مشكلة العنوسه لا قصدى مشكلة الانوثه فى مصر

[لماضة مصرية جدا]

السلام عليكم و رحمة الله و بركاته

يا جدعان و يا جدعانات مش حد يجيبني من ع قهوة كتكوت...

يا قهلا يا قهلا بالعضوة المفروسة جدا (ألا قوليلي يا شااااااااااابة هو اللي في الصورة ده شنب... و لا ده دور الموديل في اغنية منير اللي بحبها لما النسيم بيعدي فوق شعرك.....أروح واكلة شعري من الغيظ.... :lol: )

يت ميت مليون مراحب بيكي في الحوتة هنا

أنا لسه قارية مداخلتك عن السواقة.... تصدقي عمري ما فكرت اسوق لا في مصر و لا براها...

انا بقي من عشاق الحناطير...آه و الله و شايفاها ان هي دي أمل مصر الواعد في كاس العالم (أنا بحب اقعد جنب السواق لزق...بس هو الحصان بعافية اليومين دول)

دوري في السواقة... يكتفي بمساعد الطيار

عافرين احمد بدير في فيلم (ع باب الوزير) لما كان بيطلع راسه م العربية و نصه يبقي متدلدل في الشارع و بيقول

ووووووووووووووووسع ياااااااااااااا جدع

أهو ده الدور الاستراتيجي... اللي دايما بلعبه لو بابا سايق... أو لو حد من صحاباتي

بس انا معاكي انا فعلا البني آدم تلاقيه حد تاني خاااااااااااالص ورا عجلة القياة السحرية.....يعني صاحبتي اللي اصلا ممكن اعيط من كتر رقتها في الكلام (آه و الله بعيط اصلها فزيعة فزيعة)... دي تتنطر و را الديكسيون..... و احس اني قاعدة مع المعلمة حوندقة من سوق السمك

كابتن شيكو.....مفروسة هانم.....ام نضال اللي جابلك يخليلك

كملي و انا قاعدة جنبك اهه .....

واااااااااااااااااااااااااااااااسع يا جدع

فوتكم بعافية

[قلب ابيض]

اولاً العامل الرئيسى والاساسى والمهم:

السواقة ....ايوة السواقة فى مصر مع سواقيين الترلات والميكروباصات ..عاوزة راجل..وموش اى راجل

هاستنى ملاحظاتكم ..وبناءاً عليها هاستمر ولا ...لأ؟؟

يا ويلكم برفيقه الكفاح 00الاخت تخصص اتوستراد ولا محور؟؟؟

بلا فخر معاك الريس بتاع الاتوتستراد من صقر قريش للكريمات 00

نورتى يا شيكو

استمرى استمرى استمرى

[Tafshan]

مش عارف . .

حاسس ان الموضوع ممكن نبص له من زاويه تانيه خالص مع انه مفترض انه موضوع خفيف ...

انا باشتغل في مكتب شفت فيه حوالى 30 او 40 جنسيه منهم رجال و نساء .. لاحظت ان مافيش غير الجنسيات العربيه فقط هى اللى بتهتم بموضوع الميكب و الحركات و الخ من مظاهر ال "انوثه " المذكوره .. و مع احترامى .. كل حاجه لها مكانها ... و باشوف ده نوع من الجهل .. طب دى لو راحت حفله ح تعمل ايه ؟؟

يعنى انا بشوف اللبنانيات و غيرهم و بحس ان في "ماسك" لابسينه فوق وشوشهم من كثر ما المكياج ثقيل .. و على فكره تلك الطريقه بيسموها "مكياج عربي" ! لأن ما فيش حد غير العرب بيعمل كده !!

نرجع لموضوع الانوثه .. و هنا ح اركز على انوثة الشكل ..

انا شايف انها نظره دونيه للمرأة بشكل عام .. في رأيي لا يمكن اختزال المرأة بشكل عام الى مجرد سندوتش لحمه ..

المرأة المصريه متعلمه في نفس مستوى الرجل المصري .. نسبه كبيره من هن تعملن من اجل دعم الاسره مادياً نظراً لغلاء المعيشه .. تطورت المرأة المصريه عن الرجل المصري فاصبحت ربة منزل و ايضاً سيده عامله تعمل من اجل لقمة العيش لاطفالها .. مش عشان تجيب ميكاب و هدوم زي جنسيات اخرى و الرجل هو اللى بيصرف ع البيت .. للاسف الرجل دخله ما بقاش كفايا غالباً ..

ليه بقى باقول تطورت عن الرجل المصري .. لأن الرجل المصري ما يزال يرجع من الشغل مفترض ان زوجته العامله التى لا يجرأ ان يطلب منها ان "تقعد في البيت" عامله الاكل و مذاكره للعيال و مزبطه الدنيا .. و كمان نافخه البلالين و بتقول بوس الواوا .. و لما ما تعملش كده يدبدب برجله في الارض و يخبط في الحيطان و يقول قاعده رابطه المنديل و ريحتها طبيخ .. مع العلم انه حتى كوباية المايه ما يقومش يجيبها ..

