أرجوك لا تغضب

[se_ Elsyed]

قال رسول الله صلى الله عليه وسلم " ليس الشديد بالصرعة .. ولكن الشديد من ملك نفسه عند الغضب "

ومعنى الحديث إن الفتوة واللي شايف نفسه ، مش هو مفتول العضلات الذي يستطيع ان يصرع الآخرين بقوته الجسمانية .. ولكن الإنسان القوي والشديد هو من يستطيع ان يملك نفسه عند الغضب ولا يُقدم على إرتكاب حماقة ممكن ان تؤدي به إلى نار جهنم ..

- تذكرت هذا الحديث عندما قرأت عن حادث وقع في مصر الأسبوع الماضي عندما أصطدمت سيارة ملاكي يقودها شاب سعودي بسيارة آخرى من الخلف وبها إثنين من الشباب وزي الدومينو كده أصطدمت الملاكي بسيارة تاكسي من الخلف أيضاً فما كان من سائق التاكسي ( اللي عنده 63 سنة ) إلا ان نزل مسرعاً من سيارته وهو يحمل كوريك السيارة ليضرب بها سائق الملاكي الثاني فنزل الشاب بدوره وهو يحمل " عصا بيسبول " يحتفظ بها في سيارته وراح خابط السواق على دماغه جابها نصين ووقع على الأرض ماحطش منطق ...

فزي ماحنا شايفين لحظة غضب راحوا كلهم في داهية واحد مات والله اعلم إذا كان عنده اولاد محتاجين وجوده وشاب في مقتبل العمر هايدخل السجن بتهمة ضرب أفضى إلى موت وهاياخد فيها على الأقل 3 سنوات يقضوا على مستقبله ، وعائلات هاتتبهدل وهي بتلف ورا أولادها في المحاكم وورا المحامين .

في حين كان يمكن معالجة الامر بمنتهى البساطة لو تحكموا في أنفسهم للحظات فقط ولكنه دائماً هو منطق الغاب الذي يرجع بالإنسان إلى طبيعته الحيوانية وبالتالي يؤدي إلى عدم إستعمال العقل .

- بس بيني وبينكم رجعت وقولت طب لو إنت يا س س كنت مطرح الراجل التاني ولقيت أخونا السواق اللي شاهر سلاحه وجاي يديك كوركين على دماغك هاتعمل إيه ؟ بصراحة ساعتها لازم ادافع عن نفسي وكنت ممكن أخبطه بعصاية البيسبول بس بلاش على دماغه ممكن أخبط منه الكوريك وبعد كده أديلوا كام قلم على بونية .. تشكيلة يعني ...

- طب ماهو ممكن يموت يا فالح من اول زقة ... يبقى قدره كده بقى انا هاعملوا إيه .. مش هو اللي عامل فيها سبع والبادي اظلم .

- حاجة غريبة تانية حصلت لي وهو إني اول ما قرأت الخبر ده قلبي وقع في رجلي وقولت ده أكيد واحد صديقي شغال معانا في السعودية وغاوي عربيات - حتى انا شاري منه العربية اللي معايا دلوقت - وعلى طول حاطط عصاية بيسبول تحت القزاز الوراني وبيمشي يشاكل طوب الأرض هنا وإتخانق كذا مرة بنفس العصايا دي .. صاحبنا ده موجود في مصر دلوقت ونزل بسيارته برضوا عشان يتزوج للمرة الثالثة ويجيب العروسة الجديدة بعيالها معاه بس المرة دي هو بيعمل خير لأنها أرملة ومعاها 3 اولاد بتربيهم وزوجته التانية هي اللي إختارتهاله وقالت له إتجوزها ينوبك ثواب - هي دي المُثل العليا -

وإتحايلت عليه كذا مره يبيعلي العصايا دي لأن شكلها حلو وبديل عن الشومة والأسلحة البدائية القديمة ولكنه رفض ... بس الحمد لله ماطلعش هو وطلع لاعب بسيبول تاني .