يعني اية اني انتمي للجنسية المصرية ؟!؟؟

[Amr Radwan]

انا عاوز افضفض معاكم .. بس بجد .. الايام دي بقيت الاحظ شوطة أو وباء زي انفلونزا الطيور ماسكة مصريين كتير و خاصة في الغربة .. بس الوباء ده للاسف في الانتماء للجنسية المصرية !!

ناس كتيرة دلوقتي بتسالني و اية يعني انا مصري ؟؟!؟ و هي مصر عملت لي اية ؟

مصر تمثل لهم كل العناء و الشقاء و الفقر و المهانة و ... و .. و المصيبة الاكبر ان بعض المصريين بيشتموا في المصريين اللي مصر و بيصفوهم بانهم عشوائيين و .. و .. و تيييييييييت تييييييت

لما اتكلم مع الواحد من دول و اقوله لازم يكون عندك انتماء .. يقولي ليه ؟؟!؟!

اقوله عشان مصر دي هي بلدك و فيها اهلك و اصحابك و حبايبك ؟!

يقولي .. انا اهلي عايشين برا معايا و انا مستقر برا .. و بالنسبة ليا مصرلا تمثل اي شئ ؟!؟!

انا بصراحة خلص كلامي ليهم و معاهم و ما كانش قدامي الا اني انفجر فيهم .. او اني ابعت ابتسامة بارده :)

و طبعا فضلت اني ابعت ابتسامة مثلجة تخفي الكثير من الحنق و الالم في نفس الوقت ..

ليه ؟؟

ليه لما بنسافر برا مصر بنفقد الانتماء للوطن ؟

و هل الحياة الكريمة في الغربة تغنينا عن الانتماء للوطن ؟

و يعني اية كلمة انتماء ؟

هل تعني حب او اعتزاز او حنين للوطن ؟يعني اية كلمة وطن ؟

و عاوز اسالكم .. فيه فرق بين مصر و المصريين و الحكومة المصرية و الارض المصرية ؟؟

برده من كام يوم قرأت مقال للكاتب السعودي خلف الحربي في جريدة عكاظ بعنوان "من هو كفيل رمسيس الثالث؟" بيتكلم فيه عن المصريين في الخليج و قام بتصوير المصريين بصورة أراها انها غير لائقة بنا و لكن البعض يراها انها تصوير للواقع المر او عرض للصورة التي ينظر لنا بها بعض العرب .

في ضوء الرؤيتين .. نظرتنا لانفسنا بصورة مشينة و رؤية بعض العرب لنا بصورة مشينة .. هل تتوقعوا ان يكون هناك صورة جيدة جديدة ؟

بجد .. انا حزين من الصور سواء التي نصورها لانفسنا نحن المصريون او للتي يصورنا بها بعض العرب.

تم تعديل 21 ديسمبر 2010 بواسطة Amr Radwan

[زهرة الجبل]

أخي الكريم عمرو رضوان

غيرتك على مصريتك أمر محمود و لكن يجب أن تمتلك أدوادت للدفاع عنه بجداره

لا تسمح لأحد بأن يصل بك لحد الإكتفاء بإبتسامه ساخره و لا حتى حانقه

فالكلام للرد كثير

و هي مصر عملت لي اية ؟

عملت كتير قوي .. بس البني آدم طبعه كده ... نكار للجميل

مصر منحته إنتماؤه لآبائه و أجداده اللذين لو ما كانوا وجدوا بها مأوى .. لما عاشوا و لا جاءوا به إلى الدنيا

مصر منحته الهويه و السكن و الأصل في بداياته التي لم يكن يمتلك فيها ( تلك البدايات ) سوى مصر ..

مصر منحته من نيلها أول ما شرب منه .. و من أرضها أول ما نزل جوفه .. و من هوائها أنفاسه الأولى .. عندما لم يكن له حق في غيرها

مصر منحته فرص التعليم ليصبح إنساناً جديراً بالإحترام و جديراً بالحصول على فرصه للخروج من وطنه .. اللي هو مصر

مصر في عزها و قوتها كان خيرها مغرق أولادها و فايض عالغريب

فمش معقول لما يصيبها المرض _ إللي إحنا كلنا مش معصومين من إثمه و لو بإختلاف الدرجه_ يبقى أرجمها و أنكر خيرها

و مش معقول لما الغريب يتطاول على مصر هعرف أذكره بخيرها عليه لو إبنها نفسه ناكر خيرها

[طبيبة بالخارج]

شوف يا أخي أنا بقالي حوالي سبع سنين بالسعودية و لسبب بسيط جدا : الفلوس

صحيح اني جت علي فترة كنت بسعى للهجرة لأستراليا أو كندا و ده لظني بإنها ستجعلني أنا و أولادي نعيش ليس فقط في مستوى مادي عالي (على فكرة المصريين بيكسبوا أكتر في دول الخليج) و لكن بمستوى حضاري اعلى و ده من خلال سماعي عن النظام و احترام البني آدم هناك