طيب و البيه التانى اللى دخله يسمح بان "تقعد زوجته في البيت " .. ده بقى مكبر دماغه من كل حاجه .. يعنى طول الاسبوع في الشغل و يرجع ع النوم .. الخميس بالليل ع القهوه و الجمعه يصحى ع الصلاه و يرجع يتغذى و ينام ساعتين و يصحى ضارب بوز .. طب خذ العيال خرجهم .. ماشى ينزل يخرجهم ساعتين .. و يرجع متشاكل مع العيال و امهم .. طبعاً مع البوز المتين .. و يقولك اصلهم في مرحلة الصمت الزوجى .. طب ما انت بتتكلم مع صحابك ع القهوه .. اشمعنى ؟؟

اقولك انا اشمعنى ..

بشكل عام في مشكلة في مصر في مفهوم الخصوصيه .. يعنى تلاقى الواحد سايق العربيه و رأسه مدلدله من الشباك جوه العربيه اللى جانبه .. ولو واحده معديه .. يجيبها من فوق لتحت و ما ينزلش عينه من عليها غير بعد ما يعملها معاينه شامله .. مش النظره الاولى لك ؟؟ طب انت تقبل يحصل كده مع بنتك او مراتك او اختك ؟؟ يقولك لو كانوا كده كنت ذبحتهم !!!! طب هى عامله ايه البنيه ؟؟ ما هى متحجبه و مش حطه ميكب و لا حتى حجابها ضيق ... يقولك : اسكت انت .. ايش عرفك .. دول بيطلع منهم بلاوى المحجبات دول ..

يعنى من الاخر هو دائماً في حالة مقارنه بين مراته و بين كل الستات اللى في الدنيا .. و طبعاً هو بيشوفهم في التليفزيون او في الشارع .. يعنى على سنجة عشره .. مش بيشوفهم و هم بينظفوا في البيت .. دول لو اتجوزوا ملكة جمال برضوا مش ح تملأ عينهم ..

هل ده معناه ان الدنيا عشره على عشره و الرجاله عنيهم فارغه ؟؟

لأ برضوا ... و هنا ح اتكلم على الجنسين رجاله و ستات ..

في مشكلة "قبح" في مصر ..

و طبعاً سبحانه و تعالى اعلى من ان اشبه خلقه بمثل هذا التشبيه .. لكن المشكله في فهم الجمال .. يعنى طريقة الميكاب .. تناسق الالوان .. تفهم لطبيعة الجسم و اختيار المناسب .. عدم التقليد .. ما يبقاش طابور ستات او رجاله تحس انهم مستنسخين من بعض .. نفس اللبس و الالوان مش مهم بقى لايق و لا لأ ..

حاجه تانيه برضوا من الجمال : الصحه .. الاوروبين ما بيحطوش ميكب و زي القمر ليه ؟؟ عشان مهتمين بصحتهم .. الاكل الصحى .. الرياضه .. النوم بدري و الصحيان بدرى .. شرب الماء .. انا اعرف مصريين مش بيشربوا ميه خالص .. في مشكله كبيره في مصر بالنسبه للعادات الصحيه ..

حاجه تانيه مهمه : النظافه .. و مش ح اعلق كثير ..

و ده طبعاً راجع لنظام اكبر عود العين من الصغر على القبح ..

شوارع مش نظيفه .. عمارات عجيبه و مش مدهونه و لما بيدهنوها بينيلوها .. غياب الحدائق و المتنزهات .. تحويل حصة الرسم في المدارس الى حصص جغرافيا و ما اشبه عشان المنهج طويل ..

ده غير الفهم الخاطئ بقى للدين .. يقول الرسم حرام و بالتالى اي مظهر من مظاهر الجمال حرام .. و تبقى المتعه فقط في الاكل .. اغلبنا بيخرج عشان يأكل مش عشان يتفسح و يشوف منظر جميل مثلاً .. و يبقى المنظر الجميل الوحيد اللى مسموح برؤيته هو وجه زوجته اللى المطلوب منه انه يعوضه عن كل الجماليات المش موجوده بغض النظر بقى عن حقوقها و عن حقها هى كمان في زوج على الاقل بيغسل سنانه و ريحته مش سجاير ..

[لماضة مصرية جدا]

السلام عليكم و رحمة الله و بركاته

استاذ طفشان.....(ليه الاسم ده طيب...مع ان فكرك رااااااائع جدا و يدعو للمقاومة)

قريت مداخلة حضرتك اكتر من مرة......محفزة جدا للتفكير و التامل

عجبتين اوي كلمة حضرتك "عندنا مشكلة قبح في مصر".....

