اذهب الي المحتوي
إنشاء باب جديد بعنوان سد النهضة الإثيوبي لكل الموضوعات المتعلقة بسد النهضة ×

تهيؤات تسبح فى فضاء اللامعنى ..


Recommended Posts

ان شاء الله خير ..

كله خير ...

كل اللى بيحصل خير ...

كعادتى دائما اردد هذه الكلمات ف المواقف التى اجدنى فيها فى حالة حيرة ..

كان يجب على الانتظار اكثر من نصف ساعة ( طيب انا رحت بدرى ليه؟؟) ربما كانت اعصابى متعبة بعض الشئ ...لااحب الانتظار ..

افتكرت حاجات كتيررر وانا لوحدى .من الشرق والغرب ....عائلية وعالمية ...اقتصادية وسياسية واجتماعية ...

فى انتظار ان ينادوا اسمى ....ياترى انهاردة التجربة حاتطلع ايه؟؟؟ههههه....كنت زمان بقول ( طظ ) كل حاجة ملهاش قيمة لما تعرف ان اللى بيكلمك بيفهمك انه قلبه عليك اكتر مانت قلبك على نفسك ..

بس لما كبرت شوية بقيت اخاف ...اخاف من ربنا اهم حاجة ..اخاف اقول ( طظ ) بقيت اقول ( قدر الله وماشاء فعل ) كل اللى يعمله ربنا كويس ..

اخدنا المونديال ...فرحت قوى .......قصدى قوى قوى ....لالالا ...انا قصدى ....قوى قوى قوى قوى قوى قوى ...

فرحت قبلها لما بويول جاب الجول بدماغه ....محدش قال ..بس انا افتكرت ياعينى ان ( ابوه) مات السنة اللى فاتت بطريقة قاسية شوية ..

وقع عليه التراكتور وهو بيشتغل ف الارض ...

سرحت تانى ...

اكيييد ابوه كان بيحب الارض دى قوى ..بدليل انه مات وهو فيها وهو ماسكها بايده(( بس الموتة بالطريقة دى صعبة شوية ))..

لسا منادوش اسمى ...

هما انهاردة اتأخروا ليه؟؟

بيتى بينه وبين المستشفى خطوات ...اقل من اربع دقايق ابقى هناك ...

انا هنا مستنية دورى ...سرحت تانى ...

من اقل من شهرين الملك كان هنا ....ف نفس الدور اللى انا قاعدة مستنية فيه ...مفيش اى شئ اتغير ...

هما بس الصحفيين فضلوا طول النهار والليل امام المستشفى ..

مفيش اى شئ اتغير ...

ممنعوش اى حد يدخل المستشفى ...

المواصلات متوقفتش ..

الاتوبيسات مغيرتش طريقها ...

الملك ....كان بيتعالج ف مستشفى ف بلده....ههههههههههه.....انا على فكرة خبيثة قوى ....

طيب ليه بعمل مقارنة ؟؟؟

فات آوان المقارنات ..

لسا محدش نده اسمى ولما سألت البنت السكرتيرة قالت لى انهاردة اتأخرنا شوية ...

هه...ازيك؟؟

تمام ...

مستعدة ؟؟؟

آه ....عادى ..

ازود السرعة ؟؟؟

زود (( ياخويا انت حاتوجع قلبى ؟؟؟ مانا قلت لك قلبى زى الحديد هى الدكتورة دى متخلفة ..انا مريضة ضغط والضغط هو اللى بيعمل تضارب ف ضربات القلب ...طبعاااااا كل ده قلته لنفسى بس ))

هه...ايه الأخبار ؟؟؟

الضغط عالى (( عادى )) .....(( الحل انا عارفاه ...اروح اعيش ف الجبل لوحدى ومنعاش هم حد )) ÷÷÷÷(( منعاش ؟؟؟ من عاش ؟؟؟ ده انعاش ؟؟؟ان عاش )) ههههههههه

ماما ؟؟حاسا بايه؟؟؟

كله تمام ...الحمدلله ...

امبارح رحت السينما ....بقالى اربع سنين مدخلتش سينما .....آخر مرة دخلت سينما ف اسكندرية ( وبالصدفة ) ..كنت عايزة ابنى يتفرج على الكوميديا المصرى ...ضحكنا ..انا شخصيا بحب اتفرج على عبلة كامل وبحس انها مصرية اصيلة ..

كنت بقول ايه؟؟

آه...

امبارح دخلت السينما انا والولد الجميل ابنى ...لأول مرة من سنين (( طويلة قوى يعنى قوى )) يجيبوا فيلم ناطق بلغته الاصلية ..كان فيلم ..

احكى ياشهرذاد ....هما ترجموه (( نساء من القاهرة )) ..

شئ جميل ان من وقت للتانى نتفرج على الأفلام ف السينما ...

الفيلم مفاجأة لياااااااا .بكل المقاييس ....الفيلم مدته( هنا ) ساعتين وربع ..

طبعااااااا....لم يتم حذف اى مشاهد خارجة ...

ايحاءات مش معقولة ..

بس القصة ككل ....ككل يعنى ككل ...فيها شئ كبيررررر فعلا من الحقيقة ...

ده حقيقى ....بغض النظر عن اعتراضى عن حاجات كتيررر..

لكنه كان تصوير دقيق لمشاعر المرأة ف حالات معينة ...

عجبنى قوى قوى ....

منظر سوسن بدر .......لما حسين الامام بيضع شروطه علشان يتجوزها ...

هى (( شاطته ازاى ؟؟؟)) حركة حلوة قوى قوى ....ضحكت جامد ..

هو انا بفكر ف ايه؟؟؟

آه...

امبارح برضه حاولت اتناقش مع ابنى ...ليه ساب الجريدة ؟؟؟؟؟؟؟؟؟

ليه يابنى قررت تقبل الشغلة الغريبة دى وتسيب شغلتك ؟؟؟

المشاعر مش بتأكل عيش ؟؟؟

طلعت ( عبيط ؟؟زى امك ؟؟...رومانسى انت ونبيل اكتر من اللازم ...والا حاتعتبر دى برضه تجربة وخبرة ؟؟))

عارفة شغلتى ايه بالضبط؟؟؟؟؟؟؟

ادوكادور سوسيال ....مربى اجتماعى ...

حرام الولاد دى ....الكل يتخلى عنهم ...

يابنى ...

انت من سنتين فهمتنى انك بتدربهم ف الفوتبول ( بدون ما تقبض ) مساعدة وحب وتوجيه..بس مخطرش ببالى تجازف وتسيب كله وتقرر تشتغل معاهم حتى ف التعليم ؟؟؟

دول اولاد مشاغبين ....كأنهم زى ما بيقولوا موجودين ف ..(( اصلاحية )) ...عرضوا عليا الشغلة دى ف وقت كنت حاسس انى لازم اغير حياتى ..

صدقينى ياامى ..

انا اللى اتعلمت منهم ...مش هما بس اللى اتعلموا منى ؟؟

قدرتى اخللى واحد يترك ( المخدرات ) عمرى ماقلت له انى عارف انه بيشرب حشيش ..

بس هو اول ماكان يشوفنى من بعيد كان بيرمى السيجارة وانا شايفه..

كلهم لعيبة حلوين ...مخهم نضيف ..ملهمش حظ ..

حاتسيبهم امتى ؟؟؟

مقدرش اسيبهم دلوقت ...حاتحصل لهم صدمة ...هما دلوقت بيحبونى ووثقوا فيا ...مقدرش اسيبهم ..

اى نعم انا بقبض نصف اللى كنت بقبضه ف الجريدة ..بس كمان انا دلوقت عندى وقت اكتب ...اكتب بدون قيود ..

شغلى بس للساعة تلاتة ونص ..

ايه رايك ف الفيلم ؟؟؟

جميل ..بس جرئ قوى كفيلم مصرى ...

احلى حاجة عجبتك ايه ف الفيلم ؟؟؟؟؟؟؟؟

طبيبة الاسنان ....لما مسكت اليافطة وبتسأل ؟؟؟...على اى اساس بتنتخبوهم ...!!!

شئ مؤلم جدااا لما ننتظر (( مالايجئ )) ....انت تقول البلد حاتتصلح امتى ؟؟؟انما بقول ف حدود خمسين سنة حاتبقى حاجة تانية خالص ..الجيل الجديد واعى ..

لالالالا ...لااتفق نهائى ...مش بالشكل اللى انتى بتتخيليه ...هو اكتر من خمسين سنة بكتير عارفة ليه؟؟؟

التدمير كان كبيررر جدااا ..

المشكلة مش ف اصلاح البنية التحتية ..

المشكلة ف اصلاح ..البنية البشرية ...

البشر...

من جوة ومن برة ...

جسد وروح ..

مش قادر افهم ليه دمروا كل شئ ؟؟؟

بلاش تقولى لو عندهم دين ....بلاش ....قولى لو هما فعلا عندهم انسانية ..

سرحانة ف ايه؟؟؟

ف الف حاجة ...وف ولا حاجة ...

حاسا بعد العمر ده كله كأنى (( اخدت على قفايا)) ...

حضرت ووضبت ورتبت ...ولما جيت استقر ((هناك )) ....لقيتهم حرقوا الأخضر واليابس ..

انهاردة قالوا ف الأخبار ان الخضروات الملوثة بتعمل سرطان ف المرئ ...وكثرة تناول الأدوية ..

طيب مابالك ...لو كانت الأدوية كمان مغشوشة ؟؟؟

ربنا يسترها معانا ...

خليكى هنا ....بلاش من وقت للتانى تيجى لك حالة الحنين دى ؟؟؟مش شايفة ان ( هى ) موجودة بس ف مخيلتك ؟؟؟

كل واحد داير ف ساقية حياته ...

عاوزين يشيلوك هم على همك ....هو حد حاسس بحد ؟؟؟

ياامى ...ناس بتدفع خمسين الف جنيه ف رحلة حج ...ميبقوش فقرا ....اصحى بقى ..