بمصر للأسف شفت مشاكل حكومتنا و لكن على مستوى مصغر و ده ستلاقيه في كل مؤسسة حكومية و طبعا لأن اذا كان رب البيت بالدف ضارب فشيمة اهل بيته الرقص

لكني و الحمد لله احمد الله الف مرة على عدم تمكنا من الهجرة

لعدة أسباب

اولا: لأني زهقت من الغربة و حنيت لبلدي (عارفة ان مستنيني الغلب ) ثانيا: لأن اولادي لازم ينتموا لبلدهم و ده عيب الهجرة للخارج فالأولاد بيتربوا على تقاليد مختلفة تماما و كمان بحكم عليهم بالغربة الدائمة هم و أحفادهم ده غير البعد عن الدين

ثالثا: لأن العيب مش في بلدنا العيب في ناسها و الأرض هي اللي دايمة مش الناس

رابعا: لأني كلما رأيت على اليو تيوب أغاني و مشاهد حرب اكتوبر بتأثر قوي و ببكي على هذه الأيام اللي كانت مصر فيها رافعة راسها و الآن ناكساها و عرفت اني اذا كنت مش مستحملة اكتر من كده غربة و الاسم في بلد عربي مسلم امال في بلاد غير العرب و المسلمين حعمل ايه

[Amr Radwan]

الاخت الكريمة زهرة الجبل

هذا بالظبط ما احسه

و مش معقول لما الغريب يتطاول على مصر هعرف أذكره بخيرها عليه لو إبنها نفسه ناكر خيرها

كتير من ولادها مش حاسين بيها .. مش كده و بس ده مجرد ما يحصل لها حاجة بيتهربوا منها و و من الانتماء ليها

هل الانتماء بيكون في الفرحة و الاعتزاز بالمصرية بيكون فترة النصر و العزة و القوة ؟

و لا بيكون وقت الضعف و الهوان و الانكسار ؟

ام ان الانتماء يعني ان اكون فرحان وقت الفرح و النصر و برده اكون معاها و جنبها وقت الضعف ؟

شكرا للطبيبة بالخارج علي المشاركة و الفضفضة

[Damo]

استاذ عمرو رضوان

اشكرك على الموضوع ده

أنا بأسأل نفسي نفس الاسئلة

وكتير بأبقى مشعرفة هل قرار ترك مصر ده كان صح ؟ طيب ما لو قعدنا فيها هنعملها إيه ؟

طب ولو مشعرفين نعملها ....يبقى نيسيبـها ؟ طيب ده أنا...أنا بحب مصر وبتوحشني وزعلانة عليها...ليا قرايب مولودين بره ومالهمش أي انتماء لمصر ويوم ماييجوا نازلين مصر اجازه يبقوا عايزين ينطوا من الشباك.

أنا مش عايزة اولادي يبقوا كده ...أنا نفسي اولادي يتربوا في مصر وسط جيران مصرية في عمارة مصرية ويروحوا مدرسة مصرية اللي مدرسينهم مصريين وصحابهم مصريين وبيتكلموا عربي مصري.

بس مشعيزاهم ينزلو من البيت على سلالم مصر ويعدوا شوارع مصر ويدرسوا مناهج مصر ويضربوا ضرب مدرسين مصر ويتبهدلوا في كانتينات مصر على كيس شيبسي كلو مواد مضرة أكيد مش موجودة في أي شيبسي تاني بره مصر. ماش عيزاهم يرجعوا من المدرسة تخبطهم عربية ولا الولاد يشكوا انهم مش عايزين يمشوا مع اخواتهم البنات اللي كل يوم يجيبلهم وجع دماغ من المعاكسات والتحرش.

استاذ عمرو

أذا كنت أنا شخصيا مشعرفة إيه مشاعري تجاه وطني

للاسف أنا معنديش اجابة لسؤال حضرتك

[أبوعمار]

أكيد تعرفوا المثل اللي بيقول

"أدعي على ابني وأكره اللي يقول آمين"

أنا كده بقى ولو إني عمري ما أدعي على مصر

ولو فكرت أشتكي منها عمري مااشتكي قدام الغريب

لو فكر أي حد مش مصري انه يقول أي حاجة تسئ لمصر -وطبعا قدامه الفرص لا تعد ولا تحصى-

بأحاول بكل الطرق البهلوانية اني أطلعه غلطان حتى لو ما كنتش مقتنع باللي بأقوله 100%

