حلقة في مسلسل الهجرة العبيطة غير الشرعية

[se_ Elsyed]

الأسبوع قبل الماضي قرأنا خبر

" جنوح مركب قُبالة جزيرة كريت وعلى متنها حوالي 250 راكب مهاجر غير شرعي معظمهم مصريين ... بالمناسبة اللي نقل الخبر ده هو الرئيس اليوناني وكان مبارك عندهم هناك بيشتري قزازتين زيت زتون وُتمن كيلو زتون كلاماتا وقال إنه هايتابع الموقف بنفسه "

أول أمس خبر أخر عن

انتشال‏49‏ جثة بينهم‏42‏ مصريا

ربان المركب الغارقة أمام تركيا كدسها

بـ‏90‏ راكبا برغم أنها تتسع لـ‏15‏ فقط

أنقرة ـ من أسامة عبدالعزيز‏:‏

تتابع غرفة العمليات بالسفارة المصرية في أنقرة جهودها للتعرف علي الضحايا المصريين في حادث غرق مركب قبالة السواحل التركية يوم الإثنين الماضي‏.‏ وكشف السفير أحمد القويسني‏,‏ مساعد وزير الخارجية للشئون القنصلية والهجرة‏,‏

عن أن السلطات التركية قامت بانتشال‏49‏ جثة حتي الآن‏,‏ وتشير الاحتمالات إلي أن من بينهم‏42‏ مصريا‏,‏ والباقين سوريون وصوماليون‏,‏ وناشدت الخارجية أهالي الضحايا سرعة التقدم بأي صور أو جوازات سفر لأبنائهم‏,‏ للإسهام في التعرف علي هوية الضحايا‏.‏

ومن جانب آخر أكد أحد المصريين الستة الناجين من حادث غرق المركب قبالة السواحل الغربية لتركيا‏,‏ أنه تم التعرف علي هوية سبعة مصريين حتي الآن‏.‏ وأضاف أن المركب كان علي متنها ما يقرب من‏90‏ راكبا‏,‏ في حين أن حمولة المركب لا تتجاوز‏15‏ فردا‏.‏ وركزت الصحف التركية أمس علي مسئولية قائد المركب‏,‏ الذي تركها ليقودها أحد الركاب‏,‏ بعد أن حصل علي جميع مستحقاته منهم‏.‏

دعونا نحتفل سوياً بمرور أسود 26 عاماً في حكم مصر ..

لسه في حد بيلتمس العذر لهؤلاء المهاجرين اللي بيرموا بأنفسهم في الجحيم ؟

[ahmedarab]

لا طبعا مفيش اى عذر

مهما كان اللى بيشوفة الشاب دة

فهو عارف ان فية احتمال كبير اوى دة لو مش متاكد انة هايغرق فى الاخر

ويستلف من دة ومن دة ويبيع اللى وراة واللى قدامة

عشان اية ..والله لو استلف نص اللى استلفة عشان يسافر وعمل بية اى حاجة فى مصر كان افضل لة الف مرة

بس نقول اية ....احلام الثراء السريع والرغبة فى الهروب من مصر بدون تفكير هما السبب

والنبى يا سبن سين ممكن تقول الكبير يعمل حسابة فى كيلو ونص زتون كلاماتا ليا

تم تعديل 15 ديسمبر 2007 بواسطة ahmedarab

[MZohairy]

لسه في حد بيلتمس العذر لهؤلاء المهاجرين اللي بيرموا بأنفسهم في الجحيم ؟

يا سين سين

ليس على المريض حرج

الراجل اللي بينتحر هل بيكون في كامل قواه العقليه قبل الانتحار؟

ولا ظروفه و نفسيته بتخليه مغيب و واخد قرار الانتحار ده بشكل قطعي و دون تفكير؟

كذلك المهاجرين بهذا الشكل

دول ناس فقدوا القدره و الرغبه على العيشه أو (عدم العيشه) و بدل مايموت بالبطيئ بنسبة 100% داخل بلده يقامر و يقوم بالمغامره و سيصبح امامه احتمالين إما ان ينجو و يعيش او يموت فورا

