هل استمر فى خطبتى ام افسخ الخطوبة ؟؟؟؟؟

[قاهرى]

بص يا مسافر باشا

اولا انا مقرتش الرد بتاع الناس كلو علشان كدة مش عارف هيكون ردى متكرر ولا لا

بس لازم اقولك رايى فى موضوعك

ياااااااما ناس بيعيشو قصة حب رمانسية غير طبيعية وبيكون شايف خطبتو اجمل جميلات الدنيا وبعد الجواز الجمال دة بيقل شوية بشوية وبتكون بعدها مش وحشة لا عادية يعنى بس المهم تكون ملية عنيك وخلاص

انا بقولك كدة علشان افهمك ان الجمال مش كل حاجة والاهم الانسانة الى تصونك وتحافظ عليك والروح المرحة والحلوة الى بتخلق سعادة فى قلب الببت

هتعمل اية بوحدة جميلة وبردة هتبقى حياتك بردوا كلها نكد بعد الجواز وهتطر بردوا تبص بره وقتها وممكن وقتها مدورش على الجمال ولكن بتدور على حد تكلمو وخلاص وتعيش حياتك معاة الى مش عارف تعشها فى بيتك

باختصار وبدون مطول عليك ارجو تكون فهمت كلامى وتقرر انت انا مش هقولك سبها ولا كمل بس فكر فى الى قولتهولك

وعلى فكرة ناااااادر لما تلاقى وحدة تتحمل انك كل شوية تجرح فيها وتفضل بردوا بتحبك

ونصصيحة اخيرة استخير ربنا وتوكل على الله بعدها

[dawn walker]

خلاص الا خ مسافر اقتنع ..كويس ...والف مبروك مقدما ..حتى اشعار اخر

[flying tiger]

يا عم حرام عليك

حسبى الله ونعم الوكيل فيك

انت معندكش اخوات بنات يا اخى 000 معتقدش انك عندك اخوات بنات000 لانه لو عندك اخت وانت بتعمل كده فى بنات الناس تبقى معلش فى الكلام مبتحسش

انا مش عارف اقول ايه 000 الرجوله فين يا جدع 000 ده انا لو مكان اخوها كنت قطعتك 000

هيه الدنيا بيحصل فيها ايه

ده اى واحد عنده اخت او بنت بقى لازم يراقبها ويتجسس عليها ليضحك عليها واحد ندل ويقولها انا بحبك

وعاوز اقولك زى ما قالك الباشمهندس ياسر بكره ربنا هايدليك فى ذريتك بنات وممكن تكون خلفتك كلها بنات 000 ساعتها ( وتلك الايام نداولها بين الناس)

وعاوز احذرك ( ولا تحسبن الله غافلا عما يعمل الظالمون انما يؤخرهم ليوم تشخص فيه الابصار مهطعين مقنعى رؤسهم لا يرتد اليهم طرفهم وافئدتهم هواء)

وانت كل حاجه تقول عاوز واحده اجمل 000انا اعتقد انك انت اللى شكلك وحش وهيه اللى نفسها حلوه ورضيت بيك

يا شيخ اتقوا الله000هاقول ايه غير ( ان لم تستح فاصنع ما شئت)

تم تعديل 8 فبراير 2009 بواسطة flying tiger

[loayali]

بصراحة يا معلم اسمحلي في الرد

انا شايف انك لازم تسيبها

لسببين الاول انتا لازم واحده تملي عينك علشان الحياه مش عسل علي طول ومع ذلك هتكتشف برضو في النهايه ان كل الجمال زائل بش لازم تجرب علشان ترضي

السبب التاني هو البنت المسكينه ايه زنبها تتجوز واحد مبيحبهاش ومش ماليه عينه وانتا زي ما بتقول طيبه وتستاهل كل خير وانا شايف ان من الخير ليها انك تسيبها وان كانت حبتك فده هيكون اكبر عقاب ليها علي انها غلطت وحبتك ( اسمحلي انتا متستاهلهاش ) انا مش بجرحك بس اجرحها دلوقتي وخليها تعيش حياتها وع حد يقدرها ويرضي بيها احسن وتتجوزها وتعيشها في تعاسه معاك

انا بقلك الكلام ده لمصلحتك (مع اني شايف انك غلطان بس متصلحش الغلط بغلط اكبر) ولمصلحتها لاني بفكر انها زي اختي

[doha]

للاسف انت يمكن مش شايف المشكلة بكل ابعادها او من زاويتها الصح . .

الحكاية مش انك مرتبط ببنت ( وحشة شويه ) وعيالك منها هيطلعوا ( نص لبه ) .. مش هو ده بيت القصيد ..

انت ارتبطت بخطيبتك الحاليه وقد ماكنت فاكر انها افضل مايمكن ان تحصل عليه وفقا لظروفك في ذلك الوقت .. والآن وبعد ماتغيرت الظروف بدأت تمني نفسك بالاحسن والافضل .. كل ماتحاول تتركها ترجع تفكر في نفسك برضه وانك هتبقى وحيد وانك محتاجها في حياتك الفترة دي على الاقل ..

كل ماهنالك انك ومتزعلش مني اناني .. و طماع .. انت خايف تستمر مع البنت دي وتفاجأ بالي احسن منها بعدين وتقول خساره فلتت مني .. وفي نفس الوقت خايف تسيبها ترجع متلاقيش زيها وتقول خساره كانت في ايدي وراحت مني ..

