السلام عليكم من أسبانيا

[myusername]

السلام عليكم...

بما إن باب كندا اتقفل... آجى احكى بقى هنا شوية.. بس يا رب الموضوع ده كمان مايتقفلش ::wst ما علينا.

دى كانت اول رحلة ليا الى اوروبا و الغرب عموما.. و لكن لم تكن اول رحلة دولية اروحها.

بصراحة كنت خايف جدا من موضوع الامن و الامان فى اوروبا.. و كنت بسمع اساطير عن الموضوع ده.. بالاضافة الى التحذير المشهور: ابعد عن اى عربى فى الغرب wst::.

اول ما نزلت فى مطار برشلونة.. عملت غلطة غبية جدا.. بعد ما ختمت الباسبور.. قمت رجعت تانى للمنطقة الدولية :aslam: و مفهمتش انى المفروض اعدى... بس الحمدلله الراجل بتاع الجوازات اخد باله من الغلطة دى, و طبعا اتاكد تانى ان الجواز مختوم بختم دخول للبلد. فيه طابورين رئيسيين.. واحد لمواطنى الاتحاد الاوروبى.. و التانى للغلابة.

طبعا دخت شوية علشان ابص على الشنطة اليتيمة اللى معايه.. و انا كنت واخد معايه شنطة صغيرة جدا, لانى كنت حاجز على شركة ريان اير ryanair طيران من مدريد الى باريس.. و ماكنتش عامل تشيك إن للشنطة دى, لان ريان اير بتلهف 10 يورو بحالهم على كل شنطة سفر.

طبعا لانى كنت سائل المهاجرين الاوائل :old: فكنت عارف الليلة ماشية ازاى.. و لو ان اللى سألتهم ماراحوش برشلونة.. لكن الامر لم يختلف كثيرا عن وصفهم.

اول نصيحة.. انى ادخل على مكتب الاستعلامات و آخد خريطة... تانى نصيحة انى اعرف اركب المترو منين, لان المترو بيغطى كل حتة.. يعنى مش مضطر اركب تاكسى.. و طبعا برضه فيه خطوط اتوبيس قوية.

تالت نصيحة.. انى اشترى التذكرة اللى بعشر مرات.. و كان تمنها 7 يورو و كسور على ما اتذنكر..

و كمان نصيحة.. انى افك من الراجل بتاع المترو.. ورقة بعشرة يورو.. علشان متزنقش و اصرف براحتى :P

ركبت المترو.. بس هو مش مترو بالمعنى المفهوم.. و لكن هو عبارة عن قطر.. و ده اللى ركبته من مطار برشلونة..

بالمناسبة.. انا طبعا كنت حاجز الفنادق مقدما... و كان معايه وصف ازاى اروح للفندق من المطار... و سألت واحدة ظابط (حتة نصاحة).. أيهما ارخص لبلازا دى كاتالونيا؟ المترو ولا الاتوبيس؟ و طبعا قالت لى المترو :D

المهم.. القطر بقى اللى انا ركبته من المطار ده.. بيعدى عالمحطة الرئيسية اللى اسمها saint stacion.. و دى محطة مترو رئيسية.. و كبيرة جدا.. و كمان فى نفس الوقت محطة القطر.

و انا فى المترو... كنت المفروض منزلش فى محطة سانت.. و لكن كنت انزل فى محطة على بعد دقيقتين مشى من بلازا دى كاتالونيا.. بس انا مسمعتش كلام الست, لانى بصراحة ماكنتش مصدقها.. و قمت واخد الطريق الاطول شوية.. انى نزلت محطة سانت... و بدلت المترو و ركبت لبلازا دى كاتالونيا (طبعا مش فاكر ارقام الخطوط.. لكن كل خط مترو ليه لون و رقم)..

و من بلازا دى كاتالونيا.. طلعت فوق.. لأول مرة اشوف اوروبا.. مش مصدق نفسى انى فى اوروبا.. معقولة انا بقيت فى اوروبا؟

اول موقف بقى يا معلم.. طبعا انا بدور على محطة الاتوبيس.. علشان آخد الاتوبيس رقم 17 و اتوكل على الله اروح الفندق.. هو بصراحة ربنا بيت شباب كده على قده, و كمان كان معاية بشر كتير (كلهم بنات) فى الاوضة :lol: بس احلى حاجة فيه انه كان فى وش البحر عدل.. حاجة آخر جمال بجد. (بحر برشلونة لا يختلف اطلاقا عن بحر اسكندرية)

الكلام ده كان آخر يوم رمضان.. بس طبعا انا فطرت فى الطيارة.. و اذ فجأة و انا مستنى الاتوبيس فى المحطة.. الاقى واحدة داخلة عليا.. و عمالة تقول كلام كده مفهمتش منه غير كلمة واحدة.. المهم هى اول ما قربت منى زيادة عن اللزوم, و قالت الكلمة اياها دى.. فهمت على طول ان بشاير اوروبا هلت.. (الدعارة)..

المهم الموقف عدى عادى.. و انا قلت لها شكرا.. و كان الله بالسر عليم.. و لكن الموضوع كان فعلا مفاجأة و صدمة بالنسبة لى.. و اللى كان صدمة اكتر.. ان الناس بتبوس بعض و بتحضن بعض فى الشارع عمال على بطال.

