إلحقوني يا اسيادي مش عارف أذاكر لولادي

[أسد]

الخلاصة ..

تعليم الأبناء ومنحهم أفضل فرصة ممكنة للتعليم .. بأفضل مدرسة ممكنة .. هي من أهم الإستثمارات لإبنك وللمجتمع ..

أعتقد أن أحد واجباتنا في تنوير المجتمع .. والمساهمة في حل مشكلاته .. هي أن نساهم حتى بتعليم أبناؤنا .. على أفضل صورة ..

وأرجو ألا نستسهل التعليم ..

لأن الإستسهال .. هو اللي جابنا وراء .. ووضعنا في قائمةالمتخلفين ..

وما نيل المطالب بالتمني .. ولكن تؤخذ الدنيا غلابا ..

[عادل أبوزيد]

أتفق مع الأخوة اللي أفادوا إن الأستثمار في تعليم الأولاد أفضل من الأستثمار في الذهب والعقارات ...

أنا عن نفسي لن أحاول ان اترك لأولادي مال أو عقار يعني لن أُركز على ذلك ويكون شغلي الشاغل ..

فالعلم والعلم وحده هو من يستطيع من خلاله أن يحقق ذلك بنفسه ..

أي نعم سأساعدهم بكل تأكيد ..

لكن عندما يساعدون أنفسهم أولاً ...

الموضوع تحدي

وتحدي كبير كمان ...

......

......

خلصت جامعه وقلت أدرس كمبيوتر بطريقة مكثفة وعلمية ... وكانت امله أيامها بجد

الكلام ده في 94

المهم كان معايا دكاترة جامعه ومعيدين وموظفين وطلبة بس دول كان عددهم قليل

وكنا حوالي 30 واحد

والدراسة باللغه الأنجليزية اللي أُجيدها الحمد لله

لكن الجامعة رأفت بحال ناس كتيرة وقالوا في الأختبارات اللي عاوز يجاوب بالعربي يجاوب

المهم

كان معانا خريجي مدارس لغات ..

اعتقد المدارس الأنترناشونال حديثة العهد بمصر

لما كنا بنقعد سوا وبأشوف مستواهم في تحدث اللغة الانجليزة وكتباتها كمان ..

كنت بأحس إني عجلاتي .. او كبيري قوي كهربائي سيليسيون ..

من ساعتها صممت إني مش هاخلي إبني يطلع عجلاتي زيي ...

الكلام ده من 16 سنة اهو

ما بالنا في العصر اللي إحنا فيه اللي بقت الأرض فيه بتتكلم أنجليش

فعلا تغير العصر و الأهمية أصبحت للتعليم و ليس للشهادة و شتان ما بين التعليم و الشهادة

و الخطأ الذى يقع فيه كثيرين هو الإصرار على تقييم تعليم الأطفال بالمجموع و الإصرار على تحمل مسئولية التعليم بالكامل بدلا منهم أقصد بدلا من الأطفال و طبع حديثى هذا سهل أن أقوله لكن التفعيل عملية صعبة جدا و لكن لابد منها

يجب أن تحيط إبنك ببيئة علمية لازم يتعلم و مش لازم يحفظ و لازم يفكر بطريقة علمية إبحث و إشترى المجلات العلمية مثل popular science ناشيونال جيوجرافيك ده شئ مهم لأن فعلا طبيعة العصر لن تقبل التخلف

يمكن لو تخلصت من العبء النفسى إن إبنك يجيب النمرة النهائية و بدأت تفخر بتحصيله المعرفى ستتكون عنده ملكة البحث المعرفى ....... إلتقيت بالسيد أدهم إبن الفاضل أسد و أعجبنى جدا و أعجبنى جدا إصرار والده على تعميق المعارف عنده

ليس عيبا أن الأباء و الأمهات يدرسوا نفس المواد مع أولادهم

و كمان يجب على الأولاد التعود على السؤال فى الفصل بلا خجل و بإصرار

قلبى معكم أنا طبعا مريت بمثل تجربتكم من ربع قرن

[HanaaOsama]

انا بنتي داخله kg1 السنه الي جايه ان شاء الله و كنت هدخلها انترناشونال او لغات

بعد الموضوع ده بفكر بلاش :blink:

ولا ايه رأيكم

الله يستر عرضك بلاش

دخليها انترناشونال

متخليهاش تتعذب زى مجيلى بيتعذب على ميلاقى شغلانة معقولة

دلوقتى والمستقبل محتاجين ناس تكون ليها مهارات معينة يادوب يعرفوا يلحقوها فى مدارس الانترناشونال