ينفع اضيف لفكرة حضرتك... معني صغير

"احيانا احنا بيبقي فيه قبح جوانا.... بيغمي عينينا ان احنا نشوف الجمال في اللي حوالينا"

يمكن انا عشت في مصر..... و عارفة ازاي الواحد عينيه تتعود علي الفوضي و "القبح" زي ما حضرتك قولت.....و الضجيج و الصخب....(آخر نزولة للمحروسة كان عندي مشكلة حقيقة اني

اعدي الشارع.......طب اعدي منين و ازاي.....مافيش غير هي محاولة ناجحة في ميدان سعد زغلول...و من كتر فرحتي اني لقيتالخط بتاع المشاة اخدته رايح جاي

كله كوم و صخب الكلكسات و الديجيهات لافتتاح محلات عصير القصب)

الأنكي من كده ان كل المفردات دي بقت مسلمات...أو حاجة كده بنقول عليها taken for granted

احنا اتربينا ازاي.....احساسنا كبر ازاي....في شارعنا..... في مدرستنا.... في الميكروباص (و خصوصا لما بنتحشر و السواق يبص لينا كانه بيادبنا و ميتحركش غير لما يتطمن ان الكنبة الورانية بقت اربعة....إييييييييييييييييييه ايااااااااااااام)

مع حضرتك جدا ان فيه حس بالجمال تايه جوانا.... و البيئة اللي بنعيش فيها يا بتكبره يا بتموته و مكانه بيبقي فاضي و فريسة سهلة لكل الاحاسيس اللي بتشد الواحد بعيد عن انسانيته

أنا رايي المتواضع جدا......ان الواحد يحاول يكتشف مفهوم الجمال من جواه.....و النفس الحلوة...بيبقي ليها جمال و دفء لا تخطئه الروح حتي و ان استحالت رؤيا الشخص

كان فيه حد زمان قالي يا بنتي "أعيدي اكتشاف كؤوس الكريستال جواكي.... و امليها بأحلي ما فيكي"

يا تري ده ينفع يكون مفهومي الخاص جدا عن الجمال.....

اللي ممكن ياخد بايدي و يساعدني الاقي نفسي امراة كاملة الانوثة أو رجل كامل الرجولية....اينما ابحرت بي سفينة الحياة

صباحكم......فكرة حلوة تفتح في دماغكم و تنور طريقكم طول اليوم

[مغتربة]

الفاضل طفشان

الفاضله لماضه مصريه جدا

لا ادرى متى على وجه الدقه ضاع مفهوم الانوثه مننا حتى تم اختزاله فى الجمال او النظافه او السلوكيات

الانوثه هى سنفونيه متكامله تعزفها الروح فى الاساس

ما ننعيه هنا اليوم هو روح الانثى

المواصفات الشكليه و الجماليه و الميكب و تناسق الالوان و العادات السوكية ..............

كل هذه الاشياء هى مصب الانوثه و لكنها ليست منبعها

كل هذه الاشياء لن تغنى اذا كان الاساس خرب فهى نتاج و ليست الاساس

الميكب الثقيل الذى وصفته حضرتك استاذ طفشان من اكثر الاشياء ازعاجا لى و انا انثى فما بال اذا كان المناظر له رجل

دعنا نقول ان للارواح لغه لا يفهمها الاها

ففى هذه الحاله الانثى الحق هى التى تستطيع روحها ان تحاور روح الذكر

روحه و ليس نظره فقط او سمعه فقط او عقله فقط

الانثى الحق هى التى تستطيع ان تكون بديل الهواء للذكر

هل هناك انسان يستطيع ان يعيش دون ان يتنفس

اذا يجب ان تكون هى اهم له من هذا النفس ليطلق عليها انثى

هى الوحيده القادره على احتوائه و ادهاشه و امتاعه و اثارته

القادره على اشعاله بنظره و اطفائه باخرى

وعلى العزف على اوتار كيانه بمنتهى الخفه و القوه

الانوثه هى منحه الهيه للبشريه

لكى تستظل بها فى صحراء عمرها

لكن للاسف منحه ضيعتها الكثيرات

فلا سعدن و لا استطعن اسعاد ذكورهن

[shiko]

الحلقة التانية

بناءاً على طلب الجماهير .......عدناااااااااا

ومافيش حاجة حصرى كله على شاشة التليفزيون المصرى

وعشان خاطر عيووووووووون الباشمهندس يااااااااااسر ومحمد بك العنبى والستو هانم لماضة مصرررررية اوى .

ورفيقة الكفااااااااااااح لعفاريت الاسفلت القلب الابيض وبسسسسسسس

بالرغم من انى شامة ريحة تهكم وسخرية فى الكلااااام بس البلد دى احسن من غيرها

وبجد بجد انا مبسووووووووووووطة بيكوا موووووووووت ومبسوطة بردودكم جدا

المهم ندخل فى الموضوع: :blink:

اولاً: عزيزى واخويا الباشمهندس ياسر

بالنسبة لتعليقك على الاسم

وهو المطلووووووووب ...هو فى الاساس المقصود هنا كناية عن التحول ...اللى حصل وشيكو ده اسم الدلع بجد موش مستعار

ثانياً:عنبو بك

بالنسبة لذات السؤال نفسه

هو فى الاصل shikobunny وده جه لواحده كده من غير قصد معين .........

