تعالو نكون سند لبعض فى غربتنا ونشجع بعض على مصاعب الحياة

[alaashabana]

بسم الله الرحمن الرحيم

انا اسمى علاء محاسب بالامارات

انا شوفت مواضيغ كتير اوى عن الغربة والناس اللى مسافرين ومتغربين فى بلاد كتير بس انا فكرت ان كتير اوى منا تعبان فى حياتة علشان للاسف الغربة صعبة اوى على الانسان ومحتاجين اننا نتكلم ونطلع اللى فى قلوبنا يمكن نرتاح ونشل عن بعض شوية ... كتير اوى فى الغربة بيقولو ان المصرين اوحش شعب " الله اعلم لو كان الكلام دة صحيح " علشان كدة فكرت اننا نثبت لانفسنا على الاقل ان فية ناس كتير اوى كويسة من جواهم .. انا واحد من الناس متغرب وحاجات كتير اوى فى قلبى نفسى الاقى حد اتكلم معاه من غير خوف او احراج زى ما كنت فى مصر وسط اصاحبى واهلى .. بس للاسف مش بلاقى حد لان كل واحد فية اللى مكفية ومشغول بحياتة. علشان كدة بتمنى بجد انى الاقى اناس اللى يسمعونى وانا اسمعهم ونشيل عن بعض يمكن فعلا نلاقى هنا الراحة حتى لو كانت مؤقتة او قليلة .. وكتير اوى منا جواة مشاكل وهموم وانا واحد من الناس اللى جواية حاجات بس مش بحب اشكى لاهلى واشيلهم الهم .. يلا بينا يا جماعة بجد نكون اخوات فى غربتنا وكل واحد يحكى اللى جواة ويقول كل حاجة نفسة يقولها يقول قصص وحكايات حصلت لية واتعلم منها يمكن احنا كمان نتعلم منها وانا متأكد ان فية قصص جميلة اوى منها الحزين اللى هنتاثر بها ومنها اللى هيضحكنا .. يارب يكون شعورى وصل لكل واحد فيكم ويكون دة املنا الوحيد اننا نتجمع ومش شرط اننا نعرف بعض بس المهم اننا نسمع لبعض ونهون على انفسنا ..

سلامى واحترامى لكل الموجودين ...

[capitshino]

والله فكرة كويسة يا اخى .. بس انا خايف ان الواحد يجيلى احباط اكتر من اللى داخله

حضرتك مش عارف لما باشوف حد مصرى هنا تعبان بيحصل لى ايه.

من كام يوم جه واحد صاحبى السعودية وروحت قابلته ومن الوضع اللى هو فيه خلانى ماانمش بالليل رغم ان وضعى مش حلو اوى يعنى بس- الحمد لله- على كل شئ

ولك تحياتى

[حلواني]

انت فكرتك ممتازه وان كانت قائمه بالفعل فنحن في الغربه مالناش غير بعض وكل واحد فينا عند صديق او مجموعة اصدقاء بيقفو معاه وبيوقف معاهم ومس صحيح ما يقال عن المصريين والكلام دا

انا افتكر يوم عملت حادث بالعربية والحمد لله انا كنت سليم لكن العربيه انتهت تماما في نفس اليوم وقبل ما انام كان معايا فلوس تمن عربيه تانيه من اصدقائي ومن غير ما اطلب من اي حد اي حاجه مش علي الزيرو لكن اللي جالي كان اكبر من تمن العربية اللي راحت

هما دول الاصدقاء المصريين

بس انت لسه جديد في الغربه ولم تكون اصدقاء ولا تستعجل ذلك حتي تختار الاصدقاء الاوفياء المخلصين مش اي واحد تتعرف عليه لكن هاتلاقي والمصريين مفيش اكتر منهم ووجودك هنا برضه تقدر تقول كل ما تريد وستجد من الناس هنا كل ود وترحيب واذان صاغيه

سلام

[deemuck]

مرحبا بك يا استاذ علاء ، تعالى هنا وروح عن نفسك ..اشكي همومك قول اللي في بالك

بس ايه الارقام المميزة دي؟ تبييييييييييييع؟

[alaashabana]

والله يا جماعة انا كتبت الموضوع ومكنتش متوقع ان حد يد علية قولت فى بالى الناس هتقول هى ناقصة غم بس انا مش قصدى تكون قصص محزنة يعنى اكيد من الوقت للتانى فية قصص جميلة وتضحكنا سوا

انا متشكر اوى يا كابتشينو ويا استاذ deemuck " تشترى الرقم دة على كام " انا بردة استغربت من رقم عضويتى بس بصراحة تفائلت بية اوى

