ديوانيه سيناء

[مغتربة]

مع اقتراب اعياد تحرير سيناء 25/4

حبيت انى انتهزها فرصه علشان اكلمكم عنها

بس انا مش هكلمكم عن شرم الشيخ و لا دهب و لا نويبع

انا هكلمكم عن شمال سيناء

اولا لانها بلدى

و ثانيا لانها الجزء الى ما زال مهمش فى سينا و ماخدش حظه من التنميه لغايه دلوقتى

طول عمرى لما كنت بقول لحد انى من سينا كانى بقول له انى من صحراء الربع الخالى و لا حاجه :unsure:

جهل تام كنت بلاقيه عند اغلب الناس عن شمال سينا و كانها مش على الخريطه اساسا

كتيركانوا يفتكروا ان كل اهل شمال سينا بدو :sad: :sad: :sad:

و غيرها من المفاهيم المخلوطه

اكيد الوضع الجغرافى كان عليه عامل فى العزله دى عن مصر

بس اكيد برضه ان قاطره التنميه فى شمال سينا مش بتمشى لكن بتزحف

عموما انا فتحت الموضوع دا علشان اقربكم اكتر من شمال سينا

هكلمكم عن اهلها و عوايدهم و مشاكل التنميه فيها و ايه اتحقق و ايه لسه

حاجات كتير هحكيهالكم بس بدون ترتيب او تسلسل معين

و اكيد لو اى واحد حب انه يسال عن اى حاجه يتفضل

و هجاوب عليه بقدر معرفتى

منتظراكم جميعا

و كل سنه و احنا كلنا طيبين

:blink: :lol: :lol: :lol:

[مغتربة]

اول خاطره هتشارك معاكم فيها

هى جمله كنت كتير قوى اسمعها و انا صغيره

ممكن تكون خفت كتير دلوقتى ( و اكبر مثال انها منطبقتش عليا) بفعل عوامل الانفتاح الى هتكلم عليها كمان شويه

بس زمان كانت تكاد تكون عرف

و هى احنا مبنجوزش بناتا لمصريين

و كان سينا دى دوله مثلا و باقى مصر دوله تانيه

و انا صغيره كنت بستغربها

بس لما كبرت شويه فهمت اسبابها و تفهمتها

طول عمر العريش باعتبارها اهم مدن شمال سيناء فكلامنا معظمه هيكون عليها

طول عمر العريش لفتره قريبه جدا و هى معزوله عن باقى مصر

عزل اتشكل بسبب عوامل كتير كانها كلها اتعاونت على احكام الحصار على العريش

بغض النظر عن سنين الحرب و سنين ما بعد الحرب لغايه ما استعادنا العريش

لان القفل فى الحاله دى كان اجبارى بسبب الاحتلال

لكن لغايه ما افتتح كوبرى السلام و كانت طريقه الوصول الوحيده للعريش عن طريق المعديات

اتذكر من طفولتى صوره طوابير العربيات مستنين على المعديات علشان يعبروا الناحيه التانيه من القناه

و يا سلام بقى لو فيه مناسبه او عيد

فاعمل حسابك على ساعتين تلاته كده انتظار بس علشان تطلع المعديه

كمان طريق العريش طويل و العريش تعتبر بعيد نسبيا و طريقها شاق و مرهق

يعنى تصورا انها تبعد عن الاسماعيليه و ( هى اقرب محافظه ليها ) حوالى 180 او 200 كيلو

و تبعد عن القاهره حوالى 310 كيلو

يعنى الطريق من الاساس كان بياخد حوالى ساعتين و نص لتلاته حسب سرعه العربيه تضيف عليهم كمان تلات ساعات انتظار عند المعديه

يعنى الرحله تستغرق منك 6 ساعات

تكون نسيت فيهم اسمك اساسا

يعنى الطبيعه الجغرافيه المنعزله و البعد المكانى عن المحافظات الاخرى و فترات الاغلاق الطويله بسبب الحروب و خلافه

كل دى ادى الى ان اهلها اصبحوا شبه منغلقين على نفسهم

و اصبح عندهم تخوف من تزويج بناتهم لاى شخص غريب

لانهم كده بيكونوا تقريبا نفوها عنهم

طبعا زى ما قولتلكم ان دا اتغير دلوقتى بدرجه كبيره لما عوامل التقريب طغت على عوامل الابعاد

و استنونى فى خاطره جديده عن العريش واهلها

:smart: :smart:

تم تعديل 21 أبريل 2010 بواسطة مغتربة

[dawn walker]

الله يرحم اللى حرروا سينا ..مساحة شاسعة ..لا تدرى كيف تم احتلالها ..او كيفية تحريرها مرة أخرى ..الله يرحمك يا سادات وكل شهداء مصر