انا يفندم خريج 2006 والحمد لله من اول يوم اتخرجت فيه بشتغل ولكن من يوم ماتخرجت لحد النهاردة وانا مداوم عالمذاكرة عشان اعرف احط ليا مكان فى سوق العمل بجد من يوم متخرجت وانا بذاكر فى حجات المفروض الناس بتوع الجامعة الامريكية والالمانية درسوها من زمان ولو عايزين يطوروا بيذاكروا حجات اعلى

يعنى هما متقدمين عليا باربع سنين عالاقل

عشان كدة بنصح اى حد يستثمر فى ولاده عشان ميعانوش المعاناة اللى بنعانيها دلوقتى ويعالم ايامهم هتبقى عاملة ازاى

انا كمان من رأي الاستاذ حسام

فعلا اللغة اصبحت عامل مهم جدااااا حضرتك اهتمى باللغة العربية كلغة فى حد ذاتها عشان القرأن

لكن الدراسة فى اللغات بتفرق كتييييير فى سوق العمل

يعني إيه يا مدام هناء ...؟؟؟؟

هاتجوزيها وتقعديها في البيت ؟

التعليم العربي لم يعد كافياً .. وزي قلته بدون لغه وكمبيوتر

لما قرأت الموضوع ده حسيت ان نوعية التعليم الانترناشونال او حتي اللغات صعب اوي خفت البنت "تفشل" رغم ان انا كنت طول عمري في مدارس خاصة ( لكن مش لغات ) و خريجة هندسة لكن برضة اللغة مش اد كدا اعتقد مش هعرف اساعدها بالدرجة الكافية

لكن عندكم حق طبعا لان التعليم ده هو المستقبل

[justme]

بصوا يا جدعان وصلوا على النبي

التعليم الانترناشونال واتجاهات التعليم الحديثة بتقول انو لازم ال تعاون ما بين الاسرة والمدرسة

ودي مشكلة احنا مش جاهزين فعلايا للتعليم ده ومش عارف اساسا اللغة بقت مشكلة كبيرة ليه

طب مانا خريج مدرسة عربي ومخدتش انجليزي في الجامعة واخدت كام كورس كمبيوتر والحمد لله زي الفل يعني مازال ينقصني بالتأكيد بعض المهارات لكن اعتقد ان الجامعة كفيلة بها

ان ارى ان التعليم تجارة يروج لها بشكل جيد الان بس هو فعلا المهارات دي اكتسابها مش من خلال المدرسة بس

عموما انا في رأيي اذا اهتمت الاسرة بالاطفال لن يهم ما هي المدرسة بقدر متابعة الاسرة

واخير اقتراح الى احد المشرفين بتخصيص باب في المحاورات لموضوع المساعدة في تدريس الابناء يعني ممكن نتعاون ونفهم بعض الحاجات اللي مش فاهمها كلا في تخصصه وممكن الباب ده يكون مقسم بحسب المواد علشان اللي بيفهم في مادة يقدر يساعد الكل

لأني وجدت موضوع جديد اتفتح علشان القصة دي بس رأيي ان باب كامل هيكون افضل

عموما ارجو من الادارة دراسة الموضوع

تحياتي

[justme]

في بس معلومه صغيره ممكن تفيدكم للي بيلاقوا صعوبه في الترجمه ..

جوجل بقدم خدمه الترجمه بشكل رائع جدا من العربي للانجليزي وبالعكس والاهم من الانجليزي للانجليزي كمان .. ده فوق ان في كلمات كتير بينطقها لك ويحطها في جمل وشرح عشان يعرفك معناها بالظبط ..

ممكن يترجم كلمه وحده او نص كامل من عدة كلمات والترجمة على فكره بتطلع مظبوطه لحد كبير خاصه وهو بيربط الكلمات ببعضها يعني لو كلهم لها اكثر من معنى بيختار اقرب معنى للكلمات الي حواليها ويحطه ..

الخدمه هتلاقوها من ضمن خدمات كتير في آي جوجل ..

وللي مش عارف الآي جوجل اكتب ف الجوجل كلمة ترجمه جوجل وعيش حياتك ..

