الغربه و الانتماء للوطن

[darlengs]

بما اني لسا جديده فلغربه في سؤال محيرني هل غربه الانسان ممكن تأثر علي حبه لبلده الام و انتمائه ليها 00 مش انا طبعا لاني اعشق بلدي فوق الوصف 00 لكن هؤلاءالابناء الاعزاء00اقصدعلي المدي الطويل 00 خصوصا لو كانو اطفال بيبدأو لسا حياتهم و يعرفو يعني اي حب الوطن 00 لو كل يوم بيحيو علم بلد تاني 00 و يبداو يكونوصداقات 00فضلا عن وجودهم مع بابا 00دا غير الفسح هنا و التجول فلمولات ( جمع مول ) 00و اكيد بنجيب كل الحاجات الحلوا الي الاطفال بيحتاجوها ( اصل يعني احنا مش جيبين الولاد نعذبهم ) و بشكل تلقائي الطفل هيحب البلد اللي جمعته بوالده و وفرت له كل وسائل الترفيه 00 بعد كل دا وبناء علي شخصيه الطفل تفتكرو ممكن يتأثر حبه لبلده الام و انتمائه ليها 00؟؟؟؟ و يكبر يحس انها هي غربته؟؟؟؟ و ان بلد الغربه هي بلده الاصلي؟؟ انا خيفا تقولو اه 00 ياريت حديطمني 00

[رمضان]

والله ده كله بيرجع لك انتي لو انتي زرعتي فيه حبه لبلده الام وعلمتيه معنى الوطنية الصحيح اعتقد مش هيكون فيه تأثير كبير

تم تعديل 21 أبريل 2007 بواسطة رمضان

[Ghost]

الاطفال بالفطرة تميل الي مصلحتهم الذاتية مش بيفكروا في حد تاني

ممكن تقول انانين , و بالتالي يحبوا البلاد الاخرى بما فيها من جمال الحياة ووسائل الترفية اكثر من بلدهم المقرف لامواخذة

[Gihan]

سؤال جميل يا darlengs

اعتقد ان ده بيتوقف على كذا عامل

1- سن الطفل لما سافر و المده اللى عاشها فى الغربه فلو الطفل سافر وهو صغير اوى 2-5 سنين وكبر بره مصر فانتماءه حيبقى اقل لمصر واكتر للبلد اللى عاش فيها وخصوصا لو الطفل والاهل مرتاحين فى البلد ه

اما لو الطفل كبر فى مصر وراح مدرسه وبقى له اصحاب قبل ما يسافر يبقى انتماءه لمصر حيبقى اقوى

2- تاثير الاب والام عليه ورايهم فى العيشه فى مصر وبره لان بالتاكيد الطفل ا للى اهله بيتكلموا عن مصر و الحاجات الحلوه فيها حينتمى لها اكتر من الطفل اللى اهله مش عايزين يرجعوا حتى اجازه غير بالعافيه

عموما الاهل اللى بيقرروا يسافروا مع اولادهم بره ويربوهم هناك لازم يتوقعوا انهم مش حيكبروا بنفس الانتماء لمصر زى الاطفال اللى اتربوا وكبروا فى مصر

[islamonline]

عزيزتي دارلنج

احب ارد عليك في سؤالك عن انتماء الطفل لوطنه الام من خلال تجربتي الشخصية فأنا ابنتي الكبرى لم تنزل مصر الا مرتين مرة و هي عندها سنة و قعدنا شهرين و مرة تانية و هي عندها 3 سنوات و قعدنا اربع اسابيع فقط و من يوم ما جينا معداش عليها يوم الا و سألت احنا رايحين مصر كل ما تشوفنا بنلبس و خارجين تسألنا هو احنا رايحين مصر و بتزعل اوي لما بنقولها لا و هي ارتبطت في خلال الاربع اسابيع دول بكل اهلنا في مصر سواء من اهلي او من اهل زوجي و هي دلوقتي قاعدة على احر من الجمر و مستنية علشان تنزل مصر بسرعة و اتفقت معانا ان احنا نسيبها في مصر .

ادي تجربتي معاها و اتمنى ان كل طفل مولود في الغربة يكون انتمائه لبلده لأننا اكيد راجعين راجعين .

اتمنى لك كل الخير في غربتك و مادام احنا مع بعض في محاورات المصريين فمبقاش فيه غربة و اكيد كلنا بنهونها على بعض .

انا فعلاً هو ده شعوري منساعة ما اشتركت في المنتدي و كفاية عليا اني اقرا رسايلكم و بحس اني قاعدة وسط اهلي و اخواتي .

[darlengs]

اشكر كل الاخوه و الاخوات الي اهتمو بالرد عليا *الاخ رمضان انا بحاول اعمل كل اللي اقدر عليه و بربيهم علي اننا مسبناش بلدنا لانها وحشه لكن ظروف شغل بابا و اننا هنرجع في اقرب وقت و ربنا يستر *والله يا Gehan انا عندي كل الأعمار الكبار(12 و 8 سنوات) فعلا مرتبطين بالاهل و الاصحاب و الجيران و ذكرياتهم الحلوه و ديما بفكر الصغيره ( 3 سنوات ) ببيتنا و طنط فلانه و جدو و خالو واصحابها وديما بفكرالاكبرشويا عن جمال بلدنا و جوهاوروعتها و عظمه تاريخها في حد ذاته و مصره اني أأكدلهم ان بلدنا غنيه مش فقيره ابدا 00و كشئ رمزي معلقالهم علم مصر كنوع من التعود عليه 00 صدقيني يا islamonlineكلامك و تجربتك طمنتي كتير و فعلا من يوم معرفت المنتدي حسيت اني لسا فمصر يعني معدش في وحده واني بشوف فيكم كلكو اهلي و اصحابي *خوفتني و الله ياGhostلاني فعلا ساعات بحس باللي انت بتقوله خصوصا اني شفت نماذج واقعيه لناس كبار اتربو بلخارج و كانو يعلنوها صراحه اني لا انتمي لمصر 00 شفت منها اي 00مليش ذكريات فيها 00 كل دراستي و اصحابي هناك 00 و للأسف لاكان اهلهم يهتمو يعرفوهم حاجه عن بلدهم و لا تاريخها و لا اي شئ 00 و مكنت بحس غير انهم قرفانين ديما000