أميبـا فــي بيتــي الأخيرة

[shahd]

الحلقة التاسعه

الزمان: ثالث يوم الساعه السابعه صباحا

المكان: في مدرسة الأميبات

الأشخاص: الأميبات.. المدرسات.. مندوب جمعية حقوق الأميبات والأنتاميبات

( انتاميبا كولاي)

المنظر:المندوب بعد ماشاف المستوى الجميل للأميبات واقف بيكلم الناظرة والأبلة الجديده..بشدة في مكتب الناظرة

الأميبات: واقفين في الشباك و بيضحكو من منظر الأبلة الجديده والناظرة والمندوب بيهزأ فيهم...

المندوب: بقى ده لبس تلبسيه يا ابلة .. هو احنا فين هنا؟؟؟ دي مدرسه ياهانم

الأبلة: ما هو يا فندم ..ده برستيجي .. وما ينفعش اخرج غير وانا على سنجة عشره

المندوب: وعلى ايه يا روح عمو.. دا انتي ما حصلتيش هستولوتيكا..

وتطلع الأنتاميبا هستولوتيكا الهربانة من جو درج الأبلة الناظرة

الأنتاميبا الهربانة: جراااااااا ايه ياكولاااااااااي .. هو انت حتعملهم عليا انا ولاايييييييييه؟؟؟؟؟؟؟؟؟؟ قال مش قادر على الأيمبات.. حيتشطر على الهوستوليتيكااات

المندوب: اهلااااااااااا ازيك ياست الكل .. كنت فين .. الجماعه طالع عينهم بيدورو عليكي

الأنتاميبا الهربانة: لا ابدا ياكولاي .. ما انت عارف الجو هناك عامل ازاي.. قلت اريحلي يومين كده ...

الأبلة و الناظرة بيبصوا لبعض ومستغربين من الموقف .. وازاي الأنتاميبا دخلت هنا اساساً!!!

الأبلة: افففف.. دي ريحتها وحشة خالص ..ياااااااي

الناظرة: ايه اللي جاب المناظر دي لمدرستي ؟؟؟؟

الأنتاميبا: تقف على درج المكتب بالملايه اللف جرا ايه يا ست منك ليها .. يكونش منظري مش عاجبك ؟؟ ولا يعني مش عااااااجبك.. ده انا الأنتاميبا هستولوتيكااااااااااا والأجر على الله....

الأميبا الأبلة: يااااااااااي ايه ده ؟؟ دي بيئه خالص...

الأنتاميبا الهربانه: بي مين ياختي .. اسم الله .. عليكي يا ام رجلين كذاااااااااااابه

المندوب: بسسسسسسسس.. كفايه كده حرام عليكوووووووو

ابوس راسك.. امشيى انت دلوقتي وانا حخلص معاهم وابقى اقعد معاكي ..

الأنتاميبا: ماشي يازوق .. حستناك على اول قهوة على ناصية البركه .... سلااااااام..

وترزع الباب وراها.......

المندوب: كنا بنقول ايه .. ايه ؟؟؟ ااه افتكرت .. كنت بقلك بلاش اللبس اللي انت بتلبسيه ده.. وكمان .. طالما ما بتعرفيش تشرحي .. وخطك عامل زي نبش الفراخ.. كنت بتدرسي للتلاميذ لييييييه؟؟ هو احنا ناقصين ...

الأبله: ياااااااافندم اأأأأأ

المندوب: بس اخرسي .. خليني اكمل كلامي.. احنا لازم ننظر في شأنك .. ونشوف جبتي شهادتك منين.. عشان في شكوى بتقول انها مزورة .......

الأبله: انا شهادتي مزورة.. دي من مستنقع اكبر جامعه في لوندوون..

المندوب: اسمها لندن ياللي مش عارفة الأميبا من الأسكارس.. اتفضلي يا هانم.. اترزعي في بيتكم لحد ما نندهلك....

الناظرة: امشي يافاضحاني.. طول عمري بنصحها يا باشا وهيا ما بتسمعش الكلام هنا.. اميبا مايعه بصحيح..

المندوب: اهيييييييي.. لا ياشيخه.. ما بلاش الحركات دي .. مش عليا انا يا حضرة الناظرة...

الناظرة: يا باشا انا لو كنت اعرف انها بالمستوى ده كنتتتتتتت...

المندوب: كنت ايه؟؟ وهو في ناظرة مش عارفة مستوى المدرسات بتوعها.. ناظرة عيرة حضرتك؟؟؟ انت متحولة للتحقيق

الناظرة: تحقيق.. ليه يا باشا .. انا ورايا كوم لحم بربيهم.. ابوس ايدك يا سعادة البيه.. اهئ اهئ.....

يخرج المندوب ويسيب الناظرة بتطلم....

الأميبات اول ما يشوفوا المندوب خارج كله جري على فصله.... مستنين العقاب اللي حينزل عليهم هما كمان......

المندوب يدخل الفصل.. وشوشة .. ودوشة...

المندوب: صباح الخير ياحلوووووووين

الأميبات: صباح الخير يا استااااااااذ...

المندوب: الأبلة والناظرة حياخدو جزاءهم والأبلة اللي بتحبوها راجعه

الأميبات: هيييييييييييييييييه يحيا العدل.. يحيا العدل....... بس هما اتحكم عليهم بأيه؟؟

المندوب: استنوا بس .. اصبري على رزقك انت وهيا... كله حيبان ..

الأميبا الرغايه: في ايه تاني يا استاذ كلاوي بس؟؟؟ مش خلاص بوز الأخص الناظرة وام وش عكر مشيوا من هنا...

المندوب: ايوه يا ام لسان عايز قطعه .. وبعدين انا اسمي كولاي.. مش كلاوي

الأميبا الغلابويه: يا عمنا مش فارقه .. انجز بس وهات المفيد

المندوب: ما تقاطعنيش يا غلابوية.. وبلاش اللون ده معايا

الرغايه: استني ياماما .. خلي الأستاذ يتكلم.. ( وبصوت واطي ايه اليوم اللي مش باينله اخر ده؟؟)

المندوب: الحكم على الناظرة والأبلة ده شغل اللجنة الأميبيه والأنتاميبيه الكبرى

اما انا فسابولي الحكم عليكم انتوا يا حلوين .. تعالي ام لسان طويل.......

الأميبات حيرانين ياترى حتعمل ايه ياكلاوووووووي ؟؟؟

اولا الأميبا الرغايه والغلابويه : يخشوا معسكر اجباري في مدرسة الأنتاميبات ويمنع منعا باتا الرغي واللت والعجن مع بعض لمدة 3 اسابيع من ساعته وتاريخه

الرغايه والغلابويه: 3 اسابيع بحالها ..منك لله يا مفتريييييييييييييييي...

ثانيا الأميبا الفتانة: تتحرم من الموبايل.. واي مصدر من مصادر الأتصال بكافة انواعه .. وتتحبس حبس انفرادي لمده اسبوعين ويبتدي التنفيذ في التو واللحظة....

الأميبا الفتانة: ياحوستيييييييييييييي.. ياخراب بيتك يا فتاااااااااااانة

ثالثا واخيرا: الأميبا الشاطرة والأميبا الخجولة.. حندي كل واحده فيهم شهادة تقدير وجوايز انما ايه .. حاجة كده تليق بمستواهم العلمي والأخلاقي..

الأميبا الشاطرة والخجولة كانوا في قمة السعادة

المندوب يمشي ... بعد ما خلص مهمته... ويروح للأنتاميبا الهربانة في القهوة..

ولسه حيطلب الشيشيه.. يلاقي مين قدامه؟؟؟؟؟؟؟؟؟؟؟؟

يتبع.................

تم تعديل 25 يونيو 2007 بواسطة شهد

[shahd]

الحلقة العاشرة

الزمان: الساعه الثانية ظهرا

الشخصيات: الأنتاميبا الهربانة( انتاميبا هستولوتيكا) مندوب حقوق الأميبات( انتاميبا كولاي) الزحار

الحوار:الأنتاميبا الهربانه: ابااااااا.. ده الزحرور .. وقعتك سوووووده يا انتاميبا

كولاي: ما تخافيش يا بت.. ولا انت مستعيلاني يعني

الأنتاميبا: ابدا يا اخويا .. بس ده الزحرور.. يامصيبتيييييييييييييي

كولاي: خليه بس يقربلك وانا اوريه شغله..

الزحرور يمسك كولاي من قفاه.. بقي انت اللي مخبيها؟؟؟...

كولاي: يترعش اول ما يشوف الزحرور...

