أقتراح صعب

[هانى زكريا احمد]

السلام عليكم

أقتراح صعب

هل نستطيع أن نثبت موضوع فى المنتدى الكريم يتم وضع أسماء كل الشركات والمكاتب السيئة السمعه والتى تسىء معاملة العماله المصرية

بالطبع المشاركين هما الذين يضعوا الأسماء مع نبذه بسيطه عن تجربتهم فى هذه الشركات

وبذلك نضمن على الأقل ولو بشكل بسيط ردع هذه الشركات

أيضا فى نفس الموضوع نضع أسماء مكاتب السفريات فى مصر والتى تساهم بشكل كبير جدا فى أتمام التعاقدات المسيئه لنا كمصرين

فهم لهم الدور البارز فى ذلك والأمثله كثيره فالمقدم على السفر يذهب لمكتب سفريات يقدم له المكتب عقود ويذهب المغترب فيجد شيئا أخر

والسؤال

هل المكتب لا يعلم هذه الخدعه؟

يعلم زوأكيد سبق له توريد عماله لنفس الشركة مرات عديده من قبل

وأكيد أشتكى المغترب لهذا المكتب من الخلافات التى رأها على أرض الواقع

ولذلك فكل مكتب شريك فى الجريمه

لذلك أرجوا من كل المشاركين أرفاق مشاركات نظرا للأهميه

طبعا بعد موافقة المنتدى على الموضوع

[se_ Elsyed]

أنا مش موافق على الموضوع

لإن كده ممكن نرتكب ذنب عظيم وهو إننا نشوه صورة ناس أبرياء بالباطل ...

فالإنطباعات الشخصية تختلف من شخص لأخر

يعني ممكن انا اتعامل مع مكتب وياخر جواز سفري يومين تلاته .. فأتضايق وادخل أشهر به في موضوع زي ده ..

في حين إن المكتب ذو سمعة طيبة ..

وهكذا

إذاً

منتدانا ليس جهة قضائية يُمكنها أن تحكم على شخص او جهة ما بأنها سيئة لمجرد وجود إنطباعات شخصية عنها ..

ولكن لا مانع على الإطلاق من إن كل واحده يحكي لنا عن تجربته الشخصية ... وأكرر الشخصية في التعامل مع مكتب ما

وبالتالي للأخرين مطلق الحرية في الحكم على تلك التجربة والتعامل أو عدم التعامل مع تلك الجهة

[YaserK]

أنا أرشح شركة مصر الحجاز نظرا لأساليبها الملتوية والمشبوهة وذلك من خلال تجربتي الشخصية

[أسد]

طبعاً ما ينفعش ..

زي ماقال سي السيد ..

لا يمكن أن نفعل مثل هذا على أساس آراء أو إنطباعات شخصية ..

أو حتى تجارب فردية ..

من يضمن أن من يدخل من الأعضاء ويكتب عن أي شركة .. أنه ليس من شركة منافسة ويود الإنتقام من شركة أخرى ..

أو من يضمن أن يكون العيب في الشخص نفسه وليس في الشركة ..

مثال على ذلك ..

شركة مصر الحجاز ..

أنا لي تجارب معها .. حيث كنا في شركتنا نستقدم موظفين عن طريقها وكانوا ممتازين في التعامل ..

هذا رأيي طبعاً ..

أما رأي الفاضل YaserK مختلف ..

أيهما نختار ..

[هانى زكريا احمد]

طيب لو حد عنده فكره يمكننا أن نحكم بها هذا الموضوع يوضحها

وأنا مقتنع تماما بأراءكم

وفقكم الله

[se_ Elsyed]

طيب لو حد عنده فكره يمكننا أن نحكم بها هذا الموضوع يوضحها

وأنا مقتنع تماما بأراءكم

وفقكم الله

للاسف ما فيش لها مخرج

لكن زي ما ذكرت .. كل واحد يحكي تجربته الشخصية مع مكتب السفريات

[YaserK]

شركة مصر الحجاز هي واحدة من شركتين تعاقدت معهم وزارة الصحة السعودية لتوظيف المصريين في وزارة الصحة السعودية - أطباء وصيادلة وتمريض وغيره.. يعني وزارة الصحة السعودية سمحت للشركتين دول باحتكار عقود الوزارة ومينفعش أي مصري يتعاقد مع الوزارة إلا عن طريق الشركتين دول..

