اثر النشأة في مجتمع خليجي على نظرتنا لمصر .. وعلينا كمصريين

[doha]

من فترة بفكر اكتب الموضوع ده بعد ان لاحظت ردود عضو فاضل معين في كل مايختص بشان مصر

هو مصري .. ومع ذلك ..

تقريبا مفيش رد له الا ولازم يذكر فيه دولته الام ( احد دول الخليج )

سواء بقى يترحم على ايامها .. او يقارن بينها وبين مصر .. او يذكر قد ايه الحياه فيها منظمه ومرتبه سواء كان للامر علاقه بما نتحدث عنه او لم يكن ..

لاحظت ان نفس العضو كاره الحياه في مصر تماما ولا يرى فيها الا السواد والاهم بحس من كلامه انه ( شايل العار ) كون اسمه مقترن باسم مصر ..

العضو الفاضل ده لا اشكك في نواياه اطلاقا بل على العكس .. اتفهم تماما موقفه

ولكن

الشخصية دي .. بتركيز الكره الفظيع لكل ماهو مصري داخلها والتمجيد الغير عادي لكل ما هو ( خليجي ) بالمقابل خلاني افكر .

مش يمكن كلنا ( ذلك الرجل ) كرهنا العيشه في بلدنا ـ بتفاوت درجات الكره ـ وشعرنا بمشاكلها بشكل مبالغ فيه ـ مع تفاوت درجه المبالغه ـ كل ده مش لان بلدنا كده فعلا بقدر ماللاننا تربينا على كده ؟؟

ياترى اثر النشأه في بلد خليجي والي كنا بنعاني منه هناك من ( تحقير ) لسيرة مصر ومعامله دونيه في مواقف ممكن جدا تكون عابرة وممكن جدا متتكررش غير مرة في العمر ومع ذلك بتترك اثر لايمكن محيه من اننا ( تحت ) وهم ( فوق ) ؟

ياترى النشأه دي لها تاثير في نظرتنا جميعا ( كجيل تربى في الخليج ) لبلدنا مصر وتعاطينا مع مشكلاتها وازماتها ؟؟

ياريت اسمع رايكم في الحكايه .. لو كانت نشأتك في دولة خليجية طوال فترة الطفولة والصبا فهل فعلا انت بتكره مصر اوي كده وبتحس من داخلك ( بالخزي ) احيانا لتصرفات مصر والمصريين ؟ ياترى عندك استعداد تكمل بقية حياتك الجاية في مصر على اي وضع تكون عليه ؟

طيب وياترى في بينا حد نشأ وتربى خارج مصر بس مش في الخليج .. ياترى انتم كمان بتحسوا بنفس الشيء ؟

طيب الي عايش برا مصر بس خرج منها بعد ماتجاوز العشرين .. ياترى انت شعورك ناحية مصر ومشاكلها ايه ؟

واخيرا الي عمره ماخرج من مصر لا دلوقت ولا قبل كده .. رايك في مصر ايه ؟

ان كنت احد الفئات الاربع السابقة فياريت تسمعنا رأيك .. في الحكاية دي

[Alrefaey]

طيب الي عايش برا مصر بس خرج منها بعد ماتجاوز العشرين .. ياترى انت شعورك ناحية مصر ومشاكلها ايه ؟

بعتبر مصر الان مثل شجرة فى فصل الخريف متساقطة الاوراق شاحبة اللون ولكن عندى امل انه سيأتى اليوم وينكشف الربيع وتعود .

بعتبرها مثل فتاه جميله اصابها مرض ما ومازال البحث عن دواء حتى تتعافى وتعود لسابق جمالها وازدهارها .

بعتبرها تحفة من الماس وقعت فى يد لصوص اهملوها ودنسوها وشوهو صورتها ولابد ان يعود الحق الى اهله يوما ما .

اما بخصوص شعورى فأكيد انى حزين عليها وعلى اهلها وعلى نفسى اكيد لأنى جزء منها

مصر الان مشوهة فاقدة الهويه والريادة تهرول وراء الاخرين ,قرارنا ليس بأيدينا ولا بأيدى الاقليه المسماه بالنظام الحالى

لكن لم افقد الامل يوما ما ان نعود

اعتز بمصر الحضارة مصر العلماء الذين لهم بصمه فى جميع انحاء العالم

اعتز بالطقس الذى لا مثيل له بالنيل ,بالمعدن الطيب الاصيل للشعب

قد ارى فى الرياض شوارع نظيفة واسعة وسيارات فارهة ولكن لا ارى روحا وارى جفاء فى كل مكان

قد تعج دبى بناطحات السحاب ولكن اشعر بأنى داخل مدينه من الكرتون الصناعى ذات تاريخ صلاحية محدد

عندنا فى مصر الاصل (النواة ) لبناء اعظم المدن ولكن ينقصنا الارادة والادارة ولا تنقصنا المادة كما يظن البعض نحن اغنياء ولكن تحت قبضة لصوص

تم تعديل 22 أبريل 2010 بواسطة Alrefaey

[doha]

بشكرك اخي الفاضل الرفاعي على مشاركتك القيمه واسمح لي بسؤال شخصي بعد اذنك

هل تفكر جديا في الهجره ؟

وسؤال تاني للي عاش طفولته وصباه في الخليج .. ياترى رأيك ايه في الجزئية دي :

اعتز بمصر الحضارة مصر العلماء الذين لهم بصمه فى جميع انحاء العالم

اعتز بالطقس الذى لا مثيل له بالنيل ,بالمعدن الطيب الاصيل للشعب

قد ارى فى الرياض شوارع نظيفة واسعة وسيارات فارهة ولكن لا ارى روحا وارى جفاء فى كل مكان

قد تعج دبى بناطحات السحاب ولكن اشعر بأنى داخل مدينه من الكرتون الصناعى ذات تاريخ صلاحية محدد

ياترى بتحسوا كده ؟

[MZohairy]

عشت سنتين في السعوديه و انا صغير قوي (تانيه ابتدائي) و ماتأثرتش بيهم تقريبا

بعدها تخللها فترات متقطعه في اوروبا و امريكا

و بعدين عشت حوالي 17 سنه من سن 23 الى اربعين في السعوديه و سلطنة عمان و دبي قبل هجرتي لكندا

