ذكريات حُلم الطفولـــــــــــة.....البريئة :)

[nash]

يا أهلا يانانو فينك يا عمري....

تصدقي ..والله ذكرياتك فعلا تحسيها ذكريات طفوله حقيقيه..مش طفوله أحداث..زي حالاتي. :blush: ..

باستمتع بكم البراءة التي تقطر من جنباتها<<<<<عايزاكي تلاحظي النحوي المتعوب عليه..

وبعدين أنت أيه اللي جايبك هنا....؟؟؟ مش تقعدي جنب موضوعك اللي قلب علينا ذكريات وفكرنا بحاجات كثيرة بنحاول ننساها . :wub: ..لا والله بهزر.. :P

أنت فكرتيني بيوم لعبت مع أخويا بلي..بس بتفاح صغير..وأتفقنا اللي يخسر يتنازل عن تفاحه للثاني....والله يابنتي كسبته..وأخدت كل التفاح..مافيش خمس دقايق وراح يعيط للحبيبه..طيب بالأمانه أجيبهمله منين؟؟ مانا كلتهم بسرعه علشان عارفاه ..أيييييييه أيام :)

ماتنسيش يا نانو لازم تعطينا خبر لما توصلي علي المنفوحه...

تم تعديل 5 نوفمبر 2006 بواسطة nash

[نانو]

نانوش وحشتينا انت اتاخرتي اوي النهارده

شوفتي انا سيبت خلاص الموضوع العكننه خلينا هنا احسن

يا حبيبتي انت مش ناسيه اني ممكن اجي عندكم ...ربنا يخليكي يارب....اكيد قرب ما هاجي هاقلوك امال ايه هو انا ماليش اهل يسالوا عليا

لكن المكان الظاهر اني فهمت غلط تقريبا قرايبنا دول عايشين في العليا و انا طبعا ابيض يا ورد العليا من المنفوحه يا قلبي لا تحزن..ما اعرفش هذاولا ذاك

ناش نوش انتي جبتي جنباتها ديه منين

[Folana]

كنت عايزة اكتب لكم عن ذكريات الطيران بتاعتى ...وازاى كان نفسى اعرف اطير ...ومحاولاتى الفاشلة دائما للطيران ..بس بعد الفاصل بقى ...

كارت دعوة مقدم مني لسموك

لزيارة الموضوع ده ...

انت والطيران :lol:

السلام عليكم ورحمة الله....

الدعوة وصلت ياواحد تانى غيره ماجاشى ...(اظن ده اسم سهل)..بس الموضوع بيتكلم عن الطيران الحكيكى....

اما انا ..وحدى أنا.....كان لى احلام خاصة بشخصى المتواضع انى اطير..من غير جناحات...وكتير جدا كنت باتخيل نفسى طايرة فى الهوا...وبأجرى ورا العصافير وأشد ديلها ...مش عارفة ليه كنت بأشوف سرب العصافير ده كتير جدا ..غير دلوقت...يمكن علشان كنت باطير وراهم..؟...

مافيش حد فيكم تخيل انه بيطير؟.....

ده كنت كل شوية افرد ايديا وهوب انط من على السرير بتاعى ..بس فى ثوانى كنت باعمل لاندنج...ومش باطير..الا ان جاء اليوم المشئوم اللى صدقت فيه نفسى فعلا...وهو انى حأطير يعنى حأطير...

خصوصا لما سمعت عبد الحليم بيغنى "..وخدتنى ياحبيبى ورحت طااااااير ...طاااااااااير

طب بالذمة أزعله؟؟...بالذمة أغضبه؟...طبعا لأ...قلت ده نادانى ...الحسين نادانى ...قصدى عبد الحليم نادانى ...جااااايلك..جااااااااايلك...وعنها وهوب رحت ناطة فوق الشفونير فى اودة امى الله يرحمها (مركز نشاطى الجنونى)

ورحت فاردة دراعى يمين وشمال ...وباغنى بقى ..بألبى الندا...وخدتنى ياحبيبى ورحت طاااااااااااااا.....آآآآآآآآآآآىىى..آآآآآآآآآآآآآآىىى...وقعت طبعا على الارض والسمانة انشرخت أه...رجلى انكسرت أه...

""

وجت أمى على بكائى ..وكنت أنا بقى العين والنينى بتوعها مش عارفة على ايه....وياعينى يابنتى..يا قلبى ياضنايا...يقطع عبد الحليم على فرافيرو..على كله ....

تفتكروا حرمت؟...ابداا...بس اكتفيت بأحلام الطيران بس..ولغاية دلوقت بأحب السفر جدا بالطائرة ..وافرح زى الاطفال لما اعرف انى مسافرة ...واول ما اركب الطيارة تنتابنى حالة من الضحك....

ااااايييييييييههههه ...اياااااااام ورا ايام بتروح من عمرناااا...

