صباح الخير يا جاري ...

[se_ Elsyed]

ناس كتيره فاهمه إن الحياة عبارة عن أربعة جدران فقط .. وطالما أنا في السليم في ومبسوط بالداخل يبقى فليذهب الأخرون إلى الجحيم

وهما بكده مش فاهمين إن الحياة هات وخد ... وزي ما الأخرون بيحتاجوا لي .. فانا بالتأكيد احتاج للأخرين

الموضوع ده عباة عن خلاصة خبرتي في موضوع الجيرة والتعامل مع الجيران ..

يمكن الرجالة بيبقى دورهم محدود في الموضوع ده عشان أعمالهم ومشاغلهم لكن هذا لا يعني إن الواحد يبقى ساكن في بيت طويل وعريض ويبقى معزول عن باقي جيرانه

ولإن الوسط والإعتدال حلو في كل شيء ... فمن وجهة نظري ... لا إختلاط زائد عن الحد يؤدي إلى مشاكل مزعجة .. ولا إنعزال تام يؤدي إلى فجوة وجفاء بين الجيران ..

حكيت لكم إني أخدت شقة جديدة بقى لي ييجي شهرين ...

وفي البداية لاحظت إن المبنى ينقصه بعض الأشياء ... مثل

- ضرورة وجود بديل لحارس العقار اللي في إجازة سنوية طويلة عشان زوجته مريضة

- تنظيف المبنى بشكل دائم

- وضع حلول في حالة إنقطاع المياه وده عادي في السعودية وفي كل المناطق

- أهم مشكلة بل كانت مصيبة هو حل مشكلة المياه اللي بتنزل من الحنفيات فوق درجة الغليان ... ولكم أن تتخيلوا إني عشت يمكن أسبوعين في البداية لوحدي هنا لم أخذ حمام الصباح ً إلا بعد المغرب أو ليلاً لإن المياة في الصبح ولحد بعد العصر كانت تؤدي إلى حروق حقيقية ....

وبالتالي لقيت الكل متنح ... والعمارة المكونة من 20 شقة الجميع سعداء ومتعايشين مع المشاكل في تناغم عجيب ...

فأبتديت أكتب لهم منشورات واعلقها على الأسانسير بإننا لازم نعمل صندوق لعلاج مشكلة أنقطاع المياة ولتغطية الخزان العلوي عشان المياه تبقى صالحة لإستخدام البني أدمين وكمان لازم نضغط على مكتب العقار عشان يوفر حارس وما ننتظرش اللي هايرجع من أجازة ..

وكانت ردود الأفعال هايلة وغير متوقعة ... وماحدش عبر أهلي ولا قال لي أصمت أيها المجنون ثكلتك امك

بعدها بكام يوم علقت منشور تاني - زهيري كان عندي وقرأه وفضل يضحك - دعوتهم فيه إلى الإجتماع بعد صلاة التراويح عشان نناقش الموضوع .... ولم يستجب ويتصل بي إلا يمكن 6 شقق والباقي كبروا الجيم وريحوا الدال

وأول سؤال سألته لهم لما أجتمعنا ... هو أنتوا بتعانوا برضوا من المشاكل اللي ذكرتها دي ؟

قالوا طبعاً ... وبالنسبة لمشكلة الميه المغلية .. فتعودنا إننا نملى البانيو أو جرادل ... والكوز هو الحل ....

وطبعاً تعارفنا جميعاً وعرفت إن كلهم بدون إستثناء ما بين أطباء ومهندسين أو أخرون في وظائف مرموقة .... وعندنا في العمارة ييجي7 جنسيات مختلفة ما بين مصريين يمكن 3 ... وأردنيين ولبنانيين وسعوديين وسودانيين وفلبينيين وباكستان وهنود

وللاسف وأقولها للأسف ... كل الهنود والباكستان أستجابوا ومعاهم ساكن مصري وأخر لبناني ... والباقي كلهم ولا كإنهم موجودين وطالعين نازلين وكإنهم مش واخدين بالهم ..