و انا واقف مستنى الاتوبيس.. برضه اتعرفت على واحدة امريكية و امها... هما اللى قالوا لى على معلومة بيكاسو دى (بس فى مقابلة لاحقة).. و سبب انى اتعرفت عليهم انى كنت عايز اتكلم فى التليفون العام و مش عارف (غباوة غباوة يعنى)..

المهم.. ركبت الاتوبيس و بصراحة انبهرت.. ده مش اتوبيس عام ابدا.. ده اتوبيس سياحى اكيد.. طبعا هحط صورته هنا.

سألت واحدة ست كبيرة, و الحمدلله كانت بتتكلم انجليزى كويس جدا.. و اللى كان بيسوق الاتوبيس واحدة ست :lol: و طبعا الموضوع ده برضه عمل صدمة تانية بالنسبة لى..

الست دى عرفتنى انزل فين بالظبط.. و كمان قالت لى: يا ابنى خلى بالك من الحرامية, لانهم كتير قوى هنا.. و ولاد الحلال مخلوش لولاد الحلال حاجة..

من حسن حظى انها نزلت معاية فى نفس الحتة.. و شكرتها جدا و مشيت.

هكمل بقى المرة الجاية لاحسن تعبت من الكتابة..

[myusername]

السلام عليكم...

هنزل لكم بقى شوية صور عن اهم معالم برسلونة :blink:

اولا هتكلم عن احد اهم المعالم فى برسلونة.. سيجرادا فاميليا.. بناها راجل طيب اسمه لاجوردى.. و هى كاتدرائية ضخمة جدا..

لما رحت هناك كان فيه اصلاحات او شئ من هذا القبيل.. طبعا كله هيبان فى الصور..

طبعا دخول سيجرادا فاميليا مش مجانى :P.. التذكرة ب13 يورو.. و بالنسبة لو انت طالب التذكرة ب 9 يورو.. (طلعت لهم الباسبور :happy:)

المشكلة ان اليوم اللى دخلت فيه سيجرادا فاميليا من جوة.. الموبايل فصل منى شحن.. و معرفتش اصور المكان من جوة (ده ايه الحظ ده).. بس هو مكان ضخم من جوة.. و فيه اسانسير علشان اللى عايز يطلع فوق.. و عموما جمال الكاتدرائية هو فى بنيانها.. لكن مفيش حاجة مهمة قوى جوة المكان نفسه.. مفيش بس غير متحف موجود كده على جنب.. و فيه بعض الاحجار القديمة اللى كان بيستعملها لاجوردى فى البناء.. و كمان فيه زى اشكال مصغرة لسيجرادا فاميليا... و برضه فيه كنيسة علشان الزواج و كده.. و اعتقد ان كان فيه احتفال لما انا دخلت.. لكن الكنيسة دى جزء كده على جنب.

المهم المكان من جوة مش حلو قوى بصراحة.. و كمان يا دوب الواحد بيلف فى حتة معينة, لان فيه اصلاحات و كده..

نيجى بقى للصور:

ده الاتوبيس العام... يا بلاش.. بالمناسبة.. برشلونة تنطق "برثلونة".

و آدى سيجرادا فاميليا... و اللى بناها راجل اسمه لاجوردى تقريبا.. و فيه شارع متسمى على اسمه.. و الراجل ده اعتقد انه شخصية مهمة جدا فى تاريخ اسبانيا... عرفت منين؟ :P فيه اكشاك فى الشارع.. اكشاك زى سور الازبكية كده عندنا.. بتبيع كتب.. ال3 كتب ب 8 يورو (يا بلاش) لقيت كتب كتيرة عن الراجل ده موجودة فى الاكشاك دى.

و آدى كمان صورة لسيجرادا فاميليا..

و آدى كمان واحدة:

معلومات سريعة بس عن منطقة سيجرادا فاميليا..

المنطقة دى بعيدة عن البحر.. و كمان بعيدة شوية عن وسط البلد (بلازا دى كاتالونيا).. ربما تكون فى جنوب المدينة او فى شمالها (مش قادر احدد بالظبط)

المنطقة فيها مطاعم كويسة.. و كمان مطاعم مغربية (بس للاسف فيها خمرة).. و انا كنت حاجز اول ليلة فى فندق عالبحر.. و بقية الايام فى فندق جنب سيجرادا فاميليا.. عند محطة هوسبيتال دى سان باو.. يادوب 5 دقايق مشى..

الجميل بقى ان يوم الويك اند.. فى مقابل سيجرادا فاميليا.. فيه ساحة كبيرة جدا.. و الناس فى الويك اند بتعمل استعراضات و انشطة جميلة فيها..

المرة الجاية هكلمكم عن شارع لا رامبلا.. و بلازا دى كاتالونيا... طبعا فيه معالم تانية كتيرة زى الكاتدرائية (واحدة تانية).. و كمان فيه بارك جويل.. و بحر ازجنجرية.. يوه قصدى برشلونة.. و قوس النصر (زى بتاع باريس)... و كمان فيه شوية معالم كده مش عارف لها اسم.. بس هبقى احط صورها و انتو تتصرفوا بقى :P

تم تعديل 5 مارس 2010 بواسطة myusername

[myusername]

ملحوظة جانبية و لكن مهمة: انا بكتب خط سير رحلتى و المواقف اللى حصلت معايه.. لان ده ممكن يفيد حد هيسافر بعد كده, و يتجنب الاخطاء اللى انا عملتها.. و اعتذر ان كان الموضوع خرج عن سياق التحدث عن ثقافة و تاريخ اسبانيا.

