أد ايه احنا المصريين شعب طيب وعظيم

[Tarek_ml]

مع كامل اختلافنا فى اغلب الاحيان مع الرئيس حسنى مبارك فى سياسته وفى كيفيه ادارته للبلد وما آلت اليه احوال البلد مما يدفع الكثير الى الغربه داخل مصر وخارجها ولكن ..... وبمحرد اذاعه نبا وفاه محمد علاء - حفيده - رحمه الله عليه خيمت حالة عامة من الحزن على الشارع المصري .... تصدقوا ان فى ناس بكت على محمد ... يمكن كل واحد فينا وضع نفسه مكان علاء .. يمكن ناس الموقف فكرها بموقف مماثل ..... يمكن ... يمكن ... اهم حاجه اننا لم ولن نعرف الشماته .. الهم الا بعض النفوس المريضه

بحد احنا شعب جميل جدا.

تم تعديل 19 مايو 2009 بواسطة Tarek_ml

[shaeer]

انا لله وانا اليه راجعون

و الله انت قلت نفس الكلام الي دار في ذهني فعلا احنا شعب جميل و طيب جدا و كل يوم بحب البلد دي و شعبها اكتر عن اليوم الي قبله

انا مصري اذا انا استحق ان افخر بنفسي

[fatfouta]

عشان ماينفع نشمت فى الموت والمصائب لغيرنا مهما ان كان الشخص اللى عنده الميبة بيننا وبينه عداوة

احنا المصريين اتربينا على كده ان لما يكون حد عنده حالة وفاة وفى بينى وبينه عداوة يبقى لازم اعمل الواجب واقول البقاء لله

الشماتة مش هتنفعنا بحاجة ولا هترجع حقنا ولا هتشفى غليلنا ..... ودايما المصريين الظلم مش بيخليهم ينسوا يقفوا جمب بعض فى المصايب ومهما ان كان الشخص اللى عنده مصيبة ده رئيس وظلمنا لكن والله كلنا زعلنا جداااا لانه ده طفل ولا ليه اى ذنب اننا نشمت فى عيلته

واحنا فعلا شعب جميل وعاطفى وبيحب بلده اوى انا اتفرجت على برنامج التعازى فى قناة المحور والله على اد مابكيت على اد مافرحت بكمية التسامح اللى عند الناس ومن جميع انحاء مصر مكلفين نفسهم وبيتصلوا عشان بس يعزوا ويواسوا رئيسهم ونسيين كل حاجة ومش فاكرين غير انه دلوقتى فى مصيبة ولازم نقف جمبه

وفى الآخر ربنا يصبرهم على المصيبة الكبيرة دى

[ايهاب سالم]

هو إحنا فعلا شعب طيب يقترب بطيبته لحد ال******

أنا عن نفسي مش شمتان

لكن برضه مش زعلان على محمد

محمد كان عنده ١٢ سنه ... يعني غير مكلف و سيدخل الجنه بإذن الله

محمد عاش حياه أعتقد أنها سعيده و مرفهه و لم ينام في حياته يوما مشردا تحت الكباري و لم يغتصب برائته توربيني

محمد مات في سلام على فراش المرض في مستشفى في باريس و حظى بأقصى ما يمكن توفيره من رعايه طبيه

أنا زعلت أكثر على الأطفال اللي غرقوا في العباره و أكلهم السمك

إقرأ دي وقول لي زعلان على محمد و الا لأ

أنا شبعت يا ماما, طفل 3 سنوات يهذي قبل موته غرقا

اللهم إرحم محمد و سائر موتانا و إهدي أبوه و جده للصراط المستقيم

تم تعديل 19 مايو 2009 بواسطة ايهاب سالم

[masrawwwy]