لم اشعر ابدا بأي غضب او ضيق او احتقار لبلدي

ربما كنت احتقر من يسيطرون عليها

انما مصر لأ

كل ما شعرت به حقيقة هو الخوف من التأثر بعادات البلد و ضمها الى عبادات الدين

و هذا ما حدث فعلا مع الكثيرين ممن عاشرتهم في السعوديه بالذات

و منهم من ابتدى فعلا في ارتداء الغطره (بدون عقال) و الجلباب الابيض اعتقادا ان هذا قد يجعله اقرب الى الله ربما

و كذلك ارتدت كثير من النساء المصريات اللائي عشن في المملكه النقاب و ليس الحجاب في حقبة الثمانينات

و منهن من اعتقدت بحرمانية قيادة المرأه للسياره

خلط رهيب يقابله خلط و تفريط في العادات الشرقيه للمهاجرين في اوروبا و امريكا فمنهم من يقبل بالبوي فريند لابنته و الكثير من القصص

معلش خرجت عن الموضوع قليلا لكن شايف ان الانسان نفسه ممكن يتغير و بالتالي ما اسهل تغيير نظرته لوطنه الام

شكرا

[Alrefaey]

لا لست افكر بالهجرة لأنى عديت مرحلة التفكير انا بالفعل هعمل لاندنج الى كندا بعد اسبوعين ان شاء الله .

لكنى بعتبر الهجرة وسيله وليست غايه

فلم ولن اسعى الى الاستقرار فى المهجر ولكن هى وسيله لتحسين الوضع العلمى والاجتماعى .

تم تعديل 22 أبريل 2010 بواسطة Alrefaey

[hOuSsAm]

طيب الي عايش برا مصر بس خرج منها بعد ماتجاوز العشرين .. ياترى انت شعورك ناحية مصر ومشاكلها ايه ؟

انا عمرى متمنيت انى اكون متربى فى الخليج والحمد لله لحسن حظى كان قبل ميلادى بخمس شهور والدى بدأ فى اجراءات الاستقدام لوالدتى عشان يستقروا فى السعودية ويكملوا حياتهم هناك ولاسباب لحد دلوقتى مش فاهمها بس هى جت من عند ربنا والدى قرر الاستقرار نهائيا فى مصر و التراجع عن الاستقرار فى السعودية ودى كانت حاجة كويسة بالنسبة ليا انى اتربى فى مصر فى بيئة اضافتلى حجات كتيرة عمرى مكنت هعرفها فى الخليج وادتنى قوة وتحمل مسئولية تساعدنى فى اى مكان صحيح تعبت شوية بس وصلت للنتيجة اللى عايزها واللى مكنتش اتوقع انى احققها وانا فى الخليج

مش هتكلم كتير عن مميزات مصر لان كلنا عارفينها

ومش هتكلم كمان عن عيوب مصر لان مصر ملهاش ذنب فيها ده ذنب الادارة الحكيمة

بالنسبة لرجوعى مصر ده قرار اكيد بس ليه وقته المناسب ومن اسباب القرار ده انى مش عايز اولادى يخسروا وقتهم ويتربوا فى الخليج الا لو مشروع الهجرة نجح بس لحد دلوقتى هو مش باين معالمه بالنسبة ليا حتى ماخدتش قرار اكيد فيه

فكرتينى كنت دايما وانا صغير بعامل اى حد جاى من الخليج على انه متخلف مش عارف ليه كدة بس يمكن كان شعور داخلى (لان بابا كان بيحكيلى عنهم دايما انهم بدو بابا كان هناك سنة 80 ) لكن لما كبرت شوية عرفت ان الموضوع ده نسبى وحسب الاسرة والجو المحيط اللى عاشوا فيها وكمان ليا اصحاب كتيرة اتربوا فى الخليج كانوا بيرتبوا عالمدرسة

قصة طريفة كمان حصلتلى كل مفتكرها اضحك

بعد مخلصت كليتى فى المنصورة قررت انى اشتغل فى القاهرة واستقر هناك طول حياتى واستبعدت كمان فكرة السفر من دماغى خالص وقولت القاهرة دى هى مستقبلى ونجاحى

وجه واحد صحبى اعد معايا فى الشقة اللى كنا ماجرنيها وكان كاره القاهرة ومصر واللى عايشين فيها (لعلمك هو تربية الخليج) وهيموت ويسافر وكل شوية يروح يرمى ورقه فى مكاتب السفريات

اقوله ياعم تسافر فين ده انت عايش فى احلى مكان فى الدنيا (القاهرة) ...... عايش فى كايرو صدقنى تعالى استقر هنا وهتتبسط اوى وهتعمل احلى شغل وعلاقات والدنيا هتتفتحلك بس انت اتعب واصبر شوية

يبصلى باستغراب ويقولى الواد ده مجنون ولا ايه و يقولى اول مرة اقابل حد فى حاتى عايز يعيش فى القاهرة ومش عايز يسافر

المهم اتكلمنا فى الموضوع ده ساعتين وهو واخد قراره انه يسافر وانا واخد قرارى انى اعيش فى القاهرة

تانى يوم هو قرر يسيب القاهرة عشان مش مستحمل الضغط ويرجع يشتغل فى المنصورة ومن يومها مشفتوش...................

الان ...... انا بشتغل فى السعودية ............... وهو بيشتغل فى القاهرة اللى قرر انه يستقر فيها وهيتجوز فيها كمان

والله عجايب يا زمن :blink:

[لماضة مصرية جدا]

السلام عليكم و رحمة الله و بركاته

استاذتي ضحي.....لما قريت تساؤل حضرتك عن أثر نشاتنا في الخليج علي نظرتنا لمصر...دماغي راحت يا تري انتمائنا ليها شكله ايه بيزيد بيقل....

يا تري عينينا اللي اتعودت علي مناخ مختلف يا تري هتلقط في مصر ايه......

