حرفوش جديد

[حرفوش]

أنا عضو جديد لانج, و إسمى " حرفوش" وهى مفرد كلمة " حرافيش" , وهى المجموعة التى كتب عنها الكاتب الكبير نجيب محفوظ فى كثير من رواياته.

و الحرفوش هو الإنسان المصرى البسيط, الذى يريد أن يعيش فى سلام, و يحب جيرانه, و يحترم قيم المجتمع, و يرفض الظلم.

لهذا, يسعدنى أن أكون حرفوشا معكم.

[Farah]

اهلا وسهلا بيك نورت المحاورات

[فــيــروز]

الحق يا س.س. htr::

الناس بتوعك بدئوا يهلوا من ساعة ما بقيت ازرق :blink:

مش الحرافيش دول اللى طلعوا فى فيلمك المفضل بتاع عاشور الناجى والعالم اللى بترزع فى بعض دول؟ :blink: ولا التانى كان فيلم التوت و النبوت !! :blink:

على العموم اهلا وسهلا بيك يا حرفوش وسط اخوانك mfb:

[حرفوش]

الأخوات و الإخوة الأعزاء,

كان إختيارى موفقا عنما قبلت نصيحة صديق لى بالإنضمام الى محاورات المصريين الرائع, و أشكر الأخ أفيونة على ترحيبه, و هو مصيب فى قوله أنى متخفى, لأنى عادة البس الجلبية البلدى.

و أشكر الأخت فرح على باقة الورد الجميلة, التى تعبر عن جمال محاورات المصريين, و أعضائه.

و أخيرا , أشكر الأخت فيروز على تنبيه الأخ س س ( و يبدوا أنه إنسان مهم, و لازم أخاف منه ) بوصولى, و أطمئن الجميع أنى مجرد حرفوش صغير غير ضار, و غير مؤذى, و فى أغلب الأحيان, خفيف على القلب مثل السمن البلدى.

و بالمناسبة, أنا لم أضهر بعد فى أية أفلام, و لكنى أعدكم بأنكم ستكونوا أول من يعلم "إذا حدث هذا فى المشمش" cr((: :P mfb:

شكرا لكم يا أصدقائى الأعزاء, و يسعدن مشاركتكم فى حوارات مفيدة بإذن الله.

[فــيــروز]

لا لا ده س.س. راجل طيب و امير mfb:

هو بس كل ما يبعت لى رساله على الخاص يمضى زى عاشور الناجى اللى كان فى الفيلم :P .. اظن انه التوت و النبوت ماعرفش انا باتلخبط بين الفيلمين cr((:

المهم مرحبا بيك يا اخ حرفوش و نصيحه ليك ابعد عن اى خناقه خصوصا لو بالشوم لحد ما تاخد كارنيه التامين الصحى وبعدين تبقى تطيح فى الكل mfb:

[حرفوش]

ا[خت العزيزة فيروز,

يبدوا أن هناك لبس بين الحرفوش الذى يرتدى الجلبية البلدى, و بين فتوات الحسينية.

فأنا حرفوش طيب, , و لن أستعمل نبوت, و لن أطيح فى أحد, فأنا هنا فى مهمة سلمية, و سأستعمل النبوت عند زيارة لعض المواقع المعادية, حينئذ, سوف يكشر الحرفوش الطيب عن أنيابه, و يورى العين الحمرة, ثم يهرب بسرعة. fsh:: fsh::

[فــيــروز]

ا[

حينئذ, سوف يكشر الحرفوش الطيب عن أنيابه, و يورى العين الحمرة, ثم يهرب بسرعة. fsh::  fsh::

عين العقل cr((:

ممممم

واضح ان فعلا عندى سوء فهم فظيع للعلاقه بين الحرافيش و الفتوات

دى علاقة النقيض بنقيضه على كده

معلش اصل انا ثقافتى فى الموضوع ده تليفزيونيه بحته يعنى اعرف ان الحرافيش و التوت و النبوت افلام من تاليف نجيب محفوظ ..

