كل سنه و انتم طيبيين

[جـورج]

كل سنه و الجميع بخير

[Salwa]

السيد الفاضل جورج .

شكرا جزيلا ...

كل عام ونحن جميعا بخير .....

اعلم انك تقول ذلك بمناسبة المولد النبوى الشريف ...ولعلك لاحظت ان الأغلبية المسلمة لم تهنئ بعضها البعض فى هذا اليوم العظيم ...وذلك يا اخى الفاضل .....لأن الأغلبية مقتنعة انه حرام

الاحتفال بهذا اليوم ...

عموما .شكرا مرة اخرى على اللفتة الجميلة ..

وربنا يجعل ايامنا .....كلنا المصريين ....بخير..

تحياتى ..

[ragab2]

شكرا جزيلا لجورج

ويجعل أيامنا جميعا مسيحيين ومسلمين خيرا وسعادة

باذن الله

[تلميذ]

الأخت الفاضلة سلوي

من قال أن الإحتفال بميلاد الرسول الكريم حرام؟!!!!!!

وأين تلك الفتوي التي تؤكد كلامك؟

وهل تم عمل استطلاع للرأي في هذا المنتدي والذي علي أساسة تفضلت بالقول بأن الأغلبية مقتنعة بأن الإحتفال بميلاد الرسول الكريم حرام؟

قد يكون هناك تحفظ علي بعض مظاهر الإحتفال بهذة المناسبة الكريمة ولكن إذا كان الإحتفال لايخرج عن الحدود الشرعية بأن ننتهزها فرصة نجلس فيها إلي أبنائنا وبناتنا ونتدارس معهم بعض المواققف من سيرة رسولنا العطرة وأن نأخذ منها العبرة والعظة ونذكر لهم مواقف من حياة الرسول تكون لهم نبراسا يضئ لهم الطريق فما الحرام في هذا؟ وما المانع أن يتم هذا وهم يأكلون حلوي المولد التي ليست مما حرم اللة؟ لن أدعوك أن تشتري لهم عرائس وأحصنة والتي قد يراها البعض تماثيل وأصنام.

شكرا لإنك فكرتيني أروح أشتري حلاوة المولد.

وكل عام والجميع بكل الخير.

[White heart]

على فكرة الصورة دى على الرغم من بساطتها ... لكنها بتعبر عن حاجات جميلة ، و مريحة....

و بالمناسبة وراها فيه معلومات مش بطالة عن تلك المناسبة السعيدة ....

فكل عام و أنتم جميعا بكل صحة و خير .....

[abofasad]

اردت أن أكون أول المهنئين بعيد المولد النبوي الشريف

ثم تراجعت بعد قراءة مداخلة مدام سلوى

ثم تشجعت بعد قراءة مداخلة الأخ "تلميذ"

أريد أن أعرف هل أنا محق في تهنئتي.

على العموم كل عام وكل الأخوة في المنتدى بخير

ويا حبذا لو حد يبعتلنا حتتين حلاوة ع الماشي

متشكر مقدما يا س س .. الحلاوة وصلت

[الأفوكاتو]

كل عام و أنتم حميعا بخير, و أشكر الأخوة جورج و هوايت هارت على تقدمهم بالتهنئة.

الأخ تلميذ,

لم تكن فتوى, و لكن بعض الأخوة ناقشوا فى الماضى هذا الموضوع, و رأوا أن الإحتفال بمولد الرسلون ليس من فروض الإسلام.

كل عام و أنت بخير.

[Lighthouse]

الاخوة الافاضل

كل سنة وانتم جميعا بخير وصحة وسعادة

ويجعل كل ايامنا اعياد يارب

انا جيت مخصوص علشان ارد على تهنئتكم الرقيقة

اصلي مشغولة باكل حلاوة المولد

تاخدوا حتة art:)

[الأفوكاتو]

الأخ أبو الفصاد,

كل سنة و أنت طيب, و الإحتفال بمولد النبى قد يكون مثار خلاف بين بعض الفقهاء, و لكن تمنى الخير للجميع واجب فى جميع الأوقات, و لا أرى فى ذلك خروج عن الدين.

شكرا لك و لبقية الأحوة على المشاعر الطيبة.

[ragab2]

لو

هانطاوعهم

هانحرم كل حاجة ابتداءا من أكل البطيخ والملوخية

والطبخ بالتقلية

[عادل أبوزيد]

شكرا من الأعماق للجميع

و ليتكم جميعا إستمتعتم بحلاوة المولد

عامة بالنسبة لنا يا مسلمين مولد النبى موسم كعديد من المواسم التى نحتفل بها دون أن يكون فى ذلك إلزام أو عدم إلزام دينى.

