لازلت احلم بزيارتك

[فــيــروز]

الصوره التالته "من غير ما نعد الخريطه" دى حقيقيه فى البلد اللى اسمها مش عارفه انطقه ده يا امير !! :rolleyes:

[فــيــروز]

استجابه اكثر من رائعه من الاخوه الاعضاء

شكرا يا س.س. للاستجابه وتوضيح اسباب رغبتك فى زيارة ماليزيا

شكرا جزيلا للاستاذ ابو فصاد على امنياته الطيبه

انا شخصيا احب جدا ازور اسبانيا .. سمعت انها بلد سياحى من الدرحه الاولى

على فكره يا اخ وايت هارت

الهند -فى اعتقادى- على راس الدول التى يحلم بزيارتها كثيرون اعرفهم شخصيا .. رغم انى مش عارفه ليه باحس بانزعاج عند التفكير فى زيارتها !! يمكن عشان ترتبط فى ذهنى بالتعابين !!

وان كنت استمتعت للغايه بالمعلومات الثمينه التى اضفتها حضرتك للموضوع :rolleyes:

[amir]

الصوره التالته "من غير ما نعد الخريطه" دى حقيقيه فى البلد اللى اسمها مش عارفه انطقه ده يا امير !!  :rolleyes:

ايـوه يا فيروز هــــىاللىما تتسماش دى

http://www.news.li/touri/index.htm

[abofasad]

شكرا للأخ العزيز سي السيد على رسالته الخاصة لي .. فقد قرأتها وسعدت بها جدا .. وعلى الفور رددت عليها.

اريد أن اعرف كيفية اعادة قراة رسالتك مرة أخرى

[maksoof]

1- تاهيتى: شفت أفلام و صور و سمعت كتير عنها و لما توماس كوك إكتشفها كتب فى مذكراته" إكتشفت الجنة" و أنا بحب أتأمل فى جمال و كمال الخلق و كمان بحب البحر (الترعة أم شط واحد)

2- الواحات فى مصر: الرجوع للحياة البسيطة من غير التعقيدات اللى عايشين فيها دلوقت: لا كمبيوتر و لا تليفزيون و لا أخبار و لا سياسة. و بيقال إن الحياة فى الصحراء بتخلى النفس صافية وتتقرب من الخالق سبحانه و تعالى.

دلوقت يا ستنا فيروز أنا رديت على سؤالك فإيه رأيك بقى لو تردى على السؤالين دول:

1. أى بلد ترفضى زيارتها حتى لو دفعولك فلوس (بإستثناء إسرائيل) و ليه؟

بالنسبة لى أنا: الهند (ما تزعلش منى يا وايت هارت) و فعلا كان عندى فرصة إنى أروح و كانوا حيزودوا مرتبى فترة وجودى هناك و لكنى رفضت لسببين: أولا تجربتى مع أغلب الهنود اللى إتعاملت معاهم هنا أعطتنى إنطباع سىء عنهم و ثانيا أغلبهم ما يعرفوش إن فيه حاجة إسمها حمام (بشد الميم الأولى) و ما سمعوش عن صنف الصابون cbyb:

2. لو قدرتى تسافرى فى الزمن للوراء: أى زمن ترغبى فى زيارته (أو خليهم إتنين) و ليه؟

أنا أحب أرجع لأيام الرسول عليه السلام عشان أتعلم منه الإسلام الحقيقى.

و الزمن التانى هو لحظة بداية الكون أو ال big bang عشان أشوف كيف بدأ الخلق

[se_ Elsyed]

2. لو قدرتى تسافرى فى الزمن للوراء: أى زمن ترغبى فى زيارته (أو خليهم إتنين) و ليه؟

أنا أحب أرجع لأيام الرسول عليه السلام عشان أتعلم منه الإسلام الحقيقى.

