يعنى ايه نجاح ؟؟

[Salwa]

تعمدت وضع هذا الموضوع فى باب ......موضوعات جدية .

مع انه ببساطة كان ممكن وضعه فى باب ...موضوعات خفيفة ...او شخصية ..( مثلا ) ..

ولكن ؟؟

نظرا لجدية الموضوع...ونظرا لان البعض يحاول النيل من اى حديث بسيط شفاف( بحجة انه كلام غير ذى قيمة .).

لهذا اختصرت الطريق عليكم وعلى نفسى وقررت ان المكان المناسب هو هذا المكان ..

هذه الديباجة كانت مهمة جدا قبل الدخول فى موضوعنا الحيوى ...

ماهو النجاح ؟؟ وكيف نحكم على انفسنا اننا وصلنا لقمة النجاح ؟..هل هو حكم الغير علينا ؟؟ هل هو نتيجة ملموسة مادية ؟؟ هل هو تقلد وسام ؟؟ او شهادات تقدير ؟؟ وهل النجاحات متنوعة ؟؟

اسئلة كثيرة تدور فى الذهن بعيد عن كل الكلام..( السابق سماعه او قراءته ) لكل .......الكتاب المتخصصين فى تحليل الامور ....سواء بواقعية او مصداقية.....او ببعض ( التهويل ..والكذب احيانا !! )..

كل منا له رأى فى النجاح سواء من واقع تجربة شخصية او عن رؤية قريبة ...

كلمة حق......( اوحى لى بكتابة هذا الموضوع قراءتى لبعض المداخلات فى موضوع اخونا الرافعى عن ...مواضيع المقاولات ....و( الفهم الخاطئ للبعض فيم كان يقصده ..بل واتخاذ حديثه الشفاف ك...اعتراف ب( خطيئة ....وشهد شاهد من اهلهم ) ...ثم رد الاخوة عليه ...كل بوجهة نظره.

هل النجاح هو محاولة الوصول للكمال ؟؟

هل هو محاولة تنقية شوائب حياتنا اولا بأول ؟؟

هل هو استنباط طرق جديدة مختلفة عن اى طرق تقليدية للوصول الى ما لم يصل له من سبقنا ؟؟

ام هو استمرارية لنجاحات السابقين واضافة ما يثريها ؟؟

هل هو نجاح على مستوى الاسرة ....ام يجب ان يكون نجاح على مستوى المجتمع ككل ؟؟

اليس النجاح على مستوى الاسرة هو نجاح على مستوى المجتمع وبالتالى نجاحات متعددة للبلد ؟؟

وللحديث بقية ...ان كان فى العمر بقية ..

[abo 3ali]

طبعا هو موضوع جد . و جد جدا كمان

من وجهه نظرى النجاح نسبى و بيختلف من انسان لانسان

و كمان بيختلف من فتره لاخرى طوال حياه الانسان ( احلام الطفوله مثلا انى احوش علشان اجيب عجله .مثلا يعنى .. احلام المراهقه انى احب البنت ديه و تحبنى _ احلام الشباب انى انجح فى دراستى و اخلص علشان اشتغل . احلام مابعد الشباب هى انى انجح فى شغلى و اترقى .و بعد كده اتجوز و اجيب عيال اربيهم كويس .. و هكذا

النجاح لا يتوقف . و يحتاج فترات زمنيه لكى يتحقق . و محتاج وعى و تخطيط و تنظيم و مثابره

و مشواره مالوش نهايه . يعنى مش بعد مايطلع عين الواحد و ينجح فى حاجه يفتكر ان نهايه المشوار و يقعد يحتفل باقى عمره بالنجاح

النجاح بيولد نجاحات اخرى .

طعم النجاح الاحلى اللى بيجى بعد الفشل . و ده معناه ان الواحد لما يقع لازم يقوم و يكمل و ميستسلميش

النجاح هو الرضا عن نفسك و عن امكانياتك و محاوله توظيفها فى الاتجاه الصحيح

النجاح فى قاموسى عمره ماكان مادى

النجاح ان الناس تحبك

النجاح لما تشوف ولادك كبروا و بتشوف نفسك فيهم و بتشوف تربيتك فيهم

النجاح لما الاهلى يكون بيلاعب فرقه واقفه ادام التمناتشر طول الماتش و يجى الجون فى الدقيقه 92

النجاح بالنسبه لى حاليا و اللى بخطط له السنه القادمه انى ارجع ام الدنيا

و للحديث بقيه طالما فى العمر بقيه

[nancy]