حااااااااضر..

تشربى شاى ؟؟

بالقرنفل ؟؟؟؟

ماشى ....

بس ايه رأيك ف الفيلم ؟؟؟؟؟؟؟ :roseop: :rolleyes:

رابط المشاركه
شارك
  • 1 month later...
  • الردود 53
  • Created
  • اخر رد

Top Posters In This Topic

Top Posters In This Topic

Popular Posts

صباح سعيد جدااا. صباح الخيرات والرضا. اكتب هنا بعد غياب ... تتصارع داخلى مشاعر كثيرة أود تحويلها لكلمات ولعلى بهذا أوضح لنفسى بعض معالم طريق جديد ربما قررت السير فيه . أزحت كل شئ جانبا وقررت التوق

صباح الايمان . صباح صافى على أمل أن يحمل لنا الخير. احتار العقل فى تحديد ما تراه العين.هل هو حقيقة ؟؟ هل هو واقع؟؟ هل ما يحدث الآن.....كان متوقع؟؟ هل كان متوقعا ..بكل هذا (( السوء )) ...؟؟ القاتل

https://www.youtube.com/watch?v=5pynXxLh9iM صباح الرضا . صباح مشرق بدايته حمدا لله سبحانه عز وجل..على كل النعم التى أنعم بها علينا وهى لاتعد ولا تحصى..ومنها نعمة الصحة والرضا . وان تعدوا نعمة ال


يااااااااه...........اخيرا قدرت ادخل المحاورات والساعة دلوقت الخامسة بعد الظهر ..

انهاردة من الساعة عشرة صباحا كل ما احاول ادخل الاقى نفسى (( ممنوعة من الدخول ....ههههههه)) شئ غريب ...
انا على الحال ده ليا اكتر من ثلاثة شهور ..
كل شوية انهاردة اعمل حاجة ...وارجع احاول ...انزل ...وارجع احاول ...كام محاولة ؟؟ مش عارفة ؟؟ مش فاكرة ..
طيب ليه كل ده؟؟
على ايه؟؟؟
ده انا من اول رمضان ...مشوفتش ولالالالالالا مسلسل من المسلسلات الهايفة اللى تجيب الضغط ( والعقلة والمتوازيين كمان ) ..
هو الصيام والصلاة والتعبد ...والمحاورات ..
المحاورات مش حرام ...ألمحاورات ما بتفطرش ...المحاورات مش حاتنقض الوضوء ..
بنتكلم جد مش هزار ..
بمعنى ؟؟؟
فيه حاجاااات نشوفها ؟؟ وغصب عنك تغير القناة وتقول ...استغفر الله العظيم ..هى الناس اتجننت والا ايه؟؟
فيه حاجات تقراها وتقول لنفسك ....هى الناس دى بتخربش ايه؟؟؟..أو ...,ده كلام برضه يتقال ؟؟؟
فيه حااااجات برضه ...تقراها ...مشوقة جداااا ....بس المشكلة بقى والمصيبة انى قرأت (( ف جريدة )) قصة ( تاريخية حديثة ) مشوقة جدااا
والمصيبة الأكبر ...( بحق هذا الشهر الكريم ) ...انى قرأت القصة على لسان الصحفى الجهبذ ..وقرأت التهليل للسبق الصحفى العظيم ...اللى كشف الحقائق ... ( اسم النبى حارسه وصاينه يعنى من عين العدو اللى شافه وما صلاش على النبى )
ماهو فيه كذب مساوى ...بيشبه الصدق برضه..بيشبهه قوى .بس مش صدق طبعااااا..
و..
محدش جاب سيرتنا ........ههههههه....آه والله .
رغم ان كل (( الانتصار اللى حكوه وحققوه )) ... احنا اللى عملناه..احنا يعنى احنا (( اسرتى الصغيرة )) ..لكن؟؟
كالعادة دايما ...عمااااار يامصر ..
ناس تكافح ..و....ناس تعلق النياشين ...
خلاص... الواحد كبر ..زهد كلللل شئ ... وولادى حتى ميهمهمش كل الخزعبلات اللى بتتقال وكل النياشين اللى اتسرقت وبتتسرق علشان يعلقها واحد ...او...مجموعة ملهاش ف الدور ده خالص ولا تفهم حاجة ولا عندها فكرة عن اى شئ !!!!..
كانت قاعدة ف التكييف وسايبة الناس (( اللى عندها ضمير...أو ...زى ما بيقولوا دلوقت ....الناس الساذجة العبيطة ...يعنى الطيبة )) تدور على حقوق الغلابة اللى اتسرقت واتنهبت ..و...اتهربت ...بوسيلة او بأخرى ....!!
ساعدنا بكل الحب وكل الغيرة على مصر...ساعدنا بدون اى مقابل.......على وزن...اهل مكة ادرى بشعابها !!!والنتيجة ؟؟؟
غيرنا ....
اخد القصة (( فبركها وحط لها شوية تشويق ...وزود شوية تحابيش ...بسسسس....حتى عمل البطل الاصلى ؟؟ واحد اجنبى !!!))
يعنى حد يفكر انى زعلت؟؟؟ ابدااااا...بالعكس ..
تذكرت كلمة يعنى يمكن بتتقال عندنا ف اسكندرية على الناس اللى بتاخد شقا غيرها او (( عمل )) غيرها وتنسبه لنفسها ...!!!
خليه ياخد كباية المية دى .... بس الحنفية عندنا احنا ؟؟؟ صح؟؟
بحق ربنا ...
انا بالضبط بالضبط ...ليا حوالى ...اربع شهور ...براجع كل حاجة حصلت ف حياتى ..
من فترة للتانية بعمل زى بنتى ...بس بنتى بتعمل كدة ف ملابسها واشياءها ...( كل تلات سنين ...تعمل جرد لكل حاجاتها ...اللى مستعملتهوش ف الفترة دى ....تضعه على جنب لصاحب نصيبه ..اقصد تستغنى عنه بطريقة مفيدة لآخرين ..) انا بقى بحاول (( انقى العقل من كل اللى فيه )) اسلك كل الذكريات وكل اللى عندى وكل اللى بيسبب لى قلق ( بدون مناسبة ) .. بقنع نفسى ؟؟ والا فعلا فعلا اثق ف المحاولة ؟؟ كللللللل ده بحاول الغيه من تفكيرى ...
كفاية علياااااا كل متاهات اولادى وطلباتهم ورغباتهم و...حكاياتهم .. ...كفايا علياااااااا اهتمامات زوجى واهتماماتى .ومشاكسته ..وضحكات رائقة .. كفايا عليااااااا حاجات كتير من حقى استمتع بيها ..القراءة والكتابة والمحاورات وشاى الصباح وقهوة الساعة حداشر ومكالمات اخوتى وضحكات حفيدتى ف شهورها الاربعة وحب استطلاع حفيدى اللى واثق انه عنده عشرين سنة وهو لسا مكملش خمسة ...احضان بناتى وابنى ..المشى والتسكع فى شوارع قديمة رائعة معبقة برائحة مبانى مغسولة بعد ليلة شديدة البرودة منهمرة الامطار ..كفايا عليااااا حاجات حلوة قوى قوى ..آن الآوان انى اعيشها بكل جمالها ..
واللى عاوز يعمل حاجة ...يعملها ..
هههه...حتى اللى سبق واتنهب مننا ومعنديش مستند ... ؟؟ خلاص ..مش حاندور عليه..
كفايا ربنا غضبان عليهم ... اذا غضب الله على عبد رزقه من حرام ..واذا اشتد غضبه عليه بارك له فيه ..
بس للأسف....احنا شايفين اللى سرق ... وشايفين ولاده طلعوا ايه؟؟ وعملوا فيه ايه؟؟ يعنى سبحان الله ... مش رباهم بقلوس حرام ؟؟
الانتقام ؟؟ كان منه فيه ...سبحان الله العظيم ...
حاتقاضى مين؟؟ على رأى المثل... الدرج الفاضى حاتاخد منه ايه؟؟؟
وانا؟؟؟
لابد انسى كل اللى آلمنى قبل كدة ... لابد افتح صفحة جديدة ... حتى اللى قريته على لسان (( طالبى الشهرة )) ناس ف الحقيقة معملتش حاجة كويسة ..
ميهمنيش...
ميهمنيش يعنى فعلا فعلا ميهمنيش ..
احكى لمين؟؟
وليه؟؟
وحستفيد ايه؟؟؟
خليهم يستمتعوا بتفوق لم يتفوقوه .. وبجايزة لايستحقوها .. وبتهليل ناس منافقة زيهم ..

والراحة ونسيان حركات قلة الاصل؟؟

دى جايزة فعلا ..انا استحقها ..

من حقى اعيش بهدوء ..
من حقى استمتع برحلة كفاح قربت اوصل لنهايتها ..والحقيقة وصلت وعديت...وآن آوان الراحة ...والاستمتاع بما تم ... ده حقى ..
اللى عاوز ياخد ( من حقى ...حتى من ذكرياتى ؟؟ حتى من عمل طيب عملته....حتى من موقف تعرض فيه زوجى للتهديد والموت فى سبيل مبدأ يؤمن به ؟؟)

يااااااااخد ..
.اللى عاوز ياخد ....ياخد ..ويعلق نياشين ف الحياة الفانية ..ويستغل رغبتنا اننا لم نعلن ف وقتها كل الحقائق ..
والحقيقة
اللى حايستغل حايستغل ايه؟؟ شهرة ساذجة ؟؟ ف جرائد منافقة ؟؟
حايستغل ايه؟؟
الحقيقة هما كلهم دلوقت اثبتوا انهم عصابة ...حتى اللى كان بيتكلم على اساس انه حامى حمى الغلابة....دارت الايام وفاتت سنين طويلة ...وطلع زيهم ..
يالله....
كله خير ...
ربنا بيعمل دايما كل خير ...