بالنسبة لحلوانى اولا الف سلامة عليكى لكن انا من كلامى مش مستعجل يكون لية اصدقاء كتير ولا حاجة لان الصداقة بتيجى بمرور الوقت وانا الحمد لله عندى اصدقاء معايا فى السكن وفى بعض الشركات اللى بنتعامل معاهم بس اكيد انت عارف انهم مجرد اصدقاء او اصحاب " يعنى مش انى اقدر احكيلهم واتكلم معاهم او يعرفوا اسرارى مثلا " زى اصحابى اللى كانوا معايا فى مصر " انا بس كل اللى بتمناة بجد من قلبى انى اتكلم وحد يسمعنى حد يهون علية الغربة ومشاكلها وانا كمان اسمعة ونطلع شوية من جو الشغل والغربة ونضحك ونحتفل سوا باعياد ميلاد الموجودين بالمنتدى يمكن انا بجد نلاقى الصداقة الحقيقة ونرتاح بالكلام اوى ..

صدقونى انا اكتر حاجة تعبانى فى الغربة انى لوحدى . كتير اوى بكون مخنوق فى الشغل ودة الطبيعى طبعا لكل واحد وبروح البيت وافضل اضحك واهزر مع الناس اللى موجودة فى السكن بس من جواية نفسى اطلع اللى فى قلبى واشكى واحكى لحد يهتم ويسمعنى .

انا عندى 23 سنة يمكن الناس تقول دة لسة صغير اوى واة بكرة يتعود على الغربة بس انا من زمان ايام الكلية كنت متغرب بداخل مصر يعنى روحت شرم الشيخ والساحل الشمالى واسكندرية يمكن دة اللى عودنى شوية على الغربة " انا عارف انها عربة داخلية " بس اتعلمت منها كتير والله . اتعلمت اتعامل مع الوحش قبل الكويس اتعلمت اكسب الناس لصدفى . اتعلمت اتعاملمع الاجانب وجنسيات مختلفة .

لكن هنا الغربة صعبة شوية . يعنى من كام يوم كنت تعبان اوى كان عندى دور برد جامد غير احتقان فى الزور لكن للاسف معرفتش اكشف علشان هنااكشف غالى اوى والعلاج بردة غالى لكن ناس مصررين جزاهم الله خير كان معاهم ادوية من مصر وكل واحد كان بيجيبلى حبوب اشكال وانواع . لكن اللى بجد زعلنى او صعبت علية نفسى انى لو كنت وسط اهلى كنت هروح اكشف والاقى الف مين يسأل علية ويحضر لى الاكل والشرب . لكن هنا فى عز ما انت تعبات لازم اقوم علشان احضر لنفسى الاكل ..

هى دى بجد الغربة . ومكنتش اقدر اتصل بأهلى واقولهم انى تعبان او مريض علشان محدش يقلق علية .

يمكن انا هنا تعبان شوية فى البلد دى خصوصا الحر والرطوبة . وكمان الهنود كتير اوى وريحتهم زيت وقرف " بس فى الاول وفى الاخر الحمد لله مليون مرة " لان فية ناس تتمنى تيجى هنا وتشتغل .

انا عارف ان بغنى وبرد على نفسى بس معلش لستحملونى يمكن بس انا محتاج اتكلم .

لما كنت فى مصر وكنت اعرف انحد مثلامن اصحاب اخواتى مسافر وواحد صاحبة يطلب منة حمام وبط واكل كنت استغرب واقول الناس دى هبلة . خلاص يعنى هيموتوا على الحمام .

بس لما جيت وبعد 6 شهور بجد بقول ان عندهم الف حق وان فعلا الواحد كان فى نعمة وسط اهلة ووسط الاكل الجميل وللاسف كنا بنتأمر كمان عليهم ..

لكن المواضيع كتير والحكايات كتير اوى . نفسى انا كمان اسنع حكايتكم ويومياتنا عاملة اية يمكن فعلا انا اقول حاجة غيرى يستفاد منها او اى حد يقول موقفف انا استفاد منة ...

هقولكم على موقف مش عاف اسمية غريب ولا محرج بس هحكى وانتم تحكموا

انا مرتبط بانسانة من ايام الجامعة بحبها اوى وهى كمان وحصلت مشاكل كتير بينا بس مكنتش بقدر اسيبها ولا اخاصمها وهى كمان كذلك

المهم انها فضلت واقفة معايا خطوة خطوة فى حياتى وكانت حاسة انى كويس وانى بحاول اسعى واعمل حاجة غير كتير من الشباب اللى بيقعدوا على القهماوى وكدة .

