فيها ايه لو يلغوا المدارس في مصر ؟ ؟

[doha]

زي ماهو واضح من العنوان ..

ده سؤال بيتبادر لذهني كتير في كل مرة اقرأ عن او حتى افكر في حاجه تخص التعليم في مصر ..

دلوقت احنا بنعمل بالمدارس ايه ؟

وايه لزومه اجبار الطلبة على الحضور والكل عارف انهم مش هيحضروا ..

هل هي بمثابة سوق تعارف مثلا مابين المدرسين وزباينهم من طلبة الدروس الخصوصية ؟ طيب مانترك المهمه دي لمنتديات النت ولا حتى نخليها رسمي ونعترف بالاعلانات الي من النوع ده في الجرائد المتخصصة ..

هل هي لضمان جوده العملية التعليمية ؟

هي فين العملية دي اصلا عشان نبحث لها عن جوده من عدمه ..

في رايي المدارس بقت تضييع وقت واستنزاف طاقات وفلوس .. وعلى هذا بفكر دائما ليه متتلغيش فكرة المدارس او على اسوأ الظروف تبقى حاجه اختيارية يعني الي عاوز يدخل عياله مدارس يدخل والي مش عاوز ممكن يكتفي بمجاميع التقوية وتتعمم فكرة سنتر الدروس الخصوصية وتتلغى بقى الشروط التعجيزية الي الحكومه حطاها لافتتاح مدارس جديده من ان المبنى مساحته لازم تبقى على الاقل كذا في كذا ومداخله كذا وكذا عشان يحصل على ترخيص والي كلنا عارفين السبب في وضع الشروط دي وانها مش لضمان الجوده زي ماهو معلن بقدر ماهو حماية الي نجح فعلا في الحصول على الترخيص بطريقته من ان يكون له منافسين جدد في نفس المجال ..

الطلبة تذاكر باي طريقة هي تحبها سواء اهاليهم يذاكروا لهم او بالمدرسين الخصوصيين الي وجودهم اصبح واقع لا يمكن انكاره وفي النهاية الكل يمتحن آخر السنة وخلاص في اماكن تعد لهذا الغرض وتبقى وظيفة الوزارة بس وضع المناهج والتاكد من اجتياز الطالب الامتحان والسلام ؟

انتم ايه رايكم .. وتفتكروا لو اتلغت المدارس ايه البديل او البدائل المناسبة ؟ ولو شايفين انها متتلغيش فايه اسبابكم للاخذ بالرأي ده ؟

اترك لكم التعليق ..

[عاشق الترحال]

إن جيتي للحق يا ضحى المدارس مبتعلمش حاجه الوقتى وخصوصا الحكوميه منها

والطلبه كده كده بتروح المدرسه يا إما علشان تقضيها مع بعض وضحك ولعب أو علشان تخلع وتزوغ من بره بره وتلاقي وقت الصبح تتفك فيه بسجارتين او يروحوا النت ولا يزوغوا عالسيما ( ولا دي قديمه ) المهم بيصيعوا فترة الصبحيه يعني.

وللأمانه فيه بعض المدرسين اللي عندهم ضمير وبيخافوا ربنا وبيشرحوا في الفصل بس الوقتي للأسف نسبة كبيره من الطلبه إن مكنش كلهم بيعتمدوا عالدروس الخصوصيه فبينفضوا للمدرس ومبيهتموش بشرحه إن شرح أو مشرحش لأنهم معتمدين عاللي هيخدوه في الحصه بتاع الدرس الخصوصي .

بس هل إلغاء المدارس ده حل ؟ أعتقد لأ وألف لا .

الأولى أننا نعيد ترتيب أوراقنا ونشوف الخلل فين ونصلح العمليه التعليميه من جذورها لأن ملناش طريق للأمام بدون التعليم .

الأجيال اللي طالعه نسبه كبيره منها متدمره اللي المفروض أنها في يوم من الأيام هتبقى وزراء ومحافظين وقاده للبلد

حد يقولي بقى هيبقى ساعتها شكلنا أيه ولا وضعنا فين ولا إزاي ولا أي حاجه ؟

تم تعديل 13 يناير 2010 بواسطة عاشق الترحال

[أسد]

مفايهاش حاجة أبداً ..

الأحوال ستتدهور أكثر وأكثر ..

وسيتخلف المجتمع أكثر وأكثر ..

وحتى النواية التي تسند الزير ... سنزيلها ..

ويطيح الزير وينكسر ..

طبعاً إقتراح غير مقبول بالمرة ..

