ادعولي نويت اشطب الشقة

[مصري اسكندراني]

اخواني واخواتي

السلام عليكم ورحمة الله وبركاته

ان شاء الله نويت الصيف دا اشطب الشقة بتاعت في الاسكندرية.الشقة انا واخدها علي المفتاح بس انا ظبط فيها حاجات كتير مش ناقص غير النقاشة ودي الي ناوي اعملها السنادي ان شاء الله.بس شايف الموضوع صعب اوي خاصة ان اجازتي في مصر حوالي 40 يوم بس وطبعا لاني بعيد عن مصر فخبرتي وعلاقاتي بالعمال قليلة جدا.حاولت الصيف الي فات اعمل النقاشة لكن النقاش الي رسيت عليه كان عايز شهر ونص علي الاقل عشان يخلص علاوة انه كان عايز ياخد 11 جنيه مصنعية في المتر يعني حوالي 10 الاف جنية مصنعية بس غير المواد المطلوبة .بصراحة انا مش عارف اعمل ايه خاصة ان الراجل دا انا شفتله شغل او بصراحة ربط دماغي وخايف اجرب حد تاني يبوظلي الدنيا.يا ريت لو حد منكم عندو خبرة في المواضيع دي او يعرف حد هوا جرب شغله يساعدني وجزاكم الله خيرا.

[emydotcom]

اولا عشرة جنيه للمتر كتير اقصى حاجه 6جنيه والعمال لما يعرفوا ان اجازتك 40 يوم مش حايخلصوك قبل شهرين واهم حاجه تقول للنقاش مافيش فلوس غير لما تخلص لانه لو اخد منك فلوس مش حاتشوف وشه انا شطبت شقتى والحمد لله الاجازة الى فاتت فى شهر بس ماقولتش انى عايشه برة ولازم يكون معاة صنايعيه 5او6 علشان ينجزوا وربنا يوفقك

[عنبو]

الشقه مش بتتقاس كده كل متر وله شغل يعنى الساده "" بلاستيك لاميع او مغسول غير زيت غير بلاستيك عادى "" كله وله سعر وبعدين الاسبونش والتعتيق والاستوكوا دول برضه ليهم سعر تانى

والخشب برده فيه كذا فئه على حسب عدد الوشوش اللى هياخدها يعنى اتفق على نوع الشغل اللى انت عاوزه وبعدين شوف السعر

والاهم من دول المعجون خليه يخلى بين سكينة المعجون الاولى والتانيه لا يقل عن يوم علشان المعجون يعضم

اما بالنسبه ل 11 ج فى المتر على ما اعتقد ده كتير اقوى بالنسبه للشرقيه اللى انا منها معرفش الاسعار عندك عامله ايع

[مصري اسكندراني]

الاخت العزيزة الاستاذة: ايميدوتكوم

الاخ العزيز الاستاذ: محمد العنبي

شكرا جزيلا علي ردكم السريع والمفيد جدا

فعلا مفيش احسن من ان الواحد يستشير اصحابة.صدق رسول الله صلي الله عليه وسلم فقد قال فيما معناه ( لا خاب من استشار ولا ندم من استخار)

جزاكم الله خيرا

[mama nona]

السلام عليكم

الاخ الاسكندرانى

طبعا موضوعك ده جه ع الجرح

انا بدأ ت فموضوع النقاشة من الصيف ال فات

اتعمل فيه المعجون كله

ووقفت الشغل وسافرت ورجعت اجازتى الان وبدأت ف دهانات واختيار الالوان

بالنسبة للاسعار عندى الدهان العادى ب 6 جنيه للمتر ده شامل تأسيس الجدار واللون النهائى

اما لو فيه تعتيق او اسبونش او بانتير او استنسل او فلفيت ده بسعرلحاله

يعنى مثلا متر التعتيق يبدأ من 15 جنيه شاملة المون من عند النقاش مش من عندك

شغل الاستنسل البارز شامل المون ب 50 جنيه

الابواب والشبابيك اللاكيه ب 65جنيه

الابواب والشبابيك الاستر ب 100 جنيه وانت ال بتجيب المون

الاهم من الاسعار انك متقلش انك كنت مسافر او هتسافر

والاهم انك متصدقش النقاش انه هيخلص الشغل فمدة معينة

اناكان اتفاقى مع النقاش انى هشتغل فشهرين والنتيجة سافرت وسبت المعجون وقلت اهى فرصه لما ينشف وقالى لما ترجعى 4 ايام بالضبط وهتخلص الشقة وادينى بقالى اسبوعين ولسه مخلصتش

