المصريين المغتربين بالكويت

[تامر مصطفى]

كب كيك

يا بنتي بلاش تكتبي في نهار رمضان

مجرد ما بتكتبي بنجوع :lol:

سامح مجدي توصل مصر بألف سلامة

[عادل أبو عمر]

الاخ مارووو

ربنا يوفقك يارب اللهم امين لما يحبه ويرضاه

اولا علشان اسره من خمس افراد لازم تكون تفكر فى الاتى :

1- مصاريف المعيشه من اكل وشرب وفسح ودى تحسب على حسب الترف اللى حضرتك عايز تعيش فيه ولو مدخن هيبقي ليها حسبه برضه يعنى اعتقد على الاقصي 250 ومش اكتر ان شاء الله

2- مصاريف العلاج حكومى وخاص وطبعا التحاليل واسالنى لسه كعه 20 دينار لتحاليل بتتعمل فى مصر ب50 جنيه وطبعا لو عملتها فى خاص يبقي هدخل فى 100 ولا حاجه (لو تقدر نخلى التامين اللى هتعمله الشركه على مستشفيات خاص يبقي ممتاز كده هتبقي الرعايه افضل وببلاش او باسعار قليله وربنا يوفقك ان شاء الله )

3- مصاريف مدارس ودى بقي اللى ممكن تقسم الظهر ولو حضرتك رجعت اكتر من 20 صفحه لورا هتلاقي انى متكلمه على تكاليف المدارس بالتفصيل الممل وربنا يوفقك ان شاء الله

4- مصاريف السكن والمواصلات ودى نقطه هامه جدا اعتقد ان السكن عليهم ومؤثث فده ممتاز جدا جدا جدا لانه هيوفر عليك حاجات كتير ومصاريف اكتر لان اى شقه ادميه لخمس افراد لا تقل عن 250 دينار

وبالنسبه للمواصلات فدى مهمه جدا لاى مكان لان المواصلات غاليه فاتمنى ان حضرتك تكون مجهز نفسك انك هتحتاج عربيه لمشاوريك الخاصه وربنا يوفقك يارب اللهم امين

5- مصاريف تكميليه ولكنها اوقات تكون مهمه زى مصاريف التليفون والنت

ودى على الاقصي مش هتاخد 30 :50 دينار لو بترغوا فى التليفون لمصر والنت هيبقي ارحم طبعا وده اقل اشتراك لوحدك هيكون 15 دينار وربنا يوفقك

اعتقد انى كده شرحت بالتفصيل فيه ايه تانى يا بوسي في ايه تانى ؟؟؟؟؟؟؟؟؟؟؟؟؟مش فاكره

الأخت الكريمة بوسي

ألف شكر للمعلومات " التفصيلية " العرض المفروض أن الشركة توفر سيارة و طلبت منهم تأمين للأسرة بس أعتقد إنهم هيعملوه عادي مش خاص

بجد حاجة تفرح إنك و الأستاذ سندباد اهتميتوا بالرد علي و كل الإخوة مهتمين بالرد على أي استفسار ، صراحة أنا كنت بشوف منتديات المغتربين في السعودية من زمان و كان عاجبني أوي تفاعل الإخوة هناك رغم إني مكنش في عرض لي هناك "بس نفسي وما زلت أروح عشان أحج و أكون قريب من الحرم"

لكن بصراحة المنتدى هنا عن الكويت حببني في الكويت رغم إني زرت الكويت مرتين لكن الكلام بتفاصيله عن المعيشة معرفتوش أكتر إلا من المنتدى

صراحة تجربتك اللي حكيتيها صعبة جدا و مهم جدا للواحد يعرف هيتعامل مع مين أو على الأقل يتوقع هيتعامل إزاي عشان كدة مش مفروض يفرط في أي حق له

[قلب ابيض]

واحنا المفروض بنجهز الجمال وهنشد الرحال للكروان ده ولما نشوف ايه حكايته هو كمان wst::

