كندا التي رأيتها :)

[madzoro]

اسلوب جميل وشيق

احييك يا دكتور

منتظر المزيد

اخوك / مديح

[moheltohamy]

اسلوب جميل وشيق

احييك يا دكتور

منتظر المزيد

اخوك / مديح

تسلم يا باشا ، ودايماً معايا ف الموضوعين اليُتماء بتوعي :rolleyes:

حاجةاخيرة بقى

حضرتك خلال كل السفريات ده

ما لقطتش كدة اي صورة

لمنظر الاشجار الاخضرة في أخضرة ده مثلا؟!!

لو في صورة و ينفع يعني

_لو مافيهاش سقالة يعني :blush2: _

حضرتك تضيفها للرد أعتقد هيبقى الموضوع أفضل

_لو ما ينفعش بلاااش طبعا ده مجرد اقتراح _

يا سلام... بس كده؟!

عنينا يا ست نونّا ... أنا برضه مقدّر إن النسا والولادة محتاجة فاليام ، لزوم المخمخة...

اتفضلي يا ستي ، مخمخي وقوليلي رأيك! معلش ، هيه الصور واخدها بكاميرا الموبايل ، فمع الأسف ، جودة الصور مش أد كده

وأي خدمة :wub:

تم تعديل 16 يوليو 2008 بواسطة moheltohamy

[Nonna]

بجد ميرسي خالص يا دكتور على الاستجابة

تعبناك يا فندم في الرفع

بس هي بصراحة صور ماشاء الله تستاهل الواحد يتعبلها

كمية مساحات خضراء بجد تبارك الخلاق

و لا تجمعات البيوت و شكلها لون موحد

مش تلطيش

هو ده يعتبر ريف و لا هي البلد كلها كدة؟!! :rolleyes:

معلش ما سبقليش زيارة بلد غير عربي :blush2:

هي كانت ايه البلد ده اللي في الصور؟!!

معلش بس ماهو حضرتك يعني اللي مش قايل

واذا سمحت بقى

لو مش هتقل على حضرتك

النهر الطويل ده و لا ده فرع و لا ايه

أقصد يعني اسمه ايه؟!!

فضولي يقتلني أنا اسفة بجد

[moheltohamy]

بجد ميرسي خالص يا دكتور على الاستجابة

تعبناك يا فندم في الرفع

بس هي بصراحة صور ماشاء الله تستاهل الواحد يتعبلها

كمية مساحات خضراء بجد تبارك الخلاق

و لا تجمعات البيوت و شكلها لون موحد

مش تلطيش

هو ده يعتبر ريف و لا هي البلد كلها كدة؟!! :lol:

معلش ما سبقليش زيارة بلد غير عربي

هي كانت ايه البلد ده اللي في الصور؟!!

معلش بس ماهو حضرتك يعني اللي مش قايل

واذا سمحت بقى

لو مش هتقل على حضرتك

النهر الطويل ده و لا ده فرع و لا ايه

أقصد يعني اسمه ايه؟!!

فضولي يقتلني أنا اسفة بجد :happy:

الصور دي يا د. نونّا واحنا داخلين خلاص على مطار زيوريخ ، ولو تلاحظي كان ارتفاع الطيارة خلاص مئات الأمتار.

وطبيعي إنها قرى زي مانتي شايفة (الفلاحين عايشين عيشة ... إشي خيال يا ناس!)

أما النهر إسمه إيه والكلام الصعب ده...

دا ترعة يا نونّا ... نهر إيه بس؟! وحتى لو نهر ... الأنهار هناك كتيير ، مش زي النيل اللي ما حيلتناش غيره

تورونتو -مثلاً - لوحدها فيها نهرين :D

وبلاش أسئلة بتوع طب دول ... الحياة أبسط من كده بكتييير :D

[moheltohamy]

الطيران الكندي (Air Canada) ، وده أخدته ف المرتين اللي رحت فيهم على كندا (من لندن لتورونتو والعكس مع العودة ، ومن باريس لتورونتو والعودة من تورونتو لزيوريخ).

طياراتهم جميلة بصراحة ، والشاشات ططش سكرين ، وتشكيلة أغاني وأفلام من كل العالم ، وتحت الشاشة فيه فيشة كهربا (110 فولت طبعاً) ، لو عاوز تشحن الموبايل مثلاً أو اللاپتوپ. وتلاحظ كل شوية ، المضيفات يعدوا عليك ، تحب تشرب حاجة ، مخبوزات ، نأنآت خفيفة... بيزغّطوا فيك م الآخر!

