التشطيب وسنينه

[president]

الأخوه الأفاضل . لقيت مواضيع كتير بتتكلم عن التشطيب وما ادراك عن التشطيب لواحد مغترب موضوع قمة الأرق والقلق .

المهم ان شاء الله ناوى اشطب شقه فى الصيف ده .

انا خبرتى فى التشطيب = صفر كبير . طبعا انا مقتنع تماما برأى بعض الأعضاء والأخ سى السيد بضرورة الأستعانه

بمكتب ديكور . انا دلوقتى فى مرحلة البحث عن المواد المستخدمه فى التشطيب . واول استفسار عندى بخصوص

البلاط . ايهما افضل الرخام او البورسلين او السيراميك او الباركيه او DHFاو سيراميك الباركيه . انا مش بتكلم فى المطلق

لأن فى المطلق اكيد كله هيقول الرخام أفضل عشان أغلى . انا بصراحه عايز اعمل توازن بين الجوده والشكل او الفخامه

وطبعا السعر . بس مش لدرجة اعمل زى واحد من جيرانى شارى رخام ب مئتين الف جنيه –ماشاء الله ولا حول ولا قوة الا

بالله – طبعا كل واحد وامكانياته . انا فى دماغى لو هاعمل تشطيب سوبر سوبر سوبر لوكس للشقه كلها مش هيزيد عن

الرقم ده مساحة الشقه صافى 200 متر (طبعا ميزانية المطبخ جوه الرقم ده ).

ارجع تانى ايهما افضل الرخام او البورسلين او السيراميك او الباركيه او DHFاو سيراميك الباركيه من ناحية الجوده والشكل

او الفخامه وطبعا السعر . وايه موضوع لمعة البلاطه وتأثيرها فى التنضيف (مطفى ومش عارف ايه ) .

حاجه بره الموضوع ( الفاضله ماما نونا ماشاء الله ولا حول ولا قوة الا بالله هوا حضرتك جبت خبرة التشطيب والديكورات دى منين )

تحياتى وشكرا لكم .

تم تعديل 10 ديسمبر 2009 بواسطة president

[HanaaOsama]

الأخوه الأفاضل . لقيت مواضيع كتير بتتكلم عن التشطيب وما ادراك عن التشطيب لواحد مغترب موضوع قمة الأرق والقلق .

ايهما افضل الرخام او البورسلين او السيراميك او الباركيه او DHFاو سيراميك الباركيه .

انا سمحت لنفسي ارد بالرغم من خبرتي القليله المتواضعة وسني الي مش كبير اوي انا تابعت بدقة تشطيب شقتي " شقة دوبلكس " ولاني والحمد لله الناس كلها شايفة ان ذوقي حلو في اختيار الالوان والتناسق بين الاشياء و باهتم بالتفاصيل,,,

انا رأيي ان افضل شئ بالنسبه لغرف النوم او المكتب ( الباركيه او ال dhf او سيراميك الباركيه)

الباركيه طبعا ممتاز لكن عيوبه تظهر بعد سنين لان كانت شقة والدي باركية و بعد العمر الطويل من معيشتنا فيها حالته بقت صعبة

الDHF اختي مركباه شكله جميل و تنظيفة سهل و طبعا هو و الباركيه في الشتا مفيش حاجة اسمها الارض ساقعة وكدا :)

سيراميك الباركيه برضة جميل و شكل الباركيه و مش املس " يعني زي الحشب ما بيزحلقش " و بالنسبة للسقعة اقل من السيراميك العادي , انا مركباه في غرفة النوم و المكتب

اما بالنسبة للريسبشن اما بورسيلن لمعة كامله او رخام مع عمل سجاده " اطار" بوزرات الارضيات " اشيك كتير من السيراميك المقطع و المعمول علي هيئة اشكال" لكن طبعا اغلي لانها بالواحده ,, مع طبعا ملاحظه اتجاه الاطار و مساحته مع العفش في هذه المنطقة يعني مثلا ميكونش الاطار هيجي تحت النيش ولا تحت الكنبة

اانا مجربتش اضع صور في المنتدي لكن هشوف لو قدرت احط صوره

بالنسبة لللبورسيلين في نوع ليزر و نوع عادي ,,, في نوع منهم مش فاكره مين " لكن هو الي انا مركباه " التجريح بيبان فيه يعني مثلا طبعا الصنيعيه بتوع الدهان الي بيشتغلوا اكيد بعد تركيب السيراميك بيجروا البرميل الي بيقفوا عليه ولا يهمهم و ده ساب اثر للتجريح علي البورسيلين

وايه موضوع لمعة البلاطه وتأثيرها فى التنضيف (مطفى ومش عارف ايه ) .

بالنسبة بقي لموضوع لمعة البلاطه وده مش هيفرق الا في سيراميك المطبخ و الحمام لان الموضة بتاعة اليومين دول "السيراميك المطفي المحبب ده " في المطابخ و الحمامات و خصوصا المطابخ و هي فعلا اشيك كتير لكن التنظيف مشكله ورغم علمي بالمعلومه ديه لكن جبته في المطبخ لان الوزره شيك و بارزه كدا و بلاطات الديكور رائعة لكن لازم تركب علي البلاطة المحببه المطفيه ديه

هنقول ما علينا بالنسبة للنظافة و نركب فلتر فوق البوتاجاز وكدا لكن المشكله مش في الزيت و الابخره انا قبل ما اسكن اصلا ابص علي السيراميك من فوق " هو بالمناسبة بيج فاتح "

الاقي " هبو :) " اخضر علي السيراميك امسحة ميتمسحش :)

ده طلع ايه يا تري ؟!