المهم انى اول مرة كلمتها كنت فى قمة الحخل علشان مكنتش متعود انى اروح اتعرف على البنات " كان لية اصحاب بنات فى الكلية بس عن طريق الصدفة يعنى مثلا معايا فى الشارع او مثلا زميلة واحد صاحبى .

المهم انى بعد ما اتعرفت عليها باسبوعين وفضلنانتكلم فى التليفون سألتها وقولتلها " مسألتيش نفسك لية انا اتعرفت عليكى وكنت هموت واتكلم معاكى ؟؟ قالتلى عادى يعنى اصدقاء وزمايل

قولتلها بصراحة انا معجب بشخصيتك .. انا بعد ما قولت الكلمة دة سمعت كلام كأنى اجرمت فى حق كل البنات . قالتلى انت قليل الادب ومش محترم وانا غلطانة انى كلمتك وقفلت السكة فة وشى

عرفت بعد كدة انها كانت بتعمل الكلام دة علشان تتأكد انى بحبها فعلا وانى هفضل متمسك بها

احنا بقالن 3 سنين مع بعض بس بجد يا جماعة متتصوروش احنا بنحب بعض قد اية

المهم لما جيت هنا ومن كام شهر تقريبا قولتلها انا لازم اعمل خطوة ايجابية واتقدملك رسمى بس نظررا انى مش ناوى انزل مصر قبل 3 سنين ان شاء الله قولتلها هتقدملك عن طريق التليفون ولو والدك موافق اهلى يروحو يقراو الفاتحة وبعد شهرين ابعت فلوس نجيب دبلة ومحبس وخاتم وبعد 3 سنين نتجوز

المهم ان والدها لما عرف رحب اوى بالفكرة وقال اننا لسة صغيرينوالمستقبل قدامنا قوالها كويس وانا موافق وخلية يكلمنى

بعد ما اتصلت بية لاقيت حاجة تانية خالص.. لاقيتة بيقولى انا عاوز 2 اوضة غير ان الشقة تتجهز قبل سنتين وكلام كتير بى .

عرفت من طريقتة انة كان عاوز يوقعنى ويستدرجنى وبعد كدة يرفضى بالذوق

بس على مين وحياتة لو طلب لبن العصفور هجيبهولة ..

بس حسيت بصراحة ان الواحد صغير اوى قدام الطلبات الكتير دى خصوصا ان الوحد لسة فى البداية..

الحمد لله على كل شئ.

انا عارف انى اتكلمت كتير بس انا مش محتاج اكتر من كدة ومش محتاج غير انى اسمع انا كمان حكايتكم وبصدق ونتكلم سوا كأننا اخوات.

عارفين انا ساعات لما بفكر مع نفسى فى نمط حياتى بزعل اوى واى

يمكن علشان حياتى كلها كانت شغل ودراسة مكنتش بروح رحلات ولا بتفسح ولا اى حاجة لدرجة انى مليش ولا صورة وانا فى الجامعة ساعات لما بفكر فى كدة بعيط اوى واقول ياريت الزمن يرجع.. الفترة اللى المفروض تكون اجمل فترة فى حياة الانسان ويكون عندة صور كتير اوى انا للاسف مليش ولا صورة يعنى يوم من اكب ان شاء الله واشوف احفادى لو ربنا اراد مش هعف اقولهم كان شكلى اية وانا صغير او ايام الكلية ... بس الحمد لله احنا احسن من غيرنا..

نفسى اشتغل فى شركة كبيرة اوى زى دماك العقارية مثلا او شركات اجنبية .. اخد خبرة منهم كويسة ومع الوقت اكسب ثقة الناس واترقى فى الشغل .. نفيى فى حاجات كتير اوى يا جماعة وطموحاتى كبيرة اوى اوى بس للاسف اكبر من امكانياتى .. بس اهو الواحد بيسعى وبيجاهد علشان نقدر نعمل حاجة فى ظل الظروف اللى احنا فيها .

امبارح والدتى اتصلت بية وبتقولى مش عاوز اكل ابعتهولك من واحد هيجى كمان اسبوع .. كان نفسى اقولها على اكل كتيراوى نفسى فية وانى عايش طول النهار على سندوتشات او اكل اى حاجة تسد الجوع بس مقدرتش علشان مش اتقل عليهم ولا علىاللى جاى

بس بينى وبينكم انا نفسى انزل مصر اسبوع واحد بس علشان اكل الاكل المصرى الجميل اللى بجد يفتح النفس ومفيش زية ابدا

نفسى بجد ارجع وابوس ايد امى وابوية لانى بجد حسيت قد اية الناس ولا يسوى من غيررهم ..