حكايته زى الفل يا سمبا والله ...حبذا لو كانت الدعوه على صاله النوخذه ودى مأكولات بحريه -عشقى -يا خساره لو كنت هناك كنت قابلتك

نصيحه بقى مادمت رايح انزل من الباب الخلفى على شمال الاسانسير وادخل الاسبا اكواتونيك واطلب من الريسبشن حد يعرفك على المكان هايفسحوك فيه فرى طبعا ولو عجبك ...اكييييييييييدهايعجبك ابقى قولى عالخاص بس

وممكن تدخل النادى الصحى كمان وتشوف اخره الكرش ده ايه بقى ؟؟؟؟

ياريتنى هناك دلوقتى...يالله خيرها فى غيرها

ومعلش ممكن دعواتكم ان ربنا يوفقني في امتحان الرخصة من اول مرة خصوصي خصوصي يعني ان مش معايا واسطة وعلي رأي محمد صبحي في مسرحية لعبة الست واسطتنا مالهاش كارت ما ينفعش يبقي لها كارت واسطتنا ربنا .. والمشكلة بقي ان اغلب اللي راحوا وامتحنوا من اللي اعرفهم بيقولوا مالهمش دعوة تسوق كويس ولا مش كويس اول مرة دي من غير واسطة ساقط ساقط

تانى هاتقولى واسطه ؟؟؟؟؟

والله خدتها من غير واسطه ولا يحزنون ..حتى جوزى ما حضرش معايا التراى لانه كان واثق انى مش هاعدى من اول مره .....انت بس توكل على الله وخليك واثق من نفسك جداا مركز مع اللى بيختبرك وكأنك سايق عادى مش اختبار...ولن اتنازل عن انى اضرب الكلاكس بنفسى اول

ماتجيب عربيه ...ربنا يوفقك ان شاء الله

حاجة بقي مش اخيرة وخدمة منكم

مفيش حد يعرف مطعم بيعمل اكل مصري ويكون باشتراك شهري كل مطاعم الرقعي هنا مفيهاش الكلام ده وشركة التجهيزات الغذائية مش بتتعامل غير مع المجموعات الكبيرة

جاد ايه نظامه؟؟؟؟

فى مطعم خااااص جدا وبيرحب فى اى وقت بيكم جميعا ...ام نور للاكلات المصريه خاص بالمحاورتيه

اسيبكم بقي واشوفكم بعد ما ارجع م الدوام

ترجع بالسلامه

[تامر مصطفى]

والنبي يا ام نور مش عايزين كلام فض مجالس ولا عزومة مراكبية

مطعم ايه وبتاع ايه

حد شاف منك حاجة؟؟؟؟

ما الشباب يا عيني عزابية ويقطعوا القلب ولا عمرك حنيتي عليهم بحلة محشي والا صينية بطاطس والا حتى مكرونة بالبشاميل

واديكي جنبي دلوقتي وبيني وبينك شارع ونص

شفت حاجة؟؟؟؟؟؟؟؟؟؟؟؟؟

فالحة بس تقولي لي مشمشية وذهبية

[رونا]

حمد الله على السلامه يا رونا الكويت كلها نورت

وهتنور اكتر قريب ان شاء الله

اصل انا نازل اجازة ان شاء الله

فلو حد عاوز اى حاجه من مصر من عنيا الاتنين

فكرو قصادكم 5 ايام بس

ميرسى ياكب كيك وسامح

الكويت منورة بيكم

استشارة عاجلة ...

