طنط سميحة

[عنبو]

انا قصتى مميزة شوية - بس اضمن الجميع يقروها

وهى قصة مؤثرة -

وليها معانى كتير - وفيها مفاجأه كمان

بس ازاى اضمن انكم حتقروها - وهى مهم ان كل مسيحي ومسلم يقرا القصة بتاعتى دي

مع انى بحاول انساها - بجد - بس فكرتونى بيها - ومش عاوزة حد يعيط

قوووووول ياعم خلينا نقرأ

وانا اوعدك انى اقراها فى اليوم تلات مرات

[fatfouta]

انا قصتى مميزة شوية - بس اضمن الجميع يقروها

وهى قصة مؤثرة -

وليها معانى كتير - وفيها مفاجأه كمان

بس ازاى اضمن انكم حتقروها - وهى مهم ان كل مسيحي ومسلم يقرا القصة بتاعتى دي

مع انى بحاول انساها - بجد - بس فكرتونى بيها - ومش عاوزة حد يعيط

قولى وانا اعرف اذاى اجيبهملك كلهم هنا يقروها

قولى ياللا يا بنتى........قولى قولى

[اغابي]

كنا واحنا صغيرين انا واختى واخويا ماما تجمعنا باليل قبل ما ننام وتحكيلنا كل يوم حدوتة قبل النوم واحنا نشرنا الخبر وسط جيرانا وكان لينا جيران اصدقائنا جدا – ولدين وبنت – ونتجمع احنا الستة حواليها كل ليلة علشان ماما تحكيلنا حدوتة واعمارنا بالتقارب كده - 5 -8 - 9- سنين المهم التلات اطفال جيرانا دول اخوات - االوسط اللى فيهم اسمه ايمن – بس هما 5 اخوات اصلا بس اتنين كبار – وكان اكتر واحد بيخاف لو القصة فيها غوريلا او الست الخطافة اللى شعرها منكوش فى القصة برضوه - يروح يطلب من ماما لا يا خالتى ما تحكيش بخاف – ونفضل نتنطط حواليه الخواف اهو ونغيظه – شغل اطفال بقي – تروح ماما تغير القصة علشان خاطر ايمن باشا – وكنا الصبح نروح المدرسة مع بعض – تحس طول الايام والسنين ما يعديش يوم ما نشوفش بعضنا - وكانت بتحصل مواقف عادية زى اللى بين كل الجيران - لما الانبوبة تخلص نروح عندهم وفى العيد خبيز العيد عندهم – والاولاد يشيلو معانا صواني الخبيز ونمسح العمارة فى الاعياد مع بعض نفرح بالعيد اى عيد نتلم ونهيص – كنا حلويين بشكل لا يوصف – صدقونى من كتر المحبة اللى كانت بينا كلنا والجيران اللى حوالينا كنا بحس انها اجمل ايام ومامتهم الاولاد دول كانت طيبة وباباهم كان طيب جدا جدا – مفيش احنا مسلمين وانتم مسيحين – مفيش الكلام الغريب بتاع اليومين دول – لما اخو ايمن الاصغر سقط فى ثانوية عامة وقفنا فرحتنا رغم انى كنت نجحت لكن مراعاه لمشاعرهم لانه كان معايا فى ثانوية عامة

الواحد عمال يسمع عن احداث نجع حمادي

وبما انى من نجع حمادى كان جوايا الم وزعل وحسيت ان النفوس اتغيرت ... اوى ... اوى ... ايه جرا ... طب ما طول حياتنا مع المسلمين اخوات .... زي الفل .... مين زرع الكراهية دي .... وفضلت اسال نفسي هو انا بعيد عن نجع حمادي بقالى كتير؟؟ ومعقول بالشكل داه الناس اتغيرت – وكنت بابكى على المسيحين اللى ماتوا وصعبوا على اوى وبما انى مسيحية بقي ... فمتأثرة اوى اوى باللى حصل –

اكملكم - انا معايا اخويا هنا فى الكويت اتصل عليا فى التلفون فى وقت احداث نجع حمادي - كلمنى بيقولى سمعتى باللى حصل فى نجع حمادي دا الدنيا مقلوبة – قولتله طبعا داه كان عيد نكد علينا وحرقة دم مفيش حد احتفل بالعيد – ووقتها كانت المشاعر جوايا متضاربه وافكار وحاجات كتير متلخبطة – صدقونى داه الكلام اللى قالهولى اخويا فى التلفون وربنا شاهد على –

