عكاويك وديتني في داهية يا ريس

[se_ Elsyed]

أخوكم سين سين من أكتر الناس اللي إتبهدلوا أيام القمة العربية وأنعكست أثار قرارتها المصيرية على حياته وكنت هاتقصف عُمري ...

يوم الخميس الماضي جيت أروح بيتنا زي ما بأعمل كل يوم وكأي إنسان عادي لقيت الشوارع مقفلة حواليه .. قلت أركن العربية بعيد وأخد لي بتاع إتنين كيلو مشي ... كان غيرك أشطر .. إرجع كما كنت .. فضلت محبوس في المكتب من الساعة 2 الظهر حيث إن الخميس نص دوام .. لحد الساعة 6 المغرب لحد ما فتحوا الشوارع

المهم الساعة 3 عصافير بطني صوصوت إتصلت بأخويا وقلت له

تعالى نتغدى .. لإن الطرق المتجهة إلى الجنوب مفتوحة وبالتالي 5 دقايق أكون عنده ... وطقت في دماغي إني أعيش في دور الرئيس القائد محمد حسني مبارك أدام الله ظله وخدنا إحنا .. فقلت له تعرف مطعم بيعمل عكاوي بس يكون كويس .. قالي غالي والطلب رخيص .. وأنا أساساً والله العظيم ماعرف يعني إيه عكاوي بس عرفتها من موضوع أ عادل أبو زيد من خلال الحديث الصحفي بتاع طباخ السيد القائد اللي قال إن الريس بيتعشا عكاوي كل يوم ... فقلت إشمعنى الريس ياكل عكاوي وأنا لأ ... وقلت كمان يمكن لما أكل عكاوي ربنا ينفخ في صورتي وأبقى سكرتير أول وزارة التعليم حتى أو رئيس مجلس محلي مدينة كفر لاشيخ ..

روحنا المطعم وطلبت عكاوي والحمد لله أكلنا ورجعت أنا لوحدي عالمكتب حبست بشاي على أساس غن العكاوي ما تهربش .. ولعبت شويه عالنت وفين وفين لما روحت .. روحت البيت وأنا مشتاق لأولادي اللي ما شوفتهمش من صباحيه ربنا والقمة فرقت بيننا كما تم التفريق بين الشعوب العربية ... وعينك ما تشوف إلا الضلمة .. مفعول العكاوي إشتغل واخوكم كان بيموت لإن العضمة كبرت وما بقتش حِمل الحاجات دي ويادوب باكل الزبادي منزوع الدسم وأنام ... وإذ بمراتي تتصل بأخويا الصغير وتصرخ فيه وتقول له : إنت عملت إيه في الراجل حرام عليك ده احنا ملصمينه ؟ قال لها : والله أبداً ده أنا أخدته المنفوحه وأكلنا .. مارضيش يقولها أكلنا إيه عشان ما تضربوش لإنها برضوا عمرها ما سمعت عن العكاوي .. وكبيرنا قوي بناكل الكوارع في الحُسين لما بننزل مصر ... المهم جه سريعاً وأخدني عالمستشفى وعملو اللازم لإزالة أثار عدوان العكاوي ..

وقلت

توبه إن عنت أروح المنفوحة ..

وتوبه إن عنت اعمل فيها رئيس

أتاري الرئاسة برضوا صعبه ماهياش بالسهولة اللي إحنا متصورنها يا رجاله

[nash]

الف سلامه يا سي السيد يا خويا..... wst::

والله أنا كمان ماكنت أعرف يعني ايه عكاوي......