على العموم انا اشتريت قصة الحرافيش من معرض الكتاب اللى فات .. وكنت مؤجله قراءتها لكن يبدو انى ساضطر للبدء فيها

[kfaya]

أهو استقبالاتك دى يا فيروز هى اللى بتطفش الزباين ......

الراجل بيقول حرفوش , و دول مجموعة أصدقاء نجيب محفوظ كانوا بيسهروا كل اسبوع فى نادى على النيل و هاتك يا نميمة و نكت و تريقة على أوضاع البلد و العالم ومن ضمنهم أحمد مظهر رحمة اللة وفى الاخر الكل عايز يهرب من دفع الحساب ناس أخر طراوة ( دائما ما يرتبط فى ذهنى الحرفوش ب شارلى شابلن )

موضوع بقى سليمان الناجى و الفتوات دى حاجة تانية و الفتوة البلطجى غير خالص الحرفوش ابو دم خفيف

أما بقى الرجل الازرق س.س. فأحسن نصيحة لك هى ... الزلفى ...الزلفى ...

يعنى ارسمة و اديلة بريستيجة , هتاكل هنا عيش و بغاشة .... و متقولشى ماحدش وعانى و خد بيدى .... vmp:

حللت أهلا .... و نزلت سهلا .......و طيب مقام...... cr((:

[سقراط المصري]

اهلاً ً ومرحباً بالحرفوش

نورت وانست محاورات المصريين، شكلك كدا كنت متابع من زمان ، وشكلك كمان فاهم القعده ، يعني داخل تمسي على المعلم الكبير س س .

شكلك بترسم على منصب من اولها.

مرحباً بك مره اخرى

سقراط cr((:

[حرفوش]

أشكر الأخت فيروز على تفهمها للفروق التى أزاد ايضاحها الأخ كفاية( و له مزيد الشكر ), الذى عنده معرفة ( بكفاية) بتاريخ الحرافيش.

و لقد إجتمعت مع عدد من الأصدقاء فى مجلس منذ 3 سنوات, و قررنا إحياء نادى الحرافيش, حيث كنا نجتمع دوريا فى بيت أحد الأعضاء , بالدور, لنناقش أمور بلدنا ,

و فجأة, جاءنى صديق يعمل بالداخلية, ينصحنى بأن نفض المجلس, لأننا نتكلم فى السياسة, و أنه يجب أن نتلم, و إلا,

و منذ ذلك الوقت, أتلمينا, و ما زلنا متلمين, بدون إجتماعات.( الجبن سيد الأخلاق )

و حتى لا نعرض أنفسنا لغضب الملك, قررنا أن نتكلم فى السياسة, فى سرنا, أى و نحن صامتون.

لهذا , تابعت محاورات المصريين, ووجدت أنكم تفكرون بصوت عالى, فقررت الإنضمام.

و أشكر الأخ سقراط لذكائه, فقد فهمها و هى طايرة,أى أنى على إطلاع مقدما ببعض شئون محاورات المصريين,

و لكنى ليس لدى أى طموحات,

و ليطمئن سى السيد , فأنا إنسان وديع, و لا أشكل خطورة لشخصه العظيم, فهو فخر للمحاورات, و سترى المحاورات على أياديه أزهى عصور التقدم و الرفعة, و حاجات أخرى كثيرة سأشتشير فيها سمير رجب, راعى الصحافة الحرة. و الضمير المستريح.