بيقولى ايه –

طيب اسالك سؤال انت زعلتى اوى على المسيحين اللى ماتوا ؟ – قولتله طبعا – راح قالى طب زعلتى على الشرطى المسلم اللى مات معاهم – قولتله لا ؟ وانا برد بعصبيه جدا فى السؤوال داه بالذات بقي – راح قالى طيب اقولك هو مين بس اوعى تبكي- وامسكي اعصابك لانى انا شخصيا بكيت عليه – عارفة هو مين – قولتله هو مين يعنى خلص – راح قالى ايمن حامد ابن خالتى ام جمال– ابقي اتصلى عزى ماما لانها عماله تبكي عليه – انا لسة متصل بنجع حمادي من ربع ساعة

انا قفلت التليفون وكان الخبر صاعقة على راسي - طخخخ – اكيد ربنا ليه حكمة من كدا – الليل كله سيبت المسيحيين وابكي على ايمن – انا بكيت على المسيحين ال6 لانهم صعبو عليا زى اى مسيحية وهما فرحانين بالعيد خارجين يعيدو من الكنيسة وايه الظلم داه لكن معرفة شخصية بيهم ما اعرفهمش – لكن بكيت على ايمن لاننا متربيين فى بيت واحد طووول حياتنا حتى مراته كانو جابوها فى قناه المحور على فكرة كانت بنت عمه - وهي وصغيره بتلعب معانا وانا عارفاها كويس – وهما قالوا عمرايمن 28 سنة لا دا غلط لانه من سن اختى الكبيرة وكانو فى فصل واحد وهى عمرها 35 سنة يبقي ايمن 35 سنة برضوه – وكمان ايمن بيحب المسيحيين اوى اوى بجد

المهم انا فعلا اتصلت بماما وقولتلها الباقيه فى حياتك يا ماما فى ايمن وماما بكت فى التلفون وقالتلى منهم لله اهو سايب 3 عيال فى رقبته اتيتيمه وغلبان – داه انا اللى مربياه من هو وعمره يوم – داه اتولد على ايدي لغايه ماحضرت فرحه - داه لسة مقابلنى الاسبوع اللى فات فى الشارع وقالى عاوزة اى حاجة يا خالتى اجيبهالك – منهم لله وفضلت ماما فى التلفون تتكلم كلام كتير عنه بهلوسة – اد ايه فيه حب جوانا – ( ام جمال الله يرحمها – ام ايمن يعنى - كانت نموذج محبه وعمري وانا فى حضنها ما كنت اعرف انها مسلمة وعمرى وانا فى حضنها ما كنت اعرف يعنى ايه مسلم ومسيحي )

اما بالنسبة لما نحب حد نهدية للنور – عاوزة اقول اللى حوليك ما دام فيه محبة فيه نور لكن الضلمة بتيجي من الكراهية – عمر ما حاقنع حد يغير دينه بحجة انى انا اللى على نور وحق وانت لاء ... ولازم اهديك ... داه كلام مرفوض رفضا باتا وغلط .....

الضلمة والكفر فى القلب الاسود اللى مليان كراهية اما القلب اللى فيه محبة فيه نور – ايمن كان نموذج مثالى وعشرة سنين العمر كله كان قلبه فيه محبة – وانا كمان قلبي فيه محبة لانى افتكرته وحكيت عنه فى كل مكان ..

اسفة طولت عليكم وانتم قلبتو عليا المواجع

[حنين الوطن]

انا اسفه لانى ما سمعتش كلامك وعيطت.....صعب ان حد يقدر يمسك دموعه !!!تخيلى لولا انى حسيت قد ايه انتى صادقه فى كلامك كنت قلت انها قصه من وحى خيالك زى اللى بتحصل فى السينما!!!لكن قد ايه انتى صادقه حتى وانتى بتحكى عن ردك على اخوكى وانتى بتقولى له لا مش زعلانه على المسلم........لكن علشان عرفتيه واتربيتى معاه ..بكيتى عليه

