مجتمع ذكورى متعفن...!!

[الباشمهندس ياسر]

بدون دخول ف التفاصيل تماما

و من غير ما أضطر الى سرد السهرة اللى اتقال فيها الكلام ده

عايز اعرف يعنى ايه

مجتمع ذكورى متخلف

[الباشمهندس ياسر]

يا استاذ حسن

مفيش مشكلة ف كلمة مجتمع ذكورى

انما المشكلة الكبيرة ف كلمة مجتمع ذكورى متعفن

يمكن انا غلطت و كتبتها متخلف ف المداخلة الاولى

بس الكلام كان باللفظ ده مجتمع ذكورى متعفن

انا عايز افهم بقى

ايه الغرض من اضافة اخر لفظ للجملة

و يا ترى ايه اللى بيدور ف دماغ البنات عشان يقولوا لفظ زى ده

[doha]

هو طبعا كان الاولى توجيه السؤال لصاحبة العبارة نفسها ليه قالت ذكوري وليه متعفن ومش متفسخ او مهتريء مثلا .. بس ماعلينا ..

هفترض اني فاهمه هي قالت كده ليه وأجيبك نيابة عنها بالسبب والعذر مقدما لو كنت غلطانه فزي ماقلت لك هي بس الي تقدر تجيبك على وجه الدقة هو ليه بالظبط عفن وامتى وازاي ..

طول عمري بسمع ان مجتمعاتنا الشرقية منحازة للرجل وان الست فيها ( ياولداه ) مظلومه وماكول حقها وبالثلث كمان .. كنت دائما بردد الي حفظوه لنا في المدرسة بان الكلام ده مش صحيح وان الست واخده حقها ( تالت ومتلت ) وان كل دي دعاوى مغرضه واصوات بني علمان وو و ووكل الي كانوا بيضحكوا علينا بيه ده ..

لما كبرت شويه اكتر تحديدا من سنتين تلاته اربعه كده لما عديت الثلاثين وبدأت افهم الدنيا بشكل اوضح وابعد عن نظريات الكتب والمدرسة والجامعه اكتشفت للاسف اننا فعلا مجتمع ذكوري وحتى النخاع ..

هديلك مثال بسيط ..

لي صديقة من فترة كانت في خلاف شديد مع زوجها .. الشخص من وجهة نظرها ووجهة نظر المجتمع لا يطاق .. خلاص وصلت معاها ومعاه للآخر ومفيش حل غير الطلاق .. بينهم اطفال طبعا .. وبينهم مؤخر ومقدم وقائمه عفش وو و .. الزوج رفض يطلق بطبيعه الحال .. هي قررت متسكتش وتمضي في الطريق لآخره عشان تحصل على طلاقها منه ولو بأيه .. قعدت معاها وفكرنا مع بعض لو انها تطلقت ايه الي هيحصل ..

اكتشفنا ان مؤخرها وقايمتها .. تبلهم وتشرب ميتهم .. هي دلوقت لو طلبت الطلاق وهو رافض مقدامهاش غير الخلع .. وده هتتنازل فيه عن كل حقوقها طبعا مقابل الحرية المزعومه .. اكتشفنا بانها حتى لو تطلقت في النهايه فزوجها خرج بشقة وعفش جاهزين يقدر بكرا الصبح ينزل يتزوج بيهم مهو راجل لسه صغير ايه يعني حاجه وثلاثين او حاجه واربعين مقابل عريس جاهز عنده شقته وعفشه ووظيفته المرموقه .. نيجي لها هي بقى ..

وحده ( خرج بيت ) حاجه يوزد يعني .. سنها كبر طبعا مدام عدت العشرين لاه ومطلقه كمان يعني ( يع ) ومعاها كوم عيال مين هيرضى بيها ده الي متجوزتش اساسا مش لاقيه جواز فمابالك بالي لها سوابق ..

ليه المجتمع بيميز في الحاله دي مابين المطلق ويبقى سلعه رائجة وبين المطلقة الي بتبقى معليش لا مؤاخذه يعني ( جربه ) الكل يهرب منها وميحاولش يجيب سيرتها حتى ..

بلاش المثال ده .. نشوف مثال تاني وده حصل لي شخصيا ..

من فترة سافرت السعوديه عند اهلي ومكانش زوجي معايا .. كنت رايحة اساسا اعمل عمره ومددت فترة بقائي هناك وقلت احج بالمرة .. طبعا تاخرت لي كام شهر على مارجعت .. في هذه الاثناء كان كل الي يشوفني يقولي ازاي سايبه زوجك كل الفترة دي لوحده مش خايفه عليه يتزوج ولا يحصل له حاجه في غيابك . . انتي كده بتظلميه ولو عمل حاجه فانتي المسؤولة !!

طبعا عادي جدا ان اي وحده زوجها يسافر ويسيبها بالشهور والسنين كمان وياويلها وياسواد ليلها لو فتحت بقها بكلمه وقالت انت فين ولا لي حقوق .. هيطلع نفس الناس الي بيقولوا حقه ويقولوا لها اكتمي ملكيش عنده حقوق ..

برضه ليه تانيه المجتمع في حاله غياب الزوجين عن بعض يقول على الست برافوا عليها محترمه ومحافظه على نفسها ويقول عليه برافوا راجل مقدرش يستحمل وراح جاب لها بديل ..

مش هقولك بقى على الامثلة الي بيفضلوا فيها الولد على البنت والي يبقى عندها ولد تطلع بيه السما ولو ايه وتخسف بالي عندها بنت الارض ولو ايه برضه .. ومحدش يقولي ده في الريف بس لان للاسف ناس متعلمه ومن بيئات محترمه ومازال ده تفكيرها ومازالت الست الي مجابتش ( الولد) ولا الهربان من الخدمه العسكرية شايلة عارها لغايه ماتعملها وتجيبه ..