ومجرد التفكير فيه - مع إحترامي ولا أقصد به الفاضلة ضحى - هو نوع من الهلوسة .. أرى أنه من المواجب حتى عدم مجاراتها أو مناقشتها ..

التفكير في إصلاح التعليم .. وتطويره والمطالبة به .. أكثر سهولة مما تطرحينه ياسيدتي

بكثير جداً ..

[joo]

مفايهاش حاجة أبداً ..

الأحوال ستتدهور أكثر وأكثر ..

وسيتخلف المجتمع أكثر وأكثر ..

وحتى النواية التي تسند الزير ... سنزيلها ..

ويطيح الزير وينكسر ..

طبعاً إقتراح غير مقبول بالمرة ..

ومجرد التفكير فيه - مع إحترامي ولا أقصد به الفاضلة ضحى - هو نوع من الهلوسة .. أرى أنه من المواجب حتى عدم مجاراتها أو مناقشتها ..

التفكير في إصلاح التعليم .. وتطويره والمطالبة به .. أكثر سهولة مما تطرحينه ياسيدتي

بكثير جداً ..

أوئيدك مسيو

[التونسى]

انا مع الارتداد للنظام التعليمى ما قبل الثوره ,, مع بعض التعديلات التى تواكب عصرنا الحديث

انا شايف ان التعليم لازم يكون الزامى ومجانى فى مرحلة الابتدائيه .. عشان محو الاميه .. واللى عايز يكمل بعد كده يبقى بمصروفات .. مع استثناء المتفوقين والنوابغ والعباقره الغير قادرين من مصاريف التعليم عبر ما يسمى بالمنح الدراسيه

لكن الغاء التعليم نوهائى .. طبعا دى فكره مغاليه كثيرا .. المريض عيان اوى اه ..وممكن يكون بيحتضر .. لكن الحل مش اننا نموته .. لكن نحاول نطببه .. وكله على الله

[Diab]

عندك حق والله ياضحي

يعني هي كانت ليها لازمة

نعمل زي ما أبناء الملوك زمان ما كانوا بيعملوا في قصص الف ليلة وليلة

يجيبوا مدرسيين خصوصيين في البيت

يتعلم الفرد منا الشعر والحكمة والتاريخ واللغة

وأهي وفر برضه

احسن من الواحد يصرف ع المدرسة برضه يصرف علي المدرسين

ههههه

تم تعديل 13 يناير 2010 بواسطة Diab

[tantrum]

التعليم أو تحديدا المدرسة فى مصر أو فى معظم بلدان العالم العربى لا تزيد عن كونها وسيلة لتنمية المهارات الإجتماعية للتلاميذ و الطلاب

ووسيلة لإحتضان الأبناء لحين عودة الأم من العمل

و من يريد أن يقنعنى بغير ذلك فليبرر لى لماذا يتجه 100 % تقريبا من الطلاب و التلاميذ إلى الدروس الخصوصية.

[doha]

بقالي كام يوم في مصر المحروسه ..

في نقاش عابر مع احدى قريباتي كانت بتشتكي لي من الوضع الي وصل له التعليم في مصر .. للامانة هي مكانتش بتشتكي بمعنى الشكوى وانما كانت ( بتحكي ) عن الي حاصل مع ابنائها والي انقله لكم بالحرف ...

الابناء في مرحلة التعليم الابتدائي والكيجي وكلهم في مدارس خاصة ( البنات نوتردام ـ الاولاد فورير ) .

الدراسة ثلاث ايام في الاسبوع فقط على اساس تخفيف الضغط على الفصول نتيجة لظروف الانفلونزا ..

على كلامها الابناء مش بتتعلم شيء نهائيا في الثلاث ايام الي بيروحوهم دول وبناء عليه قررت تدخلهم ( سنتر ) دروس خصوصية ..

راحوا السنتر ..

اكتشفت ان المدرس الي فيه كل مهمته انه ( يرص ) لهم صفحه او صفحتين كلمات جديده ويطلب منهم حفظ الصفحتين دول وخلاص على كده .

طلعتهم من السنتر ..

والعيال طبعا بتروح المدرسة يوم ويوم وزي ماراحوا زي مارجم ..