هتلقط سلبيات و تضخمها....و لا هتلقط نفس السلبيات و تحس ان عليها واجب لازم ترجع تكمله

و فكرت يا تري هو تواجدي في الخليج أضافلي ايه......طب وجودي في مصر كان هيبقي مختلف؟؟؟

الخليج بالنسبة ليا محطتين.......خنيقة السعودية في المرحلة الاعدادية و الثانوية.....ثم العمل و الدراسة بالامارات

هسترجع مع حضرتك مشاهد سريعة كده

مشهد 1

مبحبش الاغاني الوطنية ابدا و كنت بزعل من نفسي اني لما كنت في مصر كنت بقعد اتريق عليها....اول مرة سمعت مصر هي امي كنت في السعودية....و فعلا بكيت....لاني حسيتها اوي........كنت لسه صغيرة بس حسيت فيها حاجة وجعتني أوي

نفس المشهد...بيتكرر كل ما اسمع اغنية فيروز "نسم علينا الهوي من مفرق الوداي......خدني علي بلادي"

مش عارفة دي المشاعر اللي بتتولد في الغربة انك مفتقد مكان بعينه....و المكان مرتبط معاك بتفاصيل صغيرة هي اللي بتعمل حياتك.....و لا ده الانتماء اللي حضرتك بتقولي عليه

مشهد 2

لما بنبقي مصريين مع بعض ممكن نخبط في الحلل......يعني نشتم في كل حاجة فيكي يا مصر....لكن بمجرد تواجد رجل غريبة معانا مبنسمحشي لاي حد انه يتطاول حتي او يتجرا يفتح موضوع مع ان احنا عارفين انه بيتكلم صح.......صح غلط...هي بلطجة

ايام ازمة المعبر عند غزة كنت بشتغل مع فلسطينين كتير........و لقيتهم بيهاجموا مبارك و الحكومة المصرية........و ازاي مصر ساكتة

هو بغض النظر عن موقفي الشخصي.....و قناعاتي....بس حسيت لا بقي لحد كده....و ااقف عوج و اتكلم عدل.

مشهد 3

بتقطع من جوايا اوي لما الاقي حد من المصريين متشبه باخواتنا الاماراتيين او السعوديين.....يمكن بتهاون شوية في موضوع اللبس لكن الاقي واحدة تعوج لسانها......وتتكلملي خليجي.....و تعيش الدور.......و لا لما يوصل معاها لحظة التجلي انها تبتدي تشتم في مصر و لا حاجة.... ساعتها فعلا نظرات الاحتقار مش بتكفيها

مشهد 4

بكون مشتاقة جدا انزل مصر...و تقريبا ده الحلم اللي ببقي عايشة عليه لغاية الاجازة......بس الحلم ده بيتلاشي في الاسبوع الاول من العودة....و بخش في حالة هروب من حاجات كتير...........يمكن عندي مشكلة في التكيف...مش عارفة بس بحس ان مصر بتتغير بشكل سريع جدا صعودا او هبوطا....و نحن في القارة الاخري بنعيش في صناديق مكيفة.....بنتفرج فيه علي مصر من جوه الصندوق....و لما بنرجع بنتعامل ان احنا في هبوط اضطراراي و سرعان ما نرجع تاني لملاذنا التاني

مش عارفة حاسة اني مكنتش هعرف احبها لو عشت فيها...كان لازم ابعد اشوف الصورة من بره.....و اشوف هحبها ازاي

بس اللي لقيته انا بحبها كده علي بعضها بكل ما فيها.......

بس خيار المعيشة و العودة فيها بقي صعب......و بالنسبة لي بدأ يتلاشي اصلا

بس اللي اكيد ان فيه حالة من الوهج الغريب الواحد بيحس بيها في مصر

الخليج تجرية جديرة بالتوقف.....بس بحس دايما في الخليج ان الزمن توقف.....و عندي حالة من البلادة الفكرية غير مبررة

و ع الرغم من كل ازماتي في تواجدي في مصر .....بس كنت في حالة توهج افتقدها حتما هنا.......اللي بحمد ربنا عليه اني درست الجامعة في مصر............غير كده كان ممكن خلاص اتجنن

الجامعة في مصر احساس غير...حياة غير...تحديات غير...........اينعم مطلعتش حد عظيم و لا مشهور و لا هيكسر الدنيا.....بس كفاية اني فخورة بالتعليم المحترم اللي اتعلمته في الجامعة من اساتذتي المصرين حتي النخاع

تحياتي

[عماد حمدي]

تسجيل متابعة بإهتمام ..

شكرا ً ع الموضوع المتميز دا ..

وأنا ليا أراء بس هقولها بعدين .. مش عايز احبط الناس ..

تقبلوا مروري ,,

عمــ Omda2006 ـــاد

[doha]

الفاضل الرفاعي ..

مكنتش اعرف بجد انك قدمت على الهجرة ربنا يتمها لك على الف خير ..

النموذج الي حضرتك بتمثله ناقض نظريتي الى حد ما فقد كنت اتوقع ان الي نشا في الخارج هم اكثر الاشخاص رغبه في الهجرة وحضرتك اثبت لي ان مش شرط

**

الفاضل حسام عبد الفتاح

قصتك نموذجية تماما وكنت اتوقع رد فعلك بالظبط ومشاعرك تجاه الاستقرار في مصر والي اعتقد مش ممكن تكون غير لشخص فعلا مطلعش في صباه برا مصر ..

حضرتك نموذج بيؤيد وجهة نظري تماما ..

**

الفاضل زهيري

من غير ماتذكر انك عشت فترة من طفولتك في السعوديه فده كان واضح تماما على توجهك الفكري فيما بعد

ويمكن ده الي عنيته لما تسائلت عن اثر النشاه في الخليج ( علينا كمصريين ) لاحظت ان الاسر الي قعدت فترة طويلة في الخليج والسعوديه تحديدا ـ خاصه من بيئات مصرية معينة ـ تاثروا تماما بالعادات الثقافية هناك ..وعلى الجانب المعاكس فأسر تانية او حتى شباب نفس الاسر الولانية دي خاصه الي مقعدش منهم وقت كتير كره العادات والتقاليد السعودية لدرجه انسحبت على كل مايفكره بيها ولو كان التزام ديني ..