وف أول مرة كنت رايح كندا ، لما الطيارة هبطت في مطار پيرسون في تورونتو ، وخلاص باقيلها كزا متر وتؤف تماماً ، أومت وائف يا سيدي ، على ما اجيب الشُنط بتاعتي من فوء ؛ كنت عاوز اجيب الكاميرا الديچيتال من الشنطة أصوَّرلي كام صورة جوّه الطيارة ، وعادي بأه!

ألائي مُضيف جايلي من ورا يجري ، آل إيه "ذِس إز تو دينچيراص"! تو دينچيراص مين يا عم الحاج؟! دانا لو ماشي جمب الطيارة من بره ، هاسبأها!

مفيش فايدة ، واللزيز إنو كان بيتكلم جد مش هزار خالص ، لدرجة إني أولت لو طوّلت معاه كلمة كمان ، هالائي الكلابشات طلعت ، و "من حقك التزام الصمت وطلب محامي ، وأي كلام هتئوله هيتّاخد ضدك"! وما سابنيش غير لما قعدت تاني وربطت الحزام! لمحت كل اللي ف الطيارة بيبصوا عليّا ، ماهي سياحة بأه ، وجُرسة!

ساعتها حسيت إني بيئة وما اتربيتش ، و... شيلو الزبالة ده ارموه بره كندا! :gather:

الله يرحم الخطوط بتاعتنا ف الميدِل إيست ؛ كل الركاب بتئوم توؤف لما الطيارة تبدأ تهدي مشيها ع الممر! ويبدئوا يلمو الشنط ، ويفضلو وائفين لغايت الطيارة ما تؤف تماماً ، ويوصلو الممر المتحرك لباب الطيارة ، ويتفتح! ما هيه هيَّاها! بس يمكن الناس بتحس إنو بالمنظر ده هيخرجوا أسرع!

وكانت أكتر مرة أتعب فيها من الطيران كانت تاني مرة وانا راجع من تورونتو على زيوريخ ، كان فيه تأخير ساعة تأريباً ، وم الواضح البيه كان بيحاول يعوض التأخير ده ، وآرص ع البنزين ، وغُرَز وخمسات وبتاع ، مع الجو طبعاً في كندا والعواصف الثلجية ، والمطبات الهوائية ، كنت خلاااااص باودّع! mfb: وكنت خلاص ماسك الكيس اللي هارجّع فيه! عارف اللي روحة بتطلع؟! بس ما حصلش حاجة ، وربنا سترها!

واللذيذ بأه... ف المرة دي (تاني عودة من كندا على مصر) ، كان آعد جمبي واد كندي من أصل إيراني (بهائي البيه) ، وكان سعيد جداً باللي بيحصل ، ومبسوط أوي من الطبيعة الأم ، ولا كإنُّه ف الملاهي وراكب المراجيح (لايك آ بيبي ، والطبيعة الأم بتهشّك فينا – أم بأه)!

أولتلُه : أنا أصلاً مش باحب لا المراجيح ولا الملاهي! إرحمني وحلّ عني بقى! brd::

ورغي طول السكة ع البهائية gra:- ، وإن ده أسلوب حياة ف العيش بتناغم ومصالحة بين جميع الأديان ، وإنهم رايحين (كان هوه المشرف بتاع فرقة رقص :angrycop: ) جولة من فانكوفر (ولاية بريتيش كولومبيا – أقصى غرب كندا) لأوروبا! ولابسلي حلق البيه بسلامته! وانا أصلاً مش طايئ أبص لمنظره من واحنا ف المطار ، آجي ألائيه آعد ع الكرسي اللي جمبي؟! :big_boss:

من ضمن كلام البيه لما أعدنا نتكلم على أنهي أحسن مدن كندا ، كان الكلام على مونتريال وفانكوفر وتورونتو... البيه قال لي فانكوفر جميلة على هدوء ، وتورونتو جميلة على حياة وحركة ونشاط أكتر ، ومونتريال لو بتدور على عبق الماضي والتاريخ! (بيتهيألي عبق دي مش لايئة خالص مع الجو النفسي بتاع الهاند أوفر ده!) mfb:

طبعاً ، مش محتاج أقول لك إني وانا باعمل تشيك إن ع الويب سايت بتاع إير كندا :D ، لقيتهم كاتبين إن فيه تأخير ساعة (قبل ميعاد الطيارة بحوالي 5-6 ساعات)! ولما اتصلنا بالمطار po:: عشان نتأكد لقيناها متسجلة ع الخدمة الصوتية ؛ بيطلب منك تدخل رقم الرحلة ع التليفون ، ويرد عليك بتفاصيل الرحلة ، وقال لنا نفس الكلام عن تأخير ميعاد الإقلاع! إشي خيال يا ناس!!