كنا الصبح بندردش ...
بقول له..
فاكر؟؟
انت صممت تقف جنبهم وتدور على الحق اللى راح...مع اننا مكانش لنا اى دخل ؟؟ شفت انهاردة بيقولوا ايه؟؟ بيصوروا نفسهم كأنهم هما الابطال ؟؟
رد علياا رد بليغ؟؟؟؟؟؟؟؟ ف نظرى انا ؟؟ كان رد بليغ وعفوى جدااا ومصرى جدا جداااااااا
بليغ قوى قوى ....... (( علشان كدة انا بحب الراجل ده قوى ..قوى قوى .. وكل يوم احمد الله انه وعدنى بيه...مبيعقدش الدنياااااااا ابدااااا وفاهم كل حاجة صح))
قاللى ...
على رأى المثل ...
قال له يابا عاوز كلب...قال له...ادخل الزريبة نقى لك اى كلب ...آهو كلهم كلاب ولاد كلاب ..
متوجعيش دماغك ..
انتى يهمك تعلنى الحقائق؟؟ طظ فيهم كلهم ... كلهم يستاهلوا بعض ..
اللى بيكذب...واللى بيصدق الكذاب ..
خليهم ...
خلاص هما خربوها وقعدوا على تلها ..
يهمك ايه ؟؟
طيب حاولى كدة ؟؟ حايطلعوكى انتى اللى كذابة ؟؟

انسى بقى ...
الله ينتقم من كل اللى ياكل حق الغلابة ..
احنا عملنا اللى علينا واللى يرضى ضميرنا ...
متندميش على اى خير عملتيه وربنا هو العالم بالضمائر ..

بسسسسس...حبيت ادردش دردشة الصائمين ..كل حاجة بتتقال (( على ميه بيضا )) ..
الحمدلله رب العالمين ..
كلمة حق ..
بعد فترة تفكر ...
حسيت انى مرتاحة ...راضية عن كل اللى عملته ف دنيتى ..
الحمدلله..
الحمدلله..
لم يأكل اولادى الا من حلال ..ولم نفعل الا كل ما يرضى الله سبحانه وتعالى ويرضينا ..

لاخوف ولافزع من يوم محتوم ..
الخشوع من خشية الله..
ويبقى وجه ربك ذو الجلال والاكرام ..
((كل من عليها فان . ويبقى وجه ربك ذو الجلال والإكرام))
صدق الله العظيم

رابط المشاركه
شارك

...

حسيت انى مرتاحة ...راضية عن كل اللى عملته ف دنيتى ..

الحمدلله..

الحمدلله..

لم يأكل اولادى الا من حلال ..ولم نفعل الا كل ما يرضى الله سبحانه وتعالى ويرضينا ..

لاخوف ولافزع من يوم محتوم ..

الخشوع من خشية الله..

ويبقى وجه ربك ذو الجلال والاكرام ..

((كل من عليها فان . ويبقى وجه ربك ذو الجلال والإكرام))

صدق الله العظيم

بجد........بحبك بحبك بحبــــــــــــــــــــــــــــــــك اوووووى

" انت عارفه يا ماما سلوى انا بحس ان انت هو انا بعد شويه كده "مالهاش دعوه بالسن دى بحس باللى بتكتبيه اوووى كاتك بتاخديه من على بالى ..ز

انا بلا فخر واخده كم زنب تكفى بلد ومن مين ؟؟؟؟من اللى حبيتهم اوى واخلصت فى حبهم اوى

من ناس كانوا اهم ناس فى حياتى امنتهم على نفسى وولادى او ما طعنوا طعنونى وفى قلبى مش فى ضهرى

اااااااااااااااااااااه والف اه

طب اعمل ايه؟

اتنازل تانى...اصغر نفسى وابتسم لهم تانى ... طيب اكشر والبس الوش الخشب ..مابعرفش خااالص لااكون قاسيه ولا اكون بوشين

بحب حد ببقى طايره بيه ولما ازعل من حد ببقى زى الاطفال اعيط قدامه من زعلى منه

ياترى ده ضعف ولا عبط ولا ايه؟

تخيلى طفله عمرها 46 سنه؟؟؟؟

عزائى دايما ان اللى عند ربنا ما بيروحش ..وعزائى ان ربنا معوضنى عن الدنيا كلها بزوج ربنا يحفظه لى يارب هو كل فرحى وملجئى سلوتى

يااااااه انا طولت عليك اوى واقتحمت خلوتك بس والله من حبى فيك حاسه انى قاعده معاكى وبنشرب الشاى بالقرنفل سوا

بس بجد والله بحبك اوى يا سلوتى انتى

رابط المشاركه
شارك

عزيزتى الغالية قلب ابيض .

نورتى المكان بكلامك الجميل المنور الساطع سطوع شمس الحقائق فى كل وقت ..

اوعى تزعلى على اى شئ ضاع..واوعى تزعلى على اصدقاء غير اوفياء ..

متندميش على ناس متستحقش ..

بتقولى ياما عملوا معاكى ؟؟ ..صدقينى هما اللى خسروا.

حاتقولى لى ..ايه الموقف المعكوس ده؟؟ وارد عليكى بكل خبرة السنين ..

اللى خان هو اللى خسر فعلا ...خسر بمليون طريقة ..

لما (( تكبرى )) تبقى ادى ... :roseop: :rolleyes:

حاتعرفى ان الحياة مش فلوس وبس ...

حاتعرفى ان الفلوس مش دايما ...غالية .

حاتعرفى ..ان ياماااا مليونيرات ...فقراء جدااااا ..ومعندهمش الا فلوس ..

اللى استغل تصرفاتك العفوية بدافع الصداقة او القرابة ..

ربنا مش حايسيبه ..

ممكن تشوفى بعنيكى انتقام ربنا منه ( ف الدنيا ) وممكن يكون ربنا محضر له (( يوم لوحده ف نار جهنم ... واليوم بالف عام unsure.gif ))

متتعجليش ..ولو حتى شفتى بعنيكى جزاء وقصاص عادل يتم مع هذا الشخص ...متشمتيش ..

لابد يبقى قلبك ابيض دايماااا زى اسمك ... القلب الابيض بيفضل منور طريق صاحبه ..

الغيظ والغضب بيؤدى لما لايحمد عقباه ..

لاتتوقعى من كل الناس انها تكون زيك ...

للأسف..

للأسف فعلا بعض الناس تترجم الطيبة على انها (( سذاجة )) او انها (( قلة خبرة بالدنيا )) ..

اى ترجمة الطيبة ترجمات شتى ...كل ..حسب ما يهواه ..

ف الحقيقة انتى بتعملى بس اللى بيرضى ضميرك .

ربنا هو اللى بيكافئ الانسان مش العبد الذى لاحول له ولا قوة ..

يعنى غاية المرء ايه؟؟

انسان يتعامل معاه بكل شفافية ووضوح وصدق ..

وزى ما سبق وقلنا .

ان الفعل او القول اللى بيكون طالع من جوة القلب ..لازم برضه يوصل لقلوب الناس اللى احنا بنحبها ..

شوفى ياطفلة الايام الجميلة

لما حد يطلع خاين معانا ...ويتهيأله انه ضحك علينا واستغل ثقتنا فيه ..

الجدعنة تعملى ايه؟؟

تقومى وتبدئى من جديد ولا كأن حاجة حصلت ..وتحاولى تلغى الناس دى من اجندة حياتك ولا كأنها كانت موجودة ف يوم من الايام ..

برضه..

فيه ناس كتير كويسة ..

بس ساعات احنا بنبص للناس وبننسى نشيل الغلالة اللى اتحطت لنا على عنينا من غير ما نحس ..

مش بنقدر نشوف بوضوح ..

بس بييجى الوقت وبنشيل اى شئ يمنع وصول الضوء لنا ..

ساعتها !! بنشوف كل حاجة صح ..

كل عام وانتم بخير ...

لكن؟؟

ايه رايك بقى ف الشاى بالقرنفل ..؟؟ :roseop: :rolleyes:

رابط المشاركه
شارك

ان شاء الله خير ..

كله خير ...

كل اللى بيحصل خير ...

بس لما كبرت شوية بقيت اخاف ...اخاف من ربنا اهم حاجة ..اخاف اقول ( طظ ) بقيت اقول ( قدر الله وماشاء فعل ) كل اللى يعمله ربنا

احكى ياشهرذاد ....

عجبنى قوى قوى ....

منظر سوسن بدر .......لما حسين الامام بيضع شروطه علشان يتجوزها ...

هى (( شاطته ازاى ؟؟؟)) حركة حلوة قوى قوى ....ضحكت جامد ..

ليه يابنى قررت تقبل الشغلة الغريبة دى وتسيب شغلتك ؟؟؟

المشاعر مش بتأكل عيش ؟؟؟

صدقينى ياامى ..

انا اللى اتعلمت منهم ...مش هما بس اللى اتعلموا منى ؟؟

شئ مؤلم جدااا لما ننتظر (( مالايجئ )) ....

مش قادر افهم ليه دمروا كل شئ ؟؟؟

بلاش تقولى لو عندهم دين ....بلاش ....قولى لو هما فعلا عندهم انسانية ..

سرحانة ف ايه؟؟؟

ف الف حاجة ...وف ولا حاجة ...

حاسا بعد العمر ده كله كأنى (( اخدت على قفايا)) ...

خليكى هنا ....

بلاش من وقت للتانى تيجى لك حالة الحنين دى

؟؟؟مش شايفة ان ( هى ) موجودة بس ف مخيلتك ؟؟؟

كل واحد داير ف ساقية حياته ...

ماهو فيه كذب مساوى ...بيشبه الصدق برضه..بيشبهه قوى .بس مش صدق طبعااااا..

بحق ربنا ...

انا بالضبط بالضبط ...ليا حوالى ...اربع شهور ...براجع كل حاجة حصلت ف حياتى ..