الله يرحمه ويرحم امواتنا جميعا

فعلا انا شفت بنفسى زميلاتى فى الشغل بيعيطوا على محمد رحمه الله

كله نسى الزحمه والمواصلات والمرتب ومصاعب العيشه فى مصر كلها وبكى على محمد

احنا بجد شعب جميل

قال رسول الله صلى الله عليه وسلم : { لا تظهر الشماتة لأخيك ، فيرحمه الله عز وجل ويبتليك } رواه الترمذي

[ssmaly]

شعب طيب بالفعل

وبينسى كل شىء خاصة عند الموت

تم تعديل 19 مايو 2009 بواسطة ssmaly

[~Heba~]

إقرأ دي وقول لي زعلان على محمد و الا لأ

أنا شبعت يا ماما, طفل 3 سنوات يهذي قبل موته غرقا

اللهم إرحم محمد و سائر موتانا و إهدي أبوه و جده للصراط المستقيم

حرام عليك يا إيهاب انا مش قادرة اكتب

اول مرة اقرأ الموضوع ده و نفسيتى تعبت

[Sherief AbdelWahab]

لأن "الموت علينا حق"..

لأننا نُشِّئنا على فكرة "الواجب" .. وأنه من الممكن أن تفوت "فرح" لكن من الصعب أن تغيب عن عزاء..

لأن علاقتنا بالموت علاقة خاصة لا تجدها في أي شعب آخر على ظهر هذا الكوكب..

لأننا نبكي على أنفسنا قبل أن نبكي على الشخص الذي توفي..

لأن المصائب توحدنا أكثر..

كل هذه أسباب لردات الفعل الطبيعية عقب وفاة حفيد الرئيس ، ولا داعي للحديث عن ردات الفعل المصطنعة التي رأيناها من كبار محترفي النفاق.. وإن كان للنفاق في مصر علاقة بالموت..

وسبحان الحي الذي لا يموت ، والجن والإنس يموتون ، كما في الدعاء المأثور..

خلص الكلام

[herohero]

مش شعب طيب شعب عاطفي وغلبان

بينسى عموما مفيش شماته ف الموت انما ياريت ماننساش ضحايا العباره واطفال معهد الاورام ها اللي جالهم السرطان بسبب المبيدات المسرطنة

دول اطفال مالهومش حد يوديهم فرنسا ولا قنوات تقفل عشان خاطر وفاتهم

عموما ربنا يرحم الجميع

[شرف الدين]

بسم الله الرحمن الرحيم

الأخ / إيهاب سالم

أنا زعلت على محمد وزعلت أكتر على الأطفال اللي ماتوا في العبارة ... ربنا يهدي الجميع

[MoTo]

انا عامة شايف إن الموضوع تم تكبيره بشكل مبالغ فيه و إنه شخصي و مش لدرجة قنوات تتقفل و أفتح الاقي اللي شغال منها مشغل قرأن و تعازي و القنوات اللي مشغلة أغاني وطنية !!!!!!

انا شايفه حاجة شخصية لعائلة الرئيس ولو مستنا كشعب فتمسنا بشكل شخصي برضه .. إنما محبي النفاق حبوا ينفخوا في الموضوع !

بالله عليكم أغاني وطنية إيه اللي تتذاع في ظرف زي ده !!!؟؟ حد يقولي بس معناها إيه ؟؟

حتي الأي أر تي نقت تعبير و الله يدل علي النفاق .. و هو "صادق مواساتنا" و الله انا ضحكت!

الهرم موقعش و الريس مماتش .. و الأسبوع اللي فات فيه طفلين إتدبحوا في بيتهم و الله في شبرا و علي إيد واحد قريبهم و محدش حس

و ألاف من الأطفال بييجوا و يموتوا تحت الكباري .

و الله يا جماعة في أي بلد محترم مش هيحصل كل هذا النفاق و الموالسة الإعلامية .. و يا ريت لو حد يعرف موقف مماثل في بلد محترم يقولنا .. اما عن شعوري الخاص فا أكيد حزين طبعاَ .. بس مش لأنه حفيد الرئيس .