و الإحتمالين افضل من الموت البطيئ المؤكد

الكلام ده على لسان سايس بقاله 5 سنين و هو خريج خدمه اجتماعيه

بالتأكيد قرار الهجره بهذا الشكل غلط و جريمه بشعه في حق النفس

لكن

اللي على البر عوام

فلنلتمس لهم بعض العذر في ظل حاله نفسيه الله وحده العالم بها

[se_ Elsyed]

يابا الحاج زهيري

ليس على المريض حرج ... الأية يُقصد بها إعفاءه من المشاركة في الحروب يا عم

لكن مريض إيه ده ياخويا اللي بيدفع 50 ألف و70 ألف عشان يركب مركب لصيد البساريا ويادوب كتيرها تمشي إتنين كيلو في البحر .. قال إيه عشان يروح أطاليا ولا اليونام أو الماميا ... وهو ما بيعرفش يتهجى إسمه ؟

عايزك تتابع يا زهيري الحلقة التالتة من برنامج " الحقيقة " اللي بيقدمه وائل الإبراشي على قناة دريم 2 الساعة 8 مساءً تقريباً مساء كل سبت واليوم الحلقة الثالثة في مسلسل الهجرة غير الشرعية المخذية اللي متورط فيها فنانين وفنانات متهمين حتى الان ومنهم الممثل النكرة طارق النهري والصدمة المطربة نادية مصطفى اللي نفت ذلك تماماً وغيرهم وغيرهم

عارف بيعملوا إيه يا زهيري ؟

1- اولاً معظم إن لم يكن كل هؤلاء الشباب من الأرياف

2- بعض هؤلاء الفنانين المتهمين حتى الان بيشغلوا سمسارة بينتشروا بين الشباب ويقولوا لهم : إحنا هانطلعكوا أوروبا على إنكو أعضاء في الفرقة الموسيقية المرافقة للفنان . ومن هناك تسلكوا نفسكو .

3- عارف كلواحد دافع كام يا زهيري من هؤلاء الشباب المساكين الذين يولولون ويتباكون على إنهم مش لاقيين فرص عمل ؟ بالأوراق ولامستندات كل واحد دافع 70 ألف ج .... تخيل ؟

4- عارف يا زهيري إن سمعتنا بقت زبالة قدام العالم وسفارة زي سفارة بلجيكا في مصر أصبحت لا تمنح دكاترة الجامعة المشهورين اللي طالعين يحضروا مؤتمرات عالمية مدعويين لها رسميا أو فرقنا الرياضية اللي مسافرة بطولات ... عشان السبب ده ؟

5- عارف إن حكومتك لا تُحرك ساكناً وحنا عمالين نصوت كل يوم ونقول : إوعى القطر إوعى القطر حوش يا عم الشباب دول يا عم إعمل حاجه إنت وهو ... يا سيدي ورينا المليون ونص وظيفة عمل اللي وفرتوهم طبقاً لتعليمات وبرنامج مولانا الرئيس ؟

ولا حياة لمن تنادي

[الحاج فوزى]

على قدر سؤالك يا س س

على قدر العجز الذى تشعر به وسط تشعب حيثيات الموضوع الذى هو جداً خطير .. ويحمل الكثير من الوقفات المتناقضة المثيرة للمشاعر والشجون

تقف بين دوافع الشباب فى الهجرة الإنتحارية والمقامرة على حياتهم لتجد الشاب مفضلاً إحتمال التهلكة ذو النسبة العالية على الإستمرار فى الوضع المتردى الذى هو بحد ذاته تهلكة ..

وتقف بين فتواى قبيحة تفتك بأهل الضحايا كما فتكت الأسماك برفات الإبن والأخ والزوج والحفيد ...

وتقف بين إصرار البعض على المضى فى نفس الطريق بنفس الوسيلة ، بل إصرار بعض الناجين أنفسهم على تكرار نفس التجربة المميتة

وتقف بين مسئول كبير يقول أن أهداف الشباب المهاجر هو السعى خلف شهواتهم وتطلعاتهم لبنات أوروبا.. فى حوار مستفز يثير الغثيان وكأنه تبقى شىء من رفات الضحايا لينهشه بدوره.. وكأنه لم يكتفى بأن يقتات على الغلابة الأحياء. فأكمل دوره على أمواتهم .

فبين هذا وذاك أقف عاجزاً مغلول الروح قبل اليد .. ولا أدرى كيف يكون الرد المناسب على هكذا سؤال ...