هو اية نظام المياة هنا

يعنى نشرب من الفلتر ولا لزم مياة معدنية

[تامر مصطفى]

رونا خلي بالك ان المياه المعدنية ليها اضرار على المدى الطويل

وبتؤدي الى ارتفاع الاملاح في الجسم

الافضل انك تخلطي يعني شوية من الفلتر وشوية معدنية بس انصحك بتركيب فلتر متعدد المراحل

وعموما كله على الله وربنا يستر علينا وعلى عيالنا

[قلب ابيض]

تعالوا احكيلكم على موقف يبين اننا متربعين على قمة العشوائية

اول امبارح كنت ماشي وقت الفجر على كوبري 6 اكتوبر وفي ناس راكنة على الكوبري فوق النيل بيشموا هوا

خصوصا والجو الايام دي في مصر يجنن والحرارة 26

:blush2: :blush2: :blush2: :blush2:

بعد اخر سيارة بحوالي 30 متر يعني مسافة قريبة جدا شفت تاكسي راكن جنب الرصيف والسواق على الرصيف قاعد في الارض القرفصاء وبيعمل زي الناس

:blink: :blink: :blink: :blink:

الجميل بقى في الموضوع ان بعد الراجل ده ب50 متر تقريبا في نقطة شرطة وقاعدين امناء الشرطة والعساكر

وعلى رأي محمد صبحي

طب والله ما هي نكتة

يا استاذ تامر رمضان كريم ...يعنى هى ناقصه ؟؟؟

ربنا يقدرك على كلمه حلوه قولها ...مافيش يبقى خلاص بلاش

اللى هايبص فى العيش مش هاياكله ...

يا سااااااااااتييييييييييييييييييييير md2:

[قلب ابيض]

والنبي يا ام نور مش عايزين كلام فض مجالس ولا عزومة مراكبية

مطعم ايه وبتاع ايه

حد شاف منك حاجة؟؟؟؟

ما الشباب يا عيني عزابية ويقطعوا القلب ولا عمرك حنيتي عليهم بحلة محشي والا صينية بطاطس والا حتى مكرونة بالبشاميل

واديكي جنبي دلوقتي وبيني وبينك شارع ونص

شفت حاجة؟؟؟؟؟؟؟؟؟؟؟؟؟

فالحة بس تقولي لي مشمشية وذهبية

md2: md2: md2:

لعلم حضرتك انا عزمت بقلب على حفله الايتام امبارح والموضوع كان مش قادره اوصف لك كم السعاده اللى رجعت بيها اجمل شىء انك تعطى بدون ان تنتظر مقابل ..الا من وجه الكريم سبحانه وتعالى

كان اكل وهدايا وتبرعات واختك لله الحمد كان لها دور اسأل الله ان يجزينى عنه ...وده بقى اللى كان بينك وبينه شارع ونص بجد يا اهل فيصل mfb:

طيب بعد بكره فى زياره لدار مسنين....تحب تشارك سيادتك؟؟؟ولا مشمشيه وذهبيه ؟؟؟؟؟

واكرر انا مش بقول كلام اقصدونى كده وانتو تشوفوا بالعند فى ناس مغرضه ...

سمبا الكحك اعتبره وصل بس ياريت عالخاص رقم موبايلك بالكويت ...

وعنيه فى حدود اللى اقدر عليه كرمالكم يا محاورتيه

ابو فرح ....انت مالك بالعزاااب؟؟؟ افتح عليك فاتحه يعنى واتحمل انت بقى من ام فرح الرد؟؟؟؟اسكت احسن

تم تعديل 4 سبتمبر 2010 بواسطة قلب ابيض

[تامر مصطفى]

ابو فرح ....انت مالك بالعزاااب؟؟؟ افتح عليك فاتحه يعنى واتحمل انت بقى من ام فرح الرد؟؟؟؟اسكت احسن

هـ هـ هـ هـ (ضحكة خوف)

هو الواحد ميعرفش يهزر معاكي ابدا كده

على طول تقومي قالباها عنف كده

طب تصدقي بايه انا كنت هقولك اني هاجي عزومة الايتام دي بس كنت معزوم على الفطار

وبعدين هبقى اقصدك في الكويت في شوية مموش والا متشبوس

تعرفي احساسي حاليا وانا راجع الكويت بعد اسبوع ايه هو؟؟

كأني واخديني يحموني بالعافية

او رايح اتضرب علقة في الفصل

ده غير الاحساس اللي بيلازمني في كل يوم سبت

كأني مش عامل الواجب ورايح للأبلة تضربني تاني يوم

تفتكري ده مرض نفسي؟؟

[samehmagdy]