كنت فاكراها يعني..........هي الكوارع..... :P

وبعدين عرفتها....وبصراحه .....طب إزاي مش تسأل وتعرف...وكده؟؟؟

بس الحقيقه ...أنا كنت سعيده بالقمه العربيه....جدا......أصل كلنا ...كلنا أخذنا الأجازة وهيصنا :wub:

عقبال كده مايفرحونا بحاجه محرزة (علي رأي اخوانا ) حمدلله علي السلامه مرة تانيه

إن شالله هوة مش أنت ha)

[kokomen]

قلبي معاك يا سي السيد

لما أنت مش قد العكاوي ليه بتأكلها يا سي السيد .. عايز تعملي فيها ريس طيب دوق بقى طعم العكاوي

ولا أنت فاكر المريسة سهلة .. علشان متعملش فيها ريس بعد كده .. وياويلك لو فكرت تنزل الانتخابات الرئاسية حتبقى في خبر كان .... أبو أحمد أسكندرية :lol: :lol: :lol: :rolleyes: :unsure:

[mohamed_mido87]

بسم الله الرحمن الرحيم

الف سلامه يا سى السيد باشا بس العيب عليك يعنى يوم ما تحب تقلد ملقتش غير الزعيم القائد محمد حسنى مبارك

وتقلده الراجل ده ليه ظروفه الخاصه وبعدين عكاوى ايه تاثر فيه يا سيدى احنا غلابه وكل واحد على قد معدته وهو بالصلاه على النبى

معدته حماله قسيه وبتشيل

الف سلامه مره تانيه

احلى سلام

[فريح]

ألف ألف سلامه يا سى السيد أحنا محتاجينك دايمآ تكون فى أحسن حالاتك

أنا مداخلاتى قليله ولكن متابع جيد للمنتدى وخاصة كتاباتك منذ فتره طويله

وألف سلام

[Ahmad Farahat]

حبيب قلبي س.س............

إنت ايه اللي خلاك تصدق إن الرئيس أصلا بياكل عكاوي...........

وكمان في مطعم.........

الريس كل يوم بيعدي على (مسمط تخة) بياكل فيه لحمة راس...........

وشوية ريش ف رغيف

وبيحلي بدوم ونبق...........

واضح إن طبيب الريس كان سكران........

ربنا يرحم

[أبو زياد]

قال لها : والله أبداً ده أنا أخدته المنفوحه وأكلنا .. ..

وقلت

توبه إن عنت أروح النفوحة ..

طب والله العظيم واهو حلفان وقسم غليظ .. المرة اللي جايه يا موديست لأخدك البطحاء والمنفوحاء ... ويا سلام لو خالتي ام موديست دعيه لك وكنا يوم خميس او فرايدي .. عييييييييييييييش يا ريس .. حاجة أورينتال خالص ...

سمعت يا موديست ؟؟؟ :)

[Modest]

قال لها : والله أبداً ده أنا أخدته المنفوحه وأكلنا .. ..

وقلت

توبه إن عنت أروح النفوحة ..

طب والله العظيم واهو حلفان وقسم غليظ .. المرة اللي جايه يا موديست لأخدك البطحاء والمنفوحاء ... ويا سلام لو خالتي ام موديست دعيه لك وكنا يوم خميس او فرايدي .. عييييييييييييييش يا ريس .. حاجة أورينتال خالص ...

سمعت يا موديست ؟؟؟ wst::

سمعت يا ابو زياد wst::

و شكلي كده يا إما هالغي السفر علشان الحلفان ده يا إما هاسافر من غير ما اقول لسين سين .. أنا معدتي ماتستحملش أكل رؤساء يا عم :)

[أبو زياد]

سمعت يا ابو زياد wst::

و شكلي كده يا إما هالغي السفر علشان الحلفان ده يا إما هاسافر من غير ما اقول لسين سين .. أنا معدتي ماتستحملش أكل رؤساء يا عم :)

ماتخافش يا موديست

هو مش حيخرج مالبيت أساسا

وإنت فى حمايتى إن شاء الله

فى انتظارك

[kokowawa1979]

مين : الزعيم س.س كان هايروح في دوكة علشان أكلة عكاوي :) ألف سلامة عليك يازعيم .

ياعم س.س معدتك ماتستحملش العكاوي خاصة أما تكون معمولة في الطاجن عند العهد الجديد في الحسين - لإن معدتك مش زي معدة الريس اللي سايعة البلد كلها !!