انا هقولك على خبرتى الصغيرة مع سيناء ..وانقل بعض من خبرات اصحابى ايضا

* بدو سينا بيقولوا على اهل الدلتا والشمال (جايين من تحت ) ..ودى تتفهم على انهم من وادى النيل ..بس فيها نبرة استخفاف ..ما علينا

*اللى حضروا الاحتلال ..بيقولا ان اسرائيل كانت معيشاهم فى عز...يا ريت ايامهم ترجع .....!! سمعتها كذا مرة ..واكيد موضوع ان الدولة ما بتدخلهومش جيش ..لسبب بردك

*اللى واخد على الزحمة ..هيصاب بالاكتئاب فى سينا ..وهيشتغرب ازاى الناس عايشة هناك

* اكمنة الشرطة كتيرة جدا ...والتفتيش رذل جدا ..بس مفيش اكمنة اسرايلية زى ما الناس بتقول ..والشرطة بتخاف من البدو خاصة فى المناطق اللى زى الحسنة ونخل

*تعمير سينا اونطة ...والعريش نفسها لا تقارن باى مدينة اقليمية كالمنصورة والزقازيق وغيرها

*العريش (اهل الحضر فيها)..من كل الاقاليم ..وبها فلسطينيين ايضا ..

.

*السياحة فى الشمال مش زى لجنوب ..بس اسعارها معقولة كتير عن الجنوب

كوبرى السلام made in japan

................................................................................

.......................................

اهل شمال سينا طيبيبن فى العموم......بس اللى جايين من تحت يفهموهم

[عنبو]

تسجيل متابعه

انتى طلعتى من العريش وانا اللى كنت فاكرك من الاسماعليه

[مغتربة]

النهارده هنتكلم على عامل تانى اثر بشكل كبير على تنميه شمال سينا لفتره طويله

و هو المياه

بحكم الانعزال الجغرافى لسينا الى اتكلمنا عنه قبل كده فسينا مفيهاش اى موارد للماء على الاطلاق

اللهم الا المياه الجوفيه

و دى نسبتها قليله

علشان كده فضل الوضع لفتره طويله صعب جدا

المياه الموجوده فى الحنفيات هى مياه البحر لا غيرها

و مصدر المياه الحلوه للسكان هى محطات تحليه تقع خارج العريش بمسافه طويله نسبيا

و لفتره طويله جدا كان على سكان شمال سيناء ان يعتادوا الحصول على المياه العذبه على شكل جراكن تباع

طبعا متخيلين معاناه شراء الجراكن دى من الباعه المتجولين ( زى نظام بيع اسطوانات الغاز بالضبط )

او انك تروح انت تملى من محطه التحليه بنفسك لو الجراكن خلصت منك بشكل مفاجىء

الموضوع دا اثر جدا على تنميه شمال سيناء لانه باختصار بيضرب اهم فرعين للتنميه ممكن يقوموا فيها و هما السياحه و الزراعه

لكن الحمد لله الوضع دا اتغير كتير بعد دخول ترعه السلام لشمال سينا

ابتدا الاول تيجى المياه الحلوه فى الحنفيات ساعه واحده فى الاسبوع

و دا فى حد ذاته انجاز لانه وفر للناس انهم يملوا الميه من بيوتهم بدل شراءها

و فضل الموضوع يتطور كل ما العمل فى ترعه السلام يتطور

و لغايه ما وصل الموضوع دلوقتى ان المياه الحلوه بتاتى لفتره طويله فى اليوم و بشكل يومى تقريبا

و استنونى فى الحلقه القادمه

:blink: :blink: :)

[مغتربة]

الله يرحم اللى حرروا سينا ..مساحة شاسعة ..لا تدرى كيف تم احتلالها ..او كيفية تحريرها مرة أخرى ..الله يرحمك يا سادات وكل شهداء مصر

الكلام فى الموضوع دا يطول استاذ داون ووكر بس احتمال اتطرق ليه فى المداخلات القادمه

انا هقولك على خبرتى الصغيرة مع سيناء ..وانقل بعض من خبرات اصحابى ايضا

تنورنا و خبرتك تزيدنا ثقافه و علم

* بدو سينا بيقولوا على اهل الدلتا والشمال (جايين من تحت ) ..ودى تتفهم على انهم من وادى النيل ..بس فيها نبرة استخفاف ..ما علينا

عموما مقدرش اكلمك عن البدو لانى معرفش عنهم كتير لانى من الحضر

بس على فكره اغلب المصريين :blink: ميعرفوش اساس ان فيه بدو و حضر و انهم مختلفين عن بعض

يعنى ان حد مش من هناك يعرف كده دا انجاز فى حد ذاته :)

