أسئلة في المطبخ

[Simba]

انا عندي استفسارات كتير وعلشان مش كل شوية افتح موضوع لسؤال واحد هاجمعهم كلهم هنا

وانا عارف ان الاخوة والاخوات الشيف محاوراتية مش يبخلوا بالاجابة

اول استفسار عن التسبيكة

التسبيكة العادية بتاعة اي طبيخ

انا بعد ما الصلصلة تغلي مع المية خلاص احط اللي انا عايزه بس متهيألي اكيد فيه وصفات تانية علشان التسبيكة تطلع حلوة

تاني حاجة انا عايز اشتري محضر طعام

عايز اعرف ايه النوع الكويس اللي ممكن يعمل كل حاجة في المطبخ فرم توم وملوخية وتقطيع بطاطس وياريت لو كان الجهاز بالصور

شكرا للجميع :blink: wst::

[pink rose]

بص حضرتك انا باعمل التسبيكة في اي اكل ني في ني يعني مش باحمر البصلة الاول

كده بتكون اخف على المعدة كتير و مريحة و طعمها حلو و مش بيحرق في القلب

مقادير التسبيكة

بصل مفروم

طماطم مضروبة في الخلاط

سمنة او زيت

ملح و فلفل

الطريقة

حضرتك هاتحط كل الحاجات دي على بعض على النار و تسيبها تغلي لحد ما المايا تتشرب اللي في الطماطم و تلاقي الزيت او السمنة بقت على الوش

بس خلاص

بالنسبة للكيتشن ماشين انا عندي دا

[fatfouta]

هات براون مالتى كويك يا سمبا جميل وسريع فى التحضير

[doha]

ياعين مامتك .. ومن ساعتها رايح جاي على نون النسوه وكل ده اتاريك مزنوق في التسبيكه .. ولا يهمك ياسيدي .. نقولك .. واجب برضه نكرموك ..

ريمو .. بلي الفوطه في صينية القلل عندنا زبون ..

يااهلا ياهلا .. اتفضل ..

بص بقى ياسيدي .. التسبيكه او مانطلق عليه احيان ( الدمعه ) طريقتها سهله مفيش مشكلة بس بتختلف من صنف للتاني ..بعضها بيتعمل بالبصل وبعضها بالثوم وبعضها بالاثنين ..

1. هتجيب بصله وتخرطها كويس .. مهم اوي ان تحاول قدر امكانك ان قطع البصل تبقى نفس الحجم تقريبا وده هيجي معاك ان خطوط التقطيع على البصله تكون متوازيه والمسافات بينها وبين بعضها تقريبا وحده .. لو معملتش كده هيطلع عندك قطع سميكه وقطع رفيعه طبعا الرفيعه هتتحرق قبل مالسميكه تفكر حتى تاخذ لون .. عن نفسي بحب اقطع البصل على لوح التقطيع لضمان تساوي الحجم ..

2. هنحط شويه زيت في حله .. ممكن نضيف للزيت ده مقدار ميزيدش عن ملعقه صغيره سمنه بلدي للطعم فقط لا اكثر وهيبقى بالظبط كأننا طبخنا بسمنه بس .. السمنه الكتير في الاكل ملهاش لازمه بتطخن على الفاضي ..

3. بعد دقيقة لما الزيت يسخن نسمي الله ونحط عليه البصل .. تشششش .. .ونقلب بالراحه .. نوطي النار نخليها متوسطه ونستمر في التقليب كل نصف دقيقة كده لغايه مالبصل ياخذ لون اصفر .. لو في ثوم هنحطه بنحطه في المرحله دي بعد البصل بشويه وده لان الثوم بيستوي اسرع بكتير .. هنستمر بالتقليب لغايه مالبصل يبدأ يادوب ياخذ لون ذهبي .. اوعى تسيبه لغايه مايبقى بني او اسود .. كده هتبقى تقلية مش تسبيكه ..

4. واحنا بنقلب بنراعي البصل الى على الاطراف عشان ده اول حاجه بتنحرق .. دائما نحرص نوقعه بالملعقه داخل الحلة مهما حاول يفلفص .. واخد لي بالك انت طبعا .. الفوطه يالي جواا ..

