منين يا بلديات؟

[الجدار]

موضوع مكانش مهم بالنسبالي ولا عمري سألته وانا في مصر

لكن اكتشفت هنا في الخليج ان معظم الناس وبالذات اللي من الصعيد لازم اول سؤال منين يا بلدياتنا

وكنت زمان فاكر ان اللهجات عندنا في مصر بتتقسم ان الصعايده نفس اللهجة

والفلاحين نفس اللهجة والقاهرة قريبة لأسكندرية مع اختلافات طفيفة وبورسعيد ومدن القناة نفس اللهجة

طبعاً بالإحتكاك هنا الواحد عرف ان الكلام ده كلام فارغ وان تقريباً كل مدينه ليها لهجتها وليه كلام مميز تقدر تعرف اللي بيتكلم ده منين

طبعاً الواحد ماوصلش للحنكة انه يعرف اللي بيتكلم ده من انهي حته في مصر

لكن أعرف واحد معايا من الشرقية جبار بمجرد الواحد ما يتكلم أدامه يقولك ده منين

ولذلك ومن هذا المنطلق قررت اتعلم تعرف الشخص اللي أدامك ده منين من خلال كلامه

ويا ريت كل واحد يتفضل ويشاركنا ايه الكلام المميز في محافظتك

[الجدار]

حبتدي بأسكندرية اللي هي بلدي

اكيد أيوووووو

الإمَّه يعني الناصية

حنروح وحنيجي وحنعل وحنسوي

مش زي المسلسلات حنروحوا وحنيجوا وحنعملوا الكلام ده مش تبعنا

طبعاً في القاهرة بيقولوا هنروح بيبدلوا الحـ ويحطوا هـ (ملحوظة عالماشي يعني)

عطيته يعني اديته

مش فاكر في ايه تاني بس دول اكتر كلام الناس عرفت اني أسكندراني من خلاله ولو افتكرت حاجه حضيفها وأخواتنا الأسكندرانيه يساعدوني

ملحوظة : لو حضرتك سمعت حد بيقول اي كلمة من اللي فوق دول يبقى على طول أسكندراني

يعتمد ،،،

:lol:

[زعلان]

:lol: انا شخصيا لما اتكلم صعب اي حد يعرف انا منين من مصر او منين من الكرة الارضية و تم منحي عشرات الجنسيات حول العالم حذكر اغربها على الاطلاق جنسية دولة موريشيوس (جزيرة فرنسية في افريقيا )

[أحمد سيف]

:lol: انا شخصيا لما اتكلم صعب اي حد يعرف انا منين من مصر او منين من الكرة الارضية و تم منحي عشرات الجنسيات حول العالم حذكر اغربها على الاطلاق جنسية دولة موريشيوس (جزيرة فرنسية في افريقيا )

ممكن حضرتك تقولنا أخذتها ازاي ... يمكن حد في المنتدى يكون ناوي يقدم هجره لموريشيوس :lol:

[زعلان]

:lol: لا يا حمد انا بخدها شفهي بس :lol: واحدة مورشيسيه كنا في حفلة وهي طول الوقت فاكرني من مورشيس وانا فاكرها صينية

[الباشمهندس ياسر]

ولذلك ومن هذا المنطلق قررت اتعلم تعرف الشخص اللي أدامك ده منين من خلال كلامه

ويا ريت كل واحد يتفضل ويشاركنا ايه الكلام المميز في محافظتك

اخوك الصغير يقدر يقولك معلومة بسيطة

هيفرق معاكى جدا جدا

لو اتعلمت تبص فى عين الانسان و تعرف صادق ولا كداب

[الباشمهندس ياسر]

ولذلك ومن هذا المنطلق قررت اتعلم تعرف الشخص اللي أدامك ده منين من خلال كلامه

[elfakhrany]

بما انى دخلت الجيش وكنت فى سلاح المشاه ( اللى بيقولو عليه سلاح البقر ) وكنت فى منطقة أسمها وادى الملاك ( اللى بيقولو عليها وادى الهلاك ) كانت فى أعداد كبيرة من مختلف محافظات مصر ويوم بعد يوم بدأت أعرف الشخص اللى بقابله منين :-

1- القاهروية :خصوصا الشبراوية كانو دايما يقولو كلمة ( يا زميـــــلى - يا شقيق )

2- الجيزاوية : كنت أحس أنهم بينطقو بدل ال ق حرف ال ك وعليه كان يقولو أنا من الكاهرة وبدل ما يقولو( أعمل ايه دلوقتى ) بيقولو ( أعمل ايه الوقتى :lol: )

2- الأسكندرانية :خصوصا اللى من بحرى كانو دايما يقولو كلمة ( ياخويا - يابويا )

3-الشراقوة : كان دايما يقولو ( مش تاكل - مش تشرب - مش كلت - مش شربت )

4- بنى سويف : كانو بياكلو اخر حرف فى الكلام ولما تسأل انت منين يقولك أنا من بنى سويــــــ ( معرفش خرف ال ف بيروح فين :lol: )