مش قصدي نهائيا ان حضرتك مش متدين مثلا او ماشابه وانما كتير بحس من كلامك انك مش بس رافض لفكر معين ـ السلفي تحديدا ـ وانما ( مخنوق ) منه

على كل حال انا معاك في ( الخنقة دي ) وان كنت بختلف عنك في درجتها

***

الفاضلة لماضة ..

مداخلتك حيرتني .. ببساطه لاني كأني انا الي كتبتها بالظبط

تقريبا خط سيرنا واحد لدرجه تكاد تكون متطابقة ..

بس تعرفي حاجه . .

اكتشفت ان الي زيي وزيك تقريبا كده وبرغم رغبتنا القاتلة في الاستقرار واننا ( نبطل ) سفر بقى الا اننا للاسف شكلنا كده .. مش هنقدر

تقريبا بقى جزء من حياتنا اننا مستنيين آخر السنة عشان ( نرجع ) اجازه .. ومستنيين برضه اليوم الي ( هنرجع ) فيه خالص والي في نفس الوقت مش عاوزينه اصلا ييجي ..

تعرفي اني بفكر احيانا اني مسافرتش السعوديه في السنتين الاخيرتين دول لاني محتاجه اسافر او عشان اعدل وضع قائم وانما لاني مقدرش اعيش من غير ماكون مغترب منتظر اليوم الي يرجع فيه ( للوطن )

تفتكري انتي كمان كده ؟

**

الفاضل عماد

ياريت تقول وجهة نظرك في مانتحاور بشأنه بصفتك احد الفئات الي تكلمنا عنها ..

واظنها هتكون جديرة بالبحث ..

تم تعديل 23 أبريل 2010 بواسطة doha

[kitkat]

كلمتين أبرك من 10

مصر بلدنا لم ولن نستبدلها بوطن أخر

ولكن ألم تكن أرض الله واسعة فتهاجروا فيها؟

الانسان المحترم بيحب بلده وعمره مايشتم فيها حتي لو تعرض للتعذيب والاهانة علي يد بعض الكلاب من ذوي النفوس المريضة ورأي في أعينهم كل عقد النقص والحقارة ولم يتعرض لذلك في الغربة

[MZohairy]

الفاضل زهيري

من غير ماتذكر انك عشت فترة من طفولتك في السعوديه فده كان واضح تماما على توجهك الفكري فيما بعد

*

ماعتقدش

لأني مش فاكر منهم اي حاجه تقريبا

الكلام ده سنة 74

لكن اللي متأكد منه ان فترة شبابي هي اللي تركت عندي انطباعات كثيره

و ابتديت افكر و اعي ان ما قد يصلح في مكان قد لا يصلح في مكان آخر

و لقيت نفسي مقتنع تماما بفكرة عدم صلاحية قيادة المرأه للسياره في المجتمع السعودي حاليا على الأقل (ليس لأنه حرام و لكنه سيسبب بلاوي و يمكن ده سبب تحريمه)

و ابتديت انقم على مصريين اول ماينزل من بيته و هو رايح للشغل يقفل على زوجته بالمفتاح من بره (معرفش خايف عليها ولا خايف منها؟)

يعني باختصار مازعلتش من السعوديين على تصرفاتهم بل و اديتلهم العذر كثيرا لأن دي عاداتهم و يمكن تكون مناسبه ليهم

لكن اللي ضايقني جدا هو تقليد بعض المصريين لهذه التصرفات اعتقادا انها من الدين او من الاحترام و التحفظ

[eslam elmasre]

مدام ضحي

صباح الفل

انا هاتكلم عن السؤال اللي يخصني واللي ما جربتش غيره وهو

(واخيرا الي عمره ماخرج من مصر لا دلوقت ولا قبل كده .. رايك في مصر ايه ؟)

انا الحمد لله ما خرجتش بره مصر

لا بل ما خرجتش بره اسكندريه ولما اروح القاهره اللي بنقول عليها مصر بحس كمان بغربه شديده وعند العودة لحدود اسكندريه اشم ريحتها روحي ترجعلي تاني ويمكن لهذا اسبابه وفي اعتقادي ما حدش بيسيب بلدة الا من اجل لقمة العيش يعني ماينفعش واحد يقولي انا مسافر دبي عشان بلد جميله ونظيفه لكن المعقول انه يقول انه مسافر دبي عشان يشتغل وياكل عيش فيها

وفي اعتقادي ان مصر فيها مجالات احسن من الخليج واحسن من اوربا ده بالنسبه لفرص العمل فانا لدي اصدقاء يعملون في شركات بترول واسمدة مرتباتهم احسن من زملائهم في الخليج وفي اوربا نفسها لكن اوربا بتتميز عن الخليج انها بلاد جميله وناسها جمال وبلاد جاذبه للعيش فيها وليس للعمل فيها وتكوين الثروات فغالبية اصدقائي المقيمين في اوربا يعيشون فيها بغرض العيش فيها لا تكوين الثروات

لكن انا لم اجد ما يدفعني للسفر وكان لي وجهة نظر تمكنت بتوفيق من الله من تحقيقها وهي اجتهادي في بلدي وبذل الجهد والعرق سيحقق لي ما ابغاه اذا كان السفر وسيله وليست غايه

مانكرش اني كنت بابذل مجهود مضاعف ويمكن كان وقت النوم هو اللي بيبقالي خلال اليوم لكن كان عزائي اني في اخر اليوم ارجع وانام في حض اولادي

يمكن انا عاطفي شويتين وبحب اخواتي واهلي وجيراني واصدقائي لدرجة اني لازم اعيش معاهم ومشاكلهم وافراحهم وبحس ان الدنيا مش دنيا من غيرهم وبحس اني لو بعدت عن امي هاتكون اخر يوم لي في الدنيا

عندي اصدقاء واقارب كتير عايشين في اوربا والخليج لكن بحس انهم مش سعداء رغم العيشه الرغدة وبحس انهم ناقمين علي مصر وعلي عيشتها ومنهم ابنة اختي التي تعيش في هولندا والتي قامت السنه الماضية بشراء شقه مجاورة للبحر واعدتها خير اعداد وتكلفت فيها الشيء الفولاني وبعد ذلك تركتها وعادت الي بلدها التي تقيم فيها ولم تستمتع بها الا ايام معدوده فهل هذه قيمة المادة التي جمعتها هي وزوجها ان تبني ولا تسكن ان تشتري ولا تستمتع وهذا هو حال غالبية المغتربين والغير منتظر ان يرجعوا للاقامة في مصر بل يجمعون ويبنون لكن دون استمتاع حقيقي بثمرة غربتهم لذلك انا لم اتقبل هذه الفكرة ففي نظري ان المادة وسيلة وليست غايه