من ناحية تانية القنصلية السعودية في القاهرة مبقتش تتعامل مباشرة مع المواطنين بخصوص التأشيرات وتوثيق الأوراق والمسائل دي.. دلوقتي أي واحد محتاج أي حاجة من القنصلية لازم يروح لمكتب وسيط متعاقد مع القنصلية.. وطبعا مكتب وسيط يعني هيكون في سمسرة.. التأشيرة اللي بتكلف 50 ريال بس المكتب بيخلصها من السفارة بـ 300 أو 400 وطبعا محدش يعرف يعترض لأنه مفيش أسعار رسمية معلنة من القنصلية..

تجربتي مع شركة مصر الحجاز تتلخص في التالي.. أولا أنا عملت مقابلة مع لجنة وزارة الصحة وتم قبولي.. الخطوة الجاية اني أخلص إجراءات التعاقد مع شركة مصر الحجاز.. طبعا شركة مصر الحجاز محتكرة للعقود وللتأشيرات.. يعني مفيش أي حل تاني غير اني اتعامل معاهم همه وبس..

القانون المصري بيقول ان عمولة شركة التوظيف هي 2% من راتب أول سنة.. اللي حصل ان الشركة طلبت مبلغ يزيد 3000 جنيه عن العمولة الرسمية.. وطبعا مكنش في أي حل غير الدفع, لأنه لو مش هتدفع يبقى مفيش عقد, ولو معرفتش تاخد العقد من عندهم مش هتعرف تاخده من أي حد تاني.. وطبعا وزارة الصحة السعودية هيه اللي وصلتنا للمرحلة دي..

المهم دفعت المبلغ المطلوب أنا وكل المقبولين في وظايف وزارة الصحة, وفوجئنا بعد كده أن الشركة بتطلب منا التوقيع على إقرار باننا مدفعناش غير 2% بس, واننا لازم نوثق الاقرار ده في الشهر العقاري, والا مفيش عقود والورق مش هيخلص..

بعدين بدأنا في اجراءات التأشيرة اللي تكلفتها 50 ريال بس في القنصلية.. بس طبعا القنصلية زي ما شرحت قبل كده لا تتعامل مع الجمهور, يبقى لازم عن طريق شركة مصر الحجاز اللي طلبت 400 جنيه في التأشيرة..

القنصلية السعودية لا يمكن الاتصال بيها للشكوى نظرا لأن التليفون اما مشغول أو مرفوع من الخدمة.. بعت ايميلات للقنصلية ولوزارة الخارجية السعودية من أكتر من شهرين ومفيش رد.. بردو اشتكيت لوزارة القوى العاملة المصرية ومفيش رد.. عملت كل ده بالرغم من اني بالطريقة دي بخاطر بفلوسي اللي دفعتها بدون ايصال, وطبعا بخاطر بالعقد..

ايه رأيكم في أسلوب الشركة دي؟؟ مش بردو أساليب ملتوية ومشبوهة؟؟ اللوم مش عليهم همه بس.. بردو وزارة الصحة السعودية متورطة في الموضوع ده وكمان الجهة الرقابية في مصر اللي هيه وزارة القوى العاملة..

اي تعليق؟؟

[محمد عبدالعزيز]

بصراحة -مش دعاية لموقعى ولا حاجة- أنا عامل موضوع التجارب والتقييم ده فى موقعى مش بس لشركات العمالة, ولخدمات تانية كمان

وجهة نظرى فى الموضوع إن ده ممكن ينفع لو عملنا كذا حاجة:

1- التجارب المكتوبة تكون حقيقية وموضوعية وده طبعاً ممكن يبان من الكلام اللى مكتوب هل هو حقيقة ولا مجرد تشهير.

2- مفيش مشكلة إن اللى يكتب تجربة تكون عبارة عن رأيه الشخصى, لأن مجموع الآراء والتجارب الشخصية هو اللى بيمثل انطباع الجماعة عن الشركة, يعنى لو أغلبية التجارب بتقول إن الشركة كويسة يبقى الشركة كويس, والعكس صحيح.