يجب أن نفرق بين العام و الخاص، بس إحنا عممنا الخاص .. و العام مخصخصينوا .. و ربنا يرحمنا جميعا!

[newcomer]

انا عامة شايف إن الموضوع تم تكبيره بشكل مبالغ فيه و إنه شخصي و مش لدرجة قنوات تتقفل و أفتح الاقي اللي شغال منها مشغل قرأن و تعازي و القنوات اللي مشغلة أغاني وطنية !!!!!!

لو فسرنا رد فعل الاعلام المصرى بحسن نيه ...بعيدا عن شبهه النفاق

هنلاقى لان الموضوع جه فجأة ....فمعرفوش يفكروا

و لأننا للأسف كشعب بشكل عام ....اتربينا على نموذج الأجابة المعتمد

دوروا فى كتاب كيف تتصرف فى هذه المواقف

لقوا ان مافيش موقف مشابهه حصل فى مصر قبل كده فى اسرة اى رئيس سابق

نعمل ايه ...نعمل ايه...دوروا على نماذج اجابة مشابهه

لقوا ان هو ده السيناريو اللى بيتعمل فى البلاد العربية المجاورة

و هو ده اللى اتعمل للرئيس عبد الناصر و السادات نفسهم.....فقالوا مافيش غير كده

طيب ماهى حرم رئيس الوزراء توفيت من عشر ايام تقريبا !!!

مافيش اى حاجة ....لا فى الاعلام المرئى و لا المسموع

ليييييه؟؟؟ علشان فى نماذج اجابة شبيهه من قبل كده

بجد من غير الشوهات الأعلامية الناس متأثرة...لأنه طفل و فحأة

زى ما تـأثروا قبل كده لوفاة سعاد حسنى و احمد زكى...

.لما بيكون حد مشهور ....بيبقى رد الفعل قوى

زى ما نكون بنفتكر ان " كل نفس ذائقة الموت" ....ما فيش استثناءات

فبنحزن على اللى مات و على امواتنا.......و على نفسنا

اللهم ارحم امواتنا جميعا و ادخلهم فسيح جناتك....امين

!!

[goodnewss]

أي أم أكيد بتزعل لما تعرف إن طفل مات ايا كان مين وابن مين واحنا زعلنا عليه وقلبنا اتحرق زي مازعلنا برضه علي الطفلين اللي اتدبحوا من اسبوع وعلي ضحايا العباره لأن حزن الأب والأم علي ابنهم اصعب من عذاب

[hanzalah]

إقرأ دي وقول لي زعلان على محمد و الا لأ

أنا شبعت يا ماما, طفل 3 سنوات يهذي قبل موته غرقا

اللهم إرحم محمد و سائر موتانا و إهدي أبوه و جده للصراط المستقيم

حرام عليك يا إيهاب انا مش قادرة اكتب

اول مرة اقرأ الموضوع ده و نفسيتى تعبت

قرأت التفاصيل ولم أتمالك نفسي ..

فعلا

احنا شعب طيب وعظيم وغلبان

أول مره أعرف إن المصري غلبان لدرجة انه ممكن يموت اطفاله بالطريقة البشعة دي ولا تتغير الامور

كما نقول دوماً ..

عادي ..

مصيبة فعلا ..

حادثة العبارة مأساه حقيقية في حياة من عاشوها لحظة بلحظة .. ومن قرأوا عنها

إنها تصلح عنوان عريض للمرحلة الحالكة السواد التي نعيشها في كل مناحي حياتنا

هذا لو كنا نعيش فعلا

أو لنا حياة

أتصور ان الناس في بلادنا تعيش وتموت .. وهي لم تعيش أصلاً

ربنا يسامحك يا استاذ ايهاب

فعلا اتعبت كل من يقرأ هذا الموضوع

[احمد هادي]

انا مصري اعتقد ان الرئيس مبارك مسئول امام الله عن كل ما يجري للمصريين بسبب سوء ادارته للبلاد ولكن

هل لدي احد هنا ما يمكن ان يدين علاء مبارك ؟

هل علاء مبارك صاحب منصب رسمي في الحكومة المصرية وبالتالي يمكن ان نحملة مسئولية ما ؟

واذا لم يكن

هل علاء مبارك مسئول عن افعال والده ؟

هل شاهده احد يسرق او يرتشي او يقتل او يزني اويشرب الخمر ؟

واذا كان كذلك فعلا ......