والى اللقاء فى ذكرى جديدة

مقدمته

فلانة ياسين فى سلاح الطيران

[khedr]

أحلي مافي هذه الذكريات كلها البراءه ولا غير البراءه

حتي لوكانت تتسم بنوع من العفرته او الشقاروه او الضرب

كنا بنعمل الحاجه ....ومش واخدين بالنا..... مش عارف...... مش فاهمين مش عارف

كنا أحس طايحين في الدنيا شمالا وجنوبا شرقا وغربا لحد اليومين دول هي اللي بتطيح فينا

ماعلينا

........................

........................

سيده الطيران

الطيران ده كان مسيطر علي معظمنا فاكره الله يخرب بيته فرافيرو

فرافيرو العجيب اللي كان عامل فيها فراقيرو ويطير ويخرب لنا الدنيا

وربنا يحوش

الحلقه تخلص من هنا

والطيران بكل انواعه المدني والتجاري والحربي....واه من الحربي ده

وتبتدي المشاكل ما بين اصطدامات وفتح جباه وكسر بالايدي وعلقات ساخنه من أمي ربنا يديها الصحه

وأبويا الله يرحمه ....واخواتك الكبار ....والجيران.....وعم أمين البقال ...كله بيضرب

البلد كلها كانت بتضرب

وأثار هذه المعارك لا يزال لا يفارق وجوهنا ولا ايدينا حتي هذه اللحظات

أنا جااااااااااااااااااااااااااااااااااااااااااااااااي

فرافيرو العطره ...........العطره

[Folana]

السلام عليكم ورحمة الله...

ايه ياجماعة الخير!!!.....زخيرا ان شاء الله....ينبوع الذكريات جف ولا ايه ؟....

نانو...ناش..خضر....ابو زياد انا رجعت اهو يا ابو زياد :o...واحد تانى ...زعلان .نانسى..ياشو.....كل الناس الحلوة اللى هنا ..فين ذكرياتكم...لو نسيت اكتب اسم حد من اللى مشاركينى ذكرياتى ..مايزعلش...

يعنى انت ياخضر طيرت؟...يا سلام..شفت الطيران بقى جميل ازاى...بس ياه ه ه ياخضر ..ده انت اكبر منى بقى بكتيرررر على كده..انا عمرى ما اتفرجت على فرافيرو ده..كنت باسمع عنه من جدتى بس :) :)

عندى لكم ذكريات كتير جدا...انا كل حياتى ذكريات حتى النهاردة كمان ذكريات :)

لكن ياخضر انا كنت طفلة ملتزمة جدا..عمرى ماكنت اعمل حاجة يعاقب عليها القانون..يعنى لا اكسر ولا اخرب...كل نشاطى كان مع نفسى كده ...

لدرجة انى لو عايزة العب ..كانت امى تقولى مثلا ...العبى لحد الساعة خامسة....اقف فى البلكونةو.افضل اسأل بقى الناس اللى رايحة واللى جاية ..هى الساعة كام ...هى الساعة كام؟...اوووووووف...دى كانت حاجة تخنق..مش العب بقى وبعدين ابقى اسأل عن الساعة..لأ اضيع الوقت كله فى السؤال احسن امى تزعل ....

تصوروا ..ما احبش البس ساعة ابدااا دلوقت ...

[نانو]

اه يا فولانه و الله ذكريات الطفوله ديه جميله بجد

فتكرت احد ذكرياتي التي تدل علي البراءه اللي تودي في داهيه

لما كنت في ابتدائي يمكن كنت في تالته ابتدائي...كنت في مدرسه راهبات و كنت شقيه بطريقه غير طبيعيه بس كنت شاطره جدا علشان كده كان مدريسني بيستحملوني

و كان عندنا سيستر بتدرس لنا الحساب...و كان يوم توزيع الشهادات اللي كانت ف اول كل شهر ...و اليوم

ه بالذات كنت مزوداها شقاوه علي الاخر فقالت السيستر مش هاوزع غير ما نانو و شاهيناز صاحبتي في الشقاوه يطلعلوا بره الفصل

و فعلا اتكرشنا و بدات توزع الشهادات و خلت شهادتي في الاخر و بعدين نادتني و فوجئت اني الشهر ده طلعت الاولي و سامحتني بس علشان كده

كل ده جميل نيجي للي بعد كده...كان عندنا التلاته الاوائل بيلبسوهم كردون قطيفه حول جسمهم و الاولي بس كان الكردون بتاعها لونه احمر و الباقي اخضر

و كنت طايره من السعاده و بقيت ماشيه في الشارع زي الديك الرومي لما ينفش ريشه زي ما يكون الناس كلها فاهمه ايه الكوردون ده

المهم من فرحتي قررت بقه اني اروح من مكان تاني غير اللي بمشي منه كل يوم ...علشان ناس كتير تشوف الكوردون...و فعلا مشيت من علي شارع ابوقير و ده شارع رئيسي في اسكندريه....و اول ما دخلت في العماره بتاعتنا و اذا براجل ...طويييييييل جدا لابس بدله سوده و كرافته سوده