5. في اثناء تقليب البصل بنكون مجهزين كوبايه اما ماء او شوربه الي موجود يسد .. هنجيب مقدار الصلصة .. نقول باكو او ملعقتين كبار صلصه .. وهنقلب الصلصه في الكوبايه كويس بحيث تذوب في الماء .. اول مانحس ان البصل تغير لونه نروح مسميين تاني وننزل بالصلصه .. تششششين ..

6. هنقلب الصلصه ونحط رشة ملحق بسيطه ونسيبها على النار مثلا خمس دقائق تغلي لوحدها بس نهدي لها النار شويه وهي بتغلي .

7. يقال في كتب الطبخ والله اعلم بان التخديعه او التسبيكه المظبوطه نعرفها منين من لما السمنه بتاعتها تطلع على الوش ونلاقي فقاقيع كده وفقافيق وعليها الماده الدهنية يبقى كده هي استوت وجاهزه .. عن نفسي مش بنتظر المرحله دي كتير .. انا بسيبها شويه صغيريه بعدين ازود شوربه او مية على حسب بطبخ ايه واسيب كله يغلي بعدين انزل بالخضار المطلوب .. طبعا بزود رشه ملح بعد اضافة الخضار واسيبه على النار وقبل مايستوي بحاجه بسيطه اتذوقه واشوف هيعوز ملح قد ايه لان مش من الحكمه اضافة الملح كله في بدايه الطبخ على اساس ان المية بتقل مع الوقت وبالتالي الملح بيتركز .. يعني اظبط الملح دائما في الآخر مش من اولها ..

8. لو بعمل كفته مثلا يفضل تكون التخديعه دي بثوم فقط .. لو بعمل مختلف انواع الخضار بعملها ببصل بس وساعات بصل وفص او اثنين ثوم بيبقى كويس برضه .. لو بعمل بامية بالذات فاختلفت فيها الاقوال .. انا بقول بالبصل والثوم ( الثوم في البامية اساسي ) وزوجي العزيز بيقول بالثوم بس .. بس بما انها بتعجبه لما بتكون بالاثنين زي مابعملها فاعتقد والله اعلم انها هي دي الطريقة الصح ..

9. سبحان الله لسه مبقاليش يومين بفكر في موضوع الصلصه على الاكل .. لاحظت ان الصلصه لما بتغلي اوي بتسمر .. اعتقد والله اعلم ان من الافضل اضافتها للخضار في المراحل الاخيرة بس مش متاكده بصراحه مجربتش ..

10. لو هتستخدم الطماطم بدال الصلصه يبقى يفضل تضربها في الخلاط وتصفيها الاول بعدين تستخدمها .. وطبعا في حاله استخدام الطماطم مش هنزود غير قليل جدا من الماء وممكن كمان الاستغناء عنه ده غير اننا هنسيبها تغلي مده اطول قبل اضافه الخضار لها .. عن نفسي بعمل حركه حلوة لما بتكون الطماطم عندي كتير .. بجيب الطماطم الطريه الي فيها عصير كتير .. احطها في الكتشن ماشين .. ازود عليها ملعقه او اثنين صلصه .. واضربهم مع بعض تمام واستخدمها للطبخ بدون تصفيه او شيء .. بتدي نتيجه هايلة ..

واخيرا الفود بروسيسور او الكتشن ماشين الي عندي هي بالظبط اخت الي ريمو حطت صورتها ممتازه وانصحك بيها .. برضه كان عندنا زمان نفسها براون برضه بس بدون الجج او الحلة الاضافية الي تشبه الخلاط دي .. عن نفسي مبستخدمهاش .. لو هتشتري ممكن تشتري الي بحله واحده فقط هتوفي الغرض .. وعلى فكره برضه لو في امكانيه اشتري الخلاط اليدوي الي بيبقى زي العامود ده الي حطت صورته فتفوته .. عندي منه واحد بس صناعه صيني اي كلام بصراحه رهيب لشوربة العدس واي حاجه عاوزه تنهرس .. بفكر اجيب منه براون بس الي مانعني ان قطعها كتير وفيها حاجات مش محتاجاها على اساس ان عندي الماكينه التانيه الام تغنيني عن القطع دي كلها ..