للعلم فقط جوجل كمان ممكن يدور بلغتك في اي موقع ايا كان لغته ويطلع النتائج مترجمة بلغتك الاصلية ودي موجود داخل ادوات اللغة ودي خدمة جيدة بخلاف الترجمة العادي

كمان جيبتلكم مجموعة مواقع مفيدة لتعليم الرياضيات وهتلاقوا في معظمها جزء خاص للأباء

ولو الانجليزي مشكلة ممكن تستخدموا جوجل برضه

انا بدرس ماجستير وده كان واجب علينا في الجامعة يمكن يفيدكم

دول مواقع للرياضيات وهحاول اجيبلكم في العلوم اذا افادتكم

http://school.discoveryeducation.com/brainboosters/

http://www.terc.edu/ourwork/elementarymath.html

http://www.delta-education.com/

http://www.coolmath.com/

http://www.harcourtschool.com/glossary/math2/index_temp.html

http://www.resourceroom.net/math/

[قطرة ندى]

هأ أو أو

بيقولك يابو أدهم من السن الجاية .. رابعه يعني .. هايعتمدوا في معظم المواد على " الريسيرش " يعني باللغه العربية أبحاث يقوم بها الطالب ويستعين بالأنترنت فيها ... وأديها ما ترحمهاش ...

في مدرسة أدهم الكلام ده بيحصل من السنة دي ..

والمسألة مش بس كده .. ده بيطلبوا منهم قراءة قصة .. وتحليلها .. يعني مثلاً .. تلاقي أدهم باشا بيقولي يادادي أنا عايز أروح مكتبة جرير .. أقوله ليه سعادتك ؟؟

يقولك لأنه عندي بروجيكت (مشروع) .. وعايز أشتري استوري (كصة) ..

آخده وأروح مكتبة جرير .. يقوم يقعد يدور لغاية مايلاقي القصة اللي على مزاجه ..

وبعدين .. يبتدي يقرأها . وبعدين .. يعمل لها أناليسيس (تحليل) .. وبعدين يعرف الكاراكتارز (الشخصيات) والسايت (المكان اللي بتدور فيه القصة) والبروبلم (الحبكة الدرامية) وبعدين البروبلم سولفينج (حل المشكلة والوصول للنهاية لاسعيدة) وبعدين يكتب الحاجات دي .. ويقعد يرسمهم .. ويقصهم .. ويلزقهم ..

هييييييييييييييييييييييييييييييييييييييييييه

شغلانة طويلة جداً ...

بس زي ماقلت ..

أنا مليش دعوة .. أنا فقطط ممول .. ومستشار .. وحكم بينه وبين أمه في حالة الإختلاف ..

لكن بصراحة .. هناك فرق غير عادي بين الجيل ده .. وبيننا لما كنا في نفس عمرهم ..

لا وجه للمقارنة ..

الفرق مش فى اختلاف الجيل الفرق فى المنهج يعنى لما يكون واحد ابنه بيدرس منهج بريطانى غير اللى ابنه بيدرس منهج نشونال

يعنى مصرى مترجم انجليزى والترجمة الحرفية لكلمة نشونال هى(وطنى)!!!!!

[se_ Elsyed]

كل شيء وخصوصاً التكنولوجيا له جانب سلبي وأخر إيجابي

الجانب السلبي مثلاً في الكمبيوتر هو إنه لحس دماغ العيال وبقوا قاعدين ليل نهار قدامه يلعبوا جيمز لحد ما دماغه تتلحس ( زي الأفندي اللي عندي .. جاي أول أمبارح وإحنا راجعين من المدرسة يقول لي : حلمت حلم فظيع أمبارح مش هاقول لك عليه .. قلت له قول .. قال لي لأ لأ ده فظيع .. قلت له قول بس ... قال لي ... حلمت إن في دبابتين خبطوا في بعض جوه شقتنا وأتقلبوا على جنبهم ... وقدام البيت فيه كوبري فعلاً .. حلمت إن تريلا أتقلبت من فوق الكوبري ... والناس كانت مرميه في الشوارع ورجولها وروسها طايرة ... إنت بقى نزلت الشارع تشوف في إيه ... وطلعت هدومك متغرقه دم .. ودخلت الحمام بسرعه تاخد حمام وتغير هدومك .......................... إوعى وشك من قدام أحلام سي عُمر ... أنا سألته : طب بالنسبة لحادث السير بتاع الدبابات .. ده كان في الصالة ولا المطبخ ؟ هههههههههه )

ما هو بيلعب جيمز زي النيلة فيها ضرب وطحن .... وعنده كيف ولا الأفيون إنه يتفرج على افلام رعب والله العظيم ما بأقدر اشوف منظرين منهم على بعض ... عيل دموي وسادي

حتى دي ممكن نحول السلبية فيها إلى إيجابية

الولا بقى بدأ ياخد جدول الضرب السنة دي ...