*اللى حضروا الاحتلال ..بيقولا ان اسرائيل كانت معيشاهم فى عز...يا ريت ايامهم ترجع .....!! سمعتها كذا مرة ..واكيد موضوع ان الدولة ما بتدخلهومش جيش ..لسبب بردك

ان اليهود كانوا معيشنهم فى عز فعلى حسب العز الى تقصده

لو تقصد الفلوس منكرش

لكن طبعا مش دا العز الى كل اهل سينا كانوا عايزينه و لا مكانوش قاوموا المحتل ببساله و رفضوا الاستسلام ليه

اكيد الى قال الكلام دا كان على سبيل المزاح معاك لكن طبعا وقت الجد الامور بتختلف تماما

و نار وطنى و لا جنه محتلى

*اللى واخد على الزحمة ..هيصاب بالاكتئاب فى سينا ..وهيشتغرب ازاى الناس عايشة هناك

طيب دى دلوقتى كده اتعمرت عن زمان كتييييييييييير :blink:

* اكمنة الشرطة كتيرة جدا ...والتفتيش رذل جدا ..بس مفيش اكمنة اسرايلية زى ما الناس بتقول ..والشرطة بتخاف من البدو خاصة فى المناطق اللى زى الحسنة ونخل

اكمنه اسرائيليه :sad:

لا مش للدرجه دى

عموما زياده الاكمنه ضروريه جدا

علشان تعوض نقص انتشار الجيش و كمان ضبط المهربات و تهريب السلاح و اهم حاجه بيدققوا عليها طبعا المخدرات

*تعمير سينا اونطة ...والعريش نفسها لا تقارن باى مدينة اقليمية كالمنصورة والزقازيق وغيرها

كلامك صحيح للاسف

بس نعمل ايه ما باليد حيله

و عموما مننكرش برضه ان فيه تحسن مستمر

*العريش (اهل الحضر فيها)..من كل الاقاليم ..وبها فلسطينيين ايضا ..

اصبر على رزقك هتكلم عن اهل سينا بالتفصيل الممل فى المشاركات الجايه ان شاء الله

.

*السياحة فى الشمال مش زى لجنوب ..بس اسعارها معقولة كتير عن الجنوب

ما هى دى النتيجه الطبيعيه للاهمال المستمر الى عانت منه سنين طويله

كوبرى السلام made in japan

و دا احسن حاجه الصراحه wst::

................................................................................

.......................................

اهل شمال سينا طيبيبن فى العموم......بس اللى جايين من تحت يفهموهم

سعيده جدا بمشاركتك

و بتمنى انك تتابع معانا الحلقات القادمه

لان عندى كلام كتير قوى لسه هكتبه

[مغتربة]

تسجيل متابعه

انتى طلعتى من العريش وانا اللى كنت فاكرك من الاسماعليه

اهلا استاذ عنبو

الاساس من العريش و المعيشه فى الاسماعيليه

و كفايه عليك كده لحسن تتوه منى

اصلى وخداها كعب داير فى النيا بحالها

:blink: :blink: :)

[لونا]

تسجيل متابعة واهتمام :blink:

سيناء جزء غالي و لكن للأسف شبه مجهول للكثيرين .. و أنا أولهم

حتى من يذهب للسياحة لا يرى إلا القشور

[مغتربة]

فى الكلام الى فات اتكلمت معاكم عن العوامل الطبيعيه الى ساهمت فى تاخر التنميه فى شمال سيناء

( طبعا بالاضافه للعوامل الحكوميه الى مذكرتهاش لانها بتنطبق على كل مصر تقريبا و ان كان هنا الموضوع كان ازيد شويه )

لكن احب اركز على ان كل العوامل دى خفت حدتها تدريجيا بدايه من العشر او سبع سنين الاخيره

بدايه اتفقنا ان الطريق الوحيد لشمال سينا كله هو الطريق من الاسماعيليه ليها

و ان المسافه بين العريش و الاسماعيليه تعتبر بعيده نسبيا فما بالك بباقى المحافظات

و كانت وسيله عبور القناه الوحيده فى السابق هى المعديات و دى طريقه تعتبر بدائيه نظرا لقله عدد هذه المعديات و تهالكها و كمان كانت بتشتغل بنظام الورديات

و دا كله مينفعش يكون المنفذ الوحيد لمنطقه كامله لو عايز تطورها و( توطنها )

علشان كده ان شايفه ان كوبرى السلام فعلا انجاز كبير اختصر الكتير من الوقت فى سبيل تنميه شمال سينا

لانه سهل الوصول بصوره رهيبه بالاضافه لان المعديات ما زالت شغاله و بالتالى اصبح فى اكثر من طريقه للوصول بدل من طريقه واحده تقليديه