بتقولي ايه ؟ مفيش فوطه ؟ كيس مخده ؟ ماشي ماشي كله ماشي ..

ايييييه .. ماحااادش بياكووولها بالساااااهل ..

[قلب ابيض]

البراون ممتازه جدا

والمولينكس الكاتش ماشين موديل 2010 حلوه برده انا جبتها لجهاز بنتى

واستنى بقى التنزيلات فى اليوسفى اللى فى الفروانيه 15 مايو على كل الاجهزه الكهربائيه لحد اخر 6

[Simba]

بص حضرتك انا باعمل التسبيكة في اي اكل ني في ني يعني مش باحمر البصلة الاول

كده بتكون اخف على المعدة كتير و مريحة و طعمها حلو و مش بيحرق في القلب

مقادير التسبيكة

بصل مفروم

طماطم مضروبة في الخلاط

سمنة او زيت

ملح و فلفل

الطريقة

حضرتك هاتحط كل الحاجات دي على بعض على النار و تسيبها تغلي لحد ما المايا تتشرب اللي في الطماطم و تلاقي الزيت او السمنة بقت على الوش

بس خلاص

بالنسبة للكيتشن ماشين انا عندي دا

مش مهم الاكل الصحي اوي

المهم الطعم الحلو

خلاص معدش بقي فيه صحة الواحد يزعل عليها :big_boss:

بس فعلا ساعات التسبيكة بتعمل حموضة وانا اصلا بعاني منها من زمان

[Simba]

هات براون مالتى كويك يا سمبا جميل وسريع فى التحضير

شكله حلو يا فتفوتة ومفيهوش تعقيد كتير

بس انا عايز جهاز هاخده معايا مصر انا مش محتاج محضر الطعام هنا اوي

اوقات كتير بيكون بيني وبين المطبخ خصومة كبيرة :big_boss:

[Simba]

ياعين مامتك .. ومن ساعتها رايح جاي على نون النسوه وكل ده اتاريك مزنوق في التسبيكه .. ولا يهمك ياسيدي .. نقولك .. واجب برضه نكرموك ..

نوة نسوة ايه بس .....انتم بتكدبوا الكدبة وتصدقوها ..خلي الطابق مستور :unsure:

بعدين ماماتي اللي انا عينها قالت لي ما تروحش تلعب هناك تاني

كمان اوعوا تكرموني علي طريقة ريا وحصبلة انا لسه صغار والعمر ايامه معدودة يا احمد

مدام ضحي

بجد وصفتك هايلة ودقيقة جدا ربنا يخليكي انا قريتها اكتر من مرة بمتعن وتركيز علشان تثبت في دماغي بيعجبني تفاصيلك الصغيرة اللي اكيد بتفرق في الاكل

خالص الشكر لحضرتك :big_boss:

ممكن حضرتك تقوليلي ازاي اعمل مكرونة باللحم المفرومة

تم تعديل 31 مارس 2010 بواسطة سمبا

[Simba]

البراون ممتازه جدا

والمولينكس الكاتش ماشين موديل 2010 حلوه برده انا جبتها لجهاز بنتى

واستنى بقى التنزيلات فى اليوسفى اللى فى الفروانيه 15 مايو على كل الاجهزه الكهربائيه لحد اخر 6

مدام قلب ابيض

انا كنت في الفرانية النهاردة بجيب التذكرة وشوفت فعلا البروان والمولينكس بس في الغانم بس انا ميال شوية لبروان

الف مبروك مرة تانية لبنت حضرتك

[doha]

ممكن حضرتك تقوليلي ازاي اعمل مكرونة باللحم المفرومة

هل حضرتك تقصد المكرونة بالبشاميل او التي يطلق عليها في المطاعم في مصر اصطلاحا مسمى مكرونه فرن ولا المكرونه الي على وشها لحمه مفرومه ولا المكرونة بكرات اللحم المفروم ؟

[Simba]