وبالنسبة لسؤالك واستفسارك ده هاتسمعوا فى الحقة القادمة .........انتظرووووووونا.

ثالثاً :لماضة مصرية جدا

اختى اللمضة بالنسبة للصورة ...ده شنب اه شنب شحتااااااااه من واحد معرفة وباطلعه وقت اللزوم زى مانتى شايفة والحقيقة انا هنا كنت مطلعاه بدل ما طلع عين حد تااااااااانى ...وده كناية عن التهديد المستمر لاى واحد تسول له نفسه بالتريقه عليه يا لمضة

)))

عجبنى اوى الدور التالت اللى انتى بتقومى بيه ده "دور عظيم وجليل " لمساعد الطيار ده بقى دور مامتى ...حضرتك

امى بتقوم بالدور ده من كريسيها وتقعد تزعق للناس اللى حوالينا ...وتزق فيهم وتدوس فرامل من مكانها على اساس ان قاعدة المراقبة الجوية عندها وناقنا بس ميكرفووون صغير نهش بيه النا مع حتة عصايا صغنونة وحووووووووول

رابعاً: القلب الجميل الابيض

اهلا بيكى يا رفيقة كفاح عفرررررريت الاسفلت ...بس هو عندى استفسار صقر قريش ماشى لكن ليه الكريمات ؟؟

وعلى العموم اختك شيكو ..من عفاريت طريق الدائرررررى القرية الذكية "من الفلاحين يعنى واعجبك على الاخر"

والان جاءانا البيان التانى "موش التالى" حيث انكم بقيتوا اصحابى وقبلتوا كتاباتى ...هاكتبلكم اخر اخبارى ..ومذكرات فرستى ابتداءاً من هيثم سواق الباص نهايةً بعم لطفى الساعى ومروراً باعضاء الهيئة القومية للفرسة الالكترونية "ده زى التوقيع الالكترونى" والبقية تأتى عقب الموجز انتظروووووونى

الغريب انكم بتتكلموا على الانوثة ...والعنوسة ...وبالمرة بقة اتكلموا على البنات المفروووسة

وفى اعتقادى ان الفرسة هى العامل الرئيسى فى فقداااااااان وضياع الانوثة "بذمتك يا لماضة مابتحسيش انك متغااااظة من اللى بيحصل فينا ؟؟؟

طب يا قلب ابيض موش حاسة انك بتتحولى وبتبقى القلب الاسود من الغيظ ..وتحسى ان البياض اللى جواه كله راح مع تايد فى الغسيل ...؟؟

وعلى فكرة الفرسة دى بتخلى البنت مننا مضرررررررررربة وبقوة عن الجواز ...وده اكيد اللى بيوصلنا للعنوسة

لو عاوزين تتأكدوا اقروا كتاب انا عاوزة اتجوز وانتم تتاكدوا من كلامى ده !!!!

المهم اسيبونى دلوقتى بس اخلص الفرسة اللى انا مفروساها فى الشغل وان شاء الله نعقد النية على الكلام المرة الجاية

فاصــــــــــل ونواصـــــــــل

[MaYousof]

ابتداءاً من هيثم سواق الباص

سواق الباص اسمه هيثم! wst::

معلش أنا بضحّك معاكم بس والله

أنا بحترم سواقين الباصات جدا بجد

وبعزّ كل اللي اسمهم هيثم قوي قوي

هي بس أول مرة أسمع عن سواق باص اسمه هيثم :blink:

مصيره ييجي اليوم اللي أسمع فيه عن سواق الباص اللي اسمه وائل

على فكرة هيثم ووائل دي من الاسماء العربية الأصيلة اللي موجودة في جزيرة العرب من ايام الرسول عليه الصلاة والسلام ومن قبل كده كمان.

[وافدة هنا و عاملة بالخارج]

صراحة بسجل متابعة

و بصراحة أكتر مبسوطة قوي لأني بجد كدا ممكن ننظم حزب المفروسين و بصراحة واضح إن الحزب هيشمل كل الفئات و الأعمار و كل الحالات الإجتماعية

[رضوي]

السلام عليكم ورحمة الله وبركاته

الأخت العزيزة شيكو

لييييييييييييييه بس مفروسة من ايه

هو فيه حاجة في البلد كلها تفرس لاسمح الله

دة حتي الدنيا ربيع والجو بديع ع الآخر

طيب أسألك سؤال ............ ايه اللي موجود في البلد ومش بيفرس ........... لدرجة ان احنا قربنا علي انفلوانزا الفرسة ..........