لوغاوى فعلا تخلص يبقى تشوف واحد امين ومواعيده مضبوطة وتقف ع ايديه من اول ما يبدأ يومه لغاية ما يخلص

اكيد هتنجز وتعمل حاجة بس الأكيد والاهم انك هتضيع اجازتك

عندك حجج كتير تقول انك مستعجل عالدهان انه انت عقد شقتك الايجار هينتهى ولازم تنقل عفشك قبلها

واتمنى لك التوفيق

[مصري اسكندراني]

الاخت العزيزة:ماما نونا

شكرا جزيلا علي ردك المفصل وجزاكي الله خيرا

معلش كنت عايز استفسر من حضرتك انتي بتقولي مصنعية الابواب والشبابيك من 65 الي 100 للقطعة ولا للمتر ؟

ويا تري ايه الفرق بين الاكية والاستر؟ وايهم افضل من وجهة نظرك؟

كمان انا شوية محتار في نوعية الالوان فيا ريت استفيد من خبرتك في الموضوع دا

كمان مش عارف لو ممكن ترشحيلي حد من العمال تشوفي انه كويس علما ان شقتي في اسكندرية

شكرا جزيلا واسف علي كثرة استفساراتي ولكن شجعني علي ذلك احساسي بان حضرتك متعاونة جدا

[mama nona]

ولا يهمك اخى الفاضل

الفرق بين اللاكيه والاستر

الاستر ده لون بنى زى الموبليايعنى بيكون الخشب واخد لون بنى رش

انما اللاكيه ده الألوا ن ال بتندهن بالفرشاه زى الابيض والبنى والازرق وخلافه

انا عملت الشبابيك وابواب البلكونات لاكيه انما ابواب الغرف والمطبخ والحمام استر زى لون باب الشقة

والسعر اللاكيه بيبدأ من 50 جنيه لحد 70 جنيه للقطعة

والاستر بيبدأ من 100 جنيه للقطعة

وباب الشقة بيتحسب قطعتين

انا بعيد عن اسكندرية اوى ومعرفش حاجة عنها

بالنسبة للالوان دى حسب ذوق حضرتك وحسب الموبليا

انا عملت الشقة كلهازيت مطفى الصالة لونها بيج كريمى

وفيها جدار استنسل بارز يعنى وردات بارزة مذهبة

وجدار فلفيت اورانج

ومدخل الشقة نبيتى غامق

غرف الاطفال اصفر وفوشيا ومرسوم فيها ورود

غرفة النوم الرئيسية سيمونى فاتح

غرفة اللفنج كاكاوى فاتح وفيها جدار مقلم كاكاوى ف بنى وجدار بنى معتق

اتمنى انى اكون افدت حضرتك

[مصري اسكندراني]

الاخت العزيزة ماما نونا

السلام عليكم ورحمة الله وبركاتة

ربنا يبارك فيك ومتشكر جدا علي التفاصيل المهمة الي اولتيهالي وان شاء الله ربنا ييسر الامر وارسي علي الالوان الي حعملها في الشقة عشان الموضوع بصراحة مش سهل ابدا خاصة ان الاختيارات كتيرة اوي والتفاصيل لا تحصي

اكرر شكري والف مبروك علي شقتك وربنا يجعلها سكن ساكن وبيت هانئ باذنه تعالي

[عنبو]

الفرق بين الاكيه والاسطر

الاكيه يغسل الاسطر لا يغسل

الاكيه يستحمل الشمسه الاسطر لا يستحمل الشمسه

الاشيك الاسطر اشيك 100 مره من الاكيه وصحى عن الاكيه مريع للبصر بس ده اذا اتعمل صح ومش تخلى النقاش هو اللى يعمله خلى الاسطروجى هو اللى يعمله

ولكن اذا كانت الابواب الخارجيه بتتعرض للميه والشمس كتير فده احنا كده هنضطر نعمل الاكيه علشان المياه والشمسه

فيه بقى دهان تانى بس ده غالى شويه اسمه بوليستر وده زى الاسطر فى الشكل ولكن مقاومه عاليه جدا للحراره وللمياه على حسب نوع الريزن اللى هو مصنوع منه