هوه ده يا اخونا اللى عايزين نقوله لازم نحس ببعض احنا نسيج واحد بنعيش على ارض واحده وبنشرب ميه واحده وبتظللنا سماء واحده ورسولنا اتجوز قبطيه والاسلام مش كده الاسلام زى ما انتى قولتى بالظبط مش بيجبر حد انه يخش فيه والرسول قال لكم دينكم ولى دينى....اه ..لو تعرفى احنا بنحب المسيح قد ايه؟؟والعدرا مريم اطهر نساء الارض ...اه لو تعرفى قد ايه ببكى وقت اما اقرا سوره مريم فى القران وهى بتولد وحيده تحت نخله وبتقول "يا ليتنى مت قبل هذا"وهى مش عارفه تقول لاهلها ايه وهما بيتهموها فى شرفها وهى الشريفه الطاهره النقيه الورعه التى كلما دخل عليها زكريا المحراب وجد عندها رزقا...وكان يستغرب ويقولها كيف لك هذا؟؟كانت ترد وتقول هو من عند ربى انه كان بى حفيا ......يعنى كان الله يكرمها ويحتفى بها ويرسل لها طعاما من الجنه ..*******.كل ده واكثر فى القران احنا اتربينا على اننا نحترم الدين المسيحى *******فين اصحاب العقول ؟؟اليس منكم رجلا رشيد؟؟؟

الله عليكى قد ايه انتى رائعه وصادقه وحساسه زى مامتك الست الجميله اللى من الزمن الجميل اللى بتبكى جارها وشايله هم اولاده الثلاثه بصرف النظر عن دينه والله انه شعور متبادل والله على ما اقول شهيد

قبلاتى

تم تعديل 16 مارس 2010 بواسطة Folana

[لماضة مصرية جدا]

السلام عليكم و رحمة الله و بركاته

أغااااااابي و حنين الوطن.....

مش تزعلوا مني....انا مش عيطت

الاحساس ده نعمة.........ده خير ان احنا لسه بوصلة مشاعرنا البرة بتاعتها متلخبطتش

ليه لما يبقي عندنا نموذج حلو اوي كده نعيط......ليه منخلهوش شمعة تنور لينا و لولادنا الطريق......

حقيقي يمكن زعلت علي ايمن....

لكن زمان كنت بسمع عبارة....."فيه ناس ولاد موت".....و مكنتش بفهم معناه......و لما فهمت معناها...

بقيت اقول فيه ناس بتعيش و تموت من غير ما حد يفتكرها

و فيه ناس بتعيش و تسيبنا شوية....بس هتفضل عايشة في حكايتنا...لانها بتصحي احلي احساس فينا...ان احنا كنا في يوم بني آدميين أوي......بنعرف نحس اوي....مش ده اللي ربنا خلقنا عليه.....مهما اختلفت طريقة محبتنا ليه

بلاش مساحات الدمع.........

خلينا نعملها مساحة نتنفس فيه حب الحياة........حب ربنا بطريقتنا الخاصة

خليها تكون طاقة تخش مسامنا.....

تقوينا....

ان احنا هنقدر نميز الزيف من الصواب...هنقدر نقاوم طوفان المشاعر الملوثة بثاني اكسيد الكراهية...

خلينا نمسك علي حاحات حلوة فينا و نتبت فيها اوي......من غير دموع

دي لحظة ولادة.......احساس....احتفلوا بيها

صباااااااااحكم يقين لا ينتهي....ان لسه فيه خير و خير اوي

[لونا]

أنا الحقيق ما قدرتش أمنع دموعي

يمكن فرح إن الروح دي لسه موجودة

و يمكن حزن إنها ما عادتش موجودة كتير زي الأول

بجد تحياتي ليكي

[اغابي]

حنين الوطن ولماضة مصرية ولونا

اشكركم جدا لاحساسكم الراقي واحساسكم اكتر بمشاعرى - وفهمتونى صح - لان كان ممكن اى حد جواه مش طيب يفهم كلامى اللى بين السطور غلط - لكن انتم بجد نموذج للطيبة النضيفة اوى