اللي اكتشفته وأكيد كلكم اتأكدتم منه بالذات اللي برا مصر

وخصوصا اللي في البلاد العربية انك لما تحب بلدك بجد وتفتخر بيها

وتكون مقتنع انها أكبر وأقوى من الفساد

لأن أكيد هاييجي اللي يطلعها من اللي هي فيها

لما بتكون متشبع بالاحساس ده بيوصل لكل اللي بتتعامل

ولا حد يتجرأ يقول عليها كلمة مهينة على الأقل قدامك

بس اللي مقتنع بيه وماشي جوا دمي فعلا ومن غير كلام شعارات

"اني بحب مصر"

ومهما يجور الزمان علينا وعليها الفرج جاي أكيد

والفجر هايطلع مهما طال الليل

مش كده ولا ايـــــــــــــــــــــــه؟

[محمد عبدالعزيز]

معلش يا باشمهندس عمرو إنت بتضيع وقتك مع الناس اللى بتفكر بطريقة "هى مصر عملت لى إيه علشان أحبها ولا أنتمى لها"

وأنا متأكد إن اللى بيفكر بالطريقة دى ماتفرقش معاه أى بلد بيعيش فيها, يعنى لو البلد اللى هو عايش فيها مبسوط, دار بها الزمان وبقت فيها مساوئ زى مصر حتلاقيه أول واحد يقول عليها نفس اللى بيقوله على مصر وأول واحد يهرب منها, رغم إنه قبل كده كان شايفها جنة الله فى الأرض وبيقول فيها شعر.

الخلاصة يعنى, اللى بيفكر بالطريقة دى ترمى طوبته نهائى وماتحاولش معاه, لأن شعاره الأول والأخير: أنا ومن بعدى الطوفان.

[لماضة مصرية جدا]

/size]

ليه ؟؟

ليه لما بنسافر برا مصر بنفقد الانتماء للوطن ؟

السلام عليكم و رحمة الله و بركاته

استوقفني سؤال حضرتك جدا

ليه لما بنسافر برا مصر بنفقد الانتماء للوطن؟؟؟

مع ان المفروض لما الحبيب بيبعد عن حبيبته بيزداد لها شوقا...(معذرة في التشبيه)

مش يمكن هو اصلا ماكنشي بينتمي ليها....و السفر...."اسفر"أي كشف و أظهر عن الحقيقة اللي كانت تايهة جواها

هي كانت فكرة مطمورة جوه منه....اول ما رجليه اتحطت في ارض جديدة...ابتدي يزرع زرعة جديدة

لكن الزرعة عشان تكبر.....لازم تكون مروية صح

و اللي بيسال عن مصر ادتين ايه...عشان اديها ايه...عمري ما هيزرع زرعة خير لا جوه مصر و لا في اي حتة تانية

حضرتك بتتكلم عن الانتماء

طب انتماء لمين

انتماء....لمكان جغرافي....يعني مكان مصر علي الخريطة

و لا انتماء...لحكومة....لاني اخترتها و عارف انها هتحقق السعادة ليا و للاهم لولادي

و لا انتماء....لتفاصيل شخصية كل واحد فينا و ادته مقومات التفرد اللي بتميزه منين ما يشيل شنطة سفره

في حالة الانتماء الأولي....يبقي اكيداحنا عندنا انتماء....عشان ده اللي مكتوب في جواز السفر اللي طلعنا بيه من الارض....من المساحة دي....لمساحة تانية...مجرد تغيير في المسارات الجوية و الجغرافية

لو ع الانتماء التاني.....طبعا غير منتمين.....لان كل مصري....عنده موقف صريح او ضمني عن رفضه لحكومة فاسدة...و ده امر لا جدال عليه

لو ع الانتماء الثالث....صراحة.....خليني اقول لحضرتك....مش كل الناس عندها القدرة انها تصنع تفاصيل انسانية او ترتبط بيها...او تري اصلا انها تشكل اي فارقا في حاضرها او مستقبلها

مثال علي التفاصيل الانسانية دي...ما ذكرته الرائعة دامو من تفاصيل....كلنا بنشكو منها...جوه مصر او براها...لكن لا زلنا منتمين ليها....لا زلنا حاسين ان هي دي الل شكلت شخصيتنا هي دي الظروف الصعبة اللي مرمطتنا و علمتنا ان الحياة حقيقي صعبة...بس كمان علمتنا لما نقع نرجع نقف تاني علي رجلينا

من التفاصيل ديت خليني اقول لحضرتك

عندي تفاصيل.....جبتها معايا في مصر..

زي ازاي كنت بخش مدرج فيه 235 طالب

و ازاي كنت بذاكر من مذكرة متصورة علي ورق لحمة

و ازاي اني بفضل الله اصريت اني اطلع الاولي....

و ازاي اني برضه انطردت من الجامعة عشان تتعين بنت الدكتور....

و ازاي قاوحت فيهم و كملت دراسة...

و ازاي بروح المصالح الحكومية و بحس اني بشوف انماط من البشر خارجة من كتاب علم النفس في تحليل الشخصيات السيكوباتية....