وبرضه شوف كده لو عندك ولد وبنت وتقدم لبنتك شاب متدين وعلى خلق بس فقير معندوش شيء وبنتك بنت ناس وغنية .. لو انت راجل عاقل هتقول وماله اجوزها الي يخاف عليها ويتقي الله فيها ومش مهم المصاريف اصرف انا واهو يابخت من جمع راسين في الحلال .. كلام سليم والناس كلها هتشجعك عليه .. طيب تخيل العكس .. ابنك ابن الناس الغني المقتدر راح يتقدم لبنت غلبانه لا وراها ولا قدامها وشكلها عادي مفيهاش حاجه مميزه .. بذمتك هتوافق وتقوله واظفر بذات الدين تربت يداك ؟ وحتى لو انت وافقت تفتكر امه هتوافق ولا اخواته ولا ولا ..

مجتمع لما الشاب الي معندوش حاجه يقولوا عليه وماله هو من ترضون دينه وخلقه فزوجوه .. ولما البنت الي معندهاش حاجه لا مال ولا جمال يقولك خذوهم فقراء تشحتوا سوا ..

مش عاوزه اقولك بقى على امور تانيه زي لو وحده وزوجها الاثنين موظفين .. لو هو قصر في المصروف يقولوا لها معليش واجبك تسدي وتساعدي معاه والحياه تعاون وامال كنتي بتتعلمي ليه روحي اشتغلي معاه .. لو اشتغلت وبقت زيه زيها فده برضه مش هيشفع لها التقصير في شغل بيتها لان اي خلل في نظافة البيت او ترتيبه او حتى تربية الاطفال وتعليمهم فالمدان الاول هي لان ده واجبها ومحدش ساعتها هيقوله شمر ايدك والحياه تعاون ولا حد هيقول مهي شقيانه برا وجوا .. كله يقول لما يكون في تقصير فتش عن المرأة .. هي المسؤولة لو فلوس جوزها مش مكفيه لانها هي المسرفة وهي الي مش عارفة تدبر وهي الي مش عاوزه تهز طولها وتنزل تشتغل .. وهي برضه نفسها المسؤولة لو بيتها فيه حاجه ناقصه لان هي ست البيت وشغله والاهتمام بيه كله على راسها لوحدها بس ..

لما مجتمع يعمل حاجه زي كده تقول عليه ايه ؟

بعد سنين طويلة من الوهم افقت اننا للاسف مجتمع ذكوري بل وشديد الذكورية متخلف ورجعي للاسف وده بيفكرني بقناعه تكونت لدي زمان وانا طفلة .. كنا عايشين وقتها في السعوديه وكنت دائما اقول في نفسي يابخت الرجاله لان الاسلام دين رجاله .. كنت ملاحظه انهم هم بيلبسوا زي ماهم عاوزين ويطلعوا زي ماهم عاوزين .. تجمعاتهم مكشوفه واحنا دائما نقعد في حتت متدارية .. هم يمشوا يقولوا ياارض انهدي ماعليك قدي واحنا ممنوع يطلع لنا صوت .. للاسف ببراءة الاطفال وقتها كنت فاهمه ان ده الاسلام وان ده الصح بس اكتشفت ان مش كله صح وان في حاجات كتير اوي لاعلاقه لها بالاسلام وانما هي مجرد عادات وتقاليد صاغها الرجل عشان ده مجتمعه الي بيكيفه على كيفه ..

مش هقول ان الموضوع مؤامرة او اننا مضطهدات لاه بالعكس .. الستات مرتاحه في جوانب كتير وبرضه النماذج الي قلت عليها مش عامه يعني في ناس كويسه وبتفضل البنت على الولد وفي ناس بتخطب لعيالها بنات فقرا وشكلهم وحش وفي ناس بتطلب المطلقة وترفض المطلق .. بس دول ولو فرضنا بوجودهم نسبتهم كام من كام ؟ هم الاستثناء الذي لاينفي القاعده ..

كده اعتقد متفقين انه مجتمع ذكوري صاغ اعرافه وتقاليده بما يحقق مصلحة الذكر على حساب الانثى .. بس لسه مفسرناش هو ليه متعفن ..واعتقد مش محتاجه تفسير .. يعني الي تحس بالظلم والمراره دي كلها من المجتمع الي مش بينصف وحده فينا ودائما الست هي الغلطانه ودائما هي من يدفع الثمن .. تفتكر لما يكون المجتمع عامل فينا كلنا كده نقول عليه ايه ؟ مجتمع ورد وآخر فل وخمستاشر ؟

قد تفهموا من كلامي ده اني حانقة على المجتمع الشرقي الي بنعيشه او حاسه بالاضطهاد فيه .. بالعكس .. انا بس بوصف الواقع بالظبط زي وحده بتبص في المراية كده فقاله يااه ده انا زايده اثنين كيلو يلزمني شويه دايت .. هي لا بتكره نفسها ولا عاوزه تولع فيها هي بس صريحه وبتقول الي هي شايفاه بلا زياده او نقص ..

طبعا هيجيي واحد من آخر الصف ويقول مين قال انكم مظلومين ده احنا الي مضطهدين واحنا الي غلابه والست النهرده بتاكل دراع جوزها .. اقوله معليش شكلك مقريتش ردي كويس ارجع اقراه من البدايه ..

[MoTo]

هو مش ذكوري بس متعفن فعلاَ .