..كفايا عليااااا حاجات حلوة قوى قوى ..آن الآوان انى اعيشها بكل جمالها ..

لابد انسى كل اللى آلمنى قبل كدة ... لابد افتح صفحة جديدة ...

من حقى اعيش بهدوء ..

من حقى استمتع برحلة كفاح قربت اوصل لنهايتها ..والحقيقة وصلت وعديت...وآن آوان الراحة ...والاستمتاع بما تم ... ده حقى ..

يااااااااخد ..

.اللى عاوز ياخد ....ياخد ..ويعلق نياشين ف الحياة الفانية ..ويستغل رغبتنا اننا لم نعلن ف وقتها كل الحقائق ..

والحقيقة

يالله....

كله خير ...

ربنا بيعمل دايما كل خير ...

السلام عليكم و رحمة الله و بركاته

تهيؤات في فضاء اللامعني

هو حضرتك شايفة كده يعني

أصلي قريت المداخلات بتاعت حضرتك.....و الاقتباسات اللي فوق دي من اكتر الجمل اللي كان صعب تعدي من قدام عينيا من غير ما الاقي ليها معني و الف معني كمان في حياتي...مع ان حضرتك كنتي بتتكلمي عن حياتك انتي

ماما سلوي

عودتينا في "تأملات في معايشات يومية"....التوبيك الاثير لقلبي ان قطرات الندي اللي بتتساقط ع الورد في الصبح بدري و كل العيون نايمة و مش شايفاها....صحيت فينا بكلماتك الاحساس و العين اللي تدور ع القطرات دي.....مش بس تشوفها.....كمان تشوف جمال ربنا في الكون بكل اشكاله

يمكن يكون احساس عابر

يمكن يكون حتي غضب طفولي

يمكن تكون دردشة صايمين زي ما حضرتك قولتي

بس اللي انتي مش شايفاه

هي مش تهيؤات يا ماما سلوي

حتي لو بدونا وسط الناس ان احنا كائنات اوشكت ع الانقراض.....بجد مش تهيؤات

دي قناعات

ده إيمان بالاشياء و بالمفاهيم

دي عبادة

يمكن اللي حواللنا اتغيروا......و اكيد بنجاهد ان احنا نفك شفرات اللغة الجديدة.....بس اكيد ما نراه و ان لم يراه الآخرون ليس قطعا تهيؤات

و كمان مش فضاء يا ماما سلوي.....

القناعة...اللي بتطلع من قلب....و بتخبط علي قلب تاني....تجبره انه يعيد حساباته في حياته في مواقف من غير ما تكوني قاصدة الموعظة المباشرة.....أكيد مش فضاء

دي سماء واسعة رحبة......مالهاش حدود.....مالهاش قيود تحدها و تطوقها أو تخنقها

من زمان يا ماما سلوي و انا مغرمة بقانون الجاذبية

مغرمة بفكرة مقاومة السقوط لاسفل

التحليق

التحرر

فرد الجناحين

تشوف الكون من فوق علي مدد الشوف

تعانق الهوا........تعيش حر

مقاومة

عارفة يا ماما سلوي

قانون الجاذبية ده مش ارض بتشد الأشياء لتحت

قانون الجاذبية...ممكن يكونوا بني آدمين زينا....بس عندهم قدرة عجيبة انهم يخلقوا معارك وهمية و يشدونا ليها

عندهم قدرة عجيبة انهم يفكرونا باسوأ ما فينا.....و يشدونا معاهم لتحت

ماما سلوي

دي مش تهيؤات تسبح في فضاء اللامعني

كل كلمة انا ظللت عليها باللون المختلف.... المقاوم لكل كتابة عادية......تحمل لدي معني....تفجر لدي طاقة نور

يمكن لا اتشارك بما تحمله لي من طوق نجاة في حياتي الخاصة

لكن يكفيني علي البعد ان اري و اتلمس يدا تمتد لي...حتي و لو بالكلمات.....لتبدأ كلماتها......كل أمر الله خير

و تنهي أيضا كلماتها...كل أمر الله خير

لو اقص عليكي كم تمنحني تلك العبارة كل يوم طاقة للنهوض من رمادي

لو أقص عليكي....أني اوقات كثيرة اختلس واقتبس بعضا منكي....و اهديه لاناس اخرين

لو اقص عليكي.....أنكي اصبحتي فردا يراه المحيطون بي...و يتساءلون....متي و كيف و اين تعارفنا

لن اقص

و لن اطيل

فقط

رجاءا

حين تكتبين كوني دوما كما انتي

مقاومة لقانون الجاذبية

فلم اري في هذه المساحة...تهيؤات تدعو للحيرة او التشكك....

هي حالة صفا.....زي اللي بنعملها لما بنقرب من كوباية الشاي و هي سخنة مولعة....و نصر ان احنا نشم البخار اللي طالع منها عشان ينخشش في مناخيرنا و ينسينا روائح كتير تزكم الانوف

صباح حضرتك كوباية شاي بالقرنفل.....يمكن مش هنشربها دلوقتي....بس موعدنا الجنة....هناك ما لا عين رأت

في أمان الله

رابط المشاركه
شارك

ريهام الغالية قوى ..

البنت اللمضة المصرية اللى لازم تجبرك على النظر اليها بكل اعجاب مخلوط بابتسامة تظل ترافقك لحد ما تقفل الصفحة...وتأخذ نفس عميق ..تبدأ ف تصفح صفحات اخرى فيها كلمات مقالتهاش هى .

كلمات ربما كانت فى نظر البعض اكثر جدية واقل شاعرية .

كلمات تخاطب العقل فقط وليست كلماتها التى تخاطب الاثنين معا ( العقل والقلب ) ...

ثم تنتبه ...

.تتذكر الابتسامة ..وتنتبه...فيأخذ وجهك صورته الأصلية ...قليل من الاهتمام العميق مطلوب برضه..

كثرت المواضيع الساخنة ...شوية شوية ...بتحصل عوامل ( تعرية ) فى محيط الغابة .!!!!

يالماضة مصرية واصيلة جدااا ..

ساعات...لاعب الكرة المحترف ...يبص على الشبكة ف الناحية االشمال ..فجأة ..يشوط برجله الشمال على الناحية اليمين ..ف الوقت ده...حارس المرمى يكون رمى نفسه ناحية ايه؟؟ ....الشمال طبعاااا ..

بس الجول جه فين؟؟؟ ....ف الناحية اليمين ...!!! فهمتى طبعاااا كل تهيؤات اللعبة الحلوة ...

التوقع شئ..والحقيقة شئ تانى خاالص..

بس الحقيقة ...هى واحدة ف الحالتين ...

واحد بس اللى توقع العكس ....فهمتى قصدى ؟؟؟

ياريهام ...

اجمل حاجة ف الدردشة انها تبقى مفهومة للبعض ومش شرط للكل ...

تعرفى ؟؟؟

لو حاولتى تصطادى سمك دنيس ف مكان فيه صخور كتيرة ...وطلعتى آخر اليوم بكام سمكة بس ...تبقى كسبتى ..

احلى سمك دنيس ...دنيس الصخر .. :rolleyes: . :roseop: :roseop:

تعرفى كنت امبارح بفكر ف ايه؟؟؟

ف حاجة فكرت فيها قبل كدة وكتبتهالك ف التأملات ..

دايما بفكر فيها ..

حاجة لذيذة قوى وبسيطة قوى وحقيقية قوى قوى قوى ...

بفكر انه...

ياترى مين الاسعد؟؟؟

من يملك اكثر؟؟؟.........ام ...من يحتاج اقل؟؟؟.

.فكرى كويس ...

تعالى نتناقش ..تعالى ندردش ..

هل الاحتياجات هى اللى بتحددمايجب علينا ( امتلاكه) ؟؟؟ .

ام المظاهر الاجتماعية ؟؟

وهل المظاهر تحدد الاحتياجات ؟؟ام ان الاحتياجات تجبرك على تغيير المظاهر ؟؟؟

متعلقيش على كلامى ...احلى حاجة ف الدنيا انك متعلقيش على كلامى ...ردى وقولى رأيك بسسسس ..اعتبرينى بكلم نفسى ..

يمكن انا خلاص مبقاش عندى اى احتياجات كتير دنيوية علشان كدة بفلسف كل شئ ...يمكن؟؟؟

يمكن اكون بحب المشاكسة ليس الا ....يمكن..!!!

وللحديث بقية ان كان ف العمر بقية ...

مساء الخير والسعادة ان شاء الله...

/size]

رابط المشاركه
شارك
  • 2 months later...

انا لله وانا اليه راجعون..

كتبتها هناك ....ف باب اجتماعيات ...

مقدرتش اشوه الموضوع بكلامى اللى اكيد هناك مكانش مكانه...!!!

يعنى غصب عنى ....غصب عنى والله ...بحاول اسكت ومش عارفة !!!

بحاول افتكر كلمة ...اذكروا محاسن موتاكم....بحاول ..

لكن غصب عنى مش قادرة اسكت...

يعنى حتى ف نشر الخبر ....خبر الموت....الموتتتتتتتتتتتتتتتت...

اهم حاجة تتقال ...

وقد صافح السيد الرئيس ...نجليه .....و..........................يااااعالم.

ده انتوا لسا بتقولوا ...

وقد أقيمت صلاة الجنازة على الفقيد بعد صلاة الظهر بمسجد ..... بمدينة .....، ثم اتجه المشيعين لموارات جثمان الراحل الثرى بمسقط رأسه..... في ....ة.

يعنى لموارات جثمان الراحل ..........دى .

لها مليون معنى ...

مليون معنى ياعالم..

يعنى تحت التراب .....بيواروا (( الجثة )) تحت التراب ..