اتاري انا اكمني مركبه في المطبخ رخام اخضر و طبعا ده اتقطع في المطبخ و اتساوي و كدا ,,, البودره الناتجة عن التقطيع و المسح الخضرا لصقت في السيراميك :lol:

يعني هي مش واضحة اوي لانها فوق

لكني للاسف باهتم بالتفاصيل mc(:

المهم يعني كل واحد وحسب اولوياته ممكن السيراميك الامع العادي يكون احسن له او ممكن يفضل الموضة و الاشيك :)

معلش طولت عليكم و لو حد مهتم بالصور هحاول احطها

[president]

انا سمحت لنفسي ارد بالرغم من خبرتي القليله المتواضعة وسني الي مش كبير اوي انا تابعت بدقة تشطيب شقتي " شقة دوبلكس " ولاني والحمد لله الناس كلها شايفة ان ذوقي حلو في اختيار الالوان والتناسق بين الاشياء و باهتم بالتفاصيل,,,

انا رأيي ان افضل شئ بالنسبه لغرف النوم او المكتب ( الباركيه او ال dhf او سيراميك الباركيه)

الباركيه طبعا ممتاز لكن عيوبه تظهر بعد سنين لان كانت شقة والدي باركية و بعد العمر الطويل من معيشتنا فيها حالته بقت صعبة :)

الDHF اختي مركباه شكله جميل و تنظيفة سهل و طبعا هو و الباركيه في الشتا مفيش حاجة اسمها الارض ساقعة وكدا :)

سيراميك الباركيه برضة جميل و شكل الباركيه و مش املس " يعني زي الحشب ما بيزحلقش " و بالنسبة للسقعة اقل من السيراميك العادي , انا مركباه في غرفة النوم و المكتب

اما بالنسبة للريسبشن اما بورسيلن لمعة كامله او رخام مع عمل سجاده " اطار" بوزرات الارضيات " اشيك كتير من السيراميك المقطع و المعمول علي هيئة اشكال" لكن طبعا اغلي لانها بالواحده ,, مع طبعا ملاحظه اتجاه الاطار و مساحته مع العفش في هذه المنطقة يعني مثلا ميكونش الاطار هيجي تحت النيش ولا تحت الكنبة

اانا مجربتش اضع صور في المنتدي لكن هشوف لو قدرت احط صوره

بالنسبة لللبورسيلين في نوع ليزر و نوع عادي ,,, في نوع منهم مش فاكره مين " لكن هو الي انا مركباه " التجريح بيبان فيه يعني مثلا طبعا الصنيعيه بتوع الدهان الي بيشتغلوا اكيد بعد تركيب السيراميك بيجروا البرميل الي بيقفوا عليه ولا يهمهم و ده ساب اثر للتجريح علي البورسيلين

أخت هناء . أشكر حضرتك على الرد المستفيض . بس اسمحيلى حضرتك دخلتى فى تفاصيل فى الديكور وانا اساسا ميح ومش عارف الأساسيات.

فاسمحيلى انا عندى كام سؤال وهاقسمهم على كذا مداخله .

السؤال الأول : زى مافهمت من حضرتك اننا نستثنى الباركيه ونخلينا مع dhf او سبراميك الباركيه طب الواحد لما بيحب يختار حاجه بيحط 3 معايير

الجوده والشكل والسعر . ليه اختيار حضرتك اختلف عن اختك برغم ان الأتنين كويسين .

نفس السؤال بس بين البورسلين والرخام ؟.

حضرتك قلقتينى من حاجه هوا انا المفروض اكون متخيل شكل العفش وألوانه قبل ماركب البلاط ولا الموضوع مش للدرجه دى ؟

طبعا ياريت حضرتك تحطى الصور . هوا حضرتك استعنتى بحد ولا كله كان على ذوقك ؟

شكرا ليكى

تم تعديل 10 ديسمبر 2009 بواسطة president

[HanaaOsama]

2أخت هناء . أشكر حضرتك على الرد المستفيض . بس اسمحيلى حضرتك دخلتى فى تفاصيل فى الديكور وانا اساسا ميح ومش عارف الأساسيات.

فاسمحيلى انا عندى كام سؤال وهاقسمهم على كذا مداخله .

السؤال الأول : زى مافهمت من حضرتك اننا نستثنى الباركيه ونخلينا مع dhf او سبراميك الباركيه طب الواحد لما بيحب يختار حاجه بيحط 3 معايير الجوده والشكل والسعر .

ليه اختيار حضرتك اختلف عن اختك برغم ان الأتنين كويسين .

اولا الباركيه مش وحش و بالنسبه للي بقي حالته صعبة ده ده بعد 30 سنه هو لو اتاحفظ عليه كويس و بعد عن المياه و كل مده طويله يتلمع بوش ورنيش اعتقد هيكون كويس

بالنسبة لل DHF هو برضة لازم يبعد عن المياه اما الفرق بينهم وليه اختلف اختياري عن اختي :-

النقطة الاولي ال DHF اغلي لكن مش ديه كانت المشكله بالنسبة ليا

ثانيا زي ما قلت لحضرتك انه المفروض يبعد عن المياه و لتنظيفة يبقي قماشه مبلوبه بسيط او المساحة الجديده ديه الي بتتعصر المهم اختي ده اسلوبها في التنظيف ببساطة و هدوء انا الصراحة احب اغرق ميه

ميزه ال DHF انه امن للاطفال محدش مثلا يتزحلق من نقطة ميه علي الارض و دافي في الشتاء و مش هتحتاج سجاد مجرد حاجة كده ديكور

نفس السؤال بس بين البورسلين والرخام ؟.

