عمار يامحاورات المصريين

[SANAA]

تضطرني الظروف ان اجلس امام الكمبيوتر لمده طويله في بيتي ولانني احب ان اقرأ اكثر من الكتابه فمعظم الوقت بأحب ادعبس في المنتديات العربيه معظمها اعجب به والبعض اجده تافه وهكذا يعني بااحاول اعرف افكار الشباب في مصر وبحس انني موجوده مع اهلي لان المنتديات تجمع شخصيات مصريه وعربيه مختلفه

كانت المحاورات المصريه اول منتدي اتعرف عليه وشدني معظم كتابه لدرجة انني بأحس انني اعرفهم كلهم وبحبهم كلهم علاقتي بمنتدي المحاورات بدأ من تقريبا 3 سنوات

بيني وبين نفسي احببت كثيرمن قواعدوقوانين المنتدي وكرهت بعضها ولكني اليوم وانا اتصفح بعض المنتديات التي كنت احبها ولكن كان لي بعض التحفظات علي بعض الالفاظ في الكتابه ولغة الشتائم مع البعض ولكني كنت انظر الي المضمون

المهم اليوم بالصدفه اول مره ااخد بالي ان هذا المنتدي فيه باب اسمه الثقافه الجنسيه اتخضيت ولكن رجعت نفسي وقلت يمكن دي ناس مثقفه ليه لا بيفيدوا الناس المهم دخلت علي هذا الباب وعينك متشوف الا النور اي ده الي هذا الحد تحرر الناس والشباب في بلدنا العربيه واين الحياء في الكلام واين الحدود في السؤال المهم اللي بيرد عليهم منهم فيهم وهم غير متخصصين يعني ثقافه مفيش ثقافه دا كل واحد بيقول رائيه صح غلط مش مهم اترعبت واول مره احس ان اولادنا في خطر

ولم اجد كلمه اقولها غير عمار يامحاورات المصرين واجدع سلام وتحيه لكل عضو فيها من غير مجامله وربنا يبارك فيكم كلكم

تم تعديل 15 أبريل 2004 بواسطة SANAA

[se_ Elsyed]

دي نعمة من ربنا بأن يكون هناك إحترام متبادل بين اعضاء مجتمع أو بيئة ما مما ينعكس على اسلوب حوارهم حتى وإن إختلفوا فلابد ان يكون هذا الإختلاف داخل إطار الإحترام ...

وأيضاً ما يميز منتدانا - ووالله العظيم دي حقيقة مش مجاملة - هو التفاعل بين الأعضاء والحيوية ... يعني أنا بأشوف منتديات كتير وبأكون مشترك فيها لكن تلاقي الموضوع ماتحركش من شهرين تلاتة وأوقات كتير جداً بأشك في جهاز الكمبيوتر عندي وأقول هو متجمد ليه كده ؟ معقول فه مواضيع لسه ماترضش عليها من يناير مثلاً ... فتلاقي ده بيصيب الأعضاء بالإحباط سواء اللي كتب الموضوع أو اللي عايز يرد او يكتب تعليق ...

وبعد إذن أخويا محبط .. ففي إحدى إتصالاته بي وكانت الأسبوع الماضي .. قال كلمه جميلة قوي ... فبيقولي إن أحلي حاجة بيحبها في منتدى المحاورات أنه بيشجعه على الكتابة لوجود هذا التفاعل من الاعضاء حتى اللي بيختلفوا معه في أفكاره وطروحاته وده بيدفعه انه يكتب اكتر وأكتر - لدرجة أنا ساعات بأقول لنفسي " يا واد يا س س هو محبط بيكون مجهز المواضيع اللي مابيقلش طولها عن 3 متر دي على جهازه وبعدين بيعمل قص ولزق .. ولا دي فتوحات من عند ربنا ولا إيه بالظبط " ؟-

ده العبد لله يوم ما بأفكر في موضوع لازم اجهز له الأول وأروح أكل اكله كويسه .. وأستعد نفسياً للهجوم والدفاع والأوفرات العالية ...

بس هي دي الفروق الفردية ... حاجة بتاعت ربنا :)

زي سناء مثلاً أهي مش مشتركة من يونية 2003 يعني حوالي سنة لكن لسة بدبورة واحده .. يعني Junior Memeber وعدد مشاركاتها 45 وكأنها بتطبق مثل اللي ما يشتري يتفرج .. هاتشتري يا ست سناء : لأ يا عم هانتفرج ...

أنا بأهزر معاكي إوعي تزعلي ..

[SANAA]

أنا بأهزر معاكي إوعي تزعلي

انا لو زعلت من الدنيا كلها مقدرش ازعل منك ولا ازعلك

زي سناء مثلاً أهي مش مشتركة من يونية 2003 يعني حوالي سنة لكن لسة بدبورة واحده .. يعني Junior Memeber وعدد مشاركاتها 45 وكأنها بتطبق مثل اللي ما يشتري يتفرج .. هاتشتري يا ست سناء : لأ يا عم هانتفرج

...

لا... بس انا ماشيه بمبدأ ان لم تقل خيرا فالصمت احسن

[مصر عشقى]

انا كمان عامل زى النحلة ومشترك فى منتديات كتير

والمنتدى الجميل دة لة تاثير كبير وهحكى حاجة حصلت وبجد تثبت ان شبابنا كويس بس مش لاقى والكلمة الحلوة ممكن تكون فى اى منتدى

مثلا جالى اعلان على ايميلى لمنتدى اسمة سكساوى ( اسمة كدة )

ودخلت وبدور لقيت فية باب اسمة القلم الساحر

لقيت رجبيات ساخرة منقولة ومكتوب مقتبسة من احلى منتدى

ومنهم موضوع حسنين فى السفارة وكان مسجل اعلى نسبة مشاهدة حتى اعلى من مواضيع الهلس اللى الشباب بيدور عليها

[DARWEEN]

أختنا العزيزه سناء ...

أفكرك بموقف يمكن أنتي نفسك تكوني مش فاكراه ... أفكرك بأول مداخله ليكي ... كانت دعواتك ليا بالشفاء أيام كنت في المستشفى وبعد مارجعت البيت ودخلت المحاورات وقريت دعوات أخواتي وإخواتي هنا لقيت دعواتك وسطهم وقلت سبحانك يارب آدي أنسانه عمري حتى ماأتناقشت معاها في موضوع ولا حتى جاملتها في مناسبه وبتدعيلي

وساعتها عرفت أن المحاورات دي مش منتدى على النت لكن دا بيت وأهل وعيله حتى من غير مانشوف بعض ويمكن عمرنا ماحنشوف بعض كلنا لكن أحساسنا ببعض وقربنا من بعض حتى لما نختلف وساعات نتخانق بس في الآخر فعلا بنفضل أهل وبنحب بعض جدا كلنا وبنحترم الصغير والكبير

ربنا يديم علنا نعمة المحبه ويخلينا جميع أهل دايما

[abofasad]

ربنا يديم علنا نعمة المحبه ويخلينا جميع أهل دايما

انه السميع المجيب