لا دة بجد ........ كل حاجة تفرس عاي الأخر ...... بس مش حينفع ان احنا نتفرس كدة علي طول لازم ناخد مناعة

بالنسبة بقي للعلماء الأفاضل وملوك الطرق والكباري ( سائقي المكروباصات ) ياسلااااااااااااااااااااااااااااااام مش قادرة اقولك انا بحبهم ازاي ......... ............ حب فوق الوصف والخيال ................ قلبي بيزقطت لما اشوف مكروباص كدة ماشي وواخد الطريق لحسابة وماشي بالدراع ولا هامه حاجة

وخصوصاً لما يكون الطريق زحمة أو فيه اختناق مروري ....... عبقرينو بيحل كل المشاكل

اما لو طريق سريع ..................... من الأحسن انك تمشي علي الجاني الأيمن وتخليه يعدي براحته .... خليكي ماشية ورا عربية تريلا مافيهاش بنزين ....... لحد لما تطمني ان مافيش مكروباصات ........ وخصوصا ع الدائري ....... ربنا يستر

طيب دة في مرة كنت مع ابي العزيز وكان مستعجل شويتين ....... فكان ماشي بسرعة عالية ..... لدرجة انه سبق مكروباص ....... تخيلوا سواق المكروباص اعتبرها اهانة ........... اه والله ........ ودخلنا في مسابقة مع المكروباص ........ لحد لما بابا سابه يعدي علشان بس نوصل بالسلامة

دة لو كنتي بتسوقي جنب مكروباص في عربيتك الخاصة ياعزيزتي

أما بقي لما تركبي معاه ........... ياسلااااااااااااااام تبقي قاعدة تنطقي بالشهادة لحد لما توصلي

ولو اخدتي حبيتين شجاعة وحاولتي تقوليله بالراحة شوية لو سمحت .............. يقول وبسوط مسعور ( جرى اييييييييييه ياانسة ماتيجي تقعدي مكاني احسن )

بس ربنا بيسلط ابدان علي ابدان ................. ربنا يكرم أمناء الشرطة بيربوهم تمام

حد بقي يقولي ايه علاقة دة بالأنوثة ,,,,,,,,,,,,,,,,, اه ماانا عارفة

طيب لما نشوف الحاجات دي كل يوم ...... نعمل ايه .......

طبعاً نحط الوش الخشب ونتعامل من وراه مع الناس دي ............ وبعدين نشيل الوش الخشب ونبقي عاااااااااااااااااااادي

يالا كملي مستنينك

[لماضة مصرية جدا]

السلام عليكم و رحمة الله و بركاته

إوعي وشك...... هو ده

إنتي فين مين زمان يا شيكو بون.... ع فكرة احنا كده بقينا صوحاب.....كتاب اناعايزة اتجوز انا قريته 3 مرات و في كل مرة بضحك اكتر م الاول

بقولك يا أوختشي... أنا و انتي هنبقي حكااااااااااااااااية....

احنا نفتح كوشك كده محندق....

انتي تبقي مفروسة

و انا ابيع بسبوسة باللماضة و كدهوت يعني (كل ما تيجي كدهوت لازم افتكرك يا حبي الغالي سين سين.... اين انت....؟؟؟)

و الله بجد انتي خوشي ع موضوع دعوة للابتسام.... لا مش طنطك ابتسام اللي ابنها حسام و عايز يتجوز بس معهوش تمن الحمام (بقول يمكن تكون ودنك تقيلة و لا حاجة ما هو انا لسه بعاين صوحابي....هع هع هع)

و افتحي باب كده اسمه يوميات بنوتة مفروسة.... و احدفي بقي

اصل يا أوختشي نفسيتي اتقطعت خالص كل ما اخش الباب ده... يعني يتصلوا بيا عبر القارات أقولهم مشغولة لشوشتي في حل مشكلة العنوسة (إففففففففففففي ... فيه ريحة وحشة دخلت علينا)

و عشان كده يا رياسة... أنا هكون اول واحدة مستنياكي هناك... و هنضرب نار و اعملك احلي تسييحة

انتي لسه هتهرشي في راسك....

انتي ركبي الشنب المستعار.... و قولي انا شفيق يا رااااااااااجل و ربنا هيبقي باب جامد

مستنياكي

1.....2......ها..... لسه مروحتيش

يوووووه نسيت يا جدعان حد ينزل الشارع يجبلنا شيكو من قدام الدريكسيون

فوتكم بعافية

[مسافر زاده الخيال]

ابتداءاً من هيثم سواق الباص

سواق الباص اسمه هيثم! :lol:

معلش أنا بضحّك معاكم بس والله

أنا بحترم سواقين الباصات جدا بجد

وبعزّ كل اللي اسمهم هيثم قوي قوي

هي بس أول مرة أسمع عن سواق باص اسمه هيثم :lol:

مصيره ييجي اليوم اللي أسمع فيه عن سواق الباص اللي اسمه وائل

على فكرة هيثم ووائل دي من الاسماء العربية الأصيلة اللي موجودة في جزيرة العرب من ايام الرسول عليه الصلاة والسلام ومن قبل كده كمان.

wst:: :lol: :lol: :lol: :lol: :wub: :wub: :) looooooooooooooooooooooooooooooool

[الباشمهندس ياسر]

وعلى فكرة الفرسة دى بتخلى البنت مننا مضرررررررررربة وبقوة عن الجواز ...وده اكيد اللى بيوصلنا للعنوسة

لو عاوزين تتأكدوا اقروا كتاب انا عاوزة اتجوز وانتم تتاكدوا من كلامى ده !!!!