و ازاي امي الست المصرية اويبتخاف عليا لغاية دلوقتي...و بتصر انها تسالني اكلتي....(هي ليه بتتطمن عليا لما بتعرف اني اكلت يعني)

اهي التفاصيل دي....هي ملامح الوطن

هي العود اللي بنتسند عليه

هي التفاصيل الصغيرة اللي عارفة اني لو قعدت مع اي مجموعة مصريين من شرقها لغربها لازم نتكلم فيها....يا هنشتم في الحكومة....يا هنتكلم عن ان مصر طردتنا...(طبعا قدصنا الفساد الحكومي....)...يا هنتكلم عن هنرجع نعمل ايه

هي حالة توحد.....حتي في الهم.......بقي فيه حالة توحد....و هم مشترك

اهو ده الانتماء من وجهة نظري

و عمري ما سالت هي مصر ادتني ايه....

لانه مينفعشي يتسال السؤال اصلا.....و مينفعشي يتحطله اجابة.....و الله العظيم عمر ما حد سالهولي

لكن لما حد بيسالني اتعلمتي فين....و جبتي اللكنة بتاعتك اللي بفضل الله تشبه اهل الغة الاجنبية....ببقي مبسوطة اوي اوي اوي اوي....لما برد و بقول....الحمد لله انا اتعلمت في مصر

و ساعتها برضه برجع افتكر المدرج ابو 235 طالب...و افتكر مذكرة اللحمةوافتكر اني انطردت من الجامعة....بس المرة دي...مش بفتكر الوجع...بخلي بس مساحة للفخر....انا من هناك ع فكرة(عبارة بقولها لو حد تشكك في الملامح)

فيه ناس....عايزة تنتمي....و دي مش هيفرق معاها....انا عايشة في مصر و لا براها

لاني بخلي مصر عايشة جوايا منين ما بروح

بشيل معايا تفاصيلي.....و حتي لوقدر لي الله اني اتزوج و اعيش بره مصر....هحرص جدا ان يكون ليهم تفاصيل تربطهم.....مش بس بمصر

بكل مكان هم بيعيشوا فيه.....تفاصيل مش لازم تزاحم بعضها

يعني لما احب الامارات....بكل حياتي هنا....بكل تفاصيلي هنا....مش لازم اعمل عملية احلال و تبديل لتفاصيلي المصرية جدا

بالعكس انا بحس اني في نعمة ان ربنا اداني ثراء في الاوطان

الوطن....الانتماء ليه....مش حالة حرب....لازم بقعة جغرافية تنتصر علي التانية

الانتماء حالة حنين لتفاصيل....هي اللي بتعمل مننا انسان متفرد.... لا يشبه احد

انا ممكن البس زي الاماراتي....لكن روحي هتفضل مصرية

انا ممكن احكي اماراتي.....لكن افكاري....هتظل بتاعتي....ساظل انا

حيث قررت ان انتمي.....هنا او هناك

الانتماء...قرار.....انك تكون انسان.....سعيد....

و ده عمره ما هيحصل لو شوهت حد قدامك.....او طعنت في انتماؤه او وطنه....او حتي بلده(حكومته)

و ده اللي يمكن كاتب المقال....لم يتفهمه...لانه قطعا انسان غير سعيد...قد يري ان التهكم علي بلد....و السخرية من اوضاعها يجعله في مرتبة افضل

مين قال

دي كانت وجهة نظره...الشخصية جدا التي لا تخرج عن نطاق عقله ثنائي الابعاد....(يا وطني يا وطنك....يا تري مين الغالب)

لكن هناك وجهات نظر اخري....و اصوات اكثر اعتدالا و اكثر احتراما....لانها ثلاثية الابعاد...(وطنك....وطني....و انت حيث تقرر ان تنتمي و حين تقرر ان تكن سعيدا)

شكرا جزيلا استاذي علي الفضفضة من جانبك و علي تحفيز الفضفضة من جانبنا

مسا حضرتك...كل الخير

تحياتي

[Diab]

من هو كفيل رمسيس الثالث؟

خلف الحربي

لا أدري لماذا أوحى لي اكتشاف ختم رمسيس الثالث في تيماء أن هذا الفرعون جاء إلى بلادنا بتأشيرة محرم!، وحين لم يجد وسيلة يقضي بها على الفراغ القاتل وكسب العيش الشريف قرر أن يعمل مدرسا خصوصيا ويلصق رقم جواله على الجدران، أو لعله كان ضحية لتاجر إقامات فرض عليه مبلغا مقطوعا كل شهر وتركه يهيم في الشوارع كي يبحث لنفسه عن أي مهنة كانت: حلاق، سباك، مدير بلا إدارة، بائع سجاد، سائق ليموزين .. وأحيانا راق شرعي يصعق الجن المتغلغل في أجساد النساء بسلك كهربائي!.