لاياعم وانا مالي اهي قدامك اهيه...

الأنتاميبا: بتغدر بيا يا جبان

كولاي: ياستي العمر مش بعزقه.....

الأنتاميبا .. تجري والزحرور وراها . وتدخل محل خضار وفاكهه.. تستخبا في سلة الكرمب..

الزحرور يجري وراها .. يشوف شوية اميبات بيلعبوا كورة شراب يطنش الأنتاميبا ويروح يلعب معاهم..

يجي راجل ياخد الكرمبايه اللي الأنتاميبا مستخبيه فيها .. ويروح لمراته ...

الزوج: مساء الخير يا وليه

الزوجه: مساء الفل يا سبعي..

الزوج: خدي الكرمبايه دي .. اعمليلي سلطة كرمب..

الزوجه: ياماجاب الغراب لأمه ...

الزوج: قلت ايه يا وليه يا قرشانه

الزوجه: بقول تعيش وتجيبلي ...

الأميبا : وليه بكاشه ؟؟

الزوجه: ايه الصوت ده؟؟

الأميبا: انا الأنتاميبا .. امي بعتاني اسلم عليكي

الزوجه: الحقوووووووني.. عفريت

الأميبا: عفريت اما ياخدك.. بقلك انا الهستولوتيكا

الزوجه: وتطلعي مين بسلامتك ؟؟

الأميبا: انا ياختي بجي للناس الجربانين اللي زي حالاتك.....

ويدخل الزوج يلاقي مراته بتتكلم لوحدها ..

الزوج: انت اتلحستي في نافوخك يا وليه .... فين الأكل ؟؟؟؟؟؟؟؟

الزوجه: حالا حالا الأكل يكون جاهز

الأنتاميبا: هو ماله بيكلمك كده ليه.. اما نسوان ما عندها ش شخصيه؟؟؟

الزوجه تتنرفز : حتشوفي انا حعمل ايه دلوقتي

وتحط الأكل على السفرة من غير ما تغسل الكرمب

الزوج: يا وليه انا مش قايلك اغسلي ايدك .... وكمان مش غاسلة الكرمب ده ايه القرف ده...

الزوجه: ماهوياحبيبي اصلــــــــ. .

الزوج: اصل ايه وفصل ايه.. في نهارك اللي مش فايت ده......

.

الزوجه:.... ولا تزعل انا حغسل الحته اللي انت حتاكلها بس ..

الزوج: ياناااااااس .. هو انا اتجوزت زباله متحركة؟؟؟

الأنتاميبا:هيا حصلت للزباله.. لالالالا.. اوعي تسكتي؟؟

الزوجه:.. انا ما حدش يقدر يبهدلني وحتشوفي..

الأنتاميبا: ياشيخه اجري.. الرجال بقاله 15 سنة بيبهدل فيكي .. وانت قاعده زي العبيطه...

الزوجه: انا عبيطه.. اما انت انتاميبا مش متربيه بصحيح...

وتمسك الكرمب اللي الأميبا فيه وتروح رامياه في الزباله وتقفل عليها في الكيس

وتحطه جمب الباب..

الأنتاميبا .. تزعق .... حرام عليكي طلعيني من البتاع ..ده ريحته وحشه

وتفضل تزعق وتصرخ ولا حد يعبرها....

يوصل الزبال ياخد الزباله....

وتلف عربية الزباله بيها .. ويغمى عليها من كثر اللف

تفوق الأنتاميبا وهيا جوا عربيه الزباله ..مفزوعه....

ياترى عربية الزبالة حتوصلها لفين؟؟؟؟

يتبع..............

[shahd]

الحلقة الحاديه عشره

المكان: مدرسة الأميبات

الأشخاص: الأبلة .. التلاميذ..

عودة الأبلة لتلاميذها..

الأميبات عاملين حفله كبيره في حوش المدرسة..

الناظرة الجديده توصل .... وتقدم للأبلة شهادة تقدير..

التلاميذ مبسوطين... ويجروا على الأبله وكل واحده فيهم عايزة تسلم عليها .... وتاخدها بالحضن

الحفله تنتهي ... الكل يدخل فصله..

الأبله تاخد تلاميذها وتدخل الفصل وتبتدي الحصه...

وفي الفصل...........

الأبله: صباح الخير يا ولاد

الأميبات: صباااااااح الفل ياااااااااااا أبلة...

الأبله: نبتدي الدرس يا امامير ولا لسه عايزين نلعب؟؟

الأميبات: نبتدي الدرس يا ابله...

الأبله: طيب.. حنتكلم النهارده عن الحركة في الأميبا

الحركة ياولاد بتميز الحيوان عن النبات بتبقى واضحة في الأميبا

وحركتها بتتعرف بأيه يا شاطرة

الشاطرة: بتتعرف بالحركة الأميبيه.. وتعتبر ابسط انواع الحركة الأوليه في الحيوان

الأبله: برافو ياشاطرة .. والحركة دي يا شطار.. مختلفة خالص عن الحركة الفضليه في الحيونات المعقده.. الا ان اللي بيحصل في العضلات في وقت انكماشها لتحريك الأطراف مثلا بيبقى مايل

لأيه ايه يا خجوله؟؟

الخجوله وشها يحمر وتمسك في فستانها : امممم.. بيبقى مايل للتغيرات الكميائيه والطبيعيه اللي بتحصل في الأميبا المتحركة.

الأبله : ممتاز يا خجوله.. كملي يا راييقه ...

الرايقه حاطه رجل على رجل : وزياده على كده بعض خلايا الجسم في الحيوانات الراقيه بتتحرم حركة اميبيه اللي هيا الكريات البيضاء

وبتحصل الحركة بأن الاميبا بتكون بروز أنبوبي اللي هو الرجلين الكذابة في الجهة التي اللي الأميبا بتتحرك فيها .

الأبله: والرجلين الكذابه ياولاد.. بتتكون في أي جزء من سطح الجسم وبتفضل تكبر بعد ما بتتكون لوقت معين وده بسبب ايه هااااااا مين يقول؟؟

ها يا ناعمه ..

الناعمه بكل رقة وبصوتها الناعم اللطيف : وده بيحصل عشان شويه من بروتوبلازم الاميبا بيتدفق جواه بس بعد مده بتتكون قدم ثانيه في مكان جمبها فيقوم البروتوبلازم يتدفق في القدم الجديد.

الأبله: هايل يا ناعمه

وبالطريقه دي تتحرك الاميبا حركة مش منتظمة. ولما بيتكون قدم كاذب جديد تختفي الأقدام الكاذبة الأولانيه ..

الهاديه ترفع ايدها: ابله ابله .. انا عايزة اقول حاجة

الأبلة: قولي يا ستي ..

الهاديه: عايزة اقول اننا لو شفنا الأميبا وهيا بتتحركك حنلاقيها بتكون اقدام كاذبه في الأتجاه ده وان كل قدم بيتكون بيدور لتحت عشان تلمس قمته السطح اللي بيمشي عليه الحيوان وبعد كده يروح متوجه للخلف..

الأبله: اتاريكي شطورة ياهاديه.. امال ساكته ليه دايما يا بنتي

وبعد كده .. قولي يا اللي هناك.. اسمك ايه

الكسلانه: اسمي الكسلانه يا ابله.. وتقعد تتاوب ... ايوه في ايه .. بتصحوني من نومي ليييه؟؟؟

الأبله: نايمة ياحلوة.. اسم الله عليكي.. قومي فزي كملي الأجابة

وتقوم الكسلانه بكل نشاط بعد ما الأبلة شخطت فيها..

البروتوبلازم بيستمر في التدفق إلى الأمام مكونا قدما ثاني وبكده تكون حركة الاميبا فيها تدفق وزحف وتدحرج ....

الأبله: ياحلاوة ياحلاوة .. الكل جاوب على الأسئله .. وحتى الكسلانه... امال كنتوا بتغلبوني لييييييييه

الأميبات: بندلع عليكي يا ابله ويطلعوا على الترابيزت ويبتدو يتشاقوا

الأبله: هاااااااا وبعدين ...

ولا عايزين.. تروحوا المعسكر .. عند الرغايه والغلابويه؟؟

الأميبات: .. لاااااااا بلاش معسكر...

الأبله: خلاص مافيش معسكر ياشطاااار

ويرن جرس الحصة .. تخرج الأميبات من المدرسة .. ويركبوا الأتوبيس

وهما في الأتوبيس يسمعوا صوت الأنتاميبا الهربانة .. وهيا جوا عربيه الزبالة

بتخبط في باب العربيه .. يمكن حد يسمعها ..