انا قريت الكتاب اكتر من مرة

و الدوك مجلهاش عريس مناسب اصلا

كلهم كسر

يعني الموضوع ملوش علاقة باضرابها او عدم اضرابها

[MaYousof]

مازلت منتظرا ويحدوني الأمل إن واحد من الشباب اللي زي الورد, أو واحدة من الآنسات و السيدات اللي زي الياسمين, اللي معانا هنا يتطوع ويقوم بوقفة مع النفس كده ويوضحلنا تعريف الأنوثة إيه. لأن بصراحة حاصل عندي لبس في المفاهيم وماعدتش قادر أميز بين الأنوثة والمياصة بعد ما قرأت الردود في الموضع ده. يعني أنا لقيت إني لو عملت استبدال لكل كلمة أنوثة في الردود اللي هنا بكلمة مياصة الكلام هيبقى أكثر انسجاما ومنطقية في أكتر من 66% من الردود طبقا لقاموس مفرداتي الشخصي.

صحيح عبارات زي "المايصة هي الحياء" وزي "المايصة هي انكار الذات" هتكون بعد الاستبدال المقترح عبارات أقَل انسجاما ومنطقية بس دي من نوادر الردود, والغالب الأعم في الردود هيكون ماشي أكثر منطقة بعد عملية الاستبدال. مش عايز أدي أمثلة على العبارات بل والردود الكاملة اللي - طبقا لقاموسي البدائي - هتنضبط جدا بعد الاستبدال, عشان احنا شعب بينقمص بسرعة. بس أنا ممكن اتجرأ وأدي مثل سريع, مثلا عبارة "لقيت واحدة بتخر مايصة" عبارة منسجمة اخر حاجة.

المهم أنا محتاج تحديث شامل لقاموسي البدائي

أي حد متطوع من الورد أو الياسمين اللي معانا هنا يساعدني؟ wst::

[herohero]

بصراحة جزء كبير من مشكلة العنوسة يتحمله الشباب الذكور صح فيه تعنت من اهل الفتيات في بعض الاحيان لكن الشباب مش هو المستوى المناسب انا مش بعمم وبصراحة اكتر بنات بيعانوا من كده الطبيبات يعني بتكون طبيبة هتاخد واحد مؤهله اقل منها عارف والله ان ده عادي وان مين قال ان لازم الدكتورة تتجوز دكتور لكن ده مجتمعنا وده تفكير بناته

تيجي البنت الدكتورة تقولك لازم دكتور او ع الاقل مهندس انا اختي قالت لي كده وانا مهندس وفضلت مصممة لحد ما اتجوزت من طبيب وصدقوني مافارقة بس الدماغ نقول ايه

المشكلة ان الدكتور بيقولك اجوز واحده عادية عشان انا هكون مشغول محتاج واحده متفلاغة للبيت يعني البنت الطبيبة خسرت من ابناء الكار الواحد

عشان كده بجد بتعاطف مع البنات لان هم ذنبهم ايه مفيش ولاد اد المسئولية وفي الاخر هنيجي نتحجج بان البنت المصرية فقدت انوثتها

ماهو برده الراجل فقد تحمله للمسئولية وفقد الكثير

[shiko]

التالتة

صباحوووووو عسل

ياناس يافل شيكو حبيب الكل

.....حطيت الشنطة من ايدى وقعدت على الكمبيوتر وهاتك ياكتابة للناس اللى زى العسل

بجد انا فرحااااااااااااانة بيكم جدا ........اخيرا لاقيت ناس يشاركونى ويوافقونى الفرسة ونبقى مفرووووسين كلنا كده على بعض وحط فرستك على فرستى (زغروتتتتتتة يا بنات ....بلوا الشربات ...الشربات بسكون الشين موش يفتحها علشان الروايح بس انا فاهماكوا)

اخويا العضو الرايق وموش مفروووووووووس بالمرة يوسف

بالنسبة لهيثم بيه لوسمحت ...هو فعلاً سواق حضرتك بس موش اى سواق سواق صاحب مزاج ...والسواقة عنده احتراف موش هواية يعنى موش لقمة عيش والسلام

هيثم حضرتك صاحب شهادة ما بعد الكى جى تو فى ادارة الدريكسيون بالصباع الصغير من وزارة السواحة قصدى السياحة يعنى اجدع سواق يسيحلك على مستوى الدائرى كله وكلالكسات بقى وتيت تيت وكده يعنى

علشان كده احذر احذر من انك تلمح اى تلميحات لكونه هيثم او غيره هتلاقى رخصك اتسحبت وشرطة السواحة تقفل الشارع على عربيتك ..وانت الخسران

اختى الحزبية واقفة قصدى وافدة حضرتك موافقنى تماما نطالب بحزب للمفروسين على ان يكون مجلس الادارة من بنات اصحاب الفرسة الاكبر وكل واحد وفرسته لامواخذة يعنى اكيد اكيد هابقى رئيس مجلس الادارة وهاديك منصب العضو المنتدب ...عشان باين انك لسه فى اول الطريق ....