بالنسبة للسعر الرخام اغلي اعتقد بس مش اكيد لان البورسلين اسعاره متفاوته و كذلك الرخام انواع و اسعار لكن لو بالنسبة للرخام الجيد " اغلي طبعا "

بالنسبة للشكل اعتقد البورسلين و الرخام الاتنين شيك

حضرتك قلقتينى من حاجه هوا انا المفروض اكون متخيل شكل العفش وألوانه قبل ماركب البلاط ولا الموضوع مش للدرجه دى ؟

لا مش للدرجة ديه ما زي ما قلت لحضرتك انا بهتم بالتفاصيل و بعدين علي الاقل يكون في تخيل مبدئي لان مثلا هتعمل حضرتك اطار او سجاده شيك و حلوه وتلاقي بعدين نصها اختفي تحت الكنبه او النيش او نصها تخت الترابيزه والباقي بره يعني اعتعقد بلاش احسن :lol:

طبعا ياريت حضرتك تحطى الصور . هوا حضرتك استعنتى بحد ولا كله كان على ذوقك ؟

هحاول اشوف موضوع الصور ده

شكرا ليكى

العفو وانا بانتظار مزيد من الاسئله

[HanaaOsama]

نسيت ارد علي السؤال الأخير ,, انا مستعنتش بحد كله من اختياري و علي فكره ده من اول بناء الشقة وليس التشطيب فقط

تم تعديل 10 ديسمبر 2009 بواسطة HanaaOsama

[HanaaOsama]

حاولت احط صوره لكن فشلت محدش عارف ازاي احط صوره

[mama nona]

http://m5zn.com/

تدخلى عالسايت ده وتحملى الصورة من على جهازك

وبعدين تدخلى فاضافة رد

وتشوفى العمود ال ع اليمين وتقرأى نوع الاضافة ال انتى هتضيفيها وتنتظرى لغاية ما يحمل الصورة

وبعدين تبعتيها

[president]

أخت هناء . أشكرك مره ثانيه على ردودك .

وضحت الأمور فى الفرق بين DHF وسيراميك الباركيه . انما الفرق بين الرخام والبورسلين وعلى اى اساس يتم الأختيار لسه فى لخبطه شويه .

زى مافهمت من حضرتك يفضل فى غرف النوم سيراميك الباركيه او DHF والريسيبشن رخام او سيراميك .

السؤال الثانى

فقره أ

ماهى البلاطات المرشحه لكل مما يلى الريسيبشن - تراس الريسيبشن - غرف النوم - غرف مكتب صغيره ملحقه بغرفة النوم الرئيسيه- الطرقه مابين الغرف - بلكونة غرفة النوم ؟

انا قاصد اكرر بعض الأجابات عشان فى الآخر ان شاء الله اعمل حاجه مجمعه .

فقره ب

على اى اساس بختار حجم البلاطه فى الريسيبشن يعنى كل ماكبرت البلاطه بقت اشيك ولا الموضوع هيبقى نسبى مع المساحه

ولو كانت الريسبشن مساحته 67 متر حجم البلاطه المناسب يكون كام .

فقره ج

فى دماغى فكره مجنونه بس حابب اخد رايكم فيها . الفكره فرضا لو انا حابب احط فى الريسيشن 3 قطع

حابب احط كل قطعه على مستوى تانى ولو حبيت اروح مثلا من الصالون للسفره انزل من مستوى الصالون وامشى لغاية مستوى السفره

واطلع للسفره . يارب تكون الفكره وصلت . بس مش عارف ليه حاسس انى بتكلم عن تقسيمة شوارع مش شقه

ياترى اللى انا بقوله دا هبل ولا عادى. انا خايف اقوله لمهندس الديكور يسيبنى ويمشى عشان هوا دا اللى حصل مع مراتى انها ماردتشى عليا وسابتنى

وقامت وكانت بتردد كلام من قبيل انا ايه اللى خلانى اجوز واخلف من الراجل العبيط ده .

بس انا حابب الفكره دى اوى ياترى لو هيا مقبوله ينفع معاها البورسلين او الرخام ولا هيحتاج حاجه تانيه .

فقره د

الريسيبشن عندى سايح يعنى على شكل مربع تقريبا عايز اعمل فواصل بين القطع المختلفه وغالبا هيكون شغل خشب ( صح كده )

يعنى مش حوائط اسمنتيه ياترى لو هاعمل الشغل ده هابتدى من فوق البلاطه ولا من الأرض نفسها ؟ يعنى اعمل الشغل وبعدين الزق البلاطه؟

ولا عادى ممكن اركبه فوق البلاطه .

انا سايب الحمامات والمطابخ للآخر

شاكر لحضرتك أخت هناء .

الفاضله ماما نونا .مستنى ارائك القيمه

تحياتى .

تم تعديل 10 ديسمبر 2009 بواسطة president

[doha]

اقولك خبرتي المتواضعه في هذا المجال ..

بالنسبة لمين افضل الرخام ولا السيراميك ولا البورسلين انا بفضل البورسلين ..

اولا لان شكله حلو واكثر فخامة من السيراميك وفي نفس الوقت ارخص من الرخام ..

ثانيا لان البورسلين بعكس السيراميك مصبوب صب زي البلاط كده بينما السيراميك عباره عن بلاطه فخار يادوب واخذة على وجهها طبقة ملونه ومعنى كده ان مع الوقت الطبقه دي بتنمسح وتلاقي رسوماتها راحت ( لاحظها في المستشفيات مثلا او الاماكن الي عليها اقبال جامد وحاطين سيراميك تلاقيها ممسوحه يادوب لون الخلفية بس الي باين اما النقوش راحت تقريبا ) .. البورسلين مفيهوش المشكلة دي لانه زي ماقلت لك قالب كامل من نفس الشكل يعني ( والعهده على الصنايعية ) قالوا بان ممكن ( تجلي ) البورسلين بعد كام سنة تماما كما بنعمل مع البلاط العادي او الرخام وده يرجعه جديد تاني ..