يفكروا في خطه عشان ينقذوها...

تروح الأميبا الشقيه.. تخربش الزبال اللي بيسوق العربيه.. .. والأميبا ام عضلات تديه بالبكس على وشه.. اما الأميبا الزكيه.. فتدور في اكياس الزبالة على الأنتاميبا.. تجيب سكينه وتفتح الكيس بشويش عشان ما تعورش الأميبا..

وبعد جهد كبييييييييير .. يطلعوا الأنتاميبا من الزبالة .. وتاخدها الأميبا الحنينه للبيت عندها .. عشان تعالجها..

تدخل الأنتاميبا بيت الأميبا الحنينه .. تستحما وتشرب الشاي وتتعشا.. وتنام في سرير جميل..لكن؟؟؟؟؟؟؟؟؟؟؟ لكن اييييييييييييه؟؟؟؟

يتبع...................

تم تعديل 2 يوليو 2007 بواسطة شهد

[shahd]

الحلقة الثانيه عشرة

المكان : منزل الأميبا الحنينة

الأشخاص الأنتاميبا الهربانة

الأنتاميبا نايمة وبتشخر ....

الأميبا الحنينة مجمعه اميبات الحارة وبتحكيلهم حدوته في الأوضه الثانية وبصوت وااااااطي عشان الأنتاميبا ما تصحاش من النوم.....

الأميبا : نبتدي الحكاية

كان ياما كان في اميبا لما بتتحرك بيبقى ناتج عن استجابة السيتوبلازم للمنبهات الخارجيه..

اميبا بنت الجيران : المنبهات دي بتأثر علينا والأستجابة دي بتعتبر واحده من خصائص البروتوبلازم في كل الأحياء

الأميبا بنت الأميبا الحنينة : مامي .. مامي .. ومش بيقولوا ان التغيرات البيئيه بتعمل تغيير في البرتوبلازم اللي هي المنبهات ولكل كائن حي منبهاته الخاصة واللي بيتأثر بيها ويستجيب لها...

الأميبا: صح الكلام وكمان احنا بنتأثر بالأشعه البيضا والزرقا.. بس الحمرا لأ..

اميبا بنت اخت الأميبا الحنينة: وبرضه بنستجيب للمنبهات بأساليب مختلفة نبعد عن الضوء ونروح ناحية القطب السالب للتيار الكهربائي.

اميبا جاية من الشارع الثاني: ونبعد عن الحاجات السخنة وعن كل محلول كيميائي مختلف عن الوسط المائي اللي بنعيش فيه وننجذب ناحية المواد الكيميائيه اللي بتكون غذائنا

الأميبا بنت الأميبا الحنينة : قوليلي يا ما مي .. ايه حكايه الرجلين الكذابه ؟؟؟

الأميبا : الرجلين الكذابه دي ياستي بترجع لتغيير في قوام السيتوبلازم

فالجزء الداخلي من الاندوبلازم أكثر ميوعة واسمه بالبلازما السائلة الجزء اللي بره فصلب وبيكون موجود مع الاكتوبلازم واسمه البلازما الهلامية.

الأميبا بنت اخت الأميبا الحنينة : خالتو خالتو انا قريت في كتاب ان المنبهات اللي ثؤثر على الأميبا وتخليها تتحرك في اتجاهها هي المنبهات.. اللي بتأثر على البلازما الهلامية المواجهه ليها وتقلل من سمكها فينفتح الطريق قدام البلازما ا لمايعه .. وتروح جايه متدفقه ناحية المنبهات وبكده تتكون الرجلين الكذابه....

الأميبا : شطورةياروح خالتو .. واللي بيساعد على تدفق البلازما المائعه هو انقباض البلازما المتصلبة في الجهه المضاده للحركة

اميبا بنت الجيران : ولما بتوصل البلازما السايلة لقمة الرجلين الكذابة تتحول لبلازما هلاميه وتنجذب بشويش ناحية البلازما المتصلبة الخلفيه..

الأميبا الحنينة : ولما بتوصل الى الجزء الخلفي بتتحول مره ثانيه لبلازما مائعه

والمنبه اللي يسبب ابتعاد الأميبا عنه هو المنبه اللي يسبب زيادة سمك السيتوبلازم في الجهه المواجهه ليه

وتخلص الأميبا الحكاية.. وكل واحده تروح بيتهم ....

تصحا الأنتاميبا وشعرها منكوش وغضبانه .. وتدور على الأميبا الحنينة

الأميبا الحنينه: مالك ياجميل صاحيه من النوم ليه؟؟

الأنتميبا: وانام ازاي في الدوشة دي..

الأميبا الحنينه: معلش .. معلش حقك عليا ..

الأنتاميبا: حق ايه وباطل ايه .. ما خلاص نومي طار

الأميبا الحنينه: تحبي احضرلك الفطار

الأنتاميبا: اه طبعا امال حقعد على لحم بطني؟؟؟؟.

تروح الأميبا الحنينه تجهز الفطار للأنتاميبا.. تحط السفرة قدامها

الأنتاميبا: ايه القرف ده يعععععععع

وتروح راميه الأكل على الأرض

الأميبا الحنينه تزعل قوي ودمعتها تنزل ..

تدخل بنت الأميبا الحنينه

بنت الأميبا: في ايه يا مامي .. حضرتك بتعيطي.. وايه اللي عمل كده في الأكل؟؟

الأميبا الحنينه: ابدا يا حبيبة مامي.. مافيش حاجة.. روحي اوضتك انت

الأنتاميبا: ما تقوليلها.. امك ياستي جايبالي اكل معفن...

بنت الأميبا : احترمي نفسك .. مامي احسن طباخه في الدنيا

لو مش عاجبك امشي من بيتنا

الأميبا الحنينه: لألأ ياميمي يا روحي.. انا علمتك كده؟؟ مش احنا قلنا نحترم ضيوفنا مهما قالو.....

بنت الأميبا: ايوه يامامي بس دي بتشتمك..

الأميبا: معلش .. طول ما هي في بيتنا فهي ضيفتنا

بنت الأميبا: حاضر يامامي..

وتروح اوضتها وهي زعلانة على الأخر...

الأميبا الحنينه تسأل الأنتاميبا: تحبي اطلب لك اكل من بره؟؟

الأنتاميبا: ياريت احسن من اكلك الماسخ

الأميبا الحنينه ماسكة أعصابها..

حاضر من عنيا....

الباب يخبط .. بنت الأميبا تفتح الباب..

تدخل الأميبا الحقانيه..

الأميبا الحقانيه: مالك ياميمي بتعيطي ليه ياروحي

بنت الأميبا: اصل ياخالتو في ضيفه عندنا

الأميبا الحقانيه: طب ومالو يا ماما ؟؟

بنت الأميبا تترمي في حضن الأميبا الحقانيه وتحكيلها كووووول الحكايه...

الأميبا الحقانيه : ولا يهمك ياعيون خالتو.. انا دلوقتي اخد لماما حقها... ولاتزعلي...

بنت الأميبا : حتعملي ايه يا خالتو؟؟

الأميبا الحقانيه: انا حتصرف .. تعالي ورايا انت بس

تدخل الأميبا الحقانيه على الأميبا الحنينه:

الأميبا الحقانيه: مساء الخير ياعسل

الأميبا الحنينه: مساء الفل اهلا انت جيتي امتى؟؟

الأميبا الحقانيه: لسه من شويه .. وحشاني قلت اجي اطمن عليكي

الأميبا الحنينه: منوراني .. معلش اصل عندي ضيوف..فمش قادرة اخرج

تطلع الأنتاميبا من الأوضه: ما تخرجي يا اختي هو انا قاعده على دماغك..

الأميبا الحقانيه: مش تعرفينا..

الأميبا الحنينه: دي الأنتا..........

وقبل ما تكمل

ترد الأنتاميبا: انا ياختي بعرف اتكلم عن نفسي كويس قوي..

انا الأنتاميبا هستولوتيكا.. قاعده كم يوم عند الست دي .. استجم شويا

الأميبا الحقانيه: حلو الكلام.. يعني الست دي مضيفاكي عندها..ومدة الضيافه 3 ايام.. واللي عرفته انت بقالك هنا اسبوع.. وهيا كده عداها العيب

الأنتاميبا: يعني ايه حتطردني؟؟

الأميبا الحقانيه: ابدا هيا مش حتعمل حاجة.. انا اللي حاخدك هيلا بيلا كده واحدفك من الشباك كده هوووووووووو

لحاااااااااد ما توصل للناصيه الحارة اللي وراهم .. وهناك تلاقي مباره كورة بين الزحارير والأنتاميبات

واخيرا تخلص الأنتاميبا الحنينه وبنتها من دوشة الأنتاميبا

ياترى حتلاقي مين بيلعب في الماتش ده... فاكره يا انتاميبا ...

يبقى استلقي وعدك......

يتبع..............

تم تعديل 7 يوليو 2007 بواسطة شهد

[shahd]

الحلقة الثالثة عشرة

المكان: الأستاد الرياضي لفريق الأنتاميبات والأميببات

الأشخاص: الأنتاميبا الهربانة.. انتاميبا كولاي.. اميبات .. انتاميبات..

المنظر: فريق الأميبات ضد الأنتاميبات في مبارة كرة قدم.....

انتاميبا كولاي الحكم..

الشوط الأول: الكورة مع الأميبا

اميبا.. تجري بالكورة ... تجري .. تجري ..

الأنتاميبا تزقها تقع في بركه..

تنقض عليها اميبا كالفك المكفترس وتخطف الكورة ..

تجري انتاميبا وتشدها من شعرها ..

الكورة دي بتاعتي اناااااااا

الأميبا تديها بكس في عنيها..

انتاميبا كولاي يصفر....

توقف المبارة

يدخل الأسعاف ..

الأنتاميبا تطلع من الأستاد وتصرخ اااااااااه ياعينييييييييييي

انتاميبا كولاي يطلع كرت احمر للأميبا

الأميبا تشعلل .. تولع .. تفرقع من الغضب

تضرب الأنتاميبا كولاي على دماغه..

وتقطع قميصه فتفوفته فتفوته...

مشجعي الأنتاميبات

واقفين قصاد مشجعي الأميبات..

تحيا الأنتاميبا

وطز في الأميبا

مشجعي الأميبات

حلوة يا اميبا

كخه ياانتاميبا

وتنقلب المبارة الى حلبة مصارعه بين الأنتاميبات والأميبات

وتستمر الخناقه ... وكله يضرب بعضه....

والبوليس يدخل ... ويناله من الضرب جانب

وبعد ساعه يوصل رئيس اتحاد الزحارير

ومعها رؤساء نوادي أنتاميبات والأميبات...

والكل يقعد قعدة صلح

تقام فيها وليمه طويلة عريضه على شرف رئيس اتحاد الزحارير ..

رئيس اتحاد الأميبات الأكبر يحلف مية يمين ان الغدا عنده النهاردة

الأكل يتأخر .. رئيس اتحاد الزحارير يتسحب ويرورح على المطبخ...

الأميبا الطباخة: اتفضل يا استاذ زحرور نورت المطبخ ...

رئيس اتحاد الزحارير: الحله دي فيها ايه ياست اميبا؟؟

الأميبا الطباخة: ده يا سيدي شوية

أحياء ميكروسكوبيه صغيره حيوانية ونباتية زي الدياتومات والبكتيريا والحيوانات الأولية وياسلام على (clopidium chalomonas)

وبلابيع ببنبلعها اسمها جزيئات الحيوانات والنباتات المائية.

رئيس اتحاد الزحارير: والأميبا الطفسة دي بتعمل ايه هناك

الأميبا الطباخة : دي يا اخويا مغلباني .. بتبلع في اليوم مابين 50-10 (chalomonas)

الأميبا الطفسة تسمعهم تسيب الأكل

رئيس اتحاد الزحارير: هيا سابت الأكل ليه تكونش زعلت؟!

الأميبا الطباخة: تزعل ايه يا عم زحرور.. دي تقدر تبطل اكل 20يوم وفي الحالة حجمها يقل لحد 50% من حجمها الأصلي.

رئيس اتحاد الزحارير: طب ولما تواجه الغذاء تقف حركة السيتوبلازم عند نقطة التلامس بيحصل ايه؟؟

الأميبا الطباخة: ساعتها تتكون الأقدام الكاذبة من يمين الغذاء وشماله .. عـ الجنبين يعني وفوقه وبالتحام الأقدام الكاذبة يحاط الغذاء إحاطة كاملة ويتحبس مع شوية ميه في تجويف اسمه الفجوة الغذائية.

الأميبا الطفسة: وبعدين يفرز السيتوبلازم في عصارة هاضمة في التجويف الغذائي

الأميبا الطباخة: وفي أول أطوار الهضم تكون حمضيه (ومحتمل انها تحتوي على حامض الايدروكلوريك) وبعد كده تتحول إلى قلوية وهو ده اللي بيحصل فعلا في عملية الهضم في الإنسان.

الأميبا الطفسة:و الإنزيمات المفرزة تقدر تهضم الدهن .. والمواد المهضومة تروح للسيتوبلازم وتدخل في تركيبها ..وده يؤدي إلى نمو الحيوان.

الأميبا الطبااخة: أما المواد الصلبة المتخلفة عن الهضم (البراز) تفضل في الفجوة الغذائية وتلفظها الاميبا من أي نقطة من سطحها

رئيس اتحاد الزحارير: ايه يا اختي .. طب بس بس سديتي نفسي...

الأميبا الطباخة: هو حد قالك تدخل المطبخ يا استاذ زحرور ماهو لازم ينوبك من الحب جانب

رئيس اتحاد الزحارير: يخرج من المطبخ ..

يلاقي رئيس اتحاد الأميبات في وشه

رئيس اتحاد الأميبات: مالك يا زحرر بيه في حاجة؟؟

رئيس اتحاد الزحارير: مالي ايه وبتاع ايه.. ايه الأكل بتاعكو ده؟؟ ولا حاجة تفتح النفس .. انا ماشي

رئيس اتحاد الأميبات: ياعم استنى بس .. احنا لسه ورانا فريقين ؟؟

حنصلح بينهم ...

رئيس اتحاد الزحارير: يتحرقوا الفريقين.. على الأتحاد كله...

رؤساء نوادي الأنتاميبات مندهشين من تصرف رئيس اتحاد الزحارير!!

رئيس نادي الأنتاميبات : عيب عليك يازحرر .. دي الأميبات كلفة نفسها في العزومة دي؟؟

رئيس اتحاد الزحارير: كلفت نفسها ايه بس بلا خيبة ؟؟

رئيس اتحاد الأميبات: امال عايز ايه حضرتك؟؟ مكرونة بالباشميل ؟؟

رئيس اتحاد الزحارير: بتتريق حضرتك؟؟

رئيس اتحاد الأميبات: اعملك ايه طيب.. ماانت عمال تتألط علينا ....

وانت حتتة زحرور ولا تسوى...

رئيس اتحاد الزحارير: لم لسانك وبلاش قلة ادب.. لحسن اوريك قيمتك .........

رئيس نادي الأنتاميبات: ياجماعه اهدوووووووووو... احنا جاين نصالح الفريقين ونكمل الماتش .. ولا جايين نتخانق

رئيس اتحاد الزحارير: يتحرق الماتش باللي فيه ويسبهم ويمشي..

رئيس اتحاد الأميبات : في ستين داهيه....

رئيس نادي الأنتاميبات : اما لعب عيال بصحيح ...

رئيس اتحاد الأنتاميبات يجري ورا رئيس اتحاد الزحارير ...

يحاول يصلح بينه وبين رئيس اتحاد الأميبات ... وبعد جهد كبيييييييييييير............

يتبع..................

تم تعديل 12 يوليو 2007 بواسطة شهد

[shahd]

الحلقة الرابعه عشرة

المكان: الأستاد الرياضي لفريق الأميبات والأنتاميبات

رئيس اتحاد الأنتاميبات ينجح في انه يصلح مابين رئيس اتحاد الزحارير ورئيس اتحاد الأميبات

ويتم الأتفاق على تأجيل المبارة لليوم الثاني ....

الفريقين يزعلوا من القرار .. عشان عايزين يخلصوا.. بما انهم مش طايقين بعض اصلا

الأنتاميبات: ييييييييييييييييييييييييييييييييييييه

الأميبات: تاااااااااااااااااااااااااااااااااااااااااااااااااني

ويبتدوا يبهدلوا في بعض .......

المشجعين ينزلوا للملعب وكل واحد يقف جمب الفريق اللي بيحبه

زحمة.. خناق.. هيصة .. كلمات وشتايم من الأميبات .. للأنتاميبات.. والعكس......

اميبات مش عارفة تتنفس من كثر الزحمة والكتمة............

يدخل فريق الأسعاف ........

كابتن الأنتاميبات( لسه ساقط سنة ثانية طب 6 مرات)

كابتن الأنتاميبات : اجري يا ابني هات انبوبة اكسجين قبل ما الأميبات تفطس

اميبا صاحيه : انبوبة اكسجين وانوبة بتوجاز ايه ياابني احنا بنتنفس بتبادل الغازات اللي بتحيط بالحيوان من كل سطح الجسم

انتاميبا : مش زي البني ادمين شهيق وزفير والكلام ده؟؟؟

اميبا من الجماهير : لا يافالح الأكسجين يعدي على السيتوبلازم بالأنتشار .. جزيئات المادة بتوزع نفساها بالتساوي في المكان المتاح ليها..

اميبا دكتورة: بمعنى ان جزيئتها تتنقل من المكان المركزه فيه للمكان اللي بيقل تركيزها فيه...

اميبا من الفريق : وبما ان تركيز الأكسجين في الماء اكثر منه في سيتوبلازم الأميبا.. فيستمر دخول الأكسجين ويفضل تركيزه في السيتو بلازم اقل من الميه

اميبا من الجماهير :عشان الأكسجين بيأكسد المواد الغذائيه وبسبب الأكسده دي تنطلق الطاقه اللي بيستغلها الحيوان عشان يعمل وظائفه المختلفة .. زي الحركة .. وافراز ........

اميبا من الفريق: ومع الأكسده بيكون في ميه وثاني اكسيد كربون ولما الميه كانت من مكونات السيتوبلازم فمش مهم انك تتخلص منها .. بس ثاني اكسيد الكربون فسام ولما بيتراكم يضر الجسم ..

اميبا من فريق الأسعاف: بس هو مش بيتراكم في الأميبا لأنه بينفذ بنفس خاصية الأنتشار .. من السيتوبلازم للماء الخارجي.. لأن تأثيره اكثر في السيتوبلازم من الماء الخارجي...

الأميبا الكابتن: و الطريقة دي في التنفس تنفع بس في الحيوانات الدقيقة زي الأميبا

لأن سطح الجسم كبير بالنسبة للحجم، ولازم يكون سطح الحيوان مش مغطى بطبقة عازلة.

واحد من فريق الأميبات: بقى هيا الحكاية كده.. وعاملي فيها دكتور .. وهاتوا انبوبة اكسجين ومش عارف ايه ...

واحد من فريق الأميبات: سيبك منه ده مش ناوي يتخرج من سنة ثانية اساسا

كابتن الأنتاميبات: مش احسن افضل في سنة ثانيه ان شالله عشر سنين وافهم كل محاضرة فيها.. بدل ما اتخرج وانا مش عارف امسك مشرط؟؟؟

كابتن الأميبات: يادماااااااااااغي جايبينه منين ده؟؟؟

واحد من فريق الأميبات: شم ريحته وانت تعرف يا كابتن

الأنتاميبا الهربانة بعد ما رمتها الأميبا الحقانية من الشباك وقعت في الأستاد الرياضي للأميبات والأنتاميبات ومستخبيه وسط الجمهور بعد ما لمحت الزحرور من بعيد...

ما تقدرش تستحمل اهانة كابتن الأميبات لكابتن الأنتاميبات.... فتطلع وسط الجماهير ... ولا همها زحرور ولا غيره...

تخلع كرسي من الكراسي بتاعة الأستاد وتنزل على الملعب .....

الأنتاميبا الهربانة: حاااااااااااااا .. مين اللي بيشتم اهلي وناسي... وانا اديه على ام رأسه بالكراسي.......

كابتن الأنتاميبات: اهلا بالأنتاميبا الشجاعه اللي كسرت كل قوانين العيله الممله...

الأنتاميبا الهربانة بينها وبين نفسها( شجاعة مين يا ضنايا.. هو انا نابني غير قلة القيمة....... )

كابتن الأنتاميبات: تعالي وريه مقامه .. الكابتن السكه ده.........

الأنتاميبا الهربانة: سيبهولي وانا اعلمه الأدب

و لسه حترفع الكرسي .. واحد ... اتنين ..ثلاثة .. على وش كابتن الأميبات ...

تحس بخيال ضخم جاي من وراها وماسك ايدها ..

والكرسي بيتشال منها في لمح البصر ...تلفت تشوف مين وراها...

الزحروووووووووووووووور... يادي المصييييييييييييبة.........

يمسكها الزحرور.. ويلفها زي عقب السيجارة.....

وووووووووووو...........................

يتبع..................

تم تعديل 25 يوليو 2007 بواسطة شهد

[shahd]

الحلقة الخامسة عشرة

اميباتي انتاميباتي زحاريري زحروراتي أسعد الله أوقاتكم بكل خير معكم انتاميبا كولاي للتعليق على أحداث المباراة..

اللقاء الأسطوري ..

اللقاء الرهيب ..

تابع وشوف .. لقاء المستنقعات .. والمعاميع.. لقاء الأميبات و الأنتاميبات ...........

بدأت المبارة يدخل فريق الأنتميبات بزيه الأصفر المقلم ببرتقالي ..

فريق الأميبات بزيه الكروهات اخضر في موف ..

وفي مقاعد كبار الزوار يجلس الزحرور الأكبر.. بكل حقد والشر بينط من عنيه لافف االأنتاميبا الهربانة.. زي ورقة السيجارة .. وياعيني مش عارفة تفلفص ..

الكورة مع كابتن الأنتاميبات.. ومن الكابتن للرايق ويرقص ...... ويدي الكورة بكعبة .. للصاروخ .. ومن الصاروخ للبدلوزر .. ويشووووووووووط ..تخبط في وش حارس مرمى

الأميبات .. تكسرله مناخيره ..

نشوف الحكم حيقول ايه ... هاااااااا .. حتتحسب جول ... ولا.. ولا .. ولاااااا

الحكم يحسبها .. واااااااااااااااااااو ..... وجوووووووووووووووون

جووووووووووووووووون ...

جووووووووووووون

الهدفـــــــــــــــــ الأول لفريق الأنتاميبات

سلامات

سلاماااااااات .. .. سلامة مناخيرك ايها الحارس الهمام ....

فريق الأسعاف يدخل .. يلف مناخير حارس مرمى الأميبات بلفة شاش .. ماركة بركتكو..

تستمر المبارة الكورة مع فريق الأميبات..

يااميبا يا خطييييييرة .....للسريع في الشمال ..... وبيرفع عرضياااااااااا ....وجون .....ياسلااااااااااااااااااااام ............ عليك .... وياسلااااااااااااام .. وسلامين وحتة.. ياولـــــــــــــــــــد ..... ...

ويسجل السريع هدف التعادل ...

ترجع الكورة لفريق الأنتاميبات.. الرهيب ... للرايق .. الرايق للبدلوز .. ياخدها السريع.. جون .. يا سريع.. يلا يا بلدوزر.. وجــــــــــــ .. ابااااااااااااااااا... ويمسكها حارس مرمى الأميبات

وبرافوا .. برافوا ايها الحارس الرهيب .. صاحب المناخير العجيبة

رهيب والله رهيب..

في مدرج كبار الزوار

رئيس نادي الأميبات.. بيرقص ويغني.. ينصر دينك .. يااميبااااااااااااااا..

الزحرور .. دمه بيفور .. يضغط على الهربانة بين صوابعه.. يعصرها .. زمارة رقبتها حتطلع في اديه .. .

الكورة مع فريق الأميبات ..

وياسلام.. ياسلام.. دي الأميبا ما فيش كلام.. ويلا .. يلا .. ملك الأميبات

للمايسترو.. المايسترو سيمفونيه كوريه.. وهبا.. هبا.. وحلوووووووووووووووة.. وجوووووووووون................

ويصفر الحكم معلناً نهاية المبارة بفوز فريق الأميبات .. على الأنتاميبات .. هدفين لهدف

بروافوا .. الأميبات.. هادر لك الأنتاميبات

الجماهير .. تستعد للخروج .. الأستاد .. زحمة.... زحمة يادنيا زحمة..

كولاي يستعد لتنظيم عملية الأخراج.. وبجانبه نائب نادي الزحارير.. والأميبات

كولاي: يلا يااميبات انتشروا عشان ينتج عن تأكسد البروتينات مواد مختلفة سائلة يتخلص منها جسمكم

نائب الزحارير: عندكم في الأندوبلازم من جمب الجهه اللي ورا اتجاه الحركه في تجويف مائي كبير اسمه التجويف المنقبض

اميبا غلسه: واسمه المنقبض ليه لا مؤاخذه؟؟

كولاي: عشان بينقبض في فترات منتظمه فيرمي محتوياته لبرا .. زي ما ححدفك لبره كده.. تختفي وترجعي شويه شوية.. بتجميع قطرات صغيرة من الميه.. لحد ما توصلي لنهاية حجمك..

نائب نادي الزحارير: عمل الفجوة المنقبضة فيكم يا اميبات زي شغل مضخة في سفينة مخرومة

كولاي : المضخة تتشتغل فيها باستمرار بالانتشار بسبب شدة تركيزها عن الميه المحيط بيها

نائب نادي الزحارير: ويتكون فيكم يا اميبات ميه زايدة عن ناتج التنفس أو يدخلكم مع الأكل اللي بتطفحوه.

كولاي: وعشان كده الوظيفة الرئيسية للفجوة المنقبضة هو تنظيم الميه جوا الجسم

نائب رئيس الزحارير: ويشتغل بشكل ثانوي ويطرد البولينا وثاني أكسيد الكربون.

اميبا عامله فيها زكيه: ياسلاااااااام وايه اللي يثبت ان وظيفة التجويف المنقبض تنظميه؟؟

كولاي: عدم وجود تجويف منقبض في الأنواع البحرية أو المتطفلةفالميه مش بتدخل للأنواع دي من الوسط المحيط بها، يافالحة

وهكذا يخرج فريق الأميبات مروفوع الرأس ..

وفريق الأنتاميبات قفاه يقمر عيش...

الزحرور الأكبر .. مشجع الأنتاميبات.. يجر اذيال الخيبة.. والهربانة لسه بين صوابعه.. يطلع

الولاعه من جيبة.... حيولع الهربانة .. تتلسع...ها ....لألأ .. موووش ممكن ..

موستحييييييييييييييييل ...

حاسبي ياهربانة ..

حاسبي..

حاااااااااااااسبي......

يبتع.....

تم تعديل 25 يوليو 2007 بواسطة شهد

[Ahmad Farahat]

خيال رائع وغير محدود

يستحق كل الإحترام والتقدير

[shahd]

خيال رائع وغير محدود

يستحق كل الإحترام والتقدير

اشكرك ارسين فمرورك هو الأروع .. لك خالص احترامي

[kokomen]

الأخت العزيزة : شهد هانم

بعد طول انقطاع عن المحاورات ... وحشتني قصص الأميبات الجميلات

فعدنا الي قصصك الجميلة ... الي المبدعة شهد

في انتظار المزيد من ابداعاتك في كل المجالات

مع خالص تحياتي القلبية

:closedeyes: :blink:

[shahd]

الأخت العزيزة : شهد هانم

بعد طول انقطاع عن المحاورات ... وحشتني قصص الأميبات الجميلات

فعدنا الي قصصك الجميلة ... الي المبدعة شهد

في انتظار المزيد من ابداعاتك في كل المجالات

مع خالص تحياتي القلبية

استاذ ابو احمد اشكرك على كلماتك الطيبة والتي تسعدني دائما.. مرحبا بأطلالتك الراقيه

[shahd]

الحلقة السادسة عشرة

المكان: شارع عمومي.....

الزمان: الساعة 2 الظهر

المنظر : عربيات وباصات فيها اميبات وانتاميبات .. غير اللي ماشية على رجليها.... منهم تلاميذ خارجين من مدارس.. ومن الجامعات.. واميبات عجوزة ماسكة اكياس خضار.. واللي حاضنة عيل ...........

الحوار

اميبا تلميذة في ابتدائي: مامي هيا الدنيا اتزحمت فجأة كده ليه؟؟

اميبا من المرور:عقبال عندك يانونو في اميبا وصلت لنهاية حجمها فبتتكاثر بانقسام ثنائي و النوع ده بسيط من الانقسام غير المباشر فاالنواة بتتخنق وتنقسم لنواتين ،

اميبا شايلة عيل : وبعد انقسام النواة بيحصل اختناق السيتوبلازم والحيوان ينقسم وبيقى حيوانين والعملية دي مش بتاخد اكثر من ساعة، وينمو كل من نص إلى الحجم الأصلي.

اميبا مطربة: يووووووووووة وحنفضل وافقين في الزحمة دي ساعه بحالها .. انا ورايا فرح .. عايزة اروح للكوافير

اميبا بتبيع خضار: كوافير ايه يا ام كوافير دي مادة الاميبا مش بتخلص لأنها بتتنقل للحيوانين الناتجين من الانقسام. فكل اميبا موجودة دلوقتي بتحتوي جزء من الاميبا الأولى وتستمر في الانقسام طول ما الظروف مناسبة ليها.

اميبا شحاته : طب يا اختي لو الظروف صعبة ومافيش اكل تعمل ايه؟؟

اميبا رقيقة: بصي يا تنت لو في جفاف والمم قليل ..

في الوقت ده الأميبا تتكور وتفرز حوالين نفسها غلاف واقي ليه ثلاث طبقات بيسموه الحوصلة ثلاثية الطبقات تفضل قاعده جواها وتنخفض سرعة العمليات الحيوية فيها إلى اقل ما يمكن

اميبا شحاته: ياحلاوة ياولاد طب لو الظروف اتغيرت والقاشيه بقت معدن ؟؟

اميبا زهقانة: اففففف ساعتها تذوب الحوصلة وتخرج الاميبا لاستئناف حياتها الأولى.

اميبا جامعيه : وأحيانا بيحصل انقسام كثير جوا الحوصلة وتختلف دقائق الانقسام في الأنواع المختلفة وغالبا تنقسم النواة انقسام مباشرا لعدد كبير من الانوية تتجه ناحية سطح السيتوبلازم.

اميبا اميه: ده العلام حلو يا ولاد.... هه وبعدين؟؟

اميبا في محو الأميه : ما انا قايلالك تعالي معانا نحو الأميه اتريقتي علينا ..

اميبا اميه: ابدا يااختي بس جوزي منه لله ..قالي يا انا يا نحو الأميه.. هيييييييه.. ماعلينا .. اتعلمتوا ايه هناك..

اميبا في محو الأميه الأبلة قالتلنا انه بييحاط كل منها بجزء من

السيتوبلازم و تذوب الحوصلة وتطلع العيال الصغيرة على شكل اميبيات صغنونة ليها رجلين كذابة مدب دبة اسمها (pseudo podiospore)

اميبا شايلة عيل على كتفها وحواليها كوم عيال: وفي أنواع مننا بيكون الأقتران باندماج فردين مع بعض وده نوع من التكاثر الجنسي.

اميبا مفجوعة: لا وايه والمعروف عننا بالرغم ان ما عندناش اعضاء حس لكن بنستجيب للمؤثرات المختلفة فنعرف نميز بين الأكل المناسب لينا واللي مش مناسب

اميبا هادية: ولو حد دوشنا وفضل يدوشنا باستمرار نتكور و ونقعد في سكون

وتفضى الشوارع وتروح كل اميبا لناحيه ..

عند الكوافير

الأميبا المطربة:: ياختي خفي ايدك شوية.. انا ورايا فرح اميبات مهمين

الأميبا الكوافيره:.. اميبات مين دول يا اختي.. بيوزعوا لحمة.. ولا فرح قرديحي زي الأفراح اللي بتحييها

الأميبا المطربة: لاااااااااا دول اميبات هاي قووووووووي

في الفرح

تدخل المطربة هيا وفرقتها وتبتدي تزف العروسة

ياقلب امك وابوكي

أيـــــــــــوة

من البركة جابوكي

أيــــــــــــــوة

حموكي وبخروكي

أيــــــــــــوة

لعريسك زفوكي

لولوولولولولولولوليلولوولولولولوولولولولولولولولوولي

اهل الفرح: ايه الأغاني السكه.... ويضربوا المطربة والفرقة ويرموهم برا في الشارع .........

في الشارع....

الأميبا المطربة: منكم لله .. ااااااااه يارجلي.. أااااااااه ياني.. ااااااااااه ياتسريحة شعري اللي دفعت فيها الشيئ الفولاني

في السبوع.....

الأميبا اللي معاها كوم عيال .. تروح سبوع بنت صاحبتها....

ياالف نهار ابيض

ياالف مبروك ..

صبرتي و نولتي يا اختي

عقبال ما تخاويها...

الأميبا الأم: لألألأ كفاية عليا دي.. هو انا قادرة اكلها .. اما اجيب غيرها

الأميبا اللي معاها كوم عيال: يا اختي هو في احلى من العيال

يلا ياولاد باركو لخالتكم وبوسوو النونو

ويخشوا الأميبات يباركو ويبوسوا النونو .. نفر نفر.. وياعيني الواد قرب يفطس .. تروح امه تبعدهم عنه..

وتخليهم يروحوا مع الأميبات الصغيرين يغنوا اغاني السبوع

يارب ياربنا

تكبر وتبقى قدنا

تلعب في البركة زينا

وتبقى اشطر مننا

في الشارع....

الأميبا الشحاته وافقة تشحت في الشارع

حسنه قليلة تمنع بلاوي كثيرة.. وهنيالك يا فاعل الخير

تعدي دورية .. تقبض عليها....

الأميبا الشحاته: ايه .. هو في ايه.. ماسكني ليه؟؟

اميبا من الدوريه: مكافحة تسول يا ماما.. امشي انجري قدامي

الأميبا الشحاته: مكافحة مين .. يادي المصيبة.. ياوقعتك السووووووده.. الحقوني يااميبااااااااات..

تلاقي اميبا تطبطب عليها

بس يا اختي.. بس ياماما .. ما منوش فايدة اللي انت بتعمليه ده..

الأميبا الشحاته: سيبني في حالي .. ما حدش عالم بالي جرااالي...

اميبا : روقي يا اختي روقي.. غمة وتنزاح.. انا حهربك....

الأميبا الشحاته: تهربيني!! انت مين!!

اميبا: انا الهربانة.. هربت من بق السبع .. قبل ما يولع فيا ..

الأميبا الشحاته: هو انت الــــــــي.......

الأميبا الهربانة: ايوه انااااا.. اسكتي حتفضحينا...

الأميبا الشحاته: امال ايه اللي جابك هنا؟؟

الأميبا الهربانة: دي حكاية طويلة احكيهالك بعدين.. نامي دلوقتي و الصباح رباح

يتبع.............

تم تعديل 20 أغسطس 2007 بواسطة شهد

[kokomen]

الأخت العزيزة : شهد

إبداع جميل لموضوع الأميبا وأخواتها

سيناريو جميل من المبدعة ذات الخيال الواسع شهد هانم

تعلمنا طرق تكاثر الأميبا بالإنقسام الثنائي البسيط وعملية التحوصل للحماية

في أسلوب رائع .. سلمت أناملك

:lol: :lol:

[shahd]

الأخت العزيزة : شهد

إبداع جميل لموضوع الأميبا وأخواتها

سيناريو جميل من المبدعة ذات الخيال الواسع شهد هانم

تعلمنا طرق تكاثر الأميبا بالإنقسام الثنائي البسيط وعملية التحوصل للحماية

في أسلوب رائع .. سلمت أناملك

:lol: :lol:

استاذي الفاضل ابو احمد ممتنة جدا لتشجيعك المستمر ومتابعتك الجميلة وردودك القيمة .. وانتظرونا في الحلقة القادمة :)

تم تعديل 7 أغسطس 2007 بواسطة شهد

[Diab]

أولا مساكي ورد يا شهد

ثانيا انا مبكرهش حاجة في الدنيا قد الأحياء الأميبا والحاجات دي ( بجد )

انا كنت في ثانوي علمي علوم واول ماشفت كتاب الأحياء direct حولت علمي رياضة قال أحياء قال

لا يا عم خمس جذر تسعة أرحم

فقط تسجيل متابعة

:lol:

تم تعديل 7 أغسطس 2007 بواسطة Diab

[shahd]

أولا مساكي ورد يا شهد

ثانيا انا مبكرهش حاجة في الدنيا قد الأحياء الأميبا والحاجات دي ( بجد )

انا كنت في ثانوي علمي علوم واول ماشفت كتاب الأحياء direct حولت علمي رياضة قال أحياء قال

لا يا عم خمس جذر تسعة أرحم

فقط تسجيل متابعة

:lol:

مساء الفل يادياب..

وتكرهها ليه بس دي الأميبا حبوبة

انا ياسيدي خدتها من قاصرها ودخلت ادبي ....

بس ساعات الواحد بيحب يقرا ويفهم حاجات مالوش علاقة بيها من باب العلم بالشيئ :) .....

منوووووور يادياب.....والف شكر للمتابعة

عقلي المستخبي

جذر ايييييييييه اللي انت جاااااااااي تقول عليه.... تيرا رااااا رااااا بيني وبينك انا اخري تفاحيه ومانجايا يبقوا كام:lol:

تم تعديل 7 أغسطس 2007 بواسطة شهد

[shahd]

الحلقة السابعة عشرة

المكان : سجن الأميبات والأنتاميبات

الزمان: الساعة العاشرة صباحا

الأشخاص:(1) المساجين الأنتاميبا الهربانة.. الأميبا الشحاته.. الأنتاميبا النشالة,

(2) ضباط وعساكر:أميبا السجانة, الأميبا الضابط

الحوار: الأنتامبيا السجانة:تفتح باب الزنزانة وبوش مكشر وصوت خشن

خشي يامذنبة ...

الأنتاميبا النشالة: مساء الخير يامعشر المتشردات

الأنتاميبا الشحاته: مساء العسل ياهندسة...

الأنتاميبا الهربانة: هيا الأخت هندسة مدني ولا معماري ؟؟

الأنتاميبا النشالة: لا محافظي هع ..هع.. هيا الأمورة جديده هنا؟!

الأنتاميبا الشحاته: بقالها حوالي اسبوع .. وكل ما اقلها احكيلي .. تقولي حكايتي طويلة ... قال يعني الف ليلة وليلة

الأنتاميبا النشالة: استني انت بس ياشحاته.. هيا حتقلي انا .. مش كده ياجميل!!

الأنتاميبا الهربانه: اصل الموضوع بصراحه ..

النشالة: انت حتزعليني منك ؟؟؟

الهربانة: طب فيكي من يكتم السر!!

النشالة: في بير .. قولي وخلصيني...

الهربانة: انا اصلي هربت من بق السبع

النشالة: سبع ولاضبع .. احنا حنستعبط... حتكلمي ولا اهبدك قلم اطيرلك طقم سنانك؟؟

الهربانة: خلاص حقول وامري لله.. انا هربانه من الزحرور... فما لقيتش مكان امن من ده استخبى فيه...

النشالة: وبيجري وراكي ليه؟؟

الهربانة: اصلي هربت من امي واخواتي من مده كده .. وهو راسه والف سيف ليرجعني للبيت..

النشالة: وتهربي ليه يعني .. هو حد لاقي بيت يتاوى فيه.. لما سيادتك تهربي؟؟

الهربانة: ما هو اصل بيتنا مش حلو.. وانا مش بحبه

النشالة: ياخي حبك برص .. وعاجباكي نومت البورش قوي يافالحة؟؟؟

الهربانة: ما انا كنت ناوية اسافر الساحل الشمالي .. استجم هناك .. لولا الزحرور ورايا ورايا...

النشالة: بقلك ايه يا بت... بلاش فشر .. خشي في الموضوع يطلع مين الزحرور ده...

الهربانة : الزحرور ده ياستي بيعيش امعاء الإنسان وحجمه اكبر وانشط وبياكل الغشاء المخاطي للأمعاء

بأنه يفرز إنزيم يروح مذوبه وكمان بيتغذى على الكرات الدموية اللي بتنزف منه وتسبب مرض الدسنطارية وتمشي في الدم إلى الكبد وتعمل خراجات فيه.

النشالة: وبيعمل ايه المفتري ده كمان

الهربانة: العدوى بتتنقل عن طريق الحويصلات عشان الحيوان النشط مش ممكن يعيش برا الجسم.

النشالة: لحظة شوية بس.. هاتي الشاي يابت خلينا نفهم .. ابن الزحارير ده عنده نوايا ؟؟

الهربانة:ايوة الانتاميبا المتحوصلة عندها أربع انويه في وسطها أجسام بروتينية اسمها الأجسام الكرومانيدية.

النشالة: كرومو مين ؟؟؟ ياحلاوة.. ده الزحرور طلع حكاية.. كملي ..

الهربانة: ولو اكل البني ادم اتلوث بالاكياس دي اللي هيا الحويصلات

ووصلت للقناة الهضمية .. تصحا من نومها في الأمعاء الرفيعة وتطلع الحويصلات وتروح للأعور وتاكل البكتريا

النشالة: ده طلع طفس بشكل...

الهربانة: انت لسه شفتي حاجة .... وتنقسم لأربع حيوانات عبارة عن نماذج صغنونة تعيش في الأمعاء الغليظة تتغذى بالسوائل والبكتيريا

النشالة: طب والمفتري ده ما عندوش عيال؟؟

الهربانة: اه ماهو التكاثر بيحصل بالانقسام الثنائي و تكون أكياس تطلع مع البراز بس الأنتاميبات الصغنونة دي مش بتجيب دسنطارية عشان مش بتتغذى على الأنسجة.