هل حضرتك تقصد المكرونة بالبشاميل او التي يطلق عليها في المطاعم في مصر اصطلاحا مسمى مكرونه فرن ولا المكرونه الي على وشها لحمه مفرومه ولا المكرونة بكرات اللحم المفروم ؟

يالهوي ايه ده كله

انا اقصد العادية خالص مكرونة بيكون متلخبط عليها اللحم المفروم

[doha]

هل حضرتك تقصد المكرونة بالبشاميل او التي يطلق عليها في المطاعم في مصر اصطلاحا مسمى مكرونه فرن ولا المكرونه الي على وشها لحمه مفرومه ولا المكرونة بكرات اللحم المفروم ؟

يالهوي ايه ده كله

انا اقصد العادية خالص مكرونة بيكون متلخبط عليها اللحم المفروم

ولو اني مبعملهاش المكرونه المتلخبط عليها لحم مفروم دي بس بما انك قلت العاديه فهقولك مكرونتي العاديه الي بحط عليها احيانا لحم مفروم ..

بص ياسيدي نبدأ اولا في عمل اللحمه المفرومه ..

هنجيب لحم مفروم وهنجيب مقدار مساوي له تقريبا من البصل المقطع ( برضه مكعبات صغيره متساويه زي الطريقة السابقة ) يعني بالنظر تقريبا لو كمية الحم المفروم كوب مثلا هتجيب حوالي كوب برضه او اقل قليلا من البصل المقطع ..

هنحط مقلاه عميقة على النار او حلة .. انا بفضل تكون مقلاه وتكون واسعه كمان .. نحط فيها شويه زيت .. في ناس تقول حمر البصل الاول شويه لغايه مايصفر بعدين حط اللحمه .. وفي ناس تقول لاه حط اللحمه الاول وقلبها شويه بعدين حط البصل .. وفي ناس ثالثه بتقول اخلط البصل مع اللحم بعدين حطهم مرة وحده في المقلاه .. مفيش فرق بين الطرق الثلاث كلها بتعطي نفس النتيجه تقريبا ..

بعد ماتفرد اللحم في المقلاه بالملعقة .. اقعد قلب فيه كل دقيقة كده لغايه ماكله لونه يتغير .. هتغطي المقلاه وتسيبها شويه على نار متوسطه .. وتلاحظها من وقت للتاني عشان متنشفش منك .. لاحظ اننا لسه لم نضيف اي مقدار من الملح .

هتلاحظ بعد شويه ان اللحم طلع سائل .. كويس لاحظ السائل ده لو اوشك انه ينشف زود شويه مية صغيرين جدا ربع كوب مثلا .. وافضل على كده لو لقيتها محتاجه مية زود شويه لو مش محتاجه خلاص .. اوعى تحط المية كلها مرة وحده والا هتبقى شوربه وهتبوظ طعم اللحمه حتى لو شربتها كلها هيبقى طعمها مش مظبوط ..

هتترك اللحمه على النار حوالي عشر دقائق الى ربع ساعه .. لما تحس انها قربت تستوي يعني آخر خمس دقائق كده ضيف واحده طماطم مقطعه صغير + الملح + الفلفل لو حبيت .. قلب كويس وغطي المقلاه تاني وسيبها على نار متوسطه لغايه ماتستوي .. متتركش اللحم المفروم على النار كتير فالمفروم زي الجمبري كل مايغيب على النار كل مايقسى اكتر ويتهيء لك انه عاوز يستوي اكتر ..

نيجي للمكرونه ..

هتجيب المكرونه بالنوع الي انت بتفضله ( اشكال المكرونه بتختلف على حسب الاكله .. يعني لو هتعملها فرن هتستخدم الطويلة الي اسمها قلم او مقصوصه او رقبة الوزه .. ولو هتحط عليها زيتون وفلفل وحركات يبقى هتستخدم السوسته او المبرومه ـ لها اسم بس انا نسياه ـ ولو هتطبخها بالخضار يبقى هتستخدم الي زي الفيونكه او الفراشة .. لو هتعملها مع كرات لحم او بفتيك يبقى الاسباجيتي .. لو شوربه يبقى حروف او لسان عصفور .. واخيرا لو هتطبخ مكرونه عاديه يبقى الشكل العادي المتعودين عليه الي شكل الخرز ده او القواقع او الكوع )

هتجهز حلة كبيرة وتملاها مية من الحنفية عادي ..