والجميل في إير كندا إنها ما بتحتاجش تأكيد حجز. إير فرانس إتصلت بيهم عشان أؤكد الحجز ، جيت أتصل بإير كندا ، آلولي الحجز اللي عملته ع النت كونفِرمِد ومش محتاج تأكيد ، وده النظام عندنا!

إشطة جداً ... إشطة خالص...

تم تعديل 16 يوليو 2008 بواسطة moheltohamy

[KINANE]

مش عارف اقولك ايه يا اخ تهامي بس تجربتي مع الطيران الكندي كانت مش زي ما توقعت يبدو ان حظك حلو معاهم ,بس انا كانت الطياره مهترءة يعني خفت تتفكك و احنا في الطريق و يعيني على المضيفات يعني بتاع 40-50 سنه :big_boss: بس ايه ربنا الله لطف و زوق حاجه عاليه اوي .

و ربنا بعتي برفسور كندي من جامعه يورك في تورونتو متخصص بالغه الانجليزيه ,و انا يا عيني كلمه من الشرق و كلمه من الغرب و بدات اسب على اليهود وعارف انتا لما تكون فلسطيني يعني متحمس , و فجاه يخويا ............ـ بيفتح السمكة ملاش الخاتم ـ بكتشف انو يهودي من اصل كندي ..... بس كان راجل زوق محسسنيش بلحرج وسمعلي للاخر و شرح وجهة نظره و كان منحرج من اعمال الاسرائيلين العدوانيه .

و انا يا خويا يا تهامي جاي على الطيران الاردني بس والله كان شيك و على الاساس ده توقعت يكون الطيران الكندي إه جنه بس يالله معلش خيرها في غيرها ,

انا جربت لوفتانزا و سويس اير و الطيران التركي بس بص زي لفتانزا لحد دلوقتي ما شفتش مع ان كتير قالولي على الطيران الكندي و عن الشاشات و الحجات الحلوه ,يا رب يكون حظي احسن وانا راجع بعد كم اسبوع . :angrycop:

لك التحيه و للجميع .

[احمد عبده]

وحياة ربنا دمك زي العسل

انتوا كنتوا بتطلعوا ايه من البريمة عسل نحل

بس لو كل ده في الطيارة يبقي علي ماتوصل كندا .. يا نهار ازرق شيلنا الباطنة والحمد لله

اخوك الصغير في 5 طب اسكندرية

الله يكرمك د. أحمد ...

بقول لك إيه بأه ... هالاقيها منك انتا ولا من د. نونّا؟

واحد هيشيّلني ذنب الباطنة ، والتانية تشيّلني ذنب النسا والجراحة!

إحنا نكتب ع التوبيك بتاعي أحسن (24+) ، عشان أضمن إنكم ما تدخلوش هنا غير ف الامتياز

بالمناسبة صحيح يا باشا... لو فعلاً بتفكر تقدم ع الهجرة لكندا...

أولاً ، فكر في امتحان الــ MCCEE وانتا في سنة ساتة. وفر في الوقت ، وباسمع عنه إنه امتحان مش صعب. وفي نفس الوقت ، جو المذاكرة مش غريب عليك حالياً. كل ما تبعد عن سنين المذاكرة ، هتلاقي المذاكرة دي تقيلة على قلبك بشكل ما تتخيلوش!

ثانياً ، وانتا في سنة الامتياز فيه ورقة ممكن تعملها بضم سنة الامتياز لسنوات الخبرة ، من المستشفى اللي بتشتغل فيها ، وقبل التكليف.

دي هتفيدك فعلاً في حساب نقاط الهجرة.

ونتمنى نراك هنا من وقت للتاني.