بالنسبة للـ dhf بصراحه معنديش فكرة عن المصطلح ده . . فمقدرش افيدك فيه ..

بالنسبة للباركيه من تجربة شخصية كان عند والدي في غرف النوم باركيه والشقة كانت مقفوله لاننا كنا عايشين برا ومع ذلك وبعد كام سنة احتجنا نغيره .. ميزته انه دافي في الشتا لكن عيبه بيبوظ بعد فترة ولازم يتغير ده غير انه متعب في الصيانه بتاعته .. عامه لو هتحط باركيه تاكد انك هتضيف له طبقه حماية من الشمع .. بس اجمالا اعتقد والله اعلم ان محدش عاد بيستخدم الباركيه دلوقت يعني تقدر تقول راحت عليه ..

اما عن عمل الريسيبشن مستويات فانتبه من نقطه في غايه الاهمية لو عندك اطفال صغيرين او ابناء اطفالك باذن الله بعد كده وحد فيهم في مرحلة الزحف او الحبو فهتبقى حكايه المستويات دي مشكلة كبيرة .. اعتقد تصرف نظر عن الفكرة دي لانها ديكوريا ممكن تكون جميلة لكن من ناحية السلامه هتبقى نقطه ضعف كبيرة في الشقة لو عندك اطفال او حد مسن ..

واخيرا هتختار الوان الاوض ازاي .. بتشوف حاجه انت حاببها وعاجبك لونها وشداك اوي اكتر من غيرها .. مثلا لحاف شكله حلو .. بلوفر الوانه عجباك اوي .. او حتى فاكهة ولا اي شيء بتحب لونها وشايف فيه تدرجات لونية مميزه .. بتطلع الالوان الي عجبتك في الحاجه الي اخترتها مثلا اللحاف عباره عن وردي في بنفسجي مثلا .. يبقى خلاص بتاخذ نفس درجة اللونين دول وتروح لبتاع الدهانات هو على الكمبيوتر بيطلع لك الدرجتين او الثلاثه الي اخترتهم بالظبط .. وبناء عليه بتدهن الغرفة مثلا الجدار بلون منهم والبراويز بتاعت الشبابيك مثلا او الارضيه بدرجات الالوان الباقية وهكذا ..

ممكن تخلي اوضة نوم البنات شكل والاولاد شكل وغرفتك انت شكل وممكن تخليه كله شكل واحد ..

برضه اعمل حساب المستقبل يعني متبالغش اوي في تزيين غرفة ما بجبس والوان وارضيات ومش عارف ايه على اساس انها الصالون مثلا بعدين تضطر مستقبلا تغير وتخليها غرفة الاولاد ... عندي مثلا غرف النوم معزوله عن الريسبشن فخلاص عارفه انها نوم مش هينفع تبقى استقبال عشان كده ظبطت الاستقبال بشكل مختلف .. لكن لو انت الحكايه دي مش موجوده واي اوضة تنفع مكان اي اوضه فاعمل حساب المستقبل ومتبالغش في التوضيبات في وحده على حساب التانية لانك مش عارف ممكن بعدين تعمل ايه ..

بالنسبة لارضية بلكونة اوض النوم بتخليها نفس ارضيه اوضة النوم عشان ده بيدي اتساع للبلكونة .. وعامه انا من انصار ان الشقة كلها تبقى نفس الارضية لان ده بيديلك احساس باتساعها .. البلاطات الكبيرة برضه بتدي فخامة وعامة هي افضل من الصغيره فكل ماكانت البلاطه مساحتها اكتر كل ماعنى هذا تقليل المساحه البينية بين كل بلاطه والثانيه وده في صالح الارضيه اكيد بس عيبها الوحيد انها هتديلك احساس زائف بضيق المساحة اكتر لو الغرف صغيره ..

برضه عن نفسي بفضل الارضيات الي الوانها هادئة وفاتحه بتدي اتساع وفي نفس الوقت مبتأثرش على اختيار العفش او تتداخل مع ذوقه ..

واخيرا بالنسبة للحمام والمطبخ اشتري طقم الحمام وسيراميك الجدار والارضيه والوزر كله طقم واحد على بعضه من الكتالوج افضل لك واكثر تنسيقا في الالوان .. هتلاقي شركات السيراميك عارضه دائما اطقم بكل تصميماتها والي عاملها متخصصين في الحكايه دي فهتلاقي الوانها متناسقة ولايقه مع بعضها فهاتها زي ماهم عاملينها احسن ..

وان شاء الله تتوفق في حاجه كويسه ومتنساش اكيد تستخير وتاخذ راي الي هيعيشوا معاك عشان تبقوا جميعا مرتاحين للي هتختاروه ..

[president]

بالنسبة لارضية بلكونة اوض النوم بتخليها نفس ارضيه اوضة النوم عشان ده بيدي اتساع للبلكونة .. وعامه انا من انصار ان الشقة كلها تبقى نفس الارضية لان ده بيديلك احساس باتساعها .. البلاطات الكبيرة برضه بتدي فخامة وعامة هي افضل من الصغيره فكل ماكانت البلاطه مساحتها اكتر كل ماعنى هذا تقليل المساحه البينية بين كل بلاطه والثانيه وده في صالح الارضيه اكيد بس عيبها الوحيد انها هتديلك احساس زائف بضيق المساحة اكتر لو الغرف صغيره ..

