مبروك لمصر فوز الأهلي والأسماعيلي

[se_ Elsyed]

الف الف مبروك لمصر صعود الاهلي والأسماعيلي لدوري المجوعات لبطولة أفريقيا للاندية

ولو أني أول مره في حياتي أتمنى هزيمة الأهلي

لا لشيء إلا لعدم التجديد للكفتجي المدعو حسام البدري الذي لا يفقه في الكره شيء

لكن للأسف

إدارة الأهلي أشبه بحكم مبارك .... عند وكِبر وعنجهيه ... هذه حقيقة وبالتالي فرصة حسام البدري كبيرة في التجديد وبكده نبقى ضمننا المركز الخامس في الدوري العام القادم .. كما أنني غير متفائل في دوري المجموعات الذي يحتاج مدرب فاهم كره مش كفته

أيضاً الأسماعيلي شرفنا ... فبعد التعادل مع فريق الهلال السوداني القوي في السودان .... كانت مهمته سهله للغاية في مصر .. لكن فوجئنا بدون هدف في مرماه ... لكنه حول الهزيمة إلى فوز كاسح 3-1

الأسماعيلي محتاج تدعيم فني كبير جداً بلاعبين محترمين وأيضاً مدير فني فاهم

لا أريد ان افسد فرحة مشجعي الكره بالفوزين

الف الف مبروك لمصر

[MZohairy]

اتفرجت ع الماتش فين يا عفريت؟

[se_ Elsyed]

اتفرجت ع الماتش فين يا عفريت؟

iiiiiiiiiiiiii

ما فيش فُرجه بمزاج بعد رحيلك يا كبير

قولي

الاهلي كسب عندكو في كندا برضوا ولا عشان فرق التوقيت لسه ما الماتش ما جاش عندكو

[jasmin hamed]

لا لا يا استاذ سي السيد زعلتنى منك خالص

انا معاك الراجل ده البدله واسعه عليه شويه

بس سياسة الاهلى ديه بحلوها و مرها هيه الى مخلياه الاهلى لغية النهارده

و احب اقولك الراجل ده مش هيجدد و لو خد البطوله و ابقى قول جاسمين قالت

[الغريب]

ولو أني أول مره في حياتي أتمنى هزيمة الأهلي

لا لشيء إلا لعدم التجديد للكفتجي المدعو حسام البدري الذي لا يفقه في الكره شيء

والله يا سي السيد نفس الإحساس جالي أمبارح وكان نفسي الأهلي يخرج علشان البدري يروح

المشكلة أنا متأكد أن إدارة الأهلي غير مقتنعة بالبدري بس ممكن يخلوه علشان الراتب المناسب والاستقرار وربنا يستر

على فكرة المستويات بتاعة دور الثمانية أعلنت والأهلي على رأس مجموعة هو ومازيمبي وهيكون معاه فريق جزائري لأن الفرقتين الجزائريتين على مستوى واحد ، ومعاه كمان الإسماعيلي أو الترجي لأنهم نفس المستوى

نفسي الأهلي والإسماعيلي يوقعو مع بعض علشان يساعدو بعض ويصعدو أول وثاني إن شاء الله

بس المجموعات هتكون سخنة بالتأكيد والأمور بصراحة محتاجة المراوض الأفريقي جوزيه

تم تعديل 10 مايو 2010 بواسطة الغريب

[lovelyramy]

الف الف مبروك لمصر صعود الاهلي والأسماعيلي لدوري المجوعات لبطولة أفريقيا للاندية

أيضاً الأسماعيلي شرفنا ... فبعد التعادل مع فريق الهلال السوداني القوي في السودان .... كانت مهمته سهله للغاية في مصر .. لكن فوجئنا بدون هدف في مرماه ... لكنه حول الهزيمة إلى فوز كاسح 3-1

الأسماعيلي محتاج تدعيم فني كبير جداً بلاعبين محترمين وأيضاً مدير فني فاهم

لا أريد ان افسد فرحة مشجعي الكره بالفوزين

الف الف مبروك لمصر

الاخ سين سين

الاسماعيلى لم يتعادل فى السودان بل فاز على الهلال السودانى فى السودان واحد صفر

تم تعديل 10 مايو 2010 بواسطة lovelyramy

[محمد عبدالعزيز]

مازلت مقتنع إن حسام البدرى بسماته الشخصية هو أنسب من يتولى المسئولية فى المرحلة الحالية, مرحلة الإحلال والتجديد.

