اخوانى المغتربون

[joo]

بما ان معظم زملائى فى المحاولات لا يعيشون فى مصر

انا طمعان فى اجوبتكم بس بصراحة

عندما قررت اهاجر الى كندا كنت متحمس جدا جدا وكنت حاسس ان الحياة هناك هتدينى اللى انا عاوزة

وهعيش سعيد انا واولادى

لكن فى الفترة الاخيرة حسيت بأحباط شديد من اللى سبقونا وحسيت انى هنا ملك زمانى بشتغل شغلة كويسة جدا بأخد مرتب مش بطال وعايش عيشة حلوة ومرتاح

بس من كلام الاخرين حسيت انهم بيبداو من الصفر ومش مبسوطين ومكتئبين

فلو سمحتم احكولى عن خبرتكم

لانى خايف اسافر واندم وخايف مسافرش وبردو اندم

[التونسى]

بما ان معظم زملائى فى المحاولات لا يعيشون فى مصر

انا طمعان فى اجوبتكم بس بصراحة

عندما قررت اهاجر الى كندا كنت متحمس جدا جدا وكنت حاسس ان الحياة هناك هتدينى اللى انا عاوزة

وهعيش سعيد انا واولادى

لكن فى الفترة الاخيرة حسيت بأحباط شديد من اللى سبقونا وحسيت انى هنا ملك زمانى بشتغل شغلة كويسة جدا بأخد مرتب مش بطال وعايش عيشة حلوة ومرتاح

بس من كلام الاخرين حسيت انهم بيبداو من الصفر ومش مبسوطين ومكتئبين

فلو سمحتم احكولى عن خبرتكم

لانى خايف اسافر واندم وخايف مسافرش وبردو اندم

من الاخر .. اللى هاجر .. هاجر :)

لو حضرتك ظروفك كويسه فى مصر ومستوره معاك زى ما حسيت من كلامك .. يبقى من رايى انك متهاجرش .. وربك هنا ربك هناك

وكله برده يرجع لظروفك ...ولتفصيلات حياتك اللى محدش يعرفها غيرك انت واسرتك

هى معادله .. وتحسبها .. مكاسب وخساير .. وعشان تضحى بوطنك وذكرياتك واستقرارك .. لازم يكون التمن المقابل يستحق فعلا .. انت راجل متجوز وعندك اسره ولا مجال لاى مغامره ممكن تعصف لا قدر الله بحياتك دى اللى بنيتها .. لو كنت لسه فى مقتبل حياتك وخالى زى ما بيقولوا .. كان ممكن اقولك جرب .. وسافر .. لكن ده مش قرارك لوحدك

ربنا ييسر لك الخير حيثما كنت :)

[joo]

شكرا يا استاذ تونسى على اهتمامك ودعائك

انا فعلا مرتاح هنا بس خايف ييجى يوم ولادى يقولولى انت السبب فى اعدتنا هنا

[اغابي]

شوف يا جو .. يا ابن الملك

مع احترامى للاخ الفاضل التونسي

انا راى تسافر طبعا - اى غربة فى الاول بتتعب لغاية ما توصل للي بتحلم بيه

بس احنا مشكلتنا جيل عاوز بسرعة كل حاجة وما عندهوش استعداد يسافر

انا راى ضدد انك تقعد فى مصر - سافر انت واهل بيتك وربنا حيوفقك اكيد - والتوفيق من عند ربنا . .

لازم تبقى مغامر - ما تخليش روح المغامرة تسيبك ابدا - انا كان مستوايا كويس فى مصر وجيت الكويت لطموحات اكبر

انا صحيح محبتهاش ومحققتش كل طموحاتى - بس برضوه افضل من انى اكون لسة فى مصر لغاية دلوقتى

- ودى الصراحة يا جوو لو انت عاوز الصراحة .. اوى

لازم طموحك ما ينتهيش عند نقطة - وتوقف عندها وانتهى الموضوع -

لاء- اجتهد - وغامر ولازم يكون عندك روح المغامرة - انشالله لو عندك 10 عيال خدهم على ضهرك ولف العالم بيهم

- اجرى فى الدنيا وربنا موجود فى كل مكان ..