و الزمن التانى هو لحظة بداية الكون أو ال big bang عشان أشوف كيف بدأ الخلق

لأ أنا أعترض ... لو سمحت يا مكسوف إنت كده بتعتدي على حقوقي الفكرية - مين فكرية دي ؟ - أنا بقى لي ييجي 4 شهور عايز أكتب الموضوع ده وكنت هاسمية " ألة الزمن .. أو التايم ماشين " ... بس كل مرة الظروف لا تفتح إما لضيق الوقت أو للحالة النفساوية .... فلو سمحت ماتكروتناش وإفتح موضوع مستقل تحت هذا الأسم ..

وإبقى اتوصى بي وأسمحلي بأربع أزمنة اعيش فيهم

[se_ Elsyed]

شكرا للأخ العزيز سي السيد على رسالته الخاصة لي .. فقد قرأتها وسعدت بها جدا .. وعلى الفور رددت عليها.

اريد أن اعرف كيفية اعادة قراة رسالتك مرة أخرى

مافيش حاجة جت يا عمو .. إنت بعثتها لمين بالظبط ؟ :blink:

وبعدين حضرتك ممكن تقرأ الرسالة مرة أخرى من خلال الـ inbox الخاص بالرسايل الخاصة هاتلاقيه موجود لو ماكنتش حذفتها ونحن على أستعداد لإرسالها مرة أخرى بدون مصاريف شحن :rolleyes:

[عادل أبوزيد]

الفاضلة فيروز موضوع ممتاز ولكن - آه من لكن هذه - عنوان الموضوع لا يعبر عن محتواه تصورى أن ترين أتوبيس مكتوب عليه العتبة و لكنه لا يروح العتبه و لكنه يروح العاشر من رمضان مثلا.

هذا الموضوع دغدغ مشاعرى فعلا فى أعماقى أمنية غالية أن أزور سوريا و أشتم رائحة زهر المشمش و أرى القطط الدمشقية فى ساحات البيوت تتقافز فى شمس الصباح الهادئة

كنت منذ سنواتى الأولى "من سن الرابعة عشر" مغرما بالشعر و أتذوقه و أتنفسه و كان يعطينى قدرا كبيرا من السعادة و النشوة و الفرحة و بالنسبة لرائحة زهر المشمش فقد كان فى حديقة بيتنا شجرة مشمش و كانت رائحة زهر المشمش شئ رائع ينساب إلى داخل النفس و لا تستطيع أن تسميه و لعلنى وجدت ما يشبه تلك الرائحة فى عطر "دولسى فيتا" أظن إنتاج كريستيان ديور (غير متأكد) و فى عطر سيكريه للشبراويشى كما أذكر و هذه عطور للسيدات و لو كان الأمر بيدى لصنعت منها معطر للمنازل و السيارات.

أحاول أن أصل إلى مصدر تعلقى بسوريا و تخوننى الذاكرة.

و الآن أخشى ما أخشاه أن أذهب هناك و أجد أننى عشقت صورة شعرية موجودة و أصطدم بالزحام و الأسمنت و دخان السيارات القديمة

[فــيــروز]

سؤال صعيب كتير يا استاذى مكسوف clp::

مافكرتش فيه خالص تصور .. البلد التى ارفض زيارتها !! مممم ايه يا فيروز ايه يا فيروز .. clp::

مش عارفه فيه بلد "قد تكون الهند او بنجلاديش" كنت ارى لها اعلان مفترض انه سياحى فى قناة شو تايم .. وكانوا بيجيبوا لقطات من مختلف دول العالم واللقطه التى اذاعوها لهذه البلد كان فيها طفل صغير مستند للحائط والى جانبه فار صغير !! والولد قاعد ببساطه ومش حاسس ان فيه حاجه غريبه !! clp:: اللقطه دى فعلا كانت بتستفزنى ومش فاهمه ايه الهدف منها !! بس كانت تترك لدى انطباع سيئ جدا .. وليس معنى هذا انى ماباشوفش فيران و عرس فى مصر المحروسه لكن مش ممكن هاشوف اعلان فيه فار متعايش سلميا مع اهل البلد و اشعر بالاطمئنان اليها !! clp::