تانى انجاز ضخم فى نظرى هو مد ترعه السلام لشمال سينا و دى ترعه بتستمد الميه بتاعتها من النيل

و هى ترعه مبطنه و مغلقه الا انها هى الاخرى انجاز بكل المقاييس

و ظهر اثرها سريعا فى التخفيف من معاناه السكان فى الحصول على المياه العذبه بسهوله و يسر

لكن و الاهم من كده انها ساهمت فى توطن البدو فى قرى حديثه على طول الطريق من القنطره الى العريش

و بعد ما كان الطريق حتى العريش كله طريق صحراوى صرف باستثناء مدينه بئر العبد و كام قريه صحراويه الطابع

اصبح الان تشاهد على طول الطريق قرى حديثه و كثافه سكانيه كانت غير موجوده قبل ذلك

و بدلا من مشاهد الجمال و الرمال و النباتات الصحراويه التى كانت شائعه زمان على طول الطريق استبدلت الان بمشاهد قرى سكنيه و مساحات خضراء و رقع زراعه حديته

كلمه حق واجبه

كوبرى السلام و ترعه السلام غيروا الوضع فى شمال سينلء تغير جذرى

و انا متفائله بالقادم فى المستقبل بفضلهم

اينعم هى خطوه تاخرت كثيرا لكن الاهم انها حقيقه واقعه الان

فاصلو نواصل

ابقوا معنا

[مصري أصيل]

الأخت مغتربه

أولا أحييك علي الموضوع و أنا رحت العريش مره واحده في أواخر الثمانينات .. كنا مجموعة شباب مع بعض و بنصيف كل سنه في بلد و رحنا مره العريش و صدقيني مع ان البلد كانت ايامها هاديه زياده عن اللزوم بس بالتأكيد أنا استمتعت بالفتره اللي قضيتها هناك

و اكتر حاجه كنت بستغرب ليها النخل اللي طالع وسط البيوت و طبعاً فاكر شاطيء النخيل الجميل و كنت أول مره أكل خوخ سيناء و كان وقتها مش معروف في باقي انحاء الجمهوريه زي ما حصل بعد كده... و فاكر كويس ان واحد راح اشتري كيلو خوخ و لما شوفنا منظره رفيع و أخضر و مضعضع كده قلناله ايه الرمرمه اللي انت فيها دي ده منظر خوخ و هو صاحبنا غسله و فضل ياكل فيه باستمتاع رهيب و احنا طبعاً مش فاهمين ايه اللي بيحصل إحنا واخدين علي منظر الخوخ العادي الأحمر الكبير اللي عامل زي الميه الساقعه و مافيهوش أي طعم . المهم قالنا طيب جربوا بس و مش هتندموا و بالفعل كل واحد أخد واحده ياكلها و من بعدها صدقيني بقي أكتر حاجه بناكلها طول ما احنا هناك و اخدت منه كمان كميه و انا راجع و بقيت كل ما اشوف حد أقوله كله كوم و خوخ سينا كوم .

طبعاً دلوقتي أو من زمان جداً موجود في المدن بس طبعا ايامها ما كانش معروف أبداً.

و فاكر كمان منظر مش ممكن يروح من خيالي و كان في رفح و هو منظر لمحادثات كانت تتم من خلال الاسلاك الشائكة بين رفح المصريه و رفح الإسرائيليه بين الأهالي في الناحيتين ... مش عارف المنظر ده لسه موجود و لا مع سهولة الإتصالات اختفي بس بالامانه كان منظر يقطع القلب

منتظرين تكملي الموضوع لنتعرف اكثر علي شمال سيناء

و تقبلي تحياتي

[مغتربة]

تسجيل متابعة واهتمام :lol:

سيناء جزء غالي و لكن للأسف شبه مجهول للكثيرين .. و أنا أولهم

حتى من يذهب للسياحة لا يرى إلا القشور

حبيبتى لونا و لا يهمك

انا هنقلك الصوره من قلب الاحداث

تابعينا انتى بس

و انا اؤكد لك انك بعد نهايه الدوره المكثفه دى

هتكونى تعرفى عن العريش الى يمكن فيه من اهلها ميعرفهوش

تحياتى يا قمر

[مغتربة]

الأخت مغتربه

أولا أحييك علي الموضوع و أنا رحت العريش مره واحده في أواخر الثمانينات .. كنا مجموعة شباب مع بعض و بنصيف كل سنه في بلد و رحنا مره العريش و صدقيني مع ان البلد كانت ايامها هاديه زياده عن اللزوم بس بالتأكيد أنا استمتعت بالفتره اللي قضيتها هناك