وسيلة للاستمتاع بالحياة لكن ان نجمع الاموال ونبني البيوت ونشتري العربات ثم نضعها في الجراج فهنا تصبح المادة غايه وليست وسيله وهذا ليس من اهدافي

يمكن ما اقوله لم يتوافر لمن اقدموا علي السفر والغربه لذلك اقول ان هذا من فضل الله عليّ ان منّ عليّ بذلك وان منّ عليّ بعدم اللجوء للسفر والغربه وفي نهاية الامر وجدت ان المحصلة تكاد تكون واحدة من الناحية الماديه مع اخلافات طفيفه بيني وبينهم لكن اختلافات جوهريه في الاجتماعيات والغربة ومرارتها

بالنسبة لمصر كبلد اعتقد ان بها مشاكل لا حصر لها وهي مشاكل موجوده في غاليه الدول العربيه ومصر ليست بمنأي عنها لكن اري انها افضل حالا من كثير من الدول واري ان مصر بها رؤوس اموال واستثمارات رهيبه بحق وان مصر بها فرص عمل تحتاج لاصحاب العلم لا الكسالي والمتواكلين فقط علينا الاجتهاد والعمل والاقدام لا الخوف

[herohero]

الاخت ضحى يمكن انا العضو المقصود

لكن انا معايا اصدقاء دراسة كتير قوي كاوا معايا ف هندسة باختلاف تخصصاتهم اتربوا ف الخليج طبعا اتعسهم من تربوا ف السعوديه وانا لو كنت عايش طفولتي ف السعوديه كان الوضع هيكون مختلف كليا

لكني تربيت ف دولة انا بعتبرها محترمه جدا ومستعد للمناقشه انا تربيت ف الكويت انا مواليد 78 يعن لست شاب ارعن

ووالدي عمل ف الكويت من سنة 76 وكان مدرسا حكوميا يعني لا كفيل ولا غيره

والاخوة اللي ف الكويت من قبل سنة 90 يعلمون جيدا ماهي الكويت كانت بلد رخاء وكانت ف السبعينات من اكثر الدول انفتاحا ف الخليج كانت بتلم كل التنيارت السياسة

اا لا اكره مصر ابدا بل بالعكسانا مقتنع ان الذي ينقد هو من يحب

لكني واقعي كلنا هنا بنتكلم ونقول بلدي حبيبتي طب ليه سيبناه حد يرد

وانا ليا خالي كان دايما يقول دول الخليج متخلفة والحمد لله قد بعد كده ف السعوديه 17 سنة وساعتها اول اجازة سالته ها لسه رايك انهم متخلفين

انا بعمل ف لسعوديه ف مجال الاتصالات وتكنولوجيا المعلومات حاليا مصر بقت كويسة انما زمان احنا كنا ف مصر معزولين خالص عن كل وسائلالتكنولوجيا

وانا صغير كنت بقول ليه مفيش ماكينة البيبسي اللي كنت بحط 100 فلس ويطلع لي حاجه ساقعه طفل صغير وبكلم ع مصر ف 88 يعني البلد كانت مقفوله

انا ياجماعه حضرت وقت كانت الهمبورجر فيه مش موجوده ماحدش يضحك انا كنت طفل مفهمش الكلام الكبير

والحمد لله عمري مانطقت كلمة خليج انا بقول اني عيشت ف الكويت لحد الثانوية العامة وياما سمعت انكم واخدينها بالكوسة طب ف وسط ده نزلت مصر واخد الاعدادية من مصر جيبت كم 261.5

وخدت درس ف مادتين والله ماكنت مقتنع الفرق انا كنا جايين من الكويت صح

هقولكم ايه بس كان زمايلي ف تانيه اعداي مش بيعرفوا يقرو اانجليزي انا كنت نازل من تانيه متوسط واخد انجليزي بقالي سنتين وانجليزي صح

وكان النحو عندي ممتاز وانا دخلت ف مصر مدرسة حكومية هل نقدر نقارن الفصول ف المدارس الحكومية ف الكويت زي مصر

الفصل سنتها كان فيه اتنين مكيف اسبليت توشيبا ومروحتين

انا بتكلم عن الكويت لما جيت السعوديه بصراحه حمدت ربنا اني ماتربتش فيها

ف الكويت كنا بنلبس لبس مدرسي موحد واحنا ف مدرسة حكومية "اسمها سفيان الثوري " والمتوسطة اسمها ابرق خطان المتوسطة

كان بنطلون رصاصي وقميص ابيض وف الشتاء بلوفر كحلي

ولازم جزمة سوده وكان ف الطابور بيفتشوا ع حلاقة شعرنا وظوافرنا

ياترى يبقى نظام محترم ولا وممنوع الضرب

انا فاكر لما نزلت سنة الغزو عارفين الابلة قالت لي ايه الهانم كانت بتعاقبنا بالضرب ع الوش بكفوفها الاتنين والله العظيم ساعتها قولت انا ما اضربتش بره بلدي ماجيش جواها وف بلدي واضرب وروحت للناظر والله الراجل احترمني من صغري وانا لمض

نزلت مصر كانوا الطلبه بيحفظوا مواضيع التعبير

وف الغزو بقى وده اكتر موقف فرحني بمصريتي

القنصل ولو مش غلطان القنصلية كانت ف منطقة السرة

طلع وكان ناقص يتف علينا وقال هعملكم ايه بالعافيه ادونا وثيقة سفر لان العراقيين كانوا بيقطعوا الجوازات

سافرنا عارفين حكومة الكويت كانت ماجرة لنا طيارات من مطار عمان للقاهرة

ونزلنا مصر لقينا منحه اميرية من الشيخ جابر كانت كم 500 دولار عارفين قبضناها كم 1200 ليه معرفش والدولار كان ساعتها 330 قرش وخدناه بطلوع الروح

