شلل اسمه موظفين الحكومة

[crossfield]

تعرضت فى حياتى لعدة مواقف اضطريت فيها للتعامل مع أسوأ نوعيات ممكن تتخيلهوها من موظفين الحكومة و هاحكيلكم هنا عن بعضها:

أو لموقف كان من عدة سنوات فى مجمع التحرير. كنت رايحة علشان أخلص ورق خاص بمنحة دراسية و كان لازم أخلص ورقى فى اليوم ده علشان أطلع بيه بعد كده على السفارة و دى كانت آخر فرصة لتقديم الورق .للأسف وقتها كان فيه ظروف اتسببت فى تعطيلى فى الاجراءات.

المهم دخلت الأوضة اللى المفروض ألاقى فيها الموظف اللى هيمضيلى الورق و يختمه ؛و زى فيلم الارهاب و الكباب بالظبط ؛موظفة بااااااااااااااردة قالتلى:معلش أصله فى الحمام ثانية واحدة زمانه جاى...و استنى دقيقة اتنين تلاتة فات حوالى ثلث ساعة و بعدين ابتديت أتوتر .يا ستى قومى شوفيه فين تلاقيه فى مكتب حد تانى؛وترد عليه ببرود برضو:اقعدى بس زمانه جاى؛الصبر الصبر.

-يا ستى عايزةأروح الخارجية و بعدين السفارة النهاردة آخر يوم لتقديم الورق

-حاضر بس اهدى اهدى ...اجرى جرى الوحوش..لو ليكى نصيب هتسافرى هتسافرى.

و ابص لاخويا و يبص لى و فى اللحظة دى حن عليه اليه الموظف و جه و وصلت السفارة بعد انتهاء مواعيد

العمل الرسمية بربع ساعة و من ستر ربنا لقيت المسئولة بالصدفة لسه موجودة علشان عندها شغل كتير و الحمد لله.

يوم تانى فى حاجة اسمها ادارة العلاج الحر التابعة لوزارة الصحة؛كنت رايحة أسأل عن الشكوى اللى قدمتها من فترة ضد الدكتور و المستشفى اللى والدى-الله يرحمه-كان عمل فيها عمليته و ألاقى دستة ستات محشورين فى أوضة واحدة و هاتك يا ضحك و يا تهريج دون مراعاة لشعورى و شعور من حولى من مواطنين جايين يسألوا عن شكاوى خاصة بهم أو بحد من أهلهم توفى بسبب اهمال طبى. تقدمت نحو واحدة منهن و سألتها عن الشكوى المسجلة عندكم برقم كذا و بتاريخ كذا,...تم فيها ايه؟ يعنى بياناتى كاملة و مظبوطة و ما عليها غير البحث بشئ من الاهتمام.

-انتى لسه فاكرة ؟دى من زمان قوى.(على فكرة زمان قوى ده يعنى حوالى سنة و انتوا عارفين ان يوم الحكومة بعشر سنين أصلاً)

-يعنى ايه يعنى من زمان ؟مش شكوى و اتقدمت؟أنا عايزة أعرف ايه اللى تم فيها؟

-طيب استنى بقى..

و راحت بسلامتها قالعة الحذاء و طالعة على مكتبها و هى تطأ بأقدامها أوراق شكاوى خاصة بناس تانية و فتحت درفة عالية و نزلت منها ملف كبير و قعدت تدور و هى طبعاً بتتبادل عبارات التهريج و السباب أحياناً مع زميلاتها...فعلاً موظفات لا يليق بهن سوى الجلوس فى البيت.

-مفيش شكوى عندنا بالرقم ده و لا بالاسم ده.

-نععععععععععععععم؟

-الملف أهوه الخاص بالمستشفى ....و مفيش فيه شكوى بالاسم ده.

-طيب دورى تانى ...