[ابوالسنون]

اعتقد ان تكرار الكلمات يفقدها الكثير والكثير ..ومصطلحات ذكورية وذكورى تم تكرارهم بشكل مزعج فى الفترات الاخيرة لدرجة انهم كلمات عاديةاشبه بالافيه صحيح ان كتير من النسويات بتستخدم مصطلح ذكورى بشكل مبالغ فيه واحيانا فى غير موضعه ووصل للامر لتحول الكلمة لتابوه لا يسمح فيه بالمراجعه او بالمناقشة او حتى ولكن كل ده لا يفقد لللفظ معناه وللتصرفات الذكورية بشاعتها

ومحدش قال بنفرض موازيين التعامل لكن مش لازم نحارب بشراسة على كل حاجة صغيرة او كبيرة وياننجح يانفشل وبدون اى نقد لتصرفات الاخر معانا http://' target="_blank">

[wagdi]

مع إني مش فاهم أنتم بتكلموا على إيه بالظبط... وإيه السهرة إلى إتقال فيها الكلام ده... ومين إلى قاله... وفي أي مناسبة...

لكن في رأيي الشخصي إن وصفنا ب"مجتمع ذكوري متعفن" وصف لائق ورحيم ويجب شكر قائله على مراعاته وإنتقائه لألفاظه...

وكفاية إنه أستخدم لفظ "مجتمع"... أهي دي لوحدها مبالغة...

[Amr Radwan]

الاخت الكريمة .. ضحي ..

اهنئك علي اسلوبك الرائع في سرد الافكار و طريقة التوضيح لما في مخيلتك عن هذا المجتمع .. الذكوري ..

و لكن .. انا فعلا احزن لما بسمع كده .. و ساعات بحس اننا كرجال ننظر الي النصف الفارغ من الكوب الذي بين يدينا .. و كذلك النساء ينظرن الي نصف الكوب الفارغ الذي بين ايديهن .. في حين لو نظرنا بعين من العدل و المساواة سنجد انه كما يوجد نصف فارغ يوجد نصف ممتلئ .. كما يوجد سماء .. يوجد ارض .. كما يوجد رجل يوجد امرأة .. كما يوجد اب يوجد ام .. و هكذا ..

و لكن كل طرف مميزاته و عيوبه .. لكل طرف اراؤه و تطلعاته .. لكل طرف حقوقه و واجباته ..

و في النهاية .. الطرفان مكملان لبعضهما البعض و لو اختل طرف ستختل المعادلة ..

اري انه في حالة رؤيتي لاسرة من الاسر و تكون فيها الام هي المسيطرة علي مقاليد الحكم الاسري و هي الامر و الناهي في البيت و الزوج لا بيهش و لا بينش .. و سايب مراته تربي ولاده بالطريقة اللي هي عاوزها .. هل هذا يعطي لي الحق في تلقيب المجتمع بلفظ "مجتمع انثوي متخلف" ؟؟!؟!؟

اخواتي العزيزات .. ارجو الا نقوم بعمل كذبة و تصديقها .. نحن في مجتمع شرقي .. مختلف في عاداته و قوانينة الاجتماعية عن المجتمع الغربي .. و الذي يتشدق برفع راية الانسانية و حقوق الانسان و انهم حماة الانسانية و .. و .. و هم اسوأ من يعاملون الانسان و الحيوان

و نفترض ان هناك من المشاكل في حياتنا اليومية بين الرجل و المرأة في امر من الامور المستعصية مثل قضية الطلاق و غيرها حدثت لاحد اقربائنا او اصدقائنا ان نقوم بتعميمها علي المجتمع كله .. انا ارفض هذه الصورة و بشده ..

نعم يوجد من الرجال من لا يعملون عقولهم في تدبير حياتهم .. في التعامل مع زوجاتهم و اولادهم .. و حتي ابائهم و امهاتهم .. و كذلك من الطبيعي ان نجد من النساء من يفعل ذلك ..

نعم يوجد من الرجال من لا يراقب الله في بيته و كذلك من النساء ..

حتي لا اطيل عليكم .. اري ان ذكر الصور السيئة فقط للرجال هي صورة من الصور الاجحاف لكل الرجال .. و كذلك نفس الوضع للنساء ..

و في النهاية ..

اعشق مجتمعي العربي المصري المتماسك .. الجميل

دمتم بصفاء البال .. و رخاء الحال .. حياة مليئة بالحب و السرور

[SoSo R]

مساء الخير يا باشمهندس

أخبارك إيه؟ بقالك فترة مختفى لعل المانع خير

كان جاية أشد كرسى و أتابع من بعيد...مش عايزة أتضرب الصراحة

لى ملحوظة ...هو ليه كل المواضيع اللى بتفتحها ليها علاقة بكلام سهرات

المهم إن أنت بخير...و أتمنالك أجازة سعيدة

تحياتى

سوسورانى

[ذهبية]

ياااااااااااااة يا doha

قولتى كل اللى نفسى فية بجد و اى ست حاسة بية دى مجرد امثلة بسيطةةةةة بس اكتر حاجة مضايقنى بجد و شايفاة و بيحرق دمى

لما الولد يخرج مع البنت و يبقى لة علاقات كتيرة دة شىء عادى جدا و كمان يمكن اهلة فرحانين بية الواد كبر و بقى لة علاقات

ام البنت لو فكرت بس مجرد تفكير كل البيت يولع فيها الاب يضرب و الاخ يضرب و الام تضرب و الجيران

و العيلة والناس مش الولد دة لما بيكلم بيكلم بنت برضة و البنت دى ممكن تكون قريبتك او اختك او او