وبعدين العكاوي أنواع ياسي السيد - نوع من سلسلة الضهر - والنوع التاني ولامؤاخذة من ديل الدبيحة !! إنت أكلت أي نوع علشان اقدر احكم تتعب من بعدها واللا لأ؟

جالك كلامي يابو محمد على شباب الأيام دي أهو س.س عنده 35 سنه و ماستحملش أكلة عكاوي wst::

[se_ Elsyed]

زملائي الأعزاء

لم أكن اعلم بإن مجرد أكلة عكاوي ستقوم بعمل كل هذا اللغط والقلق في البلد مما يحيد بقطار التنمية عن طريقة ..

وإن شالله كنت اتشك في معاميعي قبل ما أكلها وأتسبب في كل ذلك ...

ولكن بعد أن تعافيت من تلك الوعكة - حلوه الوعكة دي .. أصل الرئيس من دول بيبقى عندو القطط الفطسة ويقولك وعكة ...- قعدت أفكر وقلت إذا كنت إنت يا سين سين يا مواطن يا فسل حاولت تاكل عكاوي رئاسية وحصلك كده أومال بقى أيمن نور ونعمان جمعه يبقى حلال اللي حصل فيهم عشان كانوا بينازعوا الكبير عالكرسي

ولإني مواطن إيجابي وفي عز شبابي وبأؤمن بالأفكار الوحدوية التقدمية التعبوية التي ينادي بها أ عادل ابو زيد عندما قال جُملته الشهيرة " مواطنون لا متفرجون " فقلت لازم أبعت لاخويا وحبيبي ورئيسي ورئيس اللي جابوني طويل العُمر جمال بك ..وأقترح عليه بعض مواد تُضاف للدستور بحيث نؤمن الحماية اللازمة والقُدسية الحاتمة للعكاوي ..

وصفتكو أهلي وحابيبي فقلت أعرض عليكو بعض مسودات للمواد الجديدة في الدستور والي سأقترحها على جمال ليلة جوازة ....

مادة واحد

" الإسلام الدين الرسمي للدولة "

مادة إتنين

" العكاوي هي الاكلة الرئاسية الاولى في الدولة " ( إشمعنى الحاكم بأمر الله اللي حرم الملوخية على الشعب لإنه كان بيحب الطشة .

مادة تلاتة

" يُمنع منعاً باتاً تداول العكاوي بين عامة الشعب وخاصته .. وأي مواطن يُظبط بيضرب عكاوي شواء ف مسمط أو في بيته او تحت بير السلم يُعاقب بـ 100 جلده أول مرة .. وبالسجن 3 سنوات مع 100 جلدة تاني مرة .. وبالإعدام نفخاً تالت مرة "

مادة أربعة

: يتم وضع كايمرات مراقبة في جميع محلات الجزارة وجميع المسماط لضمان الإلتزام بتنفيذ القرار "

مادة خمسة وخميسة

" يتم وضع سيريال نمبر لديل كل عجل وكل جاموسة حلوب لضمان السيطرة على الاصدر والوارد من الديول اللي هي المادة الخام للعكاوي "

مادة ستة

" يُكلف وزير المالية ووزير الإقتصاد ووزير التخطيط بوضع خطة خمسية لتحقي قالإكتفاء الذاتي من هذا المحصول الإستراتيجي في الفترة المقبلة "

الله

الوطن

الرئيس وعياله

العكاوي

[se_ Elsyed]

وبعدين العكاوي أنواع ياسي السيد - نوع من سلسلة الضهر - والنوع التاني ولامؤاخذة من ديل الدبيحة !! إنت أكلت أي نوع علشان اقدر احكم تتعب من بعدها واللا لأ؟

هو فعلاً كان طاجن يا كوكو

والظاهر إن الحيوان كان لسه مقتول قريب والراجل حب يوجب معايا وعملي كوكتيل من سلسة الضهر على لا مؤخذه ديل الحيوان وكان مكتر التخديعة في الطاجن وحصل اللي حصل ..

لكنني توبت .. وربنا بيقبل التوبة يا أخي ...

من فضلك إقرا الكام مادة الجداد بتوع الدستور على أساسا نُقنن موضوع العكاوي ده ..