ومع ذلك اللى يهمكم .....انه صافح؟؟؟

يعنى انا لو حضرت جنازة ابويا حفكر مين اللى صافحنى ومين اللى مصافحنيش ؟؟؟ ولازم الناس تتكلم ؟؟؟ولازم يتقال وقد حضر عليه القوم؟؟؟

طيب....كام واحد اترحموا على المرحوم؟؟؟

فاكرين المسجد اللى عمله المغفور له ان شاء الله؟؟؟

فاكرين اتكلف كام؟؟؟

فاكرين الاتاوات اللى اتاخدت على كل من فكر يشترى ارض ؟؟؟ وغيره وغيره وغيره ؟؟

طيب فاكرين حتى بعد .الشفاء المؤقت ...كان بيفكر يرشح نفسه تانى .؟؟

حاشا لله..

حاشا لله ...

انا لااذكر مساوئ رجل رحل الى بارئه...لكنى اتعجب من تصرفات ممن يسيرون فوق التراب وهم يوارونه تحت التراب ...و..

مشفتش حد اتعظ ولا بيتعظ ....

مشفتش ...

ده ميت بيوصل ميت .....بس مين يتعظ؟؟؟

مين يفوق ؟؟؟

مين يلحق نفسه؟؟؟

غصب عنى مش قادرة اسكت...مش قادرة اسكت وانا بسمع ان اغلب (( الناس الكويسة )) بطلوا حتى يدبحوا ف العيد ...ألكل ماشى على نظام الصكوك ..والناس بقى اللى عندها ضمير تفرق بمعرفتها فلوس وغيره ....طيب مين بقى فاضل فيهم لسا عنده ضمير ؟؟

مش قادرة اسكت وانا بسمع اهوال بتحصل ف البلد ....عصابات عصابات عصابات مبرمجة ولادها على السير على نفس الطريق ..

آهى السلامات دى والمواساة دى بتفكرنى بحاجة غريبة ...

بتفكرنى بمسابقات الجرى الجماعى ....آه والله..

اللى بيوصل فيهم بيسلم الراية للى بعده....يسرق له شوية .

وبعد كدة نحلم برضه ....ماهو لازم نحلم ونتمنى ..

ولازم ف يوم حايتحقق الحلم ..

لازم حاييجى حد ويشوف الأصل ....ويشيل الصورة .....لازم يعنى .

لازم حاييجى حد ....عايش كل اللى بيحصل ...

يشيل كل الاشواك اللى مالية كل الطرق وعلى كل الجبهات ..

واحد عايز يعيش بضمير حى ...

عايز يعيش صح..

وعايز الكل يعيش ...زيه .....برضه يعيش صح.

رابط المشاركه
شارك



بسم الله نبدا محاولة ترتيب الفكرة اللى نفسى اقولها ومش عارفة تيجى ازاى ..
دايما اقول ...العنف ليس حلا...لم يكن ابداا هو الحل ...ولن يكون.


امبارح كنت بتناقش مع نفسى ..ماهو برضه ساعات كدة آخد وآدى مع نفسى علشان مش بقدر اصرح بكل اللى جوايا كدة على طول ..
بحب الاول (( ابلور الفكرة ف دماغى )) ل وبعدين اناقشها مع حد يمكن يقنعنى بأى شئ تانى ..
هو انا بقول ايه بالضبط؟؟؟

بقول ..
ان مش ممكن ومش طبيعى ان الانسان يفضل ساكت كدة على طول على الظلم اللى بيشوفه ومش قادر يعمل حاجة ...

يعنى كل يوم والتانى مظاهرات واحتجاجات وصريخ....ولاحياة لمن تنادى ....الا قليلا جدااا..
ساعات بيسمعوا كلام الناس اللى بتصرخ ويعملوا لهم عملية تهدئة مؤقتة .....يعنى علاوة والا ترقية ...اى مسكن مؤقت وخلاص..
طيب...
الكلام ده بيحصل فين؟؟؟
بيحصل ف الدنيا بحالها ...بس فيه بلاد فيها نسبة حرية اكبر من بلاد تانية ..
الامور زادت عن الحد ف اوروبا ..
الظروف وحشة ..
الناس بتعمل ثورات ويحرقوا السيارات ويكسروا المحلات...ده غلط...العنف مش بيجيب نتيجة ..

(( فكرونى بكلمة الرئيس السادات المشهورة ايامها ..(( انتفاضة الحرامية ))
ورغم انها مكانتش كدة..لكن؟؟ الشوية اللى عملوا كدة...شوهوا كل الاعتصام والمظاهرات وكل حاجة سلمية كانت من الممكن ان تحل الموقف ..اذن..نتفق..
العنف لايحل اى مشكلة ..

نشوف حصل ايه من لاعب الامانشستر يونايتد ..الفرنسى كانتونا.

(( الجارديان )) بكل عظمته....راح وراه وشاف الحديث اللى عمله مع ال( بريس اوسيان ) ...يعنى محدش حايروح يبص على جريدة مغمورة زى دى ...
لكنهم كانوا وضعوا فيديو ل اللاعب السابق صاحب الستة واربعين عام...يشرح فيه كل ما يحدث ف العالم من مآسى تدعو فعلا للغثيان ..

والخلاصة واجمل شئ انه بينادى بطريقة جديدة تمامااا للاحتجاج....وهى ...ان كل الناس تروح يوم سبعة ديسمبر وتشيل فلوسها من كل البنوك...هههههههه....معقول ده حايحصل؟؟؟
كل الناس ف اوروبا حاتاخد فلوسها؟؟؟

http://www.youtube.com/watch?v=-Uop5R7E314&feature=related

هو قال كلمة جميلة جدااا....يعنى الكلمة اللى قالها دى تضعه وسط الفلاسفة العظام ( المودرن )قال........

عندما تتابع اسراب النورس المركب ....فهذا معناه ان احداا سوف يقذف سردينا ف البحر ..

طبعا معروف ان اريك كانتونا له طبع ..بركانى ...
لكن؟؟؟
الفكرة رغم غرابتها ...تروقنى فعلا .

ان حدث هذا فعلا .....فسوف يكون له معنى صعب ان نغمض اعيننا وندعى اننا لانراه..
سوف تحدث فعلا ثورة ..
سوف يهتز الاقتصاد..

اجمل شئ ...ان فات بس ساعات او يومين ...
والثورة خلاص قامت على النت.... :blush2: unsure.gif
والكل بينادى ..
اسمعوا كلام كانتونا..

وآهى مجرد تهيؤات ..ويمكن ف يوم يبقى لها اى معنى
.. :give_rose:

رابط المشاركه
شارك
  • 2 months later...

جمعة مباركة ان شاء الله.

جمعة مباركة ان شاء الله .

ياااه....

قرأت ما سبق ان كتبته هنا وتعجبت ....وكأنى كنت احلم واستبق الأحداث .

كأنى كنت اريد الاعتراض السلمى..بلا اى عنف .

لم اكتب اى شئ فى اى موضوع .........ثورى .

لم ارفق صورة ...أو...فيديو...أو احكى خبرا او حدث .

لم افعل اى شئ ..أكثر من ....القراءة والمتابعة و..التأمل ...والدعااااااءءءء

الدعاء...

الدعاء...

يارب احفظها لنا ...,احفظ ولادنا وشبابنا وشيوخنا وامهاتنا وبناتنا ..

ياااارب...

انت العالم اد ايه بنحبها ...

لكنه هو....من يحكم بلادنا

حبها وبيحبها زى ما احنا بنحبها ؟؟؟

طيب لو دول ولاده .....ليه معملش زى ماعملت ...أمرأة وأم ...مع سيدنا سليمان ؟؟؟

ليه ما تنازلش ؟؟

مش مهم مين يمتلك ..(( البنية ؟؟ )) المهم انها تعيش..

قلبه مش بيوجعه..على الشباب اللى ضاع؟؟

مش بيوجعه على اللى ضاعوا ؟؟؟ اللى راحوا ؟؟؟

اى حاجة تتنسى ..أى شئ ممكن يتنسى ....الثورة تتنسى ...الانتفاضة المؤقتة ( لو كانت مؤقتة )) تتنسى ...

الدوشة والتخبيط حتى بغطيان الحلل ...يتنسى ..

لكن؟؟؟

الدم؟؟؟

الدم؟؟؟

الدم حايتنسى ؟؟؟؟ حايتنسى ؟؟؟

مشفتوش اسكندرية كلها..اسكندرية اللى قالت للعالم كله...

اعرفوا معنى الحزن الجليل....لابد حاخد حق ابنى ؟؟؟

محدش قال ...ليه....ليه ده حصل ؟؟؟

محدش قال ان الميعاد دايما كان على البحر ؟؟؟

محدش قال ؟؟؟

ويوم ما ....مات طفلكم ....بكى شيخ الأزهر ....,انا بنفسى رايت المفتى يبكى وسمعته بنفسى ف برنامج البيت بيتك يقول انه رأى هالة نورانية حول وجه الطفل الملائكى ...,بكيت ...ورغم انى احترم هذا الرجل جداا وكنت احرص على الاستماع له يوميا فى حديث الصباح ...الجمتنى المفاجأة ..هذا نفاق واضح...

ورغم ذلك .....بكى الشعب كله.

ماحنا شعب بيحس ...والله بيحس وعاطفى ...

اقيمت الصلاة فى المساجد كلها ...والدعاء للفقيد كان فى كل بيت ..

واقيم قداس على روحه الطاهرة ...

طيب واللى راحوا مننا ؟؟؟....حتى ....جثثهم ...تم الحصول عليها بصعوبة فائقة ...وارواحهم؟؟؟؟صعدت طاهرة الى بارئها مع الشهداء والصديقين ان شاء الله...

طيب ودول ؟؟؟

دمهم مش طاهر زى دم محمد؟؟؟...محدش اتكلم ..

عادى ..

عادى جدااا..