[myusername]

شط ازجنجرية.. يا شط الهوا.. :P

احلى حاجة فى شاطئ برشلونة.. انه مفتوح.. مفيش حد يقول لك رايح فين ولا جى منين.. و كمان فيه كراسى اللى هى عاملة زى الكنبة الطويلة.. و جنبيها شمسيات.. كله مجانى و كله ببلاش.. يا حلاوة يا ولاد..

هتلاقى كل شوية بت فلبينية ولا صينية.. تيجى تقول لك: اعمل لك مساج؟ طبعا انت هتقول لها الله يخليكى مش عايزين النهاردة..

بصراحة انا منزلتش المية.. لان كان معاية الباسبور.. و المحفظة.. و مفاتيح كتير.. و مكانش ينفع اسيب الحاجات دى فى الفندق (فيه بشر معرفهومش معاية فى الاوضة)..

بصراحة نسيم البحر يجنن... و انا رايح فى الطيارة كان قاعد جنبى واحد اسبانى من برسلونة.. قال لى انى جى فى احسن وقت فى السنة كلها.. يعنى اللى عايز يروح, انصحه يروح فى شهر سبتمبر.. بصراحة اختيار ممتاز.. و خلوا بالكم ان المطر هناك فظيع.. ممكن تقعد بالست ساعات تمطر.. يعنى اعملوا حسابكم فى شمسية و انتوا رايحين :happy:

العيب الوحيد فى البحر... ان هتلاقى ستات كتير قاعدين "توبليس"... لكن الشط نضيف جدا بصراحة..

نتكلم بقى عن بلازا دى كاتالونيا... اولا برسلونة موجودة فى مقاطعة اسمها كاتالونيا.. و المقاطعة دى اهلها بيتكلموا لغة غير الاسبانى.. الا و هى لغة "الكاتالان"..

نفس اللغة بيتكلمها اهل مدينة فالينسيا.. و فيه ناس بتفتكر ان فالينسيا ليها لغة مختلفة.. لانهم بيطلقوا عليها اسم لغة فالينسيا.. لكن يا جماعة هى هى نفس اللغة..

بلازا يعنى ميدان بالعربى.. و بلازا دى كاتالونيا من اشهر (و ربما اكبر) الميادين فى اوروبا..

فى بلازا دى كاتالونيا.. هتلاقى الفرق الموسيقية قاعدة بتغنى.. هتلاقى شحاتين.. هتلاقى بنات.. هتلاقى ناس قاعدة تستريح.. و هتلاقى محطة الاتوبيس :blink:

آدى صورة لفرقة موسيقية.. و هتلاقى النبت قاعدة بترقص رقصة اسبانى معتبرة.. و وراها الفرقة بتغنى..

الغناء و الموسيقى جزء لا يتجزأ من حياة الاسبان...

و دى صورة لشط برسلونة.. (دى رجلى على فكرة :P)

و لنا عودة باذن الله...

تم تعديل 5 مارس 2010 بواسطة myusername

[Salwa]

مساء الخير ..

نورت الموضوع حضرتك ..

على فكرة بيكاسو اسبانى ومولود فى مالاجا.....

واللى بنى ساجرادا فاميليا ...هو جاودى ..

ولو قرأت مرة اخرى اللى سبق لى وكتبته من سنين حاتلاقى انى اتكلمت عنه ... :lol:

والمحطة الكبيرة اللى حضرتك نزلت فيها هى ....محطة قطار ...سانز...Estacio Sants.....تنطق بالكتلان هكذا..

كلامك كله جميل لكن؟؟

زعلت جدااا لما قلت ان اول شئ قابلك هو ...الدعارة ..!!!

الكلام ده مش صح...

هو فعلا فيه دعارة ومنتشرة جداا نظرا لانتشار البطالة خصوصا بالنسبة لكل الوافدين من دول اميركا الجنوبية او من يعملون بدون تصاريح عمل او ..يقعون تحت يد عصابات مافيا تجارة الرقيق الابيض..!! او اى الوان تانية يعنى ..

لكن لو انت ف حالك...او...لم تنظر بطريقة ملفتة للنظر ...لن يتعرض لك اى شخص ..(( سواء رجل او امرأة )) ...

برشلونة رائعة فى كل شئ ..

وسوف اتحدث معك عن رحلتك واعلق على كتابتك بطريقة حيادية ......لو حضرتك اردت.

مسألة الستات اللى قاعدين..بطريقة لم تتعود عليها ..(( تصدق بقى ..انك لو نظرت لهم بطريقة ملفتة ممكن ينادوا البوليس ؟؟ لأنك كدة بتعترض على حريتهم ...دى بلدهم وهما احرار ..صح؟؟ ..ولهذا لايجب النظر كأنه شئ مستهجن ....دى كلها عادات جديدة على فكرة ...والاسبان اساسا كانوا حتى ينزلوا البحر بمايوه شورت .. :lol: ))

مسألة ان الدنيا تمطر فى شهر سبتمبر كثيرا.....لأ...تمطر اكثر فى شهر ابريل...ويجب ان تكون معك دائما (( المطرية ))...هنا اسمها كدة .. :)

على فكرة البنت اللى بترقص فى الرملة دى ....غجرية ...لكن عموما منتشر اكثر رقص ابناء اميركا اللاتينية بالفرق الخاصة بهم ولهم ايقاع اسرع من ايقاع الغجر الذى يتسم بالحزن ..فى اغلب الحانه..