و نظاره سوده و عنده شنب اسود كبير(و اعتقد ده سبب كرهي للشنب) و عايز يخطفني... :ninja: .و انا و لا حس و لا صوت اتكتمت و بقه يسالني اسمك و في مدرسه ايه و رايحه سنه كام و بتطلعي كل يوم من المدرسه الساعه كام و انا زي الباشا....اجاوب في منتهي الصدق لاني ميته من الرعب

و فجاه مشي و سابني و طلعت جريت علي السلم و اول ما وصلت الشقه انفجرت في العياط ....موت من الرعب و طبعا ماما هزقتني لاني ما صرختش علشان اخوف الراجل المرعب ده

المهم بقه ان كان ده يوم صعب اوي في حياتي...شقاوه مالهاش حدود .....وفرحه مالهاش حدود ....و رعب مالهوش حدود و براءه مالهاش حدووووووووود :blink:

[أبو زياد]

أختى نانو

كل طفل تعرض للخوف من الخطف مش عارف ليه

تصورى زياد بيقوللى يابابا إقفل باب الشقة جامد ولا ينام إلا لما يتأكد إن الباب مغلق بالمزاليج

ودايما يقوللى انا خايف حد ييجى لابس وش شبهك و يطلع حرامى و........

شوفى خيال الأطفال و برائتهم - و طبعا دة من أفلام الكرتون الخيالى اللى بلتنا بيها سبيستون

أنا بقة أفتكر وأنا صغير كانوا بيسيبونا فى البيت و يروحوا الشغل -أنا و أخويا و يعطونا قرش - كان كنز أيامها -

ومرة القرش وقع من الشباك و قعدنا ننادى على أى حد يجيبه لنا بس محدش سأل فينا و الآخر جه واحد صعيدى - والله فاكر شكله - وخده حطة ف جيبه ومشى ولم يسمع نداءنا و استغاثتنا

دخلنا البيت وكنا معتقدين إنه حيرجع مرة تانية من نفس الطريق وقعدنا نجهز مية و نحط فيها كل القاذورات اللى نقدر عليها عشان نكبها عليه وهو راجع ....بس للأسف مارجعش حتى الآن .... والقرش ضاع :blink:

ولنا عودة :ninja:

[nash]

فولانه..نانو ..أبو زياد.....ليه يا جماعه بتحسسوني أني ماكنتش طفله....؟؟ :blink:

حرام عليكم..حطمتوني.. :D

طيب أكمل؟؟ :ninja:

خلوها بعدين لما حماده تروح منه الحرارة..لإنه مريض جدا...

تسلمولي يارب

[أبو زياد]

أيوة ياناش

إنتى كنتى بتخطفى العيال وانتى صغيرة ؟ :ninja:

كلنا كنا أطفال حيارى مساكين ومش هاحكى حكاية تانية غير لما حمادة يخف بالسلامة

حبيب قلبى سلامته - اطمنى عليه وربنا يقويكم و يقوم بالسلامة

[Folana]

السلام عليكم ورحمة الله.....

الف سلامة على حمادة ..ربنا يتم شفاؤه على خير ان شاء الله..وربنا معاك...منتظرينك ومنتظرين ذكريات طفولتك ...

طبعا كلنا كنا بنخاف احسن نتخطف..مش دى الجملة المأثورة اللى اهالينا كانوا دائما يرددوها فى اذاننا...اوع حد يخطفك...اوع حد يقولك تعال كلم بابا...اوعى تمشى ورا حد ...

طب ده انا كنت دايما بأحلم انى فيه حد بيجرى ورايا علشان يخطفنى ..واجرى ادخل البيت واحاول اقفل باب الشقة وهو مش عايز يتقفل وفجاءة يتخلع الباب والحرامى يدخل وافضل انادى على امى وصوتى مش عايز يطلع

طبعا اكيد الحلم ده كان منتشر بينا

بس بعد كده بقى عرفت ليه الصوت مش بيطلع فى الاحلام او الكوابيس....وحابقى اشرح لكم لما أعود لانى طبعا....

لى عودة :ninja:

[Salwa]

ذكريات حلم الطفولة ....

ذكريات كتير قوى قوى ....قوى ...........قوى

يمكن نشترك اغلب الاسكندرانية فى ذكرياتنا لان اغلبها مرتبط بالبحر ...

يعنى ايه تتولد وانت بتحلم انك تملك فى يوم من الايام موجة !!! ( موجة من امواج البحر )) آه والله...

.كنت عاوزة يكون لى موجة بتاعتى انا ...اراقب الموج وهو بييجى ويضيع واقول الموجة بتاعتى حاترجع تانى وحستناها وفى يوم حاتاخدنى وادخل بيها بعيد .....جوة البحر ...واتفرج واشوف عروس البحر ....واشوف الاعماق ...

كنت بحلم كتير كتير بحاجات خيالية ...احلم وانا صاحية...واحلم وانا نايمة ...واحلم حتى وانا بحلم ... واتمنى يكون عندى مصباح سحرى يحقق لى كل احلامى ..