و أنا أتكلم عن نفسى طوال عمرى أشترى الحلاوة فى مولد النبى (و ليس فى مولد السيدة مثلا ..و لا أدرى لماذا) و فى رأس السنة الهجرية نأكل المهلبية فى الصباح (لم أعرف ذلك إلا من من حماتى) و فى الصعيد ندبح بطة مثلا فى أى موسم.

و لا أستطيع أن أتذكر المواسم الأخرى لكنى أذكر تعبير "الأعياد و بنات الأعياد"

لعل هناك نقطة أحب أن أوضحها إحتفالنا بمولد النبى لا يمثل ناحية دينية كتلك التى يمثلها مولد السيد المسيح للإخوة المسيحيين.

عندنا دينيا عيد الفطر عقب نهاية شهر رمضان و عيد الأضحى فى العاشر من ذى الحجة.

أعتذر إذا كنت أدخلتهم فى متاهة بعد قولى "و أنتم بالصحة و السلامة" ... سامحونى و سأرسل حلاوة المولد على الإنترنت لمن يطلبها

[سقراط المصري]

كل سنه وانت طيب يا جورج وكل سنه واحنا كلنا طيبين وبخير.

سقراط

[kfaya]

أنا مخى قرب يضرب .... ما كنت بتفرج من سوكات لازم يعنى أتفلسف و أدخل و كمان عايز أكتب !!!!! الكتابة دى ليها ناسها يا با ....

المهم انا من يوم ما دخلت يعنى من تلات اربع تيام و انا عايز افتح توبك ( صح توبك دى ) تهنئة المولد النبوى الشريف .... لكن قلت يا واد استنى شوية و خليك لارج و خلى حد من الاخوة المسيحيين يبتدى و انت وراة على طول زي يعنى تقاليد المنتدى عشان الروح والاخلاق و الحجات دى ... طبعا انتوا فاهمينى ... يا دوبك صهينت شوية اللى حسبتة فعلا لقيتة ... اخويا جورج فتح الموضوع الساعة 3.51 ..... جريت عشان ابقى التانى لقيت أختى سلوى ردت خلاص !!!!!!!! و الساعة كام 4.01 ....... قلت ماشى الاقدمية ليها حقوق .... كنت محضر كلمتين ظراف خفاف ... . ببص لئيت كلمة \\\\\\ حرام \\\\\\

قلت بس للخلف دور ...... انت عايز تكون كافر المنتدى من أول اسبوع .... طب أعمل اية فى علبة الحلاوة الاربعة كيلو اللى لسة شاريها من عند العبد و اتبهدلت من الزحمة و دافع فيها الشيء الفلانى و منئيها علا الفرازة من كل الحاجات اللى بحبها .... اديها للبواب ولا للشغالة ؟؟؟؟ طب لو كان حرام ماهو انا اللى هاخد ذنبهم ؟؟؟؟؟ ام اذا كان على دكر البط اللى متزغط فول ودرة من شهرين لما بقى يطلع عشرة كيلو .. ممكن نخلية فى الفريزر و ناكلة على عيد ثورة التصحيح يوم 15 مايو او حتى من غير مناسبة ما يخسرش .....

طب الناس اللى عازمينهم زى كل سنة على صلاة الظهر جماعة يعقبها جلسة دينية خفيفة يتحدث فيها كل واحد شوية عن مأثر الرسول الكريم صلى اللة علية و سلم و نتلوا ما تيسر من القرأن الكريم ثم نقوم على البطة و الحاج رز و الكشك و الملوخية فى جلسة عائلية ينتظرها الصغار قبل الكبار ....... اعمل فيهم اية ؟؟؟؟؟؟

لما أخش اصحي المدام و أقولها و ألم الحصان و العروستين .......::::::""""":::::::

بصوا بقى بالزوق بالعافية \\\ كل سنة و انتم طيبيين \\\

و هاكل الحلاوة و البطاية

[se_ Elsyed]

كل سنة والجميع بخير وفي اتم صحة واحسن حال ...

في ديننا الإسلامي نحاول دائماً الإبتعاد عن البدع ، بمعنى إن يوم مولد الرسول كان بتاريخ 12 ربيع الاول ... يبقى مانفعش أخصص اليوم ده بس عشان اتذكر الرسول .. وباقي السنة أنساه .... كمان لابد ان نقتدي بصحابة رسول الله الأبرار يعني إذا كانوا وهما اللي عاصروا الرسول ماحتفلوش بحاجة زي كده .. نيجي إحنا نتفلسف ونبتدع إحتفال من الهوا .. وتقريباً كلنا عارفين إن الإحتفال ده إبتدعه الفاطميين الشييعين وهم أساساً أهل بدع وخزعبلات وأدينا بنتفرج عليهم بيعملوا إيه .. إشي الضرب بالسيوف في عاشوراء وإشي الإحتفال بأربعين الحسين ... إلخ .