وعلى فكرة برضه....بارك جويل اللى بتتكلم عنه ...ينطق (( جوييى )) ...وايضا ...بناه ..جاودى ..

كل الحاجات الحلوة اللى فى برشلونة حاتلاقى لجاودى لمسة فيها ...

وشئ آخر...

المطعم اللى فى الرملة واسمه ....ايجبت ...صاحبه اسبانى .. :lol:

والمطاعم العربية اغلبها سورى ..وتوجد مطاعم لبنانية او سورية يقولون عنها (( يونانية ))...لكنك سوف تفاجأ بأنها خليط ...اى ان الوجبات هى نفسها فى كل المطاعم .

فى انتظار باقى الانطباعات ...

ولو فيه موضوع اتقفل...فهذا بالتأكيد شئ مؤقت...لمجرد التنظيم ..

ولنا عودة ..

[أسد]

أنا أعشق برشلونة

أذهب سنوياً إلى هناك وأمضي أسبوعين أو أكثر حسب الظروف .. لإرتباطي بأعمال هناك ..

أسبانيا بشكل عام .. فيها الدفء .. والأسبان شعب محترم .. والحياة جودتها أصبحت عالية جداً .. حتى مقارنة بدول غرب أوروبا الأخرى .. من حيث يسر الحياة .. وسهولتها .. ومستوى الأسعار.. إضافة إلى المناخ الرائع التي تتميز به أسبانيا .. مما يجعلها ملاذ للألمان والفرنسيين والقادمين من اسكندنافيا حيث لا يروا الشمس ..

أذهب إلى أسبانيا باستمرار وخاصة برشلونة منذ حوالي 15 عاماً .. أستطيع أن أرى الفرق عاماً بعد عام ..

لقد إنتقلت أسبانيا نقلة رائعة .. تعبر عن إدارة دولة هائلة .. ورائعة .. وشعب يريد التطور .. والحياة الجيدة .. وأفضل مثال لأن الإتحاد قوة .. فبعد إنضمام أسبانيا للإتحاد لاأوروبي .. جرت نحو القمة بسرعة ورشاقة ..

برشلونة .. هي مدينتي المفضلة في أسبانيا .. حيث النظام والجمال .. والبحر .. والطقس الرائع ..

[myusername]

سيدتى الفاضلة سلوى... اولا اشكر حضرتك على التعليق...

و بالطبع احب اسمع تعليقات حضرتك.

رحلتى لم تخلو من الاخطاء.. خاصة و انها كانت اول رحلة لى الى بلاد الفرنجة و الغرب.. و انا شخص انطوائى بطبعى.. فما رأيته اذهلنى بحق.

بالنسبة للدعارة... الحق يقال انها ابشع فى مدريد.. و لكنى لم احب ان اتطرق باستفاضة لمثل هذا الامر, لانه امر مقزز على اية حال..

و لكن ما لاحظته ان السياح مستهدفين دون غيرهم فى هذا الامر... و ما لاحظته اكثر انهن ينتظرون على ابواب الفنادق.. و أيضا عندما كنت اسير بشنطة سفرى, كان الامر يزيد عن الحد.

و فعلا.. اول واحدة كلمتها فى "الشارع".. كانت كما أشرت... و طبعا هى اللى جت لى.. انا كنت واقف فى حالى وربنا :P

و مدهش جدا موضوع ان صاحب مطعم Egypt اسبانى.. لان المطعم مكتوب اسمه باللغة الانجليزية على ما اتذكر.. و ليست باللغة الاسبانية.

بالنسبة للبنت اللى بترقص.. دى كانت فى بلازا دى كاتالونيا نفسه.. بس مش فى الساحة اللى فى المنتصف.. و لو حضرتك تاخدى بالك, هتلاقى العلامة بتاعت المترو وراها.

بالمناسبة.. كنت جالس فى الساحة بتاعت بلازا دى كاتالونيا.. و سمعت اجراس كنيسة... و لم اعلم من اى كنيسة اتى هذا الصوت؟

و لاحظت حضرتك كاتبة الرملة.. على اساس انه "لا رامبلا"؟؟ فهل هذا هو نطقه؟

بقية انطباعاتى عن برسلونة...

شارع لا رامبلا... او الرملا..

شارع طويل حبتين... و اعتقد انه من اشهر شوارع اوروبا...

يبدأ من ميدان بلازا دى كاتالونيا.. و نهايته مش متذنكر ايه بالظبط... لكن نهايته كانت شارع يؤدى الى المرفأ, و كانت فى نهاية ذلك الشارع.. مكتب بريد ضخم.. و ايضا كان فيه بتاعه كدة عبارة ماسورة طويلة.. مش عارف ايه لازمتها :P

شارع لا رامبلا.. يتميز ان فيه ناس كتيرة جدا بيعرضوا فنهم.. سواء مغنيين, موسيقيين و رقاصين.. او رسامين.. و كمان فيه ناس بتعمل حركات بتضحك.. و ناس بتعمل اشكال غريبة و عجيبة..

و برضه.. كنت شفت مرة شوية شباب مغاربة.. كانوا بيعملوا حركات اكروبات.. و خدوا اللى فيه النصيب و مشيوا.

يعنى نقدر نقول ان شارع لا رامبلا بيتميز بفن الاستعراض.. ايا كان هذا الاستعراض.. احيانا تكون استعراضات بايخة.. و احيانا استعراضات دمها خفيف..