اهلا استاذ مصرى اصيل

لو رحتها دلوقتى صدقنى مش هتعرفها حاجات كتير فيها اتغيرت

و اكتر حاجه كنت بستغرب ليها النخل اللي طالع وسط البيوت

النخل الى طالع وسط البيوت دا لان كان فيه قرار زمان بعدم قطع النخل نهائيا للحفاظ عليه باعتبار انه من اهم معالم العريش

علشان كده الى كان عايز يبنى كان لازم يضبط رسمه البيت مع النخل الموجود فى الارض

و طبعا ساعات كانت بتظبط و ساعات لا

لكن اعتقد ان القرار دا اتغير دلقتى مع تغير المحافظ

و المشاهد دى تكاد تكون اختفت دلوقتى من العريش

و طبعاً فاكر شاطيء النخيل الجميل

و كنت أول مره أكل خوخ سيناء و كان وقتها مش معروف في باقي انحاء الجمهوريه زي ما حصل بعد كده... و فاكر كويس ان واحد راح اشتري كيلو خوخ و لما شوفنا منظره رفيع و أخضر و مضعضع كده قلناله ايه الرمرمه اللي انت فيها دي ده منظر خوخ و هو صاحبنا غسله و فضل ياكل فيه باستمتاع رهيب و احنا طبعاً مش فاهمين ايه اللي بيحصل إحنا واخدين علي منظر الخوخ العادي الأحمر الكبير اللي عامل زي الميه الساقعه و مافيهوش أي طعم . المهم قالنا طيب جربوا بس و مش هتندموا و بالفعل كل واحد أخد واحده ياكلها و من بعدها صدقيني بقي أكتر حاجه بناكلها طول ما احنا هناك و اخدت منه كمان كميه و انا راجع و بقيت كل ما اشوف حد أقوله كله كوم و خوخ سينا كوم .

طبعاً دلوقتي أو من زمان جداً موجود في المدن بس طبعا ايامها ما كانش معروف أبداً.

انا ناويه افرد مشاركه مستقله للحاجات الى بتشتهر بيها العريش و على فكره هى كتيره اوى و مش مقتصره على الخوخ فتابعنا هتلاقيها

و فاكر كمان منظر مش ممكن يروح من خيالي و كان في رفح و هو منظر لمحادثات كانت تتم من خلال الاسلاك الشائكة بين رفح المصريه و رفح الإسرائيليه بين الأهالي في الناحيتين ... مش عارف المنظر ده لسه موجود و لا مع سهولة الإتصالات اختفي بس بالامانه كان منظر يقطع القلب

لا دا كان زمان

انا بيت عمتى كان على خط الحدود بالضبط يعنى بيمر من جنبه الاسلاك الشائكه

و افتكر و انا صغيره لما كنت بروح عندها و اطلع على سطح البيت كنت بشوف احداث الانتفاضه فى رفح الفلسطينيه

بس كل دا اتغير

لان اسرائيل اعترضت على كل المبانى المتاخمه لخط الحدودى و اصرت على ازالتها لدواعى امنيه

بس عوضت جميع من ازالت بيوتهم

و خلت منطقه واسعه على الحدود من الجانبين خاليه تماما من اى نقاط تقاطع

لكن بعد انسحابها من قطاع غزه لاتفاقيه السلام الى وقعتها مع الفلسطينين

بقت المنطقه تحت السياده الفلسطينيه و بالتالى معدش هناك موانع بين الاهالى فى الجانبين زى زمان

دا طبعا قبل مشاكل قفل المعابر و الحاجات الى استجدت دى

منتظرين تكملي الموضوع لنتعرف اكثر علي شمال سيناء

ان شاء الله اقدم لكم نظره متكامله عنها

تحياتى

و تقبلي تحياتي

تم تعديل 22 أبريل 2010 بواسطة مغتربة

[رضوي]

السلام عليكم ورحمة الله وبركاته

موضوع جميل جداً ........... ويستحق المتابعة

آخر مرة زرت فيها العريش كانت من سنتين .............. بصراحة كنت مستمتعة جداً بالمناظر الطبيعية ومنظر البحر الجميييييييييييييل جدا جدا جدا

حتي في الطريق منظر الصحراء مختلف تماماً عن أي صحراء

ماقدرتش اسيب الكاميرا من ايدي وابطل تصوير في جمال الطبيعة اللي انا شايفاه دة

حتي الجو مختلف تماماً

بجد مش قادرة اوصف الجمال هناك

كوبري السلام بقي في حد ذاته حكاية

طوال الطريق ذهاباً واياباً وانا مستمتعة جداً بالعبور علي الكوبري

من أول ماتم انشاء الكوبري وافتتاحه وانا متشوقة اني اشوفه علي الواقع

وساعتها بس حسيت ان ممكن بلدنا تعمل حاجة

احساسي بالعريش بالذات وراس سدر استحالة يتوصف

من أكتر المدن اللي اتمني اروحها كتير العريش وراس سدر

استحالة ازهق منهم ابداً

[shiko]