هل لديه اربعة شهداء علي ذلك لإدانة الرجل

ولنفرض ان علاء مبارك انسان سيئ وفيه كل العبر ....

فهل ذلك يعني ان لا نتعاطف معه لأن ابنه كان منعما-ونحن لا نعرف مصدر أموال والده علي وجه اليقين - وحصل علي افضل عناية طبية ؟

أي منطق هذا؟

انا لا اعرف عن علاء مبارك سوي انه بعيد عن السياسة وتحاصرة الشائعات ....وما اكثرها في مصر ...ونحن اكتر شعب في العالم شاهدته يدعي العلم ببواطن الامور ويحب الفتي

و علاء مبارك لم يطلب من المنافقين ان ينافقوا .......ومعروف انهم ينافقون الرئيس لا الإبن

فهل عندما يختبر اعظم اختبار يمكن ان يجريه الله علي احد من عباده تخرج ردود افعال من نوعية ...انا مش زعلان عليه لأنه كان منعم ومات في مستشفي في باريس

وعلي فكرة

المال والجاه ليس هو النعمة الوحيده التي يمنحها الله لعباده ....هناك نعم كثيرة لا يراها الناس ولا يعرفونها لان معظمهم للأسف لا يحكم الا علي المظاهر الخادعة .

اعرف مصري في قطر ...جاء اليها من اكثر من 25 سنه ...كلما عرف احد ذلك عنه تخرج التعليقات من نوعية ...ولسه ما شبعش ؟ قاعد يعمل ايه مش كفايه عليه كده وغيرها من تعليقات النفوس المريضة

الرجل ابتلي في ابنيه ...الاول بالمرض وظل يعالجه في مستشفيات الخليج لعدة سنوات حتي توفاه الله وهو في الاعدادي

واراد الله ان يبتليه في ابنته الثاني فماتت في حادث سيارة بعدها بعام واحد

لكن الناس لا تعرف سوي ان الرجل يلبس كذا ويسكن في المكان الفلاني ويركب سيارة ومن 25 سنه وهو في الخليج

لو دخلت افخر مستشفيات العالم لرأيت أغنى الاغنياء يبكون في غرف المستشفيات الفاخرة لأن لا احد يسأل عنهم ولا يهتم بهم ولا يتعاطف معهم ......وذلك نوع من العذاب اشد بكثير من المرض نفسه .

انا اعرف ان في مصر من يموت في المستشفيات لعدم قدرته علي شراء حقنه ببضعة جنيهات ......وان الرئيس مبارك مسئؤل – كما ان كل من يعمل في المستشفي من المدير الي اصغر عامل مسئول كذلك

وانا أتعاطف مع هؤلاء أكثر واحزن عليهم لأنني اشعر انهم ظلموا بعدم تلقيهم علاجا علي المستوي المطلوب ولذلك احاول علي قدر ما يكرمني ربي ان اساعدهم

لكن ليس معني ذلك ان لا نتعاطف مع شخص لمجرد انه ابوه غني أو جده ظالم أو عمه نصاب .......