[أبو محمد]

على قدر سؤالك يا س س

على قدر العجز الذى تشعر به وسط تشعب حيثيات الموضوع الذى هو جداً خطير .. ويحمل الكثير من الوقفات المتناقضة المثيرة للمشاعر والشجون

.....................................

........................................

فبين هذا وذاك أقف عاجزاً مغلول الروح قبل اليد .. ولا أدرى كيف يكون الرد المناسب على هكذا سؤال ...

الأخ الفاضل / أسد

نطقت حروفك بما كنت أبحث عنه لأقوله

كلام سى السيد صحيح ... وكلام زوهيرى صحيح ...

ثم ماذا ؟

لاحظت أن هؤلاء الشباب من محافظات الأرياف .. المحافظات التى كانت فى الماضى (الذى عشت جزءا منه) مراكز لإنتاج غذاء مصر الذى كان يغنيها عن سؤال اللئيم .. كان ذلك قبل أن يعلمنا الملوك غير المتوجين أن عبارة "مصر بلد زراعى" هى دعاية استعمارية الغرض منها استمرار الإقطاع واستغلال بلدنا لإنتاج القطن الذى يحوله الاستعمار إلى أقمشة وملابس يبيعها لنا .. وقبل أن نتعلم أن نكتب فى مواضيع التعبير أن مصر بلد صناعى رغم أنف الاستعمار وأعوانه من الإقطاعيين والرجعيين .. حتى بات ابن الفلاح يخجل من نشأته ، ويحتقر دوره فى حياة مجتمعه .. وينسى أنه صاحب جميل فى أعناق أبناء الوطن .. وعندما كبر ابن الفلاح ربى أبناءه على أنهم يجب أن يتحولوا إلى أفندية ، موظفين قيمة وسيما ....

دار كل ذلك فى رأسى وأنا أقرأ الموضوع .. وفجأة تذكرت موضوعا قديما للفاضل / عادل ابو زيد فى باب التكافل الاجتماعى "جاموسة عشر للأسرة الفقيرة" .. يقترح فيه التبرع بجاموسة عشر "حامل" فهى من الممكن أن تحول أسرة معدمة إلى أسرة منتجة ذات دخل يكفيها مؤونة السؤال .. وتذكرت ذلك المثل الصينى الحكيم الذى ينصح بألا تعطى السائل سمكة ليأكلها بل علمه صيد السمك ...

"جاموسة عشر للأسرة الفقيرة"

كان الموضوع فى عام 2004 عندما كان ثمن الجاموسة العشر 3000 جنيه وكان الدخل الشهرى المتوقع من بيع لبنها هو 300 جنيه غير انتاجها لعجل كل عام ... وأضيف : غير إنتاجها من السماد الطبيعى ...

الآن ثمن الجاموسة العشر هو 7000 جنيه .. وثمن اللبن تضاعف

بحسبة بسيطة .. إذا كان الشاب الذى قرر الانتحار بالهجرة غير الشرعية قد استطاع تدبير مبلغ 70 ألف جنيه لينتحر به .. ألم يفكر فى أن هذا المبلغ يستطيع به شراء 10 جاموسات عشر ؟ وإذا كان الدخل الشهرى المتوقع فى 2004 من بيع اللبن هو 300 جنيه من كل جاموسة فهو الآن لا يقل عن 500 جنيه من كل جاموسة أى 5000 من العشرة .. بخلاف عشر عجول كل عام أو عام ونصف وإذا باع العجل عقب ولادته بشهرين تلاتة لن يقل ثمنه عن 1500 جنيه يعنى 15 ألف جنيه فى العام يعنى على أقل تقدير ألف جنيه فى الشهر .. ومن الممكن زيادة عدد الجواميس المنتجة بإدخال الإناث المولودة فى دورة الإنتاج ..

وبعد عدة سنوات يمكن البدء فى تصنيع اللبن ................

إذن .. قبل أن نلعن الظروف التى دفعتهم إلى الانتحار بالهجرة غير الشرعية .. دعونا نلعن العجول (قصدى العقول) التى فكرت فى طرح قيمة العمل جانبا وزرعت مكانها قيمة الفرار بحثا عن منجم الذهب سهل المنال على الجانب الآخر من البحر الأبيض حيث المتعة وشرب العسل وأكل العنب فى جنة إيطاليا أو اليونان ..