تسجيل متابعة فى عشق سيناء

[مغتربة]

النهاردة هنتكلم عن سكان شمال سيناء

او العريش تحديدا

العريش بيسكنها مجموعه متبايه من البشر فى اهل البلد نفسهم و هنتكلم عليهم بالتفصيل دلوقتى و فيه كمان الناس الى جت العريش و استقرت فيها من كل مصر بسبب العمل او الزواج و خلافه

و العريش بيسرى عليها قانون المناطق النائيه الى بيدى حافز زائد على الراتب الاساسى لموظفى الحكومه بيقدر بحوالى 70% من الراتب ( على ما اتذكر ) و دا حافز علشان يشجع الناس انها تستقر فى الاماكن النائيه للعمل و طبعا بحكم الموقع الجغرافى فلسطينين و كمان بعض البدو و ان كان بيميلوا للاستقرار على اطراف البلد

بالنسبه لقبائل البدو معرفش عنهم كتير علشان كده مقدرش اتكلم عنهم لكن انا هتكلم معاكم اهل البلد من الحضر

حضر العريش موزعين على عائلات كتتيره جدا لكن بشكل اساسى نقدر نقسمهم لتلات اقسام رئيسيه

اول قسم هم عائلات تعود جذورها لوادى النيل نفسه هاجروا العريش من زمن طويل و استقروا فيها زى عائلات مطرى و الحجاوى و دول احدث ظهورا من القسمين التانين

تانى قسم هم الفواخريه و هى مجموعه عائلات تنضم كلها تحت نفس الجد و بترجع اصولهم لسوريا و هناك من يبعد بالاصل قليلا الى اصول عربيه نزحت اولا الى سوريا ثم من سوريا نزح قسم منها الى العريش و استقر بها

اما اخر قسم و هو الاقدم فى الظهور فى مدينه العريش و يطلق عليهم اولاد سليمان

فيرجع اصلهم الى جدهم الامير محمود على اغا

و هو امير ينحدر اساسا من ( بوشناق )

البوسنه و الهرسك حاليا استقدم فى العصر العثمانى الى العريش ليكون حاكم على قلعه العريش حوالى العام 1550

فاستقر بها و من بعده ابنائه و عمروها و توارثوا الحكم على القلعه حتى الغاها محمد على

و على هذا فاصول العرايشيين الاصليه تعود للبوسنه و الهرسك

و مازالت الكثير من العائلات فى العريش حتى الان تحرص على رسم شجره العائله من اول الامير محمود و حتى اخر الافراد فى الوقت الحاضر

كمان عايزه الفت النظر ان اكبر محافظه مصريه استقر فيها عرايشيه هى الاسماعيليه بحكم القرب

و فيه فى الاسماعيليه حى كامل اسمه حى العرايشيه

و بما ان الشيىء بالشيىء يذكر

فزوجات كلا من علاء و جمال مبارك لهم اصول عرايشيه

فهايدى راسخ زوجه علاء والدتها عرايشيه

و خديجه الجمال جدتها لوالدها ايضا عرايشيه

ارجو ان الخاطره دى تكون عجبتكوا و استنونى فى القادم باذن الله

[مغتربة]

كل سنه و احنا جميعا طيبين

ايه هى الحاجات الى بتشتهر بيها شمال سيناء او العريش بشكل خاص

1- الخوخ العرايشى

الى اتكلم عنه استاذ مصرى اصيل قى رده

فعلا خوخ العريش لا يعلى عليه مع ان شكله من بره مش عاطفى بالمره و لونه اخضر و ملمسه قاسى لكن طعمه احلى من الشهد بجد لازم تجربوه و مش هتندموا

2- التين العرايشى

التين العرايشى برضه زى الخوخ ليه فى حركات التمويه

لونه اخضر جدا و ملمسه من بره برضه صلب و استحاله تصدق ان الثمره فعلا ناضجه

لكن طعمه هو كمان احلى من الشهد

هو لسه ماخدش شهره بره العريش زى الخوخ فكتير ميعرفوش عنه لكن لو حد زار العريش فى موسم التين لازم يجربه

3- البلح

اكتر حاجه بيلاحظها زائر العريش هى كثره النخيل فيها و دا طبعا لانه افضل ما يمكن زرعه فى البيئه الصحراويه و بلحها من اجود انواع البلح و فى الموسم بتلاقى البدويات قاعدين على طول الطريق لغايه العريش يبعوا بلح و تمر و عجوه و كل مشتقات البلح

