أجازة !!!

[Scorpion]

الساعة 6 ... المنبه بيرن ... اوتوماتيكي ايدي عارفة طريقها للزرار تقفله ... 10 ثواني و اقوم ... اضرب رجلي في الشبشب و عالحمام ... ابص في المراية علي دقني و ابتدي امسك فرشة الحلاقة .. و مع اول رغوة افتكر ان النهاردة الحد .. أجازة ... ابتسم و اشيل الرغوة من غير ما احلق .. و ارجع ارمي نفسي في احضان السرير بسعادة ... و لكن مافيش نص ساعة و اصحي علي صوت المكنسة الكهربائية ... الماركة اسمها Silent –energy ... و لكنها في الحقيقة ليها صوت منشار كهربائي بتاع نجار شغال في مغلق خشب ..

ما علينا ما هو انا كده كده لازم اصحي علشان عندي كذا حاجة متأجلة و لازم اعملها النهارده ... تبتدي بأيه يا سكوب تبتدي بأيه يا سكوب ...

نغسل العربية اللي العيال ابتدوا يكتبوا شعارات علي التراب اللي عليها..

و انا رايح ناحية الجراج الاقي بوسطة علي ترابيزة المدخل ... قررت اني ابص بصة عليهم قبل ما اغسل العربية ... اسيب مفاتيح العربية عالترابيزة .. اقرا كام جواب و اللي كان في وسطهم كام فاتورة ... و بعدين اتجه ناحية صندوق الزبالة علشان ارمي الأظرف الفاضية و الأعلانات ... و لكن الاقيه مليان عالآخر ..

اسيب الجوابات و اشيل صندوق الزبالة و اروح علشان أفضيه بره ...

لكن الأول فكرت في الفواتير فطلعت دفتر الشيكات اتطمن انه موجود ولا نسيته كالعادة ... المهم لقيته و لكن كان فيه آخر شيك ... رحت اوضة المكتب ادور علي الدفتر الجديد اللي كنت سحبته الأسبوع اللي فات ... عالترابيزة لقيت ازازة الكوكاكولا اللي كنت حشربها امبارح بالليل و نسيتها هناك ... اخدتها و قررت احطها في التلاجة تاني ... و انا رايح المطبخ لاحظت ان فازة الورد اللي علي ترابيزة الصالة مبقاش فيها ميه .. سبت ازازة الكوكاكولا علي الترابيزة و اخدت الفازة علشان املاها ميه .. جنبها لقيت النضارة اللي كنت بدور عليها امبارح طول الليل ... قررت اروح اسيبها علي المكتب بدل ما انساها تاني و افضل أدور من جديد .. و بعدين ابقي املا الفازة ميه ... سبت النضارة عالمكتب و رحت املا شفشفق ميه املا بيه الفازة ... و انا بملاه علي ترابيزة المطبخ الاقي الريموتكونترول بتاع التليفزيون .. مليون في الميه جونيور هو اللي سابه كالعادة هنا .. اقرر ان بعد ما املا الفازة ميه حبقي احطه في مكانه في الليفينجرووم ...

ابتدي املا الفازة .. شوية ميه اتحطوا جواها و شوية اكتر خلصوا عالباركيه ... و عليه رجعت لبلكونة المطبخ .. اسيب الريموتكونترول علي الترابيزة هناك و آخد ممسحة انشف بيها الميه اللي وقعت مني ... ارجع للصالة و انا بفكر في حاجة تخص الشغل ... و بعدين اقف في نص الصالة علشان افتكر انا كنت حعمل ايه بالممسحة اللي في ايديا دي ...

الخلاصة .. آخر النهار جه ... العربية ما اتغسلتش ... ما دفعتش اي فاتورة ...صندوق الزبالة مليان ...فيه ازازة كوكاكولا علي ترابيزة اوضة المكتب ... الورد من غير ميه ...فيه شيك واحد في دفتر الشيكات ... مش لا قي الريموتكونترول بتاع التليفزيزون ... و لا النضارة ... فيه بقعة منيلة بستين نيلة علي باركيه الصالة و ما عنديش اي فكرة فين مفاتيح العربية ...

وقفت شوية افكر ازاي و بالرغم من اني ما وقفتش لحظة طول النهار.. و احساس الأجهاد الجامد ده ... ماانجزتش اي حاجة اليوم كله ... فقررت اني اقعد شوية اكتب كام سطر اسألكم عن تفسيركم للحالة دي ..

هو انا عََجِّزت و الا حاجة ؟؟؟

[أحمد سيف]

روعه يا عم سكوب ... لأ انت ما عجزتش ولا حاجه ده حال كل الناس ... الكل بيجري والوقت بيخلص والشغل عمره ما بيخلص.

الحل ايه ... خذ لك بريك ... خذ لك كيت كات.

تم تعديل 5 سبتمبر 2010 بواسطة أحمد سيف

[عادل أبوزيد]

شعرت بدوار خلال قرائتى الأولى و دوار أشد فى قرائتى الثانية بتركيز أكثر.