فلنحاول التبشير (أعرف أنها كلمة سيئة السمعة) بقيمة العمل والكسب الحلال والأكل من عرق الجبين خيرا من عسل وعنب الجنة التى على الجانب الآخر من البحر

[محمد عبدالعزيز]

يعنى الشباب دول لو يائسين من حياتهم لهذه الدرجة وشايفين إن مالهاش قيمة عشان كده بيقامروا بالشكل العبيط ده عندى اقتراح لهم ممكن يخليهم أبطال و ومش حيكلفهم حاجة ويعملوا خير فى إخواتهم وأقاربهم والبلد كلها

أيها الشاب اليائس من حياتك الباحث عن فرصة عمل إنزل للشارع واعترض على الأوضاع المتردية التى أوصلتك وأمثالك من الشباب البائس إلى هذه الحالة المزرية ولا تترك الشارع حتى تستشهد (واخد بالك مش تنتحر) أو تنصلح الأحوال وتكسب احترام الجميع وتقديرهم, وأكيد إن شاء الله ستكسب فرصة عمل جيدة ومستوى معيشة مقبول على الأقل

يعنى فى الحالتين إنت إن شاء الله كسبان

[الحاج فوزى]

على قدر سؤالك يا س س

على قدر العجز الذى تشعر به وسط تشعب حيثيات الموضوع الذى هو جداً خطير .. ويحمل الكثير من الوقفات المتناقضة المثيرة للمشاعر والشجون

.....................................

........................................

فبين هذا وذاك أقف عاجزاً مغلول الروح قبل اليد .. ولا أدرى كيف يكون الرد المناسب على هكذا سؤال ...

الأخ الفاضل / أسد

نطقت حروفك بما كنت أبحث عنه لأقوله

هذا هو نصيب الأسد دائماً

[deemuck]

لسه في حد بيلتمس العذر لهؤلاء المهاجرين اللي بيرموا بأنفسهم في الجحيم ؟

أنا التمس عدم الوعي في المناطق الريفية. فنظرة المسافر العائد من بلاد الغربة معبي براميل فلوس في الأرياف تختلف عنها في المدن الحضرية الأخرى (القاهرة مثلا) رأيتها في عيون كثيرا من زملائي في العمل. في الغالب كثير من الريفين يحبون العمل والعيش في المدن الحديثة سواء داخل بلدهم او خارجها.

وترجع اسباب المشكلة ان اهتمام الحكومة بالمدن اكثر منه بالارياف وكأنها ليست على الخريطة. المدرس لما يحبوا يعاقبوه بيرموا على الارياف علطول.

اذا اهتمت الدولة بالمناطق الريفية منذ فترات سابقة لكانت الامور اختلفت كثيرا.

[se_ Elsyed]

لسه في حد بيلتمس العذر لهؤلاء المهاجرين اللي بيرموا بأنفسهم في الجحيم ؟

أنا التمس عدم الوعي في المناطق الريفية. فنظرة المسافر العائد من بلاد الغربة معبي براميل فلوس في الأرياف تختلف عنها في المدن الحضرية الأخرى (القاهرة مثلا) رأيتها في عيون كثيرا من زملائي في العمل. في الغالب كثير من الريفين يحبون العمل والعيش في المدن الحديثة سواء داخل بلدهم او خارجها.

تماماً أخي الكريم

وهي دي المُصيبة

إن اللي ما بيعرفش بيقول عدس

والله العظيم عدس

كنا لسنا من يومين تلاته بنتكلم مع أخ محترم من الفيوم وجت السيرة دي بالمناسبة الحزينة إن أخر دفعه ماتت من إسبوعين من عندهم من الفيوم وكانوا حاجة وعشرين ... غرقوا كلهم