حمدالله على عودتك يا مدام سلوى

موضوع مهم احيانامش بنفكر فى الى احنا فية دة نجاح ولا فشل ولا وقفين مكانا

وحاجات كتير عندنامش بنحاول نفكر فيها بنعملها وبس

انا فى راى ان النجاح بيكون فى اولة حلم يعنى بارسم انى حاعمل كذا واوصل لكذا

فى كل حاجة فى شغلنا وتخطيط حياتنا عموما

النجاح انى اكون راضية عن نتيجة اعمالى

ان اكون بالنسبة للى بداو معايا اكثر تقدما منهم

ان اكون عملت شغل اكتر فى وقت اقل وبمستوى جيد

ان اكون قادرة على صنع بيت هادىء ومنتظم

ان اصل باولادىليتقدموا فى هوايتهم وفى درستهم وفى الموضوعات الى تهمهم دة نجاح

ان العلاقة مع الزوج لا يشوبها الملل نتيجة لاصرار الزوجين دة نجاح

ان اكون شخصية مؤثرة فى عملى ولا يمكن الاستغناء عنى او استبدالى دة نجاح

ان اكون قادرة على صنع شبكة من الاصدقاء واكون بالنسبة لهم ملاز وقت الضيق وموضع ثقة دة نجاح

ان اكون قادرة على المحافظة على صحتى مع كل الضغوط المحيطة واحاول ان اعيش بشكل صحى دة نجاح

ان اكون قادرة على السيطرة على غضبى والقضاء على الطاقة السلبية داخلى دة نجاح

خلاصة القول

النجاح

ان تحلم وتحقق وتسعد بما وصلت الية هو دة خلاصة النجاح

[otaka]

التعريف اللى موجود فى قاموسى

النجاح هو ان تفشل و تحاول مره اخرى

اما من حيث الانجازات فالفرح بها وقتى و يعود الانسان ليفكر فى الخطوه التاليه

[إسلام طلعت]

رأيي ان تحديد الهدف يكفي ان يكون نجاحا

بس احنا نحدد الهدف

[bentmasria]

عود احمد يا مدام سلوى وحشتينا

موضوع جميل وقاسى لاننا يجب ان نتوقف لبرهة ونزن اعمارنا بميزان النجاح

وقديما عندما كان اليأس يستبد بافكارى احيانا كنت احسبها بشكل مختلف وكنت اظن ان المحصلة مجموعة اصفار متوازية لكنى فعلا كنت مخطئة اتدرين لم

لانى لم اكن اعلم ان لكل دوره فى مكانه ونجاحاتى الصغيرة التى لم اضعها فى الحسبن يجب ان اقدرها ايضا لاقوى على المسير

سيدتى الفاضلة

اعمارنا مساحات لونية قد تكون مسطحة وقد نستطيع ان نضيف لها ابعادا ثلاثية فتبرز وتتميز وكل مرحلة منها تلونت بشكل ما ربما ساهمنا فى صياغته او ساهم طرف آخر معنا فيه وربما من وقت لآخر مع تزايد العمر ووضوح الرؤية وبعض النضج نعيد الصياغة ربما لا نحصد باكرا لكننا فى وقت الحصاد ربما سنجنى شيئا ما

اسرة صغيرة هانئة

او زهور تتفتح وتلمع لتجسد فرحتنا

وربما درجة علمية طاردناها سنين طوال

المهم الا نهدر استفادتنا مهما كانت صغيرة وان ننتفع بها وننفع سوانا ان تيسر لنا والا نكون طوال سنيننا طاقة مهدرة تطارد اشباحا وهمية فحيث لا تخطيط او سعى لا حصاد

ولنعد لاسئلتك الصعبة جدا والعميقة جدااااااااااا

هل النجاح هو محاولة الوصول للكمال ؟؟

هل هو محاولة تنقية شوائب حياتنا اولا بأول ؟؟

هل هو استنباط طرق جديدة مختلفة عن اى طرق تقليدية للوصول الى ما لم يصل له من سبقنا ؟؟

ام هو استمرارية لنجاحات السابقين واضافة ما يثريها ؟؟

هل هو نجاح على مستوى الاسرة ....ام يجب ان يكون نجاح على مستوى المجتمع ككل ؟؟

اليس النجاح على مستوى الاسرة هو نجاح على مستوى المجتمع وبالتالى نجاحات متعددة للبلد ؟؟

كلنا يسعى للكمال او الاقتراب منه والنجاح درجات نعتليها آملين الوصول وبالطبع ربما لن نصل او حتما لن نصل لكننا دائما نرتقى اليس كذلك