العصر الذى اريد ان اعيش فيه .. حيث انك اخترت عصر الرسول ممكن اختار انا عصر الدوله الفاطميه .. حاسه انه كان عصر مبهج و سعيد فى مصر وكله اعياد و احتفالات taz:: .. وكمان احب اعيش شويه فى مصر الفرعونيه و احضر احتفالات وفاء النيل لانى باحب النيل جدا ومن المؤكد انه فى عصر الفراعنه كان يلقى عنايه اكبر من اللى موجود دلوقت "مصيبه و عشت الدور و عملت فيها هاميس" clp:: .. ادينى عصر كمان فوق البيعه ممكن؟ bsh:) عاوزه اعيش فى مصر فى الوقت اللى كان فيها مشربيات و قلل .. انا عارفه ان ده قد يبدو اختيار عجيب لكن هذا العصر يثير خيالى جدا واعتقد انه عصر كانت المراه فيه فى اوضاع افضل "فى بعض النواحى" افضل من الآن .. اعتقد ان الانسان المصرى بصفه عامه فى هذا العصر كان افضل فى كثير من النواحى .. bsh:)

على العموم انا اؤيد فكرة س.س. انك تعمل موضوع جديد عشان اروح هناك اختار عصور تانيه غير اللى اخترتها هنا :D

الاستاذ عادل ابو زيد

الحقيقه اختيار عنوان الموضوع قد يكون اصعب من صياغة الموضوع نفسه بالصوره التى ترضينا .. ومشكلته انه كما قلت حضرتك قد لا يراه البعض معبرا بالكامل عن المضمون

نرجع لسوريا .. الحقيقه الاسباب التى ذكرتها لرغبتك فى زيارتها شوقتنى انا ايضا ان اراها راى العين .. واتمنى معك من الاعماق الا تكون تلك الصوره الجميله مجرد صوره فى الخيال والا تخيب دمشق آمالنا وان تكون بها ولو لمحه مما تخيلته عنها .. تحياتى bsh:)

تم تعديل 26 مارس 2004 بواسطة فــيــروز

[se_ Elsyed]

س س ينادي أبو فصاد هل تسمعني

الرسالة وصلت وكله تمام

حول

أوفر

مصيبة لا يقروها أوفر من التوفير وأنا قاصد

over

[White heart]

maksoof كتب:

1. أى بلد ترفضى زيارتها حتى لو دفعولك فلوس (بإستثناء إسرائيل) و ليه؟

بالنسبة لى أنا: الهند (ما تزعلش منى يا وايت هارت) و فعلا كان عندى فرصة إنى أروح و كانوا حيزودوا مرتبى فترة وجودى هناك و لكنى رفضت لسببين: أولا تجربتى مع أغلب الهنود اللى إتعاملت معاهم هنا أعطتنى إنطباع سىء عنهم و ثانيا أغلبهم ما يعرفوش إن فيه حاجة إسمها حمام (بشد الميم الأولى) و ما سمعوش عن صنف الصابون

لا يا راجل، لا زعل و لا يحزنون، دة رأيك و انت حر فيه طبعا، لكن مش ملاحظ انك قيمت و حكمت على دوله كامله بحجم الهند بناء على مجموعه بسيطه تعاملت انت معها، و ليس فى وطنهم الأم؟ انا بينى و بينك بأتجنب التقييمات اللى بالطريقه دى، لأنه ممكن جدا مجموعه هنديه يتواجدوا فى القاهرة لفترة و يروا ما يروا من "الفضائح"، فأنا فى هذه الحاله سوف أرفض تماما عند عودتهم أن يكون هذا هو تقييمهم لبلدنا "كاملا"، خصوصا اذا ما نشروه على مرأى من العالم أجمع، و لو اتكلمنا عن "الأنطباع" الذى سببوه لديك، و الذى نتج عنه رفضك للسفر الى بلدهم، ما بالك بالأنطباع الذى يسببه كثير من المصريين و العلاقات فيما بينهم عندما يحتك بهم من حولهم .... مثلما ورد مثلا فى هذا الموضوع للعزيز ragab2 : تنافر المصريون بالخارج