فالراجل إنفعل جداً وقال لنا بما إننا من القاهرة ومش عارفين حاجه : أصلكو ما شفتوش بعض القرى عندنا ... دي إتحولت لقطع من أوروبا من كتر الناس اللي سافرت إيطاليا وبترجع بعد كام شهر تقوم رازعه الفيلا المعتبرة وشاريه أبعديات أرض ... فالشباب الصغير اللي لسه ويرور بيشوف كده وبيتشعوذ ويروح رامي نفسه فب البحر يمكن ينوبه أوضتين وصاله حتى زي الفيلا دي ، إنت راخر تلاقي الإشاعات شغاله على ودنه : بيقولك يا سيدي الولا إبن فتحي أبو عوضين سافر أطاليا قعد 6 شهور بس وجه بنى فيلا وأشترى 10 فدادين ... أي والختمة الشريفة .... يا جدع جول كلام غير ده .. ده نا سامع إنه جعد شهر واحد هناك بس ... اللي عطاه يعطينا يا عم .... طب بيجولك الولا البهنساوي اللي في الحوض الجبلي من البلد بياخد من النفر من دول 50 ألف جينيه ويسفروا أطاليا زي الحلاوه وما بيسيبوش إلا وهو مشغله الشغلانه المعتبرة اللي يغب منها غب يابويا ..... يا حلاوه يا حلاوه ... والله يستاهل .. طب وإنت حيلتك حاجه يا أبو إسماعين .... لأ .. بس هادنيني ورا ابويه لحد ما أخليه يبيع الخمس جراريط اللي حداه مع الجاموسة وربع الدار اللي عندنا وأدسلمهم باليد للبهنساوي ... وأهو شهر والتاني أجيب لأبويا عشر جوامي ودارين و20 فدان ... ونجب على وش الدنيا ونطلق الفجر يا ولا ...

بالمناسبة بقى وبما إن عمي أبو محمد فتح الموضوع ... أريد ان أوجه تحيه من القلب للأستاذ عادل أبو زيد اللي كل كام يوم يكلمني في التليفون بحماس الشبب ولا يخرج الكلام عن موضوع واحد فقط وهو طلبه من سين سين إنه يفتح موضوع عن الأفكار والمشاريع الصغيرة اللي ممكن الشباب يعملوها بدل ما يرموا نفسهم في البحر ... وتسائل الرجل بأمانه : تفتكر يا سي السيد إحنا ليه ما بنسمعش إن شباب محافظة دمياط بيهاجروا أو بيرموا نفسهم في البحر ؟ فقلت له عشان عيال شغيله من وهم اطفال ولا يستكنفون ولا يخشون القول عليهم بإنهم صنايعية درجة أولى حتى لو كانوا مؤهلات عُليا والواحد فيهم عارف طريقه .. ودمياط المحافظة الوحيدة في المحروسة التي لا تعتمد على الحكومة في كل حياتها

للاسف المشكلة تنحصر في الإستسهال ... الإستسهال

[mizo]

هى دى المشكله

الناس فاكره ان خارج مصر كله بيغرف فلوس مايعرفوش ان هناك تعب ومشاكل واثبات الذات والكفاءه وكل ده بياخذ وقت ومافيش حد فى يوم وليله ولا سنه واتنين الا لو كان

ماشى فى الممنوع

برجاء عمل ندوات فى الارياف لشرح الحقائق لان المشكله هى انتشار الاشاعات فولان عمل وفولان كسب بدون اى حقيقه ومايروج لهذه الشائعات سماسره الموت

تحياتى من مكه المكرمه

[se_ Elsyed]

هى دى المشكله

الناس فاكره ان خارج مصر كله بيغرف فلوس مايعرفوش ان هناك تعب ومشاكل واثبات الذات والكفاءه وكل ده بياخذ وقت ومافيش حد فى يوم وليله ولا سنه واتنين الا لو كان

ماشى فى الممنوع

برجاء عمل ندوات فى الارياف لشرح الحقائق لان المشكله هى انتشار الاشاعات فولان عمل وفولان كسب بدون اى حقيقه ومايروج لهذه الشائعات سماسره الموت

تحياتى من مكه المكرمه

لأ معليش يا ميزو

لازم نقول حاجه مهمة ..

لإن في الظروف دي وبالمنظر ده لو عملنا ندوات في الريف لتوعية الناس بمخاطر الهجرة غير الشرعية ... يبقى هانضمن إنهم هايزقلونا بالطوب وإحتمال يربطونا في أشجار الزيزفون حتى تاكل الطير من رؤسنا ...