برضه عن نفسي بفضل الارضيات الي الوانها هادئة وفاتحه بتدي اتساع وفي نفس الوقت مبتأثرش على اختيار العفش او تتداخل مع ذوقه ..

وان شاء الله تتوفق في حاجه كويسه ومتنساش اكيد تستخير وتاخذ راي الي هيعيشوا معاك عشان تبقوا جميعا مرتاحين للي هتختاروه ..

أخت ضحى . انا فعلا بفضل الأرضيات ذات الألوان الهاديه والفاتحه . انما الشقه كلها نفس البلاطه هيبقى صعب عندى .

نقطة ان اراعى فى الديكورات تعامل الأطفال معاها . هما الأطفال دول هيقرفونا فى كل حاجه :blink: سنتين ويكبروا انما الديكورات هيا اللى ابقى .

شاكر لحضرتك ردودك القيمه.

[doha]

بالنسبة لارضية بلكونة اوض النوم بتخليها نفس ارضيه اوضة النوم عشان ده بيدي اتساع للبلكونة .. وعامه انا من انصار ان الشقة كلها تبقى نفس الارضية لان ده بيديلك احساس باتساعها .. البلاطات الكبيرة برضه بتدي فخامة وعامة هي افضل من الصغيره فكل ماكانت البلاطه مساحتها اكتر كل ماعنى هذا تقليل المساحه البينية بين كل بلاطه والثانيه وده في صالح الارضيه اكيد بس عيبها الوحيد انها هتديلك احساس زائف بضيق المساحة اكتر لو الغرف صغيره ..

برضه عن نفسي بفضل الارضيات الي الوانها هادئة وفاتحه بتدي اتساع وفي نفس الوقت مبتأثرش على اختيار العفش او تتداخل مع ذوقه ..

وان شاء الله تتوفق في حاجه كويسه ومتنساش اكيد تستخير وتاخذ راي الي هيعيشوا معاك عشان تبقوا جميعا مرتاحين للي هتختاروه ..

أخت ضحى . انا فعلا بفضل الأرضيات ذات الألوان الهاديه والفاتحه . انما الشقه كلها نفس البلاطه هيبقى صعب عندى .

نقطة ان اراعى فى الديكورات تعامل الأطفال معاها . هما الأطفال دول هيقرفونا فى كل حاجه :blink: سنتين ويكبروا انما الديكورات هيا اللى ابقى .

شاكر لحضرتك ردودك القيمه.

مهو المشكلة سنتين ويكبروا واحنا برضه بنكبر معاهم يبقى سنتين تلاته كمان وهتبقى السلالم عائق لصاحب الشقة شخصيا فزي ماقلت لحضرتك السلالم والـ ( عتب ) عائق للطفال وكبار السن كمان ..

ربنا يدي الجميع الصحه وطولة العمر ..

[mama nona]

صباح الخير

انا جيييييييييييييييييييييييييييييييييييييييييييييت الحمد لله اصل النت كان فاصل وكنت بستخدم الموبايل والموضوع ده كلامه كتير

الاول احنا هنبدأ الشقة من الاساس ليه بقى دخلنا عالرخام والسيراميك والبورسلين والالوان

خلينا بندأفيها خطوة خطوة افضل

الاهم من ده كله العفش موجود ولا هنشترى جديد ,كلاسيك ولا مودرن

الشقة كام غرفة وكام ريسبشن وهتققسم ازاى

المطبخ هياخد كل الاجهزة ولا هنحط حاجة فالحمام

هتكسر حاجة فالشقة وتغيرها ولا الوضع كده متاح

الشبابيك وابواب البلكونات هتكون الوميتال ولا خشب

هتكسر ابواب البلكونات وتوسعها ولا انت مرتبط بواجهة البرج من ضمن شروط العقد ولا متفرقش

وهرجع لكم بعد الفاصل

[HanaaOsama]

أخت هناء . أشكرك مره ثانيه على ردودك .

وضحت الأمور فى الفرق بين DHF وسيراميك الباركيه . انما الفرق بين الرخام والبورسلين وعلى اى اساس يتم الأختيار لسه فى لخبطه شويه .

البورسيللين و الرخام بالنسبة للجوده و الشكل تقريبا واحد و زي ما قالت الاخت doha لان الاتنين طبقة كامله يعني مش طبقة علي الوش فقط و الفرق الوجيد بينهم ان الرخام الجيد اغلي كتير يعني مثلا السلم الداخلي في الشقة عندي رخام الابيض الي فيه شويه رصاصي مش عارفة اسمه لكن تقريبا كان ب 300 جنيه المتر او 250 مش فاكره و ده كان من 3 سنين اما البورسييلن الي جايباه في الرسيبشن كان ب 65 تقريبا

زى مافهمت من حضرتك يفضل فى غرف النوم سيراميك الباركيه او DHF والريسيبشن رخام او سيراميك .

غرف النوم ايوه يفضل ال dhf او سيراميك الباركيه اما الريسيبشن الرخام او البورسيللين

السؤال الثانى :ninja:

فقره أ

ماهى البلاطات المرشحه لكل مما يلى الريسيبشن - تراس الريسيبشن - غرف النوم - غرف مكتب صغيره ملحقه بغرفة النوم الرئيسيه- الطرقه مابين الغرف - بلكونة غرفة النوم ؟

انا قاصد اكرر بعض الأجابات عشان فى الآخر ان شاء الله اعمل حاجه مجمعه .