يا دكتورنا الغالي شكرا علي اهتمامك

ماليش دعوة انت السبب في الباطنة

انا فعلا بحلم بالسفر لكندا بقالي سنة

يارب لو لي خير فيه ربنا ييسرهولي انا وكل اللي في المنتدي

خطتي MCCEE في امتياز وفرنساوي في سادسة وامتياز

وبكده اخلص امتياز وانا معايا اكتر من 70 نقطة

اللي مقلقني اني معرفش حد مشي في سكة المعادلة

يعني كام واحد بينجح في المعادلة

كام منهم بيعرف ياخد نيابة هناك

كام من النيابات جراحة

كام سنة النيابة

لو الفرصة وحشة ايه بيحسنها ( شهادة مصرية - معادلة امريكية - زمالة بريطانية)

او شهادة كندية ولو اه فممكن اشتغل بارا ميديكال علي ما تفرج ( اي حاجة ان شلله حتي رئيس قسم)

ملحوظة : انا بحب طريقتك في الكتابة

وكمان خطك حلو ( علي الكمبيوتر)

[moheltohamy]

أحكيلك بأه عن الحجز للسفر...

في أول مرة رحت لشركة سياحة في وسط البلد في شارع طلعت حرب اسمها Spring Tours ، وحجزنا وَن واي تيكيت لهند (ومعاها عدد 2 قُلَّة ، و ولاَّعة :lol: ) وانا راوند تيكيت.

طبعاً عملنا سيرك ، ولفينا على معظم شركات السياحة ف وسط البلد ، عشان نلحق السفر يكون قبل يوم 13 سبتمبر (أول رمضان) وإلا هنصوم 6 ساعات زيادة عن اللي قاعد ف البلد!

والحجز طبعاً عملته قبل السفر بأكتر من شهر ونُص ؛ محدش يضمن الظروف. بالإضافة إنو موسم عودة للناس ، والبركة في البكور. هند اتكلفت خمس تلاف وشوية ، وانا (7.126 جنيه)!

وانا راجع صحيح قلت هاصوم ، مانا رجعت يوم واحد أكتوبر ، في أواخر رمضان. الواد أحمد الديب لئيته بيئوللي : "إنتا هتتذاكى على ربنا؟"! ليه بس يا سيدي؟ آللي ما تتزاكاش ، إنتا بتوفر ف الوأت! يا سيدي يعني المفروض أعمل إيه؟ أستنى لما انتو ف كندا تفطروا وأنا آعِد في مصر والناس حواليّا بيتسحّروا ، وانا باستعد للفطار؟ آللي : بلاش خالص الصوم ف اليوم ده ، ربنا مديك رخصة تفطر طول مانتا على سفر ، وربنا يحب أن تُؤتى رُخَصُه ، وانتا مش هتمن على ربنا بصيامك! خلاص يا عم... أنا آسف! بأه أنا كنت هاعمل كل ده؟! وقد كان.

وانا ف الطيارة بتاعة البريتيش إيروايز (العودة من لندن للقاهرة) ، كان فيه مُضيف مصري ، البيه لما طلبت الوجبة بتاعتي ؛ بصّلي شزراً! وهوّه مال أهله ده كمان؟ حسسني زي ما اكون باشرب سيجارة من ورا بابا ، ولاّ هربانين م المدرسة عشان نشرب سجاير ، والمدير بيعدي وأفشنا! :P

وأول ما وصلنا كندا ، سمعنا نصيحة الواد أحمد الديب برضه عشان نتفادى الـــ Jet Lag ، اللي هيه لخبطة البيولوچيك كلوك ، نتيجة فرق التوقيت بين مصر وكندا ، ورغم إننا نمنا متأخر (تبعاً لنصيحة ديبو) ؛ برضه فضلنا متلخبطين لمدة 3 تيَّام! نمنا بدري ، نمنا متأخر ، بنصحى واحدة اتنين بالليل! ماهو الوقت كده 8 – 9 ص في مصر! وبعد التلات تيام ، بدأ الإيقاع اليومي (السيركاديان ريثم) بتاعنا ينسجم مع الإيقاع الكندي!

تاني مرة ؛ كنت مظبّط كل حاجة من بدري بنفسي ومع نفسي ، وانا موجود ف البريمة ف وسط الميَّه! :D موقع إكسپيديا الأستاذ بتاع مايكروسوفت.

وطبعاً أعدت أعمل مقارنات بين الموقع الأساسي (الأمريكي) والموقع الكندي. وكما توقعت ؛ هتلاقي نفس الرحلة على إكسپيديا الكندي أغلى م الأمريكي! يبئى طز ف الكندي! هوه انا هندي يا عم الحاج؟ إنتماء آه ، بس مش عبط هيه!

