مشكلتى فى دبى (فتاة مصرية)

[mony]

السلام عليكم يا اخوانى

انا فتاه مغتربة مصرية اسكن و اعيش فى دبى ، انا عاوزه ارجع مصر فى اسباب شخصية لازم ارجع علشانها.

المشكله انى شغالة فى شركة فى دبى و عقدى محدد المدة يعنى لازم ادفع شهر ونص انا حسبتها مع نفسى لاقيت هسبلهم الاجازات مع مرتب اخر شهر.

المشكله ان عليا قرض ب 20 الف لمدة 3 سنين و واحدة بطاقة ائتمان فيها 7 الاف درهم ده غير سيارة عليها قرض لسه جديدة

انصحونى يا جماعة ايه الحل هد يدينى النصيحةز

وانا فى انتظار الرد

[Alrefaey]

انا لا اعلم قوانين دبى لكن لو انتى فى اى بلد وعليكى قروض المفروض تسدديها قبل النزول

قرض البنك سددية

السيارة اما تسلميها للشركة او تشوفى مشترى مكانك يدفع لكى ما دفعتية من اقساط ويسدد باقى الاقساط لشركة السيارات

البطاقة الاتمانيه سدديها والغيها

هذا الكلام كله على افتراض انك مش راجعة تانى دبى

تم تعديل 11 سبتمبر 2009 بواسطة Alrefaey

[Mercedes]

السلام عليكم و رحمة الله و بركاته

و كل عام و حضرتك بخير بمناسبة عيد الفطر المبارك

أنا رأى الشخصى - رغم أنى ماعرفش ايه الظروف الشخصية بتاعتك - أنك تحاولى تاخدى أجازة قصيرة و تنزلى مصر تخلصى مصالحك و توفقى أوضاعك فى مصر و ترجعى على الأقل سنة كمان , عشان تقدرى تسددى كل الحاجات دى و يكون موقفك سليم و أنتى ماشية نهائى من دبى لأن :

أولا , أكيد حضرتك عارفة أنه ماينفعش تاخدى طبعا القروض دى كلها و ماتسدديهاش و تمشى .

ثانيا , عشان تكونى ماشية فى السليم و نظامى , على أساس أنك ممكن تحتاجى ترجعى دبى تانى فى المستقبل , ساعتها هتقعدى تضربى أخماس فى أسداس و تقولى , هو ياترى الموضوع القديم بتاعى لسه مفتوح و ياترى هلاقى مشكلة فى انتظارى لما أرجع و لا ايه؟؟؟؟

و طبعا عليكى بالدعاء فى ليلة القدر , هتلاقى كل حاجة انحلت بكل سهولة و يسر ان شاء الله

و ربنا ييسر ليكى و لنا و لكل المسلمين أجمعين

[alaashabana]

متهيالى فعلا كلام الاخوة الافاضل صح

بالنسبة لموضوع السيارة ممكن ترجعيها تانى او تعملى اعلان فى الجريدة ان حد يشترى سيارتك ويكمل باقى الاقساط ودة سهل اوى وهتلاقى كتير وكانك كنتى مأجرة سيارة طول الفترة دى وخلاص يعنى مش خسرتى حاجة

اما بالنسبة للقروض وبطاقة الائتمان متهيالى لازم تسدديهم او لو انتى عندك امكانية فى مصر تشتغلى وتبعتى كل شهر المبلغ المستحق على البنك وتبلغيهم بعنوانك الجديد فى مصر علشان يبعتولك الاستاتمنت بكدة ممكن تسددى الاقساط وانتى ى مصر علشان لو حبيتى ترجعى تانى دبى مش يكون فية اى عواقب جنائية ..

وربنا يسهلك الامور ان شاء الله .

[الباشمهندس ياسر]

ربنا يتولاك و يفرج همك

حاولى تنهى الفيزا و تبيعى السيارة

و تتفقى مع البنك انك تسددى ف الفرع بتاعه ف مصر...

[مغتربة]

هل مكافاه نهايه الخدمه متغطيش اى جزء فى قرض الفيزا و البنك

[EGYPTDNRD]

الاخت الكريمه

بالنسبه لاستفتسارك .. لازم تنهي كل مشاكلك مع البنوك سواء بالقرض او البطاقه لان لو اتغلت اقامتك هيكون في عليكي تعميم منع سفر من البنك عشان مش تسافري فالافضل انك تنهي كل حاجه افضل بدل مايكون في مشاكل عندك... ياما بقي تلجأي للطرق غير المشروعه ودي تبقي مش صح وحرام . والله يوفقك

[حازم نجاح حمزه]

ربنا يعينك بجد

اوحش شي في الدنيا اللي بيدخل نفسه في ديوان البنوك