ما سبق كان إستهلالا لابد منه

فكرت أن هذا الموضوع يمكن أن يكون موضوع مسابقة أين مفاتيح السيارة ؟ أيت الريموت كونترول ؟ أين الأظرف الفارغة و الإعلانات ؟ و يكون شرط المسابقة قراءة الموضوع مرة واحدة فقط فعلا تنفع مسابقة فقط يبقى ما هو عنوان المسابقة ؟ إبحث مع الفاضل سكوربيون مثلا

[Howayda Ismail]

احتمال عشان كل هذه الاشياء ثانوية بالنسبة لحضرتك يعنى ممكن حد يقوم بالشغل ده عنك فالحماس

مش واخدك انك تنجزه بالسرعة المطلوبة وبالطبع ده مش بيحصل مع شغلك الاساسى لانك المسئول الاول

عنه وفى نفس الوقت الانسان بيحتاج لبعض الكسل العقلى والبدنى عشان يرتاح من طاحونة الحياة

وصراحة الوصف الدقيق الذى ذكرته حضرتك بيحصل معايا كل يوم فى شغل البيت اانا باحب اعمل كل حاجة

بنفسى بالاضافة لمطالب البيت الخارجية لكن بفضل ربنا بنجز جميع الاعمال اللى ورايا بسرعة دون كلل

لكن بيجى على وقت باهنج تبعا للحالة النفسية والمزاجية(حالة الكسل) الاقى اليوم عدى عليا لكن باعمال اقل

بس الملاحظ ان الوقت ماعدش فيه بركة زى الاول الزمن يطوى بسرعة رهيبة

[أسد]

شوف .. أول حاجة تعملها ..

إنك تقرأ القصة بتاعتك دي مرة تانية ..

لما تقراها حنتعرف فين مفتاح العربية ..

لما حتلاقي مفتاح العربية ..

غير هدومك ..

وخذ العربية ... وروح مكان هادي ريح فيه أعصابك ..

أو روح السوبر ماركيت .. إشتري إحتياجات البيت ..

ما هو يا مكان هادي .. يا إما السوبر ماركيت ..

وبما إنك مش حتعرف تروح مكان هادي .. يمكن لأنك زي حالاتي مش بتعرف تروح لوحدك

يبقى أحسن حاجة .. تعمل زيي برضه وتروح السوبر ماركيت ...

بس إوعى تنسى تجيب كوكاكولا ساقعة بدل إللي إنت سايبها من إمبارح دي وزمانها سخنت

وممكن تدور على سدادات للأذن .. غحتياطي علشان تعرف تنام لك شوية الأسبوع الجاي .. في يوم الأجازة

وإطمن

إنت ماعجزتش ولا حاجة

ومش إنت لوحدك إللي بيحصل لك الظواهر الغريبة دي ..

كلنا هذا الرجل ..

[Scorpion]

طمنتوني ربنا يخليكم ليا ....

ده انا مفاصلي سابت لما شفت الأستاذ عادل بيعلق عالموضوع ده .. الراجل ما بيتحركش الا في المشاكل الكبيرة و كونه يشرف باب الأبتسامات قلقني بصراحة .. و لكن في النهاية كرجل اعمال ماهر و بمناسبة رمضان اداني فكرة بمليون جنيه و المشكلة نعمل بيها فوازير رمضان و نطلع بسبوبة ...

لكن لما أسد يقول كلنا هذا الرجل .. نبقي ناخد نفس عميييييق و بالنا يستريح ... ربنا يخليك يا كبير .. و اول ما اجيب الكيت كات بتاعت احمد سيف حديك انت الكيت يا عم .. و كفاية عليا الكات ... دي حتي بتقول نياو ...

اما اللي كتبته هند .. فبصراحة مش لاقي رد مناسب لأني في انانية رجولية بحتة ما فكرتش في النص التاني من الموضوع .. النص اللي بيصحي هو كمان يوم اجازته علشان يشتغل في بيت اتمطع بسلامتي الاقيه نضيف ... و كل اللي قدرني ربنا عليه اني اشتكي من صوت المكنسة الكهربائية ... حتي الحاجة الوحيدة اللي نسيت تعملها ( تحط ميه للورد ) يا ريتني كنت سبتهالها علي الأقل ما كنتش طرطشت ميه في دائرة قطرها مترين ....

والله يا ستات انتو ليكو الجنة ....

[Salwa]

بجد يعنى ياكامل باشا ...!!

لابد تاخد وسام ويكفيك شرف المحاولة ..

اصل بس الستات هما اللى يقدروا يعملوا اربع حاجات ف نفس الوقت لكن الرجالة ؟؟ حتى لو حاولوا ...!!! صعب يعنى عليهم ..

مفاتيح العربية ....كويس انها ضايعة ف البيت ..

طيب ايه رايك بقى.. ف اللى كان برة البلد على شاطئ رائع مع زوجته واولاده الصغار وقبل ما يقعدوا ويستقرا يعنى على الشاطئ ...طلع كل الحاجات من شنطة العربية و... رمى المفاتيح جوة ..وقفل الشنطة؟؟؟

واكتشف ده لما جينا نمشى ؟؟ واضطر يرجع لوحده ...يجيب المفاتيح التانية من البيت ؟؟ يعنى ساعتين ف انتظار حل الاشكال .. ..