الريسيبشن : رخام او بورسيلين

تراس الريسيبشن : غالبا التراس بيكون تابع للمكان الخارج منه

غرف النوم و المكتب : اما كلها dhf او :-

غرفة نوم رئيسية : بما ان غالبا الوان غرف النوم الرئيسية بتكون " بني - بيج - ذهبي - اخضر - ....... " فيكون السيراميك سيراميك باركيه و هذا ينطبق ايضا علي غرف المكاتب حتي لو لم تكن ملحقة بغرفة النوم

غرف الاطفال : بالنسبة للي تفرق معاه اوي تناسق الالوان " زي حالاتي كدا " انا فضلت السيراميك يكون بلون الغرفة و الدهان يعني مثلا غرفة بمبي في ابيض يبقي كل حاجة بمبي في ابيض الدهان و الخشب و السيراميك و الستاير و الفرش و السجاد و ....... او اي لون اخر لبني , فستقي ,موف ,.......

بالمناسبة لما توصل حضرتك لمرحله الدهانات ابقي اقول لحضرتك علي الانواع و الاشكال الحديثه

بلكونة غرفة النوم : رقم ان البلاكونه غالبا بتكون تابعة للجزء الخارجه منه لكن لو سيراميك باركيه مش هتكون حلوه ممكن سيراميك بلون بيج مثلا

فقره ب

على اى اساس بختار حجم البلاطه فى الريسيبشن يعنى كل ماكبرت البلاطه بقت اشيك ولا الموضوع هيبقى نسبى مع المساحه

ولو كانت الريسبشن مساحته 67 متر حجم البلاطه المناسب يكون كام .

البلاطات المساحة الكبيره غالبا بتكون في المساحات الكبيره اوي او لو عايز تقلل الفواصل بين البلاطات

حجم البلاطات العادي في البورسيلين 40*40 او 60*60 يكون مناسب للمساحه عند حضرتك لكن في نقطه :-

لو هتعمل اطار " سجاده " بوزرات الارضيات الوزرات بتكون عرضها 40 معتقدش فيه 60 عشان تمشي معي فواصل البلاط

اما لو هتعمل الشكل التاني الي بيسموه " فوريره " الي هو كل اربع بلاطات بينهم مربع صغير باشكال بيتباع بالواحده برضه يبقي مش هتفرق 60 ولا 40

فقره ج

فى دماغى فكره مجنونه بس حابب اخد رايكم فيها . الفكره فرضا لو انا حابب احط فى الريسيشن 3 قطع

حابب احط كل قطعه على مستوى تانى ولو حبيت اروح مثلا من الصالون للسفره انزل من مستوى الصالون وامشى لغاية مستوى السفره

واطلع للسفره . يارب تكون الفكره وصلت . بس مش عارف ليه حاسس انى بتكلم عن تقسيمة شوارع مش شقه :blush2:

ياترى اللى انا بقوله دا هبل ولا عادى. انا خايف اقوله لمهندس الديكور يسيبنى ويمشى عشان هوا دا اللى حصل مع مراتى انها ماردتشى عليا وسابتنى

وقامت وكانت بتردد كلام من قبيل انا ايه اللى خلانى اجوز واخلف من الراجل العبيط ده .

بس انا حابب الفكره دى اوى ياترى لو هيا مقبوله ينفع معاها البورسلين او الرخام ولا هيحتاج حاجه تانيه .

الي فهمته ان مساحة مربعه كبيره هتعمل فيها 3 مساحات عاليين و الباقي واطي ولا ايه ؟

هي فكره لكن اعتقد 3 كتير غالبا الناس بتعمل مستوي واحد في الريسيبشن و احب اوضح لحضرتك نقطة :

عشان لو حضرتك هتعمل بورسيللين عشان تكلفة الرخام غاليه ف الدرجة الي هتتطلعها لازم تبقي سلمه رخام لان لو مش رخام و طلعت كدا عادي مش بتكون حلوه

يعني لو هتعمل 3 مربعات اطارهم " محيطهم " هيكون رخام و بالنسبة للسلالم الرخام فبيحسبلك السلمه متر طولي " الدرجه والقايم والجوانب " و المتر الطولي للسلمه يعني " عرضها " بيكون قريب من سعر المتر المربع للرخام مش عارفة اقل بقد ايه لكن افتكر مش اقل كتير يعني ببساطه مثال للتوضيح

لو مربع الصالون مثلا 3*4 و هتعمله رخام هيكون 12 متر مربع لو هتعمله بورسيللين و من جميع الجوانب درحة رخام يعني 4+4+3+3 = 14 متر طولي سلمه رخام

حضرتك تسال عن سعر المتر المربع للرخام و المتر الطولي للسلمة الرخام ده غير طبعا تكلفة ال 12 متر البورسيللين

في حل وسط لو عايز تعمل السلالم ديه بتكلفة اقل بتعملها عادي من فوق البورسيلين و القايم فقط بتاع السلمة يكون رخام بيكون شيك برضة

في ملحوظه اخري في موضوع السلالم الرخام : السلم العادي بيكون سمك السلمة 4 سم اما الدرجة فالراجل يقلك لازم برضة 4 سم و اجمد و مش عارف ايه طبعا هيكسب اكتر لكن الدرجة بتاعة المستوي ممكن تكون 2 سم و يعمل ليها حافة بتتلصق تدي شكل ال 4 سم " زي رخام المطابخ " و بتتلف برضه حرفها و كل حاجة

اتمني اكون قدرت اوصل الموضوع ده و معلش هو ملعبك شويه :)

فقره د

الريسيبشن عندى سايح يعنى على شكل مربع تقريبا عايز اعمل فواصل بين القطع المختلفه وغالبا هيكون شغل خشب ( صح كده )

يعنى مش حوائط اسمنتيه ياترى لو هاعمل الشغل ده هابتدى من فوق البلاطه ولا من الأرض نفسها ؟ يعنى اعمل الشغل وبعدين الزق البلاطه؟

ولا عادى ممكن اركبه فوق البلاطه .