المهم ... بعدها بيومين تلاته قرات إعلان في جريدة الوسيلة عن جهاز لتبريد المياه بيوضع على الخزانات ويشتغل 24 ساعة وهو نفس فكرة المروحة بس كبير وبيوجه الهواء إلى أسفل وبه فتحات لخروج الهواء الساخن .... وثمنه 600 ريال !! يعني كل شقة هايقع عليه في حدود 30 ريال

المهم أنا كنت لسه راجع من أجازة والشقة كلفتني كتير جداً .. فتبرع مهندس باكستاني ودفع لي ثمن الجهاز واتفقت مع الشركة وجم ركبوه وقعدت معاهم أكتر من ساعتين وقلت كله لوجه الله ... وتاني يوم أجرت عامل وأشتريت له أدوات لتقطيع الموكيت اللي لقيت منه كميات قديمة كبيرة مرمية على السطح .. وخليته قطع الموكيت على مقاس مواسير المياه الممتده على سطح العمارة الشمس بتنقح فيها طول اليوم وكان إيدي بإيده وساعدته عشان يعمل شغل مظبوط ....

وبجد يا جماعة .. مافيش يومين إلا والموضوع أختلف 180 % درجة ورجعت المياه طبيعية كما كانت ...

والكل بقى يتصل يشكرني ويدعوا لي ..

فقلت أضع منشور أخر أطالب الناس إنها تدفع الفلوس للراجل وقلت لهم إحنا عملنا كذا وكذا وكذا والتكلفة كذا واللي تحملها فلان وتليفونه كذا ....

ولا الهوا إبن عم الطراوة ... والراجل لبس نصف ثمن الجهاز وحتى الأن الباقي متقلين ودانهم ومستنطعين في الموضوع .. وقلت له ما تزعلش وهانوزع المبلغ على الناس اللي دفعت لأنك مالكش ذنب .... في رد فعل غريب وكأن اللي واخد شقة بـ 30 الف سنوياً وساكن في مكان محترم وبيستفيد من الخدمة مثله مثلنا .. كإنه مستكتر المبلغ أو بيقول دي عالم هبل وخليهم يدفعوا هما وأنا اعيش في النعيم ..

وللاسف مره قابلت واحد من المتنحين دول في الأسانسير طلع شغل في بنك كبير هنا ... وأعطاني محاضرة عن الحقوق والواجبات وإن ما أفعله أنا المفروض إن المكتب ملزم به وجزاك الله خير على تعبك معانا و و و و و و .... طب إدفع يا عم ؟ تقل ودانه وسابني ومشي

طب يا جماعة المياه مره قطعت وأتبهدلنا وما ينفعش كده ؟

صباح الطراوه

أخيراً .. قلت ألجأ للدواء المُر .... وكل واحد مع نفسه وياكش تولعوا ..... و لا مؤخذه طظ فيكو ... وعلى رأي المثل السعودي " كلوا تراب "

روحت نازل شاري خزان إحتياطي ظريف سعته 600 لتر .. مع موتور رفع صغير .... وبالمواسير بالتركيب بالحركات إتكلف 1000 ريال ...

وأهو قد كان يا سادة يا كرام ... المياه قاطعه من 3 أيام .... وأنا الحمد لله رب العالمين عايش في سلام نفسي ... وأصحو كل صباحً لأخذ الشاور المعتاد وبأغني قصيدتي المفضلة " الميه تروي العطشان وتطفي نار الحيران وبيليف مي تيك أشاور وأدعي لي " وباعلي صوتي عشان الجيران يسمعوا ....... وكلهم الأن بيبكوا وينوحوا وخمسين إتصال تليفوني بي وكأني خلفتهم ونسيتهم عشان والنبي كلم لنا المكتب أو شوف لنا حل ....

وطبعاً نفضت لهم وقلت لهم ...........هههههههههههه ... والله لسه واحد متصل بي دلوقت وأنا باكتب الموضوع بيعيط ... ورديت عليه وقلت له ربنا معاكم وشدوا حيلكم يا ولاد وإن شاء الله المياه تعود إلى مجاريها وتستحموا وتنضفوا ...