بس بجد...

احييك بشدة وعنف....لأنك محاولتش تصلح المكنسة الكهربائية لأن صوتها عالى ...!!!

بجدددد يعنى ..

احكى لك ( حاجة تانية من الحاجات الرجالى بتاعتكم )..

من ييجى تلاتين سنة ..مكانش فيه بقى لافضائيات عربية ولا مصرية ولا غيره..

هما قناتين هنا الاولى والتانية وكان الله بالسر عليم ..

عاصرت انا تطورات هنا غريبة الشكل يعنى ...

المهم...

كان عندى ف البيت ييجى اربع راديوهات وبسسسسسسسسس راديو واحد فيهم هو اللى بيجيب الجزائر ..!! او اذاعة لندن ((يمكن كبار السن يفتكروا الصوت المعروف ...هنا لوندون ))...كنت بعتز بالراديو ده قوى يعنى قوى قوى ...معايا حتى وانا ف المطبخ ..وساعات اسمع عبد الحليم ( آه والله ) كان يبقى هنا...وكمان شادية ؟؟ آهو عربى وخلاص ..وساعات اسمع اخبار وكدة يعنى ..

الراديو برضه غير شرايط التسجيل ...ده مباشر..

ف يوم..

الراديو كان فيه خروشة ...(( ياريتنى ما اتكلمت ولا اشتكيت )) ..

انا بسسسسسسسس قلت له... شوف الراديو ده فيه ايه؟؟؟ ياريتنى ما اتكلمت ...بجد يعنى ..

فتح الراديو بكل فن ...وثقة ..

بدأ يصلحه بكل انتباه...

فوجئت...

انه ...

صلح الراديو ...وكان بيشد حاجة كدة غريبة ..و...قطعها ...

وقاللى ...

ناس اغبيا فعلا ...آل وتصنيع يابانى ...ايه الفتلة اللى حاطينها دى كلها ؟؟؟؟

وعنها....

الراديو اتصلح ومبقاش فيه اى خروشة ...بقى يجيب محطات غريبة ...برتغالى وفرنساوى ...واسبانى طبعا ..

اتلغت كل المحطات العربى ...

والخلاصة ...

انا فعلا فعلا فعلا ....متخيلة ومقدرة حجم الكفاح خصوصا كفاح يوم الأحد ..

اسعد الله اوقاتك ...

دعيتلك انا انهاردة ..ربنا يسعدك زى ما اسعدتنا ورسمت البسمة على وجوهنا جميعا ..

على فكرة ..

الليلة ليلة القدر ..

دى عندنا ليلة مفترجة

وانا دعيتلك ودعيت لكل الناس ربنا يسعد الجميع ويحقق لكل انسان كل اللى بيتمناه ..

سلام :roseop:

[اغابي]

بصراحة يا استاذ سكوربيون

انت ما عجزتش ولاحاجة - كل الموضوع شوية ملاحظات ناخد بالنا منها

يوم الاجازة بالنسبالى يوم خمول وكسل وتوهااااان ومش منظم بالمرة

فعملت شوية ترتيبات وتغييرات لليوم داه سبيشيل يعنى

زى مثلا

مش حادخل المطبخ اطبخ مش كفاية الاسبوع كله وانا بطبخ

يوم الاجازة الاكل ديليفرى لغاية باب البيت

كمان حاشرب قهوة ونسكافية كتير اوى

وليه فى يوم الاجازة بانسي اشرب قهوة ونسكافية

يمكن علشان انا للى حاعمل لنفسي مش فراش مكتبي

وبكدا مش حابقى دايخة ولا مرهقة ولا تايهة

كمان اطلع اللعب للاولاد اللى مخبياها طول الاسبوع - لعب الطوارئ

ودى مفاجاه الاجازة علشان اخلص من جملة - مامى انا زهقان اعمل ايه

:blink:

وحاولت اتفاوض مع خدامتى الهندى بس للاسف فشلت

لان اجازتها فى اليوم داه ورفضت اى يوم بديل فى الاسبوع

بس مش مشكلة انا مش فارقة معايا ما هو كدا كدا

مش حادخل المطبخ غير اعمل قهوة او نسكافية

كمان فكرة رائعة

اللاب توب مش حيفارقنى ولا ريموت التلفزيون

واضرب عصفورين بحجر استغل التلفزيون والنت

ولا حافارق منتدى محاورات المصريين واقرا كل اللى فاتنى طول الاسبوع

mfb: smk: md2: bv:-

وو بكدا الاجازة اخر لازازة

اصل العقل السليم فى الجسم السليم

اى والله فى الجسم السليم

وانا اهلاوى صميم وزملكاوى قديم ميم

:lol:

اغابي

[عنبو]

دى مشكلة اغلب الرجال المتزوجون

علشان كده الواحد ناوى يبعد عن الشر ويغنى له