برضوه - انا كنت عاوزة انزل قصة ايمن فى توبيك وحده بتاريخ 12/1 - على حلقات وافتح باب حوار ومناقشات على اساس اعتبر ان دي هديه لروحه - لانه اتظلم وما اخدتش حقه لكن وقتها ما كنش مناسب احترمت مشاعر المسيحين لانها كانت مجروحة اوى ومصدومين من حادث نجع حمادي - اى كلام فى الموضوع داه فى التاريخ داه بالذات كان حيبقي مش مناسب - وياريت محدش برضوه يفهم كلامى غلط - اه المسيحين كانو مدبوحين جواهم - يمكن لو القتل ليله العيد قدام الكنيسة جه من غارة بالطيارات الاسرائيلية - كان حيبقي فيه حزن من العدو المفتري اللى قتل اولادنا ليلة العيد - لكن انه يحصل من اخواتنا اللى عايشين وسطنا هو داه الصدمة والجرح الكبير وحاجات تانى - لكن ربنا بعتلنا رسالة بسيطة انه حط ايمن وسط المسيحيين واتنقل فى عربية اسعاف واحدة ودمهم بقي واحد -

ايه حكمتك يارب دي - ايه الرسالة اللى عاوز توصلهالنا -

ايه رسالتك يارب اللى خلت واحدة مسيحية تتحول جواها مشاعر الحزن والبكا مرة واحدة من انها بدل ما تبكي مسيحيين 6 تبكي مسلم واحد بس - ايه رسالتك يارب اللى خلت واحدة مسيحية تتحول جواها مشاعر الغضب وانها عاوزة تكسر وعاوزة وعاوزة - الى انها تنسي كل داه وتفتكر المحبة وبس - ازاى يارب اتحولت 180 درجة مرة واحدة وبالسرعة دي - يا ترى دي رسالة للمحبة اللى فعلا فى قلوبنا - صحيح مشاعرنا اتلخبطط شوية لكن اكيد فيه رسالة منك لينا كشعب ولازم توصلنا .

بشكركم لاحاسيسكم الرائعة وعودة مرة اخرى للتسامح

[عنبو]

الاخت اغابى قصتك مؤثره قوى وبتبين حاجه مهمه قوى

ان الواحد المفروض يعامل الانسان على انه انسان وبس ماليس دعوه بلونه بدينه بافكاره بأى شىء كفايه انه انسان وبس

المشكله بجد هى تغيييييييييييييييييييييب العقل والجهل

ياجماعه لازم الواحد يتأكد من صحة المعلومه قبل لما يصدقها او يعمل بها

اذا طالما ربنا اعطانا عقل وكل واحد هيتحاسب لوحده وعلى عمله هو يبقى لازم انى افكر بعقلى انا مش بعقل اى شخص تانى

لازم اشوف انا رايح فين وجاى من وين

ده كلام كان لابد منه بس ياريت يتفهم صح

شكراً

تم تعديل 16 مارس 2010 بواسطة Folana

[Alshiekh]

السلام عليكم

الحقيقة موضوع جميل وشيق ويستحق القراءة لما فيه من قصص انسانية واقعية لايتم تداولها الا على نطاقات ضيقة وان كانت فى واقع الحال كثيرة جدا.

أستغرب اننى لم الاحظ هذا الموضوع على الرغم من مرور وقت طويل عليه او ربما شغلتنى مراجعة الموضوعات عن متابعته ، او ربما كالعادة ، تطغى الموضوعات الغير ذات قيمة على الموضوعات الجادة والمفيدة .

شكرة لماضة وشكرا على كل من ساهم بتجربة واعدكم باسترجاع بعضا من ذاكرتى ، هذا على الرغم من ان معظم المشاركات تعود للجنس اللطيف.

[حنين الوطن]

السلام عليكم ورحمه الله وبركاته

انا سعيده جداااا بك يا "اجابى" ...فيه ناس زيك كده وزى العزيزه جدااااااا" لماضه" جهاز الاستقبال عندهم عالى وحساس فبتوصلهم الرسايل بسرعه ولانهم شفافين قوى بيتاثروا ..وبيؤثروا فى الناس انا حاسه ان التجربه دى حولتك لانسانه اكثر عمقا فى تفكيرها واحاسيسها وبقيتى متامله ....واحنا فعلا محتاجين وقفه للتامل والتدبر وادراك حكمه ربنا زى ما انتى وصلتى لكده وانا معاكى دى رساله للحب والتسامح ونبدا صفحه جديده

دى دعوه منى للرقى ...للسمو...للترفع...لمخالفه الهوى والنفس والشيطان...لاحكام العقل

واحكى يا اجابى .....واحنا سامعينك ...ومتفاعلين معاكى......