لية تحللها لنفسك

امثلة كتيرة الاخت ضحى ذكرت معظمها افتكر وانا ضغيرة و كنت اخت وحيدة بين ولدين وللاسف للاسف

كانت المعاملة مختلفة لانى بنت لازم اخدمهم و انظف البيت و اساعد امى لية لانى بنت

و لما اقول اشمعن هما يقولوا انتى اتجننتى دول ولاد يعنى اية ولاد يعنى رجالة يعنى الرجالة ما تساعدتش و لا تطبخ و لا تغسل البنت هى الى لازم تعمل كدة

لية و فى عرف مين و قانون مين ؟؟؟

الولد من حقة يسهر للصبح انا كان لازم قبل 6 اكون فى البيت الولد من حقة يتكلم براحتة فى لتليفون البنت لا

بتكمى مين و لية و علشان اية؟؟ ام الولد يحق لة يكل اى حد فى اى وقت

ياةةةةةةةة يا ضحى انتى فتحتى مش جرح جروح بجد

زعلان ي باشمهندس ياسر من الكلمة دى ياترى البنت كان عندها حق فى الكلمة دى و لالا

دى القاعدة لكن بجد اللى خارج من القاعدة انك تلاقى حد يعطى للمراة حقها

دى تربية و تعامل وعادات وتقاليد متوارثة بتجرى فى عروقنا و دمنا و للاسف احنا كمان من غير ما نحس

بنلاقى نفسنا بنعمل فى ولادنا اللى كان ا هلينا بيعملوا فينا و بنلف فى دايرة مش عارفين نخرج منها

[لونا]

انا الحقبقة مش شايفة اننا فى مجتمع ذكوري ..

و إن كان فى بعض الناس بتتعامل على هذا الاساس فغالبا حيكونوا من النساء

يعني مين اللى بيفرق فى المعاملة بين الأولاد و البنات ؟ الأم !

مين اللى بيرفض زواج الإبن من مطلقة ؟ الأم و الأخت !

مين اللي بيعمل سيرة المطلقة لبانة ؟ النساء !

مين اللى حيلوم الست على تربية ولادها ؟ حماتها و أخت جوزها و سلفتها !!

مين اللى بيسمح لإبنه انه يصاحب بنات ؟ الأم ..على أساس إنه مش عيب .... و لا تفكر إنه حرام !!!!!!!!

إلخ إلخ.......

و النساء اللى بيفكروا كدة بينقلوا تفكيرهم ده للأجيال اللى بعدهم و تصبح دايرة مفرغة.

و كل دى أشياء ممكن تجنبها إذ طبقنا تعليمات ديننا الحنيف بشكل صحيح.

طيب أقولكم على حاجة أنا اتربيت في بيت كله بنات , و لم نشعر للحظة إن أحد والديْنا كان نفسه في ذكور,

بل بالعكس والدي - رحمه الله رحمة واسعة -كان يشجعنا على الاعتماد على أنفسنا و قضاء مصالحنا بأنفسنا

و كان يشجعنا على الذهاب في الرحلات المدرسية و الجامعية التي تمتد لأسبوع بالرغم إنه كان يعتبر من الآباء المتشددة في أشياء أخرى كثيرة

و أنا عن نفسي لا أفرق بين ابني و بناتي فكل واحد لازم يساعد في تنظيف البيت و ترتيب سريره ...بالرغم يعني إن الولد بيعمل كدة بطلوع الروح

و آسفة على الإطالة و شكرا’’

[dongol]

لما الولد يخرج مع البنت و يبقى لة علاقات كتيرة دة شىء عادى جدا و كمان يمكن اهلة فرحانين بية الواد كبر و بقى لة علاقات

ام البنت لو فكرت بس مجرد تفكير كل البيت يولع فيها الاب يضرب و الاخ يضرب و الام تضرب و الجيران

و العيلة والناس

يا أختي

اعذريني كل كلام حضرتك حق يراد به باطل

يعني لو البنت سيبناها تعمل اللي عايزاه و تخرج و ترجع وقت ما هي عايزه و تكلم الشباب وتعمل علاقات ده هيكون الصح من وجهة نظرك

معلش سؤال و اعذريني لجرأته هو لو الولد والبنت عملوا علاقه خارج نطاق الزواج مين هيكون المتضرر في الاخر

الولد اللي مفيش اي دليل انه عمل حاجة غلط ولا البنت اللي هترجع بعيل شايلاه و مش عارفين مين ابوه

يا جماعه ارحمونا من الكلام الحنجوري اللي كل واحده عماله تقوله و هي مش مدركه ممكن يوصلنا لغايه فين

انا معاكم ان لازم يكون في فرص متساويه في التعليم و الوظايف بين الجنسين بس في الاخر الرجال قوامون علي النساء زي ما ربنا قال

[dawn walker]

الموضوع مبالغ فيه

وما يفتعل تلك التفرقة فى المعاملة هى الامهات انفسهن ..وحتى ان كان انجاب المرأة كله بنات ...وياتى الطفل الاخير ولد ..تحس انه يساوى الدنيا كلها عندها .... وهى من تبدأ فى التفريق فى المعاملة

الشىء الحرام فعلا ..والظلم للبنات .كما رأيته فى الواقع وعن تجارب واقعية ...يكون فى المواريث

تم تعديل 15 أبريل 2009 بواسطة dawn walker

[فــيــروز]

يا أختي

اعذريني كل كلام حضرتك حق يراد به باطل

يعني لو البنت سيبناها تعمل اللي عايزاه و تخرج و ترجع وقت ما هي عايزه و تكلم الشباب وتعمل علاقات ده هيكون الصح من وجهة نظرك

لا أدرى كيف فهمت الكلام على هذا النحو !!