بالنسبه للميه يا رونا زى تامر كان بيقول خلى بالك من الميه المعدنيه

بس انا من رائى وعن تجربه اشترى ميه شرب معبئة مش معدنيه

بتبقى نسبه الاملاح فيها اقل وهى عباره اصلا عن ميه حنفيه متفلتره ومضمونه

ABCزى حياة واكوافينا و

وعلى فكره يا تامر انا الظاهر عندى نفس المرض النفسى بتاعك دى بس يمكن اكتر شويه

اصلى بفكر فى يوم الرجوع من قبل ما انزل الاجازة اصلا الظاهر انا فى مرحله متقدمه اوى :blink:

[hakeem]

السلام عليكم يااهل المحاورات فى الكويت ..عندى استفسار خاص بواحد قريبى

جايله عرض من شركه امريكانا فرع الكويت هو خريج تجاره 2009 والعرض اللى جايله بياناته:-

المرتب 120 دينار

السكن على الشركه

المواصلات على الشركه

له كل يوم وجبه اكل من المطعم

الشغل 8 ساعات وبيقولوله لو اشتغلت اكتر منهم هيتحسبلك اضافى (فى اضافى فعلا ولا كلام)

ومش هيتكلف اى مبلغ هنا غير بس تجهيز اوراقه والتحاليل وتذاكر السفر الشركه هتبعتهاله

والاجازه شهر فى السنه................

ايه رأيكم وياريت الاجابه على نقط بنود العقد اللى عرضتها عليكم

وكل سنه وانتوا طيبين

[sindbad]

السلام عليكم يااهل المحاورات فى الكويت ..عندى استفسار خاص بواحد قريبى

جايله عرض من شركه امريكانا فرع الكويت هو خريج تجاره 2009 والعرض اللى جايله بياناته:-

المرتب 120 دينار

السكن على الشركه

المواصلات على الشركه

له كل يوم وجبه اكل من المطعم

الشغل 8 ساعات وبيقولوله لو اشتغلت اكتر منهم هيتحسبلك اضافى (فى اضافى فعلا ولا كلام)

ومش هيتكلف اى مبلغ هنا غير بس تجهيز اوراقه والتحاليل وتذاكر السفر الشركه هتبعتهاله

والاجازه شهر فى السنه................

ايه رأيكم وياريت الاجابه على نقط بنود العقد اللى عرضتها عليكم

وكل سنه وانتوا طيبين

120 دينار ومعاه تجاره

حرام عليه يجي على الراتب ده

حرام

دي تذكرة السفر بتوصل 2800 جنيه في السنه واكيد على حسابه

ده غير المكالمات واللبس والاكل ولو حب يغير جو مره في الاسبوع ولا حاجه

يعني في اخر السنه ح يصفي له 10 الاف جنيه فقط والاسم قاعد في الكويت ويشتري بيهم هدايا للناس في مصر ويبقى بيضيع وقت

تم تعديل 4 سبتمبر 2010 بواسطة sindbad

[تامر مصطفى]

السلام عليكم يااهل المحاورات فى الكويت ..عندى استفسار خاص بواحد قريبى

جايله عرض من شركه امريكانا فرع الكويت هو خريج تجاره 2009 والعرض اللى جايله بياناته:-

المرتب 120 دينار

السكن على الشركه

المواصلات على الشركه

له كل يوم وجبه اكل من المطعم

الشغل 8 ساعات وبيقولوله لو اشتغلت اكتر منهم هيتحسبلك اضافى (فى اضافى فعلا ولا كلام)

ومش هيتكلف اى مبلغ هنا غير بس تجهيز اوراقه والتحاليل وتذاكر السفر الشركه هتبعتهاله

والاجازه شهر فى السنه................