و برضه فيه اكشاك فى آخر الشارع.. علشان اللى عايز يشترى اى حاجة زيتكار.. قصدى تذكار..

ساعات برضه بيبقى فيه ناس بتبقى قاعدة تقول نكت.. طبعا انا ماكنتش ببقى فاهم حاجة.. بس مثلا واحد كان لابس وش بطة او حاجة كده.. و كان بيقعد يقول كلام.. اعتقد انه سافل :happy:... يعنى مثلا تيجى واحدة تديله فلوس.. يقوم عاضضها كده معرفش فين.. طبعا هو لابس وش يعنى.. و البق بتاع الوش كبير شوية..

احلى حاجة بقى ان الراجل ده كان بيقعد ساكت و هادى خالص.. و اول ما حد يعدى و يكون مش واخد باله.. يقوم يعمل قال يعنى هيعضه.. و يخضه.. زى كده ما احنا بنقول بخ :lol:

طبعا انا هنزل صور لبعض تلك الاستعراضات...

####################################

جران بيا... اعتقد ان كل مدينة فى اسبانيا.. فيه شارع اسمه جران بيا gran via

فى برسلونة... شارع طويل جدا اسمه جران بيا.. بس مش دى القضية.... عند احد التقاطعات... ستجد قوس النصر... ايون ايون زى بتاع باريس بالظبط.. بس لونه نبيتى.. برضه هنزل صورته.

فيه مكان مصارعة التيران... اعتقد انه قريب من شارع جران بيا.. او ربما فيه نفسه.. طبعا انا بتكلم عن جران بيا فى برسلونة.. لانه يوجد جران بيا فى مدريد و هو اكثر شهرة..

انا لقيت عليه علامة اليهود.. علشان كده كنت فاكره انه سيناجوج.. معبد يهودى :lol:

آدى صورته.. و يا ريت سيدتى الفاضلة سلوى تؤكد المعلومة.. اذا كان ده فعلا المكان بتاع مصارعة التيران ولا لا.. لانى مدخلتهوش بصراحة..

لما كنت موجود.. كان فيه فعاليات مهرجان اسمه لا ميرسى.. و اعتقد ان سيدتى الفاضلة سلوى تكلمت عنه من قبل... و بالمناسبة.. كنت شايف ساعتها اعلانات عن وجود توت عنخ أمون.. كانت موجودة فى المترو... و ضحكت لما رأيتها (انتا ورانا ورانا يا جدع انتا :sad:) ما علينا

شوية كده و هنزل لكم صور شارع لا رامبلا..

ملحوظة: و انا ماشى هناك ماكنتش ببص خالص على اى حد... يعنى كله كان فى الطبيعى.... و سبحان الله انى كنت بغض بصرى هناك اكتر من هنا.

تم تعديل 6 مارس 2010 بواسطة myusername

[myusername]

السلام عليكم...

شوية الصور بقى... دى صور لناس فى شارع لا رامبلا.. بيعملوا اشكال و استعراضات:

و دى صورة قوس النصر...

و دى صورة الماسورة.. اللى مش عارف ايه لازمتها بالظبط :unsure:

[Salwa]

و دى صورة الماسورة.. اللى مش عارف ايه لازمتها بالظبط

والله يااستاذ/ ماى يوزر نيم ...اضحكتنى كثيرا بجد ...ربنا يسعدك .

دى برضه ماسورة ؟؟

كولون ....بقى ماسورة ؟؟

دى اهم معالم برشلونة ....كريستوفر كولون (( او ..كولومبوس ))....واقف بيشاور ناحية البحر على مركبه...سانتا ماريا ...اللى حايكتشف بيها اميركا ..

رغم ان المكتشف الحقيقى ..طبعااا..هو اميركو ..(( اللى الناس نسيته ))..!!

بس حلوة ..

ماسورة ...؟؟

على فكرة الصور اللى فاتت كان فيهم فعلا مبنى لساحة مصارعة الثيران ...

منور يااستاذ/ اسد ..

.وعمار يابرشلونة .

لى عودة ان شاء الله..

[myusername]

و دى صورة الماسورة.. اللى مش عارف ايه لازمتها بالظبط

والله يااستاذ/ ماى يوزر نيم ...اضحكتنى كثيرا بجد ...ربنا يسعدك .

دى برضه ماسورة ؟؟

كولون ....بقى ماسورة ؟؟

دى اهم معالم برشلونة ....كريستوفر كولون (( او ..كولومبوس ))....واقف بيشاور ناحية البحر على مركبه...سانتا ماريا ...اللى حايكتشف بيها اميركا ..

رغم ان المكتشف الحقيقى ..طبعااا..هو اميركو ..(( اللى الناس نسيته ))..!!

بس حلوة ..

ماسورة ...؟؟

على فكرة الصور اللى فاتت كان فيهم فعلا مبنى لساحة مصارعة الثيران ...

منور يااستاذ/ اسد ..

.وعمار يابرشلونة .

لى عودة ان شاء الله..

و الله لو الناس راحت و وقفت قدامها... هتفتكرها ماسورة :lol: :lol:

اصلها طويلة جدا... لكن الطول مش باين فى الصورة... انا لو كنت اعرف انها من ريحة الغالى كولومبس.. كنت وقفت اتصورت جنبها على طول :lol: بس انا كنت فاكرها حاجة لقديس مثلا او شىء من هذا القبيل..