لإن يا ميزو تصور حضرتك راجل لمُحاضر ودكتور متكلم وروحت قرية يعاني اهلها من الهزال والجوع والعطش ورايح تكلمهم عن أضرار السِمنة والتُخمه وتبدأ عملية ترويجية لعمليات التجميل وشفط الدهون وزراعة السيلكون .... انا هاسيبك تتخيل المنظر !!!!!!!!!

- إذاً نحن هنا نتحدث عن محورين مهمين جداً

1- توعية الشباب ضد مخاطر الهجرة غير الشرعية وخصوصاً في الريف .

2- في نفس الوقت وبالتوزاي على الدولة خلق مُناخ عمل مناسب لهؤلاء البؤساء المحرومين اللي كل يوم يقرأ ويسمع عن مشاريع مترو أنفاق ومطار الأنفاق والقاهرة الجديدة وكايرو تاون وسيتي ستارز ومارينا وشرم وسهل حشيش وتاكيبس العاصمة والحمامات اللي بتشتغل لوحديها ويادوب بنص جنيه .... كل ده وهو عايش في نجع الدهاشنة و عمال يكح تراب ويشم جبس في الريف ومن حواليه البرسيم والمعيز والناموس والبلهارسيا وأجعص حاجه بيشوفها هي عربيات نقل الركاب المفتوحة من الخلف واللي بيتشحنوا فيها لا مؤخذه زي المواشي عشان ييجي سواق جرار أعمى يشيل العربية باللي فيها وكل يوم نسمع عن وفيات على الطرق الزراعية الخطرة اللي بيروح فيها ما بيجيش ...

تخيل حضرتك قرية نائية من احد قرى محافظة دمنهور او الفيوم مثلاً وتعداد القرية دي 20 ألف نسمة وإتخرج منها السنة دي 10 مهندسين حاسب آلي و30 محاسب و70 واحد ما بين دبلوم تجارة او دبلوم صنايع ... تفتكر بيروحوا فين دول ويشتغلوا إيه ؟

ما تسمعنيش أغنية " الأرض لو عطشانه نسقيها بدمانا وعد وعلينا أمانة " والشعارات دي

لإن برضوا مش معقول شاب يطلع أيمانه ويتخرج من كلية الهندسة واجي أقوله أمسك الفاس وفلح في الأرض ... بالرغم من إنه شرف إلا إن نفسه بتصعب عليه خصوصاً لو مش أرضه كمان .. يعني ما ينفعش يشتغل أُجري باليومية برضوا لإن سنة والتانية وبتلاقيه جاب جاز وأصابته الشيخوخة قبل الأوان من التعب والسخرة بتاعت شغل الأرض .

اعود وأؤكد أن المرحلة التي نعيشها الان هي مرحلة تفجر الأوضاع في مصر بسبب السياسات العشوائية لمبارك طوال ربع قرن

وما المظاهرات والإعتصامات والإضرابات وماسورة الهجرة اللي ضربت فجأة إلا محصلة وبداية لمرحلة أخطر على أمن مصر ومستقبلها ...

أكرر تاني ... البلد داخله على مرحله خطرة جداً جداً والناس وصلت لمرحلة الملل واليأس من الإصلاح في ظل تلك الوجوه الكئيبة الموجودة ... وحذاري حذاري من ثورة الجياع

بالمناسبة : عايز حد يجاوبني على السؤال ده : في ظل الأحوال الإقتصادية والسياسية السيئة التي كانت مصر تعيشها في عصر عبد الناصر وعصر السادات كله وبدايات عصر مبارك والأجواء الإشتراكية الكئيبة اللي كانت موجودة وطوابير الجمعية والفراخ اللي بالواسطة وقزازاة الزيت اللي كان البشاوات بس هما اللي ممكن يحصلوا عليها ... تفتكروا ما كانش في حالات الإنتحار الحيتاني الجماعي ده زي اللي بيحصل دلوقت ليه ؟

هاديكوا نص ساعة وألم كراسات الإجابة عشان أصححها

[مصري أصيل]

دار كل ذلك فى رأسى وأنا أقرأ الموضوع .. وفجأة تذكرت موضوعا قديما للفاضل / عادل ابو زيد فى باب التكافل الاجتماعى "جاموسة عشر للأسرة الفقيرة" .. يقترح فيه التبرع بجاموسة عشر "حامل" فهى من الممكن أن تحول أسرة معدمة إلى أسرة منتجة ذات دخل يكفيها مؤونة السؤال .. وتذكرت ذلك المثل الصينى الحكيم الذى ينصح بألا تعطى السائل سمكة ليأكلها بل علمه صيد السمك ...