المقصود يا عزيزى أن تكون نفس القيود على الولد و البنت و ليس التعامل مع الأمر بالطريقه التى ذهبت إليها و هى أنّه طالما البنت هى الأكثر تضرّرا يبقى الولد يُترَك له الحبل على الغارب !! لأن الدين لم يفرّق بينهما فى العقوبه بينما المجتمع يفرّق !!

و كلام حضرتك فى هذه الفقره من مداخلتك

معلش سؤال و اعذريني لجرأته هو لو الولد والبنت عملوا علاقه خارج نطاق الزواج مين هيكون المتضرر في الاخر

الولد اللي مفيش اي دليل انه عمل حاجة غلط ولا البنت اللي هترجع بعيل شايلاه و مش عارفين مين ابوه

يؤكّد -من حيث لم تقصد فيما يبدو- على كلام الأخت "ذهبيه" و هى أن المجتمع فعلا يتساهل مع الذكور فى الناحيه الأخلاقيه من نفس منطق الأكثر تضرّرا هذا و هو منطق مغلوط ليس له علاقه بالدين أو الشرع الذى لا يتذكّره البعض إلاّ فى موضوع القوامه بينما يتناسون ما يقوله نفس الشرع فى أمور أخرى تستحق الاهتمام بنفس القدر

تحيّاتى

[hanzalah]

اشكر الاخت لونا التي أعادت بكلماتها الامور الى اتزانها المفقود بعد قراءة مداخلة اختنا ضحا التي اشكرها على صراحة التعبير

اتصور ان المجتمع (لو صحت هذه التسمية كما قال العميق جدا - الاستاذ وجدي-)

المجتمع كله قائم على التظالم

كل طبقة تريد قهر من تحتها

انظروا الى التحفز الواضح في سلوكنا

القوي السياسية

وجماعات المستفيدين واصحاب المصالح من رجال الاعمال

يقهرون من تحتهم

ويسحقون الطبقة المتوسطة التي كادت تختفي من حياتنا

وهذا اخطر مافي الامر

بالتالي يحدث نوع من الكبت الذي نلاحظة في بشاعة الجريمة في مصر لاسباب تافهة (يمزق اوصال صديقة بسبب 50 جنيه !! ألم تقرأ مثل هذا الخبر)

وأحيل القاريء الفاضل الى تفاصيل اكثر في تقرير رسمي

يحمل عنوان

نحو نسق إيجابي للقيم الاجتماعية يحلق بالمصريين إلي أفق الرؤية المستقبلية لمصر 2030

هذه الدراسة أصدرها -منذ أسابيع - مركز حكومي !! هو مركز معلومات مجلس الوزراء ..

الدراسة تحمل خلاصة عشرين بحثاً لأهم باحثي مصر وخبرائها

الدراسة رصدت ظواهر كارثية في المجتمع المذري وتحولاته الاجتماعية

التفاصيل

http://dostor.org/ar/content/blogsection/21/64/

الاخوة الافاضل

عندما نادى السيد قاسم امين منذ عقود بتحرير المرأة

وقف أمامه بعض العقلاء يقولون

نعم هناك سلبيات في المجتمع وحيف وظلم يقع على المرأة

ولكن الاصلاح يأتي بردع الظالم - الرجل - وليس بإفساد المظلوم - المرأة -

النفخ ليل نهار في إذن المرأة من وسائل اعلامنا مرئية ومقروءة ومسموعة لتحريضها على الرجل

وتصوير المسألة بأنها معركة وصراع أزلي .. على طريقة يا أنا يا هوه ..

تأليب الزوجة على خلع زوجها

والام على هجر بيتها

والبنت على الفسق بدعوى الحرية والمساواة في الفساد (بدلا من أن نقول للولد الفاسد لاتصاحب بنات .. نقول للبنت صاحبي رجاله .. عادي)

كل ذلك يتناغم مع حمله ضخمة لتسويغ اطفال السفاح وتقنين نسبهم الى الام فقط !!

والحديث بالاطنان حول زواج عرفي و زواج مسيار و زواج فرند وكافة اشكال الزنى

ليهضمها المجتمع ولا يجد فيها غضاضه

لنفيق على احصائية تقول أن مصر تحتل المرتبة الاولى في دول العالم في (تزايد) نسبة الطلاق !! (المصدر جريدة حكومية!!)

ونفيق على 3 مليون من أطفال الشوارع (تصريحات من مصدر حكومي اكثر من مرة)

ونفيق على جرائم اغتصاب تفجرت بشكل وبائي لدرجة الهجوم بيوت آمنة وانتزاع زوجة أما الشارع واغتصابها في حصار رجال الشرطة وتبادل اطلاق نار (هذا ماحدث في جريمة كفر الشيخ الاخيرة والقضاء أمر باعدام تسعة من الجناه بشكل عاجل )

كل هذا من كسل الناس وارتخاء قبضتهم عن حبل الله المتين

وكذلك من مكر الليل والنهار الذي تعيشه الامة المصرية منذ عقود

وهذه هي قصة الذين استضعفوا والذين استكبروا في كل العصور

يقول رب العزة:

وَقَالَ الَّذِينَ كَفَرُوا لَنْ نُؤْمِنَ بِهَٰذَا الْقُرْآنِ وَلَا بِالَّذِي بَيْنَ يَدَيْهِ ۗ

وَلَوْ تَرَىٰ إِذِ الظَّالِمُونَ مَوْقُوفُونَ عِنْدَ رَبِّهِمْ يَرْجِعُ بَعْضُهُمْ إِلَىٰ بَعْضٍ الْقَوْلَ

