قناة المحاورات الفضائية

[Diab]

بدأ الأن البث التجريبي لقناة المحاورات.. ومع باكورة فقراتنا المنوعة

برنامج صــــــــــوت أم سيكا( الموسيقي يعني )

وليد صفوت ( المذيع): مساء الخير أصدقائي المشاهدين طبعا أنتة عارفين أني أكتر واحد بيحب المزيكا موووت موووت

وبيسموني( واوا بيتهوفين) طبعا حد حيسألني دلوقت يا واد يا واوا بيت هو فين؟

حقوله معرفش مكانه بس هو كان بيت قديم و جالوا قرار من الحي وشاله إزالة .

نبدأ بقي موضوع حلقتنا النهاردة وهو عن الفن الكلاسيكي المعاصر القديم ذو البعد البؤري في الأستبحس شلولخ طبعا حد حيسألني دلوقت يا واد يا واوا يعني أيه فن ؟ :)

حقوله معرفش بس هو معد البرنامج الزميل حشيش كتابها كده ده حتي خطةه وحش قووييييييييي و معانا ضيفنا في البرنامج العضو س س ... ( وليد صفوت يقلب في الورق الذي بيده ثم يستطرد قائلا ) ضيفنا س س بيشتغل.. أوس .. أوس .. أوستاذ في

معهد الكبدة .. جامعة الشرقية للدخان ( وليد صفوت في سره أيه اللي أنت كاتبه يا حشيش روح يا شيخ .. روح وتعالي بسرعة )

س س يصحح: أستاذ في معهد الكبد جامعة الزقازيق و غاوي مزيكا

وليد صفوت : وحضرتك بقي غاوي مزيكا أزاي . بتألف

س س : لأ

وليد صفوت : بتلحن

س س : لأ

وليد صفوت : بتغني بقي

س س : لأ

وليد صفوت : يبقي أكيد ناقد فني

س س :برضه لأ

وليد صفوت : امال بتعمل أيه ؟

س س : سميع أغاني قديم بس أيه آخر حلاوة بالصلاة ع النبي .. وساعات بغني في الحمام ساعة الإنسجام لما البدر يبقي تمام

و خصوصا لما بأستحمي حماية العيد الكبير

وليد صفوت متأفأفا : طب أسكت بقي أسكت :) .. ومعانا إتصال ألو ألو ألو مين معايا

أنا ياشو بكلمك من فرنسا

وليد صفوت يتهلل وجهه :) اهلا أهلا يا ياشو أزيك و ازاي أصحابي اللي عندك كلهم

ياشو: كلهم بخير وبيسلموا عليك.... و بيقولوك هم مش ناسين الساعة الرولكس اللي وعدوك بيها لو أخدت تأجيل من الجيش

وليد : يارب يا اختي يا رب ... يا ريت يا ياشو توطي صوت التليفزيون وتعلي صوت التليفون وتطفي ع اللبن اللي ع النار

ياشو : حاضر .. ممكن اسأل سؤال للأستاذ س س

س س : أتفضلي يا فندم

ياشو : ممكن اعرف مين هو يوهان سباستيان باخ ؟

س س : بتقولي مين يا ستو هانم ..باخ ( س س متعجبا :) في سره مين باخ ده يكونش عم باخ بتاع فيلم اللمبي .. لا لا ده أكيد دوا صراصير جديد ع العموم ح اتصرف )

شوفي يا ست ياشو هانم باخ ده رسام كبير زي محمود حفظي كده( مين محمود حفظي ده؟) عاش في القرن الخمستاشر

و له لوحات كتيرة زي غادة الكاميليا و عايدة حلاوتهم ومات بعد ما أتفطم بخمس سنين و 480 شهر و...