وف النهاية حجزت التذكرة بتاعتي راوند تريب ، وكلفتني بالظبط ($ 843.50) ، اتحسبوا عليا ف الكريديت (4.689 جنيه)! والمُلاحَظ ، إن الأسعار بتختلف من يوم للتاني ، ومن خطوط طيران للتانية. وطبعاً حجزتها قبلها بشهر (حجزتها 7 يناير ، والسفر كان 10 فبراير). وكنت ناوي أحجز السفر يوم 9 فبراير ، أقل سعر كان 925 دولار ، قلت ، لأ بنائص يوم! وكان فيه فرء بتاع 50 دولار بين الموقع الأمريكي والكندي! بالإضافة إن البنك (كريدي أجريكول اللي مطلّع الفيزا بتاعتي منه) كان هيحسبلي سعر الدولار الكندي أعلى بكتير من الأمريكي (استعباط تاني)!

وطبعاً كالمعتاد بتحدد نوع الوجبة اللي انتا عاوزها (إخترتها أنا طبعاً Halal أو Muslim meal) ، واحب أئول لك إن الخطوط الوحيدة اللي لقيتها بتصيع عليا هيه إير كندا! البهوات عملوهالي فيچيتيريان (نباتي) ؛ إنتا مش خايف م اللحمة وم الفراخ ؛ ومش عاوز تاخد حاجة مخالفة للشريعة؟ طب اتفضل بأه وجبة نباتي حلال مِيّة × المِيّة! إعترض بأه! أولت يا ريتني خدتها أسماك! ع الأئل الأكل كان هيبئاله طعم!

اللذيذ ، إن الناس اللي بيطلبو وجبة مخصوص (زي حالاتي) ، بتلائي المضيفة جايّالي بوجبتي (الاسبيشيال) قبل ما تبدأ توزيع الوجبات ع الركاب! و وجبتي مطبوع عليها إسمي ورقم الكرسي ونوع الوجبة. دي ميزة إنك تحجز وجبتك أونلاين smk:

الخلاصة إنو من الآن فصاعداً ، هيه الإكسپيديا ، وانسى شركات السياحة تماماً! بتدخل وتنئّي وتألّب ف البضاعة وتختار اللي على مزاجك ، وأرخص ، ومرتاح ع الكرسي بتاعك ، وبتطبع الـــ Itinerary بتاعك ، والـــ Boarding Pass بعد ما بتنئي الكرسي اللي يعجبك ، والأكلة اللي تعجبك. هتعوز إيه تاني؟ خِلصِت بأه!

تم تعديل 21 يوليو 2008 بواسطة moheltohamy

[محمد عيسى]

بمناسبة موضوع الحجز من عالنت فجربت مع طيران الإتحاد لإن سعر الحجز من النت أرخص من المكاتب و فعلا بتحدد الكرسي و الوجبة و كل التفاصيل في خطوات سهلة و بسيطة جداً و سريعه، و بعدها اتصلت بيهم لتأكيد الحجز قاللي مفيش داعي لاتصالك الحجز متأكد خلاص بس روح المطار في معادك، و بعد ما رحت المطار طلبت تغيير الكرسي و بكل سلاسة تم تغييره

[moheltohamy]

تمام يا باشا ... فعلاً خطوط الاتحاد من أرخص الخطوط.

بس لما لقيت إن هاخدها من مصر ، وترجع بسلامتها تعمللي ترانزيت ف الإمارات تاني ... ونظام ودنك منين يا جحا؟!

قلت لأ ... شكراً ... مش عاوزين :rolleyes:

وعلى رأي الأخ KINANE ، فعلاً سمعة اللفتهانزا هيه التوب. بس أسعارها في السما!

بتقعد انتا توازن بين السعر والجوده ، وزمن الترانزيت والزمن الكلي للرحلة طبعاً. وبناءً على كده بتختار.

وشكراً لتعليقك.