ايه رأيكم وياريت الاجابه على نقط بنود العقد اللى عرضتها عليكم

وكل سنه وانتوا طيبين

اولا شغل بتوع امريكانا 12 ساعة في اليوم

ثانيا دواماتهم غير ثابتة يعني ممكن يشتغل اسبوع من 12 الضهر ل 12 بالليل والاسبوع اللي بعده من بالليل لغاية الضهر

بمعنى انه ميقدرش يدور على شغل اضافي

وكمان الشغل بيبقى متعب جدا لانه واقف في مطعم وشغال باستمرار ده غير معاملة بعض الزباين الغير آدمية بالمرة

وعلى فكرةكمان شركة امريكانا مش بترحم حد يعني اقل غلطه هيقولوا له مع الف سلامة

ياريت ترجع في الموضوع ده لصفحات سابقة وتشوف ردود الناس وتعليقاتهم على مواضيع مشابهه

يا جماعة الكويت انا حاسس ان الناس اللي بتدخل تسأل كلها هتقول اننا مش عايزين حد يشتغل

بس هما بيسألوا عن شغل برواتب متدنية جدا والموضوع امانه

وبكرر كلامي ان ملناش اي مصلحة ولا علينا اي ضرر لما اي حد يجي يشتغل بأي راتب سواء كبير او صغير

وكل واحد حر في نفسه

بس المصيبة اننا بنرخص جيل كامل ورانا لما بنقبل بالرواتب التعبانه دي

[Simba]

سمبا الكحك اعتبره وصل بس ياريت عالخاص رقم موبايلك بالكويت ...

لالالالالالالا يا مدام قلب ابيض كحك ايه بس ربنا يخليكي يارب هو بالظبط وصل واكلته وتسلم الايادي

والله العظيم انا كنت بهزر بس في التوبيك لا اكتر ولا اقل

[Simba]

المرتب 120 دينار

مجرد االتفكير في العرض ظلم كبير لنفسه

[Simba]

اللافينوز

http://www.youtube.com/watch?v=YtFv0OimA5s

بيني وبينه فردة كعب :P

[noname]

120 دينار.............. بجد مش عارف اقولك اية

[noname]

ممكن يا جماعة لو سمحتم من فضلكم محدش يجيب سيرة كحك العيد والذى منة

مراعاة لمشاعر اخوانكم المحرومين ( احنا ) ودا مش حب فى الكحك وانما بتلكك نفسى ارجع مصر

مصر مليانة سلبيات وكلنا قبل ما نسافر ونسيبها كنا متعايشين معاها اشمعنا دلوقتى بناخد بالنا منها .

على فكرة هنا كمان ( على اساس انها الجنة الموعودة) سلبيات اكتر بكتييييييييير من المحاسن

انا مش شايف غير شوية مطاعم وقهاوى واسواق اقل مستوى من العتبة الخضرا وارقاها مستوى ميوصلش لاقل محل فى عباس العقاد

وعلى راى الاستاذ تامر الكويت متبعدش على حبيب ... ربنا يكتر الحبايب وترجعلنا بالسلامة

وبعدين يا اخى مش يمكن عندة عذر ولا مريض سكر .. وفعلا الشرطة فى خدمة الشعب

اعتذر للجميع لانى محبط وكارة الغربة .....

تم تعديل 5 سبتمبر 2010 بواسطة noname

[noname]

السلام عليكم جميعاً

اية رايكم نسيب عيوب ةمحاسن مصر وكمان ننسى مشاكلنا شوية وننتهز فرصة ان النهاردة 26 رمضان اى ليلة 27 ( يارب تكون ليلة القدر )

فرصة كبيرة ننسى همومنا ونستغفر

يارب يقبلنا جميعنا ويدخلنا فى رحمتة آمين

http://www.ugaidaat.com/vb/showthread.php?t=3790

ودة رابط لموقع جميل اوى عن رمضان والصيام

تم تعديل 5 سبتمبر 2010 بواسطة noname

[noname]

الاخ الفاضل سامح مجدى

برجاء المساعدة بخصوص برنامج الاتصالnymgo

على فكرة انا نزلتة بس مش عارف اجيب الكروت ازاى ولا هو بيشتغل ازاى

جزاكم الله خيرا