دور على حياه كريمه تحترم ادميتك - افضل من كدا - واستقر فيها ..

md2: واساسا ما ينفعش بعد كل المشوار داه يا جوو ..... والتكاليف ...... والمجهود ...... وانت قربت توصل خلاص تيجي دلوقتى تتردد -

من يضع يده على المحراث لا ينظر الى الوراء

اتمنى لك التوفيق

اغابي

[joo]

سدئينى يا اغابى كلامك منطقى

بس بردو خايف من الفشل

[لى لى]

يا راجل حد يطول يروح كندا ؟

[Alrefaey]

1+1 = 2

احسبها صح , شوف مكاسب الهجرة بالنسبة لك مقابل عيوبها

الاقدار والتوفيق من الله وهو لوحده اعلم بالغيب

لكن ليس هناك مانع ان تخطط جيدا لمستقبلك ومستقبل اولادك وطموحاتك

مكاسب الهجرة شىء نسبى كلا منا له اهداف قد نتفق معظمنا فى بعضها مثل التعليم الجيد الرعاية الصحية احساسك بالمواطنه وقد يكون لكل منا طموح يخصه لوحده

قم بعمل مقارنه وضع المميزات فى كافه مقابل العيوب لو هاجرت

وقم بعمل مقارنه وضع مميزات عدم هجرتك والعواقب فى كافه وقارن

لا تهاجر اذا لم يكن لك مخطط سليم , اشخاص يساعدونك ,اعداد نفسك زهنيا ووظيفيا للهجرة وتأمين الوضع المادى لأسرتك

اعقلها واتوكل :lol:

[joo]

كلامك موزون جدا يا رفاعى ومنطقى

انا فعلا كنت حاسس انى هلائى نفسى واولادى فى الهجرة بس فى ناس راحو ومش مرتاحين وفى ناس مرتاحين

علشان كدة انا عاوز اعرف تفاصيل حياة المهاجرين اللى فى المحاورات علشان استفاد منها واعرف العقبات اللى ممكن تقابلنى

واعمل حسابى عليها ومتصدمش

تحياتى لك وللجميع

[doha]

مهو لو هتخاف تقعد في مصر عشان ميجيش يوم عيالك تقولك ليه عملت فينا كده ممكن برضه وبنفس المنطق تسافر وتسيب اهلك وناسك وكل الي تعرفهم ويجي لاقدر الله يوم عيالك تنساك بقى وتبعد هي كمان زي ماانت عملت قبل كده وساعتها انت الي هتلوم نفسك وتقول ليه عملت فيها كده

مقدامكش غير حل واحد .. تحسبها من كل الاتجاهات انت في اللحظه دي ودلوقت وفي المستقبل القريب مش البعيد مين افضل انك تفضل في مصر ولا تهاجر ؟ والي تستقر عليه اعمله ونفذه فورا ومتشيلش من دلوقت ابدا هم ان بكرا ممكن يطلع الي عملته غلط لان يكفيك شرف المحاولة والاهم لان الي هيلومك بعدين ميعرفش الظروف قدامك كانت ايه ولا اضطرك على قرارك ايه

بس سيبك من كل ده وطالما ان زوجتك وراك وبتقولك اتلحلح وخلص ورق الهجرة فانت ملكش اختيار ومهاجرون مهاجر ياولدي

ربنا معاك

[hanzalah]

ياعم جو باختصار

رب هنا

رب هناك

يعني المكتوب لك .. راح تشوفه

وانت راجل مؤمن ان الارزاق على الله

فلا تقلق أبداً

وبعدين الواحد مش ممكن يطول كل حاجه

يعني هتاخد من مصر بعض الايجابيات وتشيل معاها شوية سلبيات

و ف الغربة نفس المعادلة .. هتاخد بايد .. وتدي او تتنازل عن شيء تاني بإيد

والاختلاف كله في تقييمك و الوزن النسبي اللي اعطيته لكل نقاط المعادلة

يعني مثلا ممكن تكون مرتبط بابوك وامك .. كبار ف السن .. مين يراعيهم ف غيابي .. طب الدعوة منهم بالدنيا

وبالتالي تقعد .. وترفض السفر

وممكن تكون على العكس .. بيلح عليك طموح كبير ليل نهار .. ومش راح تهدى ابداً قبل ما تجرب وتسسافر وتشوف بعينك وتجرب ..