[حسام يوسف]

د.تهامى

انا هشتكيك للادارة

انت واخد كل المنتدى عندك

انا شايف طابورطويل على موضوعك

يعنى عشان اسلوبك حلو

تقوم تاخد كل الناس عندك؟

عموما اناهسكت عشان الناس تستمتع معايا بأسلوبك

فيفا كندا

فيفامنصورة :rolleyes:

[hosiny]

عندك حق يا دكتورنا موقع اكسبيديا ده استاذ

كنت اسمع عنه من زمان بس اول مرة ادخله و احاول اعمل من عليه حجوزات

فعلا استااااذ و يغنيك عن اي مكتب سفريات و بالذات مش هتلاقي مكتب يفيدك في موضوع الاسعار و المواعيد بالقوة و الوضوح ده

شاكرين ليك يا باشا

[KINANE]

فعلن موقع اكسبيديا ممتاز انا حجزت سفري من عليه و السعر كان خيال في الهاي سيزن يعني اختها في شهر 6ـ 7 كانت ب 1120$ بس

و عاوز ااول يا اخ تهامي ان في وجبه بتتعمل مخصوصي لليهود بيسموها (كشير) و هي حلال لان اليهود بيذكروا اسم ربنى تعالى و الدين بيسمحلنا ناكل من اكل اليهود وهي بيكون فيها لحمه او فراخ بس انا محبتهاش و طلبت فجتيريان و كانو متعاونين معايا و احترمو طلبي و هوا(air) كانت وجبتي ابل الكل . :rolleyes:

[moheltohamy]

إيه ده؟

إحنا كام واحد هنا م المنصورة؟!

أنا وحسام وحسيني... فيه حد تاني كان قاللي إنه برضه بلدياتنا...

الزهايمر شكله اشتغل!

عقبال ما نتقابل بجد في تورونتو ، ونبقى نعمل نقابة المنصوريين في كندا. :wub:

على فكرة يا حسام...

أنا اشتغلت في أسوان فترة ، مش فترة قوي ؛ كله على بعضه بتاع تلات أربع شهور. كنت في بنك الدم الإقليمي في أسوان ، طريق الخزان. عارف وانتا طالع متحف النوبة؟ تكمل بقى على طول ، بعد الاستاد هتلاقيه على إيدك اليمين.

أسوان مدينة جميلة بجد ، وأهلها طيبين أوي ... بسطاء جداً. وساعات بيقفشوا على حاجات عبيطة موووت! الدماغ الصعيدي لما بيظهر!

وفول المنّاعية ياما خد مننا راقات! كان أحلى مزاج ، وأحلى فول :happy: وكنا بنعمل بلاوي واحنا رايحين نجيبه :lol: حكاوي ممكن أحكيلك عنها بعدين !

"مغامرات أبو سعد في أسوان" :unsure:

تم تعديل 18 يوليو 2008 بواسطة moheltohamy

[hosiny]

الا يا دكتور موضوع التذكرة الروندترب ام 900 دولار دي لاقيتها علي خطوط ايه و ايه المحطة الوسطي و امتي؟؟؟

لاني عمال ادور خلال السنة مش لاقي الرقم ده خالص

تم تعديل 18 يوليو 2008 بواسطة hosiny

[moheltohamy]

أرجع أقول ... ماهي الطلبة الخايبانة اللي لا بتذاكر ، ولا حتى بتقعد مركزة في الدرس ، لو يصحصحوا شوية!!!!

التذكرة أم 843.5 دولار كانت على الإير فرانس (طبعاً الترانزيت في باريس) ، وناخد إير كندا من باريس لتورونتو. وف العودة ، إير كندا من تورونتو لزيوريخ ، وسويس إير من زيوريخ للقاهرة!

وزي ما قلتلك... اليوم اللي قبله كانت بحوالي 925 دولار! بناقص يوم!

وعلى خطوط أليتاليا كانت أغلى في نفس اليوم! كانت بحوالي 950 دولار!

مانا قلت ، مش كل الخطوط ، ومش كل الأيام ، ولا كل المواسم!

يبقى شكراً ، ومش عاوزين! :unsure:

أنا يا سيدي أساساً من المنصورة ، وعشت في ميت غمر بتاع 22 سنة. وبعدين رجعنا المنصورة تاني!

منين انتا بقى انتا وحسام؟

وزميلنا Nassarlink...

منين ف المنصورة؟ وإيه حكاية كندا؟ إنتا قدمت ولا لسه بتفكر؟!

أطربنا...

