الغنوة دي بتفكرك بايه؟!

[المدهش]

الأغاني كالشخوص والأماكن قد تثير في النفس الشجون والذكريات..

وهناك مواقف ومراحل في الحياة مرتبطة في داخل النفس والذاكرة ببعض الأغاني..واليكم أغاني في حياتي..

حلاوة شمسنا..

هذه الأغنية للثلاثي المرح لا تزال تعلق في ذاكرتي وترن في أذني كلما لاح الصباح وتذكرت أيام المدرسة وسندوتشات أمي التي كنت أتركها في شنطة المدرسة وأفضل عليها الرمرمة من الكانتين أو المقصف كما كانوا يسمونه..

أغاني فوزي..

محمد فوزي تلك العبقرية الموسيقية النادرة التي لم تكتشف كل أبعادها بعد..أغانيه السابقة لعصره تثير في نفسي الاحساس بالجمال والربيع..الزهور زي الستات لكل لون معنى ومغزى..والفرح.يا ولاد بلدنا يوم الخميس هاكتب كتابي وابقى عريس..وببنت الجيران..بعد بيتنا ببيت كمان حلو ساكن من زمان بابتسم له لما اشوفه يجري يهرب من كسوفه لا حد يعرف من الجيران ..بعد بيتنا ببيت كمان..محمد فوزي أغانيه تشيع في الكون التفاؤل..

أغاني منير..

طبعا منير يعني بالنسبة لجيلي كله مرحلة الجامعة وخصوصا البوماته الاولى شباببيك وشجر الليمون ..كنت أقلد صوته الى درجة التطابق وأغني أغنياته في الرحلات وحفلات الأصدقاء ومع فرقة شبابية في الاسكندرية..واغنية الليلة يا سمرة بالذات ترتبط عندي بأول بنت أحببتها في الجامعة..أما يا بنت يا ام مريلة كحلي فكلما سمعتها تذكرت بنات ثانوي اللاتي كنا ننتظرهن ونعاكسهن ونحن في طريقنا للمدرسة أو في طريق العودة منها الى البيت.

فيروز..

لم أكن أستمع اليها الا بالصدفة حتى بدأت حياتي العملية بالسكن في شقة مفروشة بالقاهرة بعد أن تركت بلدتي الصغيرة للعمل بالصحافة ، وكان يقيم معي في نفس الشقة ثلاثة من عشاق فيروز ..كانوا يأكلون ويشربون وينامون على أغاني فيروز ..وكانت فرصة لأعيش مع هذا الصوت الملائكي ليل نهار..ومن أيامها وقعت في غرام فيروز..وأصبحت كلما سمعتها الآن تذكرت أيام الكفاح الأولى لأفسح لنفسي مكاناً في القاهرة..

[nancy]

حلو اوى الموضوع دة يا مدهش

انت بتخلينى افضفض كتير اوى الايام دى :rolleyes:

انا كل الطفوله لحد ثانوى عبد الحليم وطبعا كل الافلام العربى ةاغنيها بلا استثناء

فى ثانوى بافتكر

شريط وهمى كدة كان عاملة مودى وحسين الامام كان فية الجو فى قبلى جميل شكرا يارب

وشريط تانى كان فية ولد وبنت كل الجنينةولد وبنت

الى شدينى ليهم انهم مش العادى الى كنا بنسمعة

الكلية طبعا كلها محمد منير ونفس الاغانى الى قلت عليها شبابيك وشجر الليمون

والموشحات القديمة اكتشفتها فى الكلية زى يا غصن نقى مكللا بالذهبى وحاجت من نفس النوع

كنت دخلت الكورال فى الكلية اغنى واسمع الموشحات حفظتهم ومكملتش لانى محبش الظهور على المسرح

واكتشفت فى سنة تالتة الموسيقى الكلاسيك والرومانتيك والاوبرا

وحبتها اوى

وطبعا اسكندرية يعنى كتير اوى من فيروز

بعد كدة المشاكل والكعبلة كانت مع على الحجار متغربيناش وتقولى قدر

وافتكر وانا ويايا بعيش زى المليونيرات واحلم وانا معيش

دى بتفكرنى بيوم عيد ميلادى وانا مع صحبتى الانتيم وبنلف على البحر بعربيتها وانا كلى حزن ان محدش افتكر عيد ملادى فى الشتا والمطر دة غيرها وكانت مشغلة الاغنية دى