ومنهم واحد من جنسية عربية أول مره يتصل بي أول أمس ويقول لي والنبي شوف لنا حل .. وكمان الأسانسير الباب بتاعه بيعلق بش شغال ولازم له تصليح بسيط والنبي كلم لنا المكتب ( المكتب على بُعد 50 متر من العمارة ) ... فمسكت نفسي وقلت له هو سيادتك دفعت معانا في ثمن جهاز تبريد المياه اللي متركب من شهر ونصف ؟ قال لي لأ بصراحة لسه ..... فقلت إحنا لسه خارجين من رمضان ومش وقت الشتيمه دلوقت .... فخليني أقفل السكة في وشه مؤقتاً إلى إشعار أخر ...

يُتبع

[akramgroup]

بالمناسبة يا س س

ساكن فى الشقة اللى تحتى مهندس مصرى مع اسرتة المكونة من 5 او 6 اشخاص

وبما انك عارف موضوع مشاكل المياة فالحارس عندنا كل ماتخلص الميه وقبل مالخزان الاخير يخلص يتصل زى الشاطر

بالراجل بتاع الوايت

المهم الراجل بقى المهندس ده كل ماييجى الحارس يسأله فين الفلوس بتاعة الميه

يقوله ميه ايه ماانا عندى ميه ( كانه فاكر انه ساكن على ضفاف النيل وان حنفية المية بتاعتة واصله على النيل مباشرة)

يعنى من الاخر شغل استعباط على شوية استهبال ولو نقول انه راجل غلبان او وظيفته على اد الحال كان مشى الحال

بس بجد فى ناس كده معندهاش اى كرامه ولا اى ذوق وعايشين على حلول الاخرين

ربنا يعينك ويعنا على امثالهم

بس عجبتنى فكرة الخزان دى

بس قلقان اعملها الاقى كل الناس تعترض عشان هايقولوا انى بخلص الميه بتاعتهم وكده

ولا ايه؟

[Howayda Ismail]

ييجي7 جنسيات مختلفة ما بين مصريين يمكن 3 ... وأردنيين ولبنانيين وسعوديين وسودانيين

وفلبينيين وباكستان وهنود

ايه القوى متعددة الجنسيات دى شكل حضرتك ساكن فى مبنى هيئة الامم المتحدة.........هههههههههههه

قبل اى حاجة احسن ان حضرتك اتعاملت مع الناس دى كده من الاول لانك كنت حتتعب قوى

الخيبة فى موضوع دفع مستحقات العمارة بتيجى من ناس ميسورة جدا وراسمة برستيج ايه ...اخر حاجة

بس للامانة مش كل اتحاد ملاك بالشكل ده فى عمارات متعاونة جدا وبرضه فى عمارات كتيرة

نفس المشاكل واحدة بتوصل لخناقات

بخصوص بعض المشاكل هنا عندنا واستهبال بعض الناس اللى عاوزة تعيش سفلقة كده

زوجى قالهم بالحرف اوعى حد يجى يطلب منى مليم واحد وعمل زيهم

كان احد السكان متولى رئاسة الاتحاد وكان فى اجتماعات ومنشورات على باب الاسانسير

زوجى ماكنش بيحضر الاجتماعات دى عشان ظروف شغله وماكنش بيمانع فى الدفع لكن كانت فى

ناس بتحضر وتتمنع عن الدفع او تماطل الساكن لحد مازهق وخصوصا لما شككوا فى ذمته

واتولى موضوع الاسانير ومواتير المية لان دى اهم حاجة فى العمارة والدفع كان فيها منتظم

من الاول وترك بقية الامور يتخانقوا عليها مع بعضهم وهم اللى دلوقتى بيغنوا ظلموه

[أسد]

في مصر أسكن في عمارة كبيرة

عدد سكانها كبير ...

زتحتاج لمجهود خرافي لرعاية أمورها ..

ومبالغ طائلة لصيانة الأسانسيرات ومواتير المياه لأننا نعتمد على مواتير المياه دون الإعتماد على الخزانات مطلقاً .. والنظافة والكهرباء ..

أمور كثيرة ومتعددة ..

أسكن في تلك العمارة منذ حوالي 15 سنة .. كانت جديدة وكان عدد السكان قليل .. ولكن لما اكتمل سكان العمارة زادت المشكلات .. وحيث أن بعض الملاك فيها لا يعيشون في العمارة ويؤجرون شققهم .. فبالتالي جاء في العمارة ناس أشكال وألوان ولا يهتمون بحقوق جيرانهم لأنهم شوية وماشيين..

