اذهب الي المحتوي
alnoobi

العاشرة مساءً : المتابعة اليومية

قيم هذا الموضوع :

Recommended Posts

من لم يشاهد حلقة الأمس من برنامج العاشره مساء على قناة دريم فاته الكثير !

فى البدايه أشارت منى الشاذلى الى حفل العرض الخاص لفيلم "عمارة يعقوبيان" بدار الأوبرا و هو الحفل الذى غاب عنه الدكتور "علاء الأسوانى" مؤلف القصه الذى لم تتم دعوته فى تصرف غير مسبوق و ذلك لكونه واحدا من المعارضين اللدودين لحكم مبارك و لكونه دائم النقد و بشكل لاذع خاصة على صفحات جريدة العربى الناصرى .. فكان لزاما على منظمى الحفل أن يستبعدوا الدكتور الأسوانى رغم أنه مؤلف القصه !!

ثم كانت الفقره الرئيسيه التى دارت حول لجوء الجمعيات الأهليه و الحقوقيه الى المنظمات الدوليه للتحقيق فى الاتتهاكات التى ارتكبتها الحكومه فى حق المتظاهرين خلال التظاهرات التى شهدتها مصر خلال السنه الأخيره و كان ضيوف الحلقه الدكتور حسن نافعه و كرم جبر و السفير أحمد حجاج وحسام بهجت و كما هو متوقع فقد حضر الدكتور حسن نافعه كمتحيز للوطنيه و النزاهه و حضر كرم جبر كمتحيز للحكومه , الجديد كان فى تواجد السفير أحمد حجاج و هى المرة الأولى التى أسمع فيها اسمه و أظننى سأنساه غدا فالرجل لم يقل جديدا نذكره به و كان يتحسب لكلماته و لم يشأ أن يقول كلمه تغضب مسئولا !

الجديد الثانى ونجم الحلقه كان حسام بهجت مدير "منظمه المبادره المصريه للحقوق الشخصيه" و هى المنظمه التى قامت بتقديم شكوى الانتهاك الى منظمة الوحده الافريقيه أما هو فشاب أسمر نحيل صغير السن كانت الحلقه بالنسبه له و لنا فرصه لتأديب و تهذيب المدعو كرم جبر .. و تصدى حسام بهجت بالحجه و البرهان لكل محاولات كرم جبر للدفاع عن الحكومه و تجريم اللجوء للمنظمات الدوليه و لم يترك له فرصه واحده للهروب و تجلى عجز كرم جبر عن الرد حينما عاب على حسام بهجت صغر سنه و قال عنه ( لسه متخرّج من سنتين ) !

و وصل كرم جبر الى أدنى مستويات اليأس من الرد على حسام بهجت مع نهاية الحلقه عندما استجدى منى الشاذلى ( أظن لازم ننزل بالتتر الأخرانى علشان ما نقعدش ساعتين تانى ) و ابتسمت منى الشاذلى و استجابت له شفقة به !!

قلت لكم من لم يشاهد حلقة الأمس من برنامج العاشره مساء على قناة دريم فاته الكثير !

تحيه للأستاذ الكبير ( حتى لو كان لسه متخرج أمبارح ) حسام بهجت ,, أثلجت صدورنا .. شكرا .

و لى طلب عند معدى برنامج العاشره مساء هناك تقليد متبع فى كثير من القنوات عند عرض ماده أو فيلم يحتوى على مشاهد عنيفه أو مخله و هو تحذير المشاهدين .. يا ريت عند عرض حلقات تحتوى على أشكال زى كرم جبر أو نبيل لوقا بباوى أو جهاد عوده يتم تحذير المشاهدين !

و لى طلب عند أخوانى فى المنتدى لو فيه حد بيقرا روز اليوسف يراقب لنا رد فعل كرم جابر على اللى اتعمل فيه أمبارح .. أظن نه بعد ما أكل الطوبه بتاعة أمبارح من الولد الشقى حسام بهجت حياخد ديله بين رجليه و و يا فكيك على بيته و يقف على الباب و هات يا هوهوه !!