وايه يعنى ؟؟؟

كام محمد مات؟؟؟

كااام محمد ذنبهم ف رقابكم ؟؟

فى حرائق القطارات...أم فى غرق العبارات؟؟ ام بالسرطان والكبد الوبائى والفشل الكلوى وانفلوانزا الطيور وتلوث اللحوم والاسماك والمبيدات للخضار والفاكهة ...ولا تنسوا ..الحليب ببودرة السيراميك والفورمالين ..وغيره وغيره وغيره ...

شئ مؤلم .

.مؤلم فقط؟؟؟ لالالالالالالالالالالا..

شئ مؤلم ومقزز ومثير للغثيان............ان ترتع مجموعة حيتان فى بلهنية العيش ...ويبحث تسعين فى المئة من الشعب عن لقمة العيش...فقط..وبصعوبة

وعندما اقول لقمة العيش فقط ..

فمعنى ذلك...

لايوجد بند اضافى للصحة ....مع اختفاء اى ترفيه اسمه تأمين صحى (( وزير الصحة يتعالج هو واسرته على نفقة الدولة فى الخارج وبالملايين )) ..

لايوجد بند اضافى ...للتعليم..رغم الدروس الخصوصية وانحدار مستوى التعليم (( التعتيم )) ...

قلة الدخل ....جعلت الناس ...رغم التدين الظاهر ..(( مش متدينة )) آه والله ..ازاى ؟؟؟

مش بيقولك الا صلة الرحم؟؟؟

طيب ازاى اصل الرحم...اذا كان ممعييش حتى مواصلات اروح اشوف اخويا؟؟؟

معنديش تليفون وان كان عندى ممعييش ادفع فاتورته؟؟؟

طيب اللى حاروح ازوره ده.....مش حادخل عليهم بكيس جوافة والا برتقال ؟؟؟بلاش تفاح؟؟ بلاش ظفر؟؟؟بلاش سمك؟؟؟

ماهى حتى العادات الاصيلة اللى فينا...انقرضت ...لضيق ذات اليد...

ف يوم من الايام...

رايت هنا على صفحات المحاورات فيديو ....وضعه عضو محترم ..

الفيديو على اليوتوب ...لسيدة مسنة مصرية .

الفيديو يقول ...شوفوا القناعة والصبر ..

كل ما المذيع يقول لها حاجة ...ترد تقول بكل صبر جميل ....ألحمدلله..

بتاخد خمسين جنيه معاش ...وامام الجامع بيساعدها بعشرة جنيه ...

وعندها حتة ارض قيراطين بس عندها تلات بنات ارامل وبيصرفوا على عيالهم..

الله؟؟

ايه البؤس ده؟؟؟

دى تعتبر مرفهة بجانب سكان المقابر ...كام مليون عايشين ف المقابر ؟؟

ذنبهم فى رقبة مين؟؟

بلاش تكونوا كسيدنا عمر بن الخطاب رضى الله عنه ..اللى حتى لو تعثرت شاه يكون هو السبب ...

خليكم تفتكروا بس...أن كل راع مسئول عن رعيته...بسسسسسس

قصور نظيف الثلاثة ....بسسسسس....غير ثروة عز...............بس.

ده غير الخمسة وسبعين رجل اعمال اللى اموالهم تعدت الميارات...

ممكن تصلح اقتصاد البلد...

ممكن تلغى العشوائيات ...

سبق لى وقلت ................اسرقوا برحمة ...اسرقوا بس سيبوا شوية صغننين للغلابة ..

دى سرقة بكل ...فجر...(( الفاء عليها ضمة )

فعلا...هم فجروا بجد...

امبارح سمعت كلمة ف الأخبار ....ألأجنبية ..

وجعتنى قوى قوى قوى قوى .......قوى .

قالوا.....اخيرااا.....ثار افقر شعب من شعوب الدول العربية ...

ليه؟؟

ليه؟؟؟

ليه وصلتونا لكدة ؟؟؟؟ليه؟؟؟ ليه تسيبوا كل ...كل ...كل ...وكلاء الأنباء على مستوى العالم كله ..تبدأ تحكى حكاية مصر..

مصر الحضارة ...

ازاى يتعمل ريبورتاج عن الانسان اللى بنى الأهرامات وابو الهول والسد العالى ..الانسان اللى علم الناس يعنى ايه حضارة ؟؟ يعنى ايه ويعنى ايه ويعنى ايه ..

هل هو ده نفسه ....هو الانسان المصرى ؟؟؟

اللى انهاردة جايبين صورته وهو ....يبحث فى صناديق القمامة ليلا؟؟؟؟

ليه وصلنا لكدة ؟؟؟

يعنى ايه ست محجبة ....منقبة بمعنى ادق (( يعلم الله ان كانت راجل والا ست )) تبحث فى صندوق قمامة بجانب اوتيل فخم...

ليه؟؟؟

شوية قوى قوى قوى ....اللى بيحصل فى شوارع مصر دلوقت..شوية فعلا ..

وصلنا لكدة ؟؟؟

وصلنا قبل كدة من كام سنة ............ان المنافقة الساذجة اللى بتبوس الايادى ..وافقت على سفر ( حريمنا ) لخدمة حريم السلاطين...!!!

والسلطانيات ...ماهى كلها سلاطين وسلاطات ...

ربنا ينتقم منهم كلهم على بعضهم ويدخلوا جهنم دفعة واحدة ...

ليه تم تشويه صورة نساء مصر بطريقة منظمة .........بحجة سينما مورن؟؟؟

ليه؟؟؟

ليه سكتنا؟؟

ليه سكتنا لما كانوا شبابنا ....بيتصوروا ف ...( افلامهم ) على انهم مدمنين وشمامين وبلطجية ؟؟؟وبناتنا سوقيات وعاهرات ومدمنات ويبحثن ن الزوج الكهل الثرى ؟؟

ليه؟؟؟

اعلام فاشل..

منظومة كلها فاشلة ..

ودلوقت ؟؟

خايفين؟؟؟

خايفين وبتقولوا ياترى حايحصل ايه؟؟؟

يعنى حايحصل ايه اكتر من اللى حصل ؟؟؟

آدى شبابنا الحقيقى ....شباب زى الفل .

هى دى مصر بتاعتنا ..

مصر بتاعتكم ف ذاكرتكم الضعيفة بس ...

هو ده الانسان لمصرى الراقى ....اللى فعلا مش بيحب العنف وحاياخد حقه بالسلم ..

وبالحق وبالعدل ...

جمعة مباركة ان شاء الواحد القهار ..

يارب احفظ مصر . :egyflag: :egyflag:

رابط المشاركه
شارك

صباح بطعم الأمل والصمود والانتصار والعزة والكرامة .

يعنى بصراحة ياجماعة انا كنت ناوية اضع لكم فيديو لكل اللى بيحصل دلوقت ف لندن وكل عواصم العالم لكن؟

قلت اقول لكم الخلاصة يعنى ...هو مجهود صغير على أد تفكيرى .

أظن بعد كدة كل رؤساء وملوك العرب .....حايلغوا حاجة اسمها ميادين كبيرة ..

لأنهم مش حايستوعبوا الدرس بسرعة ...

لو استمر النظام حتى ولو كان لغاية نوفمبر بسسسسسسسسس.

ميدان التحرير....حايبنوه بيوت .....حايلغوه.

مش حايسبوا اى مساحات فاضية للتجمع....الا ف الصحراء ..

باقى الدول العربية ...

حايعملوا ميادينهم خيام سياحية للترفيه عن الغربيين .

خلاص...

مصر انهاردة بتكتب تاريخ جديد.

المجموعة الاوربية بتجتمع وف اول اجندتها ما يحدث فى مصر....مين كان يصدق؟؟؟مين كان يصدق ...ان اللى ( قال عليهم ...خليهم يتسلوا ) ..عملوا اللى محدش يقدر يعمله..

فاكرين فيلم قديم ابيض واسود ...كان بطولة فاتن حمامة وعماد حمدى ....لما كانوا كل ما يزرعوا الأرض ...يهدوا لهم تانى كل اللى بيعملوه؟؟؟

ولما الاشرار سألوا (( رئيسة كل عصابات التدمير دى )) نعمل ايه؟؟؟

قالت لهم جملة .....دول مش فلاحين ياوله...ده دود أرض .

فاكرين؟؟؟

والآخر....اللى كانت فاكراه ده.....دود أرض .

هو اللى كتب نهايتها..

كان فيلم....لكنه فعلا من سنين طويلة كتب حقيقة .

ايام الثورة كثرت هذه الأفلام على اساس انها قضت على الاقطاع والرأسمالية والاستعمار و...كووووول الكلام الكبير ده؟؟ ...اشتراكية وديمقراطية ووحدة ...وعدالة اجتماعية ومساواة ...ووووووو..واستمرت للآن...لازالت تنقل لنا ( كل ) ما انجزته الثورة المباركة ..!!!!!

وزى ما بيقولوا ...راح ملك وجه الف ملك..

اجمل حاجة ف قصة انهاردة .

ان المصرى اثبت انه...مصرى قوى .

راهنت دايما على اصالة معدن المصريين .

وقلت ..

أن ما افرزه المجتمع من عشوائيات وضالين وخارجين على القانون ...هم نتيجة سياسات مستبدة ...نتيجة نظام فاسد ...نتيجة منظومة نشاز ف المجتمع المصرى .

ان شاء الله.

العملية ناجحة بكل المقاييس..هى فعلا نجحت..

تمت ازالة البؤرة الصديدية من جسد خير اجناد الأرض .

وازيح الستار ..

وظهرت شمس الحرية ساطعة ....ظهرت معادن الذهب تلمع ..فى ميدان التحرير وفى كل ميادين مصر..

بحبك يابلدى ياأرضى ياناسى بحبك وعارفة انك قوية وعفية .

ياراضية وصامدة وأبية .