وأبشركم إن مجلس الإدارة قرر التجديد للبدرى فعلاً بعد المباراة:

إدارة الأهلي تقرر التجديد للبدري بعد التأهل لدور المجموعات

وإذا كان على بعض الأخطاء فمفيش مدير فنى على وجه الأرض لا يخطئ, الأهم من كده إنه بيعترف بأخطاءه ويصلحها.

وبعدين الراجل ماشافش أسبوع واحد من غير إصابات وغيابات مؤثرة.

[se_ Elsyed]

مازلت مقتنع إن حسام البدرى بسماته الشخصية هو أنسب من يتولى المسئولية فى المرحلة الحالية, مرحلة الإحلال والتجديد.

وأبشركم إن مجلس الإدارة قرر التجديد للبدرى فعلاً بعد المباراة:

إدارة الأهلي تقرر التجديد للبدري بعد التأهل لدور المجموعات

وإذا كان على بعض الأخطاء فمفيش مدير فنى على وجه الأرض لا يخطئ, الأهم من كده إنه بيعترف بأخطاءه ويصلحها.

وبعدين الراجل ماشافش أسبوع واحد من غير إصابات وغيابات مؤثرة.

يا محمد ..

الديك الفصيح في البيضه بيصيح

المدرب اللي يستغنى عن حسين ياسر المحمدي وأمير سعيود وينزل أحمد حسن اللي عجز على حساب أحمد شكري ويركن مصطفى شبيطه وعفروتو لحد ما صدوا ... يبقى منجد مش كفتجي

والمدرب اللي يلعب أمبارح من بداية الماتش لحد بداية الشوط الثاني براس حربه واحد ووراه قاعدة مثلث مكسور ضلعاها مكون من المغفور له أبو تريكه الذي لم يقدم حاجه هذا الموسم وفقد الذاكرة الكروية ... والضلع الأخر ملصمينه ومسندينه بالعافية وهو بركات ... يبقى عجلاتي

المدرب الذي لازال يتمسك بفرانسيس اللي أخره لا مؤخذه يلعب في مناخيرة مش يلعب كرة قدم ... يبقى طرشجي

والمدرب اللي يقول للعيب كويس ومجتهد عنده زي محمد فضل بينزل يخلص لك ماتشات كتيره " أنت مستواك الفني متدني " وبعدين ينزله بعدها بماتش زي أمبارح عشان يخلصهوله .. يبقى كهربائي سيارات

أعرف تماماً أن لفظ مجتهم ممكن أن يُطلق على حسام حسن وطارق العشري وطارق يحي

لكن محتاج خبره وجرأه وكلام ده .... لا أعتقد إن عماد سليمان وحسام البدري ييجي منهم .. دول أخرهم يبقوا مساعدين

حسام البدري لا يمتلك جرأه هجومية .. ولا عين خبير تصنع لاعب كويس ....

ويكفي حربه لحسين ياسر كما قلت وأمير سعيود وعفروتو

على فكره لو تشوف تصريحاته وشتيمته لهم عشان حريفه زيادة عن اللازم بس محتاجين تظبيط ... تقول الراجل ده مالوش فيها ...

------------

الاخ سين سين

الاسماعيلى لم يتعادل فى السودان بل فاز على الهلال السودانى فى السودان واحد صفر

شكراً يا رامي

-------------

أنا لا أتمنى أي شر لفريقي المحبب ..

لكنني أزعم إني بأفهم كره وأستقرأ الواقع اللي أمامي ..

الأهلي لو أستمر مع حسام البدري ... هانتفضح في دوري المجموعات ..

طب مثال بسيط .... حد فكر حتى في مجلس الأدارة الأشاوس .. وشاف إننا الماتشين اللي لعبناهم بره أرضنا في دور الـ 32 .. أتغلبنا لأاول مره من فريق مغمور من زيمبابوي 1-0 ... ثم من فريق الأتحاد الليبي 2-0 خارج أرضنا .. وبالتالي لو حدث هذا في دوري المجموعات معناها إننا فقدنا 6 نقاط كاملة مهما فزنا بأي نتيجة على ارضنا وبكده نبقى بالسلامه نركن جنب الحيط ؟

بالأضافة إلى إن كل المباريات القوية في الدوري العام أمام فرق القمة سواء الزمالك أو الأسماعيلي او بتروجيت كلها انتهت بالتعادل بالعافية اللهم بتروجيت غلبناها مره ..

الأصابات مش حجه أبداً ...

وإلا كان الزمالك أتحجج إن مشي من عنده أفضل إتنين هدافين عمرو زكي وميدو .. وتقريباً بيلعب من غير هجوم كل الدور الثاني ومع ذلك أستطاع أن يحصد أكثر 40 نقطة مع مدرب فاهم كره وعينه حلوه

-------------

بس سياسة الاهلى ديه بحلوها و مرها هيه الى مخلياه الاهلى لغية النهارده

و احب اقولك الراجل ده مش هيجدد و لو خد البطوله و ابقى قول جاسمين قالت

جاسي هانم ...

هابقى افكرك .. وبكره تقولي الله يرحمك يا كابتن سونسون كان عندك بُعد نظر

[محمد عبدالعزيز]

كلامك أغلبه مردود عليه يا معلمى, يعنى مثلاً اللى طفش المحمدى أساساً من الأهلى هو جوزيه مش البدرى, البدرى يمكن كمل عليه, بس ماحدش ينكر إن لياقته تعبانة ويمكن ده مش مناسب لطريقة لعب البدرى اللى اختارها وهى 4-4-2 , وكلنا عارفين الطريقة دى محتاجة لياقة وسرعة وتكتيك أكتر من المهارة.

وسعيود برضه كلنا عارفين الظروف اللى مشى فيها من الأهلى بعد أحداث الفتنة بين مصر والجزائر, مش قرار البدرى يعنى.

أحمد حسن لسه واخد أحسن لاعب فى الامم الأفريقية من 3 شهور بس, وكان برضه بيجيب أهداف مؤثرة للأهلى ويكسبه ماتشات, ورغم كده انا متفق معاك إن مستواه كان وحش وماكنتش عاوزه يلعب امبارح, بس ممكن يكون البدرى فكر إن ده ماتش محتاج ناس خبرة أكتر عشان تقدر تسيطر على أعصابها لأنه كان ماتش أعصاب فعلاً لأن فريقه مغلوب اتنين ومحتاج تجيب 3 أهداف عشان تكمل, وده برضه يفسر اعتماده على بركات ومتعب وأبوتريكة رغم إنهم لسه مش فى كامل الفورمة ومتعب وبركات كانوا بيلعبوا وهما مصابين كمان.

ورغم كده فى الوقت المناسب غير ونزل الشباب, اللى هو أصلاً اللى مصعدهم للفريق الأول فمش فاهم إزاى بتقول إنه بيركنهم لحد ما يصدوا وكأنه متعمد كده.

محمد فضل بقى أتفق معاك تماماً فى موقفك من حسام البدرى فى الموضوع ده, فعلاً فضل يستحق يكون أساسى, بس برضه نرجع ونقول هو أدرى بحالة اللاعبية بتاعته, المهم إنه يكسب ويجيب بطولات.

أما بقى فرانسيس, فبيقولك اللى اتلسع من فلافيو ينفخ فى فرانسيس, والبدرى معاصر حكاية فلافيو من أولها لآخرها, وبصراحة فرانسيس أحسن من فلافيو فى بدايته مع الأهلى بكتييييييييييييييييييييييير, يمكن هو شايف فيه فلافيو نمبر 2

عفروتو أنا شايف إنه بيزودها فعلاً, مش عشان جاب له جونين تلاتة يبقى خلاص مارادونا, الكلام ده لو كان بيلعب كرة شراب فى الحارة كنا نسقف له, إنما كل كرة لازم يعمل فيها بيليه فى زمانه وهو لسه بيقول بسم الله الرحمن الرحيم يبقى لازم يتأدب شوية عشان تعرف تسيطر عليه بعد كده, لازم يعرف يلعب لعب جماعى مع الفرقة كلها ويستغل مهارته بإيجابية لصالح الفريق مش مجرد استعراض وبس.

احمد ربنا يا سى السيد إن البدرى فى الظروف دى جاب بطولة الدورى ومكمل فى أفريقيا, لو كان واحد خواجة كان قال لك استنونى بعد سنتين تلاتة أكون عملت فريق جديد.