احلى اوقات ( كنت واخى( اكبر الاخوة الرجال ) نكون ثنائى خطير ) لما كانت ماما تخرج للذهاب لجدتى او تكون مع خالاتى ...كنت اعمل البدع فى اختى الصغيرة ....كنت اضع لها مكياج كامل وكنت اصنع لها فستان من ورق الكوروشيه بكل الالوان وفيه كرانيش

( ولا اتعب من تشبيك القطع بالدبابيس او اللزق واحتفظ به لمناسبة اخرى )..وكنا نجبرها على القيام بدور الاميرة والاقزام السبع ....او ذات الرداء الاحمر ...واحنا طبعا باقى الابطال ..

اما اخى فيجبرنا ان نكون جمهوره ....ويلقى علينا بالمنولوجات ( حفظناها ولسا حافظينها للآن ) ...بل يتمادى ويعطينا اوراق موقعة منه كـانها تذاكر دخول لرؤية ( مواهبه ) ...ولازم نحتفظ بالتذاكر ....

كنا نتفنن فى عمل المقالب......اذكر مرة فى عيد الام ...وقبل البدء فى الاحتفال ( كنا نقيم احتفال خاص لجدتى وتجتمع كل العائلة عندها ) ...احضرنا ثعبان بلاستيك من محل ( ظنانة ) فى المنشية ...( الاسكندرانية حايعرفوه فين ...فى اول شارع فرنسا ...كان مشهور بانه لديه لعب اطفال كثيرة )...وكان الثعبان يتحرك كأنه حقيقى ..

وقبل الاحتفال ....اقتربنا من الجدة ....وقلنا لها ياتيتا احنا جبنا لك هدية جميلة جدا ومفاجأة بس بلاش تشوفيها قبل الاحتفال ..ومددت يدى فى جيب البالطو ووضعت لها الهدية ....

طبعا تيتا ....لم تنتظر موعد الاحتفال ..

بدليل الصوت اللى سمعناه...

واغمى عليها ....

كان يوم .............يوم جميل والله......اخدنا اللى فيه النصيب من توبيخ لكن انتهى كله بالضحك ..

ايضا مقالب كذبة ابريل ....

مرة قلنا لخالتى ان فيه مسئولين من شركة المياه كانوا بيمروا و قالوا ان حايقطعوا المياه لمدة تلاتة ايام لان فيه تصليح فى المنطقة ...وطبعا بلاش احكى ...اتحول بيت خالتى ( لحمام سباحة ) ..البانيو مليان وكل الحلل وحتى الكبايات مليانة ....

وفى المساء قلنا الحقيقة ....وكان يوم ..

حكاية التخويف بالعفاريت ....كان عندنا شغالة متخصصة ترعبنا ....وعلشان تخلص مننا وننام من سكات كانت تحكى لنا حكاية عسكرى الدورية اللى رجله رجلين معيز ...والا حكاية العفريت اللى بيطلع من الحيطة لو الطفل منامش ..

مشيت من عندنا لما اتجوزت ( لما هى اتجوزت ) ...وانا كنت كبرت وبقى عندى اتناشر سنة ...

جت لنا زيارة بعدهابسنين وكنت انا فى ثانوية عامة وكان معاها ابنها ......لم اظهر لها اى شئ ....لكن جوايا كان نفسى تسيب لى ابنها ده ساعتين احكى له كل الحكايات العبيطة المتخلفة اللى كانت امه بتحكيها لنا ومكناش بنقول لماما عليها من خوفنا منها ...برضه كانت بتقول الحكايات دى تتحكى واللى يسمعها ميحكيهاش لانها ممكن تتقلب عليه ....

ولنا لقاء آخر ان شاء الله ...

[Folana]

السلام عليكم ورحمة الله...

ايه النور ده...سلوى معانا اخيرا...تعرفى انى كنت حأبعت لك علشان تحكى لنا عن ذكرياتك.....

والله كنت مستمتعة جدا وانا بأقراها....موضوع الشغالات والاطفال ده قصة كبيرة جدا...بافكر افتح لها موضوع منفصل ..وخصوصا بعد معاناة ولادى وهم صغيرين مع الشغالات وافلام الرعب اللى كانوا فيها ...

بس خلونا دلوقت فى ذكرياتنا الجميلة وايامنا الدافئة...

فهلم بنا يا أصدقائى نقلب صفحات الماضى...ونغوص وسط ورود الذكريات ...فما احلاها ذكريات ....واااييييييييييه (وش شعبولا)

[Folana]

السلام عليكم ورحمة الله .....

امبارح كنت باتكلم مع انسانة عزيزة على قلبى ..وتطرق الحديث لفترة من حياتى ..كنت سعيدة جدا وانا بافتكرها...ايام ثانوى..وانا مشتركة فى معهد حر لتعليم الموسيقى علشان اتعلم الجيتار..