وليد صفوت( مقاطعا ): أيه الكلام الفارغ اللي بتقوله ده .. باخ ده مؤلف موسيقي وعازف أورغن ألماني، يعتبر أحد أكبر عباقرة الموسيقى الكلاسيكية في التاريخ الغربي. إتولد سنة 1685 ومات 1750 وعمال تقولي اوستاذ .. أوستاذ

أنا عرفت ليه حشيش كتب أنك في معهد الكبدة ... شكلك كده لا أوستاذ ولا حاجة وعمالة تشتغلنا من الصبح

انت مين ياه .................عرفتك أنت لا س س ولا حاجة :D

أنت

أنت

أنت رابسوووووووووووووووووووووووووووووووووووووووووووووو

هاهاهاهاه

نلتقي بعد الفاصل

تم تعديل 30 يوليو 2006 بواسطة Diab

[Diab]

برنامج الطب البديل ( أبو من غير ديل )

معكم مقدمة البرنامج الدكتورة شانا الشهيرة ببنت شعنونة

بنت شعنونة ( تعدل نظارتها الطبية ام 500 جنيه من عند مغربي) :) وتقول : أعزائي المشاهدين مرحبا بكم في أول حلقة من حلقات البرنامج

عشان تبقوا علي مية بيضة ( بس مش علي عنيكم لا سمح الله ) أنا ما بخدش أقل من 100 جنيه فيزيتا و عنوان العيادة

حينزل دلوقت ع الشاشة

( عيادة الدكتورة شانا : 1150 حارة حلال عليك - الباطنية ) المواعيد من 7 صباحا إلي آخر زبون

الدكتورة شانا : و دلوقت بعد ما عرفتوا عنوان العيادة ندخل بقي علي البرنامج : موضوع حلقة النهارة عن السمنة

أيوووووووووووة السمنة لأ لأ مش سمنة النخلتين لأ السمنة يعني التخن يعني الفشولة و كدة يعني

ناس كتير بتسأل أعمل أيه أقولهم بسيطة : متاكولش أي حاجة لمدة 10 أيام واحد تاني غلس حيقول طب مانا كدة حموت أقوله طب ماتموت يا أخي يعني حتموت ناقص عمر ده أنت حتي قلتك أحسن علي الأقل البلد حتخف و مش حتبقي زحمة

جاتكووووووووووو القرف مليتوووووو البلد

أففففففففففف بقي

يلا الحلقة الجاية حتكون عن ( لا يا خفيف يا أبو دم ظريف مش عن الزبدة ... دمك سم ) الحلقة حتكون عن أمراض الشيخوخة

مش عرفتوا عنوان العيادة أمال كنتوا فاكرين يعني حقدملكوا نصايح طبية أمال فاتحة العيادة ليه

يلااااااااااااا بااااااااااااااااااااااي

نلتقي بعد الفاصل

تم تعديل 30 يوليو 2006 بواسطة Diab

[Diab]

الفشرة ( النشرة ) الجوية

المذيعان : مومو الأمور و القبطان( hopsan)

القبطان: صباح الخير أعزائي المشاهدين أهلا وسهلا بيكم في الفشرة الجوية

طقس اليوم مائل للحرارة لليلا شديد البرودة نهارا و تتكاثف السحب المنخفضة والمتوسطة والعليا علي كافة أنحاء الجمهورية و أحتمال كبير تمطر :lol: و يتواجد شبورة كثيرة خصوصا علي الطرق الصحراوية و الزراعية و تنعدم الرؤية

وننصح سائقوا المركبات بتوخي الحذر عشان متلبس في اللي قدامك وسمعني سلام ( سووووووووق علي مهلك سوووووووووق . بكرة الدنيا ترررروق).. أحم أحم

مومو الأمور : إليكم بيان بدرجات الحرارة للعواصم المدن العربية والعالمية العظمي و الصغري

عابدين : 17 ، 30

أبو أتاتة : 2 ، 1

أول فيصل . -80 ، 100 % :lol:

لمعرفة درجات الحرارة أول بأول إشترك بخدمة ( المحاورات موبايل )

نلتفي بعد الفاصل

[نورية]

حلوة الحكاية دى... قال ايه النهار برررررررررررد و الليل موللللللللللللللع mfb:

دة انت بوظت النشرة الجوية خاااااااااااااااااااالص :sad:

متهيألى هوبسن و مومو راح دى تكون اول و اخر نشرة جوية ليهم يا دياااااااااااااااااااااااااب :D :lol: :D

[اسود وتعالب وارنب]

طب مافيش برامج ترفيهيه في القناه دي اوافلام كوميدية والنبي عازين فيديو كليب

[بنت شعنونة]

يالهو بالي؟ mfb:

دا ...... انا؟؟؟؟؟؟ :lol:

و بنظارة كمان؟؟؟؟!!!

ومن عند مغربي؟؟

اقفلوا الشاشا علية :sad:

[Diab]

بناء علي رغبات المشاهدين تم وضع هذا البرنامج في الدورة الصيفية للقناة

بــــــــــــرنامج هب و شب ده فيديو كليب

المذيعة : كليو

كليو : hi all how are you أزيكم يا يا مشاهدين معاكم أنا معاكم في أول حلقات البرنامج اللي مدته ساعة ونص منهم ساعة إعلانات ومعانا دلوقت أول فيديو كليب بس الأول ناخد إتصال ألو

- ألو

- مين معايا

-أنا مصرية يعني مصرية

- بتكلمينا منين يا أخت مصرية

- من المغرب

- أهلا وسهلا بيكي بتحبي تسمعي مين المطربين

- أحب أسمع تامر دياب و عمرو حسني :sad:

- قصدك عمرو دياب و تامر حسني

- بالظبط يا سلااااااااام عليك يا عمرو يا دياب و أنت بتغني الواد قلبه بيوجعة وعايز حد يدلعة

- ده مش عمرو ده بهاء حسني واااااضح أنك لخبطتي الدنيا خالص .. تحبي تهدي الأغنية اللي حنذيعها دلوقت لمين

- أحب أهديها لكل لأعضاء المنتدي ماما سلوي و جدو الأفوكاتو و سكوربيون و kane و النوبي و لولاتي بمناسبة عيد ميلادها و المدهش وتيتا شهد و نورية و .....و....و..........و.........

- خلاص كفاية الحلقة حتخلص و معايا إتصال آخر ألو

-ألو

- مين معايا

- انا خضر khedr

- بتتكلم منين يا أخ خضر

- بتكلم من إمبابة وبحـــــــ ............... تيت تيت تيييييييييييييييت

- واضح ان الخط قطع ليه مش عارفه mfb:

ودلوقت مع الفيديو كليب

المطرب النسر المصري

أغنية: حتــــــــــــــــــــــــــجوز

النهاردة فرحي يا جدعان

عايزة كله يبقي تمام

حيبقي عندي أولاد و مدام

بعد ده ما كان في الأحلام :lol:

و إيييييييييييييييييييييييييييييييييه

فاصــــــــــــــــــــــــــــل و نـــــــــــــــعــــــــــــــــــــــود

تم تعديل 1 أغسطس 2006 بواسطة Diab

[وليد صفوت]

حلو اوى يا دياب :lol: mfb: :D

كمل يا راجل انت كنت فين من زمان انا بقالى كتييييييييير ما ضحكتش :sad:

[KANE]

طيب يا عم دياب :lol:

ماعندكش برنامج المصارعة وتخلي أخوك كين يقدمه

على الأقل هكون احسن من ممدوح بوم . آآاسف ممدوح فرج

أو برنامج سياسي حواري إخباري ~ بس أوعى تدخلنى المعتقل :sad:

[Diab]

إعـــــــــــــــــلانـــــــــــــــــــــات

[المدهش]

دمك زي السكر يا دياب..وموهبتك واضحة في الكتابة الكوميدية..وبصراحة حلوة أوي فكرة قناة المحاورات دي ويا ريت تشوف لي شغلانة فيها..ولو حتى اعمل الخطوط اللي بالطول اللي بتيجي بعد الارسال ما ينتهي ..أو حتى اعمل وشششششششششششششش

[Diab]

متشكر جدا يا جماعة :)

بعض ما عندكم

صالح كامل بتاع art هاريني تليفونات و إيميلات عشان يشتري القناة و أنا مش راضي :rolleyes:

تصدقوا عارض عليا 12 جنيه ونص وصندوق حاجة ساقعة . و أنا مش موافق

أوافق .... ودي تجيي ده أنتو عندي أغلي من 12 جنيه ونص وصندوق الحاجة الساقعة

خلاااااااص يا صالح يا كااااامل مش حبيع مش حبيععععععععع خلااااااااص حل عني بقي خليني أشوف شغلي

قريبا برنامج

فتاوي القهاوي تقديم مسيو زوهيريmzohiry

[رمضان]

معاكم المقدم رمضان

اقدم لكم فقرةالمرور

بالنسبة لسائقي التاكسي يوجد في طريق مصر اسكندرية الصحراوي كمين خدوا بالكم

وفيه رادار عند الكيلو 52 امشي براحتك ولما تقرب من الرادار هدي شوية وبعدين كمل اهم شيء ما يلقطك الرادار

[nancy]

حلو اوى يا دياب

بس اديلك شوية عناوين

اعمل برنامج عن اخبار الجرايد وخلى مدهش يقدمة

وبرنامج عن المطبخ

وبرنامج عن تربية الاطفال

وواحد عن المرأه وايدية لعاليا

وانا حاعملك على ديكورات الاستوديوا

وبرنامج رياضى

وواحد ثقافى

بس عموما اسلوبك حلو اوى

وكلة حياة ومرح

كمل يا دياب

ومتنساش المراسلين من كل بلد

[محمود الشاعر]

غريبة

الكل بيشكر دياب على مجهوده فى عمل قناة المحاورات

ونسين دوري اللي هو اهم دور

انا بذلت مجهود خرافى علشان القناة دي

ما هو انا اللي باجي بعد نهاية الارسال اقول

وووششششششششششششششششششششششششششششششششششششششششششششششششششششششششششششششششششششش

[مصرية يعني مصرية]

إيه ده ؟؟؟ :rolleyes:

والله المحاورات الأيام دي كانت ناقصها خفة الدم العسل بتاعتك دي

والله ضحكتني بجد ...كنت فيييييييييييييييين من زمان

يلا كمل انا مش هغير القناة

بس لو احتجت مراسلين من المغرب

أو مغنيات أو كوافير و ماكياج للمذيعات

أنا في الخدمة

[عليـ***ـاء]

ههههههههههههههههههه

موضوع زي العسل بجد

انا مش هغير القناة

ولا هفتح عنيا ...............

انا مستنية بقيت البرامج

[Diab]

المدهش

ويا ريت تشوف لي شغلانة فيها..ولو حتى اعمل الخطوط اللي بالطول اللي بتيجي بعد الارسال ما ينتهي ..أو حتى اعمل وشششششششششششششش

محمود الشاعر

ما هو انا اللي باجي بعد نهاية الارسال اقول

وووششششششششششششششششششششششششششششششششششششششششششششششششششششششششششششششششششششش

بناء علي طلب الجماهير الغفيرة ( مرات الغفير )

تم تعيين المدهش و محمود الشاعر في وظيفة وشششششششششششششششششششششششششششششششش

خبر عاجل : أصابة 60 واحد في حوادث مرورية بعد الأستماع للفقرة المرورية للمقدم رمضان

واضح أن المقدم رمضان كان مقدم علي سلفة في بنك ناصر :D

ــــــــــــــــــــــــــــــــــــــــــــــــــــــــــــــــــــــــــــــ

برنامج

فـــــــــــتـــــــــــاوي القــــــــــهـــــــــــاوي

المذيع مسيو زوهيري : السلام عليكم أهل المحاورات .. أهل ال games و الشات نقدم اليوم حلقة جديدة من البرنامح ومعنا أول رسالة

رسالة من الأخ ( س ح م ) من الغريبة يقول فيها ( ينظر مسيو زوهيري إلي الكاميرا متعجبا :sad: ما معني س ح م ثم يقدح زناد فكره آه يكونش أسمك سكك حديد مصر أم أنا واد فتك بشكل ;) أجيبها و هي طايرة حتي لو عندها أنفلونزا الطيور)

يسأل الأخ س ح م في رسالته : هل دم الباعوض علي و جدته علي الثياب ينقض الوضوء ؟ ونقول له يا أخ س ح م هناك فرق لو كان باعوض فلا ينقض الوضوء أما لو كانت بااااااعوضة فهذا ينقضه و السبب أنك لمست أجنبية لا تحل لك بالأضافة أنك قد جرحت مشاعرها فنزفت هذا الدم الذي علي الثياب و كفارة ذلك أن تصوم شهرين متتابعين و تجلد 2000 جلدة

ياريت بقي يا أخ س ح م تشوفلي تذكرتين علي ديزل إسكندرية الساعة 5 بالليل الجمعة الجاي بس تانية مكيف لو سمحت

نـــــــــلتقـــــي بعد الفــــــــــــاصـــــــــــــــــــل

إعــــــــــلانــــــــــــــــــــــات

شركة نميمة رائدة التسوق عبر شاشة التليفزيون تقدم لكم

التليفون الإسلامي : هذا التليفون له خصائص مذهلة

التليفون الأسلامي مزود بخاصية الرنين لما حد يتصل بيك ده غير أن فيه زراير وسماعة عشان تتكلم منها

التليفون الأسلامي مش حتصدقوا لما تتصلو منه ترد عليكو نفس النمرة اللي طلبتوها

التليفون الأسلامي فيه redial

التليفون الأسلامي مزود بخاصية الأذان وممكن كمان يروح يصلي في الجامع عنك وكمان يصوم أتنين وخميس عنك برضه

عرض خاص جد : أشتري 10 تليفونات تاخد علي قفاك هدية مجانية

أتــــــــــــــــــصــــــــــــــــــــــل الأن علي خمسة أصفار صفر صفرين :P

قريبا التليــــــــــفــــــــــــــــون المسيــــــحــــــــي ( يلا ماهي تجارة بقي)

فـــــــــــــــــــــــــــــــــــــــــــــــاصـــــــــــــــــــــــــــــــــــل و نـــــــــــــــــــــــعــــــــــــــــــــــــــــــود

تم تعديل 2 أغسطس 2006 بواسطة Diab

[Diab]

kane

الفقرة الرياضية محجوزالك بس أجهزها

مصرية يعني مصرية

هو بصراحة القناة محتاجة مراسلين بس مش في المغرب

أحنا محتاجين في بوركينا فاسو و سنغافورة و تشيلي لأن دي هي النقط الساخنة وبؤر الأحداث في العالم كله

المرتب 5 جنيه في الشهر ده غير البدلات و الأوفر تايم

50 قرش بدل سكن

25 قرش بدل إنتقال ، 40 قرش بدل طعام

و 10 صاغ بدل ... بدل بدل ما حد تاني ياخدهم

أيه رأيك أجيب العقد

علياء

شكرا جدا أهم حاجة أن الواحد قدر يرسم بسمة علي وجوهكم دي تساوي كتير

نانسي

شكرااااااااااااا دايما كده بتعلي من روحنا المعنوية

أنت تحبي إشتغلي أيه ( وش ماري منيب في مسرحية إلا خمسة )

تم تعديل 2 أغسطس 2006 بواسطة Diab

[الاسكندرنى]

السلام عليكم

انتى يابنى فينك من زمان روح يا شيخ و تعالى تانى

المهم زهيرى مش حيسيبك ده حيولع فيك انا بهدى النفوس مون شيرى

واللى حبنا حبناه و صار متعنا متعه و اللى كرهنا كرهناه و يحرم علينا اجتمعه فاهم ولا ايه

عاوز برنامج على دور البلطحى فى الشارع المصرى

ماشى ولا ايه :P