ده مستقبل البلد مش أكله والسلام يا كوكو ...

[واحد تاني]

مادة خمسة وخميسة

" يتم وضع سيريال نمبر لديل كل عجل وكل جاموسة حلوب لضمان السيطرة على الاصدر والوارد من الديول اللي هي المادة الخام للعكاوي "

الله

الوطن

الرئيس وعياله

العكاوي

تعديل المادة خمسة وخميسة

"يتم زراعة شريحة اليكترونية ذكية تحت الجلد في ذيل كل عجل تقوم بالتعرف على شخصية اللى بيضرب العكاوي واذا ثبت انه مش مولانا السلطان تقوم بالتفجير ذاتيا داخل هذا المجرم"

والله الموفق ,,,

[Handasah]

:) الف سلامة عليك ياسى السيد انا مشاركاتى قليلة بس اول مقريت الخبر قولت لازم اقولك الف سلامة والمرة الجاية متجيش جنب العكاوى وخش على الكوارع عشان تعوض معاك بس على فكرة انت زعلتى اوى لانى لسة النهاردة شارى عكاوى بس لسة مكلتهاش واعتقد بعد اللى عرفتة منك مش هقرب منها خالص واغير رأى بس الظاهر ان موضوع العكاوى دى ظاهرة لانها انتشرت بين المصريين فى فترة القمة بس اية اسبب مش عارف ولا اية رايك ؟؟؟؟؟؟؟؟؟

[Abdulaziz Omar]

سلامتك يااخ س س

عشان تعرفو الراجل بيضحي بنفسه ازاي عشان الشعب

ياعيني هاري تفسه عكاوي كل يوم

ربنا يخليه لينا ياااااااااااااااااااااااااااااااااااااااااااااااااااااااااااااااااااااااااااااااااااااااااااااااااارب

عمر

[kokowawa1979]

بسرعة يابني طاجن عكاوي محترم لس السيد وصلحه علشان بطنه ماتوجعوش :blush2:

[Tafshan]

عكاوى يا سين مره واحده :wub:

و الله نفسي فيها .. يا حلاوتها في طاجن مع البصل مع قليل من جوزة الطيب و كثير من الفلفل الاسود .. بس هى ثقيله الى حد كبير ... محتاجه لامعاء قوية الهضم واسعة الاحتواء قابله للتمدد زي امعاء السيد الرئيس المفّدى

الف سلامه عليك يا سين يا خويا ... آدى اخرة اللى يعمل فيها ريس :blush2:

[عادل أبوزيد]

.. فقلت له تعرف مطعم بيعمل عكاوي بس يكون كويس .. قالي غالي والطلب رخيص .. وأنا أساساً والله العظيم ماعرف يعني إيه عكاوي بس عرفتها من موضوع أ عادل أبو زيد من خلال الحديث الصحفي بتاع طباخ السيد القائد اللي قال إن الريس بيتعشا عكاوي كل يوم ... فقلت إشمعنى الريس ياكل عكاوي وأنا لأ ... وقلت كمان يمكن لما أكل عكاوي ربنا ينفخ في صورتي وأبقى سكرتير أول وزارة التعليم حتى أو رئيس مجلس محلي مدينة كفر لاشيخ ..

روحنا المطعم وطلبت عكاوي والحمد لله أكلنا ورجعت أنا لوحدي عالمكتب حبست بشاي على أساس غن العكاوي ما تهربش .. ولعبت شويه عالنت وفين وفين لما روحت .. روحت البيت وأنا مشتاق لأولادي اللي ما شوفتهمش من صباحيه ربنا والقمة فرقت بيننا كما تم التفريق بين الشعوب العربية ... وعينك ما تشوف إلا الضلمة .. مفعول العكاوي إشتغل واخوكم كان بيموت لإن العضمة كبرت وما بقتش حِمل الحاجات دي ويادوب باكل الزبادي منزوع الدسم وأنام ...

لم تقل كمية العكاوى التى أكلتها و بالذات مقارنة بأكلتك العادية و يبدو أنك عمدا أخفيت إستمتاعك بأكلة العكاوى .. ليتك تحكى لنا عن شعورك و أنت تأكل العكاوى و بصراحة و بكل صراحة ما الإحتياطات التى ستتبعها فى وجبتك القادمة من العكاوى ....

كلامك يدل إنك "إفتريت" فى أكل العكاوى و إنك إستمتعت جدا و أتصور أنك تفكر فعلا فى تكرار أكل العكاوى ....

أما كلامك عن التعب و المستشفى و الذى منه فأنا أضعه فى نفس سياق بيانات وزارة الإعلام.

لا تظن أن أعضاء محاورات المصريين إقتنعوا إن العكاوى "كخ" بل أغلب الأمر أنهم يفكرون فعلا فى تجربتها .... أنا شخصيا لم أذقها فى حياتى بل أزعم أن كل معلوماتى عنها من الأفلام المصرية القديمة و كلام محمد رضا عنها ، و لكننى أعترف لك و بصدق و بعد قراءة موضوعك هذا أنى إنتويت التجربة و للأمانة سأسأل أصدقائى الأطباء عن الإحتياطات المطلوبة و لكنى أكيد سأخوض التجربة حتى الثمالة ربما بعد أن أنجو من معركة اليوم ( حادثنى الفاضل أحمد محمود و قال شعرا حماسيا و رسم سيناريو خطير لأحداث وجبة شم النسيم التى سيخوضها اليوم )

[se_ Elsyed]

أنا حاسس إني بأذن في مالطه ..

بنقول العكاوي يا جماعة أكلة رئاسية والظاهر الراجل كبير عامل عمل لكل من يأكلها أو يحاول يأكلها ..

والله يا عادل بك أنا ما أفتريت ولاحاجة لأني أستمتع بالأكل عامة ً - أي نعم - . ولكنني لا أأكل كميات كبيرة .. وعشان كده ممكن أقعد 5 سنين مؤشر الوزن عندي لا يزيد ولا ينقص ...

وهي تجربة تستحق أن نخوضها - بس كل واحد متعلق من عرقوبه - وزي ما قال أخويا طفطش .. هي كانت طاجن - آممممممم - و بالبصل - يا سيدي .. وسخنه ملهلبه - يا عيني يا عيني - وإحقاقاً للحق عشان الكلام ده بيبقى للتاريخ .. لم أطلب معاها أي شيء سوى

سوى

ملوخية خضرا .. وهي عشقي الأول الذي ينزوي أي معشوقٍ بعده ...

الغريب بقى إن مُضيفي اللي هو أخويا طلب لحم محمر ودومتم وقعد يتفرج عليه وأنا باتعامل مع الهدف

على فكرة دي مش أول مره الولد ده يجيب أجلي .. فالسنة الماضية وأثناء ما كنت أمر بمرحلة عزوبية مقننة نتيجة سفر الأولاد لمصر ، وعزمني ذات مساء على أكله مصرية 100 % وهي عبارة عن شوربة كوارع ... وممبار وفشه ولحمة راس ولسان وجوهرة .. ودي بقى فعلاً اللي جابت أجلي فعلاً وحرمت بعدها إن ألغوص في الحاجات دي إلا لما اكون مستعد نفسياً وجسمانياً ...

[DARWEEN]

هذا وقد أكد المواطن س س أن الريس حفظه الله وأدامه يتميز عن باقي أفراد الشعب عامة بمواصفات خاصة ونادرة ولا ينافسه فيها أحد ... إذ أن الريس يقوم بإلتهام العكاوي دون شكوى ولا تأوه على صفحات الإنترنت ... لا وإنها ليست العكاوي وحده فالريس الكبير وخليفته الريس الصغير ودلوعته الريس الأصغر يقومان بإلتهام كل شيء بما في ذلك مستقبل الشعب بأكمله دون كلل أو ملل ودون شكوى ولا تذمر

عشت يا ريس لنا آكلا للعكاوي ولحقنا ... وخسئت ياشعب لا تعرف للعكاوي مسلكا ولا دربا