مع انها من فلوس الكويت وفلوس التعويضات مش عارف اقولكم ايه

3 سنوات وللعلم كانت ف جيب الحكومة المصرية وخدناه بالمصري مش بالدولار

شايفين ازاي بلدنا كويسه معانا

تعبت اول مانزلت مصر لان لقيت مجتمع غريب كان بيضايقني ان محدش يقولي عفوا

هتتضحكوا اه انا كنت متعود اقول شكرا ولاطرف التاني يقولي عفوا طبعا ف مصر انسى

ولا حد بيلتزم بطوابير ولا غيره وحاجات غريبة لاتخفى على احد منكم

واشتغلت ف مصر 4 سنوات والحمد لله والدي كان موفر لي كل شيئ لكن ما ارتحتش

بحب بلدي اه بس مش راضي عن اللي بيحصل فيها والحمد لله عمري ماقبلت كلمه وحشه عليها وان واضح مع نفسي اما غيري كتير جدا من اول سنة بيعوجوا لسانهم

فيا اخت ضحى مرحبا لو كنت انا هذا الاخ المذكور وانا واضح مع نفسي

وفخور بان اتربيت ف الكويت هذا البلد المتميز بارقى ديموقراطيه عربية والحمد لله ابويا كان له فرق فلوس بدل سكن والله العظيم عارفين جات الفلوس ازاي

رفعوا قضيه ع وزارة التربية والتعليم متخيلين عشان بدل السكن الطبيعي الوزارةتفنشهم تاني سنة والله العظيم واسالوا اي حد ف الكويت ع موضوع بدل السكن للمدرسن زمان اللي رفعوا قضيه خدنا الفلوس وافتكر والدي كان له فرق بدل سكن تقريبا 2550.30تخيلوا 30 فلس خدناهم قبل اي شيئ متخيلين

ماكلوش 30 فلس يبقى اقول ايه ف حق الحكومة ده مش زي ناس مصروف لنا 500 دولار واخدهم 1200

كلمة الحق لازم تتقال عمر ماحقي ضاع ف الكويت وبلد حق وامن وامان اما بلدي حبيبتي فللاسف قست عليا من اماكن اتحرمت من التعيين فيها عشان الواسطة وعشان حاجات ماليش ذنب فيها اتكلم عشان المكان ده بيعين ديانة معينه

تاثير النشاة الخليجيه بتطلع شايف الامور بوضعها القياسي وبصراحه شبعان شوفوا اي بنت تربية الخليج لما بتيجي تتجوز عمرها ما بتتكلم ف شبكة وغيره شبعااااااااااااانه

وبتبقى ملفوفة بسلوفان

مفيش اختلاط وتاني بقول الكويت غييييييييييييير السعوديه ف التربية واللي عاش طفولته هناك يعرف انا عيشت ايام الخير

ونظرتي للمجتمع المصري الكل بيبص نفس النظرة المجتمع فيه فساد ورشاوي وما اظنش ان حد راضي عنها

والحمد لله انا مش بقول امتى ارجع لترابك يامصر لان واقعي محدش شربني اصفريكي عشان اجي هنا وبقولها لاي حد خليك واقعي واحشاك بلدك انزل ما اظنش انهم ف اي بلد بيتحايلوا علينا ولا انهم اللي دفعوا فلوس عشان يجيبونا وانهم اللي حفيوا ع الاعلانات

ياريت شوية صراحه مع النفس

[miramikhail]

انا هاتكلم عن السؤال اللي يخصني واللي ما جربتش غيره وهو

(واخيرا الي عمره ماخرج من مصر لا دلوقت ولا قبل كده .. رايك في مصر ايه ؟)

انا الحمد لله ما خرجتش بره مصر

لا بل ما خرجتش بره اسكندريه ولما اروح القاهره اللي بنقول عليها مصر بحس كمان بغربه شديده وعند العودة لحدود اسكندريه اشم ريحتها روحي ترجعلي تاني ويمكن لهذا اسبابه وفي اعتقادي ما حدش بيسيب بلدة الا من اجل لقمة العيش يعني ماينفعش واحد يقولي انا مسافر دبي عشان بلد جميله ونظيفه لكن المعقول انه يقول انه مسافر دبي عشان يشتغل وياكل عيش فيها

وفي اعتقادي ان مصر فيها مجالات احسن من الخليج واحسن من اوربا ده بالنسبه لفرص العمل فانا لدي اصدقاء يعملون في شركات بترول واسمدة مرتباتهم احسن من زملائهم في الخليج وفي اوربا نفسها لكن اوربا بتتميز عن الخليج انها بلاد جميله وناسها جمال وبلاد جاذبه للعيش فيها وليس للعمل فيها وتكوين الثروات فغالبية اصدقائي المقيمين في اوربا يعيشون فيها بغرض العيش فيها لا تكوين الثروات

لكن انا لم اجد ما يدفعني للسفر وكان لي وجهة نظر تمكنت بتوفيق من الله من تحقيقها وهي اجتهادي في بلدي وبذل الجهد والعرق سيحقق لي ما ابغاه اذا كان السفر وسيله وليست غايه

مانكرش اني كنت بابذل مجهود مضاعف ويمكن كان وقت النوم هو اللي بيبقالي خلال اليوم لكن كان عزائي اني في اخر اليوم ارجع وانام في حض اولادي

يمكن انا عاطفي شويتين وبحب اخواتي واهلي وجيراني واصدقائي لدرجة اني لازم اعيش معاهم ومشاكلهم وافراحهم وبحس ان الدنيا مش دنيا من غيرهم وبحس اني لو بعدت عن امي هاتكون اخر يوم لي في الدنيا

