إنجازات الرئيس ... من وجهة نظر طفل عنده 10 سنين

[se_ Elsyed]

ولسه والله ما كمل الـ 10 سنين حتى

لكن أنا أًصبت بالذهول من رأيه الصريح في إنجازات السيد الرئيس القائد

مع العلم أني لا أتحدث أمامه عن امور سياسية قد يصعب عليه أن يفهمها في هذا السن المبكر .. ولا هو يجلس معي يتابع حتى نشرة الاخبار

المهم

بالأمس كنا نشاهد برنامج واحد من الناس الذي يقدمه الإعلامي المحترم عمرو الليثي .... وفي فاصل إعلاني تم التنوية عن البدء في تقديم حلقات من برنامج على نفس القناة تحت عنوان " لمحات من إنجازات الرئيس مبارك "

أنا كتمت في قلبي وقلت كويس إني عرفت ميعاد البرنامج عشان ما أتفرجش عليه لأني حافظ الإنجازات دي عن ظهر قلب

وصاحبنا عُمر سمع عنوان البرنامج لقيته بص لي وقال لي : إنجازات ؟!!!!!!!!!!!!!!!!!!!!!!!!!!!!!

وهي الزبالة اللي ماليه شوارع مصر تعتبر إنجازات ؟

والزحمة اللي تموت دي إنجازات ؟

والنور اللي كان بيقطع علينا كل شويه في الاجازة يعتبر إنجازات ؟

والأولاد قلالات الأدب اللي ماليين الشوارع - يقصد البلطجية - تعتبر إنجازات ؟

انا سمعت كده وما قدرتش ارد .. وكل اللي عملته إني مسكت الواد من قفاه وصرخت : الواد ده إبن مين يا جدعان ؟

بجد أنا مندهش إلى الأن ... رد مختصر ومُفحم من طفل صغير هو شاهد عيان على حكم السيد الرئيس من وجهة نظر فطرية ..... وأنجازات لا تُخطئها العين خلال 30 عاماً ركبنا خلالهم صواريخ نفاثه لنعود إلى الخلف في جميع المجالات بفضل قيادته الحكيمة وتخطيطاته اللئيمة ..

عاش الرئيس القائد صانع الإنجازات

وليهلك الشعب الناكر لتلك الأنجازات

ورقصني يا جدع

[Mr MAGED]

هذا الشبل من ذاك الأسد يابو الاسياد

الحمد لله كده اتطمنا علي مستقبل الاجيال القادمة انها مش هتقول حاضر ونعم وخلاص

بس الواحد كده بدأ يقلق عليك وع الولاد اكتر من الأول

هتبقوا محط أنظار رجال الامن اللي ماليين الدنيا حوالينا

خد بالك منه .. ووعيه ميقلش الكلام ده قدام حد غريب

وعاش السيد الرئيس القائد حامي حمي الامن وراعي الرعية

ويلا نخلي المنتدي كله يرقص ع الانجازات

رقصنا يا جدع

[أبوعمار]

ربنا يحميه يا سي السيد

وشكلنا هانشوف قريب في المنتدى عضو جديد سي عمر

عموما هو جاب المختصر المفيد

وفكرتوني انت وسي عمر

بقصيدة قريتها ع الفيس بوك

لمين ما اعرفش

القصيدة بتقول:

لقيت الفانوس مرة ودعكته طلعلى عفريت… شبيك لبيك

قلت أنا للذل باى وودعته وللعفريت هاهريك هاهريك

قالى هأوأو يا إبن الإنسان دانا عفريت مارد بن جان

ما يهمني مكان ولا زمان واطلب وأنا عندى البرهان

*****************

أناعاوز قمح زُرع فى مصر ومرتب يكفى لآخر الشهر

وحكومة متعصرنيش عصر ومسؤولين يبطلوا فشر

وعاوز عيش من غير طوابير وإنفاق حكومى بدون تبذير

وانتخابات من غير تزوير ورئيس سابق أشوفه كتير

*****************

عاوز فى بيتى شيكارة دقيق وتبرير مقنع لأى حريق

ومجلس شعب بدون تصفيق وفى كأس العالم لينا فريق

وأكلة كباب مشوى على السيخ مع عيالى فى شرم الشيخ

وأشرب فى القسم عصير بطيخ وأخرج سليم بدون تلطيخ

ونفسى الضحكة ترجع تانى ورصيف للمشى أنا وخلاّنى

وجنيه مصرى زى البرانى يشترى حتة لحمة ضانى

*****************

رد العفريت عليا بغشم وقال يا مصرى ماكنش العشم

بص.. أنا ممكن أشيل الهرم واسدلك الأوزون اللى اتخرم

وأرجعلك الأكل اللى اتهضم وتمأمأ البقرة كأنها غنم

أبنيلك قصر من العدم وأقولك معنى شرم برم

بس طلباتك طلبات ملموس عقله خلاص أكله السوس

ده تخطيط يا بنى ومدروس إنك تعيش على طول موكوس

وأحنا بناخد منكوا دروس إزاى يبقى الجن متعوس

ويا ريت ترجعنى تانى الفانوس وأنا راضى أعيش محبوس

بدل ما أخرج واتبهدل زيك ويتلم موكوس على متعوس

يعني مش بس الأولاد الصغيرين

ده العفاريت يا جدعان

قالوا جاااااااااااي

على رأي سليمان باش غانم في ليالي الحليمة

[se_ Elsyed]