وبعدين اول ماتجوزت وجيت السعودية بافتكرها بوردة مليت من الغربة مع ان كان بقالى اسبوع

بس افتكر وانا معليها على الاخر لدرجة ان كل الكومباوند كان سمعها وجوزى جاى من برة جرى لانه سمعا من بعيد ومش فاهم حاجة

غير كدة كل صيف عندى له اغانى بس بقت بتلفت نظرى الكلمة اوى وان اللحن ميكونش بيتكرر

يعنى الصيف دة ماجدة الرومى اخر شريط لها اكتر من رائع

[mohameddessouki]

طبعا كل الاغانى التى تمر على الانسان فى فترات الطفولة والصبا والشباب حتى قبل الزواج لاتنمحى من الذاكرة وترتبط كل منها بمناسبة

معك حق يا استاذ مدهش

يصباح الخير ياللى معانا لام كلثوم كل صباح من الرايو هى وحديث الشيخ شلتوت بصوته الاجش

يا دنيا ياغرامى لعبد الوهاب كنت اسمعها وانا طفل يادنيا يا خرابى واضحك كثيرا من نفسى عندما اسمعها الان

يا جمال يا مثال الوطنية اجمل اعيادنا المصرية بنجاتك يوم المنشية... لام كلثوم عندما ضرب عبد الناصر بالرصاص فى ميدان المنشية بالاسكندرية

حرب فلسطين ..... اخى جاوز الظالمون المدى لعبد الوهاب وكانت مصر مظلمة بسبب حرب فلسطين واصوات صفارات الانذار والامان تملاء الجو فى القاهرة وكذلك اغنية يا مجاهد فى سبيل الله جه اليوم اللى بتتمناه طول ياعرب ما معانا سيوف الدنيا ياما بكرة تشوف فن الحرب احنا بدعناه يا مجاهد فى سبيل الله

عاشت مصر حرة والسودان دامت ارض وادى النيل امان اعملوا تنولوا واهتفوا وقولوا السودان لمصر ومصر للسودان لمحمد عبد الوهاب وكانت اول كليب فى العالم وكانت تذاع فى كل سنبمات مصر اذ لم يكن التليفزيون دخل مصر بعد

عدوان 1956........ تحت علمنا الحر الاخضر راح تمشى الملايين وتدك جيوش المستعمر داحنا المصريين لمحمد عبد المطلب ترجعنى لعدوان 1956

انى ملكت فى يدى زمامى فانتصر النور على الظلام وهتفت حمامة السلام انى ملكت فى يدى زمامى لعبد الحليم حافظ

دع سمائى فسمائى محرقة دع قناتى فقناتى مغرقة لفايدة كامل

صافينى مرة وجافينى مرة.... فوق الشوق مشانى زمانى لعبد الحيم حافظ اول التفاتة لاذنى على صوت جديد وغناء جديد والقاء جديد

وحدة مصر وسوريا .... وحدة مايغلبها غلاب لمحمد قنديل من الموسكى لسوق الحامدية انا عارفة السكة لوحدية لصباح

انت عمرى لعبد الوهاب وام كلثوم .. وكانت كل العرب تنتظر هذا الحدث واذكر انه حتى قبل رفع الستار وانا اخشى ان يحدث لام كلثوم مكروه ولا نسمع تعاون هؤلاء العملاقين والذى سمى لقاء السحاب

اصبح عندى الان بندقية لام كلثوم وكيف كان العرب عندهم امل كبير بميلاد منظمة فتح

صورة صورة .... قلنا حنبنى وادى احنا بنينا السد العالى لعبد الحليم حيث كانت رؤوس المصريين والعرب فى عنان السماء

خلى بالك من زوزو ...... يعاد حسنى وصلاح جاهين بعد النكسة انتكست الافكار الى المسخرة بعد الوقار والعزة

بليغ حمدى ووردة والابنودى فى حرب 1973 شىء لاينسى

قلوا له قلو له الحقيقة ابو عيون جريئة لعبد الحليم كانت قمة المراهقة وحب بنت الجيران ذات العيون الجميله فانا اعشق فى المرأة عيناها فهما نافذة على ما بداخل المرأة