[abofasad]

أسمعك

حول

[White heart]

لاحظ مثلا يا "مكسوف" مداخلة العزيز Freefreer فى نفس الموضوع:

اثبتنا اننا متفردين فى هذا الموضوع .. لا توجد جنسية على وجه الأرض لا تتعاطف مع بعضها البعض الا نحن

و هذا تحديدا .. كان الغرض و السبب الأول لعمل موضوع السلام عليكم من كندا

هل هو الفقر .. لا .. هناك شعوب من افقر مايمكن .. و فى منتهى التضامن مع بعضها

و اعتقد ان هذه الجمله مثلا تنطبق على "الهند" و شعبها الذى يختلف فى الكثير و الكثير، و ربما هذه من احدى الأسباب التى تثيرنى لزيارة و مشاهدة تلك الدولة على الطبيعه، على الرغم من عدم معرفتهم الحمام و الصابون كما ذكرت ..... عموما كما ذكرت لك انت بالطبع حر تماما فيما تعتقده....

و اتمنى بالمثل انك ما تزعلش منى. clp::

تم تعديل 26 مارس 2004 بواسطة White heart

[فــيــروز]

لازلت احلم بزيارتك ....

روسيا :rolleyes:

رغم انها بلد برد جدا

الا انى بالفعل احلم بزيارة روسيا

فى احد الافلام كان هناك مشهد سيتم تصويره فى محطه لمترو الانفاق .. فى البدايه لم ادرك انها محطه لكنى تصورته متحف !! وفى النهايه ظهر انه محطة مترو الانفاق

من المؤكد ان روسيا وشعبها الذى استطاع ان يصبح قوى عظمى تستحق التعرف عليهم من قرب .. خاصة مع الظروف المناخيه القاسيه التى عاش فيها الشعب الروسى

[Cleo]

أبدأ بجوة مصر ولا برة مصر؟؟

خلينا جوة الأول و بلاش نعمل زى القرع نمد لبرة..

1- سيوة... أشوف يعنى إيه واحة و عين ماء محاطة بالنخيل فى وسط الصحراء... يتهيألى منظرها يبقى عامل زى الجنة..

2- شرم الشيخ.. من باب الفضول ليس إلا

3- رشيد و فوة... أشوف البيوت الإسلامية القديمة اللى هناك واللى ليها طابع متميز

4- إسكندرية... نور عينى.. روح قلبى... حبيبى... حياتى... مازهقش منها أبددددداااا

5- المنيا... بيقولوا عروس الصعيد...و أتمنى أشوف أطلال أخيتاتون (يا سلام لو عمو إحناتون يعومنا على فطير و مش و بتاو هناك يا ولاااااااااااد...)

برة مصر:

1- أسبانيا (تانى) لأن أول مرة لم تتح لى الفرصة للتمتمع بجمالها و زيارة الكثير من معالمها... قد إيه بلد رغم إنها متحضرة و نظيفة بس دمها خفيف جدا و ناسها زى السكر.. مش كئيبة زى بلاد أوروبية كتير

2- إيران... سحر الشرق و حضارة الفرس.. كمان لما كنت فى تركيا كان نازل معانا فى الفندق جروب إيرانيين... لفت نظرى إن لغتهم فيها كلام كتير عربى و نغمة لهجتهم مماثلة لنغمة اللهجة المصرية... يعنى لو ماشى جنب اتنين إيراينيين بيتكلموا و مش مركز معاهم قوى بيقولوا إيه ممكن تفتكرهم مصريين

3- ولو إنها المفروض تيجى نمرة 1... بس نفسى أروح مكة و المدينة و أتمتع بجوار الحبيب المصطفى عليه الصلاة و السلام..