مش هاخاف عليه لو فهم وعرف إزاي يقول كلمة الحق ويكبر في يوم ويقول للظلم لأ

إيه ده ؟

المعجزة حصلت وبقيت أقول شعر .. أنا خفيت يا سعاد خفيت خفيت

لأ بجد ... الواد من وقلت للتاني بيقول لي : انا عندي 10 سنين دلوقت يا بابا ولسه بأشوف نفس الرئيس هو هو .. هو إحنا ما عندناش غيره ؟

والله أنا لا اسخر ولا ابالغ ... لكن هذا يحدث بالفعل

قلت له : يا روح مامتك إنت من 10 سنين منهم سنتين رضاعة مش محسوبين وزهقت وجبت جاز ..

اومال أبوك اللي بقى له نيف وثلاثون عاماً ما شافش غير بابا حُسني وانجازات بابا حُسني وأولاد بابا حُسني بل امتدت الايدي الأثمه لتُريني أحفاد بابا حُسني اللي البلد وقفت على راسها لما واحد فيهم مات موتت ربه في حين إن المئات يومياً يموتون بسبب عك بابا حُسني ...

ده على كده أبوك يتعمل له تمثال من العجوه يا ولدي اللي صبرت ده كله من غير عٍرق الناس ما يطق عندي أو من غير ما اتحول وأبقى حاجه تانيه غير إن أكون بني ادم ...

حد يشتري الواد ده أو ندخله راس في راس مع خروف لزوم العيد ؟

[لولا]

يااااه طفل عنده عشر سنين حاسس بكم الرفض لكل مظاهر الفساد اللى قادر انه يشوفها فى سنه الصغير دوت.. وقادر على اصدار

احكام منطقيه وتقييم انجازات وحال بلد بصدق شديد وفى كام كلمه.

حيبقى احساسه ايه يا ترى بعد خمس سنين كمان فى ظل استمرار منظومة الحكم الفاسد اللى نخرت عظم كل شيء..

مصر تعبت قوى يا احمد .. واحنا كمان تعبنا.. والنظرة لكل شيء اختلفت.. مشاعر الرومانسيه وافتقاد كل شيء فى مصر

واحنا نازلين اجازة بقى طعمه مختلف..مختلف قوى.. بيرعبنى جدا الفرق بين احساسي دلوقتى وقبل مجرد سنتين !!

غريبه قوى ان كل سنه بتعدى بتشقلب حاجات كتير..

الفساد بقى بيتطور بسرعه صاروخيه.. كل شيء بيشتكى فيكى يا مصر..

بقالى كام شهر للأسف بتفرج على برنامج بلدنا بالمصرى .. اعصابى كل يوم بتتلف بجد

ضيف عليه برنامج عمرو الليثى يبقى كده فاضل ايه فى اى مشاعر فيها امل فى اى شيء !!

ياريت عُمر يشوف اللى بنحلم فى يوم نشوفه ..ياريت يعيشه هو وجيله.. ياريت يبقى الأمل قُريب كده ونلحق نشوف مصر واقفه على رجلها ..

ياريت مصر ترجع مصر مش عزبه كبيره لسعاده الرئيس وشركائه.

ربنا يخليلك عُمر ويبارك فيه.

سورى انا مش فى مود الكوميديا السودا .. حاسه بس بدراما سودااااااااااااا !!!! :closedeyes: :closedeyes: :closedeyes: :closedeyes:

لولا

[nightmare]

لأ بجد ... الواد من وقلت للتاني بيقول لي : انا عندي 10 سنين دلوقت يا بابا ولسه بأشوف نفس الرئيس هو هو .. هو إحنا ما عندناش غيره ؟

ههههههههه , 10 سنين وزهق , قله يا حبيبي فيه واحد اسمه عمك نايتى داخل على الثلاثين وما شفش غيره , لدرجة انه كره سنة ميلاده لانها نفس السنة اللى اتولى سعادته الحكم وكره الشهر اللى اتولد فيه علشان ده نفس الشهر اللى اتولد فيه جلالته, وكره البرج بتاعه لان ده نفس برج جلالته.

بس هذا الشبل من ذاك الأسد يا ابو عمر , هما دول الأمل القادم , ربنا يجعل ايامهم احسن من ايامنا ويباركلك فيه

مع تحياتي