كانت بتقول لا في تعليم في المدرسة الي اصلا معادتش موجوده .. ولا في تعليم في السنتر الي معتمد على مدرسين لسه متخرجين عمرهم مادرسوا لطالب من اساسه وملقيوش مدرسة يتعينوا فيها فراحوا السنتر ده .. ولا تعليم في البيت على اساس انها هي ووالدهم مشغولين بلقمة العيش وازاي يجيبوا فلوس تغطي مصاريف المدرسة الي اصلا ملهاش وجود .. كل ده وهي لا تنكر ان مدرستهم دي هي الافضل فمابالك لو كانت حكومية ؟؟

بهدي القصة دي لمن يعتبر ان مناقشة الغاء المدارس في مصر هلوسة ( ايون قصدي عليك يااستاذ اسد )

في البداية كنت طارحه الموضوع من قبيل ( الفانتازيا ) او حتى التفكير بصوت عالي .. مكنتش متخيلة ان في امكانية لتطبيقه على ارض الواقع لكن لما قرأت تعليق الاستاذ اسد تاكدت ان للاسف شكلها كده ملهاش حل تاني غير الغاء المدارس فان كان البديل هو اصلاح حال التعليم الي مش هينصلح يبقى موت يامش عارف ايه على مايفكروا يصلحوه ..

هتلاقي الناس الي عايشه بره مصر شايفه ان بلا كلام فاضي نصلح التعليم احسن .. اما الي في داخل مصر لو قلت لهم نلغي المدارس هيضحكوا ببساطه لان مفيش اصلا مدرسة عشان تتلغي ..

ولاعزاء للتلميذ المصري وولي امره الي ارتكب غلطه عمره لما فكر يخلفه ..

[Simba]

يا سلام علي الافكار

من زمان نغمة نرتقي بالتعليم وطبعا لا فيه ارتقاء ولا حاجة بس معني الالغاء ايه

مفيش اطباء

مفيش محامين

مفيش مهندسين

مفيش مدرسين

مفيش تمريض

مفيش حاجة ولا حد خالص .. طيب فيه دولة لغت المدارس اظن مستحيل

[doha]

يا سلام علي الافكار

من زمان نغمة نرتقي بالتعليم وطبعا لا فيه ارتقاء ولا حاجة بس معني الالغاء ايه

مفيش اطباء

مفيش محامين

مفيش مهندسين

مفيش مدرسين

مفيش تمريض

مفيش حاجة ولا حد خالص .. طيب فيه دولة لغت المدارس اظن مستحيل

يبقى معنى كده ان بعد 12 سنة تقريبا من دلوقت وهو العمر الزمني لتخرج التلميذ من ( المدرسة ) مش هيبقى في لا اطباء ولا مدرسين ولا ولا ولا ..

لان فعليا للاسف مفيش مدارس .. هي حاجه الاولاد بتقضي فيها كام ساعه كل يوم عشان الام تلقى وقت تشوف شغلها ..

يعني الناس ( بتيجي على نفسها ) وتدبر مصاريف المدارس الخاصه بطلوع الروح زي مابيقولوا ثم يكتشفوا ان مفيش تعليم في المدرسة من اساسه ونتيجه للظروف الاقتصادية المعروفه بيبقى من الصعب ان الناس دي تدور لعيالها على مدرسين اكفاء او مراكز تدريب لها سمعتها تعوض الي كان المفروض يتاخذ في المدرسة . فيها ايه لو تتلغي المدارس دي او تبقى حاجه اختياري وبدال ما يحطوا فلوسهم في عملية ( زيارة ) يوميه او يوم يوم لمبنى المدرسة بدون فائده تذكر تنحط الفلوس دي في تعليم بجد ؟

سؤالي كان ومازال .. فيها ايه لو يتلغي التعليم ( النظامي ) ويستبدل بمنهج واضح ينحط من الوزارة والاهالي تدرسه لابنائها باي طريقة كانت ..سواء بقى يودوهم دروس خصوصيه او يذاكروا لهم في البيت يعملوا الي يعملوه المهم ان يبقى دور الوزارة وضع المنهج والاشراف على الامتحان وخلاص على كده .. حاجه بالظبط زي نظام شهاده ميكروسوفت كده او الرخصة الدولية للحاسب .. تقدر تاخذ فيها كورس او تقدر تذاكرها لوحدك المهم انك تعرف تجتاز الامتحان وخلاص ..