5- المنصورة : كان ليهم كلمات غريبة زى ( أنت بتتأملت عليا ) ودى معناها انت بتتريأ عليا

6 - الطنطاوية :wub: : دايما يقولو ( الدنيا بتشتى ) بدلا من الدنيا بتمطر وفى القاهرة بيقولو بتندع :lol:

7 - الدمايطة : دول تعرفهم فى ثانية من لهجتهم وكانو بيضيفو ( ها ) فى اخر الكلمات أنا شلتها

8 - المنايفة : كانو بيمطو الكلام وتحس ان الكلام بيخرج من الأنف مش من الفم

أمممم .. مش فاكر الباقى انا خلصت جيش من 2005 ومحدش يزعل من كلامى :wub: أنا اصدقاء عمرى من الجيش ومن محافظات متنوعة

تم تعديل 30 مايو 2009 بواسطة elfakhrany

[الجدار]

انا شخصيا لما اتكلم صعب اي حد يعرف انا منين من مصر او منين من الكرة الارضية و تم منحي عشرات الجنسيات حول العالم حذكر اغربها على الاطلاق جنسية دولة موريشيوس (جزيرة فرنسية في افريقيا )

:lol: لا يا حمد انا بخدها شفهي بس :wub: واحدة مورشيسيه كنا في حفلة وهي طول الوقت فاكرني من مورشيس وانا فاكرها صينية

:wub: حلوة يا عم زعزع

طيب ادينا بقى Tips نعرف حضرتك من اي مكان ازاي ؟؟ :lol:

[الجدار]

ممكن حضرتك تقولنا أخذتها ازاي ... يمكن حد في المنتدى يكون ناوي يقدم هجره لموريشيوس :wub:

جرى ايه يا باشمهندس انت غيرت وجهتك عن كندا ولا ايه :wub:

يا ريت يا هندسة تشيلني من قائمة الممنوعين من المراسلة مش عارف ابعتلك

:lol:

[الجدار]

اخوك الصغير يقدر يقولك معلومة بسيطة

هيفرق معاكى جدا جدا

لو اتعلمت تبص فى عين الانسان و تعرف صادق ولا كداب

مستر ياسر حضرتك فهمتني غلط انا مش بتكلم على لغة العيون هنا

يا كوتش عايزين الكلام المميز لكل محافظة اللي هما بس بيقولوه في محافظات مصر كلها

:lol:

[الجدار]

بما انى دخلت الجيش وكنت فى سلاح المشاه ( اللى بيقولو عليه سلاح البقر ) وكنت فى منطقة أسمها وادى الملاك ( اللى بيقولو عليها وادى الهلاك ) كانت فى أعداد كبيرة من مختلف محافظات مصر ويوم بعد يوم بدأت أعرف الشخص اللى بقابله منين :-

1- القاهروية :خصوصا الشبراوية كانو دايما يقولو كلمة ( يا زميـــــلى - يا شقيق )

2- الجيزاوية : كنت أحس أنهم بينطقو بدل ال ق حرف ال ك وعليه كان يقولو أنا من الكاهرة وبدل ما يقولو( أعمل ايه دلوقتى ) بيقولو ( أعمل ايه الوقتى :lol: )

2- الأسكندرانية :خصوصا اللى من بحرى كانو دايما يقولو كلمة ( ياخويا - يابويا )

3-الشراقوة : كان دايما يقولو ( مش تاكل - مش تشرب - مش كلت - مش شربت )

4- بنى سويف : كانو بياكلو اخر حرف فى الكلام ولما تسأل انت منين يقولك أنا من بنى سويــــــ ( معرفش خرف ال ف بيروح فين :lol: )

5- المنصورة : كان ليهم كلمات غريبة زى ( أنت بتتأملت عليا ) ودى معناها انت بتتريأ عليا

6 - الطنطاوية :wub: : دايما يقولو ( الدنيا بتشتى ) بدلا من الدنيا بتمطر وفى القاهرة بيقولو بتندع B)

7 - الدمايطة : دول تعرفهم فى ثانية من لهجتهم وكانو بيضيفو ( ها ) فى اخر الكلمات أنا شلتها

8 - المنايفة : كانو بيمطو الكلام وتحس ان الكلام بيخرج من الأنف مش من الفم

أمممم .. مش فاكر الباقى انا خلصت جيش من 2005 ومحدش يزعل من كلامى :lol: أنا اصدقاء عمرى من الجيش ومن محافظات متنوعة

;)

والله ضحكتني يا فخراني

99% من كلامك صح

طيب انا حشارك باللي أعرفه

- سوهاجية ..... الأحمر أو الأسود يقولوا عليه إحمار أو إسواد

- الأقصرية والقناوية ...... لما يقولك حط حاجه جوا حاجه يقولك أسند حاجه جوا حاجة

- البورسعيدية والدمايطة والشرقاوية ..... لما يقولك فلان جه يقولوا فلان إجا

- الشرقاوية ..... غير طبعاً المشمشة (يقولوا كلمة مش زي مانت قلت قبل النفي مش تروح ومش تيجي) لما يحب يقولك عايز أروح يقولك بدي أروح