ألم أقل لكم أنى إنسان وديع, و ماشى جنب الحيط؟؟؟ cr((:

تم تعديل 25 مايو 2004 بواسطة حرفوش

[hamo90]

يا أهلا بالحرفوش الجديد

علي فكرة انا عضو جديد زيك برده

وبرده بعتبر نفسي حرفوش وسط الرعابيب الكبار بتوع محاورات المصريين

بس انت يا عم مين قدك أول ما اشتركت عملوا ليك هيصة في غيرك نفضوا ليه ( الا المعلم سي السيد اللي رحب بانضمامي )

بس بجد أنا حاسس أني فعلا حرفوش وسط الاخوة

يعني مثلا حبيت أحط موضوع من يومين

لقيت الموضوع موجود من أسبوع والردود عليه ققققققد كده

مالهاش أول من أخر

فعلا نحن حتي الان حرافيش

ويا أهلا بيك يا حرفوش

ملحوظة :-

يا ريت نتعكز علي بعض ( أقصد نحن الحرافيش) عشان الرعابيب يدونا حتة نعيش فيها جنبهم

hamo

cr((:

[Salwa]

اهلا اهلا بالحرفوش ....واهلا اهلا بHAMO 90 ..

على فكرة ....اعتقد ان كلمة الحرافيش .اى....مجموعة الناس اللى عايشة فى الحارة ...

ملهاش دعوة ب..ان كانوا بسطاء ام لا ...

ثم حورها الناس على مجموعة الأصدقاء ....بدأت بأصدقاء الحارة الواحدة ......ودلوقت تطلق على اى مجموعة اصدقاء ..

وككلمات كثيرة آخرها ....ايش.

دراويش...حرافيش..../ سنترفيش/....../ دى لازمة ...شئ لزوم الشئ ../

[نيرون]

ليه كده يا حاموووووو

الاهلاوى واثق من نفسه

وفى كل مكان يضفى رونقا وبهاءا

تأكد ان مجرد رؤيه الشعار المقدس فى اسمك يكسبك احترام الاخرين!!!!!!!!!

حرفوش

ضم علينا هنا احنا الثوار ومرحبا بك وعدى على عمنا حشيش يباركك

ولعه هنا ياوااااااااااااااد

كتنا نيله

ربنا يقل منهم

افففففففففففففففف مليتوا البلد cr((:

[حرفوش]

أشكر الأخ ( الحرفوش الآخر) هامو 90 على ترحيبه الجميل, و يسعدنى أن يكون لى أخ حرفوشى فى محاورات المصريين, و ربما سنتمكن من إنشاء حارة خاصة بنا فى المستقبل,

و هذا يقودنى الى ما ذكرته السيدة المحترمة سلوى عن أصل كلمة الحرافيش, و أشكر لها هذا الإيضاح, و لكن كان لى صديق أسم عائلته " حرفوش" و لا أدرى إذا كان هذا مفرد لكلمة الحرافيش, أم أن كلمة الحرافيش هى جمع لإسم حرفوش.

كل هذا لا يهم, المهم اننا جميعا عشاق لمصر الحبيبة.

و أشكر الأخ نيرون على " تسخينه" الترحاب, و ذلك بإضافة بعض السبرتو عليه, لزوم الولعة, و ليت الأخ نيرون يشرح لى من هم الذين يعزهم جدا و دائما يذكرهم فى نهاية مداخلاته؟

سؤالى سببه أنى مازلت أخضر, و حين أصير أزرق, سوف أتوقف عن الأسئلة, و أمشى جنب الحيط.

شكرا لكم جميعا, لقد كان إختيارى موفقا, و الى الحرفوش الآخر, يسعدنى وجود حرفوش آخر معنا.

[Cleo]

ألأف حمدلله على سلامة الأخ حرفوش...

و بمناسبة التحاقه بمحاورات المصريين نعزمه على أحلى طبق تونة بطليموسى و طبق زيتون كالاملتا من اللى قلبك يحبه فى شرفة القصر بتاعى فى أبو قير....

[حرفوش]

أشكرك يا أخت كليو على ترحيبك بشخصنا الضعيف, كما أشكر لك كرم ضيافتك بعزومتى على أكل فاخر فى قصرك العامر.

و نظرا لأنى متعود على أكل الفول( إذا وجدته, فهو عملة صعبة هذه الأيام)كما أنى لم أفهم معنى كالامينا او كالام.. حاجة, فربا كانت من الممنوعات أو المحرمات, فإنى أفضل الجرجير, و لا بأس من قليل من البقدونس.