كان معانا زميل...بيلعب على الجيتار وبيغنى..وفى احد الايام..جمعنا علشان يسمعنا اغنية جديدة حيغنيها ..وعايز بقى يسمع الاراء فى الاداء وكده...وفى وسط ما هو بيغنى وللاسف كان موجه نظره ناحيتى ..رحت انسحبت من الحجرة وخرجت...وانا مالى انا مايغنى ...ايه اللى يخلينى اقعد متذنبة واسمعه :)

بعدها بقى سمعت من صاحبتى انه اشتكى لها منى وقالها ايه ده ..هو انا صوتى وحش قوى كده..ولا هى خايفة على ودنها احسن تبوظ من صوتى....

بس عايزين الحق..ياريتنى ما خفت على ودانى ...:D

طبعا حبيبتى اللى فكرتنى بالموضوع ده حتضحك وتفهم قصدى ..;)

والمرة الجاية حاحكى لكم عن امنيتى انى اطلع دكتورة واللى كنت باعمله فى عروستى المسكينة....

:rolleyes:

[nora]

انا اعدت اقرأ اخر الذكريات ومش عرفه ليه افتكرت الموضوع ده بس والله الكلام ده حصل وانا عرفة ان الي هيقرى الكلام ده هيقول دي بتضحك علينا بس يلا اسمعو

وانا صغيرة كنت بحب انزل كتير اروح السوبر مركت وكان في سوبر ماركت على النصيه التنيه بيتنا وفي يوم بابا كان عمال يرتب دولابه وانا عرفه ان بابا كان دايما يملى دولابه بالحلويات واللبان علشانا فقعد الح عليه فراح قالي معنديش فقلت له خلاص هروح السوبر ماركت هات فلوس فاداني 20 فلس الكلام ده في الكويت المهم انا مصدقت خدت الفلوس وجريت كان عندي 5 او 6 سنين بس مكنتش لسه رحت المدرسه المهم نزلت واشتريت اللبان وقعدت على باب السوبر ماركت اكل اللبان وفرحانه وفجأه افتكرت اني مرجعتش البيت قمت اعدت احاول افتكر بتنا يترحلو منين وانا م فكرة وبدأت اعيط ولقيت ست عجوزه لبسه عبايه سوده جت سالتني انتي بتعيطي ليه فقلت ليها مش عرفه اروح فقالت هو اسمك ايه فقلت ليها نورة فقالت ليا هو انت ده باباكي بيجري هناك وبيدور عليكي وقالي لما الاقيكي اخدك اوديكي ليه وانا هبله صدقت وقمت مشيت معاها بس وكانت ايامها في صحره كبيرة ادام البيت كنا مشين فيها واذا باخويا الكبير بيجري وبينده عليا هو وعمامي (مش عرفه لحقم يجو امتى) ومسكو الست واتخنقو فيها بس ورحت البيت وكل الي افتكرة ماما وانا دخله والجيران كلها عندها وهي وقعه على الارض وبتعيط وبعدها اذكر كف بابا الي سلم على خدى من كتر الشوق ..........

اما القصه الي مش هتصدقوها ان بعد موقف محاولت الخطف دي بابا بقى يخاف علينا فبقى يقفل باب الشقه بالمفتاح علشان محدش يعرف ينزل ، وكان عندنا بلكونه كبيرة فكنت انا واختى (ودي توؤمي للعلم) بنعد في البلكونه نلعب وكانت عبارة عن سور حديد فكنا بنعد على الارض ونطلع رجلنا من بين الحديد وكان السورمش عالي يعني كان نص متر بس المهم الشبشب بتاعي وقع من البلكونه وانا كنت بطوح رجلي وكان صحابي تحت وحاولو كتير انهم يحدفوه ليا لكن مفيش فيده واعدت مرعوبه ان بابا يصحى ويضربني لما يعرف اني وقعت الشبشب بتاعي من البلكونه ....

وكانت الفكرة المجنونه احنا كنا في دور الاول قمت قلت ليهم خلاص هاتو شلت وافرشوها على الارض وانا هنزل اجيب الشبشب!!!!

المهم اختى قعدت تحاول تمنعني فقلت ليها بابا هيضربني لما يعرف ان الشبشب ضاع (كانت بخاف اوي) بس فقالت طيب المهم نطيت !!!!! ومحصلش حاجه فيا خالص ولا خربوش حتى والله وبعدها اعدت احاول اطلع والمشكله ان باب الشقه مقفول بالمفتاح فقلت اجيب سلم واحاول اطلع لكن مفيش فيده برضو وفي خضم المحاولات لقيت اختى بتصرخ وتقولي انا مش قلت ليكي متنطيش !!!! وبابا كان وراها وراح فتح الباب واعد يضربني ضرب !!!! وكان بيقولي انا مش قلت متنزليش من البيت ابدا ...هو مش واخد باله من موضوع الباب ده وانا خفت اقوله اني نطيت لتبقى علقتين ...لحد فترة قريبه جدا انا وبابا بنفتكر مع بعض وراخ سالني الا صحيح انت نزلتي ازاي فقلت له السر بعد اكتر من 20 سنه وكان هيتجنن واختى اكدتله كلامي !!!! وهو مش قادر يصدق ...وراح قالي يعني خفتي لاضربك علشان الشبشب ضاع تقومي تنطي من البلكونه !!! المهم بعدها بابا (واحنا صغيرين طبعا) على السور وبقى متر ونص بس هو برضو مكنش يعرف اني نطيت فقفل كل المنافذ باب الشقه والبلكونه ....