4- سوريا.. بيقولوا الطبيعة فيها حلوة جدا و الشوبنج رخيص موت..

5- لبنان.. ولو إنها غالية مووووووووووووووووووووووووووت

6- جنوب أفريقيا... بيقولوا الطبيعة فيها جنان و رخيصة جدا (بس تذكر الطيارة لوحدها حوالى 8000 جنيه :rolleyes: )

7- الصين... عشان الشعب الصينى أثار فضولى بشكل مستفز... إيه دول اللى كانوا فقراء و مش لاقيين ياكلوا و فجأة أصبجوا قوة اقتصادية مرعبة

8- روسيا... (أصل مواليد الشتاء يموتوا قى البرد)

9- النمسا... أشوف جبال الألب و قصر (صوت الموسيقى) و قصر يوهات شتراوس

10- المغرب.. مش عارفة ليه بس نفسى أروح..

11- البرازيل - كوستاريكا - كوبا عشان دراستى للثقافة الهيسبانية ولددت عندى فضول لزيارتهم

12- بيرو و تشيلى للتعرف على ثقافة الهنود الحمر وما بها من غموض و سحر

(إيه التواضع ده يا كليو... نصف الكرة الأرضية بس؟؟!!!)

[se_ Elsyed]

فيروز كتبت

رغم انها بلد برد جدا

الا انى بالفعل احلم بزيارة روسيا

راحت كليو رده عليها مباشرة بواحدة دبل كيك وقايله

2- شرم الشيخ.. من باب الفضول ليس إلا

س س رايح قايلهم .. طب ماحنا ممكن لما نروح شرم الشيخ يبقى كده شوفنا روسيا بحالها نظراً لكمية الروس اللي هناك :rolleyes: وفي نفس الوقت يبقى شوفنا شرم الشيخ ولا سفر ولا برد ولا يحزنون ..

يعنى لو ماشى جنب اتنين إيراينيين بيتكلموا و مش مركز معاهم قوى بيقولوا إيه ممكن تفتكرهم مصريين

انا بقى لما بأشوف الإيرانيين والأتراك في مكه بالذات بأبعد عنهم .. لأن معظم اللي بييجوا للعمره او الحج منهم بيبقوا ناس كبار في السن وما بيصدقوا يشوفوا حد عربي قاعد جنبهم في مطعم مثلاً او جوه الحرم ويطلع فوق ودني وهاتك يا كلام وأحاول أكلمه بالعربي بالإنجليزي بالفرنساوي او حتى بالفيومي إني مابعرفش لغته وهو أبداً شغال ومستمتع بالحديث معايا وكانه لقى لقيه .. وحصل ده معايا كذا مره ...

بس كل اللي فهمته من خلال تلك المغامرات أنهم بيقولوا في وسط كلامهم كلمة " الحجاز " ففهمت بقى أنه من الحوار ده كله أنهم فاهمين إنا سعودي ومن الحجاز ..

بس هما بشوشيين وتحس انهم قريبين من الملامح العربية ...

كليو كتبت

4- سوريا.. بيقولوا الطبيعة فيها حلوة جدا و الشوبنج رخيص موت..

5- لبنان.. ولو إنها غالية مووووووووووووووووووووووووووت

ما هو الفن بقى يا كليو إنك تلعبيها صح .. يعني تروحي الاول سوريا وتقيمي فيها عشان رخيصة جداً وتفكرك بمصر أيام الستينات - فاكراها ؟ :P - وبعدين تاخدي مواصله نص ساعة لحد بيروت نفسها وده يكون الصبح وتتفسحي براحتك طول النهار وبعدين ترجعي لسوريا .. ويبقى بكده تجنبنا الدفع بالدولار وفي نفس الوقت اتبسطنا بأقل التكاليف ...

إتعلموا السياحه بقى ....