طيب فيه حاجه بين الاسطر والبوليستر فى التكاليف واهى برضه حلوه اسمها مجموعات ودى برضه كويسه

طيب الاكيه فيه منه الوان شبه الاسطر ويتم عمل عليها شوية حركات كده تشوفها تقول زى الاسطر بالظبط ودى برضه كويسه واقتصاديه بس لو عاوز تشتغل صح الابواب باب الشقه الرئيسى بس يكون بعيد عن الشمس يكون اسطر من بره لكن ضهر الباب يكون مدهون لاكيه ساده ويستحن يكون ابيض وطبعا الاسطر لازم يتشطب بالكمبروسر

باقى الابواب برضه تتدهن لاكيه مطفى ويكون لون اقريب من لون الحوائط طيب وليه لاكيه علشان الغسيل والبهدله بس لازم تاكد عليه انه لاكيه مغسول يعنى ياخد لا يقل عن 3 وشوش لاكيد غير التاسيس او 2 وش لاكيه منهم الوش الاخير بالكمبروسر

طبعا بالنسبه لموضوع الاسبنش خليك انت اللى تجيب المون ليه ؟؟

علشان هو ممكن يضرب مونة الاسنبش على ايده ويحاسبك عليها وكانه شاريها وطبعا ده اسمه نصب علشان المون اللى بيضربها على ايده بتبقى اى كلام وفيه فرق شاسع بينها وبين اللى بيشتريها ومش يعرف يطلع الفرق اللى واحد صنايعى

طيب ايه هى التركيبه اللى هو بيقول عليها ده ويقولك دى اسبنش

لاكيه اللون المطلوب + شوية زيت مغلى "" من بتاع المعجون ""+ شوية ورنيش من نوع جيد + شوية بنزين على شوية جاز علشان مش يشد بسرعه

نيجى بقى لاوض الاطفال فيه رسومات بتتعمل فى اوض الاطفال جميله جدا منها عالم الفضاء بجد تشعر وكانك فى مركبه وفيه شغل كتير بس لو تسمع نصيحتى مافيش احسن من الساده وخصوصا فى اللى بره وابعد عن الاسبنش وخليك فى الاستوكو وده احسن وعملى جداص بس عاوز صناعيى يكون معلم فيه وشكرا

ولو احتجت اى حاجه انا تحت امرك ولو انك اقريب شويه كنت بعتلك شوية صناعيه تمام ومن الاخر بس الناس بتوعوا اخرهم الشرقيه والقاهره فقط لا غير

[مصري اسكندراني]

الاخ العزيز الاستاذ:محمد العنبي

السلام عليكم ورحمة الله وبركاته

بجد مش عارف اوفيك قدرك من الشكر علي اهتمامك ونصائحك المفيدة جدا والي وضحتلي حاجات كتير كنت اجهلها بحكم قلة الخبرة وبعد مجال عملي عن هذة المواضيع.جزاك الله خيرا وجعلك الله ممن اختصهم بقضاء حوائج الناس.

بالنسبة لموضوع الاكيه انا نفسي اوي اعمل لاكيه ابيض بس خايف ان اللون يصفر مع الوقت او يتحول للون البيج فهل هناك انواع كويسة بتحافظ علي درجة لونها ومش بتغير مع مرور الوقت؟

انا ميال اني اعمل حاجات تميل للبساطة بس تكون كويسة عشان انا بصراحه بحس انا البيت لازم يكون هادي ومريح في الوانة مش كانه معرض ديكورات وفيه خمس ست الوان في مكان واحد

مثلا انا ناوي ان شاء الله اخلي الرسبشن لونين اتنين فقط احتمال النبيتي مع الابيض اوالنبيتي مع البيج مش عارف ايهم افضل علما بان ارضية الرسبشن سراميك ابض رخامي فاتح

كمان عندي ارع اعمدة بارزه في الحوائط لحواي 20 سم فيه رائ اني احاول اخفيها باني الونها نفس لون الحوائط وفيه راي تاني بقول ان الاعمدة ممكن اعتبارها ميزة وليس عيب وبكدة المفروض انها تتعمل بلون مختلف عشان تظهر فايه رايك في الموضوع ده؟