انا كنت شقيه اوي هحكلكم حكايه السخان السلك والحريقه وعصير الجزر بالجبنه المره الجيه .....وللحديث بقيه

[khedr]

أحلام الطفوله البريئه

................................

المهم الاماني علي رأي اختنا المحترمه فلانه وكنت عايز تطلع ايه وانت صغير

طبعا كلنا او معظمنا كنا من زمن نفسي اطلع ظابط ...وممثل.... ولا عب كره..... التلاته مره واحده

المهم طبعا ...لا .تأتي الرياح بما تشتهي السفن في اغلب الاحوال

ولا طلعنا لا ظابط ولا ممثل ولا لاعب كره

لكن في سبيل تحقيق هذه الاماني كنا بنمثل

واخوكم من يومه له في التمثيل ....لا شكلا ولكن اداءا

وكنت دايما احب امثل دور الظابط الشهم اللي بيضحي علشان بلده وحبايبه والمجتمع والناس

وفي يوم الحفله النهائيه وصلت الي مكان الحفله متأخر

وأحاول اني ادخل ولكن عينك ماتشوف الا النور

اخدت علقه محترمه من الراجل اللي كان علي الباب لأنه افتكرني بااكدب عليه

واللي حاشني منه استاذ كان بيدينا في المدرسه وكان معدي

ودخلت وهات يا عياط

والمدرس بتاع المدرسه يهدي

يا ابني مفيش ظابط يعيط

يا ابني مش كده

يا ابني امسح دموعك وقوم

وانا الليله كلها با اعيط مش علي كرامه الظابط اللي اتهانت

لأ

علي الربع جنيه اللي ضاع مني....................!!!!

[nash]

أهلا أهلا يا نورا ..والله تتفضلي شاي ..ببس...حاجه ساقعه :angry: ..علي ما فولانه تعمل الطورطه تكوني شربتي حاجه....

والله فرحانه علي الأخر..يا عمري مش عارفه ليه كل اللي كتبوا ذكرياتهم..تحسي أنها ذكريات طفوله بس :blink: ..وأنتي جيتي حسستيني أن الدنيا لسه بخير ...وأنا عماله أكلم نفسي..وأقول :unsure: ...أكمل ولا لأ ..طب أكمل ولا لأ......

اللهم لك الحمد والشكر يارب..مش أنا لوحدي.اللي كنت أحداث.

...................................................................................................................................

أهلا أهلا يا خضر منورنا والله...

غريبه فعلا ...هوة فيه ظابط بيعيط؟؟ سؤال والله ضحكت منه. :blush: ..

تصدق بالله...أبني الكبير ..لما كان في الصف التاسع..يعني مسؤل عن كلامه....

مدرسة العربي طلبت من الفصل يكتبلها موضوع عن ماذا يتمني أن يكون في المستقبل...؟ راح كاتبلها ..أتمني أن أصبح ظابطن في الجيش حتي أقتل كل الفقراء والمساكين بالدبابه......

قولتله يابني مش حرام عليك ..مش كفايه الغولب اللي هما عايشينه عايز تقتلهم كمان

أنا كتبت الجمله والتنوين بالظبط زي ماكان كاتبه

.....................................................................................................................................

[nora]

أهلا أهلا يا نورا ..والله تتفضلي شاي ..ببس...حاجه ساقعه -_- ..علي ما فولانه تعمل الطورطه تكوني شربتي حاجه....

والله فرحانه علي الأخر..يا عمري مش عارفه ليه كل اللي كتبوا ذكرياتهم..تحسي أنها ذكريات طفوله بس -_- ..وأنتي جيتي حسستيني أن الدنيا لسه بخير ...وأنا عماله أكلم نفسي..وأقول :D ...أكمل ولا لأ ..طب أكمل ولا لأ......

اللهم لك الحمد والشكر يارب..مش أنا لوحدي.اللي كنت أحداث.

...................................................................................................................................