بالمناسبة : أنا كلت ضرب في جدول الضرب وانا صغير هههههههههههههههه

لا الحمد لله ما كنتش بانضرب .. لكن كان شيء مزعج ... وبعدين بقى أبويا الله يرحمه ساب كل حاجه في المنهج وماسكني والله بشكل شبه يومي ." حفظت جدول الضرب يا سين سين ؟ "

أناء الليل وأطراف النهار لما كرهني فيه

دلوقت بقى في عدة برامج مجانية ظريفة تقدر تشغلها للطفل وهايحفظ غصب عن قفاه .. زي لعبة من سيربح المليون .. وفي كمان لعبه بناء الهرم وكل ما الولد يجاوب صح .. تزود طوبه في الهرم وهكذا وحاجات بتبقى شيقة وتلفت أنتباه الولد وتخليه يحب المادة .. مش زينا كنا بنكره مواد معينه من طريقة شرحها الجبسية المتحفلطه

طب هاقول لكم على حاجه

أمبارح لقيت عُمر بيقول لي تعالى يا بابا أعلمك خودعه ( خلي بالكم مش خدعه ) .. قلت لك إنت جيت للشخص الصح ... أنا باحب الخودع

قال لي أخليك تحفظ جدول 9 في ثانية .. قلت له يا ريت .. عشان أنا كملت تعليمي لحد جدول 8 بس وبعدين سبت الدراسه

بُصوا الخدعه

9*1=9

* 2 = 1

* 3 = 2

*4

*5

*6

*7

*8

*9

*10 = 9

خليكو معايا الله يرضى عليكو عشان الواد بعد ما خلص اللعبه أنا تنحت وكنت مذبهل

نفضل نزود 3 4 5 بشكل تدريجي إلى أن نصل إلى الرقم 9

بعد ما نخلص نبتدي عكسي من عند 9 نحط جنب الرقم 0 وبعدين اللي فوق 1

لحد ما نوصل 9 فوق

صلي على رسول الله

هايطلع عندنا

9

18

27

36

هكذا

قلت يا سلام

ده العلام حلو يا ولاد

------------

كمان باحفظهم الأرقام الفرنساوي مثلاً بالطريقة التالية ...

عندي برنامج exe بسيط وظريف ... عبارة عن مدفع .. وبيصطاد الأرقام ... والواحد يحط السماعه على ودنه ويسمع الرقم ويقوم منشن عليه وضاربه ...

وهكذا

أقعدوا بالعافية

[محمد عبدالعزيز]

موضوع مفيد جداً وفيه خبرات ثمينة جداً لكل الآباء والأمهات.

كنت كتبت موضوع قبل كده فى المحاورات عن مجموعة ألعاب تعليمية جميلة جداً للأطفال, اللى يحب يشوفها يدخل هنا:

http://www.egyptiantalks.org/invb/?showtopic=78705

[ام بيدو]

السلام عليكم فى حد فى الدمام وعارف مدرسة انترناشونال كويسة اصلى ابنى مش بيستفيد من مدرستة خااااالص وانا الى بقوم بكل المجهود لوحدى :rolleyes:

[rewsha]

كل شيء وخصوصاً التكنولوجيا له جانب سلبي وأخر إيجابي

الجانب السلبي مثلاً في الكمبيوتر هو إنه لحس دماغ العيال وبقوا قاعدين ليل نهار قدامه يلعبوا جيمز لحد ما دماغه تتلحس ( زي الأفندي اللي عندي .. جاي أول أمبارح وإحنا راجعين من المدرسة يقول لي : حلمت حلم فظيع أمبارح مش هاقول لك عليه .. قلت له قول .. قال لي لأ لأ ده فظيع .. قلت له قول بس ... قال لي ... حلمت إن في دبابتين خبطوا في بعض جوه شقتنا وأتقلبوا على جنبهم ... وقدام البيت فيه كوبري فعلاً .. حلمت إن تريلا أتقلبت من فوق الكوبري ... والناس كانت مرميه في الشوارع ورجولها وروسها طايرة ... إنت بقى نزلت الشارع تشوف في إيه ... وطلعت هدومك متغرقه دم .. ودخلت الحمام بسرعه تاخد حمام وتغير هدومك .......................... إوعى وشك من قدام أحلام سي عُمر ... أنا سألته : طب بالنسبة لحادث السير بتاع الدبابات .. ده كان في الصالة ولا المطبخ ؟ هههههههههه )