الشبابيك ان شاء الله حتكون لاكيه ابيض بس عندي بعض البروزات من الكمر الساقط في الرسبشن واللفنج ناوي اجلدها خشب واعملها استر لون الخشب ودا الي ممكن يجبرني اني اعمل الابواب بلون الخشب عشاب يكون فيه تناسق بين لون الابواب ولون تجليد الخشب علي الكمر

بالنسبة لموضوع الالوان بسمع ان الالوان الخاصة زي النبيتي مثلا لازم يكون من شركة يوتن فهل دا صحيح ولا ايه؟

معلش اسئلتي كتيرة بس دا من العشم في كرمكم وسعة صدركم

انا عندي الشقة كانت مدهونة كمبليكو بلاستيك محبب فهل من الافضل صنفرة الدهان القديم قبل فرد المعجون ولا ممكن يتفرد المعجون عليه زي مقالي احد الصنيعية؟

كمان انا ناوي اعمل 2 مكيف في الشقة عندي وعايز اجهزلهم الاماكن بتاعتهم .السنة الي فاتت غيرت العداد بتاع الكهرباء وجبت عداد كبير عشان يتحمل التكييف بس معملتش توصيلات داخلية للتكييف فهل يا تري من الافضل احفر لسلول التكييف في الجدران ولا اعملها علي السكلو بعد التشطيب عشان خايف ان المعجون والدهان الجديد ميقدرش يداري مكان الحفر في الجدران ؟

بالنسبة للصنيعية انا عايز اكلمك في الموضوع دا لو حضرتك مرتاح لعمال عندك يا ريت تعرض عليهم الموضوع وانا حقول لحضرتك علي ظرووف البيت عندي وان شاء الله يناسبهم

انا معنديش اي مانع انهم يقيمو في الشقة طول فترة الشغل علما بان الشقة فيها كل مقومات الحياة من ماء وكهرباء ومطبخ كامل التجهيزات كمان الحمد لله الشقة في مكان جميل و علي بعد امتار من البحر يعني مش حيحسوا باي زهق ممكن نوصل ان شاء الله لتفاهم مع بعض

انا اسف بتعبك معايا بس يا ريت لو ينفع وقدرت تقنعهم حاول توصلني بيهم وانا نازل مصر اول شهر 7 ان شاء الله.

شكر لاهتمامك يا استاذ محمد وبارك الله فيك

[عنبو]

بجد مش عارف اوفيك قدرك من الشكر علي اهتمامك ونصائحك المفيدة جدا والي وضحتلي حاجات كتير كنت اجهلها بحكم قلة الخبرة وبعد مجال عملي عن هذة المواضيع.جزاك الله خيرا وجعلك الله ممن اختصهم بقضاء حوائج الناس.

لا شكر على واجب فااحنا هنا فى المنتدى كلنا اخوه وده اقل واجب اقدر اقدمه لحضرتك وربنا يارب يجعله فى ميزان حسناتنا

بالنسبة لموضوع الاكيه انا نفسي اوي اعمل لاكيه ابيض بس خايف ان اللون يصفر مع الوقت او يتحول للون البيج فهل هناك انواع كويسة بتحافظ علي درجة لونها ومش بتغير مع مرور الوقت؟

طبعا احنا مبنعملش لاكيه ابيض ساده خالص لابد يتكسر بسنة ازرق علشان يقاوم الصفار وطبعا كلما كان الاكيه من نوع جيد وكلما كان الاكيه متاسس كويس من معجون وبطانه وتشطيب كلما كانت درجة مقاومته للاصفرار اكتر

انا ميال اني اعمل حاجات تميل للبساطة بس تكون كويسة عشان انا بصراحه بحس انا البيت لازم يكون هادي ومريح في الوانة مش كانه معرض ديكورات وفيه خمس ست الوان في مكان واحد

كده الله ينور عليك الالوان الكتيره بتعمل ابهار فى الاول لكن كلها سنه ومتقباش طايق تبص فيها

مثلا انا ناوي ان شاء الله اخلي الرسبشن لونين اتنين فقط احتمال النبيتي مع الابيض اوالنبيتي مع البيج مش عارف ايهم افضل علما بان ارضية الرسبشن سراميك ابض رخامي فاتح

لو هتستعمل النبيتى ياريت متخلهوش لامع خليه مطفى علشان يريح النظر وفى الاول والاخر الالوان دى ازواق