وشكرا للماضه"لانها صاحبه الفكره"

[Folana]

هوه ده يا اخونا اللى عايزين نقوله لازم نحس ببعض احنا نسيج واحد بنعيش على ارض واحده وبنشرب ميه واحده وبتظللنا سماء واحده ورسولنا اتجوز قبطيه والاسلام مش كده الاسلام زى ما انتى قولتى بالظبط مش بيجبر حد انه يخش فيه والرسول قال لكم دينكم ولى دينى....اه ..لو تعرفى احنا بنحب المسيح قد ايه؟؟والعدرا مريم اطهر نساء الارض ...اه لو تعرفى قد ايه ببكى وقت اما اقرا سوره مريم فى القران وهى بتولد وحيده تحت نخله وبتقول "يا ليتنى مت قبل هذا"وهى مش عارفه تقول لاهلها ايه وهما بيتهموها فى شرفها وهى الشريفه الطاهره النقيه الورعه التى كلما دخل عليها زكريا المحراب وجد عندها رزقا...وكان يستغرب ويقولها كيف لك هذا؟؟؟ ه؟كانت ترد وتقول هو من عند ربى انه كان بى حفيا ......يعنى كان الله يكرمها ويحتفى بها ويرسل لها طعاما من الجنه ..لم يفعل ذلك سبحانه وتعالى مع الانبياء!!.كل ده واكثر فى القران احنا اتربينا على اننا نحترم الدين المسيحى *******فين اصحاب العقول ؟؟اليس منكم رجلا رشيد؟؟؟

قبلاتى :)

السلام عليكم ورحمة الله...

الأخت الفاضلة "حنين للوطن"....أشكر لك احساسك الراقى وحرصك على إظهار مشاعرك النبيلة....ولكن اذا سمحت لى....

عند ذكر أيات القرآن الكريم يجب علينا تحرى الدقة ونقلها من مواقع خاصة حتى لا نقع فى خطأ تبديل كلمات الله...

قال لها زكريا يامريم أنى لك هذا ..وليس " كيف لك هذا"

قالت مريم :"هو من عند الله .....

ولم تقول :هو من عند ربى انه كان بى حفيا

يقول الله سبحانه وتعالى فى سورة مريم :

"

فَتَقَبَّلَهَا رَبُّهَا بِقَبُولٍ حَسَنٍ وَأَنبَتَهَا نَبَاتًا حَسَنًا وَكَفَّلَهَا زَكَرِيَّا كُلَّمَا دَخَلَ عَلَيْهَا زَكَرِيَّا الْمِحْرَابَ وَجَدَ عِندَهَا رِزْقًا قَالَ يَا مَرْيَمُ أَنَّى لَكِ هَذَا قَالَتْ هُوَ مِنْ عِندِ اللَّهِ إِنَّ اللَّهَ يَرْزُقُ مَن يَشَاء بِغَيْرِ حِسَابٍ

ويقول جل جلاله فى سورة مريم ولكن على لسان ابراهيم عليه الصلاة والسلام :

قال سلام عليك سأستغفر لك ربي إنه كان بي حفيا ( 47 ) وأعتزلكم وما تدعون من دون الله وأدعو ربي عسى ألا أكون بدعاء ربي شقيا ( 48 ) )

نرجو الحرص على نقل الايات القرآنية نقلا صحيحا....كما نرجو من الاخوة المتابعين من الاعضاء أن يهتموا ولو قليلا بمراجعة الايات القرآنية بدلا من الاهتمام بالمشاحنات وبما هو أقل أهمية...