هو ده عيب ان الواحد يبقى رايح لواحده كده.. يعرف المعلومة بالصدفة البحتة. :blink:

بمناسبة الحديث عن القديسين... فيه كذا كنيسة الواحد كان بيكتشفهم بالصدفة كده... طبعا فيه الكاتدرائية اللى على أول شارع via laietana (الشارع ده انا مبعرفش انطق اسمه B) ) و اعتقد ان فيه كمان كنيسة فى نص الشارع ده.. قدام محطة المترو مباشرة.. معلش الذاكرة ضعيفة شوية, بس الكلام ده من 5 شهور تقريبا و الواحد خلاص قرب ينسى.. :P

و متهيق لى والله اعلم ان فيه كنيسة كمان فى مكان متدارى كده... بصراحة مش قادر اوصف المكان لجهلى باسماء الشوارع... و لكن على ما اتذنكر انها كانت فى شارع خلفى للشارع اللى بيبص على المرفأ مباشرة... و هو نفس الشارع اللى آخره بيودى عالبحر.

نتكلم بقى على آخر كام حاجة... فيه تلفريك فى برشلونة.. بس للاسف انا عرفت بعد ما رجعت مصر.. لو كنت اعرف كنت ركبته.

برشلونة و الله اعلم موجودة على جبل... او على الاقل جزء منها... او على أقل تقدير خالص ان جزء منها محاط بالجبال... هحط صورة اخدتها و انا فى الطيارة اول ما وصلت مطار برشلونة... طبعا هى مش جبال قوى يعنى.. و لكن نقدر نقول عليها تلال.. و مميزة انها عاملة زى الغابات... كلها خضرة.

فيه صورة لتمثال شخص.. الله اعلم مين هو.. بس ممكن سيدتى الفاضلة سلوى تقول لنا مين هو :lol: بس مستبعدش انه يكون لاجودى.. اصل انا صورت التمثال و انا فى الاتوبيس العام..

بالمناسبة... انا أخدتها مشى من ساجرادا فاميليا لغاية بلازا دى كاتالونيا.. فركة كعب. :lol: كان معاية الخريطة... بس برشلونة منظمة جدا... يعنى يا دوب هما 3 او 4 شوارع تقريبا اللى بتمشيهم.. من ضمنهم شارع جران بيا..

آدى صورة التمثال.. مين ده بقى؟

و دى صورة الجبل.. اخدت الصورة دى و انا فى الطيارة من مطار برشلونة.. اول ما وصلت..

و دى صورة الكاتدرائية اللى على اول شارع via laietana

و دى صورة للحرس على الحصنة.. كانوا قدام الساحة بتاعت قوس النصر:

و ده اعتقد انه مبنى البريد... لانى على ما اتذنكر دخلت المبنى ده علشان كنت ببعت كروت لاصحابى.. بس مش متذنكر بالظبط اذا كان هو ده المبنى ولا لا.. العتب عالنظر..

[myusername]

السلام عليكم,

سيدتى الفاضلة سلوى.. ممكن اسأل حضرتك عن العنصرية فى اسبانيا؟

ناس كتير بتتكلم عن العنصرية فى اسبانيا.. و ان هناك اتجاه للعنصرية ضد العرب.

تحدثت مع فتاة مغربية قابلتها فى مدريد.. و قالت لى ان اسبانيا و الاسبان يدعمون الرومانيين, و يفضلونهم فى العمل... بعد انضمام رومانيا الى الاتحاد الاوروبى.. و اذا كان هناك اختيار بين عربى و رومانى, فيتم اختيار الرومانى بشكل تلقائى (ربما لان احد قوانين الاتحاد الاوروبى, انه اذا اراد صاحب العمل تعيين شخص غير اوروبى.. عليه ان يثبت عدم وجود مواطن اوروبى مؤهل لهذا العمل :P)

ممكن حضرتك تكلمينا و لو قليلا عن ملاحظاتك عن العنصرية فى اسبانيا؟ و هل هم شعب عنصرى فعلا؟ ام ان تلك الاحاديث مجرد اتجاهات لمجموعة فقط من الشعب و ليس الشعب كله؟ مثل ان تكون نسبة العنصرية اكثر فى مقاطعة دون الاخرى؟

شكرا لحضرتك..

[Salwa]

السلام عليكم,

سيدتى الفاضلة سلوى.. ممكن اسأل حضرتك عن العنصرية فى اسبانيا؟

ناس كتير بتتكلم عن العنصرية فى اسبانيا.. و ان هناك اتجاه للعنصرية ضد العرب.

تحدثت مع فتاة مغربية قابلتها فى مدريد.. و قالت لى ان اسبانيا و الاسبان يدعمون الرومانيين, و يفضلونهم فى العمل... بعد انضمام رومانيا الى الاتحاد الاوروبى.. و اذا كان هناك اختيار بين عربى و رومانى, فيتم اختيار الرومانى بشكل تلقائى (ربما لان احد قوانين الاتحاد الاوروبى, انه اذا اراد صاحب العمل تعيين شخص غير اوروبى.. عليه ان يثبت عدم وجود مواطن اوروبى مؤهل لهذا العمل :P)

ممكن حضرتك تكلمينا و لو قليلا عن ملاحظاتك عن العنصرية فى اسبانيا؟ و هل هم شعب عنصرى فعلا؟ ام ان تلك الاحاديث مجرد اتجاهات لمجموعة فقط من الشعب و ليس الشعب كله؟ مثل ان تكون نسبة العنصرية اكثر فى مقاطعة دون الاخرى؟

شكرا لحضرتك..