-0ما انا دورت أهوه قدامك

خدت الملف منها و بدأت أدور بنفسى اسم اسم و ورقة ورقة و فعلاً مش لاقية حاجة.دماغى ابتدت تجيب يمين و شمال ...يكونش الموضوع مطبوخ؟

-اكتبى شكوى تانية(ده اللى بيقولوا عليه موت يا حمار).

-لأ...دورى على الشكوى بتاعتى.

-انت مقدمتيش شكاوى.

-يا ستى أنا اللى مقدماها بنفسى و ده رقمها .أنا مش مسطولة .دورى كويس فى ملفات تانية.

و قعدنا على الوضع ده ساعة الا ربع و هى عمالة تجيب لى نفس الملف من أوله لآخره

-يا ستى مش هنا شوفى فى واحد تانى.

-مفيش غير ده.

و آخر ما قرفت منى راحت سايبانى و قاعدة على الكمبيوتر معرفش تهبب ايه و اللى ربنا قدرها عليه اكتبى شكوى تانية.

سبت المكتب و رحت داخلة للمدير عدل و حكيت له اللى حصل من الموظفين و فى أقل من 7 دقايق اتخلق الملف من تحت طاقطيق الأرض. فعلاًُ ناس متجيش غير بالسك على دماغها.

على فكرة اكتشفت انى متأخرتش فى السؤال عن الشكوى كتير لأن بالفعل لم يبت فيها بعد.

عمار يا مصر.

[Mohammad Abouzied]

هي دي بس المشاكل بسيطه

ايه رئيك ان شركة كهرباء جنوب التحرير عطلت لي توصيل الكهرباء للمزرعة اكثر من سنة بحجة ان مفتاح الكهرباء الذي ركب لي لم يجدوا تسعيرته في ادارة المشتريات ولا عوزين يستبدلوه بمفتاح من عندي اشتريته على حسابي ولا عوزين يستبدلوه مع واحد من الي موجود له تسعيره في ادارة المشتريات ، وانا بصراحة حلفت ما هدي رشوة ابدا لو حتى خربت المزرعه كلها

ومتعطلنيش يا سيد شوف مصلحتك

[الأفوكاتو]

مرحبا بالبيروقراطية و الفساد فى أزهى صوره

[hamo90]

صحيح الي يشوف بلاوي الناس تهون عليه بلوته

أنا كنت قال ايه متضايق عشان رحت الهايكستب 9 مرات أخر مرة فيهم مشيت 4 كليو في الصحراء

وكل ده عشان حرف واحد زيادة في أسمي الرباعي !

عمار يا .......... بروقراطية

hamo

prt:

[se_ Elsyed]

العلاقة بين الموظف والحكومة قائمة على مبدأ " سيب وأنا أسيب " ( من اقوالي المأثورة ) ومن يدفع الثمن في النهاية هو المواطن العادي ...

بمعنى إن على أي أساس إنكم تطالبوا الموظف الحكومي ان يكون مبدعاً ومخلصاً في عمله والحكومة بتعين الناس على أساس إجتماعي وليس إقتصادي .. يعني سد خانه عشان العواطلية بدل ما يقعدوا على القهوة يبقى يروحوا يقعدوا على المكاتب في المصلحة .. وبالتالي ماتحصلش ثورات وغضب بين أوساط الشباب الباحث عن فرصة عمل ... وعلى هذا الأساس نراهم بأعيننا مكدسين زي السردين داخل المكاتب وممكن توصل إن إتنين أو تلاتة يقعدوا على مكتب واحد .. حيث لا توجد ظروف صحية جيدة للعمل ولا توجد حتى حمامات نظيفة يستخدمونها سواء هم أو المواطنين المراجعين لتلك المصالح .. ده بالإضافة إلى زنقة الأتوبيسات الصبح والأعباء المالية المتزايدة في حين إنه يحصل على ملاليم حكومية لا تسمن ولا تُغني من جوع ..

