام لما بأكره نفسي .. لكن عرفت السبب وهو إنه ما يبقاش ثقيل )

وفي جلسات السعوديين أو واجبات الضيافة في الشتاء .. بيبقى الزنجبيل مشروب أساسي للتدفئة ...

المهم ... كنت ناوي أكتب عن الموضوع ده لكن كسلت ... إلى أن أستمعت مساء أمس لبرنامج على قناة الرسالة يقدمه طبيب أردني

وتحدث عن الزنجبيل بأستفاضة وكانت حلقة في منتهى الروعة وأستفدت من معلومات قيمة ولا تقدر بثمن بصراحة عن هذا النبات الساحر

وسأنقل لكم بعض المقتطفات عن الزنجبيل وإن شاء الله نستفيد منها

-------------------

لا كده انتم اكيد متفقين على

دخلت المحاورات الصبح اول حاجة عينى وقعت عليها توبيك الزنجبيل ولسة باسمى واقول

باهادى وحابتدى اقرا نادى زوجى على طالب كوباية الجنزبيل(هو ده اسمه عندنا)

المعتادة بتاعة الصبح على غيار الريق ويمكن بيشربه اكتر من الشاى

احنا كمان بنضيفه ضمن البهارات على الاطعمة وخصوصا المحاشى مع النعناع الناشف بيبقى

خرافة ومرة جاله هدية منه ثمارات طازة وشفت منه طازة عند كارفور

بس انا زهقت من الجنزبيل ده لانه بقى حجة لجوزى عشان يقومنى كل شوية من على النت ههههههههه

يمكن 3 او 4 مرات ايه انت مش عاوزة العيال تشرب ولا ايه رغم ان عبدالرحمن بس هو

اللى بيحب يشربه (مش باقول لكم النت وسنينه ) يعنى باكتب المداخلة الواحدة على 3 مرات

لا فعلا مع نزلات البرد المستمرة مفيد جدا فى تقليل كمية البلغم على الصدر وبالتالى

بيقلل معاهم الكحة وجاب نتيجة كويسة جدا مع العلاج فى مرض ابنى الصغير من يومين بس

[se_ Elsyed]

الحل بسيط يا فندم

تقطعي قدر معقول من الزنجبيل وتضعيه في ترمس الشاي .. وتغلي المياه مع السكر وتضعيها في الترمس ...

يبقى ترمسنا وسلاطتنا وبابا غنوجنا وكل حاجه جنبنا ..

كده أحسن على فكرة من غلي الزنجبيل عشان الزيوت الطيارة بتاعته ما تطيرش أثناء الغلي ..

[Howayda Ismail]

الحل بسيط يا فندم

تقطعي قدر معقول من الزنجبيل وتضعيه في ترمس الشاي .. وتغلي المياه مع السكر وتضعيها في الترمس ...

يبقى ترمسنا وسلاطتنا وبابا غنوجنا وكل حاجه جنبنا ..

كده أحسن على فكرة من غلي الزنجبيل عشان الزيوت الطيارة بتاعته ما تطيرش أثناء الغلي ..

ما انا فكرت اعمل كده لاقيت حاحتاج 10 ترامس بعدد المشاريب الموجودة فى البيت

لان ساعتها انا مش عاوز جنزبيل حتشربينى على كيفك ههههههههه

[abofasad]

أخونا الكبير مقاما الصغير سنا سي السيد

تحية واحترام

قرأت موضوع صيدلية الزنجبيل من أوله الى آخره

وأعجبني جدا وعرفت منه فوائده العظيمة لصحة الإنساء

ولكن لم استدل على طريقة اعداد كباية زنجبيل سخنة

سواء من الزنجبيل الفريش

أو من النجبيل البودرة

ما هو مقدار الماء الذي يتناسب مثلا مع ملعقة زنجبيل بودرة

أو حجم القطعة الفريش

وهل نتركه يغلي على النار وما هي المدة

أو نضع عليه الماء الساخن مثل الشاي الفتلة

رجاء الإفادة حتى يمكننا مجابهة البرودة الشديدة التي تجتاح أوروبا في هذه الأيام

تحيات وتشكرات جدو ابو فصاد

[se_ Elsyed]

يا جدو والله العظيم لو أعرف إن سعادتك هاتشرفني في موضوعي .. كنت كتبت موضوعات عن الزنجبيل والقرفه وكل الحاجات الحلوه دي من زمان

أنا في غاية السعادة بتشريف حضرتك . لأني أعتبرك من جيل العمالقة ... هذه حقيقة

شوفي يا عمو

أحسن حل حضرتك تغلي المياه جامد ... يادوب على قد كوباية أو لو محتاج أكتر براحتك يعني ... وتقطع حتتين تلاته زي شرايح البطاطس كده وتضعهم في الكوب وتصب فوقهم الماء المغلي .. ويا سلام بقى لو عليه معلقتين عسل نحل أسباني من برشلونه ... يا عيني يا عيني ...