أما بالنسبة للتونة, و أعتقد أن هذا إسم سمك كان قد إنقرض منذ حلول الحكومة الحالية, و نظرا لأنها من العصر البطليموسى, فأنا أعتذر عن تناولها لأنها قد تكون قد تحجرت.

صحن فول سيكون كافيا, و لا داعى للقصر, فلقمة هنية, فى أى بقعة فى مصر, ستكون هنية بإذن الله.

شكرا مرة أخرى على الكرم المصرى الأصيل.

[Scorpion]

أهلا أخ حرفوش... نورت الحارة...

بس معلهش.. فيه كام حاجة كده لازم تتعمل في الأول.. و الأخوة هنا نسيوا ( او انكسفوا ) يقولولك...

دفعت الأشتراك و الا لأ ؟؟؟... :rolleyes:

عالعموم لو ما معكش.. و لا يهمك... ما هو كل ال منتدي عالنوتة..

الله يمسيك بالخير يا طفشان.. من ساعة ما مشيت و ماحدش واخد باله من الميزانية...

[linux]

مرحبا بأبو الحرافيش (عاشور الناجي)

حاسس أني أعرفك من زمان، من أيام الحارة في طريق الحسين، جنب التكية لما كنت بأستمع للأناشيد مع الشيخ عفرة.

يا تري أيه آخر أخبار المعلم زين و درويش زيدان و شمس الدين و سماحة بكر؟ السلام أمانة!

...

و كان يسهر ليله في الساحة أمام التكية، يطرب للألحان، ثم يبسط راحتيه داعيا "اللهم صن لي قوتي، وزدني منها، لأجعلها في خدمة عبادك الطيبين".

[حرفوش]

الأخ العزيز سكوربيون,

هل هذه أول لدغة لك فى شخصى الضعيف؟

لقد قرأت كثيرا عن الطفشان, و لكنى لم أقرأ أنه قد عينك أمينا لصندوق المحاورات نيابة عنه, و لكن رغم هذا سوف أدفع رسوم الإنضمام الى المحاورات, فى شكل مداخلات, ومناقشات.

إذا وافقت على ذلك, سوف أسمح لك بالإنضمام الى نادى الحرافيش, بدون رسوم, التى سأتولى بدفعها نيابة عنك كمبادرة حسن نية و حوار.

عزيزى لينكس,

و حشتنى أيامك, و لكن كثير من الزملاء القدامى قد إختارهم الله, و لكن بعضهم مازالوا حرافيش مخلصين لمصر, و مازالوا يسبحون بعظمتها, و بعظمة أهلها.

سيد السعدنى, و أحمد رجب يهدونك السلام, و البقية , بما فيهم أحمد مظهر, تعيش إنت, و لا حول و لا قوة إلا بالله.

تحياتى لجميع من قرأ هذه الكلمات, فكاتبها "مصرى, حتى النخاع "

( إقتبست هذه الكلمة من عضوة قديمة جدا إسمها "الدكتورة عبلة", و كانت عضوة نشيطة فى محاورات المصريين, ثم حدث سوء تفاهم, قررت بعده البعد عن جميع محاورات المصريينات )

فى النهاية, قرأت لأحد أخوتنا طلب برجوع بعض أعضاء محاورات المصريين الذبن تركونا لخلافات مع الإدارة, أو لخلافات فى الآراء. و أنا أناشد هؤلاء الأعضاء العودة الى المحاورات, فهى الملجأ وهى الملاذ, لكل رأى حر.

تم تعديل 27 مايو 2004 بواسطة حرفوش

[Lighthouse]

مرحبا بالاخ حرفوش

معلش متأخرة شويتين بس السكة زحمة وعلى ماوصلت كان الاخوة والاخوات قاموا بالواجب وزيادة

على فكرة يااخي حرفوش

اي حد يحاول ياخد منك اشتراك

اوعي تديله rs:

انا بس اللى بالم الاشتراكات هنا prt:

نورت المـنـتـدى

:o