تم تعديل بواسطة alnoobi

شارك هذه المشاركه


رابط المشاركه
شارك

حقا أعجبنى أسلوب ذلك الشاب بشدة ... شديد الوعى و المنطقية ... قوى الحجة بشكل مبهر ... هادىء الأعصاب و متمكن مما يقول ... و لقد ظل يكيل الضربات الى المدعو كرم جبر بشدة الى الحد الذى جعل الأخير مثيرا للشفقة و هو يتجه الى الأسلوب المبتذل اياه فى شخصنة الحوار و (قلة الأدب ) حين لم يجد أمامه من حجة دامغة الا أن يقول (وهو هييجى واحد زيك كان طالب من سنتين ينتقد رئيس الجمهورية و النظام؟؟؟ )

ظل المدعو كرم جبر يردد بشكل مثير للشفقة ذات الكلمات ... و ظل يقول أشياء ليس لها أية أسانيد و تلفيقات و كلاما متناقضا مع بعضه بشكل كبير ... ثم بدأ بتغيير الحقائق اما عن جهل أو عن فراغ حيلة حين وصل الموضوع الى مسألة المعتقلين بسبب مناصرة القضاة ناسبا كلاما لم يحدث و لم يقال الى أناس لم يقولوه و خالطا الحقائق ببعضها ...

أرى أن الوصول بمسألة (تدويل المشاكل مع النظام) الى ساحة النقاش فى الاعلام .. و محاولة توضيح مدى الشرعية فى هذا هو بلاشك خطوة جيدة الى الأمام .. فلقد دأب النظام و أبواقه - كديدن الأنظمة الشمولية - الى الباس رداء الخيانة قسرا بكل من ييأس من أجهزة الدولة و انصافها فيلجأ الى (بعض) المؤسسات الدولية .. النظام وصل الى مرحلة التخبط الشديد ... و لم تعد أبواقه تملك الا الحديث المكرر القديم و الذى لم يعد يؤتى ذات التأثير

ان شبابا مثل حسام بهجت و غيره يجعلون ابواق النظام قلقون فى مضاجعهم .. لأنهم يتحدثون بمنطق شديد التماسك ووعى و ادراك غاية فى التمكن ... و احترافية و ثقافة مرعبة .. أما من وصلوا الى مقاعدهم بالتدليس و الغش و الفساد .. فقد فقدوا منذ زمن كل أسلحتهم .. كما فقدها النظام .. فلم يعد لديهم الا الصوت العالى و الجعجعة و اكتساب عداء المواطن العادى و الابتذال و التدنى الشديد فى الحوار ... و هذا ما يجعلهم مثيرين للشفقة الى حد كبير

أحيى حسام بهجت على ثقافته و أسلوبه و شخصيته و منطقه المتماسك و حيلته الواسعة ... و بالرغم من اختلافى معه فى بعض الاتجاهات الا أننى لا أملك الا أن أحترمه مما رأيته أمس على شاشة دريم فى العاشرة مساءا ..

كما أحيى المذيعة منى الشاذلى التى استطاعت فى غضون سنة واحدة أن تصبح المذيعة الأثيرة لدى الكثيرين ... و يحسب لها أنها حين تكشف بذكائها غباء من أمامها من أبواق النظام فانها لا تجعل هذا يمر مرور الكرام .. بل توضحه و تبرزه و تعيد صياغته ... و فى النهاية الحكم للمشاهد

أرجو من العزيز النوبى تغيير عنوان الموضوع ليشير الى المادة الأصلية و هى لقاء حسام بهجت و كرم جبر فى العاشرة مساءا .. لأنه قد يفهم من العنوان أن البرنامج فى مجمله هو موضوع مقاله .. و اليك كل احترامى