عندي اصدقاء واقارب كتير عايشين في اوربا والخليج لكن بحس انهم مش سعداء رغم العيشه الرغدة وبحس انهم ناقمين علي مصر وعلي عيشتها ومنهم ابنة اختي التي تعيش في هولندا والتي قامت السنه الماضية بشراء شقه مجاورة للبحر واعدتها خير اعداد وتكلفت فيها الشيء الفولاني وبعد ذلك تركتها وعادت الي بلدها التي تقيم فيها ولم تستمتع بها الا ايام معدوده فهل هذه قيمة المادة التي جمعتها هي وزوجها ان تبني ولا تسكن ان تشتري ولا تستمتع وهذا هو حال غالبية المغتربين والغير منتظر ان يرجعوا للاقامة في مصر بل يجمعون ويبنون لكن دون استمتاع حقيقي بثمرة غربتهم لذلك انا لم اتقبل هذه الفكرة ففي نظري ان المادة وسيلة وليست غايه

وسيلة للاستمتاع بالحياة لكن ان نجمع الاموال ونبني البيوت ونشتري العربات ثم نضعها في الجراج فهنا تصبح المادة غايه وليست وسيله وهذا ليس من اهدافي

يمكن ما اقوله لم يتوافر لمن اقدموا علي السفر والغربه لذلك اقول ان هذا من فضل الله عليّ ان منّ عليّ بذلك وان منّ عليّ بعدم اللجوء للسفر والغربه وفي نهاية الامر وجدت ان المحصلة تكاد تكون واحدة من الناحية الماديه مع اخلافات طفيفه بيني وبينهم لكن اختلافات جوهريه في الاجتماعيات والغربة ومرارتها

بالنسبة لمصر كبلد اعتقد ان بها مشاكل لا حصر لها وهي مشاكل موجوده في غاليه الدول العربيه ومصر ليست بمنأي عنها لكن اري انها افضل حالا من كثير من الدول واري مصر بها رؤوس اموال واستثمارات رهيبه بحق وان مصر بها فرص عمل تحتاج لاصحاب العلم لا الكسالي والمتواكلين فقط علينا الاجتهاد والعمل والاقدام لا الخوف

:rolleyes: الحقيقة أنا مش حقدر أقول حاجة كل الفرق بس أنى من القاهرة و سافرت مرتين أنحلترا فسحة لأختى أسبوعين كل مرة وكان ممكن أعقد لو عايزه شهر و تانى مرة سنة لكن ما قدرشتش أنا ممكن أقعد فى أى جته جوا مصر

على فكرة أنا عيلت والدى الله يرحمة أسكندرانية و ما يقدروش يسيبوا أسكندرية خالص و حتى الى مطر يعيش فى مصر له بيت فى أسكندرية و بيسافر كل أحازة :lol:

تم تعديل 23 أبريل 2010 بواسطة miramikhail

[الغريب]

الاخت ضحى يمكن انا العضو المقصود

وأنا بردو ياهيرو لما قريت موضوع الأخت ضحى عرفت أنك أنت المقصود ، ومش عارف أيه المشكلة أن ضحى كانت قالت من الأول أن هيرو وجهة نظره كذا ... وأحنا هنا هناقشها كلنا..

طبعا ياهيرو يأخويا أحنا هنا بنتكلم عن وجهة نظرك المشهورة في المحاورات وليس هناك أي تعدي على شخصك وأنت طبعا متأكد من هذا ..

إنتظروني .. هرجع تاني أكمل بأستفاضة ..

[herohero]

الاخت ضحى يمكن انا العضو المقصود

وأنا بردو ياهيرو لما قريت موضوع الأخت ضحى عرفت أنك أنت المقصود ، ومش عارف أيه المشكلة أن ضحى كانت قالت من الأول أن هيرو وجهة نظره كذا ... وأحنا هنا هناقشها كلنا..

طبعا ياهيرو يأخويا أحنا هنا بنتكلم عن وجهة نظرك المشهورة في المحاورات وليس هناك أي تعدي على شخصك وأنت طبعا متأكد من هذا ..

إنتظروني .. هرجع تاني أكمل بأستفاضة ..

بالعكس انا مقتنع بكده ولا اجد اي شي مش طبيعي اي انسان بيحن لايام طفولته ايا كانت بنلاقي ناس كتير تشتاق لاماكن ممكن نستغرب ازاي بيشتاقوا لها لكن ف الاول وف الاخر هي ذكرياته وانا الحمد لله لا اجد لي اى ذكرى سيئة ف الكويت يمكن دلوقتي لو انا ف الكويتا هراها شي مختلف

انا اعتراضي كله ع عدم الواقعيه لا اقبل ان اقول انا نفسي ارجع لبلدي اليوم قبل النهارده لكني مستمر بعيد عن مصر 20 سنة

واني اعوج لساني واني اتظهار باشياء لا تمط لشخصيتي بصله ده اكتر بشيئ بيضايقني

وانا وجهة نظري ليست تخصني انا فقط انا واي واحد عاش طفولته بره مصر هيقول كده وانا ليا صحابي كده انتهى بهم المطاف يا ف الخليج يا في كندا

والناس واضحه مع نفسهم نزلوا لقو بلدهم بتدي ابو 50% اكتر من الطبيب اناشايف ده وما اظنش ان حد يقدر ينكره ان ابو حديد هو اللي ماشي ف البلد وكلنا عارفين ده ومن حقي ومن حق كتير اننا نعترض ع اي وضع غلط ف البلد لكن ده لايقلل من وطنيتنا لان كتر اتربوا فالبلد وجري سابوها وعوجوا لسانهم كمان وانا اعرف نماذج كده كتير وبرده بيتغنوا بالوطن وبلدي حبيبتي وبينزلوا بالعافيه كل سنة شهر يعني انا بحس اننا بنحب كمصريين نتشكى

ومازلت اصر هل ف حد طلع الامارات ولا السعوديه ولا الكويت وهو شارب حاجه هل حد كان مخطوف وانهم خدروه وخدوه الكويت

اللي مشتاق يرجع وبدون عنتريات ومناقضة للذات الصراحه حلوة

[myusername]

بسم الله الرحمن الرحيم,

الاجابة: تونس :rolleyes:

انا عمرى ما عشت برة مصر.. مع ان دى امنية حياتى انى اعيش برة مصر, و تحديدا فى أمريكا.

و انا صغير.... جارنا كسب اللوترى بتاعت الجرين كارد لامريكا... و سافر عاش هناك و كان بيرجع كل سنة لمدة 3 شهور..