والشوائب تنسينا إياها فرحات النجاح ونحس بالتجدد والتميز ونطمس ملامح الروح القديمة ان كانت قد صاحبت الفشل يوما ما

وربما نفضل ان نعمل بالطريقة القديمة التى اعتدناها او نستفيد ببعض التفتح ممن حولها ونبدأ حيث انتهوا آملين فى الافضل

وليس هناك مايسوؤ لو بنينا على بنيان صلب انشأه آخرون طالما لن نسرق نجاحاتهم وننسبها لانفسنا بل ندين دائما بالفضل لهم

واسرنا هى بيت القصيد فما يميزنا كأفراد ينعكس على بيوتنا وذوينا وابنائنا والمفترض ان يصب كل ما تعلمنا هناك فى عقول من نحب ونهتم لامرهم

ولو ان الهيكل سليم والعطاء متقد والاخلاص هو ميزة الجميع سيكون الحصاد رائعا فحيث هناك مجتمعات صغيرة رائعة وملتزمة وناجحة وتسعى دائما طامحة الى المزيد ستكون بلدى افضل ما يمكن ان يكون

طرح رائع لقضية تمس كلنا وبعضنا ليتنا جميعا نراها بعمق نظرتك الثاقبة سيدتى ولتكن منا اول البذور

اسعدنى وجودك واشتقت لمناقشاتك الدسمة

[nora]

اولا ازيك يا ماما سلوى وحشتيني اوي مش عرفه اذا كنتي فكراني ولا لاه بس انت من الناس الي عمري منساها

ثانيا احب اقول اني كنت منقطعه عن الكتابه علشان اعد مع نفسي بسبب الكلام الي ذكرتيه فوق ولاني من الناس العاديه فانا مش مبدعه ولا عالمه سياسيه ولا اقتصاديه لكي اصل لمرحه الابداع ولكن انا انسانه عاديه عندي خبرات اجتماعيه و انسانيه ممكن تسمحلي ان اشارك في المجالات الانسانيه ولسبب موضوعك الانساني البحت الي من ساعة مقريت عنوانه وانا عماله افكر في الاجابه واحاول اني اقدم شيء ميتقلش عليه تفاهات ....

وادخل في الموضوع علشان مشتتهوش

ايه هو النجاح ....

النجاح كلمه كبيرة اوي وجوانبها عديده ولو حاولنا نتكلم عنها ونوجدلها تعريف مفهوم ومحدد مش هنقدر لان النجاح شيء قياسي بيعتمد على الشخص وانا شيفه ان الايام ده كل الناس حصرت النجاح في النجاح المادي فقط والي بيبدأ التخطيط ليه من ثانويه عامه والاهل يبدأ يخططو لابنائهم الدراسه الي هتوفرلهم النجاح المادي واما ان يتخرج الابن او البنت يصيبهم السعار المادي ويحاولو الارتقاء من نجاح مادي لنجاح اخر اكبر منه متناسيين نجاحات عديده يمكن كانت وفرت ليهم نوع من الامان الاجتماعي والاسري والرضا الديني بس ده الي انا شيفاه ولما حاولت ادور اكتر عن النجاح لقيت دراسه لهنري كارتر سكوت اسمه اذا كان النجاح لعبه وفيه الخريطه دي :

وللكتاب عده فصول لقيت اهمها هنا الاتي :-

اختلاف مفهوم النجاح من شخص لآخر

التعريف القديم للنجاح و ماذا يؤخذ عليه

إن التعريف الشائع للنجاح يقوم في المقام الأول على ثلاثة عناصر هي :

1- النفوذ

2- المال

3- الشهرة

فلو كان لديك واحده فقط من هذه المتطلبات فأنت ناجح - حسب التعريف القديم- ولكن المشكلة الكبرى في هذا التعريف انه محدود لأنه يستبعد عدد هائل من الأشخاص الناجحين حقا الذين حققوا أهدافهم وأحلامهم التي نبعت من داخلهم ولم تملها عليهم الأعراف الاجتماعية مثل الرجل الذي ترك مهنة المحاماة سعيا وراء تحقيق حلمه وهو صناعة الزوارق الصغيرة وبيعها فالنجاح أمر لاحدود له وليس هناك معيار كامل نستطيع أن نقيسه به ولكن أنت وحدك الذي يمكنك تقييم نجاحك.