رضوى هانم يرضى عنك ربنا يا رضوى واللله عنك حق يا سعاد الدنيا ربيع والجو بديع ...

وبالنسبة بقى للوش الخشب بتاعك ممكن اسالك انتى بتستعملى اى نوع ؟؟يعنى ارو ولا خشمنيوم ؟؟

على اساس انى باستعمل نوع وموش مريحنى الخشب بتاعه موش اد كده وبدور على حاجة تكون استعمال طبيبة بس السعر يكون مهاود فلو عندك المام بالموضوع ياريت تفيدينى ....وحياتك

لا بجد يارضوى انا فعلا لابسة وش خشب ومن كتر ماانا اتعودت عليه خلاص بقى واجب وطنى لابد من لبسه ...زى تحية العلم بتاعة المدرسة كدة حاجة مالهاش اى علاقة بالتعليم فى شىء

لماضة ....بجد انتى تحفة والواااااضح او اننا هانبقى صحااااااب ياشابة وهانعملوا دويتوا فشر اليسا ونانسى عجرب وبالسبة لكوشوك مشروع الالفية القادمة ...فانا موافقة بس زى ماقلت اقل من رئس مجلس ادارة يبقى يفتح الله

وبعدين انتى اش عرفك بحسام ؟؟وامه كمان تعرفيها؟؟ ده احنا طلعنا معارف بقى !!!

انا اركب دقن واروح لابوكى ......شافيق ياراااااجل!!!

وعلشان انتى حبيييييتى حبييييتى يا عنى انا هابقك هناك بس وحياتك شوفى لاحسن حد يكون كاشف راسه ولا حاجة ....شيلوا الميتين اللى تحت ...وياريت بلاش ضرب النار لاحسن بقلق.

الحج بقى مسافر زاده الخيال ....انا شامة ريحيت تريقة على هيثم والله يا جماعة اسمه هيثم وسيطه واااااااسع جدا على الطريق الدائرى ...ومعروف انت بس اسأل عليه هناك وهاتبسط منه على الاخر

وبعدين هو فعلاً اسم على مسمى ...يعنى شكله يجيب هيثم برضه ناهيك عن اللبانة والذى منه لذوم الشيواكة

علشان كدا انا باؤكد لسعادتك انك هاتطبسط وتزئطط من هيثم جدا وخصوصا لما تعرف مغامرته مع سيارات النقل المكتوب عليها مـــــــواد مشــــتعلة بتجنن لما يشوفها ماتعرفش بيحصله حالة من الهسس انه يجرى وراها ويزنق عليها نفسى اعرف ليه ..

المهم دلوقتى انا عاوزة ادخل فى الموضوع الاساسى علشان مطولش عليكم ولا اطول اهوه السنة الجديدة داخلة وبراحتنا...

[shiko]

المهندس ياسر ...

ايوة كده ...قريت الكتاب يعنى شاركة اخواتك الفرسة ...وعلى العموم انابشاركك الراى ان كل العرسان ماكنوش مناسبيين لبرايد بس اللى اقصده هنا ان الناتج المحلى من وجود الاشكال دى فى الوقت ده عند برايد انها بقت موش عاوزة اتجوز يعنى بمعنى اوضح انا مفرووووووسة وطول مانا مفروسة مضربة فخمتنى يا خواجة ولا لسة ؟؟؟

[shiko]

يوسف

انت ايه منتظر على محطة مترو ؟؟

وايه نظام الجناين معاك ...ورد وياسمين وفل وزهور ونباتات

بالنسبة للتعريف اياه ...انا هافيد بس الديكشنرى كبير يعنى التعريف صعب فى كلمة واحدة

وبالنسبة للمياصة فالكلمة دى ذات مدلول موش مقبول فى مجتمعنا الشرقى

يعنى موش مقبول مثلاً ان الواحد يسمع ان الناس فى النادى او الشغل او خلافه بيقوله على مراته او اخته مايصة.

بس منكرش ان المياصة صفة من صفات الانوثة خصوصا لومكانتش مفتعلة وطبيعية فى البنت ...يعنى بلاقى كده احياناً مياصة لاهى وقتها ولا لايقة على صاحبتها وبتبقة مفتعلة جدا احيانا وده مابيبقاش مقبول عند كل الناس ...