شاكرين تفهمكم

تم تعديل 16 مارس 2010 بواسطة Folana

[حنين الوطن]

هوه ده يا اخونا اللى عايزين نقوله لازم نحس ببعض احنا نسيج واحد بنعيش على ارض واحده وبنشرب ميه واحده وبتظللنا سماء واحده ورسولنا اتجوز قبطيه والاسلام مش كده الاسلام زى ما انتى قولتى بالظبط مش بيجبر حد انه يخش فيه والرسول قال لكم دينكم ولى دينى....اه ..لو تعرفى احنا بنحب المسيح قد ايه؟؟والعدرا مريم اطهر نساء الارض ...اه لو تعرفى قد ايه ببكى وقت اما اقرا سوره مريم فى القران وهى بتولد وحيده تحت نخله وبتقول "يا ليتنى مت قبل هذا"وهى مش عارفه تقول لاهلها ايه وهما بيتهموها فى شرفها وهى الشريفه الطاهره النقيه الورعه التى كلما دخل عليها زكريا المحراب وجد عندها رزقا...وكان يستغرب ويقولها كيف لك هذا؟؟؟ ه؟كانت ترد وتقول هو من عند ربى انه كان بى حفيا ......يعنى كان الله يكرمها ويحتفى بها ويرسل لها طعاما من الجنه ..لم يفعل ذلك سبحانه وتعالى مع الانبياء!!.كل ده واكثر فى القران احنا اتربينا على اننا نحترم الدين المسيحى *******فين اصحاب العقول ؟؟اليس منكم رجلا رشيد؟؟؟

قبلاتى :)

السلام عليكم ورحمة الله...

الأخت الفاضلة "حنين للوطن"....أشكر لك احساسك الراقى وحرصك على إظهار مشاعرك النبيلة....ولكن اذا سمحت لى....

عند ذكر أيات القرآن الكريم يجب علينا تحرى الدقة ونقلها من مواقع خاصة حتى لا نقع فى خطأ تبديل كلمات الله...

قال لها زكريا يامريم أنى لك هذا ..وليس " كيف لك هذا"

قالت مريم :"هو من عند الله .....

ولم تقول :هو من عند ربى انه كان بى حفيا

يقول الله سبحانه وتعالى فى سورة مريم :

"

فَتَقَبَّلَهَا رَبُّهَا بِقَبُولٍ حَسَنٍ وَأَنبَتَهَا نَبَاتًا حَسَنًا وَكَفَّلَهَا زَكَرِيَّا كُلَّمَا دَخَلَ عَلَيْهَا زَكَرِيَّا الْمِحْرَابَ وَجَدَ عِندَهَا رِزْقًا قَالَ يَا مَرْيَمُ أَنَّى لَكِ هَذَا قَالَتْ هُوَ مِنْ عِندِ اللَّهِ إِنَّ اللَّهَ يَرْزُقُ مَن يَشَاء بِغَيْرِ حِسَابٍ

ويقول جل جلاله فى سورة مريم ولكن على لسان ابراهيم عليه الصلاة والسلام :

قال سلام عليك سأستغفر لك ربي إنه كان بي حفيا ( 47 ) وأعتزلكم وما تدعون من دون الله وأدعو ربي عسى ألا أكون بدعاء ربي شقيا ( 48 ) )

نرجو الحرص على نقل الايات القرآنية نقلا صحيحا....كما نرجو من الاخوة المتابعين من الاعضاء أن يهتموا ولو قليلا بمراجعة الايات القرآنية بدلا من الاهتمام بالمشاحنات وبما هو أقل أهمية...

شاكرين تفهمكم

الاخت الفاضله:folana

شكرا على ردك على وقراءتك لردى على "اجابى"

انا على فكره ما كتبتش الايات انا كتبت معانى الايات لانى كنت بكتب لغير المسلمين فكنت براعى انها تكون الفاظ مفهومه ليهم واكتب لهم المعنى وليس الايات كما نزلت بالقران ولو لاحظتى ان آيه واحده هى اللى كتبتها وحطيتها بين اقواس وهى "يا ليتنى مت قبل هذا وكنت نسيا منسيا" ما الباقى ما حطتوش بين اقواس لانى زى ما ذكرت بكتب المعنى وليس الايه.

شكرا لاهتمامك وانتى مشرفه شاطره ربنا يوفقك

قبلاتى wst::

[Folana]

السلام عليكم ورحمة الله...

ربنا يبارك فيك أختى الفاضلة...

ولكنى أخشى أن الاخوة المسيحين بيفهموا أيات القرآن الكريم أكثر من البعض منا...wst::...ولكنه مش موضوعنا...