مساء الخير ..

لو حضرتك عاوزنى اجاوب بصراحة جدااا على الكلام ده ...بالتأكيد سوف اصاب بالحيرة .....ليه بقى ؟؟

لأن الكلام ده..صح...وغلط..

ازاى ؟؟

مفيش حاجة اسمها ...اذا اراد صاحب العغمل تعيين شخص غير لوروبى عليه ان يثبت عدم وجود مواطن اوروبى مؤهل لهذا العمل ؟؟ ..الكلام ده فعلا كان موجود زمان ...وممكن نقول مثل بسيط ..

او انت صاحب عمل ...واردت تعيين واحد مش اوروبى ...وعنده خمسين سنة مثلا ...ساعتها يقولولك طيب ليه متعينش شاب افضل ومن نفس البلد؟؟

يعنى بيكون الشرط انك تعين واحد من اسبانيا مش من اى بلد تانية ..فهمت قصدى ؟؟

بالعكس..

لو صاحب العمل عين واحد عنده اكتر من خمسين سنة ...حتى لو مش اسبانى او اوروربى لكن معاه اوراق سليمة يعنى اقامة ...الحكومة تعطى لصاحب العمل نصف التأمين الصحى الخاص بهذا الرجل ..

دلوقت فيه مشاكل وفيه ازمة لكن الاول ..لأ..

نيجى لحكاية العنصرية ..

طبعااا فيه عنصرية ..........لكن برضه عند البعض فقط ..

من يومين كان فيه برنامج على القناة السادسة ...ولو حضرتك عندك فكرة ...كان بيقدم البرنامج شخص مشهور هنا جداا شاب مسمى نفسه (( El Follonero)) يعنى اللى غاوى مشاكل وهو اسمه الحقيقى جوردى ..

الشاب ده اساسا من الاندلس واعتقد امه من جاليسيا لكنه مولود فى كاتالونيا ..........(( خللى بالك ان حتى العنصرية موجودة بين افراد المقاطعات المختلفة ...خصوصا الكتلان مش بيحبوا اى حد من مقاطعة تانية ..ماعدا..الباسك ..........يمكن علشان الباسك اكثر جدية wst:: ))

المهم...

عمل انترفيستا...مع الرجل الذى قرر ان يرشح نفسه كعمدة لبلدة (Vic (Barcelona.....ومع ان خسارة نقول حتى اسمه و....خسارة يلاقى نفسه معروف ...

اسمه..Josep Anglada....يعنى قال كلام ؟؟ مش ممكن ...

لدرجة ان جوردى كل شوية يعيد الكلام تانى .؟؟ معقول حد بيفكر بالطريقة دى فى 2010 ؟؟ معقول ؟؟

يعنى هو ..

anti-inmigración y autor de frases como "el Islam viene a invadirnos", "los musulmanes quieren destruir nuestra democracia" o "yo no soy racista, soy realista". .

ضد المهاجرين ...وصاحب عبارة الاسلام جاء لاستعمارنا ..المسلمين يريدون القضاء على ديمقراطيتنا ...انا لست عنصرى انا واقعى ..

طيب..

واحد بالعقلية دى حاتقول له ايه؟؟

طيب لما يحكم مدينة حايعمل ايه ؟؟

عملوا احاديث مع بعض المهاجرين من المغاربة ...وهو ماشى مع جوردى فى شارع كله مغاربة وباكستانيين ...بيسلموا عليه عادى وهو منافق بيضحك لهم ..راح واحد مغربى سأله (( عارف طبعااا ان الكاميرا بتصور ))...انت ليه بتكرهنا ؟؟ مع اننا معملناش حاجة وحشة ؟؟ احنا بنشتغل وعايشين فى سلام مع الجميع ...وليه بتحاربنا رغم انك يوم قبل الانتخابات جبت سيارة ووضعت شرائط اغانى عربى ...بتحاول بس تكسب اصواتنا ؟؟ ووقت ماتقدر تمشينا من هنا حاتمشينا وتبوظ حياتنا ؟؟ انت رجل غير صريح ...

المهم انه للآن...مكسبش...وهو محتاج فعلا لاصوات المهاجرين ..

شئ آخر ..

من اين اتيت بأنهم يفضلون الرومانيون ؟؟؟؟؟؟؟؟؟؟؟

بلاش نحكى عن ....الرومانيون..

كفاية اقولك ان اسبانيا عاشت فى دعة فترة طويلة فعلا ...ومن يوم ماتم فتح الحدود ...دخلت جماعات منظمة من الرومان ومنهم كثيرون كانوا (( متطوعين فى الجيش ))...يعنى كل يوم والتانى تسمع عن سرقات ..كأنك فى شيكاغو...يعنى دخلت مجموعة مكونة من ستة وتلاتين واحد (( ايوة...ستة وتلاتين ))...فيللا مذيع مشهور وصاحب قناة خاصة ورغم انه لديه حراسة قوية واجهزة انذار ...لكنهم سرقوه...وضربوه (( قصدى شوهوه ))...وغيره وغيره وغيره ..

فيه منهم طيبين جدااا..

البشر هم البشر فى كل مكان ..

فيه منهم عاوزين يعيشوا ويكسبوا بطريقة حلال..