يَقُولُ الَّذِينَ اسْتُضْعِفُوا لِلَّذِينَ اسْتَكْبَرُوا لَوْلَا أَنْتُمْ لَكُنَّا مُؤْمِنِينَ (31)

قَالَ الَّذِينَ اسْتَكْبَرُوا لِلَّذِينَ اسْتُضْعِفُوا أَنَحْنُ صَدَدْنَاكُمْ عَنِ الْهُدَىٰ بَعْدَ إِذْ جَاءَكُمْ ۖ

بَلْ كُنْتُمْ مُجْرِمِينَ (32)

وَقَالَ الَّذِينَ اسْتُضْعِفُوا لِلَّذِينَ اسْتَكْبَرُوا

بَلْ مَكْرُ اللَّيْلِ وَالنَّهَارِ

إِذْ تَأْمُرُونَنَا أَنْ نَكْفُرَ بِاللَّهِ وَنَجْعَلَ لَهُ أَنْدَادًا ۚ

وَأَسَرُّوا النَّدَامَةَ لَمَّا رَأَوُا الْعَذَابَ

وَجَعَلْنَا الْأَغْلَالَ فِي أَعْنَاقِ الَّذِينَ كَفَرُوا ۚ هَلْ يُجْزَوْنَ إِلَّا مَا كَانُوا يَعْمَلُونَ (33) سورة سبأ

ويقول رب العالمين سبحانه:

وَبَرَزُوا لِلَّهِ جَمِيعًا

فَقَالَ الضُّعَفَاءُ لِلَّذِينَ اسْتَكْبَرُوا

إِنَّا كُنَّا لَكُمْ تَبَعًا

فَهَلْ أَنْتُمْ مُغْنُونَ عَنَّا مِنْ عَذَابِ اللَّهِ مِنْ شَيْءٍ ۚ

قَالُوا لَوْ هَدَانَا اللَّهُ لَهَدَيْنَاكُمْ ۖ

سَوَاءٌ عَلَيْنَا أَجَزِعْنَا أَمْ صَبَرْنَا مَا لَنَا مِنْ مَحِيصٍ (21) سورة ابراهيم

[dongol]

فــيــروز

يا سيدتي العزيزه انا لم أدعوا الي ان يترك الحبل علي الغارب مع الولد ولا ادعو ايضا الي التفريق في العقويه بين الولد و البنت ولكن حضرات الاخوه السيدات يتناسون الفروق العضويه بين الرجل و المرأه في حكمهم علي الامور و ذلك بدعوي التحرر و ارجاع الحقوق

بالله عليكي كيف احكم علي رجل انه يرجع البيت الساعة 6 زي ما اهل الاخت دهبيه كانوا بيحكموا عليها

ثانيا العلاقات الشبابيه مع البنات لم يقل بها لا المجتمع ولا الدين و في معظمها حالات فرديه و يفعلها الشباب تافه التفكير فارغ العقل ولا يصح التعميم بان كل الشباب مثل هذه الفئه وهي في اغلب الاحيان تقابل من الاب و الام بالنفور الشديد و محاولة الاصلاح يبقي فين المجتمع الذكوري الذي يحض علي رذيله الشباب و يطلب العفه من البنات

ثالثا وده الاهم حضرتك ناسيه ان البنات خصوصا في مطلع الشباب وقبل الزواج بيكونوا عاطفيين جدا و من السهل ان اي حد يضحك عليهم و كل الاجراءات التي تتخذها الاسره هي في مجملها الغرض منها المحافظه علي البنت حتي يكتمل عقلها و تكون قادره علي اختيار الشخص المناسب لتكمل معه حياتها و اظن ان ذلك هو عين العقل و غاية الرضا التي تطلبها اي انثي لنفسها

كما قلت انا لا ادعو الي التساهل مع الذكور و لكن يجب ان يوضع كل شئ في اطاره الصحيح و في سبيل الغايه التي خلقه الله من اجلها

ارجو النظر الي المجتمع الغربي و ما وصل اليه من فساد خلقي بسبب ان انهم طلبوا من المرأه ان تؤدي وظيفه الرجل

تحياتي

[فــيــروز]

فــيــروز

يا سيدتي العزيزه انا لم أدعوا الي ان يترك الحبل علي الغارب مع الولد ولا ادعو ايضا الي التفريق في العقويه بين الولد و البنت ولكن حضرات الاخوه السيدات يتناسون الفروق العضويه بين الرجل و المرأه في حكمهم علي الامور و ذلك بدعوي التحرر و ارجاع الحقوق

بالله عليكي كيف احكم علي رجل انه يرجع البيت الساعة 6 زي ما اهل الاخت دهبيه كانوا بيحكموا عليها

ثانيا العلاقات الشبابيه مع البنات لم يقل بها لا المجتمع ولا الدين و في معظمها حالات فرديه و يفعلها الشباب تافه التفكير فارغ العقل ولا يصح التعميم بان كل الشباب مثل هذه الفئه وهي في اغلب الاحيان تقابل من الاب و الام بالنفور الشديد و محاولة الاصلاح يبقي فين المجتمع الذكوري الذي يحض علي رذيله الشباب و يطلب العفه من البنات

ثالثا وده الاهم حضرتك ناسيه ان البنات خصوصا في مطلع الشباب وقبل الزواج بيكونوا عاطفيين جدا و من السهل ان اي حد يضحك عليهم و كل الاجراءات التي تتخذها الاسره هي في مجملها الغرض منها المحافظه علي البنت حتي يكتمل عقلها و تكون قادره علي اختيار الشخص المناسب لتكمل معه حياتها و اظن ان ذلك هو عين العقل و غاية الرضا التي تطلبها اي انثي لنفسها

كما قلت انا لا ادعو الي التساهل مع الذكور و لكن يجب ان يوضع كل شئ في اطاره الصحيح و في سبيل الغايه التي خلقه الله من اجلها

ارجو النظر الي المجتمع الغربي و ما وصل اليه من فساد خلقي بسبب ان انهم طلبوا من المرأه ان تؤدي وظيفه الرجل

تحياتي

يا عزيزى حضرتك لم تعلّق على ما قالته "ذهبيه" فى نقطة العوده فى السادسه مساء !!