كم هو مسكين رمسيس الثالث هرب من البطالة إلى البطالة!، وفر من البيروقراطية إلى البيروقراطية، وقفز من دائرة اللوم ليقع في دائرة اللوم الأكبر، كل الناس هنا تحمله مسؤولية تخبطهم وينظرون إليه باعتباره (الأجنبي) الذي يأكل خيراتهم دون وجه حق، أما الناس هناك فهم ينتظرون منه أن يرسل لهم أجهزة البلاي ستيشن والجوالات الحديثة ولن يعذروه إطلاقا إذا لم يحضرهم جميعا إلى العمرة!.

هو يأكل مثلما يأكل أهل البلد ويتقاضى أقل من رواتبهم ويجمع القرش على القرش كي يؤمن في آخر العمر سكنا يحميه من التشرد ويضمن لأولاده دراسة جامعية تبعد عنهم كوابيس الغربة، وهو أيضا يسدد رسوما على الماء والهواء والأرض التي يسير عليها، ولكن الناس هنا يريدون تحميله أخطاء كل وافد يجمع الملايين دون وجه حق، يتلذذون دائما بمحاسبته على الملايين التي يكسبها الخواجات من مدربي كرة القدم!، ويحسدونه على الملايين التي يجمعها المستشارون العرب ممن لا يطيقون العيش مالم يتوفر لهم كل مالذ وطاب في الكمباوند الفاخر!.

هو الجدار القصير في هذا العالم، إذا جاء الحديث عن السعودة نظر إليه الجميع شزرا، وإذا فتحت سيرة الفساد اضطر لمغادرة المجلس قبل أن توجه الاتهامات إليه مباشرة، وإذا ذهب إلى المسجد انتظره المصلون عند الباب كي يبدوا له ملاحظتهم على صلاته، وإذا وقف في الطابور أشار الموظف إلى الواقفين خلفه كي يتقدموا عليه، وإذا ازداد زحام السيارات في أحد الشوارع التي ملأتها الحفريات فإن الأبواق سوف تتوجه إليه باعتباره الشخص الزائد الذي تسبب في كل هذا الزحام، وإذا عاد ابنه من المدرسة فإنه مضطر للتخفيف من وقع الكلمات العنصرية التي سمعها الابن في المدرسة، أما إذا عبر عن حبه العميق لهذا البلد وأهله فإن الناس سوف يبسمون ببطء كي يشعروه بأنه منافق!.

كل الناس يعرفون أن رمسيس الثالث ليس له دخل بالبطالة ولا الفساد ولا مشاكل النقل العام، ولكنهم أضعف من أن يلقوا اللوم على تاجر الإقامات الذي يبيع عرق جبينه أو أن يشيروا ولو من بعيد إلى أسماء المتسببين في كل ذلك، أما هو فقد فهم اللعبة جيدا وأدرك أن هؤلاء القوم لا ينفع معهم سوى رجل (بتاع كله) فأصبح فني كهرباء ومهندس ديكور ومدرس إنجليزي ومحاسبا بعد الظهر وخبيرا في العسل الدوعني ومختصا في العود الكمبودي.

ويقال إن رمسيس الثالث عاد إلى دياره بعد أربعين عاما وقد حمل سيارته الكورية الصنع بالأجهزة الإلكترونية بالإضافة إلى أكياس الأرز (لزوم الكبسة) التي أدمن عليها وعدد من الثياب البيضاء التي تخفي كرشه، وبعد أن دفع كل ما جمعه من أموال لرجال الجمارك كي تمر السيارة الكورية بسلام، تذكر أنه نسي ختمه هنا ..فأصبح رجلا يسير في الشوارع بلا ختم ..وبلا هوية!.

http://www.okaz.com.sa/new/issues/20101109/Con20101109382581.htm

بالعكس المقالة جميلة جدا والكاتب وجه نقد مزدوج للنظام في الخليج والنظام في مصر

ده بيحمله نتيجة أخطائه وده سبب تعاسته

[Om Zayd]

السلام عليكم و رحمة الله و بركاته

أولا جزاكم الله خبرا على الموضوع

لماضة .. حبيبتي .. قلت حاجات كثيييييييييييير كنت عايزة اكتبها و مش عارفة

أنا مصرية .. أي مكان رحته .. مهما اتبسطت فيه .. و استفدت منه .. و خدت حقي تالت و متلت فيه .. برضه كنت حاسة انه مش بيتي

حاجة كده بتزن جوايا

مصر

مصر

مصر

مصر

فكرتكم بنبيل فاروق .. صح

:happy:

كل حاجة اشوفها برة عايزاها في مصر

نختلف بقى مع النظام مع المصريين التانيين مع أهلنا حتى

برده بلدنا

و واجبنا اللي هنتسئل عنه اننا نصلحها ما استطعنا

طول عمري فخورة ببلدي

جدا

جدا

جدا

حتى لما واحد مصري يعمل حاجة مش و لا بد أقولهم ده مصري بالاسم بس

زي ما لما مسلم ما يبقاش مسلم بجد

و عادة الصنفين دول هما اللي بيرددوا الاسطوانة المشروخة بتاعت "هي مصر عملت لنا إيه" .. ولاؤهم الوحيد لمصلحتهم

بس ممكن يكون فيه اللي مش قادر يفرق بين الوطن و النظام

مصر هتفضل غالية عليا

أوي

[زهرة الجبل]

و عاوز اسالكم .. فيه فرق بين مصر و المصريين و الحكومة المصرية و الارض المصرية ؟؟

ده هو ده بالتحديد مربط الفرس

المشكله إننا فقدنا القدره على التفريق بين مصر الوطن و الحكومه إللي حاكمه مصر الوطن

بقينا مش قادرين نفرق بين مصر الوطن و بين الناس اللي عايشه جوه _ و متأثره بحال_ مصر الوطن

بقينا مش عارفين نكره الوضع السئ بدون ما نلوث بكرهنا ده مصر الوطن

مصر يا فندم بقت عامله كأنها شئ ثمين جداً كل واحد فينا يمتلكه بالفعل ..

و حدث أن غطى وجهها القليل من التراب فتكاسلنا جميعاً عن نفخه و إبعاده عن وجهها الجميل

و تراكم التراب على وجهها فلم يزدنا إلا تكاسلاً .. كل واحد فينا يقول و أنا مالي .. دلوقت اللي جمبي هيقوم يتصرف

و محدش قام !!

و جاء البلل و إختلط بالتراب و أصبح طبقه سميكه قبيحه أخفت معالم الجمال و شوهت ملامح الوطن

و إنشغلنا كلنا بالشكوى من إساءة منظر هذه الطبقه إلى نواظرنا الحساسه !!

و إكتفينا بالإنتقاد و التجريح لدرجة إننا نسينا تقريباً إن تحت هذه الطبقه ... شئ ثمين

و المصيبه أن بعضنا راح يرمي هذا الشئ الثمين من بين مقتنياته و يحاول إستبداله بأشياء أخرى لا يمتلك حق الإحتفاظ بها أصلاً

إستغنى هذا البعض عن أصله لما نسي أنه يمتلك بالفعل شيئه الثمين الخاص لمجرد أن نكرانه للجميل أنساه أن تحت هذه الطبقه المشوهه .. وطن عظيم

رغم أن لهذا الوطن مدلولات كبيره أوسع من أن تسقط من الذاكره .. لكن تلك المدلولات أضعفها نكران الجميل

و للأسف أصبحنا في معظمنا _ إن لم أكن متشائمه _ مصابون بأزمة إنتماء

الوطن هو الشوارع و البيت و المدرسه و الجامعه و الجيران و الأصحاب و ... و ... و الكثير الكثير

و الإنتماء هو أن لا تفقد الشعور بحقيقة هذه الأشياء

فلنجرب أن نشعر بالشوارع التي لو لم تكن تلمع من النظافه فهي في عيني أنظف من أرقى عواصم العالم

و ترابها أغلى من الذهب .. يكفي عطر هذا التراب الذي يعبق الهواء عندما يختلط بماء المطر

و يكفي سخاء هذه التربه الذي ظل يجود علينا بالقطن الذي كسى مصر و غيرها و القمح الذي سد جوع المصريين و غيرهم لزمن لا يستهان به

و ظل على حاله حتى إمتدت إليه أيدي الأوغاد بالتسمسم و السرطنه .. فلما أصيب نسينا خيره و لعننا ثماره

فلنجرب أن نشعر بالبيت الذي مهما انتقلت بعده من بيت لآخر و إتسعت الجدران التي تحويني سيظل وحده هو الذي يحمل المعنى الحقيقي للسكن

البيت الذي يربطني به حنين يجعل كل ما دونه من بيوت هي مجرد علب خاويه ندخلها و نغلق خلفنا الأبواب

الإنتماء أن تشعر بالحنين إلى المدرسه التي و إن لم تكن مبنيه على أحدث طراز فإن حجراً قديماً واحداً من جدرانها يحمل ذكرياتنا فيها لا يمكن تقديره بثمن

الإنتماء أن تتذكر الجامعه التي كانت أولى الخطوات على طريق تحقيق الذات .. ألم نخطو جميعاً هذه الخطوات داخل الوطن ؟

الإنتماء أن تحمل في نفسك و لو بعض الحنين لتلك الوجوه الطيبه التي لا يمكن أن ترى طيبتها خارج مصر .. الجيران