ايه ياعم جو يابن الملك

انت خايف

يبقى هتنجح يا رأفت .. قصدي ياجو

اعقلها وتوكل على رأي عمنا (الرفاعي)

بس بصراحة السطر بتاع اختنا "ضحى" كان ف الجون

بس سيبك من كل ده وطالما ان زوجتك وراك وبتقولك اتلحلح وخلص ورق الهجرة فانت ملكش اختيار ومهاجرون مهاجر ياولدي

ربنا يوفقك ويحفظك

تم تعديل 11 مايو 2010 بواسطة hanzalah

[MZohairy]

غالبا

معظم اهداف الهجره الايجابيه بتنعكس على الأولاد مش على الاب و الام

مايمنعش ان الاب و الام بيستفيدوا من الحريه و العدل و الاحترام و النضافه و النظام

لكن استفادة اولادهم هي الجائزه الكبرى

يعني لما يتعلموا تعليم كندي و يبقى باسبورهم قوي و صحتهم كويسه و نفسيتهم متزنه و شاعرين بآدميتهم و اهميتهم غالبا بيكونوا متميزين عن غيرهم في بلدان العالم الثالث وقت عقد المقارنه ده غير ان فرص عملهم حتكون افضل و اعلى

ربنا يوفقك و يهديك للصح ايا كان

[joo]

غالبا

معظم اهداف الهجره الايجابيه بتنعكس على الأولاد مش على الاب و الام

مايمنعش ان الاب و الام بيستفيدوا من الحريه و العدل و الاحترام و النضافه و النظام

لكن استفادة اولادهم هي الجائزه الكبرى

يعني لما يتعلموا تعليم كندي و يبقى باسبورهم قوي و صحتهم كويسه و نفسيتهم متزنه و شاعرين بآدميتهم و اهميتهم غالبا بيكونوا متميزين عن غيرهم في بلدان العالم الثالث وقت عقد المقارنه ده غير ان فرص عملهم حتكون افضل و اعلى

ربنا يوفقك و يهديك للصح ايا كان

شكراا

[hOuSsAm]

بص يا عم جو

من سنتين بالظبط كنت بقول هى مصر ولا فيه غيرها

فى مصر هحقق كل طموحى وامنياتى وهعيش احسن عيشة

ودايما بقول اللى ينجح فى مصر يقدر بسهولة ينجح بره واللى مينجحش فى مصر عمره مهيشوف نجاح ولا هيدوق طعمه

والحمد لله وصلت فيها لنجاح معقول ولمستودى دخل نسبيا كويس

جه السفر كدة على غفلة

وسبحان الله لاقيت فيه منفعة كبيرة ليا زى مبيقولوا كدة فى السفر سبع فوايد

وبصراحة فرق معايا كتير اوى فكريا وخبرة وماديا وطموح وحجات كتيرة اوى

الفرق بينى وبينك انك عندك اسرة لكن انا كنت فردانى فانا مهما عملت مش هخسر كتير لكن انت خسايرك هتبقى كتيرة

هى مغامرة ولازم تكون محسوبة بالتفاصيل

كان نفسى اقولك صلى استخارة بس ارجع واقول ادعى ربنا بطريقتك انه يسهل لك طريقة

نصيحتى لك هاجر وكمل المشوار بس بشرط انك تحسبها كويس اوى

امسك الورقة والقلم واحسب المزايا والعيوب والنتايج واعرف ايه كل خطوة والخطوة اللى بعدها (حلل كل حاجة)

واحسب كمان انك لو لاقدر الله حصلت مشكلة هناك او فشلت يبقى فيه الخطوة اللى تقدر ترجعلها

