التجربة الجورجية في تعلُم اللغة الانجليزية

[se_ Elsyed]

حقيقةً أنا مولع بكل ما يتعلق بعلم وفنون الإدارة .. مش شرط اقعد أقرأ كل يوم كتب إدارة .. لأ .. لكن على الأقل أشوف واشاهد أفكار بتُطبق بالفعل .. ويا سلام لو كانت بسيطة وقابلة لتطبيق في أي كان وأي وقت ....

بصراحة .. زي ما حصل من قطر في ملف كأس العالم ...

المهم خلينا في موضوعنا ... شاهدت أمبارح في قناة الجزيرة موضوع محاولة دولة جورجيا وهي أحدى دويلات الاتحاد السوفيتي السابق .. محاولاتها لتطوير تلعم اللغة الأنجليزية في البلد وهاتبدأ من المرحلة الإبتدائية ..

تعمل إيه بقى ؟

تصرف ملايين الدولارات على بعثات تعليمية لمدرسين وتبعتهم لندن من 10 سنوات زي ما حصل عندنا .. والنتيجة !!!!! صفر حتى الأن

أصلي بصراحة ما سمعتش عن طفرة حدثت عندنا بعدما رجعت تلك البعثات سواء في لغة أو أساليب تعليم !!!!!

ولا تعين ناس النهاردة وترفدهم بكره بمنتهى الجليطة وقلة الذوق زي ما بيعمل امين الشرطة اللي عندنا ؟

"التعليم" تستبعد مدير "أصول الكتب" بعد تعيينه بشهر واحد

الثلاثاء، 7 ديسمبر 2010 - 19:30

بعد مرور شهر واحد فقط على تسميته كمدير عام لإدارة أصول الكتب، قررت وزارة التربية والتعليم إنهاء ندب محمد جاد الله من منصبه وإعادته إلى الإدارة العامة للتعليم والتدريب المهنى "مبارك - كول".

ولا يجيب لواء شرطة ويعينه مدير الكنترول والإختبارات ويرفده بعد 3 شهور بالظبط لعدم الامانة ... سيادة اللوز طلع حرامي كبير وهليب ؟

ولا يقوموا بعمليات مداهمة للمدارس عشان يراقب الإنضباط ويهزأ المدرسين أمام طلابهم والمدرس المخطيء يعاقبه بنقله لمدرسة تانية ؟

ولا الوزير يطلع كل يوم في التليفزيون لما بقى ولا نجوم الإعلانات الحمضانة ؟

كل ده كلام فارغ وشغل كفتجية مش شغل إداريين أو ناس عاوزه تطور

-------------

جورجيا يا سادة عملت حاجه غريبة وفي منتهى البساطة ..

إعلان ظريف في أنجلترا وامريكا وأستراليا لطلب مدرسين لغة إنجليزية للمرحلة الإبتدائية ... بإقامة كاملة في جورجيا .. وتذكرتين سفر في السنة .... وسكن مناسب ... وتأمين صحي دي أهم نقطة ركزوا عليها ...

والمرتب كام ؟

والله ما هاتصدقوا !!!!!!!!!!!!!!!!!

300 دولار في الشهر

ثلاثمائة دولار أمريكي شهرياً فقط لا غير يُصرف لحامله ..

يعني ما يجيش ثمن سجاير الفرط اللي هايشربها المدرس أو المدرسة اللي جايين ..

لكن المفاجأة كانت مدوية بتوافد المئات من المدرسين على القنصليات الجورجية في تلك الدول ... وبالفعل تم وصول بعض الدفعات منهم . ولما أستضافوا بعضهم في المطار وهم شباب صغير وكلهم حيوية قالوا : إنها تجربة جديدة يريدوا أن يخوضوها ومش هايخسروا حاجه ...

أما عن وزير التعليم الجورجي .. فهو حاجه تفرح ... شاب يمكن لا يتعدى 35 سنة وكله نشاط وحيوية ووجه بشوش مبتسم ...

دي الناس اللي عاوزه تنجح وتطور مش فكهانية البوء ..

[akramgroup]

هو ده التفكير المظبوط وفعلا تفكير محترم

يعنى كمان 300 دولار مش كتير اوى فى مصر

واعتقد كمان ان لو مصر طلبت كده التوافد على السفارة

هايكون اكتر من جورجيا

بس اكيد السفارة هاتقولهم سيبوا ورقكم واحنا هانبعتلكم :)

وكمان ممكن ان المدرسين دول ينضم ليهم مدرسين محليين اثناء تدريسهم

للطلبة وكأنه تدريب ليهم

بس ياترى المدرسين بتوعنا ممكن يفهموا حاجه من الاجانب

تم تعديل 8 ديسمبر 2010 بواسطة akramgroup

[aimen]

جورجيا مين ياعم

حنا حضارة 7000 سنة عاوز تساوينا بجورجيا

[akramgroup]

جورجيا مين ياعم

حنا حضارة 7000 سنة عاوز تساوينا بجورجيا

يا سيدى مفيش مانع اننا نكون حضارة 7000 سنه ونتعلم من ناس تانيه

عارف مشكلتنا اننا لسه ماسكين فى الحضارة ال 7000 سنه ومبنعملش حاجه صح

لحد مابقت الناس اللى عمرها 50 سنه متقدمه علينا فى حاجات كتير

يااستاذى مش عيب ابدا اننا نتعلم من الاخرين

ايه مشكله اننا نطبق تجارب ناس تانيه طالما ناجحه

[aimen]

عمى اكرم

فهمتنى غلط يا حج

انا بعكس الأية

انا مع وجهة نظرك وبقول الرد اللى حيتقال يا معلم

عن نفسى اتمنى نسف الهكيل الإدارى والتعليمى المصرى تماما ونبدا من اول وجديد

[engmido]

300 دولار

شاكب راكب

قايم نايم

يا بلاش

والفيزا دى ليها استقدام؟؟؟

--------------

لا بجد فكرة حلوة

[عادل أبو عمر]

الفرق بين جورجيا و مصر

إن جورجيا عرفت مشكلتها و عرفت الحل و ما اتكسفتش تقول إنها عاوزة حد يعلمها

لكن في مصر القائمون على البلد و على التعليم لا يعترفوا بوجود مشكلة أصلا في التعليم .. دا حتى زي الفل

ولكن المشكلة الحقيقية في العيال التلامذة ... الولاد مش مركزين حضرتك .. لإنهم كتير والحكومة زهئت منهم و من اللي ......

وعشان كدة و عشان الناس تفهم تاني هنرجعلكوا تاني الاعلان الاسطورة

البلد بتتحرك ولا اللى فاته القطر ..انت قاعد ليه قوم شوف شغل البلد بتتحرك

نفسي بس حد يفهمني هي فين يا اخويا البلد اللي بتتحرك دي و لا يمكن احنا مابنشوفش و لا يمكن تكون بتتحرك للخلف ..

تصدقوا فعلا تنفع نظرية .. آه اكيد بتتحرك للخلف عشان احنا مضايقين و حاسين إننا متأخرين زيادة عن اللزوم