ما هو بيلعب جيمز زي النيلة فيها ضرب وطحن .... وعنده كيف ولا الأفيون إنه يتفرج على افلام رعب والله العظيم ما بأقدر اشوف منظرين منهم على بعض ... عيل دموي وسادي

حتى دي ممكن نحول السلبية فيها إلى إيجابية

الولا بقى بدأ ياخد جدول الضرب السنة دي ...

بالمناسبة : أنا كلت ضرب في جدول الضرب وانا صغير هههههههههههههههه

لا الحمد لله ما كنتش بانضرب .. لكن كان شيء مزعج ... وبعدين بقى أبويا الله يرحمه ساب كل حاجه في المنهج وماسكني والله بشكل شبه يومي ." حفظت جدول الضرب يا سين سين ؟ "

أناء الليل وأطراف النهار لما كرهني فيه

دلوقت بقى في عدة برامج مجانية ظريفة تقدر تشغلها للطفل وهايحفظ غصب عن قفاه .. زي لعبة من سيربح المليون .. وفي كمان لعبه بناء الهرم وكل ما الولد يجاوب صح .. تزود طوبه في الهرم وهكذا وحاجات بتبقى شيقة وتلفت أنتباه الولد وتخليه يحب المادة .. مش زينا كنا بنكره مواد معينه من طريقة شرحها الجبسية المتحفلطه

طب هاقول لكم على حاجه

أمبارح لقيت عُمر بيقول لي تعالى يا بابا أعلمك خودعه ( خلي بالكم مش خدعه ) .. قلت لك إنت جيت للشخص الصح ... أنا باحب الخودع

قال لي أخليك تحفظ جدول 9 في ثانية .. قلت له يا ريت .. عشان أنا كملت تعليمي لحد جدول 8 بس وبعدين سبت الدراسه

بُصوا الخدعه

9*1=9

* 2 = 1

* 3 = 2

*4

*5

*6

*7

*8

*9

*10 = 9

خليكو معايا الله يرضى عليكو عشان الواد بعد ما خلص اللعبه أنا تنحت وكنت مذبهل

نفضل نزود 3 4 5 بشكل تدريجي إلى أن نصل إلى الرقم 9

بعد ما نخلص نبتدي عكسي من عند 9 نحط جنب الرقم 0 وبعدين اللي فوق 1

لحد ما نوصل 9 فوق

صلي على رسول الله

هايطلع عندنا

9

18

27

36

هكذا

قلت يا سلام

ده العلام حلو يا ولاد

------------

كمان باحفظهم الأرقام الفرنساوي مثلاً بالطريقة التالية ...

عندي برنامج exe بسيط وظريف ... عبارة عن مدفع .. وبيصطاد الأرقام ... والواحد يحط السماعه على ودنه ويسمع الرقم ويقوم منشن عليه وضاربه ...

وهكذا

أقعدوا بالعافية

بصرحه حاولت افهم الشرح اللي حضرتك كاتبه وماعرفتش

لكن لقيت فيديو على اليوتيوب بيشرح الكلام اللي حضرتك كاتبه ده .ومش عارفه ارفع الفيديو هنا . -_- :hi:

لكن هاحط اللينك بتاعه

http://www.youtube.com/watch?v=a0fIWpQO2V0...feature=related

معليش العلم نور برضو :unsure:

لو حد يعرفني ارفه فيديو من اليوتيوب هنا ازاي؟

[doudy]

ربنا يقويك يا سى السيد

بس الاكتر يقوى المدام اللى زى حالتى انا اللى بذاكر للولاد تالتة ابتدائى و ساتة كمان :blush2:

بعد اللى المعاناة اللى شوفتها و انا قدهم فى مدارس الفرنساوى و مذاكرة الفرنساوى و الحساب و العلوم بالفرنساوى

قررت انى ما ادوخش نفسى و دخلت ولادى انجليش مستوى رفيع و خلاص

و كل صيف بياخدوا كورسات انجليش فى الاكاديمية عندنا فى اسكندرية

و الحمد لله هما ممتازين فى الانجليش

[ام بيدو]

اية يا جماعة هو مفيش حد من الدمام خاااااااالص ولا اية :blink: