السنيما والناس وصيف 2007

[فــيــروز]

مرجان أحمد مرجان .. و كلّه عشان خاطر مصر

كان آخر فيلم شاهدته بالسينما ل "عادل إمام" هو فيلم "السفاره فى العماره" بناء على طلب الست الوالده .. من قبلها بزمن كنت قد قرّرت أن أفلام "عادل" لا تصلح للمشاهده فى السينما و آخرها أن تشاهدها مرّه على أى من قنوات الأفلام ..

لكن خروجا على هذا القرار كنت قد قرّرت بناء على قراءة قصة فيلمه الجديد "مرجان أحمد مرجان" أنّى سأشاهده فى السينما لطرافة الفكره التى تؤكد أختى أنّنا شاهدناها فى فيلم أجنبى منذ سنوات لكنّى فشلت تماما فى تذكّر هذا :(

المهم .. الحمد لله رب العالمين تخلّى "عادل إمام" عن غرامه بممارسة التحرّش ببطلات أفلامه !! تخيّلوا الإنجاز !!هو طبعا لم يتخلّ عن الصوره النمطيه للمتديّن فى أفلامه لكن ما قد يخفف من تأثير هذا أن الجميع فى الفيلم -باستثناء البطله و أبناء البطل- من المرتشين و أصحاب الذمم الخربه فمش هتحس أوى بتحيّز ضد المتدينين تحديدا !!

لا تنس قبل أن تدخل الفيلم أن تعطّل عقلك بعض الشئ عن العمل و التفكير فيما تراه و بهذا قد يزيد استمتاعك بالفيلم .. فلا تسأل مثلا عن الملياردير صاحب المؤسسات الاستثماريه الضخمه الذى يهتم بالجلوس بنفسه مع رجل الضرائب لتقديم الرشوه له !! أو تتساءل عن حالة "العته" التى ألمّت بالبطل خلال إلقاء بيان بمجلس الشعب و التى لا تتناسب إطلاقا مع تكوينه لثروه ضخمه و كونه رجل أعمال من الطراز الأول !! أو تتساءل مثلا : لماذا يهتم رجل أعمال ثروته متضخمه بهذا الشكل بصورته الاجتماعيه رغم أن مجتمعنا يشهد نماذج لرجال الأعمال لم يحصلوا على أى شهادات ولم يتساءل أحد عن ثقافتهم أو مستوى تعليمهم !! رغم ما لهذا التساؤل من أهميه لأن الفيلم ببساطه مبنى عليه ..

آه نسيت أقول أن فكرة الفيلم ببساطه هى أن أبناء رجل الأعمال يشعرون بالاستياء و الخجل من كون والدهم غير مثقف و غير متعلم تاره.. و تاره أخرى بسبب تلميحات الصحافه لمصادر ثروته الغير شرعيه .. فيقرر الاب دخول الجامعه التى يدرس بها ابناؤه للحصول على شهاده جامعيه .. و هى نفس الجامعه التى تدرّس بها البطله لابناء البطل .. لا تتساءل من فضلك عن هذه الصدفه التى جعلت البطل و البطله أبناء حى واحد بحيث يخوض كل منهما انتخابات مجلس الشعب عن نفس الدائره فكل هذه تفاصيل غير مهمه ..

أفلام "عادل إمام" غالبا ما تتميز ب "لزمه" حواريه يكررها على مدار الفيلم وكنت أرجو أن يتخلّص الفيلم من هذا الملمح كما حدث مع موضوع التحرّش بالبطلات لكن ليس كل ما يتمناه المرء يدركه و قد تخرج من الفيلم كارها ل"لشاى بالياسمين" و "قعدة المكاتب" وهى اللزمات التى دأب "عادل" على ترديدها كلّما كان بسبيله لتقديم رشوه .. آه .. نيجى للرشوه ..

اللزمه الأخرى التى تكررت لحد الملل على مدار الفيلم هى تقديم "عادل" للرشوه لكل مخلوق .. بدءا برجل الضرائب .. مرورا برجال لجنة الشعر و الإبداع و أساتذة الجامعه التى يدرس بها و مدير هذه الجامعه و زملاء الدراسه و لجنة تقييم الأعمال الفنيّه بالجامعه و حكّام المباراه التى لعب فيها لفريق الجامعه و خطيب البطله السابق و رئيس الجماعه الدينيه و كل النماذج و الرموز التى يمكن أو لا يمكن أن تتخيلها .. و هذه ليست مبالغه لأن البطل تخيّل أنّه يمكن أن يفعل المثل مع الله سبحانه و تعالى فى لحظه لم يكن ممكنا فيها تقديم الرشوه لإنسان !!

كل هذا قد يمكن قبوله و ابتلاعه باعتباره من ضرورات عمل رجل الأعمل لكن ما لا يمكن قبوله هو هذه المحاضره القصيره المركّزه التى ألقاها عادل فى تحليل الرشوه و لماذا يقدمها لأنه الأكثر إحساسا بالمواطن المطحون و أن من ينتقدوه يعيشون فى برج عاجى !! رغم أن اغلبية النماذج التى قبلت الرشوه فى فيلمه لم تكن مطحونه ولا مهروسه ولم تكن بحاجه لبيع ضمائرها و التخلى عن مبادئها !! ورغم أن تقديمه الرشوه فى كثير من المواقف حرم أصحاب حقوق من حقوقهم كما ظهر فى مشهد حصوله على جائزة التمثيل الذى مرّ عليه الفيلم بسرعه شديده و كنت أرجو أن يترك عادل و مؤلفه المطحونين فى حالهم و ألاّ يتاجروا بهم في فيلم لم يظهر به أى مطحون حقيقى .. لكن كلّه يهون فى سبيل أن يلقى عادل علينا محاضرات أخلاقيه فى كل فيلم من أفلامه !!

برغم السخريه المعتاده التى يلقيها الفيلم على المثقفين و الفنانين و الشعراء و رجال التعليم -الجامعى تحديدا- و كونهم فى انتظار اى عضمه يلوح بها لهم كى يتخلّوا عن كل قيمهم و افكارهم كان لابد من التصالح معهم كى ينتهى الفيلم النهايه السعيده و تقبل استاذة الجامعه الزواج بالطالب الفاشل سابقا الذى نجح فى نهاية الفيلم فى الحصول على الشهاده الجامعيه .. و نسمّع الناس الحلوه دى كلمتين حلوين من قبيل : بالعلم حاسس انّى ملكت الدنيا كلها !!

ملحوظه أخيره : مش عارفه ليه منصب استاذ الجامعه بقى دور مغرى لكثير من العاملين بمجال الفن !! فسمعنا عن قيام "محمد السبكى" بدور استاذ جامعى فى فيلم "عمر و سلمى" ومش فى اى جامعه لا فى جامعه كنديه !! و كنت ارجو ان يكون قيام ميرفت امين بدور استاذه جامعيه متضمّنا لما هو اكثر من ترديد كلمات مثل "حضاره" و "متحضر" و "حضارى" مثل البغبغان طول الفيلم لا لشئ الا لانها تدرّس ماده اسمها "حضاره" !!

لا اريد ان يفهم من كلامى هذا انى لم استمتع بالفيلم !! بالعكس انا خرجت من الفيلم فى حالة انشكاح قد يكون سببها غير مرتبط به شخصيا .. لكنّى خرجت من الفيلم مبسوطه لدرجة إنّى مارحتش الشغل النهارده ..

[nancy]

فعلا يا فيروز انا سمعت ان مرجان فيلم معقول الى حد ما

وناوية ادخلة بس من ساعة ما دخلت كركر وانا عندى حالة

مرضية من السنيما اول ما اخلص فترة النقاهه وانسى الفيلم دة

حارجع ادخل سنيما تانى

وطبعا نزل دلوقت كمان فيلم عندليب الدقى

بس مستحيل افكر ادخلة لحسن تجيلى حالة سكته قلبية

بعد صدمة كركر

[Ahmad Farahat]

فعلا يا فيروز انا سمعت ان مرجان فيلم معقول الى حد ما

وناوية ادخلة بس من ساعة ما دخلت كركر وانا عندى حالة

مرضية من السنيما اول ما اخلص فترة النقاهه وانسى الفيلم دة

حارجع ادخل سنيما تانى

وطبعا نزل دلوقت كمان فيلم عندليب الدقى

بس مستحيل افكر ادخلة لحسن تجيلى حالة سكته قلبية

بعد صدمة كركر

مش قلتلك

بس مبتسمعيش الكلام

[nancy]

وحشتونى

انا عرفة ان بقالى فترة مطلعتش خالص

اولا من ناحية كان عندى حالة احباط بعد فيلم محمد سعد

ثانيا اتشغلت فى الساحل الشمالى والمياه هناك تنسى الدنيا كلها بصراحة

بس برضوا استعادة صحتى ودخلت فيلمين

اولا مرجان

الفيلم كوميدى بس مش كوميديا سوداء لا على رمادى شوية

يعنى بيقول ان العلم مهم ومش بس لبفلوس هى الى بتخليك غنى وحتة ان كل حاجة ممكن تتشرى بالفلوس والى متقدرش تجيبة بالفلوس اشترية بحاجة تانية معنوية زى الحب مثلا المهم ممكن تشترى وبس وترشى كل الناس بس اعرف نقطة ضعفة والعب عليها

مفيش فى الفيلم اى شىء مش منطقى الا كل حاجة واقعية جدا ومتنفذه بشكل ساخر على الاقل حتخرج شاى اخراج كويس ممثلين جيدين وكمان الموسيقى ظريفة وان لم تخرج عن النمط المعتاد والتصوير معقول بس انا شخصيا عجبنى لديكور فية افكار ظريفة اوى وخصوصا شكل بيت مرجان

اكتر شخصية ظريفة الى اسمة فى الفيلم ياسر دبور الى عامل اعلان اتصلات كمديان ظريف وعلى اد موجة الايام دى

وابن السعدنى الى عامل رئيس جماعة اسلامية ممثل كويس وحيطلع منة حاجة لان الشخصية فيها تحول من راى للنقيض بشكل سلس فى الاداء