مهيب

شارك هذه المشاركه


رابط المشاركه
شارك

اولا كرم جبر دا قليل الادب فى التعامل مع مشروع مواطن مصري شريف و كرم جبر لما كان عيل و متخرج من الجامعة فى سن حسام بهجت كان نكرة و سبحان مقسم الارزاق و معطى المؤهلات كرم جبر لو كان مشي على اظافره مائة عام لن ينول ما ناله .. و كفايه عليه يعقد يشيش فى القهوة ورا المؤسسة بتاعة الست فاطمة اليوسف و يعر نفسه قبل ما يعر المؤسسة التى يترأس مجلس ادارتها و النهاردة حسام بهجت رغم اننى لا اتفق معاه على طول الخط الا انه كسب ارضية كبيرة جدا بواسطة كرم جبر و اتمنى من حسام بهجت أن يراجع الشيوخ فى موضوع البهائية

شارك هذه المشاركه


رابط المشاركه
شارك

أرجو من العزيز النوبى تغيير عنوان الموضوع ليشير الى المادة الأصلية و هى لقاء حسام بهجت و كرم جبر فى العاشرة مساءا .. لأنه قد يفهم من العنوان أن البرنامج فى مجمله هو موضوع مقاله .. و اليك كل احترامى

مهيب

أولا شكرا على المداخله اللى أثرت الموضوع .

اختيارى لاسم الموضوع كان سببه تخيلى ان الموضوع ممكن يفضل مفتوح و نتابع من خلاله كل جديد فى البرنامج .

شارك هذه المشاركه


رابط المشاركه
شارك

حلقة الامس كانت وجبة دسمة ... سهرتنا معاها

ابدع فيها... الفنان سيد حجاب

ومع ذكريات جميلة من اشياء قديمة كتبها

اعجبني ما اضافة بالامس من رؤية جديدة لقصيدة امير الشعراء

قال فيها ....

سلوا قلبى

سلوا قلبى وقولوا لى جوابا

لماذا حالنا اضحى هبابا

لقد زاد الفساد وساد فينا

فلم ينفع بوليس او نيابا

وشاع الجهل حتى ان بعضا

من العلماء لم يفتح كتابا

وكنا خير خلق الله صرنا

فى ذيل القايمة وف غاية الخيابا

قفلنا الباب احبطنا الشبابا

فادمن او تطرف او تغابى

ارى احلامنا طارت سرابا

ارى جناتنا اضحت خرابا

وصرنا نعبد الدولار حتى

تقول له انت ماما وانت بابا

وملياراتنا هربت سويسرا

ونشحت م الخواجات الديابا

ونهدى مصر حبا بالاغانى

فتملؤنا اغانينا اغترابا

وسيما الهلس تشبعنا عذابا

وتشبعنا جرائدنا اكتئابا

زمان يطحن الناس الغلابة

ويحيا اللص محترما مهابا

فكن لصا اذن او عش حمارا

وكل مشا اذن او كل كبابا

ودس ع الناس اوتنداس حتى

تصير لنعل جزمتهم ترابا

امير الشعر عفوا واعتذارا

لشعرك فيه اجريت انقلابا

وما نيل المطالب بالطيابه

دى مش دنيا يا شوقى بيه دى غابه

شارك هذه المشاركه


رابط المشاركه
شارك

حقيقةً يا جماعة برنامج العاشرة مساءً أصبح علامة بارزة من علامات الإعلام المصري المُستقل .. وبالفعل لا تشعر بالندم على ما تقضيه أمام هذا البرنامج لتشاهد وتستمع مختلف الأراء .. بس الحلو ما يكملش فيا حبذا لو أعطت منى الشاذلي مساحة أكثر من الحرية ... ولا أقصد بالحرية هنا هي السب واللعن .. ولكن هي حرية التعبير عن الرأي في كل القضايا .

شارك هذه المشاركه


رابط المشاركه
شارك

في جريدة الأهرام هذا الأسبو .. قرأت كاريكاتير ..

فيه صورة واحد وزوجته يشاهدون برنامج العاشرة مساء ..

ويقول الرجل لزوجته ما معناه ..

أن الفرق أن منى الشاذلي يشعر أنها بنت الجيران ..

مش بنت اللذين ....

وهذا هو أحد أسرار نجاح هذا البرنامج ...

الحقيقة أن برنامج العاشرة مساء يأسرني بشدة .. ويعيدني للمنزل على عجل لمشاهدته ..