الخشب بيركب فوق البلاط بمسامير فيشر في الارض ولكن معلش اسمحلي ديه فكره مش حلوه خالص

انا سايب الحمامات والمطابخ للآخر wst::

شاكر لحضرتك أخت هناء .

الفاضله ماما نونا .مستنى ارائك القيمه

تحياتى .

[president]

صباح الخير

انا جيييييييييييييييييييييييييييييييييييييييييييييت الحمد لله اصل النت كان فاصل وكنت بستخدم الموبايل والموضوع ده كلامه كتير

الاول احنا هنبدأ الشقة من الاساس ليه بقى دخلنا عالرخام والسيراميك والبورسلين والالوان

خلينا بندأفيها خطوة خطوة افضل

الاهم من ده كله العفش موجود ولا هنشترى جديد ,كلاسيك ولا مودرن

الشقة كام غرفة وكام ريسبشن وهتققسم ازاى

المطبخ هياخد كل الاجهزة ولا هنحط حاجة فالحمام

هتكسر حاجة فالشقة وتغيرها ولا الوضع كده متاح

الشبابيك وابواب البلكونات هتكون الوميتال ولا خشب

هتكسر ابواب البلكونات وتوسعها ولا انت مرتبط بواجهة البرج من ضمن شروط العقد ولا متفرقش

وهرجع لكم بعد الفاصل

ياسلام ياماما نونا اهوا ده الكلام . من البدايه خالص عشان انا واخد الموضوع تحدى مش هاقولك مع مين :blush2: . ولازم نثبت ان الرجاله تعرف تعمل كل حاجه وبتفهم فى كل حاجه

اولا العفش كله جديد

الشقه غرفتين نوم للأطفال

غرف نوم رئيسيه ملحق بيها غرفة ملابس وحمام خاص بغرفة النوم

حمامان ( واحد كبير والتانى صغير للضيوف )

مطبخ تقريبا 12 متر

ريسيبشن مساحته تقريبا 67 متر على حسب تصميم الشقه (المفروض يشيل 4 قطع ) بس انا شايف ان 3 كويسين عليه .

نيجى بقى لبلكونة غرفة النوم الرئيسيه ودى مساحتها ( 9 متر ) ودى بفكر اقفلها وعملها غرفة مكتب صغيره ملحقه بغرفة النوم ولو ومنعفش

هادور على مكان صغير فى الريبسيبشن .

البرج ليه اكتر من واجهه فى واجهه بتاعة غرف النوم الرئيسيه دى ممكن اقفلها عشان موضوع المكتب بس لازم يكون تقفيل الوميتال .

تسليم البرج كله الوميتال فالشبابيك والبلوكانات كله الوميتال .

بصى ياماما نونا تقسيم الشقه . لما تدخلى من الشقه ورا باب الشقه حمام الضبوف وادامك ريسيبشن كبير .

من الريسيبشن طالع طرقه فيه بقى المطبخ والحمام وغرف النوم .

الريسيبشن عباره عن جزئين مفتوحين على بعض جزء مساحته 45 والجزء التانى عشان فى بروز من غرفة النوم مساحته 22 .

والريسبشن ده اللى عاملى قلق لأنه سايح على بعضه ومفيش فواصل وعايز اعمل حاجه خاصه لليفنج .

تراس الريسيبشن حوالى 12 متر ودا ممنوع تقفيله وصراحه حرام يتقفل .

بالنسبه للأجهزه غسالة ملابس فى حمام الشقه وواحده تانيه فى حمام غرفة النوم الرئيسيه . والمطبخ فيه الباقى .

زى ماقلت لحضرتك ان فيه طرقه متفرع منها بقيت الغرف عشان كده بفكر ان فى جدار المطبخ اللى باصص على الطرقه

افتح فيه بار بطول الحيطه بش مش مفتوح لغاية السقف يدوبك فتحه عرضها متر بس بطول الحيطه ( مش عايز ضحك ).

العفش بقى ( غرفة النوم الرئيسيه والصالون والسفره يبقوا كلاسيك ) أى حاجه تانيه تبقى مودرن . مع ان غرفة الملابس مساحتها 6 متر

فالبطريقه دى الدولاب مش هيدخل فيها . وهيا كانت مصممه عشان تبقى شغل دواليب مودرن دواليب الوميتال ( زى شغل ايكيا ) . ودا برده موضوع شاغلنى

التوازن بين الأتنين فى غرفة النوم وغرف الملابس . ولو هاعملها مودرن هاستغنى عن الدولاب الكلاسيك وهاعمل فيها ركنه الغرفه مساحتها 25 متر .

دا تقريبا اللى فى دماغى دلوقت .

بانتظار رد حضرتك

[mama nona]

لو عندك صور للمكان ممكن ترفعها علشان التخيل يكون واقعى

كمان مهو الاستعانة بصديق حريمى يبقى ازاى هتثبت للجماعة انه الرجالة بتقدر على كل حاجة

ثالثا واحدة واحدة نمسك غرفة غرفة ونتكلم عنها

عشان نركز

رابعا لازم تسجل ملحوظاتك علشان متنساش

اختار جزء معين نبدأ بيه

ونفصصه

ويا سلام لو فيه صور هيكو ن افضل

[president]

الخشب بيركب فوق البلاط بمسامير فيشر في الارض ولكن معلش اسمحلي ديه فكره مش حلوه خالص

برغم ان لسه بحاول افهم فى فقره ج . انا مش ها عمل تلات مستويات فوق بعض . هوا مستوى واحد بس مش متصل يعنى الريسيبشن هيبقى صعود ونزول لمستوى واحد .