هتحطها على النار وتسيبها لغايه ماتغلي .. مهم جدا ان المية تكون بتغلي كويس ومهم اوي انها تكون كتيرة جدا بحيث تغطي المكرونه لما تنحط فيها وزياده بكتير ..

هتحط كمية ملح في المية مقدار تقريبا قبضه ايد .. حط ميهمكش

هنحط كمان ملعقة او اثنين زيت ..

بعدين تحط المكرونه ومهم انك تقلب كويس عشان متلصقش في القاع او تلصق في بعضها لو كانت اسباجيتي ..

من وقت للتاني هتقلب المكرونه ..

على حسب حجمها هتتركها على النار بتاخذ من 8 الى 10 دقائق تقريبا .. بتعرف منين انها استوت خلاص ؟ بتطلع وحده او اثنين وتذوقهم لو لقيتها طرية وتتاكل يبقى استوت لو لسه ناشفة شويه سيبها شويه ..

مجرد مااستوت المكرونه ارفعها من على النار بسرعه لان كل ماتتركها هتطلع نشا اكتر وهتعجن في بعضها ..

هتصفي المكرونه كويس جدا جدا من المية .. هتحطها في مصفاه وتهز المصفاه كويس اوي لان لو تركت فيها شويه مية هتغير طعم الصلصة ..

في ناس بتغسل المكرونه بعد ماتطلع وفي ناس بتتركها بدون غسيل .. خلي بالك لو غسلتها هتحتاج تزود لها ملح شويه وانت بتطبخها وممكن كمان طعمها يتغير شويه على حسب نوع المكرونه . الافضل انك متغسلهاش ..

طفي على اللحمه المفرومه متنساش :rolleyes: ..

هتعمل الصلصه ..

هتجيب ملعقه صغيره سمنه او شويه زيت ..

هتحطهم في حلة بعدين تحط عليهم ملعقتين تلاته صلصه وتقلب بسرعه وتكون مجهز في ايدك كوب ماء او شوربه يفضل طبعا شوربة .. هتروح مزود بسرعه شويه مية ومقلب بسرعه عشان الصلصة متتحرقش ..

هتزود المية او الشوربة شويه بشويه لغايه ماتحصل على قوام الصلصة المناسب . هتحتاج حوالي نصف كوب بس او اقل ..

هتزود شويه ملح وتقلب ..

ممكن لو حابب طعم افضل تجيب فص ثوم صغير وتدقة كويس اوي وتحمره مع السمنه قبل ماتضيف الصلصه ..

هتجيب المكرونه المسلوقة وتحطها على الصلصة وتقلب بعدين تتركها خمس دقائق كمان على النار وتطفي عليها ..

هتغرف بعد كده المكرونه في طبق وعلي وجهها كمية مناسبة من اللحم المفروم وبالهنا والشفا ..

المرة الجايه باذن الله اقولك كرات اللحم ..

[Simba]

شكرا يا مدام ضحكي ربنا يخليكي

كده تمام خالص

بلاش كرات اللحم اظن هتبقي صعب علي اوي wst::

انا كان عندي استفسار

ايه اسماء التوابل اللي بتدي ريحة وطعم للاكل غير الفلفل الاسمر والكمون دول انا عارفهم

وياتري كل التوابل تنفع في اي أكل

[doha]

شكرا يا مدام ضحكي ربنا يخليكي

كده تمام خالص

بلاش كرات اللحم اظن هتبقي صعب علي اوي wst::

انا كان عندي استفسار

ايه اسماء التوابل اللي بتدي ريحة وطعم للاكل غير الفلفل الاسمر والكمون دول انا عارفهم

وياتري كل التوابل تنفع في اي أكل

بص خذها قاعده .. بص لاصل الطبخه الي بتعملها منين ..