بصراحة انا مش متخيل نفسى انى هعيش فى مصر طول العمر... بصراحة دى تبقى مصيبة بالنسبة لى... صحيح حلم السفر لامريكا تقريبا مات بالنسبة لى, و كمان بطلت اعمل اى محاولات فيه من سنة 2008.. و لكنى حاليا أخذت خطوات جدية و نهائية لا تراجع فيها للهجرة الى كندا...

طول عمرى بحلم بالحياة برة مصر.... و لما سافرت فى رحلة قصيرة الى اوروبا, الحلم ده اصبح هدف شرس لا تنازل عنه..

قبل ما اسافر اوروبا, مصر بالنسبة لى كانت جميلة جدا و معنديش مشكلة فى الحياة فيها... لكن لما سافرت, بصراحة من بعديها مفضلتش ساكت و هادى الا لما بقيت متأكد انى خلاص سايب مصر بكل تأكيد, حتى و لو كان الموضوع مسألة وقت...

الاحداث اللى حصلت فى الفترة الاخيرة خليتنى مش مستحمل اقعد فى مصر اكتر من كده, علشان كده رحت أخدت تأشيرة انجلترا, و ناوى اقعد هناك الصيف كله عالاقل باذن الله...

بالنسبة لموضوع الوطن و حب مصر.. طبعا بحب مصر, لكن فى النهاية العالم كله هو أرض الله الواسعة... و من حقى انى اروح اقعد فى المكان اللى ابقى مستريح فيه, طالما انى مش مرتاح فى بلدى...

[جنه]

اللي كتبته لماضه مصريه جدا هو بالضبط اللى كنت عايزه اقوله من اول سطر لحاااااد كلمة تحياتى , ولانها اديبه جميله جدا زي ما هي مصريه جدا مش هاضيف على اللى كتبته غير اني بحب مصر جدا جدا جدا بس بازعل جدا لما بلاقي بلاد انظف من مصر و مواطنوها بيتعاملوا بحب واحترام ومش بلا قي ده حال المصريين . ليه بقى معرفش؟! مصر و كل المصريين يستحقوا احسن من كده بكتييير. :rolleyes: :lol:

[herohero]

ياريت كان يبقى حد من الاخوة اللي ف المنتدى يكون حضر ازاي بلدنا خدت بالها مننا ف اثناء غزو العراق للكويت بجد

ساعتها شوفت قيمة انك تكون مواطن بتنتمي لبلد بتاخد بالها منك

عشان بجد نقدر نحكم ع نظرتنا لحكومتنا وانا مصر ع فصل الوطن عن الحكومة وسياستها

بجد ياريت لو حد له تجربة يبقى يقولنا ومش محتاجين كلنا عارين ازاي حكومتنا بتتعامل معانا ف المواقف الصعبه

عشان تعرفي يا اخت ضحى ان لا المجتمع الخليجي ولا اي مجتمع له تاثير ع نظرتنا لمصرنا للاسف حكومتنا هي السبب ف اي نظرة

يكفي انها بتقيم الغريب علينا ف بلدنا حد شاف بلد كده

المصري يبقى زيه زي الاجنبي " بيني وبينكم الاجنبي كمان بيتنصف اكتر " ده فين ف بلدنا ياريت يا اخت ضحى تقولي لي ده تاثيره ايه علينا

[doha]

الفاضلان هيرو هيرو و الغريب ..

معليش بس لو حضرتك اخذت بالك انا مش فاتحه موضوع ( انتقد ) او ( الوم ) فيه عضو بعينه انه ليه ( مبيحبش ) مصر او ليه عنده بلد تانيه هي بلد ( المنشأ ) الي مبيفوتش فرصة من غير مايضرب لها تعظيم سلام

مش ده هدفي نهائيا من الموضوع فيمكن لو حضرتك لاحظت قبل كده مبدئي كل واحد يعتقد مايشاء ويفعل مايشاء وفي النهايه كل واحد ( لوحده ) بيتحمل تبعات اعتقاده وميوله ..

( الكاركتر ) الي تكلمت عنه كان مجرد ( ملهم ) لي وهو السبب في قفز السؤال الى ذهني في كل مرة اقرأ مداخله ليه .. انا مكنتش بكتب موضوع عن شخص بقدر ماكنت بحاول ارصد .. ظاهرة

ولانه لا يعنيني انطباقه على شخص معين فانا محددتش فلان او علان ببساطه لان مواضيعنا الي بنكتبها هتفضل لسنين قدام وهيقراها ناس ممكن زوار وممكن ناس لسه داخله جديد فمش هتفرق معاهم ابدا الكلام عن مين او مين هو العضو المقصود بقدر ماهيفرق ان كانت النظرية صح او خطأ .. هل فعلا البعض منا بيكره مصر وبيحب بلاد تانيه عشان الاولانية فعلا وحشه والثانيه تستاهل تنحب ولا لمجرد انه ( اتربى على كده ) ؟

ولاني لا اريد ذكر شخص بعينه فعشان كده كتبت ( الخليج ) ومقلتش بقى السعوديه او الكويت او البحرين او اي دولة تانيه من الي ممكن يكون حصل فيها ( غسيل دماغ ) لاي حد فينا ..

اسمح لي لو قلت اني مش شايفه سبب لثورة حضرتك الي باينه من سطورك في المداخله هنا او في رسالتك لي على الخاص .. الموضوع ابسط من كده .. جرد الموقف من شعورك الخاص وفكر لو بعد سنتين تلاته حد قرأ الموضوع ـ وبفرض انك العضو المقصود ـ هل حد هيقدر يستنتج ان ايوه هيرو هيرو هو المقصود .. او هل هتفرق اصلا انه يعرف مين العضو المذكور او مش مين ؟

على كل حال مداخلتك في الموضوع اثرته بكل تاكيد فهي نموذج صارخ عن الي بتكلم عنه بدليل ان موضوع مفتوح عن مصر تشارك فيه بقصيده حب في الكويت !!

على كل حال بعتذر اخي الفاضل لو موضوعي ضايقك واتقبل من حضرتك اقتراح ماتراه مناسبا للحذف من الموضوع بحيث ميكونش فيه اي اشاره ليك او تشابك مع خيوط حياتك الواقعية ..