هؤلاء الناس اللذين لا يمكن أن ننسى ترابطهم و تعاونهم و إنتمائهم لبعضهم .. و كأن الجميع أهل يعنسبهم لبعضهم جوار المسكن

الطيبه و المحبه و التعاون و الطمأنينه و البشاشه و التراحم و التآزر .. كل تلك المعاني التي لن تجمع مفرداتها كلمه واحده أبداً سوى أن تكون هذه الكلمه هي الجيران في مصر

و الأصحاب ... أصحاب الدراسه و زملاء الجامعه .. هؤلاء الأشخاص اللذين مهما قابلتنا الحياه بغيرهم يظل لهم في القلب و الذاكره مكان مقدس لا يطغى عليه الآخرون

كل هذا و أكثر يعني الوطن

أما الإعتزاز به و حمايته بالذاكره من تشويه الطبقات المفتعله فهذا هو الإنتماء

تم تعديل 21 ديسمبر 2010 بواسطة زهرة الجبل

[زهرة الجبل]

*************

تم تعديل المشاركه السابقه لإصلاح التنسيق بمعرفتي

و عذراً عن الخطأ غير المقصود

و عذراً أيضاً إذا كانت في شكلها الحالي مزدحمه قليلاً و الأسطر لا تفصلها مسافات كافيه

لكن ده بعد محاولات مريره و ليس بالإمكان أفضل مما كان

زهرة الجبل

***************

تم تعديل 21 ديسمبر 2010 بواسطة زهرة الجبل

[masraweya]

الجنسية

هي دي المفتاح

بلاد كثير ممكن تديك جنسيتها .. بس صعب تحس انك منهم فعلا .. دايما هتحس انك مختلف

ممكن مصريين اتولدوا و اتعلموا و اتربوا في مصر و خير مصر عليهم و على أهلهم من ساسهم لراسهم

و يقولك "هي مصر عملت لنا إيه؟

و ممكن مش مصري بالجنسية بس بيدوب في مصر .. و تشوفه و تتعامل معاه تقول أكيد مصري بجد و جدع كمان

و تكتشف انه جنسية تانية بس حافظ الجميل و اعتنق الثقافة و الاحساس المصري

المشكلة بقى في الجيل التاني و التلت من المغتربين

دول الجنسية مفروضة عليهم بالوراثة

و ما لهمش ارتباط قوي بالبلد

ما لهمش ذكريات فيها

كل انتماءهم مرتبط بما يزرعه الاهل فيهم

لما بيضطروا يرجعوا مصر .. عادة بيدوروا على أي فرصة للخروج

الوطن .. تفاصيل صغيرة..صعب انكتسقيها لحد بالملعقة

:egyflag:

[عبير يونس]

لاني بخلي مصر عايشة جوايا منين ما بروح

بشيل معايا تفاصيلي.....و حتي لوقدر لي الله اني اتزوج و اعيش بره مصر....هحرص جدا ان يكون ليهم تفاصيل تربطهم.....مش بس بمصر

بكل مكان هم بيعيشوا فيه.....تفاصيل مش لازم تزاحم بعضها

يعني لما احب الامارات....بكل حياتي هنا....بكل تفاصيلي هنا....مش لازم اعمل عملية احلال و تبديل لتفاصيلي المصرية جدا

بالعكس انا بحس اني في نعمة ان ربنا اداني ثراء في الاوطان

الوطن....الانتماء ليه....مش حالة حرب....لازم بقعة جغرافية تنتصر علي التانية

الانتماء حالة حنين لتفاصيل....هي اللي بتعمل مننا انسان متفرد.... لا يشبه احد

انا ممكن البس زي الاماراتي....لكن روحي هتفضل مصرية

انا ممكن احكي اماراتي.....لكن افكاري....هتظل بتاعتي....ساظل انا

حيث قررت ان انتمي.....هنا او هناك

الانتماء...قرار.....انك تكون انسان.....سعيد....

و ده عمره ما هيحصل لو شوهت حد قدامك.....او طعنت في انتماؤه او وطنه....او حتي بلده(حكومته)

و ده اللي يمكن كاتب المقال....لم يتفهمه...لانه قطعا انسان غير سعيد...قد يري ان التهكم علي بلد....و السخرية من اوضاعها يجعله في مرتبة افضل

مين قال

دي كانت وجهة نظره...الشخصية جدا التي لا تخرج عن نطاق عقله ثنائي الابعاد....(يا وطني يا وطنك....يا تري مين الغالب)

لكن هناك وجهات نظر اخري....و اصوات اكثر اعتدالا و اكثر احتراما....لانها ثلاثية الابعاد...(وطنك....وطني....و انت حيث تقرر ان تنتمي و حين تقرر ان تكن سعيدا)

تحياتي

bv:-

[Om Zayd]

لماضة .. زهرة .. مصراوية

للأسف نفد رصيدي

جزاكم الله خيرا

[أسد]

ياجماعة إللي مش عاجباه مصر ..