بحبك يامصر. :clappingrose: :clappingrose: :clappingrose:

رابط المشاركه
شارك

يااااه إحساس المفاجأة المخلوط بالذهول

فرحة غريبة جدا مشوبة بخوف و قلق فظيع على المستقبل

وجع فى القلب على اللى ماتوا واللى لسه بيموتوا

آثار بلادى اللى اتنهبت واتكسرت

أهلى وهم طاعنين فى السن وميتين من الخوف قافلين بابهم ومخزنين أكل عشان مش عارفين ممكن يعرفوا يخرجوا امتى؟؟

وهما سامعين اصوات البلطجية تحت مع ضرب النار ومش عارفين ايه اللى ممكن يحصل

إحساس تام بالعجز من جانبى ...ولكن ربنا هو الحامى ويحفظهم آمين

كل الأحداث بتلح بشدة فى ذاكرتى على مشهد واحد ..فيلم كنت شفته ليوسف شاهين أسمه هى فوضى

فيلم أدركت إن كله رموز لواقعنا..

أمين الشرطة اللى كان بيرمز للنظام و الفساد الذى زكم الأنوف..بيستخدم نفوذه للسرقة وفرض الأتاوات و إنتزاع الحقوق

يحاول إنتزاع فتاة بريئة و يغتصبها بالفعل عنوة وهى ترمز للشعب او ترمز ل...مصر

ثم يأتى المشهد الأخير

لم أصدقه و شعرت أنه خيال السينما و إستحالة حدوثه فى الواقع...أجتمع الأهالى ...كل حكى عن مظلمته ..كل حكى عن إحساسه بالخنوع والذل و الظللم

أجتمع الأهالى...قاموا بثورة

قبضوا على أمين الشرطة الفاسد

و انتقموا منه...

الخيال يصع الواقع

الظلم يولد ثورة..

تنبأوا بها ولم نصدق...لم نصدق

وحدثت

وثار الشعب

بلادى بلادى...لك روحى وفؤادى

فأنت أنت الحياة ولا حياة إلا بك يا مصر:egyflag:

رابط المشاركه
شارك

فعلا احساس جميل ورائع ومش قادرين نقول عليه اسم معين .

مرحبا بك ياسوسو معنا فى تهيؤات تسبح فى فضاء اللامعنى ....

وكما سبق وقالت ريهام....بعض التهيؤات اصبح لها معنى ..

لكن؟؟؟

واعود وافكر فى ...اللامعنى للأشياء التى تحدث ....!!!!

اشعر بغصة ..

غصة ف قلبى ..مش واقفة ف زورى بس.

انا حاسا فعلا ان ..

الشعب كله بقى معتقل .

معقول كل ده بيحصل؟؟

فيه نسبة تخبط ف القرارات غير طبيعية .

لسا برضه بعد كل ده بيعتقلوا اللى بيتكلم او بيكتب او بيعبر عن رايه؟؟؟

ليه؟؟؟

ايه المطلوب من الشباب ؟؟

انه يعيش داخل فقاعة من صنع النظام؟؟

مش كفاية اللى اهالينا عايشين فيه دلوقت؟؟ مش كفاية اللى بيحصل ف كل انحاء مصر من سرقة ونهب وترويع للأهالى ؟؟؟

سؤال جد....جد الجد...مش هزار .

ايه الأعداد المهولة دى من قطاع الطرق والحرامية ومسجلين خطر؟؟؟

من المستحيل ان يكونوا كما قيل....اربعة الاف بلطجى ومسجل خطر..

مستحيل...

دول لايقلوا بأى حال من الأحوال عن مليونين .................ليه بقى ؟؟

لم يتركوا شبر ف مصر كلها الا وروعوه.....مدن وقرى وحتى مع سكان المناطق الصحراوية .

بالأمس علمت انه تمت سرقة التاكسيات وعربات الاسعاف فى الاسكندرية وسيارات نص نقل كانت فى طريقها لمارينا لسرقة بيوت الناس هناك..

تم ضبط سيارة بالصدفة.من الاهالى وسلموهم للجيش .

واليوم علمت من البى.بى.سى. ان البلطجية دخلوا القرى على انهم ناس من وزارة الصحة رايحة تطعم الناس ...والكل اصطف ف مكان معين ..,هم نهبوا البيوت.

وغيره وغيره وغيره..

استحالة دول كلهم يكونوا ...خريجى سجون تم ترحيلهم وسيبوهم على الناس كوحوش مفترسة ؟؟

طيب...

معنى كدة بقى ان فعلا تحت رعاية ومباركة هذا النظام المبارك..

اصبحت مصر مقسمة الى ..

1.فئة حاكمة متحكمة فى اى ايراد لخزينة الدولة .

2.فئة تستولى على اى مشاريع لصالحها وباسم الدولة .

3.فئة اقرباء واصدقاء للفئتين السابقتين ...تحصل على نسبة اقل نوعا ما لكنها تعوضها بقروض لاتدفع بالمليارات .

4.فئة ما يسمونهم ( الصفوة ) وهم اصل البلاء..وهؤلاء من حقهم كل شئ وكأنهم يتحركون داخل عزبة بابا وماما....دول صفوة الحرامية الشيك ..حرامى بسموكنج يعنى .

5..فئة المثقفين او الطبقة المتوسطة العليا وهؤلاء تم ( وأدهم ) اى انهم دفنوا بطريقة او بأخرى ولا يسمع لهم صوت وحتى ان صرخوا فانهم يزج بهم ف السجون.

6.فئة الطبقة المتوسطة المستورة وهؤلاء اصبحوا يعيشون فى دعة ولا يسمع لهم اى صوت ..جنب الحيط يعنى .

7.فئة الحرفيين التى افرزت ( رجال اعمال جدد ) وبالتالى خلقت جيل غريب جدااا لديه المال ولكن؟؟.........لن نتحدث الآن .

8. فئة الباعة الجائلين وهؤلاء يشكلون نسبة كبيرة من الشعب رغم ( محاربة الشرطة لهم ).

9. فئة اولاد الشوارع ..هؤلاء لايعترفون بأى شئ يعنى لادين ولا اسرة ولا اى شئ ..

10.سكان المقابر وهؤلاء.. بعضهم وياللغرابة ...اسر متدينة وتعيش ف حالها والبعض الآخر اى نسبة كبيرة منهم ...قنبلة موقوتة فعلا .

11.فئة سكان العشوائيات ...نفس الشئ بالنسبة لفئة سكان المقابر ..

12. فئة المهااااااااااجرين والمساااااافرين.....وهذه فئة او هى فعلا تعتبر

مورد اساسى من موارد البلد للعملة الصعبة وعلى كاهلهم تقع مسئولية اصلاح

احوال ( اسرهم ) بمعنى ؟؟ غسلت الدولة يدها من اى مواطن يعيش على ارضها فعلا ..

ولسا فيه فئات كتير...

طيب لو بصينا ولقينا ان بس اربع فئات بتعيش ..

طيب الباقى ؟؟؟

عايش ازاى ؟؟؟ ازاى ؟؟؟

ولسا بنستغرب من اعداد اللى بيسرقوا ؟؟

وبنستغرب اكتر واكتر بكتيررر من ملايين الفقراء ...الفقراء ...الفقراء المثقفين الواعيين ...الشرفاء ؟؟؟

هو حصل ايه بالظبط ف البلد؟؟

دى مكانتش سرقة منظمة وبس. ...لالالالا

ولا كانت احتلال...

لالالالالالالا

دى كانت خطة محكمة للقضاء على شعب مصر كله...كله يعنى كله...

اللى يسافر ...ويرتاحوا منه لأنهم طفشوه.

واللى يسيبوه يسرق..ويتاجر فى ارواح الناس ويثرى على حسابهم ..يستورد لحوم ملوثة ومبيدات مسرطنة .

واللى يسيبوه يموت بدون ادوية او اى رعاية طبية ..

واللى يتركوه...للجهل ....لأنه ممعهوش مصاريف تعليم لأولاده رغم ان (التعتيم) مجانى ..بس حايجيب منين ثمن الدروس الخصوصية ؟؟...يطلع بقى زى ما يطلع ..

واللى يسيبوه يتعلم ..,متقلقش ..مفيش شغل وروح اقعد على قهوة ..

وكل فترة ...

يبنوا .سجون جديدة..

سجون...

سجون...

فيها كل الفئات ..معتقلين سياسيين...اخوان...حرامية..مسجلين خطر ..معترضين...

وغيره وغيره وغيره..

للأسف.

الثمن غالى قوى قوى .

ارواح ودماء طاهرة ...وياعالم فيه ايه تانى .

لكن؟؟

كان لابد من البتر بأى وسيلة .

استفحل الداء حتى لم يعد يفيد أى دواء ..

يارب احفظ مصر .

يارب احفظ مصر..

رابط المشاركه
شارك

شكرا جزيلا سيادة الرئيس..

شكرا جزيلا من أعماق القلب ...

شكرا جزيلا ياسيادة الرئيس ..نودعك مع خالص الاحترام وتمنياتنا الطيبة بقضاء شيخوخة راضية هادئة وديعة...........بعد أن لاتنتظر ان يطلب منك احد المحاسبة .

وتحاسب نفسك اولا على ...خضوعك...كأب ....لنزوات ابناءك وتطلعاتهم .

هذه هى فقط نقطة ضعفك ايها القائد العظيم......فأنت فعلا (( كنت قائد عظيم وكانت لك هيبة عسكرية لاجدال عليها ))..

تركت .. حسن التصرف ...لشريكة حياتك وابناءك واصدقاءك ...اثروا على حساب شعب مصر كله....ونسيت ان مصر ليست ملكية خاصة .

ليست ملكية خاصة ...ولا تورث..

شكرا سيادة الرئيس...

مشكلتنا الآن ليست فى ...الخراب المنتظر ...!!!

مشكلتنا الآن ليست فى ....ضرورة استرجاع كل اموالنا المنهوبة ..

مشكلتنا الآن ليست فى .....محاسبة كل المافيا التى كانت تحيط بك...ولم تكن تغمض لك العينان ..بدليل...

سوف اذكر دليل واحد فقط....او...ليكن..دليلين.