- المنصورية ...... تحس كلامهم في مده او زي ما بتقول بيمطوا الكلام بس عادي بيخرج من الفم مش من الأنف زي المنايفة ;)

- الإسكندرانية والإسماعلاوية .... الجنية يقولوا عليه جني بس مش كله بيقولها بس ناس كتير منهم

مش عارف لما أفتكر حاجة حضيف تاني

تحياتي يا فخراني باشا :wub:

[fatfouta]

فكرتونى بحاجة

كنت انا ساكنة فى الدور الارضى وفوق فى الدور الاول اتنين جيرانى من واحدة من المنصورة والتانية من دمياط

وكنا لما نقف فى المطبخ نسمع صوت بعض وكنت اسمعهم يتكلموا من الشبابيك وانا واقفة تحت

وفى يوم لقيت اللى من دمياط بتقول للى من المنصورة هو جوزك ايجه؟ قلتلها لا لسه

قعدت افكر اقول يعنى ايه ايجه؟!!!!! وبعدين لما اتعرفت عليها فى مرة لقيتها بتقولى نفس السؤال قمت قلتلها يا بسمة هو يعنى ايه قلتى يعنى جه يعنى؟.... قصدها يعنى رجع من الشغل

وقامت قلتلى احنا ساكنين فى قرية فى دمياط والكلمة دى بنقولها عطول يعنى دى من الفاظنا عادى

ففهمت الكلمة والحمد لله

[Ahmed Unknown]

كنت قاعد مرة مع اتنين اسكندرانية واحد كان بيدرس و عاش فترة فى القاهرة و التانى كان لسه جاى من اسكندرية طازة

و بينما كنا بنتكلم اذ فجأة الراجل الاسكندرانى الطازة قال "و نزلت ركبت المشروع"

انا طبعا ظهر على وشى علامات التعجب و الاستغراب انا طول عمرى اسمع ناس تعمل مشروع تخلص مشروع تخسر فى مشروع لكن دى كانت اول مرة اعرف ان المشروع بيتركب :lol:

و طبعا بعد ما ظهر عليا علامات الاذبهلال لقيت الترجمة جاية من الناحية التانية و عرفت ان مشروع بالاسمندرانى بعنى ميكروباص

[elfakhrany]

بدأت أفتكر :lol:

الشراقوة : فى هناك قول مأثور بالجيش يقال عن الشراقوة ( الفرخة مش إيلها وراك )

[واحد تاني]

جومة -----> استيكة

فلافل -----> طعمية

شي -----> شاي

يوم لاربع -----> يوم الاربعاء

اسكندرية :lol:

[الجدار]

واحد تاني فتحلي جانب مظلم من دماغي

مستيكة ----------> لبان (أسكندرية برضو)

[واحد تاني]

واحد تاني فتحلي جانب مظلم من دماغي

مستيكة ----------> لبان (أسكندرية برضو)

تصدق كنت داخل مخصوص اقولها :lol:

زبط ------> (تراب على الارض نزلت عليه مية الشتا)

معرفش ترجمتها تبقى ايه في لغات الدول التانية

في كلمات اسكندراني كمان بس بيستخدموها اللي مهتمين بالصيد

نقيصه ------> هاند باج من الخوص بنحط فيه السمك اللي بنصطاده (كسر النون والقاف وفتح الصاد)

وعرت ------> تقال على السنارة لما السن يشبك في الصخر او الاعشاب (فتح الواو وفتح وتشديد العين وكسر الراء)

[se_ Elsyed]

جومة -----> استيكة

أما بتوع الأرياف دول علهيم حركات ؟

والله أول مره أعرف

ودي بتتنطق ولا بتتكتب بس زي الهيروغليفية يا معلم ؟

أيوه يعني لما واحد أسكندراني يكون جنبي في اللجنة وعايز أستلف منه أستكية في إمتحان الجبر .. أقول له إديني جمعه ؟

ولا اشاور له زي البنتومايم ؟

-----------

خد شويه شرجاوي بقى ...

بعضشي ............. ( حسب الله بعضشي ) يعني بعض الشيء .. شويه يعني او some بالإنكليزية

إيهييي إوعى كده ملخت الكم ...... إحنا ما بنقولش كده بس كده على بالي لما حد يشد التاني من كم الجلابية فيملخها او هايقطع الكم ويبقى راجل نص كم ..

عمنول ........... مشهورة عندنا يعني العام الماضي ...

غادي ......... هناك there يعني

لدينا بعض القرى في محافظة الشرقية بتنطق الكاف شين وأوقات كتيرة بيشبكوا فيها تاء كمان ... يعني كلب = تشلب

تخيلوا ؟

[elfakhrany]

جومة -----> استيكة

إيهييي إوعى كده ملخت الكم ...... إحنا ما بنقولش كده بس كده على بالي لما حد يشد التاني من كم الجلابية فيملخها او هايقطع الكم ويبقى راجل نص كم ..

أضحك الله سنك .. بجد أنا ضحكت جدا وتذكرت أشرف عبد الباقى وهو بيقولها