انا احزن حتي عندما اري سيارة تدهس قطا في طريق سريع

افلا احزن علي محمد ابن الثلاثة عشر ربيعا الذي قال لا اله الا الله محمد رسول الله

وربما اراد الله خيرا بالام والاب المكلومين ليصبرا .....فيشفع ذلك لهما عند الله

الموت له جلاله وهيبته حتي ولو من مجرد ذكره وهو من المواقف التي تظهر عندها احوال القلوب

وصدق رسول الله صلي الله عليه وسلم

من كان يؤمن بالله واليوم الآخر .....فليقل خيرا أو ليصمت

[الأهلاوي الأصيل]

البقاء لله...اللهم ارحم محمد علاء وسائر أموات المسلمين

لا شماتة في الموت تلك حقيقة لا شك فيها ، والطفل الصغير ليس له ذنب في فساد عائلته

ولكن ألا ترون أننا جميعاً نتأثر بما يمليه علينا الإعلام الموجه ، لماذا كل هذا الحزن والتأثر على وفاة طفل صغير مات مثله العشرات بل الآلاف غرقاً في العبارة وحرقاً في القطار ودفناً تحت صخور المقطم، وجوعاً ومرضاً من الحصار الذي يضربه جد الفقيد على قطاع غزة

هل تذكرون عندما غرقت عبارة السلام 98 قبل يومين من نهائي امم أفريقيا 2006، وكيف امتلأ الاستاد يومها بعشرات الآلاف وعلى رأسهم حسني مبارك وزوجته وابنيه ومعهما الحفيد الراحل...هل تذكرون كيف قامت زوجة الرئيس تلوح بعلمها فرحاً وطرباً وسعادة...وكيف انطلقت مسيرات الفرح الصاخبة في شوارع مصر وكيف ترددت الأغاني والأناشيد الوطنية في القنوات الفضائية دون مراعاة لمشاعر أسر وعائلات أكثر من ألف مصري ماتوا غرقاً في البحر الأحمر والمسئول عن غرقهم يمرح ويرتع ويلعب خارج البلاد بسبب عضويته بالحزب الحاكم وعلاقته الوثيقة بأسرة الرئيس ومستشاريه...هل تذكرون كيف رفض الرئيس والجد المكلوم حالياً زيارة من سقطت فوق رءوسهم صخور المقطم ودفنوا تحتها لمواساتهم رغم وجوده على بعد أمتار قليلة منهم....

ربما أراد الله بهذا الطفل خيراً أن قبضه إليه قبل أن يبلغ سن التكليف حتى لا ينشأ وسط هذا الجو الفاسد

أما شعبنا المسكين فهو ضحية للإعلام الموجه الذي يعبث به وبمشاعره وأفكاره ويوجهها حيثما يشاء

[Kareemt]

من كان يؤمن بالله واليوم الآخر .....فليقل خيرا أو ليصمت

جزاك الله خيرا هذا مافكر فيه منذ الامس رحم الله الجميع

[newcomer]

ولنفرض ان علاء مبارك انسان سيئ وفيه كل العبر ....

فهل ذلك يعني ان لا نتعاطف معه لأن ابنه كان منعما-- وحصل علي افضل عناية طبية ؟

أي منطق هذا؟

فهل عندما يختبر اعظم اختبار يمكن ان يجريه الله علي احد من عباده تخرج ردود افعال من نوعية ...انا مش زعلان عليه لأنه كان منعم ومات في مستشفي في باريس

المال والجاه ليس هو النعمة الوحيده التي يمنحها الله لعباده ....هناك نعم كثيرة لا يراها الناس ولا يعرفونها لان معظمهم للأسف لا يحكم الا علي المظاهر الخادعة .

الموت له جلاله وهيبته حتي ولو من مجرد ذكره وهو من المواقف التي تظهر عندها احوال القلوب

وصدق رسول الله صلي الله عليه وسلم

من كان يؤمن بالله واليوم الآخر .....فليقل خيرا أو ليصمت

صدقت يا ا. احمد ....

كلام حضرتك فكرنى بقول الشاعر:

وقد حُسدت على موتي فواعجبي حتى على الموت لا أخلو من الحسد .