بس الانوثة فى نظرى انا حاجة تانية خاااالص حاجة تتلمس متتوصفش يعنى صعب جدا تعبر عنها بحروف او كلمات مهما كانت معبرة حاجة كده وليدة الطبيعة بتاعة ربنا ...يعنى لو كتبتلك مثلا انها تاء التائنيث

ده ممكن يكون ظلم للمعنى ..علشان كدة انا موش عاوزاك تحصرها فى كلام عاوزاك تشوف ردود افعال الناس الحلويين اللى معانا وتحس بالمعنى

كمان عاوزاك تعرف ان المعنى بيختلف باختلاف التربية والخلفية المعتقدية للبنت او للولد ..

وباختلاف الظروف والمواقف ..بس ادينى فرصه هاحكيلك على حاجات كتييييير فى عالم البنات هاتعرف منها ان البنت الواحدة ممكن تكون فى منتهى منتهى المياصة بس تبان انها جبل من جليد واول ما تتعرض لسخونة موقف واحد تلاقى انهيار الجليد وذوبانه اشتغل والانوثة طغت والجليد اتحول لانهاروهاتك انوثة بقة ومياصة والدنيا تتحول تماما...

[shiko]

هيروو البطل

تصفيق حااااااااااااااد بجد انا بحييييك انت اكتر من هايل وهيروووو ده اسم موفق جدا ياريت يا جماعة حد يركز معااااااه شوية بجد هايلاقى ان عنده حق

وهنا اسمحلى اوضح كلمة مهمة

الذكـورة كلمة عكس معن الانوثة الكلمتان متضادتان والتضاد هنا يبرز المعنى ويوضحه

والمعادلة بتقول ان المرأة بأنوثتها ومشتملات الكلمة = نصف المجتمع

بالتالى بطرح المجتمع من نصفه = النصف الاخر وهى الذكور إذاُ العلاقة طردية كلما زادت الذكورة زادت الانوثة وكلما انسحبت الذكورة او قلت والحقيقة ومحد يزعل منى انعدمت انعدم معاها الانوثة وحصل الاختلال فى العلاقة زى اللى حاصل دلوقتى.

[herohero]

هيروو البطل

تصفيق حااااااااااااااد بجد انا بحييييك انت اكتر من هايل وهيروووو ده اسم موفق جدا ياريت يا جماعة حد يركز معااااااه شوية بجد هايلاقى ان عنده حق

شكرا ع التحية بس بجد ده الواقع وانا مش منحاز لطرف لكن بجد انا اللي ملاحظه كل مايرتفع مستوى تعليم البنت ومستوها المادي والاجتاعي كل ما يكون الفرص اللي امامها اقل يعني ازاي انا هعمل نفسي الكل ف الكل وانا مش قادر احتويها يعني دكتورة ف الجامعة لها مكانتها الاجتماعية وانا موظف عادي هل هيكون سهل

بالعكس انا شايف ان كل البنات اللي سوقهم ماشي هم اصحاب المستويات التعليمية العادية ومستوى مادي قليل وحتى ع مستوى الشباب الشباب اللي بيتاخرو ف جوازهم كلهم غالبا قادرين من كافة النواحي لكنهم يبحثون عن شيئ معين انما الباقي بيتجوز لانه اتخرج واشتغل يعمل ايه بعد كده مفيش شيئ ف دماغه لا طموح ولا غيره يقولك اتجوز

عشان كده تاخر سن الزواج لدى الفتيات ليست له علاقة بان الانوثة قلت ، وبصراحه اي انوثة وانت عاوز واحدة تجيب قرش انا سمعت ده من صحاب ليبا كتار لما بيجي يتجوز بيحسبها اهلها هيورثوها كم وهي شغاله ايه وهيجي منها كم

وبعد كده تيجي تتكلم ع الانوثة ما انت اصلا تنازلت عن رجولتك وقوامتك

انا متاكد ان البنت المصرية ممكن تبقى ف دلع اللبنانية اللي انا مقتنع انها لاتصلح زوجة بالمرة

لكن اذا افترضنا مناسبتها وكونها نموذج للبعض خلاص دلعها زي ما اللبناني ما بيدلع زوجته ف السعودية مثلا بيجيب لها عربية بسواقها لطلباتها ومش بتشيل عيل وتتعب نفسها يا خدامه تشيل الاطفال يا عفوا يعني هو اللي بيشيل العيال

يعني الشيئ لزوم الشيئ

[الباشمهندس ياسر]

تيجي البنت الدكتورة تقولك لازم دكتور او ع الاقل مهندس انا اختي قالت لي كده وانا مهندس وفضلت مصممة لحد ما اتجوزت من طبيب وصدقوني مافارقة بس الدماغ نقول ايه

انا اعلن رفضي تماما لمسألة تفضيل حد علي حد طبقا للمؤهل

و الكلام ف المداخلة يحتمل تنويه بافضلية الاطباء علي المهندسيين من وجهة نظر العروس المذكورة سلفا

و من المعلوم بالسليقة ان ميزان الرجال الادب قبل كل شيء

و لكن ان نزلنا الي مستويات اخري ..

فــ احنا بالصلاة ع النبي مبنديش حد معانا اساسا

بلا سبرتو بلا وجع قلب