وتغطي الكوب لمدة دقائق بسيطة بالطبق عشان الزيوت الطيارة تختلط بالمحتوى ...

وزي ما قلت في المداخله السابقة .. ممكن نضع كمية في ترمس الشاي - أوعى تكون حضرتك نسيت كلمة تُرمس ؟

ويبقى stock جاهز عندنا طول اليوم

بس جرب مرة أو أتنين .. لو طلع خفيف وطعم الجنزبيل - بالمصري - مش باين فيه .. يبقى زود الجنزبيل شويه ... ولو طلع تقيل وبيحرق في الزور .. يبقى نخفف شوية ...

وبإذن الله لا تقولي برد أوروبا ولا غيره ومش بعيد نشوف حضرتك بتلعب تنس في جنينة البيت ..... وكله ببركة الجنزبيل ...

ربنا يديك الصحة وعيد ميلاد سعيد عليك وعلى الأسرة الكريمة ..

[abofasad]

فعلا سي السيد ابن أصل

أسرع رد على سؤالي

من فضلك بلاش حضرتك

احنا كلنا اخوات وحبايب

أشكرك على الوصفة وسوف أجربها مساء اليوم

وطبعا الكلام ليكي ياجارة

أقصد مدام سلوى اللي عندها العسل الحلو

سيبك انت اللي عسل

وشكرا على كلماتك الرقيقة واعدك اني سأكون متواجد دائما لأسعد بكم ومعكم في هذا المنتدى

وشكرا على تهنئتك بالعيد

كل عام وانت وأسرتك الكبيرة والصغيرة بخير

[حوريةعين]

اسمحولي اضيف حاجة سمعتها

بس حاجة تهم نون النسوة شوية

مره سمعت انه بينعم البشرة كمان

وكان ده من ضمن الاعجاز في القران

لان في سورة الانسان اتذكر هوا فيها وقبله ذكر ان "لقهم نضرة وسرورا"

هيا بقى النضرة

والله اعلم

اما من ناحية التوم فهوا مفيد جدا بس بعد الطبخ

يعني يضاف للأكل اثناء الطبخ بدل ما يسبب التهاب للمعدة

كمان من الحاجات اللي بتزود المناعة العسل الأبيض وعن تجربة

سبحان الله فعلا فيه شفاء للناس

وانا الايام دي متحيزة قوي للكركم من كتر اللي سمعته عنه فبضافه لكل الاكل اللي بطبخة

دمتم بود

[عبير يونس]

شكرا ع الموضوع المفيد جدا

الزنجبيل فعلا مليان فوايد

و اضافته للقرفة بيساعد جدا على حرق الدهون

و رفع كفاءة تمثيل الغذاء

و فعلا عن تجارب مع العسل و الحليب مفيد جدا لطرد البلغم من الصدر

و مهدئ للسعال

بيتنا لا يخلو منه و لا من الأعشاب بشكل عام

شكرا مرة أخرى

[se_ Elsyed]

الموضوع ده كتبته قبل الثورة بشهر

يا ترى رأيكم إتغير بعد الثورة في المشروب الثوري ده ؟

[rewsha]

الموضوع ده كتبته قبل الثورة بشهر

يا ترى رأيكم إتغير بعد الثورة في المشروب الثوري ده ؟

على يدي

كانوا بيوزعوه في التحرير مع كنتاكي ايام الثوره

يعني الواحد من دول كان يمد ايده اليمين يا خد وجبة كنتكي وايده التانيه فيها كوباية الزنجبيل

ده انا حتى كمان سمعت ان كوباية الزنجبيل كانت بدل البيبسي اللي مع وجبة كنتاكي

[rewsha]

لا بجد انا عندي عملت خلطه من الجنزبيل والقرفه وحطيتها في برطمان لوحدها

علشان في الشتاء ماانساش اشربه

وكل ما اجي اعمل قرفه ,يبقى اتوماتيك معاها جنزبيل

بس انا باعملها قرفه بلبن طبها ...وطعمها بيبقى خرافه