الظريف في موضوع تعيينات الحكومة ده إني نزلت السنة اللي فاتت لقيت أخويا الأكبر إتعين في وزارة الري .. فقولت له إيه عينوك جنايني هناك ولا أيه :angry: ؟ قال لي يا عم روح هو حد طايل يتعين ووراني توقيع وزير الري بنفسه على قرار التعيين عن طريق واسطة يعرف الوزير شخصياً ... والحمد لله من ساعة ما اتعين ما بيروحش غير أول كل شهر عشان يقبض كام ملطوش مايجيبوش ثمن كوباية شاي وساندوتش فول في اليوم لأنه عمالة زايدة والوزارة عارفه كده ... ومش هو لواحده ده كل البشر اللي فرحان بهم عاطف عبيد وبيعتبرها إنجاز إنه عين 170 ألف شاب في وظائف حكومية وإن دي طفرة إقتصادية في عهد مبارك الميمون .... وكل ده خسارة للبلد او زي ما بنقول بالبلد " من لحم الحي " ...

فإذا أردت ان تُطاع فأمر بما يُستطاع .

جلست مع احد زملائي السابقين في السعودية وكان بيعمل مهندس حاسب آلي وصفى أمورة ونزل مصر من ييجي 5 سنوات فلقيته إتعين في وزارة الري " مش عارف إيه حكاية الميه معايه " فالمهم من خلال كلامه ذكر قصة طريفة تصلح فيلم هندي أو عربي على أقصى تقدير ، ومفادها هو إنه ومجموعة من زمايلة رفعوا قضية أو إشتكوا الوزارة عشان تصرف لهم بدل مواصلات حيث إن طبيعة عملهم تتطلب التنقل بين المواقع المختلفة .. وبالفعل تحقق لهم هذا النصر المبين وأستجابت الوزارة لهم بعد عذاب مرير ولقيت وجهه تهلل بالفرحه وقال الحمد لله في الاخر صرفوا لنا " 5 " جنيهات بدل مواصلات مع المرتب الشهري !!!!!!!!!

فقولت له إنت بتتكلم جد ؟!!!!!!! :angry: :angry: ... يعني كل الفيلم ده عشان 5 ملاطيش ... قالي أيوه يا عم ماهي بتأثر في النهاية على المرتب وبدل الاجازة والمعاش ... وكل سنة وإنت طيب .

[se_ Elsyed]

من أسابيع قليلة قرات تصريح لأحد المسئوليين الروفيعين المستوى وفيه يبشر الموظفين والمواطنين الذين يترددون على مجمع التحرير أكبر وأضخم جهة حكومية في مصر ويقول فيه " بإنهم بصدد الشروع في تطوير حمامات المجمع وجعلها بشكل حضاري "

قلت الله يسكفكم يا بُعده ويورينا فيكم يوم .. بقى دول العالم المتقدم ومعاها العالم المتخلف أيضاً عماله بتتكلم عن الحكومة الإلكترونية وإنك تبقى قاعد في بيتك وتقدر تخلص من على النت كل معاملاتك الحكومية بكل سهولة ويسر وإحنا الشعب الوحيد اللي عمال يتكلم عن تطوير الحمامات وإننا هانسهل على الناس وبدل ما كل موظف او مواطن ييجي من بيتهم ومعاه كوز ميه يدخل به الحمام لأ إحنا هانبتكر حاجة إسمها حنفية وفي الخطة الخمسينية الجاية تحت قيادة الرئيس القائد حسني مبارك سوف نحاول جاهدين إضافة مناديل كلينكس في كل حمام أو على الأقل نعين موظف على باب كل حمام يدعي للي داخل إن ربنا يسهله ويسلم عليه وهو خارج ويقول له " شفيتم يا حاج " .

[سقراط المصري]

وإننا هانسهل على الناس وبدل ما كل موظف او مواطن ييجي من بيتهم ومعاه كوز ميه يدخل به الحمام لأ إحنا هانبتكر حاجة إسمها حنفية

lo:: lo:: lo::