عداد وقت و لا عداد علينا

[مغتربة]

الخاصيه الجديده الى اتفعلت من يومين فى المحاورات و الى بتحسب ساعات مكوثنا على المحاورات

خلتنى افكر كتير جدا فى حاجه لفتت نظرى

و هى اد ايه من الوقت بننفقه فى انشطه معينه من غير ما نحس هى النشاط دا اخد مننا اد ايه او بعباره اصح سرق من عمرنا اد ايه

زمان لما كنت اقرا احصائيات شبيهه بكدا عن مثلا متوسط الوقت الى بينفقه الانسان العادى فى فعل انشطه عاديه جدا على مدار حياته

كنت بحس ان فى مبالغه شويه

يعنى مثلا لما يقولونا ان الانسان بيقضى مثلا شهريين من حياته كتوسط فى تنظيف اسنانه او معرفش اد ايه فى احتساء القهوه او كدا

كنت بستعجب من نشاط عادى بنعمله بشكل الى و بنعتقد انه مبيخدش منا وقت اطلاقا ازاى بيتراكم فى نهايه عمرنا بشكل يبين انه استغرق منا فعلا وقت معتبر فى ادائه

كل ما ابص لعداد الساعات و اخد بالى انى كنت الاول مبخدش بالى اننا بقضى الوقت دا كله على المحاورات

لكن دلوقتى اهو ملياش حجه و القطنه مبتكدبش هههههههههه

فعلا كل ما ابص لتراكم الساعات على بعضها و ازاى فعلا بتجمع فى الاخر اوقات معتبره من عمر الواحد بترعب

مش لانى بعتبر ان وقت جلوسى فى المحاورات بيضيع او مش مفيد ليا لا بالعكس لكن الفكره نفسها لو طبقناها بقى على حاجات كتيرر بنعملها من غير ما نحس اد ايه بتاخد من رصيد عمرنا و الى ساعات بجد حاجات كتير منها مبيكونش مستاهل بخاف جدا

يا ترى جالكوا نفس الشعور دا و لا انا بس الى مافوره شويه

متعنا الله جميعنا بطوله العمر فى رضاه امين يا رب العالمين

:give_rose:

[رضوي]

عداد عمر كله بيعد علينا

بس بينبهنا بجد لكل الوقت اللي بنضيعه ............ كل الوقت اللي فعلا مابنحسش اننا اصلا عشناه

وقت بيمر علينا ......... وعداد عمر بيحسب كل دقيقة .........

تايمر بيعد وقت قضيناه ع المحاورات

بصراحة

أنا احسن وقت قضيته ف المحاورات

بقت بيتي ........ مكاني ........ واهلي وناسي

مابقيتش مجرد منتدي ....... بقت بيت العيلة علي رأي ماما بيضاء القلب

وعرفت ناس منها .......... استحالة انساهم ابداً

ربنا يديم المعروف

بس هو كدة الانسان .................... وقت

انسان = وقت

[مغتربة]

فعلا يا رضوى احسن وقت كان الى بيعدى فى المحاورات

الفكره ان احنا بقينا نقدر نعرف بيعدى علينا وقت فيها اد ايه

حاجات كتير فى حياتنا محتاجين لها نفس التايمر دا علشان ينبهنا احنا ضيعنا عليها وقت اد ايه

رغم ان كتير منها ممكن تكون حاجات فعلا متستهلش

اعتقد دا ممكن يساعدنا فى ترتيب اولوياتنا بجد

الحكمه بتقول انه ما دام الوقت محدود فلازم نحاول نستغل كل دقيقه فيه على قد ما نقدر فى عمل الحاجات المفرحه و المرضيه و المريحه لينا

لكن معرفش لى الموضوع قالب مع الانسان بالعكس

يعنى تلاقيه بيتفنن ازاى يضيع اغلب الوقت مع سبق الاصرار و الترصد

[maroufhany]

الموضوع جميل جدا _ بس انا رائ ان كل لحظة في حياة الانسان يجب ان يستفيد بها الي ما يخدم دينة و دنياه _ فالشطارة هي ان نستغل وقت المحاورات فيما هوا مفيد و كدا الوقت يحسب لنا لا علينا

مهنسد / هاني معروف

www.arch-n.com

[لماضة مصرية جدا]

السلام عليكم و رحمة الله و بركاته

اول مرة احس اني مش بالعة خاصية في الاصدار الجديد دوت قد الخاصية دي

اول مرة شفتها...افتكرت انها هتبقي عداد بالنسبة لليوم....عشان الواحد يحسب اد ايه مثلا وقت قضاه ع النت...اللي غالبا بيبقي ع المحاورات

و لما لقيت ناس ما شاء الله 20 ساعة....قولت يا ربي....مبينموووش

و بعدين لما الذاكرة رجعتلي مع قليل من الفهم

قدرت ادرك انه الزمن الاجمالي

طب بجد ايه الفايدة من الخاصية دي

انا شخصيا....حسيت اني بقضي وقت طويل جدا ع المحاورات....فقولت....لا احجم الموضوع شوية....و دلوقتي بقيت قاعدة ع المدونة....

يا تري ممكن دي تكون حاجة تخلي الناس تبطل تخش ع المحاورات لما تلاقي انها قضت مثلا.....20 يوم في الشهر.....محاوراااااااااااات

مش عارفة

بس حد يقولي....ايه البوينت الخضرا بتاعت الخاصية دي؟؟؟

مسااااكم عداد....و اللي راح مبيرجعشي تاني

[م تيمور المراغي]

طب اعمل ا يه

الساعات معاكم بتمر فثواني