[engmido]

اتفق تماما مع محمد عبد العزيز

وان كنت لا احبذ التجديد للبدرى

وان كان احقاقا للحق .....البدرى عمل ماتش كويس امبارح وتغييراته كلها فى محلها

احمد ربنا يا سى السيد إن البدرى فى الظروف دى جاب بطولة الدورى ومكمل فى أفريقيا, لو كان واحد خواجة كان قال لك استنونى بعد سنتين تلاتة أكون عملت فريق جديد.

[engmido]

الأهلى الأسطورة

Uploaded with ImageShack.us

[se_ Elsyed]

إخص على الكورة واللي عملوها وعلى المنافقين اللي بيشجعوها

شوفوا موقع من المواقع الرسمية ( زمالك فنز ) لنادي الزمالك كاتب ايه وأنا اللي انخدعت بالعنوان وقلت كويس والله الروح دي وعظيمه يا مصر

مبروك للأهلي الفوز على الاتحاد الليبي.. كل الزملكاويه سعداء بالنصر الغالي!

عمت الفرحة الغامرة جميع أرجاء وربوع مصر مساء أمس الأحد ومازالت متواصلة حتى اليوم الاثنين.. بعد الفوز المهم والغالي الذي حققه النادي الأهلي على فريق الاتحاد الليبي في بطولة دوري أبطال أفريقيا.

ورغم ان فرحة الأهلاوية طبيعية كون فريقهم قد فاز وتأهل إلى دوري المجموعات، رغم انه كان يواجه فريقاً لا يعرف شئ عن كرة القدم، ولم نسمع من قبل ان ليبيا تمارس كرة القدم، حتى كان المانشيت هنا في ZamalekFans.com بعد فوز الاتحاد في مباراة الذهاب بثنائية نظيفة، بأنه فوز تاريخي، كون الكرة الليبية غير معروفة أو مشهورة ولا نعرف سبب الضجة التي يفتعلها الاخوه الأهلاوية بعد فوزهم على فريق يلعب طوال التسعين دقيقة في منطقة الـ 18 الخاصة به، ليس لقوة الأهلي، وإنما لضعف ووهن شديدين منه.!!

ورغم الفرحة الأهلاوية المنطقية، غير ان فرحة جماهير الزمالك كانت أكبر بفوز الأهلي الهام.

وتتمثل الفرحة البيضاء في استمرار حسام البدري المدير الفني للأهلي على رأس القيادة الفنية للفريق في الموسم المقبل أيضاً.. ليضمن الزملكاويه بذلك الفوز بالبطولات الموسم القادم بشكل مستريح في ظل وجود العميد المحنك حسام حسن على رأس الجهاز الفني للقلعة البيضاء.

والسبب الثاني في الفرحة البيضاء، يتمثل في صعود الأهلي لمواجهة فرق قوية.. سيعرف وقتها عندما يلاقيها مستواه الحقيقي.!!

ولا تبكي يا بدري.. دموعك ليست غالية علينا.!!!

بالمناسبة

المنافقين بيتعرفوا من المواقف اللي زي دي

اصل بعد هزيمة الاهلي 2-0 في مباراة الذهاب... اتحزموا ورقصوا وهاتك يا قصايد شعر جاهلي في الاتحاد الليبي

لكن دلوقت بيقولوا هي ليبيا بتلعب كورة امتى

فعلاً كل اناء ينضح بما فيه

يعني الاناء اللي مليان مجاري ومياه صرف صحي مش محتاج تقرب منه عشان نعرف ما بداخله

بالمناسبة ليس فرضاً على الزملكاوية انهم يفرحوا ولا يهللوا لفوز فريق مصري

لكن على الاقل ما تبقاش شرير ولا منفسن

آه صحيح .. انا مش باتكلم عن جمهور من الغوغاء ...

لكن باتكلم عن مواقع رسمية

مره اخرى اخص عليكو وعلى اللي قال لكم شجعوا كروه

[الغريب]

أبعد عن موقع الزمالك فنز خالص يا سي السيد

دووول شوية حرافيش عاملين موقع بس

الله يرحم الزمالك لما كان الواحد حتى مبيرداش يجيب سيرته في نكسة السبع سنوات العجاف وكنا بنقول الضرب في الميت حرام

[engmido]

سبع سنوات ايه

ده انا بقالى 10 سنين مسمعتش عن لزمالك ده

اللى كان هيهبط السنة دى...ههههههههه