لاء مش انا اللى ابكى ولا انا اللى اشكى عبد الوهاب غندما طلق زوجتة اقبال نصار وفى لحنها وكلماتها اباء الرجل وعزة نفسه وكان الجديد فيها تلحين لفظة لا لا لا

هو صحيح الهوى غلاب ختام المسك من زكريا احمد ولبرم التونسى وام كلثوم روعة

بعيد عنك حياتى عذاب متبعدنيش بعيد عنك ام كلثوم وبليغ حمدى ان هذه الاغنية تغشانى بالشجن ولا تخلو منها سيارتى او مكتبى او منزلى او فى حالة السفر

بس لما تيجى وانا احكيلك عللى جرى عليا وحلمى بكر جمال اللحن وصوت متفرد بحالة الحزن فى صوت المرأة

كل فايزة احمد ، اغانى نجاة القديمة ، فيروز ، نصرى شمس الدين ، انغام هذه الاصوات تشدنى وتهزنى بعمق

شادية كلها واطوف فى عالم تانى وانا استمع الى رائعتها اتعودت عليك يا حبيبى اتعودت عليك

اما اغانى هذه الايام فلم تترك اى علامة فى ذاكرتى سوى اعنية " اغزل لك خيوط الشمس واعملك منها شال لاحمد الحجار

[wa7d]

اغنية يا مجاهد فى سبيل الله جه اليوم اللى بتتمناه طول ياعرب ما معانا سيوف الدنيا ياما بكرة تشوف فن الحرب احنا بدعناه يا مجاهد فى سبيل الله

أستاذ mohameddessouki حلوه جدا ، وهى مطبوعة فى قلبى ، بس تصليح بسيط لزوم المنظرة

" يا مجاهد فى سبيل الله جا اليوم إللى بنتمناه ، طول يا عرب ما معانا سيوف .. الدنيا ياما بكره تشوف ، إحنا عرب أصلنا معروف .. فن الحرب إحنا بدعناه ، يا مجاهد فى سبيل الله "

واالحن بتاعها جيد جدا ، وأظن المغنية هى سعاد محمد ، عموما صوت المغنية قوى جدا . ياريت إذا كان حد عنده هذه الأغنية يضعها وله الشكر .

[wa7d]

من الأغانى الوطنية العظيمة

الله أكبر فوق كيد المعتدى

[mohameddessouki]

اغنية يا مجاهد فى سبيل الله جه اليوم اللى بتتمناه طول ياعرب ما معانا سيوف الدنيا ياما بكرة تشوف فن الحرب احنا بدعناه يا مجاهد فى سبيل الله

أستاذ mohameddessouki حلوه جدا ، وهى مطبوعة فى قلبى ، بس تصليح بسيط لزوم المنظرة

" يا مجاهد فى سبيل الله جا اليوم إللى بنتمناه ، طول يا عرب ما معانا سيوف .. الدنيا ياما بكره تشوف ، إحنا عرب أصلنا معروف .. فن الحرب إحنا بدعناه ، يا مجاهد فى سبيل الله "

واالحن بتاعها جيد جدا ، وأظن المغنية هى سعاد محمد ، عموما صوت المغنية قوى جدا . ياريت إذا كان حد عنده هذه الأغنية يضعها وله الشكر .

اخى الكريم

انا اشكرك على التعديل ، وانا صدقنى خدت بالى بعد ما ارسلت الرسالة وانشغلت عن التصحيح . وانا بكون سعيد لما اشعر ان الطرف الاخر بيقرأ جيدا فهذا يدل على العناية بالكلام وان المحاورات متعملتش للدش ولكن للحوار والخروج بشىء مفيد

شكرا

[mohameddessouki]

من الأغانى الوطنية العظيمة

الله أكبر فوق كيد المعتدى

معك حق وكمان من الاغانى " ياسايق الغليون عدى القنال عدى وقبل ماتعدى خد مننا وادى لمحمد عبد المطلب"

واغنية ام كلثوم " سقط القناع عن الوجوة الغادرة... انا فدائيون... انا مصريون " واغنية عبد الحليم " ياحبايب بالسلامة رحتم ورجعتولنا بالف سلامة " واعنية " وطنى حبيبى الوطن الاكبر "

اما الاعانى غير الوطنية تعنية ليلى مراد " يارايحين للنبى الغالى " واعنية محمد قنديل يارايحين الغورية"

ومحمد قنديل من اعظم الاصوات المصرية فى هذا العصر بعد صوت محمد عبد الوهاب واذكر ان اغنيتة " سماح " كان يغنيها وكان يقف خارج الاستوديو الملحن محمود الشريف والمؤلف وبعد التسجيل خرج محمد قنديل فوجد محمود الشريف يبكى تأثرا من الاداء

وهناك اعنية كان لها دور كبير فى نقد العادات المصرية السيئة فى رمضان وهى الاسراف فى مائدة الافطار ثم مجرد ان يشرب الصائم كوب ماء او عصير ويتناول لقيمات حتى يشبع ويترك المائدة كما هى وفى اليوم التالى نفس الشىء وهذه الاغنية لصباح " الراجل ده حايجننى " وهناك اغية تهز كيان اى انسان وهى " ست الحبايب يا حبيبة " سواء بصوت فايزة احمد او بصوت عبد الوهاب

وكمان مجموعة " لاتكذبى " و" ايظن " و " ساكن قصادى وبحبه " لنجاة الصغيرة واغنية رسالة من امرأة مجهولة لفايزة احمد وهذه الاغانى تحكى قصة لها بداية ووسط ونهاية ومليئة بالخيال وكذلك اعنية التليفون لشادية واغنية حبيبى الغالى لعبد الحليم حافظ

تم تعديل 4 يوليو 2006 بواسطة mohameddessouki

[بنت شعنونة]

انا بقى مش زيكم خالص

وما جربتش الأغاني اللي بتقولوا عليها دي ويمكن ما سمعتهاش كمان....

الطفولة شريط ل فرقة اجنبي اسمها بوني ام والدي كان يعشقها و اغنية brown girl in the wind chala la lalla

:blink:

بحبها اوي لحد دلوقتي

ومرة والدي اشترى شريط اغاني وطنية لعبد الحليم واكنت غنوة احلف بساماها و ب ترابها اكتر واحدا علقت معايا لفترة طويلة

الاعياد غنوة سعودي ومن العاااااااااااايدين ومن الفايزين انشاالله

كنت بكرهها اوي :angry:

وخلتني اكره الاعياد..ومازلت :happy:

الكلية شريط ل حميد الشاعري مش فاكرة ولا غنوة منه دلوقتي بس كنت مقرراه على اي واحدا تركب معايا ايام الأمتحانات

كنا بنتفائل بيه جدا :huh:

الباقي كله اغاني اجنبي...

وعلى نص الكلية كدا تحولت الى الفن الشعبي وابتدى يعجبني جدا

وماسبتش منه غنوة الا وسمعتها

ما خلتشششششششششش :)

[otaka]

انا الاغنيه اللى دايما بسمعها فدائى للعندليب و انا يوسف يا ابى للرائع مارسيل خليفه

طبعا كل اغانى الشيخ امام خصوصا كلمتين لمصر و عبد الودوود و سليمان خاطر

و من اقرب الاغانى لقلبى اغنيه وقفونى عالحدود اللى غناها اكتر من مغنيه و مغنى

[se_ Elsyed]

نانسي

دى بتفكرنى بيوم عيد ميلادى وانا مع صحبتى الانتيم وبنلف على البحر بعربيتها وانا كلى حزن

إنتي أساساً كنتي حزينة وبتعيطي عشان صاحبتك الأنتيخ عندها عربيه وإنتي لأ ..بطلوا حقد طبقي بقى :blink:

ا

لاعياد غنوة سعودي ومن العاااااااااااايدين ومن الفايزين انشاالله

حرام حرام

لازم تفكريني يعني .. مانا بأكره اللي جابوها كمان

---

أنا بقى في أغنية اول ما بأسمعاه بيجيلي مغص قلوي مع رعشه في جميع الاطراف وبأحس إن الدنيا برد حتى لو كنا في شهر أيلول - الأسود

" الناجح يرفع إيده .. هيييه .. ويغني في عيد مواعيده ..برضوا هيه "

بتفكرني بنتيجة الإمتحانات .. وخصوصاً إمتحانات الثانوية العامية

-----

يا صباح الخير ياللي معانا

وماشي في نور الله ماشي .. بأدعي واقول يارب

مرتبطة عندي بالصحيان بدري وأنا عنيه معمصه وبأبقى لازق في السرير في عز الشتا لكن ماما واقفه فوق دماغي وعمال تاكل في وداني عشان أقوم أروح المنسة - المدرسة على رأي عمر سين سين -

-----

أغداً القاك .. الهادي أدم وأم كلثوم

لما كنت خاطب وهاموت وأنزل أجازة عشان أشوف خطبتي وأخد حقنتين حنان

طبعاً جبت نفس السي دي وسجلت عليه قصيدة " أنا من ضيع في الأوهام عمره "

ده بعد الجواز :huh:

فرصة إن المدام في أجازة وما بتدخلش النت والواحد يرحرح وياخد راحته

[mohameddessouki]

خايف اقول اللى فى قلبى لعبد الوهاب بتفكرتى بامرأة عجوز فى العيلة وهى تتنهد عنما تسمع هذه الاغنية التى تذكرها بايام ان تقدم لها عريس ـ واصبح زوجها فيما بعد

امانة ماتفكرتى يابكرة ، والله لسة بدرى ياشهر الصيام لشريفة فاضل وعدت يا يوم مولدى والورد لون الجراح وعذاب يادنيا العذاب وعنيا بتضحك وقلبى بيبكى لفريد الاطرش تجعلنى اشعر بان الدنيا اسودت واكاد اخرج فى الشرفة واشق هدومى واصوت واقول يادهوتى ياخرابى . ماجعل الفن لسواد ليل الانسان ولكن لخلق حالة من الجمال الية

وهناك اغان تنقلك الىحالة من النشوة وتحلق فى سماء الطرب والفرح منها " راجعين يا هوى راجعين يازهرة البساتين وها السيارة مشر راح تمشى بدا حدا يدفشها دفشة لفيروز يا مارق على الطواحين والمية مقطوعة لنصرى شمس الدين وقدرت تهجر ياقلبك يا مانت واحشنى لفايزة احمد وبكرة حترجع ياحبيبى وساعتها حا سمحك يا حبيبى لانغام امانة عليك ياليل طول وهات الماضى من الاول لكارم محمود البيض الامارة والسمر العذارى لعبد الغنى السيد قالوا البياض احلى ولا السمار احلى لسعاد مكاوى خذوا عيونى شوفوا بيها للطفى بوشناق يا مال الشام والله يامالى لصباح فخرى

وهناك اغانى تنقلق الى عبق قاهرة المعز وخان الخليلى وبين القصرين وغراميان العشر الاوائل من القرن التاسع عشر " اوعى تكلمنى بابا جاى ورايا " فيك عشرة كوتشينة فى البلكونة لمحمد عبد الوهاب ارخى الستارة اللى فى ريحنا لحسن جيرانك تجرحنا " يامانت واحشنى وروحى فيك لمحمد عثمان " آه انا عشقت " يناس انا مت فى حبى وجم الملايكة يحاسبونى حدش كده شاف لسيد درويش

وهناك اغان تذكرك بايام الصبا عندما تلاقى محبوبتك ( بنت الجيران ) وترى السعادة فى عينيها وانت تمسك يدها وتسير بها فى الشوارع الهادئة وعلى كورنيش النيل الدنيا ربيع والجو بديع لسعاد حسنى ومكسوفة مكسوفة منك لشادية

وهناك اغان تهزك من الاعماق وتذكرك بانك لست فى الوجود سائب (من السائبة ) ولا هايم ولكنك مشدود بالخالق وان لك اله ولك رسول ولك كتاب " لجل النبى تكرم عبيدك والنبى لمحمد الكحلاوى الهى لفايدة كامل يارب كرمك علينا للنقشبندى

وهناك اغان تنقلك الى الفرح بالايام القادمة ياليلة العيد انستينا ، نصرة قوية وفرحة هنية والف سلامة لام كلثوم رمضان جانا لمحمد عبد المطلب العيد فرحة لصفاء ابو السعود اهو جه ياولاد للثلاثى المرح

وهناك اغانى تؤنسك فى ليل سفرك او ليل عملك وهى كل اغانى ام كلثوم هجرتك ، انا لن اعود اليك ، جددت حبك ليه، بعيد عنك ، هذه ليلتى،الاطلال ، هو صحيح ، انت عمرى، انت الحب، سيرة الحب..........الخ

تم تعديل 5 يوليو 2006 بواسطة mohameddessouki