[hosiny]

عندك حق يا دكترة بس انا حاولت احصل الاسعار دي ملقيتهاش و دورت علي مدار السنة لقيت كله فوق ال 1200 دولار

يمكن اسعار الطيران غليت عندهم بردو عن ايامك

المشكلة اني ناوي علي كالجري و دي اغلي طبعا وصلت الي 1600 دولار ارخص حاجة

انا يا سيدي من المنصورة نفسها - مدينة السلام

واخدت الفايل نمبر من السعودية و مستني الفرج

[moheltohamy]

نيجي للمهم ... دخولنا على كندا:

أولاً واحنا داخلين مطار پيرسون في تورونتو - (وعلى فكرة ؛ الكنديين بينطقوها تورونو مش تورونتو ، بس احنا لسه فلاحين ومش م البلد دي ) - مش محتاج أقول لك إن المطار كبير بعبط! وتقعد انتا ع السير المتحرك ده زمن عشان توصل لمنطئة الجوازات ، بس إيه بأه ، أُمم! طوابير (اللي راجع من أجازة الصيف ، واللي راجع عشان الدراسة هتبدأ ، واللي جاي مهاجر زي حالاتنا ، وغيره) ، وعندك يمكن خمستاشر شباك ، والغريب إن كل واحد ما بياخدش دقيقة ع الشباك ، عشان كده ما طوّلناش!

حتة ع السريع ... وانتا ف الطيارة ، وقبل ما بتوصل تورونتو المحطة ، بيوزعو علي الركاب ورقة كده عشان بيانات الجمارك ، بتكتب فيها بقالك أد إيه بره كندا ( كل ما زادت مدة غيابك عن البلد ، كل ما زادت الكمية المسموحالك تشيلها معاك من السجاير والخمور والهدايا) ، وإن كان معاك ف الشنط بتاعتك ، حاجات م اللي محتاجة شوية بريكوشنز (نباتات ، منتجات ألبان ، مجوهرات ، فلوس كاش ، ... إلخ). أول مرة قلنا إن معاناش حاجة من دي خالص. tot::

بعد كده دخلنا على قسم الهجرة ف المطار ، برضه طابور طويل ، بس الحركة فيه مش بسرعة طابور الجوازات.

المهم ، دخلنا على حتت بنت ، ولا لهطت الجِيشطه (أنا وهند تنَّحنا أُدّامها) ! clp:: البياض بالشعر الاصفر والعيون الزُرء والملامح الطعمة والجسم اللي يتلف ف حرير! وصوتها تئولش حُؤنت فاليام! وتعاملها قمة ف الزوء واللزازة. وفضلت معانا لما خلَّصِت لنا ورأنا وهيه اللي جت صوَّرِتْنا ديچيتال ، وحكّيت معاها شوية ، وبعدين الجملة المتوقعة (ويلكَم تو يور نيو كَنتري)!

بعد كده عدينا على واحدة اتضح إنها تونسية قعدت تحكّي معانا شوية وكانت فرحانة بينا موت ، وبعدين إدتنا الأوراق اللي هنتقدم بيها للحصول على رقم الضمان الاجتماعي (Social Insurance Number, or SIN number) ، ولستة بعناوين وأرقام الجهات الحكومية اللي ممكن نحتاجها فيما بعد.

نزلنا بعد كده يا ريس ، نستلم الشنط بتاعتنا (4 شنط زي الهم ع الألب ، وشنطتين هاند باج) ، واتصلنا بالبيت عندي وعند هند نطمنهم إننا وصلنا كندا بالسلامة ، وكلمنا أحمد الديب (زميل الدكة في تانية سانوي ، واللي بئاله حوالي 4 سنين في كندا ، والتور جايد بتاعنا في بلاد الفرنچة) اللي ملطوع مستنينا برة المطار.

وبعدين عدينا ع الجمارك... طبعاً كالمعتاد ؛ أخوك دايماً حظه مع الحريم (وبصراحة أنا ما بارتاحش غير ف التعامل الحريمي ، أطيعة تئطع الرجالة ومعرفتهم!) ، برضه واحدة صفراء ناصع بياضها يسر الناظرين! هيه مش حلوة أوي زي البنت اللوز الأولانية ، بس فريندلي بشكل ما تتخيلوش ، وتسريحة ديل الحصان إياها (باعزها أوي هيه كمان) ، وقعدنا نتكلم ونحكّي معاها ، وهيه تحكّي معانا عن البلد ونظام الناس فيها. ولا شنطة م الـــ 4 اتفتحت ولا جه في بالها حتى تسألنا إنتو جايبين معاكو إيه! ty:)