كفاية كلام كدة انا ايدى تعبت بي حقيقى نفسى افضل اتكلم للصبح مش هزهق والله بس انا خايف انتم اللى تزهقوا

.انا بشكر بجد كل اللى رد على الموضوع وكل اللى قرأ الموضوع من ير ما يرد حتى .. ويارب نكون فعلا اخوات واصحاب طول العمر ..

[alaashabana]

اظاهر انى مفيش حد مهتم بالموضوع .. انا عارف هفضل طول عمرى لوحدى .. نصيبى كدة .. الحمد لله على كل شئ

[ahmedarab]

عزيزى علاء

معرفش لية حسيت وانت بتكتب ان اللى بيكتب دة انا ؟؟!!!

الظاهر المصريين كلهم كدة ... بس فعلا بجد انا من اكتر الحجات اللى كنت هاتجنن عليها اول ما اتغربت كان الاكل وخصوصا انى كنت بتامر زى حضرتك كدة وبعدين لما سافرت خدت على قف.... مشيها دماغى.

شد حيلك كدة وسيبها على ربنا انا عارف الغربة صعبة اوىىىىى بس اهوة الحمد لله على كل شىء وبعدين كل شىء فى اولة بيكون صعب وخصوصا الغربة ...صحيح انت بقالك قد اية برة مصر ؟؟؟؟

فرفش كدة واعتبرنا من دلوقتى اصحاب ..انت عايش فين فى الامارات ؟؟؟؟

وبعدين بلاش الكلام الجامد دة ...وطول عمرك لوحدك ؟؟؟ امال لو كنتش لقيت 3 ردوا عليك فى الاول ...يعنى لو كنت مثلا زى كتير مننا عملت موضوع وقعدت مستنى حد يعبر الموضوع ..ولا حصل ؟؟؟؟ يعنى خليك فرش كدة ومش تستعجل على الردود ...كله هايرد ..مش تقلق

تحياتى يا استاذ علاء ..وسلام مؤقت

تم تعديل 6 مايو 2008 بواسطة ahmedarab

[ELSHAMY]

اخى العزيز

قطعت قلبى.....الحياة لسه فيها بلاوى كتير ...أحمد ربك على اللى انت فيه.....ملايين غيرك نفسهم يسافروا حتى الى بوركينا فاسو لتحسين وضعهم...

كلنا مرينا باللى بتحكيه....عارف ايه أحسن وسيلة تفرح بيها نفسك ؟....انك تنظر لمن هم أقل منك....فتحمد ربك....و تنظر لمن هم أعلى منك...و تزيد طموحك...

فضفض يا عم....كلنا أذان صاغية....هذا المنتدى معمول عشان نفضفض لبعض....روق كده...وبلاش قصة انا عارف انى حأفضل طول عمرى وحدى و الحاجات دى....كلنا وراك يا باشا بس انت تفائل بالخير تجده...

تحياتى

[medoworld]

الاخ علاء

ايه الكلام الكبير قوى ده ياعم علاء مش كده انتى احسن من غيرك كتير وصدقنى لو كل واحد فتح قلبه هنا فى المنتدى هتلاقى مش فى حد لا وعنده هموم

يعنى انا فى بعض كلامك احسك مهموم مادى بس صدقنى انتى احسن من غيرك

وفى بعض الاوقات نفسك تكبر بس حاسس انك متكتف لانك حاطط نفسك فى ايطار الوظيفه

خالى طموحك اكبر من الوظيفه ومش هتبقى متكتف

وبعدين ياسيدى لو على الاكل فى زميلنا هنا كتير معاهم زوجاتهم هيعزموك قريب صدقنى

انا كتير ببقى غتت وبعزم نفسى عند اصدقائنا المصرين هنا فى السعوديه بيعملو ما لز وطاب هبقى ابعت لك حمامه على الامارات مش تزعل

على فكره هقولك حاجه اول ما سفرت مش كنت باكل غير فى المطعم فى مره لقيت فى الاكل ....... مش مهم ققول علشان مش تجيبو اللى فى معدتكم من وقتها والله

وانا باكل فى المطاعم بردو اجبار هعمل ايه اخوك ميحه فى الطبيخ

بس بقى ققولك على موقف يضحكك اول ما جيت السعوديه دورت على شغل فى الفنادق لان كانت خبرتى كلها فى فنادق فى مصر المهم روحت لاقيت رئيس حسابات سودانى قدمت له ال c v وصحبنا بقى استملنى اسئله ويقولى ممتاز وكل سؤال يقولى ممتاز قلت هيشغلنى اكيد رئيس حسابات