"جاموسة عشر للأسرة الفقيرة"

كان الموضوع فى عام 2004 عندما كان ثمن الجاموسة العشر 3000 جنيه وكان الدخل الشهرى المتوقع من بيع لبنها هو 300 جنيه غير انتاجها لعجل كل عام ... وأضيف : غير إنتاجها من السماد الطبيعى ...

الآن ثمن الجاموسة العشر هو 7000 جنيه .. وثمن اللبن تضاعف

يا جماعه والله الموقف ده حصل معايا حرفياً من كام يوم . كنت نازل من البيت لقيت واحد مصري بيشاورلي فوقفت أشوفه عايز ايه وهو راجل تعدي الستين عاماً ويمكن داخل في السبعين . فقالي يا ابني أنا طالع من المستوصف ومفيش معايا دينار أركب بيه تاكسي وأرجع البيت . قلتله أنا أوصلك يا عم الحاج وركبته معايا وقالي معلش أنا تقلت عليك . فقلتله طيب ليه يا عم الحاج أنت بقيت راجل كبير ليه ما بتسافرش وكفايه كده ؟ قالي أسافر أيه وكفايه ايه أنا لسه جاي من مصر جديد من شهرين وما بشتغلش . قلتله بأستغراب جديد ايه يا عم الحاج أنت ما تأخذنيش كبير جداً في السن قالي أنا بعت الجاموستين اللي كانو حيلتي وأشتريت عدم ممانعه وقلت أجي أجرب حظي في الكويت . طيب أذا كان ده تفكير واحد في السن ده بيبيع الجاموستين اللي هما مصدر رزقه عشان يجيي يشتغل وهوه لا قادر علي شغل ولا يحزنون. يكون أيه تفكير شاب كله نشاط . هيه المشكله مشكلة أستسهال بالأول والأخير مش مشكلة قلة شغل

[deemuck]

الاخ الفاضل سي السيد لقد طرحت سؤال حقيقي في غاية الاهمية

ايام عبد الناصر والسادات كانت الوطنية الكلمة السائدة لكل شرائح المجتمع من أطفال ، شباب ، بنات ، رجال ، مثقفين ، أميين ،، الخ. الكل كان يعتبر أن دمه وولاءه للوطن ولبلده ونشوف دة في أفلام كثيرة ايام الاعتقالات والذل لعبد الناصر والسادات. فكرة الهجرة كانت أمر غريب جدا بين الأسر المصرية على اعتبار كلمة هجرة تعني عدم الرجوع.

البداية:

من هنا ابدأ الكلام بقصة صغيرة ولكن ذو معنى كبير. مرة واحد من أيام عبد الناصر أخد ابنه في قطار ليوريه مصر. في المحطة الأولى الولد شاف بيوت قديمة من طوب وعشش ،، والمحطة اللي بعدها شاف عمارات وأبراج. فالأب حاب أن يعرف ابنه الفرق بين الرئيسين : أن عبد الناصر كان يهتم بالفقير والسادات لم يهتم إلا بالأغنياء.

الاندفاع العشوائي لعبد الناصر لبناء المصانع وانتقامه من الأغنياء باعتبار أن الكل سواسية ومن الممكن أن تعيش البلاد بدون أغنياء أعطى الاستقرار والاطمئنان للأسر الفقيرة في مصر. وان هي بلدهم وولائهم لها. استمرت هذه الأفكار والراحة النفسية لشعب مصر في أيام عبد الناصر ونظرا للحروب كان المعظم يتمنى أن يلتحق بالجيش. في الأيام الحالية بعد سيطرة الحكومة على البلد واحتلالها وبيع القطاع العام وغيره(الخ الخ) لم يشعر المواطن بالأمان والاستقرار في بلده. وما ألاحظه أن فكرة الهجرة بدأت في أل 15 سنة السابقة.

وتعالى كمان لحال العملة المصرية. هل ترى أن المصريين من 25 سنة سابقة كانوا يرغبون في السفر مثلا للسعودية ولا الكويت ولا غيرهم؟

الموضوع محتاج كلام كثير جدا