4- الفلفل العرايشى

الفلفل العرايش دا بقى حكايه رغم انه صغير فى الحجم جدا لكنه فعلا جبار

استحاله حد يقدر يستحمله الا لو بيحب السبايسى جدا جدا و هو كمان من الحاجات الى بتشتهر بيها العريش

5- السمان

السمان طائر صغير لطيف اقرب لحجم العصفورة من الحمام

الموسم بتاعه شهر سبتمبر بيهاجر فى الوقت دا من كل سنه للعريش طعم سمان العريش مختلف جدا عن اى سمان تانى بس لازم يكون برى مش مزارع

لو اتيحت لك فرصه زياره العريش فى شهر سبتمبر لازم تشترى اكله سمان من هناك

6- السمك

ككل المدن الى على البحر بتشتهر العريش طبعا بالسمك و افضل انواع السمك فى العريش هى البورى و الدنيس و اللوت و دول بيتم صيدهم من بحيره البردويل

لكن فى السنين الاخيره بقوا يقفلوا البحيره لفترات و يفتحوها للصيد فترات اخرى للحفاظ على زريعه السمك

7- زيت الزيتون

بتشتهر كمان العريش بمحصول وفير من الزيتون و دا بيساعد على توفير زيت زيتون على درجات عاليه من النقاوه و الصحيه العريش لوحدها بتنتج حوالى 10% من انتاج مصر كلها فى زيت الزيتون

انا حاولت اجمع لكم اشهر الحاجات لكن فى حاجات تانيه و ان كانت اقل شهره زى اللوز و الموالح بجميع انواعها

و استنونى فى حلقه جديد

[مغتربة]

انا حابه اركز فى المداخله دى على عوايد اهل العريش

اهل الحضر من العرايشيه عندهم عوايد جميله جدا لكل احداث الحياه الى بتمر بيهم

فمثلا فى حالات الوفاه

من عوايدهم ان اهل الميت يستقبلوا الاكل مطبوخ من انسبائهم او اقربائهم لمده ثلاث ايام

و دا طبعا مراعاه لحاله الحزن الى بيكونوا فيها و انشغالهم بتجهيزات العزاء و الدفن و خلافه

كمان الدفن فى العريش بيتم على السنه ( و انا معجبه جدا بالموضوع دا ) يعنى بالدفن فى لحد فى الارض مباشرا و شاهد عليه بدون ابنيه و لا حجرات و لا اى من هذه الاشياء

كمان ثقافه زياره المقابر مش منتشره بشكل كبير هناك و تقربيا شبه منعدمه بين اهل العريش الاصليين

و لا اول خميس و لا الاربعين و ممكن يقتصر احياء المناسبات دى على اقرب اقارب المتوفى و بس

فى حالات الزواج

فى حالات الزواج الطقوس مبتختلفش عن طقوس الزواج فى اى محافظه تانيه الا فى الصباحيه

و الصباحيه هو اليوم التالى لحفله الزفاف و فى اليوم دا لازم والد العريس او من ينوب عنه انه يولم للناس كافه وليمه غداء فى بيته او فى فراشه بجوار البيت

و تانى يوم الصباحيه يعنى ثالث يوم زواج بيكون الدور على والد العروسه او من ينوب عنه فى عمل نفس المادبه فى بيته

و ان كانت بتقتصر فى هذه الحاله الدعوه على الاقرباء فقط و ليس كل الناس كما فى سابقتها

و الصباحيه من مسلمات الفرح فى العريش يعنى طبيعى جدا ان كل الناس الى حضرت الفرح تروح الصباحيه تانى يوم و بعد الغدا الكل بينقط ( يدفعوا النقوط ) للعروسين و غالبا بيكون اكل الصباحيه عباره عن ذبائح خرفان او جديان معها ارز بالفطائر العرايشيه

زى ما قلت ان الصباحيه من مسلمات الافراح فى العريش لدرجه ان من يقرر الا يقيم صباحيه ان يذكر ذلك صراحه فى كارت الفرح حتى تكلف الناس نفسها عناء الذهاب على الفاضى

علشان كده محدش يستغرب لو وصله كرت دعوه فرح لاسرتين من العريش و لقى فى نهايه الدعوه عباره ( عذرا بدون صباحيه )

كمان بحكم ان كل العائلات تعرف بعضها فى العريش فالحكم العرفى ظل لفتره طويله مزدهر و ان بدء فى التراجع الان بحكم الانفتاح ( لكن ما زال قوى عند قبائل البدو ) و كل عائله لها كبير معروف و كذلك كل عائله يكون لها ديوانيه ( مجلس ) يفتحه كبيرها او احد افرادها ليتلاقى افرادها فيها او لاقامه العزاء فى حاله وفاه احد افراد العائله او تنظيم اى مناسبه للعائله بشكل عام فيه