يعنى عموما الفيلم حيعجبكم ومش حتخرجوا متئبين بس حتخرج بتقول مهى دى الحقيقة

وحتشرب شاى بالياسمين وتروح ضاحكا الى حد ما

ثانيا الشبح

انا كنت قريت نقد عن الفيلم وانه فية اقتباس والى جانب كدة ان فى الاول كويس وبعدين تهريج

انما الحقيقة النقد دة ظالم

لان الفكرة متمصرة بشكل جيد كل الحكاية واحد فاقد الذاكرة وبيحاول يعرف عن طريق موبيل واجندة وشوية فلوس انه يعرف اية الى بيحصل حوالية وهو مين بالظبط

بيصادف اتنين هما بس الى حيكونوا صدقين معاه بنت حتحبة وصاحب حيساعدة

فى فكرة فى المونتاج حلوة ان الفلاش باك بالابيض والاسود ونقلة من كادر بيشوفة على كدر فات دى حلوة اوى

الحوار حلو ومكتوب كويس وفعلا يخليك فى حيرة وتبقى عاوز تعرف هو مين فى كل الى اتكلم عليهم

ولية كل الناس دى بتتقتل بسهولة كدة طبعا الفيلم فية شوية هزار فى الكلام بس مش للدرجة

احمد عز ظريف وتمثيلة كويس وزينة تمثلها احسن شوية من قبل كدة

انما فعلا البطل الحقيقى هو صلاح عبدة الله محترف فعلا وهو بجد البطل الحقيقة لانه الى حد كبير محرك الاحداث

ومقنع جدا بانة شرير بالفطرة

الجاة الوحيدة الى فى الفيلم الى معجبتنيش النهاية حسيت انها مخدش رحتها اوى جات بشكل مفاجى لان قلب الاحداث كان عاوز يكون بشكل مريح للمشاهد مش تبقى الاحداث ماشية وفى الاخر تنقلب الاحداث فى الخمس دقايق الاخيرة

وخصوصا انه بيورط ناس كبيرة فلازم كانت تبقى بتكتيك اكبر من كدة

بس فى العموم فيلم كويس جدا ويضاف للكام فيلم الى يفوتوا السنة دى

والفيلم الى ناوية ادخلة كمان يومين هو البلياتشوا

وحاجى جرى احكيلكم علية

ولو حد شاف اى فيلم يدينا خبر

سلام

[semsema]

مدام نانسي هنا..

الف حمد الله على سلامتك..

شوفي بقى......انا لقيت موقع افلام يجنن......الافلام اللي فيه كللللها جديده..ومن الافلام دي (خيانه مشروعه)

هقولك عليه بعدين..

سلام

[Diab]

أزيكم يا جماعة

أنتو عارفين أن المغتربين أمثالي في السعودية بالذات محرومين من السينما ..طبيعي لا يشعر بذلك الأضطهاد اخويا مودست و عمو س س لأنهم نزلوا أجازة

انا مش بحسد يا شباب ....................أنا بقرررررررررر بس

ولكن

أن أن أن .......... ( موسيقي تصويرية )

ربنا يخليلنا الجماعة الهاكرز عاملين أحلي شغل وبيتعبوا يا ولداه هما صحيح بيجيبوا أفلام قديمة شوية بس أهوا ماشي حالها برضوا

ب 5 ريال تروح سوق الكورنيش في جدة تجيبلك dvd عليه فيلم جديد

انا بقي لسة شايف عمر وسلمي من أسبوع

بصراحة فيلم جامد هو صحيح في شوية أستظراف من تامر حسني وعزت أبو عوف بس مش مهم مبلوعة برضه

عجبني مشهد الكولونيا اللي بيحطها في المكتبة وبيزق الريحة علي مي عز الدين ولما قاعد يعمل زي سعاد حسني ضحكت جامد بصراحة هيع هيع هيع

ميس حمدان ممثلة جامدة بس الفيلم مدهاش حقها خصوصا أنها فعلا بتمثل حلو لو كان حد بيشوف أعمالها اللي فاتت رغم قلتها

مي عز الدين حلوة في الدور اللايت ده

عزت أبو عوف يعني مش قد كدة

تامر حسني ياريت بقي تخرج من دور الواد بتاع الجامعة الفاشل اللي موقع نص البنات فيه النص التاني بيشاور عقله

أمبارح بس لسة شايف فيلم " عن العشق والهوي "

ده انت قديم طحن

عارف عارف بس انا حبيت أقول حاجة ع السريع

الفيلم فيه كمية عياط بالهبل مفيش حد معيطش في الفيلم لدرجة أني كنت فاكر ان cameraman عيط هو كمان من كتر الدموع الي غرقت اللوكيشن

لسة مشفتش تيمور وشفيقة

كركر ومرجان وعندليب الدقي موجودين بس تصوير سيء جدا أول ماينزلو dvd هقلولكم علي طول بس ربنا يستر وميكونش ده السنة الجاية

تم تعديل 5 أغسطس 2007 بواسطة Diab