الغريب إن الراجل اللي ع الكاونتر اللي جمبنا طلعت عين أهله ؛ 4 ظباط جمارك اتسلو عليه يا ريس ، وفتحو شنطته وفلّوها حتة حتة هيه إرَف بأه ! وطول ما ده نضيف ، ودُعا الوالدين ، هتفضل سالكة يا ريس! أو يمكن هوه التعامل مع الحريم دايماً كده بيخلي الحياه بسيطة وسهلة ومفيش أجمل من كده! :waving:

من ضمن رغينا معاها ، سألناها إيه اللي ممنوع من منتجات الألبان؟ آلتلنا أي حاجة بيطلع منها سوائل! بتنِز يعني ( بتـــ Oozes)! المفروض تكون جافة أو معلبة. اللحوم ومنتجاتها طبعاً ممنوع! البذور ممنوع!

وخرجنا من المطار يا ريس (كانت الساعة حوالي 8 م) ، لقيت أحمد بيه الديب ، جاي يستأبلني بالشورت والشبشب! ماهي الحياة بسيطة بأه والحرية الشخصية وكده! وطلعنا بره المطار لقينا محمد حامد (واحد معرفة أحمد – مهندس ميكانيكا سيارات – 19 سنة ف الكويت – ولسه مهاجر على كندا من سنة – وكان لسه مطلّع رخصة السواقة طازة :lol: ) ومعاه عربية (ميني فان) اللي بتشيل 7 أفراد وفيها كنبتين ورا ، دي يا دوب شالت الكم الغريب اللي شايلينه من الشنط (4 شنط سفر فاميلي سايز + 2 هاند باجز كُبار برضه)! مش محتاج اقول لك إني كنت رافض تماماً مبدأ الشنط الكتير دي زي ما نكون مهاجرين م البلد!

بس هند كان مبدأها إن الحاجات دي احنا دافعين فيها كتير ، والحكومة الكندية سامحالنا نجيب الحاجات دي من غير ما ندفع عليها جمارك ولو حتى نقلناها على 100 مرة ، والخطوط الجوية البريطانية سامحالنا بـــ 4 شنط و2 هاندباجز (شنطتين لكل واحد مننا وشنطة هاند باج) ؛ كل شنطة أپ تو 32 كجم والهاندباج أپ تو 8 كجم (يعني لغاية 144 كجم)! يبقى نسيب الحق ده ليه ، بدل ما نسيبهم في مصر ونرجع تاني نشتريهم من كندا.

ومن هازا المنطلق يا سيدي شحنَّا الكمية سابقة الذِكر ، وطلعنا ع البيت اللي حاجزينه من مصر.

تم تعديل 19 يوليو 2008 بواسطة moheltohamy

[moheltohamy]

تمااااااااااام

حمد الله علي السلامة يا بيه

ولو انها جت متأخرة بس مع سياق الموضوع بقي علشان نعيش معاك اللحظة

الله يسلمك يا حسيني باشا ... المشوار كان علقة بصراحة ؛ بتاع 22 ساعة ما فردتش ضهرك! سيبك من نوم الطيارات ده ، ولا بيعمل حاجة! :lol:

يعني انت بصيت علي كل البنات ماعادا مراتك wst:: يا عم ارحم

يا عم ابو الخير ، يا اللي جاي تهدي النفوس ... شوف كده أنا قلتلك إيه:

المهم ، دخلنا على حتت بنت ، ولا لهطت الجِيشطه (أنا وهند تنَّحنا أُدّامها) ! :wub:

حاجة كمان... البنت أخدت مننا شوية أوراق ، وقامت تصورهم أو تعمل بيهم حاجة. بصيت لهند ، وانا متبنج باقول لها : "شفتي الطعامة؟" ، وهيه ترد عليا : "آااااااااااه"!

هاهاهاهاهاهاها ... البنت نفسها سخسخت وأعصابها تعبت ؛ من كتر الجيشطة اللي شفناها!

[hosiny]

عايزين رأي اهل الخبرة

و معلش يا دكتور تهامي و متستغربش تاني

لما اطلع ان شاء الله اروح كالجري ولا ادمونتون؟؟؟

الناس اللي عندها معللومات عن المناطق دي يا ريت يفيدونا لان انا سمعت ان ادمونتون هي عاصمة البرتا

لكن كالجري اكبر و هي ثاني اكبر مدينة في كندا و ثاني اكبر مدينه من حيث الخدمات و الاداريات

هل الكلام ده صحيح؟؟؟؟