أنت وحدك أقدر الناس على تحديد مفهوم النجاح لديك

تأكد من أن لك نظرتك الخاصة وتمسك بها فالنجاح عند بعض الناس يعرف بأنه الاستقلالية, بينما هناك آخرون يرون النجاح في الحرية المالية بينما يعرفه آخرون بأنه الشعور بالرضا التام والاستقرار العاطفي فلقد عاشت سوندرا طفولة مريرة مضطربة مما حدا بها أن تجعل هدفها هو توفير حياة سعيدة متناغمة لأسرتها وذلك يغمرها بالرضا التام فهي ترى النجاح يتحقق في كل لحظه تشعر فيها بفرحة اجتماع شمل مع أسرتها . وبعضهم يعتبرون تربية أبنائهم تربية أخلاقيه هي علامة من علامات النجاح ويمكن تعريف النجاح بأنه المجد وربما كان زيادة المعرفة والفهم هو مفهوم النجاح لديك. لذا فإن من الواضح انه ليس هناك تعريف للنجاح أفضل من الأخر فأنت وحدك الذي تعرف في قرارة ذاتك مالذي يرضيك ويجعل حياتك ذات قيمه .

ووجدت هناك ايضا تعليق امتى تقدر تعرف انك ناجح

لابد أن يصاحب كل نجاح تغيير ما

كل مستوى جديد تصل إليه ستتبعه تغيرات فد تكون إيجابية وقد تكون سلبية وقد يسبب توقع هذه التغيرات نوع من الخوف مما قد يؤدي بك إلى تدمير جهودك دون أن تدري. ما لذي سيتغير في حياتك عندما تنجح في هدفك انظر في أعماق ذاتك لترى إذا ماكان هناك جانب مظلم يمنعك من النجاح في تحقيق هدفك, فلو كان هناك شيء كهذا فعليك أن تواجه تلك القضية بشكل حاسم و حازم أو أن تبحث عن حل مبتكر لكيلا تحول بينك و بين الوصول لخط النهاية.

اتمنى اني فدت و اضيف لكلامي اسباب الفشل او معوقات النجاح وده برضو لقيته مش كلامي انا :-

1-عدم التخطيط السليم

2-الياس وفقد الهمه

3-اني انشغل بنجاحات الناس متناسيه الاستفاده من نجاحهم

4- - عدم الثقة بالنفس.

5- الرفقة السيئة.

6- عدم اتضاح الهدف.

7- عدم صفاء النية.

8- التواكل وعدم التوكل على الله

9- الذنوب تمنع النجاح الأخروي ولا تبارك في الدنيوي.

10- عدم وجود قيادة منظمة وحكيمة.

11- عدم وحدة الصف.

-12 عدم توفر الإمكانات المادية المؤهلة للنجاح.

شكرا ليكي يا ماما سلوى لطرح الموضوع القيم ده

[Salwa]

سلام من عند الله ورحمته وبركاته...

شكرا جزيلا لكل من شارك فى هذا الموضوع الحيوى سواء كان كاتبا او قارئا ...

نبدأ من حيث انتهى الآخرين ....اى انه ليس هناك تعريف محدد للنجاح ولكن كل شخص يضع مقياس للنجاح يختلف عن مفهوم شخص آخر ...اى ان كل شخص له معاييره الخاصة ...

مثلا ...فى البرنامج الذى اتت به نورا يقال ان المفهوم التقليدى للنجاح هو ...نفوذ ومال وشهرة ..

ثم يعدد طرق اخرى لمختلف النجاحات ...

فى كلمتى اوضحت قناعتى بمفهوم النجاح عن طريق التساؤل( ارفقت بنت مصرية اجابتى التى هى على شكل تساؤلات ).

هنا اضع اهم ماقيل من كل المتحاورين ...

ابوعلى قال... ان النجاح لايتوقف ...وانه فى قاموسه عمره ماكان مادى .. وان النجاح معناه الناس تحبك ...وان النجاح بيولد نجاحات اخرى ...وانه يرى النجاح فى نتاج تربيته لابنه .....

.....(( الله يسلمك يانانسى وانتى ايضا وحشتينى ))..

نانسى قالت ...

..ان علاقتها بزوجها لايصيبها الملل...وانها تكون شخصية مؤثرة فى عملها ولايمكن الاسغناء عنها ..

انها تصل بأولادها ليتقدموا فى دراستهم وهواياتهم.....زان تكون قادرة على المحافظة على صحتها رغم كل الضغوط المحيطة بها ...

اوتاكا قال....النجاح هو ان تفشل وتحاول مرة اخرى ...........الانجازات الفرح بها وقتى ....

اسلام طلعت قال..........ان تحديد الهدف هو نجاح ...