وأمس سهرت حتى الثانية ولم ينتهي البرنامج ..

مع محمد نوح والمبدع الشاعر العظيم الرائع سيد حجاب ....

وذكريات العام الماضي من العاشرة مساء ..

حاجة هايلة صحيح ..

شارك هذه المشاركه


رابط المشاركه
شارك

منى الشاذلي سألت محمد نوح ما معناه : انت ما غنيتش في حملات انتخابية لمرشحين ، قال لها لأ..

زغرت له منى الشاذلي .. التي تعرف كما نعرف أن نوح كان في حملة مصطفى الفقي الانتخابية ، وأن الموسيقار الكبير لم يقل الحقيقة!

خلص الكلام

شارك هذه المشاركه


رابط المشاركه
شارك

حلقة امبارح كانت فعلا حلوه سيد حجاب شاعر جميل اوى

ونوح مش باحبة اوى لانة صوتة عالى زيادة وكمان بحسة بيمثل شوية

ومش باحس ان عامل الحان محصلتش هو بيعمل تيمة معقولة

بس منى دى هى الى لذيذة اوى بحس انها مصرى زى وزى اى واحدة مصرية كان فيها شبة مننا كلنا

خفت دمها وسرعة البديهة عندها ولماحة و كمان ببتاثر اوى

عموما بتعجبنى جدا

ومدام جبتة سيرة البرنامج فية شاعر تانى من ضمن الفقرات الى عادتها كان بيقول قصيدة اسمها(1 2 الجيش العربى فين) عجبتنى جدا بس معرفتش اطلعا على النت

عوزة واحد عبقرينوا يطلعهالى :wub:

شارك هذه المشاركه


رابط المشاركه
شارك

بس كده ... أى خدمة

واحد اتنين .. الجيش العربى فين

الجيش العربى فين .. الجيش العربى فين

الجيش العربى فى مصر

ساكن فى مدينة نصر

يصحى من النوم العصر

و بياكل شاى و منين

واحد اتنين

الجيش العربى فين

الجيش العربى فى سوريا

حالق ع الموضة كابوريا

و على طريقة فيكتوريا

خلى الترماى بدورين

واحد اتنين

الجيش العربى فين

الجيش العربى الليبى

زى الفن التكعيبى

كله بتنجان يا حبيبى

و الظاهر و اخد عين

واحد اتنين

الجيش العربى فين

الجيش العربى خليجى

لا فيه حيل لا يروح و لا ييجى

يقولك هذا صمت استراتيجى

ايش فيك يا غراب البين

واحد اتنين

الجيش العربى فين

الجيش العربى فى تونس

أخضر مثل البقدونس

و عزيزة بتعشق يونس

تبقى الحُرُبات بعدين

واحد اتنين

الجيش العربى فين

الجيش العربى سودانى

سامع خطوته بودانى

عاوزنى أهجم فردانى

يالله اجرى يابو حسين

واحد اتنين

الجيش العربى فين

كتبها من الذاكرة

مهيب

شارك هذه المشاركه


رابط المشاركه
شارك

كتبها من الذاكرة

مهيب

ما شاء الله على ذاكرتك يا عم مهيب .. ده انا دايخ عليها من الصبح .. و مش فاكر اسم الشاعر و لا اي حاجه :) ربنا يكرمك و يدمها عليك نعمه mfb:

مش ح اكرر الاطراء على منى الشاذلى اللى فعلاً لها اكثر من وقفة محترمه خلال العام الماضى رغم انها من اسباب ارتفاع ضغطى و زيادة معدل اكتئابى لفوق المستويات المصرح بها دولياً .. بس يعنى هى ح تجيب مواضيع منين .. ما هو الاناء ينضح بما فيه ..

ربنا يستر عليها و يبعد عنها اللى بيقفلوا البرامج

شارك هذه المشاركه


رابط المشاركه
شارك

الجيش العربى سودانى

سامع خطوته بودانى

عاوزنى أهجم فردانى

يالله اجرى يابو حسين

بلاش كلامو فارغ يا شيخ

واحد اتنين

الجيش العربى فين

كتبها من الذاكرة

مهيب

برافو يا مهيب :)

تحياتي

شارك هذه المشاركه


رابط المشاركه
شارك

واحد تانى ...

