فضل وكرم

[homer]

فضل وكرم

كريم عفوك بيشملنا ولا غيرك بنسأل حد

ومن نعمك بتكفينا وتأوينا فى النوى والبرد

ولو طالت ليالينا وزمجر فى الشتا رعده

بتسبقنا برضوانك وبنلاقى اللحاف اتمد

[yasovinas]

الحمد لله على كرمه وفضله وربنا يديم علينا نعمه

دايما كلامك جميل يا هومر

بالمناسبة ؛؛ ظروفك ايه الجمعه اللي جايه ؟؟؟

[homer]

الحمد لله ظروفى كويسة ان شاء الله بس ايه اخبار الماتشات عندكم

خد دى كمان عالماشى

الضلمة بحر غويط فيه القلوب تحتار

والظلم ظلمات ما يبرق فيها نور ولا نار

وانت الاله الحق وميزانك بينصفنا

نرفع ايدينا يا تهدى يا تاخد الجبار

[homer]

سهرت عيون الناس لكن نامت عن حوايجنا

نسأل ما نسأل مافيهم حد بيجيبنا

على كل باب حاجب ما يفتح حتى للنسمة

وبابك يا كريم مفتوح ولغيرك ما تحوجنا

[مصرية يعني مصرية]

جميل ماكتبت

تسلم اناملك

[homer]

ملاح وتايه

ملاح فى وسط البحور ضيعت مجدافى

طاير كما العصفور والحمل فى كتافى

بيزيد ما ينقص وبارقص مالحزن بس صبور

وان طال على الليل الفجر هيوافى