ازيك يا nash شكرا على الترحيب الحار ده والنبي هاتلنا كبيايت كبشتينو ( مش شيفه لا ابيض ولا اسود وعزومة مركبيه وحاجة كحل)

عموما يلا نجيب كبشتونوهينا معانا المره الجيه بصي باه يا ستي هحكيلكم باه حكاية السخان كنت انا واختي في البيت لوحدنا لمدة اسبوع كان عمرنا 5 سنين وكنا في انتظار الداده لي هتجيلينا ، وطبعا بابا وماما كانو بيشتغلو ومفيش حد يعد معانا فبابا وماما عملو جميع الاحتياطات الامنيه وشالو كل حاجه خطر وماما كانت بتجهزلنا الفطار في التلاجه ووصت الجيران علينا وبابا كان مخزنلنا رقم التليفون ومعلمنا ازاي نتصل بيه وتقريبا كنا طول اليوم على اتصال بيه المهم في احد الايام كنا بليل وبابا وماما كانو من عادتهم يشربو شاي بليل وكان عندنا سخان كهربا سيلك وكان ايمها شتى فكانو بيعملو الشاي على السخان ده وكان له قاعده كبيرة زي الشوياه بيتحط عليها البراد والحجات ( حاجه خليجي )المهم انا راقبتهم ازاي بيشغلوه والصبح ماما مشيت هي وبابا وصحينا لقينا السخان وكان شكل السيلك شاديدنا اوي المهم شغلته وماما كانت بس بتقفل كبس الكهربا الي في الحيطه بس واعدت اتفرج على منظر النار مش اسكت لحد كده لاه بدات اجيب انا واختي اي حاجه ورق وجرايد واقلام خشب ونولعها ونجري نرميها على الارض وندوس عليها بالشبشب طبعا السجاده اتلسعت منا والارض كلها لونت لون اصفر مطرح النار وكل شراشيب السجاجيد باظت بس ونمنا !!!!! بعد ما هلكنا وكنا قضينا على كل الاقلام الخشبيه والاوراق ....

مش نحترم نفسنا ونحاول نلم الدنيا لاه سبنا كل حاجه زي ما هي و صحنا على حتت علقه !!!انا كل الي فكراه ان بابا كان بيقولي انتم لعبتو بايه وانا من خوفي قلت بالكبريت وطبعا مكنش في عود كبريت في البيت !!! (لان ماما كانت عمله احتياطتها ) المهم فقلت له انا خبيته فوق التلاجه فكانت اختي فوق التلاجه وانا بجري في الشقه اقول لبابا والله اخر مرة!!!!وكان يوم بس عدى وكل ما نفتكره نضحك لحد معترفت لبابا ان الي لعبنا بيه كان سخان الكهربه السلك مش الكبريت (دايما الراجل ده بنضحك عليه ويصدقنا مسكين ) وقعد سعتها يقول مش ممكن ازاي مخطرش في بالي ان هو ده الي لعبتو بيه...

بس الي مستغرباله ازاي ربنا سترها معانا ....

مع باقي يوميات اسبوع شقاوه ....

[Modest]

كل ما أفتكر "بعض" ذكريات طفولتي المشردة أقول سبحان مغير الأحوال -_-

من الشقاوة المدمرة إلى الهدوء المدمر برضه :D

لكن آن الأوان علشان أخلص ضميري و أبوح بجريمة اقترفتها و أنا صغير بمساعدة أصدقاء الطفولة عندما كنا نكون عصابة صغننة كده على قدنا :ninja:

كنَّا بنحب القطط جداً :wub: لدرجة إن مفيش قطة نشوفها قدامنا إلا و ينوبها منّا على أقل تقدير "شلوت محترم" :wub:

و في إحدى المرّات أخذ صديقي قطة مربربة حلوة كده و طلعنا بيها فوق سطوح منزلنا العامر و هووووب رميناها من فوق السطوح (مش عالي قوي .. يادوب دورين) ;)

و نزلنا جري وراها لقيناها بتطلّع في الروح... قمنا غطيناها بأغصان و ورق شجر كتير و عملنا دائرة حولها و فضلنا نتنطط و نلف حواليها على الطريقة اللي كنا فاكرين الهنود الحمر بيعملوها.

فجأة لقيناها قامت و هاتبدأ تجري.. إفتكرنا إن إحنا اللي صحيناها بالطقوس العجيبة اللي عملناها.

قوووم إيه نسيبها؟!! لأ طبعاً :D

أخدناها مرة تانية على السطوح و قلنا نعيد التجربة

بس المرة دي ... مفيش داعي أكمّل :sad:

صدقوني دلوقتي باحب القطط بس من بعيد لبعيد .. ربما شعور بالذنب .. ربنا يسامحني أنا و العصابة الصغننة

.

[nash]

ايه يا نورا...معقوله فولانه ماجابتلكيش الطورطه ؟.....دي أوم الكرم.....بس تلاقي سيتا الشغاله تعبتها قامت توريها شغلها مانتي ست العارفين بالشغالات وسنينهم........بس ماتنكريش الكابتشينو بتاعي حكايه..

أرجع يا عمري لذكرياتك......مش عارفه أقول أيه...ده حلم ولا علم...طب حد ييجي بقي ويقول ناش أحداث...مفهوم :sad: :wub: ؟؟

.............................................................................................................................................

فبابا وماما عملو جميع الاحتياطات الامنيه وشالو كل حاجه خطر<<<<<<<ليه هوة أنتم كنتم أشقيا؟؟

بدات اجيب انا واختي اي حاجه ورق وجرايد واقلام خشب ونولعها ونجري نرميها على الارض وندوس عليها بالشبشب طبعا السجاده اتلسعت منا والارض كلها لونت لون اصفر مطرح النار وكل شراشيب السجاجيد باظت بس ونمنا !!!!! بعد ما هلكنا وكنا قضينا على كل الاقلام الخشبيه والاوراق <<<<<<<<طب يعني كلفوا نفسكم شويه وشيلوا البهدله اللي عملتوها :D :D ...يعني كويس العلقه اللي كلتوها دي؟؟؟

فكانت اختي فوق التلاجه وانا بجري في الشقه اقول لبابا والله اخر مرة!!!!<<<<<<< هي أختك كانت بتعمل أيه فوق التلاجه يا نورا..... -_- قلبي بيقولي كانت مستخبيه...صح؟؟

بس الي مستغرباله ازاي ربنا سترها معانا ....<<<<<<< بيتهيألي ربنا سترها معاكم علشان بابكي ومامتك تلاقيهم كانوا بيقروا عليكم أذكار الصباح والمساء....

طيب شوفيلنا حاجه تانيه..ذكري صغنونه هنا ولا هنا..أصلي مستمتعه..بكم التشرد ده...إحساس الوحده تلاشي نهائيا....منتظراكي يا عمري

.............................................................................................................................................................................................

موديست.......

أيه اللي أنت بتقوله ده....؟؟ :wub: قمنا غطيناها بأغصان و ورق شجر كتير و عملنا دائرة حولها و فضلنا نتنطط و نلف حواليها على الطريقة اللي كنا فاكرين الهنود الحمر بيعملوها.<<<<<<<<< طب المسكينه كانت بتعمل أيه ساعتها..بتدعي ليكم طبعا.......طب أدفنوها وأكرموها.....علي الأقل أنا وولاد وبنات عمتي..دفنا الجثه.....

:D ;) :ninja: بس أنتم شكلكم ولعتم فيها...

طيب أكيد فيه حاجه تانيه برضه هنا ولا هنا...ماتسيبونيش هنا لوحدي ...ساندوني..خلي العالم تشوف شهامتنا

تم تعديل 22 نوفمبر 2006 بواسطة nash

[Folana]

السلام عليكم ورحمة الله...

ابنائى الاعزاء..ولو انى داخلة على عجل ...وحأخرج على عجل برضه بس بعد ما انفخه..علشان فيه عجلة نايمة ...قلت لازمن حتمن ولابد انى ادخل اقرأ الذكريات الجميلة ..

نورا..بارحب بك جدا بينا ...تصورى ...حاجة غريبة جدا..وانا باقرأ ذكرياتك ..كنت فاكرة انك ناش ..مش عارفة ايه وجه التشابه فى ذكرياتكم ..

ولما كتبتى انك كنت خوافة جدا...فضلت اضحك وكنت لسه حارد واقولك بقى كده تبقى خوافة يا ناش...

اتاريك نوا مش ناش ..بس ياربى مش عارفة ..نفس الخوف والطفولة البريئة برضه..... :D

وحشتنا يا خضر ووحشتنا ذكرياتك...وبمناسبة الربع جنيه ده ..فكرتنى بذكرى..مش حاقدر اقول عليها جميلة ...لكن حابقى اكتبها لكم بعد العودة ( سامعنى يا ابو زياد :ninja: )

موديست العزيز ..أخى بالتبنى...حد يعمل فى القطط كده؟..ماتعرفش ان دول نعمة؟..هه؟؟...وايه الجبروت ده...يعنى القطة ربنا كتب لها عمر جديد ..تيجوا انتوا بقى وتقضوا على كل ما هو جديد؟....

انت منور الموضوع والله..وياريت نسمع اسرار اكتر عن عصابة القناع الاسود بتاعتك دى..وياترى التجارب وقفتت لحد القطط بس ولا كملتوا...مش العلماء بيبدأوا التجارب على الحيوانات الاول وبعد كده يكملوا...

ياترى انتم كعصابة وصلتوا لحد فين....بجد كمل لنا ..انا باحب حكاوى الصبيان الا...الاشقياء دى جدا ..ياااى ...ياااى ..حاجة اوريجينال خالص ..يا موديست باشا...

انا عارفة رقصة الهنود الحمر دى..حتى كاتبة عنها فى فلانة هانم الخربوطلى ..الاخوة الزملاء المشرفين بقيادة...

سيللور( ربنا يجعل كلامنا خفيف عليه ويفضل نايم فى الجُب زى ماهو) كانوا بيرقصوها لما تم تعيننى وازرقيت بفضل قبضة سيللور المفترية....بلاش نجيب سيرته احسن بيقولوا جبنا سيرة القط ..جه ينط....اشتاتا اشتوت ..سامح يا اهل السماح

ححححىىىىىىىىىىىىىى....

ناش ..معلش يا جميلة سامحينى على التأخير..اصلى واقفة فى الطابور من الصبح مستنية اصرف التورتة ...

اصلى باجيبها من الفرن..البركة فيك بقى ...كملى بدالى لحد ما ارجع

صباحكم جميل . ;)