الجملة اللى انت أضفتها أنا فاكرها والله .. بس أنا اعتقدت انها ارتجال منه لأنها لم تأت على القافية المتوقعة ... و لأن السطر الشعرى ختمه بـ(أبو حسين) على نفس القافية

كمان فى مقطع عن (الجيش العربى اتهان يوم انضرب الأفغان)

لكنى لم أكتبه لأننى لم أتذكره .. و لم أتذكره لأننى لم أقتنع به

مهيب

شارك هذه المشاركه


رابط المشاركه
شارك

بس كده ... أى خدمة

واحد اتنين .. الجيش العربى فين

الجيش العربى فين .. الجيش العربى فين

الجيش العربى فى مصر

ساكن فى مدينة نصر

يصحى من النوم العصر

و بياكل شاى و منين

واحد اتنين

الجيش العربى فين

الجيش العربى فى سوريا

حالق ع الموضة كابوريا

و على طريقة فيكتوريا

خلى الترماى بدورين

واحد اتنين

الجيش العربى فين

الجيش العربى الليبى

زى الفن التكعيبى

كله بتنجان يا حبيبى

و الظاهر و اخد عين

واحد اتنين

الجيش العربى فين

الجيش العربى خليجى

لا فيه حيل لا يروح و لا ييجى

يقولك هذا صمت استراتيجى

ايش فيك يا غراب البين

واحد اتنين

الجيش العربى فين

الجيش العربى فى تونس

أخضر مثل البقدونس

و عزيزة بتعشق يونس

تبقى الحُرُبات بعدين

واحد اتنين

الجيش العربى فين

الجيش العربى سودانى

سامع خطوته بودانى

عاوزنى أهجم فردانى

يالله اجرى يابو حسين

واحد اتنين

الجيش العربى فين

كتبها من الذاكرة

مهيب

مهيب .. هايل .. الله ينوّر !!

كمّل جميلك بقى , عاوزين اللهجه اللى قال بيها كل مقطع !! :)

شارك هذه المشاركه


رابط المشاركه
شارك

ماشى يا عم نوبى ... انت كده عملت زى الخواجة بيجو لما كان بيملى اسماعيل يس الجواب ... بالمناسبة الشاعر اسمه على ما أذكر .. محمد بهجت

مهيب

شارك هذه المشاركه


رابط المشاركه
شارك

:wub: اشكرك جدا يا مهيب

انت جميل

اولا علشان رديت بسرعة

ثانيا على الذاكرة الحلوة

انا حديلك دروس فى الرسم ببلاش

وعلشان خطرك وكلام ستات (احس من كلام رجالة كتير) ;)

انا نازلة مصر كمان اسبوع وحدورلك على كتاب فى ظبط النسب والتلوين بالاكرويل والفحم واصورهم وابعتهملك على الخاص

بس استنة عليا شوية :)

شارك هذه المشاركه


رابط المشاركه
شارك

الله يسامحكو

خلتوني أسيب ماتش منتخب التانجو ومنتخب المكسيك وأتفرج على البرنامج

بجد بجد

حلقة تاريخية ويجب أن يتم تسجيلها للتاريخ

فهي شهادة وتأريخ لعصر مبارك ( إنت كل حاجه هاتحشر مبارك فيها )

إسمعوا معايا كده

بنت طفلة صغيرة في أولى ثانوي يعني لسه بضفاير ... ولسه ما معهاش بطاقة شخصية .. ولسه في الرابعة أو الخامسة عشر .

تكتب موضوع إنشا ( تعبير ) في إمتحان أخر العام عن

عن

" تعمير الصحراء " ..... نقطة مقاطعة مني ... يا نهار مش فايت !!!!!!.. ده انا سايب إعدادي وثانوي من ييجي عشرين سنة .. ولسه أم موضوعات التعبير هي هي ... تعمير الصحراء ... حرب السادس من اكتوبر ... المولد النبوي ... عيد الأم "

يالله ما علينا

المهم البنت أسهبت في الكلام وخرمت على المحظور - من وجهة نظر مبارك - وقالت إن الرئيس الأمريكي لن يُعطي شباب مصر الفرصة في تعمير الصحراء وتحقيق الإكتفاء الذاتي من الغذاء لإنه يكره شباب مصر ...