النشالة: امال بتعمل ايه بسلامتها؟؟

الهربانة: النماذج الصغيرة دي بتهاجم الغشاء المخاطي للأمعاء لو ضعفت حيويته . وتفرز مادة تذوبه وتعمل قروح دسنطارية

النشالة: وايه اللي بتنيله الدسونطاريه .. المهببة دي؟؟

الهربانة: تهجم على جدر الأوعية الدموية ويكبر حجم الحيوانات ويتغير شكلها وتتحول لنماذج كبيرة وفي الحالة دي تظهر أعراض الدسنطارية

النشالة: وايه هيا الأعراض دي؟؟

الهربانة: إسهال مع دم في البراز.

النشالة: بففففففففففف.. (تطلع الشاي اللي شربته في وش الأنتاميبا الهربانة) جتك القرف ..

الهربانة: مش انت اللي قلتي احكي.. استحملي..

وازيدك من الشعر بيت .. النماذج الكبيرة ممكن تخترق جدار الأمعاء وتسبب التهاب في البريتون يخلي البني ادم يطب ساكت بس ده نادر...

النشالة: وكمان قتالة قتلى.. وسيبنها طايحة في مخاليق ربنا..

الهربانة:اسكتي اسكتي دي كمان ممكن توصل للكبد وتسبب خراجات خطرة على حياة المريض لو انفجرت.

النشالة: هيا بتفرقع كمان.. ياديى النصيبة.. انبطحوا يااميباااااات

الهربانة: انت حتفضلي تقاطعيني كثير مش حكمل.. هه

النشالة: هو بمزاجك .. كملي ياماما انت لسه ماشفتيش الوش التاني...

الهربانة: حاضر انا اللي جبته لنفسي ..

الأنتاميبا مش بتتكيس وهي في الأنسجة لكن بتتكيس في تجويف الأمعاء والنواة عندها بتتقسم لأربع انوية وهو ده الطور المعدي الذي اللي بتبدأ بيه حياتها. هيا دي كل الحكايه....

وفجأة السجانة تفتح الباب ومعاها الضابط.. والشحاته مش واخده بالها

الشحاته ماشية وسط المساجين و ماسكة عكاز وبتشحت

الضابط: انت مش ناوية تبطلي الداء اللي فيكي ده.. انفرادي

الشحاته : بلاش انفرادي يا باشا ابوس ايدك

الضابط: وانت يا نشالة .. عارفة نشلتي مين المرة دي؟؟

النشالة: مش واخده بالي يا باشا..

الضابط: انا اخليكي تاخدي بالك.. بتسرقي جماعتي!!!

يا سجااااانة..

السجانة: تمام يا افندم.. انا عايزك تنسيها النشل خااااالص ..

النشالة: واكل منين لما انسى النشل .. نسيني اسمي .. بس النشل لأ.. حرااااااااام عليكوووووووو

الهربانة .. لازقة في الحيطة وبتترعش من الخوف

الضابط: ودي مالها دي ؟؟ عيانة ... جيبولها دكتور......

الهربانة: دكتور.. لأ.. مش بحب الحقن..ععععععععععععععععع

وتتحول الهربانة لمستشفى السجن.........

يتبع.............

تم تعديل 20 أغسطس 2007 بواسطة شهد

[kokomen]

أولا مساكي ورد يا شهد

ثانيا انا مبكرهش حاجة في الدنيا قد الأحياء الأميبا والحاجات دي ( بجد )

انا كنت في ثانوي علمي علوم واول ماشفت كتاب الأحياء direct حولت علمي رياضة قال أحياء قال

لا يا عم خمس جذر تسعة أرحم

فقط تسجيل متابعة

مساء الفل يادياب..

وتكرهها ليه بس دي الأميبا حبوبة :P

انا ياسيدي خدتها من قاصرها ودخلت ادبي ....

بس ساعات الواحد بيحب يقرا ويفهم حاجات مالوش علاقة بيها من باب العلم بالشيئ :blink: .....

منوووووور يادياب.....والف شكر للمتابعة :)

عقلي المستخبي

جذر ايييييييييه اللي انت جاااااااااي تقول عليه.... تيرا رااااا رااااا بيني وبينك انا اخري تفاحيه ومانجايا يبقوا كام :ninja:

***************************************************************************

الأخ العزيز : دياب

مين قال أن الأحياء وحشه وليه بس بتكره العلم الجميل ده

ده ربنا سبحانه وتعالى خلق الكون كله وأساسه العلاقة بين الأحياء

جميل أننا ندرس علم الأحياء اللى فيه تشعبات كثيرة ياعم دياب

********************************************************************

الأخت العزيزة : شهد المبدعة

أولا : مبروك على النيولوك الجديد بس بنوته بتبكي برضه زي بعضه جميل وبلاش الوجه اللة بيخوف مع العيون دي

ثانيا : أيه موضوع تيته شهد ده وكمان سنة 1900 قبل الميلاد ده العصر الكربوني ولا الأردوفيشي ولا أيه ...؟؟

جميلة جدا الحلقة السابعة عشر للأميبات الجميلات وأفعالهم الجميلة

سلمت أناملك يا شهد هانم وفي إنتظار المزيد من إبداعاتك

:happy:

[shahd]

***************************************************************************

الأخ العزيز : دياب

مين قال أن الأحياء وحشه وليه بس بتكره العلم الجميل ده

ده ربنا سبحانه وتعالى خلق الكون كله وأساسه العلاقة بين الأحياء

جميل أننا ندرس علم الأحياء اللى فيه تشعبات كثيرة ياعم دياب

********************************************************************

الأخت العزيزة : شهد المبدعة

أولا : مبروك على النيولوك الجديد بس بنوته بتبكي برضه زي بعضه جميل وبلاش الوجه اللة بيخوف مع العيون دي

ثانيا : أيه موضوع تيته شهد ده وكمان سنة 1900 قبل الميلاد ده العصر الكربوني ولا الأردوفيشي ولا أيه ...؟؟

جميلة جدا الحلقة السابعة عشر للأميبات الجميلات وأفعالهم الجميلة

سلمت أناملك يا شهد هانم وفي إنتظار المزيد من إبداعاتك

:lol: ;)

الله يبارك فيك يااستاذ ابو احمد .. ونشيل الوجه اللي بيخوف حااااضر ..

موضوع تيتا شهد ده يا استاذنا .. اللقب اللي سميت بيه نفسي.. بما اني التيتا الروحيه مين ورحيه دي

اما العصر فممكن نطلق عليه العصر الشهدي :lol:

اشكرك على متابعتك المستمرة وتشجيعك الدائم.. ولك خالص تقديري واحترامي

تم تعديل 15 أغسطس 2007 بواسطة شهد

[Diab]

***************************************************************************

الأخ العزيز : دياب

مين قال أن الأحياء وحشه وليه بس بتكره العلم الجميل ده

ده ربنا سبحانه وتعالى خلق الكون كله وأساسه العلاقة بين الأحياء

جميل أننا ندرس علم الأحياء اللى فيه تشعبات كثيرة ياعم دياب

********************************************************************

الأخت العزيزة : شهد المبدعة

أولا : مبروك على النيولوك الجديد بس بنوته بتبكي برضه زي بعضه جميل وبلاش الوجه اللة بيخوف مع العيون دي

ثانيا : أيه موضوع تيته شهد ده وكمان سنة 1900 قبل الميلاد ده العصر الكربوني ولا الأردوفيشي ولا أيه ...؟؟

جميلة جدا الحلقة السابعة عشر للأميبات الجميلات وأفعالهم الجميلة

سلمت أناملك يا شهد هانم وفي إنتظار المزيد من إبداعاتك

:lol: ;)

الله يبارك فيك يااستاذ ابو احمد .. ونشيل الوجه اللي بيخوف حااااضر ..

موضوع تيتا شهد ده يا استاذنا .. اللقب اللي سميت بيه نفسي.. بما اني التيتا الروحيه من ورحيه دي

اما العصر فممكن نطلق عليه العصر الشهدي :lol:

اشكرك على متابعتك المستمرة وتشجيعك الدائم.. ولك خالص تقديري واحترامي

علي أساس أن مفيش حد بيدخل الموضوع غيرنا أحنا بس فبنحاول نرفع روحك المعنوية ولا أزاي

أنا بهزر يا تيتة