كمان عندي ارع اعمدة بارزه في الحوائط لحواي 20 سم فيه رائ اني احاول اخفيها باني الونها نفس لون الحوائط وفيه راي تاني بقول ان الاعمدة ممكن اعتبارها ميزة وليس عيب وبكدة المفروض انها تتعمل بلون مختلف عشان تظهر فايه رايك في الموضوع ده؟

والله ده على حسب اتساع المكان يعنى لو المكان واسع ممكن اقطع فيه واقسم فيه زى ما انا عاوز لكن لو ضيق مش مستحب التقطيع علشان بيبقى شكله مش كويس بس ممكن حتى لو المكان ضيق اعمل فى العمدان دى نقشه من نفس اللون بتاع الحوائط يقوم يظهر وكأنه رخام

بالنسبة لموضوع الالوان بسمع ان الالوان الخاصة زي النبيتي مثلا لازم يكون من شركة يوتن فهل دا صحيح ولا ايه؟

معلش اسئلتي كتيرة بس دا من العشم في كرمكم وسعة صدركم

والله موضوع المون دى على حسب امكانية حضرتك فطبعا كلما كانت الشركه كويسه بيبقى المنتج كويس يعنى يوتن طبعا شركه ممتازه

بس طبعا لو عاوز توفر ممكن تشتغل بمنتج اى شركه تانيه واكيد طبعا هيبقى فيه فرق بس مش هيظهر على طول هيظهر بعد فتره

انا عندي الشقة كانت مدهونة كمبليكو بلاستيك محبب فهل من الافضل صنفرة الدهان القديم قبل فرد المعجون ولا ممكن يتفرد المعجون عليه زي مقالي احد الصنيعية؟

لا طبعا كلامه مش صح الكمبيليكو طبعا عامل تحبيبه فى الحيطه يبقى لازم التحبيبه دى تنام تماما يعنى مش تحس بيها وانت بتحسس على الحيطه وطبعا علشان مش تعمل فقاعات هوائيه بين المعجون والحيطه وده طبعاً هيأثر على قوة التماسك بين المعجون وبين الحيطه فعلشان كده لازم الحبه ده تقضى عليها تمام سواء الصاروخ او السنفره او اى طريقه اخرى

وبعد كده كلها تدى الحيطه وش غراء خرز وبعد لما تاخد وش الغراء وتعضم بعد كده يبتدى يشتغل معجون

كمان انا ناوي اعمل 2 مكيف في الشقة عندي وعايز اجهزلهم الاماكن بتاعتهم .السنة الي فاتت غيرت العداد بتاع الكهرباء وجبت عداد كبير عشان يتحمل التكييف بس معملتش توصيلات داخلية للتكييف فهل يا تري من الافضل احفر لسلول التكييف في الجدران ولا اعملها علي السكلو بعد التشطيب عشان خايف ان المعجون والدهان الجديد ميقدرش يداري مكان الحفر في الجدران ؟

انا من راى ان المعجون مش هيقدر يدارى وخصوصا ان المحاره من هتدارى اساسا الفرق بين المحاره الجديده ووالقديمه

انا معنديش اي مانع انهم يقيمو في الشقة طول فترة الشغل علما بان الشقة فيها كل مقومات الحياة من ماء وكهرباء ومطبخ كامل التجهيزات كمان الحمد لله الشقة في مكان جميل و علي بعد امتار من البحر يعني مش حيحسوا باي زهق ممكن نوصل ان شاء الله لتفاهم مع بعض

انا اسف بتعبك معايا بس يا ريت لو ينفع وقدرت تقنعهم حاول توصلني بيهم وانا نازل مصر اول شهر 7 ان شاء الله.

شكر لاهتمامك يا استاذ محمد وبارك الله فيك

الله يبارك فيك

ولا يهمك يابشا انا حاليا فى السعوديه ولكن هعرض عليهم الامر واذا وافقوا هقولك بس على ما اعتقد هتبقى صعبه وهتبقى كوست اقوى بالنسبه ليك فانت شوف اى حد عندك ولو احتجت اى حاجه انا تحت امرك

[mama nona]

السلام عليكم

الحمد لله وبعد تعب ومجهود انهيت تشطيب شقتى وفرشتها

ان شاء الله بس اخلص الفرش فيها وابعت الصور يمكن تساعدك فالالوان عند حضرتك

ربنا يوفقك فيها ويعينك عليها