دعنى اذكر ...

مجرد اسمين...

حسين سالم.....احمد عز.

فقط هذان...

وبدون ذكر اسماء باقى المليون نصاب ...

لو لم تقف بجانبهما .

كان من الممكن ان يمر يوم ...25 يناير...كأى يوم فى الأجندة المصرية .

لو توفر هذا المال المسروق فقط من ...الاثنين...لتغير اقتصاد البلد.

لو لم تكن لك ...حراسة بهذا الكم الهول من ..الحرس الجمهورى الذى يحصل على اكثر من نصف دخل قناة السويس ..

لتغير الوضع..

شكرا سيادة الرئيس....

لو كانت فقط الحصيلة من ثورة الغضب..........هى ....عودة نسيج الأمة مرة اخرى الى ماكان عليه قبل ...رئاستك..

فهذا يكفينا..

هذا يكفينا...

شكرا سيادة الرئيس.....شكرااااااا

لقد انقذتنا ...بدون ان تدرى ..من فتنة طائفية .

لقد انقذتنا....بكل الحنكة السياسية لديك ..

وكنت سببا..

كى يعود كل الى عقله.

كان من المفروض ان اقول انى حزينة على سرقة آثارنا...حزينة على منظر المومياوات مخلوعة الرأس وملقاة على أرض المتحف المصرى ..

كان المفروض اقول انى حزينة اكثر على الحرائق ..وسوف اتغاضى عن السرقات وترويع الاهالى ..

لكن؟؟

لكن؟؟؟

على من يجب ان نحافظ اولا ؟؟؟

على من يجب ان نبكى اولا ؟؟؟

أعلى سرقات المتاحف ...وضياع اموات الفراعنة ؟؟؟

واين نحن من ....ضياع ارواح المصريين ...الذين كانوا احياء ...بيد كل نظام البطش ؟؟

انبكى على الأموات وننسى الأحياء ونتركهم يموتون ...جوعا ومرضا وألما وقلقا وترويعا ؟؟؟

فعلا....

تم خراب مصر فى سبعة ايام ...وتحتاج لعشرين عام حتى تستعيد عافيتها ..

لكن؟؟

ف الحقيقة ...يتم الخراب بصفة منتظمة منذ اكثر من خمسين عام ...

خمسون عاما يتم نهب مصر..

آن آوان النظر الى ....الانسان المصرى .

وهاهو قد هب ..ولا أظن ان باستطاعة أحد أن يرجع المارد الى داخل القمقم مرة اخرى .

شكرا سيادة الرئيس..

فخيرا صنعت ..

صورة اليوم كانت عظيمة جدااا..

صورة اليوم كانت ...مسلمة بحجاب هو علم مصر تعانق مسيحية تعلق الصليب والاثنتان تهتفان...عاش شعب مصر...شعب واحد ونسيج واحد. :give_rose: :give_rose: :give_rose:

رابط المشاركه
شارك

أسجّل اعجابي الشديد جدا جدا بتهيؤاتك الني تسبح في فضاء اللامعنى

رغم اعتراضي الشديد على نبرة الاحترام التي لا يستحقها

ورغم اعتراضي على رقة الكلمات التي استخدمتيها في اللوم والعتاب

ولكن أعتقد أن مايستحقه من كلمات لا يستوعبها أي وصف ولا كلمات

جزاه الله ما يستحقه من جزاء

وجزانا الله الحاكم العادل الذي يمحو عنا همّ السنين الماضية

تقبل تحياتي

رابط المشاركه
شارك

أعتقد أنها ل تعد تهيؤات

و أنها فعلا تسبح

و لكن في سماء المعاني

تحياتي يا أعظم أم:give_rose:

أتمنى أن ألتقي بك في الأسكندرية الحبيبة

وحشتني اوي اوي اوي

قريبا جدا

بإذن الله

رابط المشاركه
شارك

أثناء متابعتى الحثيثة للأخبار على مدى أسبوع..بين المحطات و المواقع المختلفة..

تختلس ابنتى الكبرى 8 سنوات النظر و يحثها الفضول...تود تفهم..

ربما هو توريث الجينات...اود دوما ان افهم ما يدور حولى..

تسمع الهتافات ولا تفهم ماهو النظام او الشعب...

الصغرى صاحبة الثلاث سنوات تردد الهتاف...الشعب يريد اسقاط النظام مع حروف ناقصة كثيرة وهى سعيدة ولا تفهم...فقط تهتف!!

سألتنى الكبرى...ماذا يريدون؟؟ لماذا يهتفون؟؟

اخبرتها يريدون خلع الرئيس؟

لماذا؟؟

سؤال صعب...مفردات اللغة لا تكفى لسرد الأسباب..و الأهم كيف تفهم من فى عمرها كل هذه الأسباب..

وكما يقولون ان كلمة الحق هى اول ما تقال..

أجبتها فى بساطة..لأنه سرقنا!!

سرق الشعب

أجابت فى ذهول..

سرقكم..سرق جدو فولان و تيتة فولانة...وتيتة الأخرى

نعم

هل سرقك انت ايضا؟

نعم

سرق الكل...الكل

غضبت جدا..لفهمها المحدود لفعل السرقة..وقالت سأضربه عندما أراه

رابط المشاركه
شارك

يارب احفظ بلدى.

يارب احفظ شباب بلدى.

يارب احفظ ولادنا الأطهار .

يارب ابعد عنهم الفجار .

يارب .

سترك وعفوك ورضاك ياأرحم الراحمين.

------------

غمست سنك فى السواد يا قلم

علشان ماتكتب شعر يقطر ألم

مالك جرالك إيه يا مجنون ... وليه

رسمت ورده وبيت وقلب وعلم

عجبى!!

صلاح جاهين.

-----------

يارب .

انت قادر على كل شئ يارب .

افرجها من عندك يارب .

رابط المشاركه
شارك

يارب احفظ بلدى.

يارب احفظ شباب بلدى.

يارب احفظ ولادنا الأطهار .

يارب ابعد عنهم الفجار .

يارب .

سترك وعفوك ورضاك ياأرحم الراحمين.

------------

غمست سنك فى السواد يا قلم

علشان ماتكتب شعر يقطر ألم

مالك جرالك إيه يا مجنون ... وليه

رسمت ورده وبيت وقلب وعلم

عجبى!!

صلاح جاهين.

-----------

يارب .

انت قادر على كل شئ يارب .

افرجها من عندك يارب .

يارب آمين

رابط المشاركه
شارك

مش عارفة ليه فكرت ف حاجة ..

ياترى خطرت فى بالى قصة ..عودة الروح؟؟؟..,والا عودة الوعى ؟؟؟

طيب ليه انا متفائلة قوى قوى وحاسا ان....

رمانة الميزان رجعت تانى وحايعرفوا قيمتها ..

احنا كنا وحانفضل دايمااااا رمانة الميزان

الطبقة المتوسطة المثقفة .

اللى دايما حاولوا يهمشوها ويلغوها .

وجعلوا كل بلطجياتهم الأغنياء الجدد...يخفوها عن الأعين..ولا يسمع لها صوت ..

هى فعلا الطبقة المتوسطة اللى ممكن نسميها رمانة الميزان..

اد ايه قلبى فرحان بكل شباب مصر ..كأنهم كلهم ولادى ...كأنهم اتجمعوا مرة واحدة وصرخوا ...

نجحنا..

نجحنا...

نجحنا بكفاحنا واصرارنا ومبادئنا..

واد ايه حاسا بالحزن على اللى راحوا ...كنت ببص على الصور وعلى الاسامى ..وابكى ..

فعلا فعلا ...

هو ده الورد اللى فتح فى جناين مصر..

هو ده الورد اللى فتح ونور مصر ..

يارب ارحمهم وصبر اهاليهم..وارزقهم حسن الخاتمة .

يارب بارك ف شبابنا وولادنا .

يارب احفظ مصر.

يارب احفظ مصر ..

رابط المشاركه
شارك

مش عارفة ليه فكرت ف حاجة ..

ياترى خطرت فى بالى قصة ..عودة الروح؟؟؟..,والا عودة الوعى ؟؟؟

طيب ليه انا متفائلة قوى قوى وحاسا ان....

رمانة الميزان رجعت تانى وحايعرفوا قيمتها ..

احنا كنا وحانفضل دايمااااا رمانة الميزان

الطبقة المتوسطة المثقفة .

اللى دايما حاولوا يهمشوها ويلغوها .

وجعلوا كل بلطجياتهم الأغنياء الجدد...يخفوها عن الأعين..ولا يسمع لها صوت ..

هى فعلا الطبقة المتوسطة اللى ممكن نسميها رمانة الميزان..

اد ايه قلبى فرحان بكل شباب مصر ..كأنهم كلهم ولادى ...كأنهم اتجمعوا مرة واحدة وصرخوا ...

نجحنا..

نجحنا...

نجحنا بكفاحنا واصرارنا ومبادئنا..

واد ايه حاسا بالحزن على اللى راحوا ...كنت ببص على الصور وعلى الاسامى ..وابكى ..

فعلا فعلا ...

هو ده الورد اللى فتح فى جناين مصر..

هو ده الورد اللى فتح ونور مصر ..

يارب ارحمهم وصبر اهاليهم..وارزقهم حسن الخاتمة .

يارب بارك ف شبابنا وولادنا .

يارب احفظ مصر.

يارب احفظ مصر ..

بحبك يا مصر

بحبك اوي يا ماما سلوى

و بحب كل المحاوراتية

و كل المصريين

و كل العالم

و كل الكون

من النهاردة مفيش غير حب حب حب

من النهاردة بدأ العمل

من النهاردة بدأت الحياة

:give_rose::give_rose::give_rose:

رابط المشاركه
شارك

انشئ حساب جديد او قم بتسجيل دخولك لتتمكن من اضافه تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل ؟ سجل دخولك من هنا.

سجل دخولك الان

×
×
  • اضف...