[فــيــروز]

بس انا عاوزه اشوف روسيا يا س.س. مش الروس .. mf-:

وبعدين عاوز تضيق علينا ليه !! نروح روسيا و نروح شرم الشيخ انت دافع حاجه من جيبك !! wst::

لازلت احلم بزيارتك :lol:

الحقيقه .. الحقيقه يعنى الواحد محرج ومش عارف يقولها ازاى :D بس انا ماحبيتش اخليها آخر بلد احلم بزيارتها فقلت اجيبها فى النص عشان محدش ياخد باله :lol:

هتكون ايه يعنى .. امريكا طبعا .. و الحقيقه هو مش حلم بالزياره هو بس شوية فضول .. ان ارى البلد التى اظن انها الاكثر ذكرا على الالسنه فى كل يوم تشرق عليه الشمس .. وبالرغم من ان اجراءات زيارة امريكا بالنسبه للمسلمين و العرب عموما صارت صعبه .. وهذا يجعل من فكرة زيارتها كابوسا فى حد ذاته الا انى كلما تصورت انى رايت امريكا ولو ليوم واحد ارانى بعين الخيال فى حالة ذهول ارجو ان يكون ايجابى wst::

تم تعديل 28 مارس 2004 بواسطة فــيــروز

[maksoof]

لأ أنا أعترض ... لو سمحت يا مكسوف إنت كده بتعتدي على حقوقي الفكرية - مين فكرية دي ؟ - أنا بقى لي ييجي 4 شهور عايز أكتب الموضوع ده وكنت هاسمية " ألة الزمن .. أو التايم ماشين "

شوف بقى يا س.س. :

بما إنك فكرت فى الموضوع الأول يبقى سعادتك تتفضل بفتح الموضوع الجديد و تنقل مداخلتى و مداخلة أختنا فيروز (بعد إذن سعادتها) فيه نظرا لكونك ريس أبواب و عندك صلاحيات كتير. و بعدين سعادك تتصرف مع فكرية لإنى أنا ماقدرش عليها. fsh::

[maksoof]

واللقطه التى اذاعوها لهذه البلد كان فيها طفل صغير مستند للحائط والى جانبه فار صغير !! والولد قاعد ببساطه ومش حاسس ان فيه حاجه غريبه !!  mf-: اللقطه دى فعلا كانت بتستفزنى ومش فاهمه ايه الهدف منها !! بس كانت تترك لدى انطباع سيئ جدا .. وليس معنى هذا انى ماباشوفش فيران و عرس فى مصر المحروسه لكن مش ممكن هاشوف اعلان فيه فار متعايش سلميا مع اهل البلد و اشعر بالاطمئنان اليها !!  :D

معقول الكلام ده؟

فار؟

فى الهند؟ :lol:

طيب شوفى كدة الصورة دى

[maksoof]

لكن مش ملاحظ  انك قيمت و حكمت على  دوله كامله بحجم الهند بناء على مجموعه بسيطه تعاملت انت معها، و ليس فى وطنهم الأم؟ انا بينى و بينك بأتجنب التقييمات اللى بالطريقه دى، لأنه ممكن جدا مجموعه هنديه يتواجدوا فى القاهرة لفترة و يروا ما يروا من "الفضائح"، فأنا فى هذه الحاله سوف أرفض تماما عند عودتهم أن يكون هذا هو تقييمهم لبلدنا "كاملا"

كلامك سليم 100%

بس إنطباعى عن الهند له أسباب تانية كتير- يمكن جزء منها تجارب شخصية- يعنى كل بلد فيها الكويس و اللى مش ولا بد و لكنى ما قيمتش الصين مثلا أو أمريكا أو أى بلد تانية بناء على ذلك و لو جاتلى فرصة إنى أزورهم حاروح بدون تردد.

و على فكرة أنا عرفت 3 أو 4 أشخاص هنا من الهند و كانوا ناس ممتازين mf-:

المهم إنك أنت ما زعلتش لإن دى الحاجة اللى كانت حتزعلنى أنا :D