لوجو رمضانى لمحاورات المصريين

[عادل أبوزيد]

تفضل الفاضل MaYousof بتصميم لوجو رمضانى ليكون شعارا لمحاورات المصريين خلال شهر رمضان الفضيل.

و قد تم وضع الشعار فعلا صباح اليوم.

كل الشكر للفاضل

MaYousof

[محمد عبدالعزيز]

لوجو جميل فعلاً ومناسب للشهر الكريم

كل سنة وانتم طيبين

[pocy]

تسلم ايديك بجد شكله شيك جدا ومناسب ورمضان كريم يا محاورات

[ابو محمد بن مصطفي]

فعلا يسلم ايديه تتلف في حرير ...

كل سنة وانتم طيبين

ويجعل صباحكم كنافة

[shiko]

بكام ...خد منكم كام ؟؟

اصلى عارف انه غالى وبيضرب فى العالى ..

نصيحة فاصله معاه ..اصل اللوجوهات دلوقتى بقيت برخص التراب

فبلاش تكلفوا نفسكم ..وتاخدوه من حد بالغالى ..

على جنب بقى

اللوجو بصراحة يعنى شيك اخر حاجة ...

ده حتى استايلش جدا ...والفانوس ده منور فى المنتدى وعامل اتموسفير رمضانى هايل

مبروووك علينا اللوجو

ورمضاااااااااان كريم

[se_ Elsyed]

يا سلام ؟؟؟؟؟؟؟؟؟؟؟؟

يعني رمضان جه عندكو كلكو وشوفتوا اللوجو والهلال .. وأنا الوحيد اللي في سبتمبر دلوقت وما عنديش رمضان ؟

اللوجو كان موجود من دقايق وفجأة اختفى ورجع لوجو محاورات المصررين من تاني ؟

مين اللي سرق العامود ؟

[الغريب]

لوجو جميل وتسلم الأيادي

بس هو ليه يا أستاذ عادل مش مكبرين اللوجو بتاع المحاورات أصلا ليصل حتى حدود بيانات العضو في البنر العلوي أن شايف أنه صغير شويتين

وكل سنة وأنتم بألف خير

تم تعديل 10 أغسطس 2010 بواسطة الغريب

[mekkawy]

رفرش يا باشا هتلاقي الفانوس نور و بيقولك حلو يا حلو كمان

مشكور يا مايوسف و اللوجو جميل فعلاً

ألا مفيش فوانيس في السعودية يا جماعة ؟

مكاوى

[مغتربة]

لوجو جميل و تصميمه حلو جدا

و يا ريت نوسع الفكره باننا تغير اللوجو بكل مناسبه تمر علينا يعنى فى كل مناسبه نحط لوجو معبر عنها ( عيد صغير . كبير . اعياد الاخوه المسيحين . اعيادنا و مناسباتنا الوطنيه )

و مش شرط عضو واحد هو الى يتحمل عبء كده علشان منتعبهوش معانا اى حد من الاعضاء متطوع يصمم لنا لوجو مناسبه مختلفه

و الله هتبقى لفته جميله

و الف شكر لاستاذ محمد و لاداره المحاورات كلها و كل سنه و احنا جميعا طيبين

[SoSo R]

كل سنة و انتم كلكم بخير و رمضان كريم...اللوجو جميل قوى ولو إن ألوانه محتاجة تتفتح شوية

بس هو فعلا لوجو محاورات المصريين بقى صغير قوى....متهيألى محتاج يكبر شوية

وانا رأيي زى مدام مغتربة إن يكون فيه لوجو لكل مناسبة زى ما بيعمل جوجل...بصراحة بيعملوا أشكال حلوة قوى

ممكن يتم دراسة الأقتراح ده لحد عيد الفطر

تحياتى

[أشرف محمد]

كل عام و أنتم جميعاً بخير

مهندس / أشرف محمد

[MaYousof]

كل سنة وانتم طيبيين يا محاوراتييييييية   :yahoo:

كل سنة وانتم طيبييييييييييييييييييييييييين :yahoo:

وحوي يا وحوي .. أيااااااااحة

وكمان وحوي .. أياااااااااااااحة

رحت يا شعبان .. وحوينا الدار

جيت يا رمضااااااااااااااااااااان ..

هل هلالك و البدر أهوه بان ..

يالله الغفار ..

شهر مبارك و بقاله زمان ..

يالله الغفار ..

محلا نهارك بالخير مليان ..

يالله الغفار ..

جيت في جمالك .. سقفوا يا عيال ..

يالله الغفار ..

محلا صيامك .. فيه صحة و عال ..

يالله الغفار ..

طول ما نشوفك .. قلبنا فرحان ..