. بس ايه اقتراح حضرتك لو حابب اعمل فواصل فى الريسيبشن بين القطع ؟ .

تحياتى

تم تعديل 11 ديسمبر 2009 بواسطة president

[mama nona]

الخشب بيركب فوق البلاط بمسامير فيشر في الارض ولكن معلش اسمحلي ديه فكره مش حلوه خالص

برغم ان لسه بحاول افهم فى فقره ج . بس ايه اقتراح حضرتك لو حابب اعمل فواصل فى الريسيبشن بين القطع ؟ .

تحياتى

بمعنى انه الخشب لازم يتثيت فالارض بمسامير وبالتالى هيتخرم بالنشنيور فالارض عشان الفيشر ال بيركب فيه المسمار

وبالتالى لو حبيت تلغى فكرة الخشب دى بعدين هتكون بوظت السيراميك بالخروم دى

الفكرة دى مش حلوة

الفواصل دى :

ممكن تعمل مستويات

او عمدان جبس

[HanaaOsama]

الخشب بيركب فوق البلاط بمسامير فيشر في الارض ولكن معلش اسمحلي ديه فكره مش حلوه خالص

برغم ان لسه بحاول افهم فى فقره ج . انا مش ها عمل تلات مستويات فوق بعض . هوا مستوى واحد بس مش متصل يعنى الريسيبشن هيبقى صعود ونزول لمستوى واحد .

. بس ايه اقتراح حضرتك لو حابب اعمل فواصل فى الريسيبشن بين القطع ؟ .

تحياتى

:blush2: معلش الكلام في الفقرة ج داخل في تفاصيل تركيب الرخام يا ريت لو حضرتك قلتي ايه بالظبط مش مفهوم

انا فاهمة كويس حضرتك تقصد ايه انا مقلتش 3 مستويات فوق بعض قصدي 3 اجزاء من الريسيبشن هتكون مرتفعة بسلمه " مستوي واحد يعني " يعني تخت الصفره عالي بسلمه و تحت الصالون عالي بسلمة برضة بنفس ارتفاع الصفرة و الانتريه برضة عالي بسلمة و باقي الرسيبشن عادي واطي يعني صح كدا ؟

معلش في سؤال قبل الاجابة علي ايه هي نوعيه الفواصل المقترحة

السؤال ليه اصلا تفضل وجود فواصل ؟ وهل قصدك فواصل كامله يعني اكن ديه اوضة وديه اوضة ولا ايه ؟

[HanaaOsama]

ياسلام ياماما نونا اهوا ده الكلام . من البدايه خالص عشان انا واخد الموضوع تحدى مش هاقولك مع مين :blush2: . ولازم نثبت ان الرجاله تعرف تعمل كل حاجه وبتفهم فى كل حاجه

:ninja: مع احترامي لجميع الرجاله و زوجي منهم طبعا الموضوع مش موضوع رجاله و ستات الاهتمام بالديكور و الذوق الجيد يعني اعتقد موهبة او حاجة الانسان بيحب يعرفها و يتعلمها سواء راجل او ست

[president]

معلش هيا الصوره سيئه شويه . ( فى حمام جنب المطبخ نسيت اشاور عليه)

وياريت نبتدى بالريسيبشن ياماما نونا .وفى نفس الوقت هاجاوب على سؤال اخت هناء انا ليه عايز فواصل .

الفكره كلها انا عايز اعمل اكتر من حاله ديكوريه فى المكان . يعنى مثلا السفره كلاسيك بينما الأنتريه مودرن والصالون

كلايسك . كل مكان عايز اضاءه مختلفه ليه وديكور منفصل وشغل سقف مختلف .

طيب لو انا فتحت باب الشقه وشفت الريسيبشن زى ماحضرتك شفتى هتلاقيه مفتوح على بعضه . العين هتتصدم مابين

الديكورات المختلفه والأضاءات المختلفه فالفكره من الفواصل وهيا مش فواصل حائطيه انى لما ادخل الشقه اشوف ديكور واحد بس او حاله واحده بس

ولما احب اتنقل لمكان تانى عينايا متجبش غير ديكورات المكان اللى انا فيه . فى نفس الوقت شفل الفواصل بيعبر عن

الواجهه اللى هوا بيطل عليها يعنى الفاصل يبقى ليه شغل مختلف من الناحيتيبن على حسب المكان اللى هوا فيه

على سبيل مثال لو انا عملت ليفينج فى الريشيبشن هيكون الفاصل عباره عن مكتبه شيك فيها Lcd كبير من ناحية الأنتريه .

بينما من ناحية الصالون يكون فيه برواز كبير لصوره فنيه . الفاصل مش فاصل مصمت .

يارب اكون عرفت اوصل الحاجه اللى بفكر فيها .

احترامى طبعا لكل السيدات فهم امهاتنا وزوجاتنا واخواتنا وبناتنا فهم يتحملون مالا نستطيع ان نتحمله .

اخت هناء هوا حضرتك مارفعتيش الصور ليه . (انا روحت الموقع http://m5zn.com/ ) وعملت upload واخدت الرابط الأول وعملتله copy من هناك paste هنا

ماما نونا انا رفعت لحضرتك صوره -سيئه- لتصميم الشقه وياريت تشاريكنا بأفكارك

تحياتى .

تم تعديل 11 ديسمبر 2009 بواسطة president