حضرتك اقتبست حديثها عن "العلاقات" و تساءلت عن "أثر" هذه العلاقات الذى تتضرّر منه البنت بينما الولد لا يظهر عليه أى أثر و ختمت بالحديث عن العيّل الذى تعود به لأبيها !! الموضوع إذن محل تعليقك هو موضوع العلاقات الغير شرعيه التى قد ينتج عنها أطفال و ليس مجرّد موضوع ليس له قاعده شرعيه و إنّما هو عرف اجتماعى مثل موضوع وقت العوده إلى المنزل ..

الشرع لم يمنح الرجل أى مفاضله لوجود فروق بيولوجيه بينه و بين المرأه حين تعامل مع قضية الزنا و العلاقات الغير شرعيه .. و مرّه أخرى أستدلّ بحديثك أنت شخصيا و تساؤلك عن "الأثر" الذى يظهر على البنت ولا يظهر على الرجل لتأكيد أن النظره المجتمعيه لهذا الأمر ليس لها علاقه بالنظره الشرعيه و إنّما هى نظره متساهله مع الرجل لحدّ ما و متشدده مع المرأه لأقصى حد بدليل أنّها تتعامل مع الموضوع من زاوية شدّة الأثر الناجم و مدى وضوحه و ليس من زاوية موقف الشرع من هذا الإثم الذى يهتزّ له عرش الرحمن .. و للتوضيح ليس القصد من حديثى منح المرأه أى تسهيلات فى المسأله الأخلاقيه و إنّما التشديد على الرجل بالمثل فى هذه المسأله ببساطه لأن هذا هو موقف الشرع .. و سيسعدنى جدّا أن يكون ما ذهبت إليه من أن الشباب المنحرف ما هم إلاّ قلّه أو حالات فرديه لا تعبّر عن موقف مجتمعى .. حقيقة سأسعد جدّا إن كان هذا هو التوصيف الحقيقى للحال

تحيّاتى

[مغتربة]

وما يفتعل تلك التفرقة فى المعاملة هى الامهات

هذه النقطه اثيرت تحديدا اكثر من مره فى هذا النقاش بصيغ مختلفه

الام يا ساده عندما تلجا الى ما ذكرتموه فهو يكون عاده تنفيس عن القهر و الكبت الذى عانته هى خلال سنوات عمرها

عندما تفرح بانجاب الولد فلان هذا الولد هو الذى سيرفع عنها ضغط شعورها بالعجز و عدم الامان لها و لبناتها

فبما ان المجتمع كله ذكورى

و هى حقيقه لن يغيرها من يعترض عليها

فوجود ( ذكر ) فى محيط حياتها

سيمتعها بكل ما حرمت منه

ومن اجل هذا ( الذكر المنتظر )

تقوم بكل الافعال الاخرى من تفرقه فى المعامله و الحرص على انتقاء الافضل له من زوجه و خلافه و التغاضى عن هفواته و نزقاته .........الخ

بدون ان تعى انها بهذه الطريقه تستنسخ معاناتها و عذاباتها فى بناتها

لتنقل المعاناه جيل بعد جيل

اسفه هذه هى الحقيقه و ان بدت قاسيه

و انا اعلم انه لا مجال للتعميم

و لكن هذا هو الغالب حتى الان

تم تعديل 15 أبريل 2009 بواسطة مغتربة

[Amr Radwan]

اتوقع انكم لم تقرأوا مداخلة الاخ حنظلة في اخر الصفحة الاولي من هذا الموضوع ..

فعلا .. كل التقدير لك علي مداخلتك اخي الكريم حنظلة ..

[dongol]

يا عزيزى حضرتك لم تعلّق على ما قالته "ذهبيه" فى نقطة العوده فى السادسه مساء !!

حضرتك اقتبست حديثها عن "العلاقات" و تساءلت عن "أثر" هذه العلاقات الذى تتضرّر منه البنت بينما الولد لا يظهر عليه أى أثر و ختمت بالحديث عن العيّل الذى تعود به لأبيها !! الموضوع إذن محل تعليقك هو موضوع العلاقات الغير شرعيه التى قد ينتج عنها أطفال و ليس مجرّد موضوع ليس له قاعده شرعيه و إنّما هو عرف اجتماعى مثل موضوع وقت العوده إلى المنزل ..