لازم يفهم إن مصر مش حتعجبه طول عمر ما هو مابيعملش حاجة ليها

هي مصر دي عندها إيدين ورجلين علشان تجري عليه وتشيله وتحضنه

مصر بس ممكن يكون عندها حضن ..

لازم إنت تحبها وترمي نفسك في حضنها وهي اللي حتضمك ..

مصر هي أرض .. خصبة ..

لازم إنت إللي تحط البذرة وترويها وتتابعها وترعاها علشان تاخد الثمرة ..

مش حينفع تقول لحد إزاي يكون عنده إنتماء لبلده ..

ولا حينفع إنك تحاول تقنع حد إنه يكون عنده إنتماء لوطنه ..

إللي ينفع حاجة تانية ..

ياريت إللي معندوش إنتماء لمصر ..

يرحل .. ويحل عنا ...

بلا عوده ..

ويشوف مين حيستحمله بجحوده .. وعدم إنتماؤه ..

يروح .. الدنيا واسعة .. بلا عوده ..

[Howayda Ismail]

اسمحوا لى اشاركم بالاغنية دى

http://www.youtube.com/watch?v=i6MoviiClKE

لان مهما الانسان سافر بلاد الدنيا عمره ما يقدر ينسى مصر ام الدنيا

[hOuSsAm]

يا هندسة الباب يفوت جمل

لاء ده يفوت جمال

والعالم مفتوح لاى حد

اللى مش عجباه مصر قوله يسيبها ويبيع بيته اللى هناك ويمسح ارقام صحابه وينسى اهله ويقطع شهاداته اللى بتعليمها المجانى واللى اشتغل بيها فى بلاد الغربة ويمسح كل الصور اللى اتصورها هناك والذكريات

هو حد يعنى كان باس ايده وقاله اونبى ابقى مصرى

او هو يتخيل ان مصر هتبقى جنة الله لما هو يبقى مصرى

لو هو مش عايزها قيراط هى مش عيزاه 24 قيراط

مصر فيها ملايين اللى بيحبوها ومستعدين يعمروها ويحافظوا عليها مهما افسد فيها الطغاة

يا عمرو اللى بيتكلم بالاسلوب ده ناكر للجميل ومفيش منه رجا

وهرجع اقولك هو حر عايزميحبش مصر ولا يحبها ولا ينزلها ولا يهجرها فده لنفسه ولاولاده

وفى الاخر متديش لحد بيفكرالتفكير ده اهتمام ولا تقنعه بحاجة هما مبيصدقوا حد يفتحهم فى الكلام عشان يفضل يقول اشعار عن مساوئ مصر والمصريين وازاى بلد الغربة اللى عايش فيها جميلة وان اهل مصر اوحش ناس ممكن تتعامل معاهم

نكران الناس دول والتفكير ده احسن حاجة لاسكاتهم تمام

الفاضلان اسد ولماضة

احيكم على ردودكما

[الغريب]

كنت لسه في منتدى صديق ولقيت هناك موضوع في منتهى الاستفزاز

أسمحولي أصرح بعنوان الموضوع

"ماذا لو القعدة فى مصر طولت حبتين؟ "

الأخ بيشتكي أنه بيجهز للهجرة وممكن يقعد في مصر حوالي سنة بالكامل، وحازز في نفسه أزاي يقعد الفترة دي في مصر :(

والله لو أنا مصر كنت طردته وقفلت الباب عليه وقولتله خليك قاعد هناك على الباب لحد ما يقبلوك للهجرة

الردود في الموضوع حاجة تقرف بصراحة كأن الأخ قاعد في "خرابة" مش بلد..

سامحوني الموضوع أستفزني جدا ، وكنت عاوز أثيره هنا فلقيت الموضوع ده مقارب للفكرة

عاوز أقول كلمة واحدة وهي وجهة نظري

اللي مش عاجباه مصر مش هيكون مفيد ليها أبدا ، وكلما حل في مكان سواء عمل أو بيت أو.. أو.. سيحمل نفس المشاعر ولن يكون مفيد، ولا هيكون عنصر بشري إيجابي

موضوع "الخنقة من البلد" زاد قوي عن الحد عند الشباب ودي مش حاجة مبشرة، وكتير قوي ناس بتستظرف وتقول "لو لم أكن مصريا كان يبقى قشطة أوي" منتهى قلة الأدب صراحة

حسبي الله ونعم الوكيل في كل دعاوي لفظ البلد اللي منتشرة في الصحافة والإعلام الفاسد

[MaYousof]

أنا كنت عايز أشكر كل الرائعين اللي ساهموا في الموضوع ده بكلام لا يقل روعة عن روعتهم وجمالهم ..

ربنا يبارك فيكم كلكم