.....(( كيف حالك ياام مادا ...يارب تكونوا بخير ...وحشتونى فعلا فعلا ))

بنت مصرية قالت .....

.ان النجاح درجات .....درجة علمية .....او رؤية برعم يتفتح امام اعيننا ...او لن يسؤءنا لو بنينا على بنيان صلب انشاه آخرون طالما لن نسرق نجاحاتهم ..ونكمل ما بدأوه..طالما ستعود المنفعة على ابناءنا وذوينا ...

والخلاصة مجتمعات رائعة صغيرة ناجحة وبالتالى ذلك يعود على البلد ..ويكون افضل...

...(( انتى كمان وحشتينى قوى قوى ياام سيف ( يانورا ) .....وهو فيه برضه ام تنسى ولادها ؟؟ ))

اجمل ما قالت نورا ........(( مش البرنامج الجميل اللى وضعته لنا واثرى الموضوع ....لالالالا))

انا انسانة عادية وعندى خبرات انسانية واجتماعية ...ممكن تسمح لى اشارك فى المجالات الانسانية ...

النجاح شئ قياسى ....

النجاح هو الامان الاجتماعى والاسرى والرضا الدينى ...

اعتقد ممكن نستخلص من اغلبية المناقشة ان اساس النجاح هو ..............الاخلاق.

بطريقة او بأخرى ......الاخلاق لها دخل كبير فى طريقة تفكيرنا وتصرفاتنا ...وكل هذا بالتالى ينعكس على اولادنا ...

كلنا بنتفق ان اهم شئ نربى نشئ صالح...

فى انتظار آراءكم ...

وللحديث بقية ان كان فى العمر بقية ...

[White heart]

أعتقد أن هذا يُمكن أن يكون مثال قوي ومن على أرض الواقع لمفهوم النجاح:

 

السادة المعلقين والعامة من الناس
أنا نهى خطيبة أحمد صاحب العجلة الصغيرة إلي فالصورة ديه باختصار كل إلي حصل إن احنا كنا قاعدين من أقل من إسبوعين في مع بعض بندور على فكرة قبل بدايه السنة كمصدر دخل إضافي في 2016 عشان فرحنا السنة ديه انشالله وكمان عشان أحمد إعتماده الرئيسي على السياحة وطبعاً كلنا عارفين المجال دة عامل ازاي في مصر دلقوأتي ولا يمكن الإعتماد عليه أبداً فقررنا تطبيق concept موجود في كل بلاد العالم حاجة تحت مسمى street food projects ودة حاجة بتناسب ظروف أي حد فالدنيا سواء موظف أو صاحب عمل أو بدون عمل أصلاً سواء معاك رأس مال اوبدون
المهم قررنا بدايه مشروع ByBike عجلة بتلف كل حتة بنبيع عليها بطاطا بطريقة مختلفة عليها nutella وشوية حاجات تانية كل يوم بعد شغلنا من 9 لحد 12 بليل الحمدلله عمرنا ما كنا نتخيل إن ربنا يوفقنا لدرجة كل إلي بيحصل دة إن ناس تجلنا من كل حتة كل يوم عشان عجبهم المنتج إلي اخترعنا من دماغنا وبدون رأس مال ونلاقي ناس بتنشر موضوعنا فكل حتة وفرحنا بتجربتنا وفي أقل من 4 أيام نلاقي قناة المحور بتكلمنا عشان تصور معنا !! هل فعلاً حد يصدق دة ؟؟

دلوقتي ال-mission بتعتنا إنتشار concept دة في كل حته في مصر وتحويل شوارعنا إلى منظر حضاري من ال-small youth projects انشالله

أنا وأحمد فعلاً مش فارق معانا كل التعليقات السلبية إلي ضدنا أو بتهاجمنا عشان أكيد احنا عارفين إن دة طبعي جداً بالذات في بدايه أي مشروع جديد أو غريب لكن كل إلي بنطلبو منكم كلكم انكم تعيدو حسبتكم على كم الوقت إلي بيضيع على الكافيهات أو القهاوي أو أي مكان بدون أي جدوى يومياً وتخيل تحويل نص الوقت دة في خدمة أي مشروع في الدنيا إنت تختاره

ربنا يوفقنا كلنا ويعينا على الايام إلي احنا فيها ونشالله احنا حنخلي بكرة أحلى ---- مستنينكم كلكم على ByBike عشان نسمع رأيكم بجد في أحلى بطاطا في الدنيا.

Am so Proud of you habibi heart emoticon Majo El-Sherbeny
If you love what we are doing please share this post to help us spread the concept