بس برضه فيه مناظر دلوقت تشوفها فى كتالونيا مكناش بنشوفها ابدا ابدااا....وهى منظر الستات اللى كل واحدة شايلة طفل وبتشحت بيه ..

دول نساء الرومان ..

الله اعلم بقى بيأجروا الولاد دول من بعض ؟؟ والا ايه بالضبط ؟؟..تلاقى الطفل من دول نايم على طول ...وكلهم شكل بعض ..

دول بقى اللى بيجعلوا الناس الكبيرة فى السن ...تبقى عنصرية ..

البلد اتغيرت ..

مبقاش فيه امان فى اى شئ ...برضه من كام سنة واحد مغربى كان شغال فى الزراعة مع اتنين كبار فى السن ف بلد فى الاندلس ....حصل بينهم سوء تفاهم علشان ياخد الاجر المتفق عليه....قتلهم .

ايامها قامت ثورة ..شبه ثورة ...واتكلمنا هنا فى المحاورات على الموضوع ده .

لان الاسبان بداءوا يحرقوا السيارات للمغاربة ويولعوا لهم فى محلاتهم ....و..للأسف حتى دخلوا المسجد وتبولوا على المصاحف .

حصلت مهازل ..

مهازل بمعنى مهازل ...وكويس انهم لحقوا يلموا المواضيع دى ..

العنصرية عموما بتكون نتيجة تصرف خاطئ ...من فرد او افراد قليلة ........وتؤدى بالتالى الى حروب وقتال بين مجموعات كبيرة ..

ده مجرد رأى شخصى ..

سلام ..

[myusername]

سيدتى الفاضلة سلوى,

اولا اشكر حضرتك بشدة على ردك على سؤالى.. و بصراحة انا شايف ان حضرتك وفيتى فى الاجابة.

بالنسبة للرومانيات.. اذا ذكرت رومانيا.. ذكر الغجر! و نشاطهم معروف و واضح سواء داخل او خارج رومانيا.. و هن منتشرات جدا فى اسبانيا.. و فيه موقف ماكنتش احب انى احكيه.. بس واحدة رومانية عايزة تيجى معايه الفندق فى مقابل علبة سجاير :)

آخر كلام عايز اقوله عن برشلونة.. علشان هنتقل لمدريد باذن الله..

السياح انتشارهم اكبر بكتير فى برشلونة.. يعنى تقريبا كده فى اعتقادى الشخصى.. ان مقابل كل واحد من سكان البلد.. فيه واحد سائح. طبعا فيه اماكن منتشر فيها السياح زيادة عن اللزوم لطبيعتها, و اماكن تانية تشوف فيها سكان البلد.. لكن متشوفش سياح.

برشلونة زى اى مكان سياحى.. هتلاقى فيه شحاتين.. بس اللى لاحظته من شكلهم انهم باين عليهم كده مدمنى خمرة..

و على فكرة الشحاتين موجودين فى كل حتة.. حتى باريس اللى بيقولوا عليها معرفش ايه.. مفيش اكتر من الشحاتين فيها :P

فيه أكلة الاسبان بيحبوها قوى.. و بيقعدوا ياكلوها على طول.. بس انا مرضيتش آكلها علشان شاكك ان فيها لحمة... و يا ريت سيدتى الفاضلة سلوى تقولنا اذا كان المسلم ينفع ياكل الاكلة دى من اى مطعم ولا لا.. الاكلة هى تاباس..

التاباس.. عبارة عن شريحة ساندوتش.. بس نص واحد فقط.. و كمان طويلة حبتين.. و عليها تقريبا حتة لحمة على شوية حاجات تانية.. و كانوا بيحطوا حاجة زى الشفاطة كده مش عارف لازمتها ايه.. :)

طبعا انا مرضيتش آكلها علشان ماكنتش عارف ايه نظامها.. اذا كانت دى حلال للمسلم ولا لا.

عموما.. انا كنت بروح مطعم حلال.. و كنت باكل فيه السنكوتش ب5 يورو.. يا بلاش. بس بصراحة هو سنكوتش واحد و كان الله بالسر عليم.

بس انا ماكنتش بشوف عرب كتير.. و طبعا العرب هناك مغاربة. و برضه ماشفتش اى مساجد هناك :P و لو انى سمعت ان فيه مساجد قديمة ناحية ساجرادا فاميليا.. بس ماشوفتش اى حاجة من دى.

اللى عايز يسترخى و ينسى الدنيا و اللى فيها.. و يعيش يومين بجد.. انصحه انه يروح برشلونة.. هيرجه انضف من الصينى بعد غسيله.

المرة الجاية هكلمكم عن مدريد باذن الله.

بس انا كنت عايز اسأل سيدتى الفاضلة سلوى سؤال مهم و ضرورى..

لما اخدت الاتوبيس من برشلونة.. متجها الى مدريد.. أول استراحة كانت فى مدينة zaragoza .. و بعد كده السواق اتغير.. و بعدين مشينا تانى.. بس الراجل السواق عدى على مدينة.. تبدو مثل القرية.. و لاحظت ان اهلها محتشمين زيادة عن اللزوم :P و ده اثار اندهاشى بصراحة.. و لاحظت هدوء فى تلك المدينة الصغيرة.. حضرتك تقدرى تخمنى اسم المدينة او القرية؟ لانى بجد نفسى ازورها.. لانها اثارت دهشتى و اهتمامى.

تم تعديل 11 مارس 2010 بواسطة myusername