استنونى فى الحلقه القادمه

مراسلتكم

مغتربه

:rolleyes: :rolleyes: :rolleyes:

[رضوي]

تسجيل اعجاب وتابعة

[مغتربة]

رضوى و شيكو الف شكر على تشجيعكم يا قمرات

و ان شاء الله باقى الموضوع يعجبكم

تحياتى

[مغتربة]

اماكن للزيارة

بشكل عام رغم ان تاريخ التوطن فى سينا عموما بيرجع للعصور الفرعونيه الا انه و استمرارا لمسلسل الاهمال الى عانت منه لعقود طويله لم يكن هناك اى اهتمام بعمل اى بحث عن اثار فى المنطقه

و رغم انه هناك بعض الاثار البسيطه المكتشفه بالفعل الا انها لا ترقى لان تكون مقصد فى حد ذاتها

و اذكر منهم على سبيل التعريف لا غير

قلعة وآثار الفرما , قلعة الطينه , قلعة نخل التاريخيه التى بناها السلطان قنصوه الغورى

و غيرها كتير

كمان فى محميه الزرانيق

و هى بتقع فى اطراف العريش عند بحيره البردويل و هى بتمثل أحد المواقع الرئيسية لهجرة الطيور في العالم.

لموقعها الاستراتيجي الهام في مسار هجرة الطيور من شرق أوروبا وشمال غرب آسيا

و دول الاتحاد السوفيتى السابق وتركيا خلال الخريف

سعياً وراء الدفء ومصادر الغذاء الوفير كما تقيم في المنطقة بصفة دائمة وتتكاثر فيها .

الأنشطة والخدمات بالمحمية

توجد العديد من الأنشطة التى يمكن القيام بها داخل المحمية منها مراقبة ومشاهدة الطيور ،

برامج التعليم والتوعية البيئية ، الدراسات والبحوث العلمية ، السياحة البيئية ، رحلات السفارى ،

زيارة المناطق الأثرية ، التصوير . وتوفر المحمية خدمات عديدة تتيح للزائرين ممارسة هذه الأنشطة منها :

مركز خدمة الزوار

يشمل متحف ومعرض لمكونات البيئة المحلية

ويضم قاعة للتعليم والوعى البيئى والمؤتمرات تسع حوالى 120 زائر

وتقدم بها برامج التوعية البيئية وبها كافيتريا لتقديم الخدمات للزائرين .

أكشاك مراقبة الطيور

توجد ثلاث أكشاك لهواة مشاهدة وتصوير الطيور تمكن الزائر من التمتع بمشاهدة الطيور عن قرب دون إزعاجها

وتوفر مكان مناسب ومريح لمراقبة الطيور .

أماكن التخييم

توجد منطقتان للتخييم داخل المحمية تتيح للزوار هواة الرحلات المبيت باستخدام الخيام

و التمتع بجمال الطبيعة بعيدا عن التلوث.

مركز الدراسات البيئية

يشمل استراحة مجهزة للباحثين و مكتبة علمية

و يمكن للباحثين استخدام المركز بالتنسيق مع إدارة المحمية.

مناطق الترفية

و هى مناطق يسمح فيها بممارسة الانشطة الترفيهية

مثل السباحة و التمتع بمياة البحر و رمال الشاطئ النظيفة.

و الاهتمام بالمنطقه بدء متاخر بعد اعلانها محميه علشان كده ممكن ناس كتيره متكونش عرفاها

لكن عموما الناس بتزور العريش علشان البحر بس

علشان كده خلونا نركز عليه

طبعا اشهر شاطىء فى العريش هو شاطىء النخيل لكن بالنسبه لاهل البلد فى مكان تانى بنفضله كمان عن شاطىء النخيل اسمه الريسه لانه لسه فيه خصوصيه اكتر

و بوجه عام ميه البحر فى العريش نضيفه جدا جدا

و فى كافتيريات كتيره منتشره على طول خط البحر

و المصيف فى العريش ممكن انه ينزل فى فندق او قريه سياحيه او ممكن انه ياجر شاليه من الاهالى بشكل مباشر

بالنسبه للفنادق فى سويس ان ( ابروى سابقا ) و دا اقدم الفنادق على البحر الفندق اربع نجوم بس نضيف جدا و موجود فيه الكتير من الانشطه كمان فى قريه سما العريش و دى فى مدخل العريش و هى قريه خمس نجوم و متوفر فيها انشطه كتيره و مطعم كمان فى قريه كورال بيتش و هى خمس نجوم برضه و اجدد المشروعات السياحيه فى العريش مستواها متميز و يقام فيها سنويا سباق الهجن الدولى

لكن يعيبها انها خارج العريش بحوالى 25 كيلو

بشكل دا نكون غطينا اهم خدمات العريش

و اى سؤال انا حاضره