ثم

ثم

تدخل رجال أمن الدولة البواسل

حماة مصر

وحماة العروبة

وشدوا البنت

وحققوا معاها عن طريق وزارة التربية والتعليم والحاجات الحلوة ...

ونفس اللي بنشوفه في الأفلام

غرفة تحقيقات شبة مُظلمة وناس قاعدين والطفلة قاعدة مرعوبة

تعرفوا كان أول سؤال من داخل المقرر إيه ؟

مين التنظيم اللي وراكي يا بت ؟

وإنتي تبع مين ؟

وتقصدي إيه بالكلام ده ؟

looooooooooooooooooool

وأسئلة من تلك النوعية الغبية

وفي الأخر كتبوها تعهد تقول فيه حقي برقبتي وأنا أن هابقى حماره ومش هافكر وإني بأعتذر عن ذلك

وفي الأخر أكتفوا بحجب نتيجة إمتحاناتها وأصدروا قرار مباركي رقم 75 تقسيم شي حا بإنها لازم تعيد السنة عشان تتربى

والله عسل

والله الرجل بقى عنده 78 سنة ودمه بقى زي السُكر

المهم أستضافوا على التليفون السيد وكيل وزارة التربية والتعليم بمحافظة التربية والتعليم اللي إتكلم كلام يموت من الضحك . وبإن البنت خرجت عن المألوف وعن العناصر المكونة لأي موضوع تعبير وكان لازم يتخذوا قرار جاد عشان يرجعوها للطريق الصحيح ... وفي اخر البرنامج ومع توسلات المذيعة إنهم يسقطوها في العربي بس وتبقى معاها ملحق وتدخل دور ثاني

فيقوم الجبان المتخاذل البيروقراطي يرد ويقول : بإن الله السيد الوزير هايعمل اللازم ...

الوزير اللي ممكن يكون عمره ما شاف وشه أساساً . لكنه أجبن من ان يأخذ قرار تافه زي ده بنفسه .. فلقد تعود هو ووزيرة على لعق أحذية النظام

شارك هذه المشاركه


رابط المشاركه
شارك

انا كمان شفتها واستغربت جدا ازاى نحرمها حتى من حرية الراى

دى حتى لو كانت قالت بوش الى كذكا وكذا

منحرماش من الامتحان للدرجة دى وصلت العبودية

ولهى مانا عرفة بكرة حيحصل اية حتى العيال عوزين يكبتوهم

شارك هذه المشاركه


رابط المشاركه
شارك

وانا قاعد اتفرج على البنت دي واللى حصل معاها ...

وازاي الاعلام لوى دراع الوزارة عشان تنجح وتعدي السنة دي...

وشكل الوزارة ميطلعش اغبى مما يجب ان يكون عليه ...

سألت نفسي سؤال ...

اذا فعلا فوتوها للبنية ... وقالولها سماح المرة دي عشان خاطر طنط منى :P ... هه... واوعي تعملي كده تاني وتفكري يا نيلة انتي ;)

تفتكروا في ظل منظومة التعليم الهايلة دي واللي بتعمل تحت مظلة الحكومة الرشيدة النظيفة ...

تفتكروا البنت دي هتعمل ايه السنة الجاية فى الثانوية العامة ؟؟؟

حتى لو جاوبت كل المواد صح بنسبة 100% ومن غير ما تدوس على ديل حد ؟؟؟

انا بتوقع انها هتكون تحت رعاية فائقة من الوزارة ... لدرجة انها ممكن بعد تصحيح اوراقها ... يا دوب... مجموعها يدخلها معهد البوسطة بطنطا...

شارك هذه المشاركه


رابط المشاركه
شارك
زوار
هذا الموضوع مغلق.

×