3- الأفضل يكون فى إمكانية الشركة ترد على كل تجربة, يعنى يكون فى ممثل عن الشركة وله الصلاحية إنه يوضح موقف الشركة لو فى تجربة الشركة شايفة من وجهة نظرها إن فيها إجحاف لها.

احنا نوفر كل ده ونسيب المستهلك أو طالب الخدمة فى الآخر يحكم.

انا شايف إن ده ممكن يمثل ضغط على مقدمى الخدمات إنهم يحسنوا مستواهم ويكونوا دايماً عند حسن ظن الزبون.

ومادام الشركة عندها حق الرد يبقى مفيش مشكلة.

[هانى زكريا احمد]

انا أحيك يا أستاذ محمد عبد العزيز على الأقتراح وأتمنى أن أرى الموضوع ملىء بالتجارب وممكن كمان نوضح التجارب الجيده أيضا وبنفس منطق الرأى الشخصى كما تقدم ولو الموضوع يتم تثبيته فى مقدمة الصفحه نضمن فاعليته

[YaserK]

مفيش حد تاني عنده تجربة مع شركة مصر الحجاز أو شركة بايونير؟

[Dr.mmfriend]

مفيش حد تاني عنده تجربة مع شركة مصر الحجاز أو شركة بايونير؟

انا عندى تجربه كبييييرررررررررررره مع شركه بايونير

كنت رحت الشركه دى من فتره عملت انترفيو مع لجنة من وزارة الصحه السعوديه وبعديها بفتره بسيطه اتصلوا بيا الشركه وقالولى على العقد بمدينة حائل بالسعوديه

بصراحه نظرا لجهلى فانا قلتلهم لا انا مش عاجبني المدينه دى

انا كنت مفكر ان السعوديه مفيهاش غير جده والرياض وبس

المهم بعدها بفتره اتصلوا بيا تانى وقالولى على عقد في حاجه اسمها canadian center في الدمام

وبرضه رفضت لانى عاوز عقد حكومى

المهم

الدروس المستفاده ايه بقي؟؟؟

عندهم شويه بنات سكرتيرات حلوين

ههههههههههههه

[saaaaaa00]

شركة مصر الحجاز طلبت منى الاتى1---- الف لحلوح قبل ان تبدا الكلام معها 2----- لا يمكنك ان تعرف مكان تعاقدك فقط قالوا لى الطايف ولكن فين مش مشكلتهم 3-------الالف لحلوح قبل التحليل واذا التحليل طلع موجب دى مشكلتك والحاليح راحت لانهم صرفوها على ابهة وفخفخة الللجنة السعودية على حد قولهم والسادة الاطباء اللى هم احنا يعنى يفضل ريقهم ناشف ويتبصصوا على مشروبات وماكولات المقمة للجنة ومتهيألى ان الاكل اللى كالته اللجنة فى نادى الغزلان الاكلة دى مش هاتعدى على خير من كتر ارررررنا عليهم والعين برضة بتبص ما هدفع الف جنية وهذا يعطينى على الاقل الحق فى الارررررر عليهم 4----- المهم اللجنة اثنت ووسعدت بمستوان العلمى والكلام القرع ده واختاروا لى الطايف وتركونى فريسة لشركة مصر الحجاز5----- لم لقم بالتحليل ورفضت دفع الالف جنية اصل كرامتى نقحت عليا6======== طلبوا 12الف لحلوح عمولة مشفففففيه يعن التوثيق واللف والجرى على حسابك7---0 الشركة تاخد نسبة من المستشفى لاجراء الفحص الطبى8---- اخيرا تقر وتعترف وتبصم بالعشرة ان الشركة لم تتقاضى منك سوى 1800 لحلوح فقط وكمان توثق الكلام الاهبل ده فى الشهر العقارى======= طبعا ده خوفا من الضرائب ومن اللجنة السعودية ومنك شخصيا ان تشكوهم لوزارة القوى العامية اللى هتعمل مش واخده بالها المهم فى الاخر اقسمت الا اكمل اوراقى الى الان وطبعا الشركة لم تعد تتصل بى وزمانها باعت العقد ولا تاجرت فيه ولكن هناك بعض المرارة بداخلى ان تتسبب تلك الشركة فى عدم سفرى ولكن اعلم تماما ان هناك من لايغفل ولا ينام حسبى الله ونعم الوكيل