يعنى متعملش زى ناس تبيع بيتها والعربية وتسيب شغلها واصحابها وترمى كل ده ورا ضهرها وتهاجر

دايما لازم يبقى فيه مكان ترجعله

ابراهيم الفقى وزويل مكنوش هيبقوا كدة لو مهاجروش

الدكتور مؤسس جمعية رسالة مكنش هياسهها لولا انه راح كندا وشاف العمل التطوعى هناك

الامثلة كتيرة اوى

ركز كدة يا حلو وربنا يقويك وعشان انت هتيجى تاخدى من مطار مونتريال

بعد عشرين سنة كدة

[MoHaMMeD EgYpT]

انا رايي تمسك العصاية من الوسط , خير الامور الوسط

يعني ايه ؟؟!!

اقولك يعني تقدم هجرة لكندا و تسافر و تاخد الجنسية الكندية انت و اسرتك و بعد الكام سنة بتوع اخد الجنسية تكون درست فيهم و عملت معادلة لشهادتك و ترجع مصر او اي بلد عربي تاني

لان كل مكان و لييه ايجابياته و سلبياته , فانت خدت ايجابيات كندا و هي الجنسية و شهادة حلوة

و سيب سلبياتها و هي ضياع الاولاد لان مهما حصل صدقني احتمال كبير اوي انهم بتئثروا بالبيئة المحطية بهم

و صلي مرة و اتنين و تلات استخارة و ادعي ربنا يرشدك للي فيه الخير , قل لن يصيبنا الا ما كتب الله لنا

و في الختام ربنا يوفقك للي فيه الخير ليك و لاسرتك , امين يا رب

[MZohairy]

و صلي مرة و اتنين و تلات استخارة و ادعي ربنا يرشدك للي فيه الخير , قل لن يصيبنا الا ما كتب الله لنا

متهيألي دي صعبه شويه

[engmido]

جو باشا

اتفق مع رأى التونسى وهو راجل دايما بره وشاف هنا وشاف هناك

بس احب اضيف.....حاجة بسيطة

هى ان مصر على الوضع الحالى( بجميع المساوىء الل فيها واللى حضرتك وكلنا عارفينها)

تعتبر من وجهة نظرى المتواضعة افضل من غيرها بس بشرط واه من هذا الشرط

هو انك تكون مرتاح ماديا.....ليييييييييييييييه؟؟

فى مصر لو مرتاح ماديا.......ممكن تسكن فى مكان نضيف كالمدن الجديدة وخلافه وتحل مشكلة سكن صحى ونظيف

فى مصر لو مرتاح ماديا.......ممكن تركب احسن عربية وتحل مشكلة تنقلاتك

فى مصر لو مرتاح ماديا.......ممكن تدخل ولادك احسن مدارس واحسن تعليم واحسن تربية وبالتبعية احسن تكوين للشخصية

فى مصر لو مرتاح ماديا.......ممكن تعيش وترفه عن نفسك وتروح وتيجى وتصيف و تعمل كل اللى نفسك فيه وانت نفسيتك مرتاحة

فى مصر لو مرتاح ماديا.......ممكن تعيش حياتك الاجتماعية كويس جدااا وجنب اخواتك وقرايبك

فى مصر لو مرتاح ماديا.......ممكن تحل مشاكل الحياة اليومية والمواقف اليومية فى الهيئات العامة والشارع والعمل وكل شىء

امال انت فكرك الحكومة مزنقة على المواطن ليه ....مش عايزة تديله الفرصة يطلع من دوامة البحث والبحث فقط عن لقمة العيش والحالة المادية المتردية

يعنى لو المواطن حالته المادية اتحسنت وعاش زى البنى ادمين ماهى عايشة هيبدا يفكر فى الحياة السياسية والحزبية و حقوقه المواطنة وهو كمواطن

الى آخره

ارجو الا اكون اطلت عليك او خرجت او شطحت قوى عن سياق الموضوع ولكنها وجهة نظر قد تكون خاطئة والله اعلم

وشكراااااااااااااااا لك