المهم.. ف\كل سنة عن السنة اللي قبلها تزداد الأمور صعوبة .. والمشكلات تزيد .. وفواتير المياة تأتي بمبالغ كبيرة جداً لأن العمارة كلها على عداد واحد

ننزل مصر في أجازتنا السنوية نجد العديد من المشكلات .. والتي لا تنتهي .. والمسئولون عن إتحاد الملاك .. دايرين على الشقق يطلبوا الفلوس المستحقة على كل ساكن كمبلغ شهري متفق عليه .. وكأنهم يتسولون تلك المبالغ .. أو كأنهم حياخدوها ليهم مش للعمارة ..

سكان العمارة أحوالهم جيدة .. ولا يوجد من هو يشكو الفقر مثلاً .. وإلا لما كان يسكن في تلك العمارة ..

في السنة الأخيرة .. كانوا يتأخرون عن دفع فواتير المياه .. فيتم قطع المياه عن العمارة من مصلحة المياة .. وطبعاً محدش يقدر يقعد من غير مياه

اتفق بعض السكان وأنا منهم على أن نركب عدادات منفصلة لنا .. حتى نرتاح من مشكلة المياه .. وبالفعل .. عند السؤال في مصلحة المياة .. قالوا لنا ان ممكن كل 4 شقق يشتركوا في عداد .. وبما ان التكلفة حتكون عالية وافقنا لأن في الحالة دي كل 4 شقق حيركبوا موتو ويعملوا خط مستقل لرفع المياه

المهم عملنا كده . علشان نخرج من مشكلة باقي السكان .. كنا حوالي 12 ساكن .. طبعاً كانوا بيعاملونا على أننا خونة .. وبعنا القضية ..

مش كده وبس .. لا زالوا لم يدفعوا فواتير المياه بانتظام ولا يدفعوها إلا بعد قطع المياه .. يجروا يدفعوا الفواتير علشان المياه ترجع ..

الحقيقة أننا نفتقر إلى المشاركة الجماعية .. بشكل كبير .. ولا نعرف كيف ندير ونسير أحوالنا بشكل جماعي ومنظم

أعيش في الرياض في مجمع سكني .. تنقطع المياه على فترات كما أشار سي السيد في كل مكان في السعودية ..

اتفقنا جميعاً على أن نجمع مبلغ شهري .. يوضع في صندوق لا يفرغ أبداً .. منذ 3 سنوات .. الحقيقة ان الجميع ملتزمون

جيراني مصريين ولبنانيين وسوريين وفلسطينيين

مش دايماً الأحوال وحشة .. ولكن في سنوات سابقة وفي سكن آخر كنت أسكن فيه من قبل كنا نعاني من عدم تعاون الجيران

[Howayda Ismail]

مشكلة فاتورة المياه ان شركة المياه بتتعامل مع المستهلك بنظام الشرائح بمعنى كلما

ارتفع معدل الاستهلاك يدخل تحت فئة شريحة اعلى زى الكهرباء

ولان الاستهلاك على عداد واحد فيكون قيمة الفاتورة عالى ومبالغ فيه ايضا

والمشكلة دى اتعرضنا لها فى بداية السكن وكان عدد كبير من السكان يرفض يدفع فقرر عدد من

السكان واحنا منهم تركيب عداد مستقل لكل شقة باسم صاحبها والان بندفع ربع قيمة مكنا بندفع

قبل كده ولما قطعوا المية انقطعت عن عددات معينة بس للناس اللى مادفعتش

احسن نظام متبع فى احدى العمارات بجوارنا مع اول المشترى اخد الشقة دفع مبلغ مالى فى حدود

6 او 8 الاف جنيه دفعة واحدة تكون مبلغ كبير جدا لنظر لكثرة عدد الشقق وضع فى البنك

باسم اتحاد الملاك ومن ارباحه تدفع كل مصاريف العمارة بالاضافة لمرتبات 2 موظفين من شركة

امن خاصة للحراسة ومرتب بواب