يالله الغفار ..

يكتر خيرك .. أشكال و ألوان ..

يالله الغفار ..

أنا بحب شهر رمضان قوي قوي قوي   -_-

------------------

بالنسبة للوجو الرمضاني ..

أنا التزمت مقياس الرسم 100*245 بكسل عشان أبقي في الأمان .. لأن دي كانت مقاييس اللوجو من أيام المنتدى القديم .. بالتأكيد ممكن تصميم لوجو بحجم أكبر لكن لو المساحة المتاحة للوجو ثابتة يبقى بعدين ممكن في نفر مشكل كبيير  :blink:

إن شاء الله وبعون الله ومن غير مقاطعة هيكون في شعارات تانية في المستقبل .. مناسبات إسلامية زي ده .. وقومي عشان نصر أكتوبر وتحرير سينا .. وكمان هيكون فيه لوجو لمناسبات الأخوة المسيحيين زي عيد الميلاد .. وحبايبنا الفراعنة هيكوون ليهم لوجو في شم النسيم .. فسيخ بقى وأيو إياد هيهييص ..

يلا رمضان الحمد لله دخل .. لو فييه حاجة تحبوا تساعدوا بيها في تصميم اللوجوهات القادمة يبقي ماترحمونييش من الدعاء بصلاح الحال دنيا وآخرة طوووووول الشهر ده تحديدا .. إهروني دعاء خلال الشهر ده صبح وليل ..

كل سنة وكلكم بألف خير وصحة وسعادة والأهم من ده كله الرضا ..

-_-

[se_ Elsyed]

أنا مش هاشغل بالي عشان ما يحصليش روشه زيادة

اللوجو دقيقة يظهر

وخمستاشر يختفي

لكن هاتخيل بقى أنه موجود وأمري لله

[Alshiekh]

السلام عليكم

لم اكن اعرف ان عندنا مواهب مختفية

تصميم جميل استاذ / MaYousof

وكل عام وانتم بخير.

على فكرة ممكن اللوجو يكون اكبر شويتين يعنى ممكن لحد 150% والصندوق سيتسع بشكل تلقائى ، مع مراعاة انه كلما كبر الحجم فسيكون على حساب باقى الصفحة اى ان كل المنتديات سترحل للاسفل ، لكن 50 بيكسل زيادة لن تؤثر بشكل كبير. اظن 150*367 سيكون مقبولا.

[زهقان]

لوجو جميل جدا وشيك قوى

اسبم الايد اللى صممت

وكل عام وحضراتكم بخير

[Diab]

شكله حلو تسلم الإيادي ياعم يوسف

حلوة حكاية لوجهات المناسبات دي

هتعمل فيها زي جوجول ولا ايه :happy:

[Howayda Ismail]

جميل جدا خصوصا الاضاءة فيها احساس انه حقيقى

كان نفسى انقل لكم صور الاضاءة والفوانيس والزينة فى شرفات البيوت كلها دون استثناء لكن اللوجو

يشبها لحد كبير

شكرا لحضرتك وكل عام وانتم بخير

[MaYousof]

توثيقا للوجوهات المناسبات المختلفة الخاصة بشعار منتدي محاورات المصرين بعد الانتقال للإصدار 3.1 من برمجيات النتدى ..

 اللوجو العام

 لوجو شهر رمضان المبارك - بدون مدفع الإفطار

 لوجو شهر رمضان المبارك - مع مدفع الإفطار

 لوجو عام للأعياد

--------------

اللوجو القادم بإذن الله سيكون بمناسبة نصر أكتوبر المجيد

---------------

الرجاء من أستاذنا الفاضل عادل أبو زيد استخدام لوجو العيد خلال الإسبوع الحالي ..

بخصوص العيد السنوي للمحاورات .. هل هو 29 ديسمبر أم هو يوم آخر؟

[عادل أبوزيد]

شكرا جزيلا للفاضل Mayousof على هذه اللفتة الراقية.

تم رفع اللوجو إلى موقع محاورات المصريين

كل عام و أنتم بخير

محاورات المصريين بدأت سنة 1998 و لكن بإستخدام برمجيات أخرى و على سيرفر مشترك و لكن قاعدة البيانات الحالية تحوى مشاركات منذ 29 ديسمبر سنة 2000 و هو اليوم الذى يمكننا إعتباره عيد ميلاد محاورات المصريين.

[ابو محمد بن مصطفي]

كل نصر ومصر حبيبتي بخير

اللجو جميل بتاع 6 اكتوبر

بس في ملاحظة صغنونه

6 اكتوبر مكنش طيارات وبس ومش اول طلعة جوية وبس

الف رحمة علي شهدائنا

وتسلم الايادي