على فكره .. انا شبه متاكده ان الوضع هيبقى كده في مصر في المستقبل القريب .. اصل تقريبا مفيش حل تاني .. ربنا يستر

تم تعديل 25 يناير 2010 بواسطة doha

[justme]

حضرتك فكرتيني ببرنامج تحقيق محصلش

وكان ليهم حركة جامدة فعلا وقالوا لو لغينا مكتب التنسيق

واللي حضرتك بتقوليه زيه تمام

انا رأيي ان الحل اننا نعمل نظام جديد بموازة القديم وننتقل تدريجيا اليه بس نفصل ما بين الكوادر وننتخب فقطك المتميزين من الكادر الحالي بناء على الكفائة

واسمحيلي بقى من وجه نظري المتخصصة لأن ده مجالي اقولك ان كلامك

سليم ميه في الميه بخصوص ان الوضع الحالي استنزاف طاقة بس

اه والله دى هبل مش تعليم

احنا بنركز على هيكل النظام وبننسنا قلبه وجوهره اللي هو الفايدة

كل الناس بتدور على اسم مهندس لكن ابصملكم بالعشرة واتحدى خريج كلية عملية او نظرية انوا يطلع من الجامعة ويشتغل كده ويطلع متميز من غير تدريب من اول وجديد

والدليل ان كتير مننا لا يعمل بدراسته اطلاقا

انا على سبيل المثال لا الحصر علشان متقولوش بافترض

كمل اللي درسته في مصر عن التعليم كوم

واكتشفت ان الحقيقة كوم تاني

يعني من الاخر انا مكنتش مؤهل اني اكون مدرس اللي نفعني هو اني بحب التخصص واجتهدت فيه مني لنفسي

واللي اتعلمته في الجامعة ميخلنيش افتح سايبر حتى

بس المهم كلامنا ده يبقى كلام ولا خطوات نحو الاصلاح

سلام

[justme]

التعليم أو تحديدا المدرسة فى مصر أو فى معظم بلدان العالم العربى لا تزيد عن كونها وسيلة لتنمية المهارات الإجتماعية للتلاميذ و الطلاب

ووسيلة لإحتضان الأبناء لحين عودة الأم من العمل

و من يريد أن يقنعنى بغير ذلك فليبرر لى لماذا يتجه 100 % تقريبا من الطلاب و التلاميذ إلى الدروس الخصوصية.

عزيزي tantrum

الدروس الخصوصية حل فقط لمجرد اجتياز مرحلة التقييم وليست بغرض التعليم

يعني من الاخر طريق لكلية مش لعلم

حتى الانظمة الغربية فيهها مشاكل ولكن لسه هما ارحم مننا

ومشكلة التعليم انوا المجال الذي لا يجتذب العقول

لأن النوابغ بتروح الفيزياء والكيمياء لكن القليل منها يتخصص في التعليم

وبعدين سعادتك الدكاترة اللي بيدرسوا كلهم بيبقى خبراتهم اكاديمية مش عملية فبالتالي فاقد الشيء لا يعطيه

احنا عايزين تعليم مناسب للبيئة

[sarmar]

قطة نظام من فضلكم

لاتتخيلوا ان كل المصريين مستواهم المادى يستطيع المقدرة على مصاريف المدارس الحكومية تتخيلوا فى مرة من المرات كنت ازور احد المعارف هو ليس قريب ولكن تربطنى بالرجل علاقة عمل

وهذا الرجل عامل ارزقى على باب الله يوم فية وعشرة مافى وكانت الزيارة شبة عائلية حتى زوجتة كانت بتيجى مثل هذة الايام فى الارياف بيزداد السمك الصغير ( بساريا ) كانت تروح تشترى وتعبى كميات كبيرة وهى ساكنة فى القاهرة وتخزنها مملحة فى البيت وبيكون هذا هو غذاؤهم تقريبا طول العام او موسم الليمون تحتفظ باكثر كمية مملحة ويكون غذاء بديل للاولاد حتى لايملوا من حياتهم ويكون عندهم تنوع اما الغرفى التى كانوا يسكنوا فيها فكانت دور ارضى اقل من مستوى ارض الشارع بمتر ونصف

الحقايب المدرسية هى جوال من البلاستيك اللى بيعبوة ارز مصروفهم اليومى 5 قروش ( المندثرة ) هذا فى احسن الاحوال

كفاية كدة

ابنهم الكبير كلية هندسة الصف الثالث البنت التالية وجدتها تبكى وسالتها لماذ البكاء عرفت انها مهددة ان والديها يمنعوها من الذهاب للمدرسة لانهم ليس معهم المقدرة على سداد مصاريف المدرسة ( البنت فى الصف الثانى ثانوى عام )

اية رايكم نلغى المدارس ولا نخليها ؟؟؟ الله يخليكم انتم خللو المدارس للناس الغلابة وانتم الغوا مدارس اللى عمرنا ماعرفناها صحيح مافيش فيها فيل لكن الدودة الموجودة احسن من عدم وجودها لبعض الناس اللى ممكن نكون منهم