الشرع لم يمنح الرجل أى مفاضله لوجود فروق بيولوجيه بينه و بين المرأه حين تعامل مع قضية الزنا و العلاقات الغير شرعيه .. و مرّه أخرى أستدلّ بحديثك أنت شخصيا و تساؤلك عن "الأثر" الذى يظهر على البنت ولا يظهر على الرجل لتأكيد أن النظره المجتمعيه لهذا الأمر ليس لها علاقه بالنظره الشرعيه و إنّما هى نظره متساهله مع الرجل لحدّ ما و متشدده مع المرأه لأقصى حد بدليل أنّها تتعامل مع الموضوع من زاوية شدّة الأثر الناجم و مدى وضوحه و ليس من زاوية موقف الشرع من هذا الإثم الذى يهتزّ له عرش الرحمن .. و للتوضيح ليس القصد من حديثى منح المرأه أى تسهيلات فى المسأله الأخلاقيه و إنّما التشديد على الرجل بالمثل فى هذه المسأله ببساطه لأن هذا هو موقف الشرع .. و سيسعدنى جدّا أن يكون ما ذهبت إليه من أن الشباب المنحرف ما هم إلاّ قلّه أو حالات فرديه لا تعبّر عن موقف مجتمعى .. حقيقة سأسعد جدّا إن كان هذا هو التوصيف الحقيقى للحال

تحيّاتى

فيروز

حضرتك ليه مصره اني بقول انه يجب ان يكون هناك معامله تفضيليه للرجل بسبب الفروق البيولوجيه

انا قلت في مداخلتي السابقه انه يجب ان يكون هناك فرص متساويه في التعليم و العمل ولكن مسأله العلاقات الغير شرعيه دي قضيه اخري

يا سيدتي يجب ان يكون في عقلنا عند الحكم علي الامور ان كل اداه في هذا الكون لها فائده معينه خلقها الله من اجلها و اذا اردنا من هذه الاداه ان تقوم بعمل اخر فسوف تفسد بالتأكيد

اكبر دليل علي ذلك هو المرأة خلقها الله لعمارة الارض وليسكن لها الرجل و لتكون ملاذا و سكينه له يستعين بها علي صعوبات الحياة

"و من أياته أن خلق لكم من أنفسكم أزواجا لتسكنوا اليها و جعل بينكم موده ورحمه إن في ذلك لأيات لقوم يتفكرون"

و اذا بالنساء لا ترضي بهذا الدور و تريد ان تشارك الرجل في وظيفته التي خلقه الله من اجلها و تتعلل بالمساواة

لماذا جعل الله شهاده الرجل بامرأتين .... لان تركيب عقل الرجل يسمح له بتذكر اشياء قد تنساها المرأه فتذكر احداهما الاخري

لماذا كتب الله علي الرجل القتال و الجهاد ولم يكتبه علي المرأة لان الجهاز العضلي للرجل يتحمل المجهود الذي يطلبه القتال

لماذا تفطر المرأة في نهار رمضان بعذر ولا يفطر الرجل

انا بس اعطي لحضرتك امثله ان التركيب البيولوجي لكل كائن يحتم عليه ان يتعامل مع نفس الامر بطريقه مختلفه عن الطريقه التي يتعامل بها كائن اخر

و بعيدا عن الدين نرجع لنظره المجتمع لقضيه العلاقات الغير شرعيه

دائما الرجل في هذا الامر هو الطالب و المرأة هي المطلوبه وهي في يديها ان تعطي و ان تمنع ولذلك يجب ان تتحمل اكثر من الرجل في نظر المجتمع ولا اظن انه اذا نظر المجتمع الي الرجل بنفس النظره الأثمه فذلك سوف يبعد المرأة عن مسئوليتها انها هي التي تعطي و تمنع

"فلا تخضعن بالقول فيطمع الذي في قلبه مرض"

واعذريني فقد اطلت و احب ان اذكر حضرتك ان اختلاف الرأي لا يفسد للود قضيه

[فــيــروز]

يا أخ "دنجل" .. هو مش حضرتك اللىّ كتبت هذا الكلام؟

معلش سؤال و اعذريني لجرأته هو لو الولد والبنت عملوا علاقه خارج نطاق الزواج مين هيكون المتضرر في الاخر

الولد اللي مفيش اي دليل انه عمل حاجة غلط ولا البنت اللي هترجع بعيل شايلاه و مش عارفين مين ابوه

هل لكلامك هذا أى صله بما يقرّه الشرع من عقوبات متساويه لكلّ من الرجل و المرأه فى حالة إقامة علاقات خارج نطاق الزواج !! يعنى كلام حضرتك هو الذى يوحى بوجود أفضليه للرجل لأن آثار العلاقات لا تظهر عليه و لستُ أنا من يحاول أن يقوّلك ما لم تقّله !!

مسائل أخرى كالتعليم و العمل و موعد العوده للمنزل أنا أصلا لم أعلّق عليها أنا علّقت على نقطه محدّده بشدّه و لم أتطرّق لموضوعات من قبيل رضا النساء أو رفضهن للقيام بأدوارهن فى الحياه و لا أظن أن هناك علاقه بين ما ذكرته فى مداخلتك الأخيره و ما أعلّق أنا عليه بشكل شديد الوضوح و التحديد ..

و نقول تانى ؛؛

لا التركيب البيولوجى المختلف للمرأه ولا القدرات الجسمانيه للرجل ولا مَن الطالب ولا مَن المطلوب ولا أىّ من هذه الأمور جعلت الشرع يفرّق بين الرجل و المرأه فى العقوبه المرتبطه بالعلاقات الغير شرعيه كى يكون لنا كمجتمع أن نقيم هذه التفرقه .. بالعكس حديثك عن النظره المجتمعيه التى تقيم هذا الفرق رغم تعارضه مع الشرع تؤكّد ما يطرحه الموضوع عن فكرة الذكوريه المجتمعيه ..

للأسف البعض -أتحدّث بشكل عام هذه المرّه- يتمسّك بالشرع حين يطالب بحقوقه فى القوامه مثلا لكنّه يتناسى هذا الشرع و يتحدّث من زاوية المجتمع حين يكون موضع محاسبه و مساءله !!

تحيّاتى