هيكون نصيبك في الآخر نصيب الارنب في قصة العشب الاكثر اخضرارا ..

والي كانت بتحكي عن ارنب جوعان في حقل كبير مليان برسيم .. كل مايروح ياكل من حته يلاقي حته تانيه اخضر وانضر فيسيب الي في ايده ويجري عليها واول مايوصلها يلاقي حته تالته احلى واجمل من الي تحت ايده فيتركها جري ويروح للي بعدها وهكذا وهكذا فضل ينتقل من بقعه للتانيه وكل مرة يمني نفسه بان الي هناك دي احسن من الي هنا لغايه ماصاحبنا طب ساكت من الجوع ولا طال بلح الشام ولا عنب اليمن ..

انا اؤيد رأي اختي ذهبية في انك تسيب البنت دي لانك لا تستحقها . هي هتلاقي غيرك باذن الله لان معندهاش مشاكل في انها تتأقلم مع المتاح لها بدليل انها حبتك لما انت عرضت عليها الحب .. انما المشكلة للاسف عندك انت هتفضل طول عمرك تدور على الاحسن وتطلب الافضل وللاسف النوع ده من الناس بتنتهي بيه الحال وحيدا في النهايه ..

انت هتعمل كده كخدمه لها مش لنفسك لاني زي ماقلت لك مش هتلاقي ابدا الي بتدور عليها ودائما كل ماهترتبط او تحاول ترتبط بوحده هيقفز الارنب داخلك لينبهك بانها قد تكون جميلة ولكن هنالك من هي الاجمل قد تكون غنية ولكن في الاغنى وقد تكون وقد تكون ..

وحتى لا اتحمل ذنب الافتاء في وضع حساس زي كده فانت استخير الاول ثم اقدم على خطوة لتحرير المسكينه دي من سجن التردد الي حبستها فيه .. ومن غير مايكون لها اي ذنب ..

[mokhtarelmalahy]

يا اخى حرام عليك اتقى الله فى بنات الناس والله لو ليك اخت ماترضالها ان واحد يفضل رابطها بكلمه كام سنه وفى الاخر يقولها طريقك اخضر استماره 6 عشان مش ماليه عينه

لما من الاول مش ماليه عينك عشمتها ليه وخطبتها ليه .... كنت عايز تحس بالحب عندك بنات كتير مالهمش غير فى كده حب وصحبيه وبس مش بتوع جواز انما انك تكسرقلب بنت لسه صغيره مشاعرها بكر وادتك انت كل الحب يبقى بجد حرام عليك

من حقك تدور على الجمال بس هل الجمال لوحده لا طبعا الجمال معاه الاخلاق والطيبه والاصل والمستوى المتكافىء والاهل الطيبين ولاد الناس اللى هيعتبروك واحد من اولادهم ومش هيطلعوا عنيك ممكن تاخد واحده جميله الجميلات بس لامؤاخذه فى الكلمه تطلع عينك من هنا لصبه وجمالها مسيره يروح وتزهق منها

معاييرك للجواز والارتباط غلط غلط غلط وعلى فكره هتتعب فى حياتك سواء معاها او مع غيرها لانك بتاخد بالمظهر الخارجى فقط لاغير من حقك تدور على الجمال بس مع الحاجات التانيه وبعدين محدش ضربك على ايدك انما انك تعمل فيها كده حرام عليك بجد وربنا هيحاسبك على ذنبها اللى هتشيله

كما تدين تدان بس وانت اب هتبقى اصعب عليك الف مره وانت شايف بنتك قلبها مكسور وربنا مايكسر قلب اى حد يارب

اقعد مع نفسك وغير معاييرك وشوف انت عايز ايه لو عايزها بجد من جواك كمل معاها واستغفر ربنا وشيل الافكار السوده دى من دماغك

لو مش عايزها ولسه بتفكر كده يبقى تخلص كل حاجه وتسيب بنت الناس تشوف حياتها وربنا يصبرها ويسامحك على اللى عملته فيها

[ahmadmosa]

بغض النظر عن انها وحشة ولا حلوة - نصيحة من اخ كبير وعن تجربة اوعى تتجوز من غير اقتناع بنسبة 100% مش 99.9%

الجواز ياعزيزي مشروع العمر مش بقالة هتقفلها وتخسرلك كام باكو - وعذابها الان لو تركتها افضل من عذابها بعد الزواج والخلفة .

وبعدين مستقبلا يعنى لما تختار شريكة حياتك ام عيالك متبصش للشكل بس ودى نصيحة هامة جدا.

بص لاهلها وشخصيتها وطباعها واخلاقها وبعد كدة دور على بقية الامور . ولعلمك مهما كانت المراة جميلة برضه هيجيلك وقت وتبص لغيرها ياصاحبي - دى زوجتك وام عيالك

والامينة على بيتك ومالك فخلي الشكل دة حاجة ثانوية مش اساسية - مع انى متفق معاك ان الزوجة تكون جميلة بس فيه اولويات ومفيش حد كامل ولو لقيت واحدة كاملة

متسيبهاش

ارجو من اصحاب الردود القاسية على كاتب الموضوع ان يهونوا عليه بدل من جلده لان مشكلته اكيد بتالم فيه وهوة لو كان ظالم فهو في نفس الوقت ضحية برضه

وشكرا

[أحمد سيف]

يا جماعه صلوا على النبي ... الموضوع منتهي بقاله خمس شهور تقريبا ... والراجل زمانه اتجوز ومستني أول عيّل