طبعا جزاك الله خيرا..ولكن اريد ان اضيف فقط ان حتى المعانى اللى حضرتك ذكرتيها مختلفة عن المعانى التى وردت فيها الايات الكريمة...حصل خير طبعا...ومش مجال تفسير الايات هنا...بعدين لماضة تزعل مننا...

وبأشكرك على مجاملتك الرقيقة بأنى "مشرفة شاطرة"...دى شهادة أعتز بها خصوصا انها صادرة من حضرتك..

ولكنى لم أعترض بصفتى مشرفة...ولكن بصفتى مسلمة رأيت ان الكلمات جاءت فى غير مكانها الصحيح...

بأشكرك على تفهمك مرة اخرى

واقول للماضة ان موضوعك جميل جدا ...وبأشكرك على كل المشاعر الجميلة اللى عشناها بين حروفك..وحروف كل الاخوة والاخوات المشاركين فيه...

تحياتى للجميع

:)

[لماضة مصرية جدا]

صباح الخير

وحشتيني يا طنط سميحة

وحشتيني فوق ما تتخيلي

يمكن انتي في مكان تاني

يمكن ان دلوقتي في مكان تاني

لكن لساكي قريبة مني

لساكي بتوحشيني

و لما بشوف اي وجع....يوجعك

بيوجعني

بيوجعني اوي

و عارفة انك هتيجي تقعدي معايا انا وماما في البلكونة....

و هنتفرج ع التلفزيون سوا....

و هتاخديني في حضنك زي ما كل صورة جمعتني بيكي...

كنت في حضنك انتي...

جواكي أنتي

هتاخديني....

و هتضميني أوي....

و هتطمنيني.....أنا خايفة يا ماما سميحة...بجد خايفة

ضميني....و طمنيني بيكي...و معاكي

و قوليلي

ان انتي بخير.....و احنا بخير

[Dreamwithme]

ياه يا لماضة ..........أنا أول مرة أشوف التوبيك ده لأني جديدة بينكم بس نقلني في مساحة تانية خالصة

شكرا لمشاركتك وشكرا لرفعه في الوقت الحالي

نيجي بقي لمشاركتك النهاردة

و هتطمنيني.....أنا خايفة يا ماما سميحة...بجد خايفة

ضميني....و طمنيني بيكي...و معاكي

و قوليلي

ان انتي بخير.....و احنا بخير

بجد بجد ترجمتي اللي جوايا.........أنا فعلا حاسة بأحساسك أنا كمان عايزة طنط سميحة تتطمني وتقولي إحنا بخير

[Howayda Ismail]

على فكرة يالماضة حتلاقى طنط سميحة موجود منها كتير فى مناطق كتيرة

انا فاكرة جيرانا مسيحيين كان البيت متسمى كده بيت المسيحيين وهم عارفين كده

ومكنوش بيزعلوا عشان كان عادى لكن لو قلتى على حد كده دلوقت حيخدها بحزازية يفهم انك

عزلتيه بكلامك ده وقلتى احنا مسلمين و انتم مسيحين بمعنى التفرقة

البيت ده كان فيه بس عائلتين مسلمين والثالثة فى شقة مشتركة مع عائلة مسيحية اه والله زى

مابقولك يعنى حمام مشترك وباب شقة واحد يقفل عليهم بالليل وكان فيه شبان وبنات

عمرنا ماسمعنا يوم اى عراك بينهم ولا خلاف ولا ولد مسلم اتحرش ببناتهم زى اللى بيحصل دلوقت

من ابناء الديانة الواحدة

وبعد سنين طويلة لما اولادهم اللى اتجوز واللى هاجر والبيت قدم باعوه وعزلوا فى مكان تانى

بس لما امى بتقابلهم صدفة فى مكان بيحضونوا بعض ويسالوها عننا وهى تسالهم عن اولادهم

نفسى مصر كلها ترجع طنط سميحة وجيرانها نفسى ترجع روح المحبة تلم الناس من تانى

وعشان يتحقق ده لازم الناس تحس بالعدل والامان فى البلد منباقش خايفين من بعضنا منباقش

شايفين الحكومة بتحابى طرف على طرف الكل ياخد حقه عشان يقدر يعمل اللى عليه

لكن حقوق مهضومة وتربصات موجودة وامان مفقود حيضيع الف سميحة ومليون من جيرانها