فى الاخر بقى خالص يقولى تشتغل كاشير طبعا انا سمعت كده كنت هاين عليه ققلب المكت على دماعه بس سكت قلت له ماشى هتشغلنى بكام قام قالى ب 900 ريال

قلت له خلاص مش عاد تكمل قام بقى بغتاته يقولى هو انتى هتلاقى شغل بأكتر من كده وخدت نفسى ومشيت وكرهت السودانين كره غير طبيعى فى الوقت ده وكنت ناوى ارجع على اول طايره على مصر

ولو شوفتنى الحين اكتر اصحابى سودانين لان الناس مش زى بعضها

[alaashabana]

والله ضحكتونى يا جماعة وكلامكم بجد جميل اوى وبتمنى بجد نفضل كدة على طول ...

بس انا عاوز اقول حاجة انا عارف ان الغربة صعبة لكن انا متعود عليها وبدأت اتأقلم على الوضع الجديد لكن بس اللى مزعلنى او مخلينى حاسس بالغربة اوى ان مش لاقى حد اكلمة زى زمان يعنى ايام الكلية وكدة ..

وبردة انا كان قصدى من بداية الموضوع اول ما كتبتة اننا نقول قصص واقعية حصلت لينا مش شرط تكون كئيبة او محزنة لا لا ممكن تكون ظريفة ونضحك وننسى همومنا شوية .

نكتب عن احلامنا طموحاتنا ونكتب على اللى تحقق منة واللى لسة مش اتحقق..

هقولكم على موقف كنت فى قمة الاحراج فية

اول ما جيت الامارات كنت بدور علىشل المهم ربنا اكرمنى ولاقيت شغل فىشركة مقاولات وعملت معاهم 2 انترفيو وخلاص اتفقنا علىالشغل.. اول يومالمفروض اروح فية الشعل راحت علية نومة وصحيت الساعة 8:30 وانا ميعادى 8 المهم وانا راكب المصعد قابلت المدير .لاقيتة بيبص علية وبيشبة بيقولى مش انت المحاسب الجديد قولتة ايوة .. بص فى الساعة وقالى انت لسة جاى دلوقتى ..غصب عنى ضحكت وقولتة معلش والله المواصلات .. قالى اة المواصلات .. ربنا يقويك ...

بصراحة كنت محرج اوى علشان كان اول يوم لية . بس الحمد لله اثبت نفسى بعدها فىالشغل علشان يتأكد ان كان غصب عنى.

انا عارف اننا احسن من غيرنا كتير .. وكتير يتمنوا يجوا الامارات بس الموضوع مش انى ابص للى اوحش منى او اقل منى .. انا يمكن اشتغلت شغلانات كتير اوى منها سرفيس فى مطعم وشاتلت قبل كدة هاوس كيببن بس كل دة كان بمزاجى علشان كدة انا حاسس باللى اقل منى وبحمد ربنا طبعا على كل ششئ

لكن بس اللى مخلى الغربة صعبة على اى حد انة بيفتقد حاجات كتير اوى كانت فى حياتة...

انا مش كئيب والله ولا حاجة بس احنا بشر ساعات لما نبقى مع نفسنا بنفتكر الحاجات الجميلة اللى كانتت فى حياتنا وبنفتقدها اوى...

علشان كدة كتبت الموضوع دة بحيث كل واحد يتكلم ويقول كل حاجة فى نفسة ..

لما كنت فى مصر كنت دائما بقرا بريد الاهرام بتاع عبد الوهاب مطاوع رحمة الله كنت بحب اقرا المواضيع اللى بيكتبوها الناس وكنت بحس بها اوى لان كانوا بيقولو كل حاجة ونفسهم حد يسمعهم يمكن علشان احنا نتعلم منها او علاشان مجرد الفضفضة ..

فقولت ما احنا ممكن نعمل حاجة زى كدة هنا فى المنتدى ونسمية بريد المنتدى مثلا . الناتس كلها تدخل وتسمع حاكايات حقيقية حصلت واحلام وطموحات يمكن فعلا منحسش بالوحدة او بمعنى اصح اللى يشوف بلاوىالناس تهون علية بلوتة ..

بس بردة نحكى مواقف طريفة وجميلة ونضحك ونهزر..

يارب يكون شعورى وصلكم جميعا وانا متشكر اوى بجد على الناس اللى ردت وعلى اللر حتى قرا الموضوع من غير ما يرد وفى انتظار حكايتكم وردودكم ان شاء الله

ويارب نكون جميعا مستوررين وسعداء فى حياتنا ..

علاء شبانه