[amy]

قطة نظام من فضلكم

لاتتخيلوا ان كل المصريين مستواهم المادى يستطيع المقدرة على مصاريف المدارس الحكومية تتخيلوا فى مرة من المرات كنت ازور احد المعارف هو ليس قريب ولكن تربطنى بالرجل علاقة عمل

وهذا الرجل عامل ارزقى على باب الله يوم فية وعشرة مافى وكانت الزيارة شبة عائلية حتى زوجتة كانت بتيجى مثل هذة الايام فى الارياف بيزداد السمك الصغير ( بساريا ) كانت تروح تشترى وتعبى كميات كبيرة وهى ساكنة فى القاهرة وتخزنها مملحة فى البيت وبيكون هذا هو غذاؤهم تقريبا طول العام او موسم الليمون تحتفظ باكثر كمية مملحة ويكون غذاء بديل للاولاد حتى لايملوا من حياتهم ويكون عندهم تنوع اما الغرفى التى كانوا يسكنوا فيها فكانت دور ارضى اقل من مستوى ارض الشارع بمتر ونصف

الحقايب المدرسية هى جوال من البلاستيك اللى بيعبوة ارز مصروفهم اليومى 5 قروش ( المندثرة ) هذا فى احسن الاحوال

كفاية كدة

ابنهم الكبير كلية هندسة الصف الثالث البنت التالية وجدتها تبكى وسالتها لماذ البكاء عرفت انها مهددة ان والديها يمنعوها من الذهاب للمدرسة لانهم ليس معهم المقدرة على سداد مصاريف المدرسة ( البنت فى الصف الثانى ثانوى عام )

اية رايكم نلغى المدارس ولا نخليها ؟؟؟ الله يخليكم انتم خللو المدارس للناس الغلابة وانتم الغوا مدارس اللى عمرنا ماعرفناها صحيح مافيش فيها فيل لكن الدودة الموجودة احسن من عدم وجودها لبعض الناس اللى ممكن نكون منهم

[OReX]

يبقى اخر مسمار فى نعش التعليم بجد ومفيش اى امل ان مصر ترجع تانى

بدل ما نلغى المدارس ونخلى الجامعات بفلوس ما نفكر فى حلول ليه

واشارك الرأيين السابقين وعلى فكرة انا فى فترة معينة لو كان التعليم بفلوس كنت سبت كلية حاسبات ومعلومات لنفس السبب اينعم انى مش راضى عنها نهائى بس لا اتخيل حياتى من غير شهادة جامعية

[عبير يونس]

يا جماعة في حاجة اسمها " هوم سكول" و دي معترف بيها في أمريكا و كندا

يعني الطالب يقعد في البيت و يذاكر مناهج و يمتحن فيها

عن بعد عن طريق النت

أو المراسلة

و ده كان النظام زمان في أوروبا

ان الطالب يتعلم في بيته لحد المرحلة الجامعية

المدارس اتعملت مش بس عشان تدريس مناهج و عمل امتحانات

المفروض انها بيئة تعليمية اجتماعية يختلط فيها الطلبة ببعضهم لتكوين روابط اجتماعية من زمالة و صداقة

ولتنمية العمل الجماعي و روح الفريق

وهو ده الهدف المنشود

لكن طبعا ما بيتحققش بالبساطة دي

قصاده بيكتسب الطلبة سلوكيات سلبية كتير

و ربما اجرامية!!!

و طبعا في مجتمعات زي كندا و أمريكا و ما فيها من تعددية ثقافية

وجدوا ان التعليم المنزلي بقى أحسن

عشان ابناءهم يبعدوا عن السلبيات دي

الموضوع في مصر معقد و متشابك

و اذا كان في ناس تقدر تتماشى مع مفهوم التعليم المنزلي

فأكيد في شرايح كتير يمكن ما تقدرش

لأسباب كتير

ممكن مادية

و ممكن لأنهم محتاجين حياة اجتماعية لأبناءهم

و يمكن لأنهم فعلا عايزين مكان يطمنوا في على ولادهم و همة في شغلهم

يعني هي فكرة التعليم المنزلي فكرة جميلة و أكيد حتناسب ناس كتير

بس برضه لازم يبقى في مدارس تناسب الناس التانية اللي مش مناسب ليها التعليم المنزلي

بس أكيد وجود هذا النوع من التعليم حيخف كتير من الضغط على المدارس