لما يكون الاكلة شرقية حط توابل شرقية ( قرفة , هيل او حبهان , قرنفل , كركم , زنجبيل )

ولما تكون الاكلة ايطالية معجنات سواء مكرونه او بيتزا حط ( زعتر او ريحان )

ولما تكون غربية فغالبا بيحطوا الفلفل بس

التوابل الشرقية في المعجنات تخربها .. وكذلك توابل المعجنات مش هتطلع حلوة ابدا مع الاكل الشرقي ..

في توابل بتنفع اكتر شيء الاكل المصري بس زي الكسبرة الناشفة كده او المستكه ( مبحبهاش المستكه دي معرفش ليه ) ودي برضه هتلاقيها في الاكلات المصرية اوي زي التقلية او الطعميه وخلافه ..

وعندك الثوم المجفف و البصل المجفف الاثنين دول من التوابل الاكثر من رائعه لو عاوز طعم الاكل يطلع معاك بشكل مبهر وبيمشوا مع الاكلات الغربية وتتبيلات اللحوم اكثر من الشرقي .

في بقى مكونات بتبقى الذ مع حاجات بعينها ..

مثلا لو بتطبخ اسماك او حاجه بحرية يبقى الليمون اكيد بيعمل فرق .. وبرضه اي حاجه لها مزازه زي السماق ..

لو هتطبخ فراخ هتبقى ممتازه مع الثوم الطازج وبرضه المجفف وحلوة وكذلك الحوامض من ليمون وسماق وطبعا التوابل الشرقية بانواعها . .

اللحمه الحمراء دي تتبل بالملح والفلفل الاسود فقط لا غير ..

احلى حاجه وعشان اكلك ميبقاش كله طعم واحد انك تجيب التوابل قدر الامكان ( صحيحه ) أو حب مش مطحونه وتحطها في برطمان مغلق لكل صنف برطمان .. ولما تحتاج تاخذ مقدار صغير من كل نوع على حسب هتطبخ ايه بعدين تحطه في المطحنه ( تكون محتفظ بمطحنة كهربائية صغيره اوي للغرض ده ) وتطحنه كويس وتستخدمه طازج .. هيبقى الطعم اقوى وكمان هيختلف باختلاف الخلطه الي عملتها وكمان نسبة الكونات لبعض ..

واخيرا معلومه على الماشي .. يفضل تحط على كل برطمان تاريخ شرائك للتوابل الي مفروض تشتريها من مكان عليه ( سحب ) عشان تضمن انها طازجه قدر الامكان والتوابل عاده بتعيش لمده سنة .. ممكن تستخدمها بعد كده عادي مش هتقول لاه بس طبعا طعمها هيبقى مختلف كتير عن الي لسه جديده .. وبالمناسبة في ناس بتحتفظ بالتوابل في الفريزر في اوعية محكمه الغلق وبيقال ان ده بيطول عمرها ويحفظ نكهتها اكتر بس بصراحه مجربتش الحكايه دي ..

[بندق أفندى]

هأعلق على المكرونة والتسبيكة ان شاء لما أرجع الدمام لأنه لى ملاحظات مهمة عليها هههههههههه

[Simba]

احب اطمن السادة القائمين علي المطبخ

أني عملت مكرونة باللحمة المفرمة اخر لخبطة ولها العجب :closedeyes:

ودي كانت طريقتي الاحترافية للحلة المكرونية

قدحت الزبدة علي النار

بعدين ضفت لها البصل المتخرط

حطيت علي البصل وهي بيتقلي شوية بهارت كده من كيس اسمه بهارات كويتية مشكل ( هيل .. كمون .. قرنفل ..كركم)

لما البصل قرب يطلع عينه ضفت التوم المدقوم بضمير في الهون

بعد ثواني ضفت الصلصة وشوية مية صغيرين واللحمة المفرومة

وزودتها شوية مية كل ما تقرب تنشف لحد ما اللحمة استوت

علمت المكرونة بالظبط زي ما مدام ضحي وضحت في طريقة سلقها وخصوصا حط ملح وما تخافش والله جاب نتيجة كويسة وملح المكرونة طلع مظبوط جدا

بعد كده لخبطت ده علي ده

حد عايز طبق :blink: